ခရေတ်ဝၚ်ယဝ်ဟာန် ၆
ခရေတ်ဝၚ်ယဝ်ဟာန် ၆
[ပလေဝ်ဒါန် | ပလေဝ်ဒါန် တမ်ကၞက်]၁ကြဴဂှ် ယေသှုဝွံ ခၠိုၚ်တိၜေရိ မတွံဂးခၠိုၚ်ဂါလိလဲဂှ် ကၠောံအာရ။ ၂နိမိတ်လက်သန်တဳလပိုန်မထၜးပ္ဍဲမၞိဟ်ယဲရောဂါမသၞေန်စပ်တံဂှ် မၞိဟ်မကောံဒရီုအိုတ်သီုတံဝွံ ညာတ်အိုတ်တုဲ ဗက်လက်ကရဴတဳလပိုန်အိုတ်ရ။ ၃ယေသှုဝွံ က္ညတိုန်ပ္ဍဲလတူဒဵုတုဲ ကောံကုတွးတံမွဲစွံဂှ် ဂဇံဒၟံၚ်ရ။ ၄ပ္ဍဲကာလဂှ် ပေါဲပသခါမၞိဟ်ယုဍတံဂှ် ညောန်ကၠုၚ်ရ။
၅ယေသှုဝွံ လၟဳရံၚ်တုဲ မၞိဟ်မကောံဒရီုရၚ်သ္ကံသီုဖအိုတ်တံဝွံ ဒဒှ်မကၠုၚ်အိုတ်ဂှ် ညာတ်မ္ဂး ကွာၚ်သွက်ညးဂမၠိုၚ်ဂွံစဂှ် မူဒၞာဲဂွံရာန်ညိရော သာ်ဝွံ တဳလပိုန်သၟာန်ဖိလိပ္ပုရ။ ၆တေံဂလာန် သာ်ဝွံ မသၟာန်ဂှ် ပသာ်မပရောမ္ဂးဂှ် ယေသှုတီဒၟံၚ်တုဲရ။ သွက်ဂွံစံၜတ်ဖိလိပ္ပုတုဲ သာ်ဝွံ သၟာန်ရောၚ်။ ၇ဖိလိပ္ပုဂှ်လေ ဇၟာပ်အဲညးတံဝွံ ကွာၚ်ဗွဲမအောန်ညံၚ်ဂွံရုံဂှ် ကွာၚ်မကြိုက်ကဵုၚုဟ်ဍေဏာရဳၜါကၠံဂတေဟ်ဂှ် ဟွံရုံဏီ သာ်ဝွံ ပ္တီရ။ ၈ဒေံသိမောန်ပေတရုအာန္ဒြေမနွံယၟုတွးမွဲဂှ် ၉မၞိဟ်ဗၠာဲမနွံကဵုကွာၚ်မသုန်ကလောံကဵုကဍောတ်ၜါဂှ် မနွံညးမွဲရ။ ၜိုန်ဂှ်လေ မၞိဟ်ဂလိုၚ်တံဝွံ မနွံဒၟံၚ်တုဲ တေံကၜါကဵုကွာၚ်တံဂှ် ပသာ်သွက်ဂွံဟီုနွံရော သာ်ဝွံ ပ္တီရ။ ၁၀ယေသှုဂှ်လေ ညးဂမၠိုၚ်တံဂှ် ကဵုဂဇံအိုတ် သာ်ဝွံ ဟီုပၟိၚ်ရ။ ပ္ဍဲဒေသဂှ် ချောဲသ္တီုနွံဂၠိုၚ်ဂှ်ဒှ်တုဲ လမိဟ်မၞိဟ်ဗၞတ်မသုန်လ္ၚီတံဂှ် ဂဇံဒၟံၚ်အိုတ်ရ။ ၁၁ယေသှုဝွံ ကေတ်ကွာၚ်တုဲ ထိုၚ်သးဂုန်ကျာ်မ္ဂး ပရံကဵုတွးတုဲ တွးတံဂှ်လေ ပရံကဵုပ္ဍဲမၞိဟ်မဂဇံဒၟံၚ်တံဂှ် အိုတ်ပၠန်ရ။ ညံၚ်နဲသာ်ဂှ် ကၜါဆပၟိက်မၞိဟ်ဂမၠိုၚ်သၟိက်ဂွံဂှ် ပရံအိုတ်ရ။ ၁၂တေံညးတံဝွံ ဖဲအိုတ်တုဲ တဳလပိုန်ဂှ်လေ ညံၚ်ဟွံဂွံကၠေံမွဲသာ်ဆမကဝ်ဒကုတ်သိဟ်တဴဒၟံၚ်ဂှ် လ္ပဟ်သီက္ၜတ်အိုတ်ရ သာ်ဝွံ ဟီုကဵုတွးတံဂှ်တုဲ။ ၁၃မသိဟ်ဒၟံၚ်ပ္ဍဲမၞိဟ်မစကွာၚ်မသုန်ကလောံဆမကဝ်ဒကုတ်ဒၟံၚ်တံဂှ် လ္ပဟ်သီက္ၜတ်အိုတ်တုဲ စုတ်ဗပေၚ်လဝ်စှ်ၜါနအိုတ်ရ။ ၁၄တေံနိမိတ်လက်သန်ယေသှုမထၜးဂှ် ညးတံဂှ် ညာတ်တုဲ မၞိဟ်ဝွံ ဒှ်ပရောဗက်မက္ညကၠုၚ်ပ္ဍဲလောကသ္ဍာံသၟတ်ရောၚ် သာ်ဝွံ ဟီုအိုတ်ရ။ ၁၅ညးတံဝွံ သွက်ဂွံပ္တိုန်တဳလပိုန်ပ္ဍဲဒၟံၚ်ဨကရာတ်ဂှ် ကၠုၚ်တုဲ ပအနိၚ်အပိုၚ်အိုတ်ရောၚ် သာ်ဝွံ ယေသှုတီမ္ဂး ဆဇကုမွဲဂှ် က္ညတိုန်အာပ္ဍဲလတူဒဵုပၠန်ရ။ ၁၆-၁၇စိုပ်ပယာံသၟဝ်တ္ၚဲမ္ဂး တွးတံဝွံ အာဇရေၚ်ခၠိုၚ်တုဲ လုပ်ပ္ဍဲဂၠုၚ်မ္ဂး ညံၚ်ဂွံစိုပ်ဍုၚ်ကပေရနောံဂှ် ကၠောံအာအိုတ်ရ။ ကာလဂၠုတုဲ ယေသှုဝွံ ဟွံစိုပ်ပ္ဍဲဇရေၚ်ညးတံဂှ် ဏီ။ ၁၈လဗိုတ်ကျာမေလံၚ်ဗွဲမလောန်ဂှ် ပိုက်ကၠုၚ်တုဲ က္တဵုဒှ်လပဟ်ဇၟးရ။ ၁၉ဂိုၚ်တၚိုက်တုဲ ကာလမစိုပ်တရဴဗၞတ်မွဲၜါတိုၚ်ဂှ် ယေသှုဝွံ လန်ဂၚေၚ်အာလတူခၠိုၚ်တုဲ ဒဒှ်မဆိုက်ညောန်ကၠုၚ်ပ္ဍဲဇရေၚ်ဂၠုၚ်ဂှ် ညးတံဂှ် ညာတ်မ္ဂး ဒှ်တဴပဟေက်စိုတ်အိုတ်ရ။ ၂၀တဳလပိုန်ဂှ်လေ ဒှ်အဲရောၚ် လ္ပဖေက်အိုတ် သာ်ဝွံ ဟီုပၟိၚ်တုဲ ၂၁ညးတံဝွံ သီုစိုတ်မအိုတ်တမိုဟ်ဂှ် ဒုၚ်ကေတ်တဳလပိုန်ပ္ဍဲဂၠုၚ်အိုတ်ရ။ ဂၠုၚ်ဂှ်လေ ဒၞာဲဒေသသၟိက်ဂွံအာဂှ် စိုပ်မွဲချိုန်ခနှရ။ ၂၂ပ္ဍဲတ္ၚဲယးဂတဝွံ မၞိဟ်မကောံဒရီုဒၟံၚ်ပ္ဍဲသၟောန်ခၠိုၚ်မွဲလ္ပာ်တေံဂှ် မညောန်ကဵုဒေသမၞိဟ်မစကွာၚ်ကာလတဳလပိုန်မထိုၚ်သးဂုန်ကျာ်ဂှ်။ ၂၃နူကဵုဍုၚ်တိၜေရိဂၠုၚ်ဍောတ်တၞဟ်သ္အာၚ်ၜိုန်မကၠုၚ်ဂှ် ဝေၚ်နူကဵုဂၠုၚ်တွးတံမလုပ်တ္ၚဲကၠာ ဒဒှ်ဂၠုၚ်ဟွံမွဲ မွဲဂှ်လေကီုယေသှုဝွံ ပ္ဍဲဂၠုၚ်ဂှ် မွဲစွံကဵုတွးတံဂှ် ဟွံလုပ်တုဲ ဆတွးတံဒဒှ်မအာဂှ်လေကီုညာတ်အိုတ်မ္ဂး ၂၄ပ္ဍဲဒေသတေံဂှ် မပ္တံကဵုယေသှုတုဲ တွးဂမၠိုၚ်တံဝွံ ဒဒှ်ဟွံမွဲဂှ် တီအိုတ်မ္ဂး သွက်ဂွံဂၠာဲယေသှုဂှ် ဍိုက်ကေတ်ဂၠုၚ်တုဲ အာပ္ဍဲဇရေၚ်ဍုၚ်ကပေရနောံအိုတ်ရ။ ၂၅ပ္ဍဲမွဲလ္ပာ်ခၠိုၚ်ဂှ် ဆဵုဒးတုဲရာပ်ၜါဲ။ တဳလပိုန်ဝွံ မူကာလမက္ညကၠုၚ်ပ္ဍဲဒေသဝွံ ရော သာ်ဝွံ သၟာန်ပ္တီအိုတ်ရ။ ၂၆ယေသှုဂှ်လေ အဲဟီုဗွဲသၟတ်မ္ဂးဂှ်။ မၞးတံဝွံ ဟိုတ်မညာတ်နိမိတ်လက်သန်တံဂှ်တုဲ ဂၠာဲအဲဟွံသေၚ်။ ဟိုတ်မစကွာၚ်ဖဲတုဲ မၞးတံဂၠာဲအဲအိုတ်ရောၚ်။ ၂၇သၟိက်ဂွံစဏမလေပ်လီုလာ်ဂှ် လ္ပကၠေံစိုတ်အိုတ်။ ကောန်မၞိဟ်ဝွံ ကဵုပ္ဍဲမၞးတံညံၚ်ဂွံစဏမလေပ်တန်ဒၟံၚ်ပ္ဍဲလမျီုထာဝရဂှ်။ ကၠေံစိုတ်အိုတ်ရ။ တေံကောန်ဝွံ ဒှ်ညးမဒုၚ်တက်တဆိပ်မအံက်ကျာ်ဂမျိုၚ်ရောၚ် သာ်ဝွံ ဟီုပၟိၚ်ရ။ ၂၈ညးတံဂှ်လေ ညံၚ်ဂွံပ္တုဲကေစ္စကျာ်ဂမျိုၚ်ဂှ် ပသာ်ပိုဲညးဂွံပရော သာ်ဝွံ ပ္တီအိုတ်ရ။ ၂၉ယေသှုဂှ်လေ ဒဒှ်မပ္တေဟ်မၞိဟ်ကျာ်ဂမျိုၚ်မစကာဗလးနၚ်ဂှ် ဒှ်ကေစ္စကျာ်ဂမျိုၚ်ရောၚ် သာ်ဝွံ တွံပၟိၚ်ရ။ ၃၀ညးတံဂှ်လေ ညာတ်တုဲ ညံၚ်ပိုဲဍိက်တံဂွံပ္တေဟ်တဳလဂုန်ဂှ် ပသာ်နိမိတ်လက်သန်မွဲမွဲတလအဲမထၜးရော။ မူပွမွဲမွဲဂှ် တဳလဂုန်မပရော။ ၃၁ကၠုၚ်ပ္ဍဲသၠပတ်မ္ဂးဂှ်။ ကွာၚ်သွက်ညးတံဂွံစနူအကာသဂှ် ကဵုရောၚ်။ သာ်ဝွံ အတိုၚ်မကၠုၚ်ဂှ် ဇုဇအဲညးဂမၠိုၚ်တံဝွံ စမာန်ဏပ္ဍဲဂြိုပ်အိုတ်ရ သာ်ဝွံ ပ္တီအိုတ်ရ။ ၃၂ယေသှုဂှ်လေ အဲဟီုဗွဲသၟတ်မ္ဂးဂှ်။ မဝ်သေဝ်ဝွံ ကွာၚ်နူအကာသဂှ် ဟွံကဵုပ္ဍဲမၞးတံ။ မအံက်အဲဝွံ ကွာၚ်နူအကာသသ္ဍာံသၟတ်ဂှ် ကဵုပ္ဍဲမၞးတံရောၚ်။ ၃၃ကွာၚ်ကျာ်ဂမျိုၚ်မ္ဂးဂှ်။ စှ်ေဒဒက်တဴနူဘုံအကာသတုဲ ကွာၚ်မကဵုလမျီုပ္ဍဲကောန်လောကဳတံဂှ် မဂွံဒှ်ရောၚ်။ ၃၄သာ်ဝွံ ဟီုပၟိၚ်တုဲ တဳလဂုန် ကွာၚ်တေံဂှ် ကဵုပ္ဍဲပိုဲဍိက်တံလ္အိတ်တွဵုညိ သာ်ဝွံ ပ္တီအိုတ်ရ။ ၃၅ယေသှုဂှ်လေ အဲဝွံဂှ် ဒှ်ကွာၚ်လမျီုရ။ ညးမကၠုၚ်ပ္ဍဲဇရေၚ်အဲဂှ် ကြဴမွဲဝါဟွံဒးဒုၚ်ကၠောဝ်ဗျဵုရ။ ညးမပ္တေဟ်အဲဂှ် ကြဴမွဲဝါဟွံဒးဒုၚ်ထၚ်ဍာ်ရ။ ၃၆ၜိုန်ဂှ်လေ မၞးတံဝွံ ညာတ်အဲတုဲ ဟွံပ္တေဟ်အိုတ် သာ်ဝွံ အဲဟီုကဵုမၞးတံတုဲရ။ ၃၇ဆမၞိဟ်မအံက်မကဵုပ္ဍဲအဲတံဂှ် ကၠုၚ်ဇရေၚ်အဲအိုတ်ရောၚ်။ ညးမကၠုၚ်ဇရေၚ်အဲဂှ် အဲဟွံပါဲသက်သက်။ ၃၈ဟိုတ်မ္ဂးဂှ် အဲဝွံ ညံၚ်ဂွံပ္တုဲပၟိက်ဇကုဂှ် စှ်ေဒဒက်တဴနူဘုံအကာသဟွံသေၚ်။ ညံၚ်ဂွံပ္တုဲပၟိက်ညးမစကာဗလးနၚ်အဲဂှ်တုဲ စှ်ေဒဒက်တဴရောၚ်။ ၃၉ပၟိက်မအံက်မစကာဗလးနၚ်အဲမ္ဂးဂှ်။ အပ္ဍဲမၞိဟ်မကဵုပ္ဍဲအဲတံဂှ် ဆဗၞတ်ညးမွဲအဲဟွံကဵုလီုလာ်တုဲ ပ္ဍဲတ္ၚဲကြဴအိုတ်ဂှ် ညးသီုဖအိုတ်တံဝွံ ဒဒှ်သၟိက်ဂွံကဵုဂျိုၚ်တိုန်ဂှ်လေကီု ၄၀ညာတ်ကောန်တုဲ ဆညးမပ္တေဟ်အိုတ်သီုတံဝွံ ဒဒှ်သၟိက်ကဵုဂွံလမျီုထာဝရဂှ်လေကီုပၟိက်ညးမစကာဗလးနၚ်အဲဂှ် မနွံရ။ ညးတံဂှ်လေ ပ္ဍဲတ္ၚဲကြဴအိုတ်ဂှ် အဲကဵုဂျိုၚ်တိုန်ရောၚ် သာ်ဝွံ ဟီုပၟိၚ်ရ။ ၄၁-၄၂အဲဝွံ ဒှ်ကွာၚ်မစှ်ေဒဒက်တဴနူအကာသရောၚ် သာ်ဝွံ ဟိုတ်မဟီုပၟိၚ်ဂှ် မၞိဟ်ယုဍတံဂှ်လေ မၞိဟ်ဝွံ ဒှ်ယေသှုကောန်ယဝ်သာတ်ဟွံသေၚ်ဟာ။ မိမညးဂှ် အဲညးတီဒၟံၚ်ဟွံသေၚ်ဟာအဲဝွံ စှ်ေဒဒက်တဴနူအကာသရောၚ် သာ်ဝွံ ပသာ်ညးဂွံဟီုရော သာ်ဝွံ နၚ်ဒုဟ်စောဒနာအိုတ်ရ။ ၄၃ယေသှုဂှ်လေ ဇကုကဵုဇကုဂှ် လ္ပဟီုဂလာန်နၚ်ဒုဟ်ကဵုအဲအိုတ်။ ၄၄မအံက်မစကာဗလးနၚ်အဲဂှ် ဟွံပ္အောဝ်လဴမ္ဂး မူရဴညးမွဲကၠုၚ်ဇရေၚ်အဲဟွံမာန်။ ညးမကၠုၚ်တံဝွံ ပ္ဍဲတ္ၚဲကြဴအိုတ်ဂှ် အဲကဵုဂျိုၚ်တိုန်ရောၚ်။ ၄၅ကၠုၚ်ပ္ဍဲသၠပတ်အနာဂတ္တိမ္ဂးဂှ်။ တေံညးအိုတ်သီုတံဝွံ ဒှ်မၞိဟ်ကျာ်ဂမျိုၚ်မဒလောံဗ္တောန်အိုတ်ရောၚ် သာ်ဝွံ အတိုၚ်မကၠုၚ်ဂှ် ကလၚ်ပၚ်မိၚ်ပ္ဍဲဇရေၚ်မအံက်တုဲ ဆညးမဒုၚ်ဒလောံဗ္တောန်တံဂှ် ကၠုၚ်ပ္ဍဲဇရေၚ်အဲအိုတ်ရောၚ်။ ၄၆ၜိုန်အဲမဟီုသာ်ဂှ် ဝေၚ်နူကဵုညးမက္ညကၠုၚ်နူကျာ်ဂမျိုၚ်ဂှ် မူရဴညးမွဲညာတ်မအံက်တုဲရ သာ်ဝွံ ဟွံမိက်ဟီု။ ညးမက္ညကၠုၚ်မ္ဂးဂှ် ညာတ်မအံက်တုဲရ။ ၄၇အဲဟီုဗွဲသၟတ်မ္ဂးဂှ်။ ညးမပ္တေဟ်အဲဝွံဂှ် ဂွံလမျီုထာဝရရောၚ်။ ၄၈အဲဝွံဂှ် ဒှ်ကွာၚ်လမျီုရ။ ၄၉ဇုဇမၞးတံဝွံ စမာန်ဏပ္ဍဲဂြိုပ်တုဲ ချိုတ်အာအိုတ်ရ။ ၅၀ညးမစကွာၚ်မစှ်ေဒဒက်တဴနူအကာသဂှ် ဂွံ ဗၠးနူဂစိုတ်ရောၚ်။ ၅၁အဲဝွံ ကွာၚ်လမျီုမစှ်ေဒဒက်တဴနူအကာသဂှ် မဂွံဒှ်ရောၚ်။ ညးမစကွာၚ်ဝွံ ပသာ်ရောမ္ဂးဂှ်။ လမျီုမဂျိုၚ်ဒၟံၚ်လ္အိတ်တွဵုဂှ် ဂွံရောၚ်။ ကွာၚ်အဲကဵုမ္ဂးဂှ် ဖျုန်အဲမထောံကၠေံသွက်လမျီုကောန်လောကဳတံဂှ် မဂွံဒှ်ရောၚ် သာ်ဝွံ တွံပၟိၚ်ရ။
၅၂ပ္ဍဲကာလဂှ် မၞိဟ်ယုဍတံဂှ်လေ မၞိဟ်ဝွံ ဖျုန်ဇကုသွက်အဲညးဂွံစဂှ် ပသာ်ကဵုမာန်ရော သာ်ဝွံ ဇကုကဵုဇကုကယျာန်ဓဝါတ်အိုတ်ရ။ ၅၃ယေသှုဂှ်လေ အဲဟီုဗွဲသၟတ်မ္ဂးဂှ်။ ဖျုန်ကောန်မၞိဟ်ဂှ် ဟွံစ။ ဆီဂှ် ဟွံသုၚ်မ္ဂး ပ္ဍဲမၞးတံဂှ် လမျီုဟွံမွဲ။ ၅၄စဖျုန်အဲတုဲ ညးမသုၚ်ဆီအဲဂှ် ဂွံလမျီုထာဝရရောၚ်။ တေံညးတံဝွံ ပ္ဍဲတ္ၚဲကြဴအိုတ်ဂှ် အဲကဵုဂျိုၚ်တိုန်ရောၚ်။ ၅၅ဖျုန်အဲဝွံ သွက်ဂွံစဂှ် ခိုဟ်လောန်သန်ရ။ ဆီအဲဂှ်လေ သွက်ဂွံသုၚ်ဂှ် ခိုဟ်လောန်သန်ရ။ ၅၆ညးမသုၚ်စဖျုန်ဆီအဲဂှ် တန်ပ္ဍဲအဲရ။ ပ္ဍဲညးဂှ်လေ အဲတန်ဒၟံၚ်ရ။ ၅၇မအံက်မဂျိုၚ်လမျီုဝွံဂှ် စကာဗလးအဲတုဲ အဲဝွံ နကဵုမအံက်ညံၚ်နဲမဂျိုၚ်လမျီုဂှ် ညးမစအဲတံဝွံ နကဵုအဲဂှ် ဂွံဂျိုၚ်လမျီုရောၚ်။ ၅၈ကွာၚ်ဝွံဂှ် ဒှ်ကွာၚ်မစှ်ေဒဒက်တဴနူအကာသရ။ ဇုဇမၞးတံစမာန်ဏတုဲ ညံၚ်မဒးချိုတ်ဂှ် ဟွံသေၚ်။ ညးမစကွာၚ်ဝွံဂှ် ဂွံဂျိုၚ်လမျီုလ္အိတ်တွဵုရောၚ်။ ၅၉သာ်ဝွံ ပ္ဍဲမကဵုလၟေတ်ဩဝါဒ ပ္ဍဲဇြပ်ဓဝ်ပ္ဍဲဍုၚ်ကပေရနောံဂှ် တဳလပိုန်တွံပၟိၚ်ရ။
၆၀တွးဗွဲမဂၠိုၚ်တံဝွံ မိၚ်တုဲ ဂလာန်ဝွံဂှ် ဒှ်ဂလာန်မဝါတ်ဂါတ်ဗွဲမလောန်ရောၚ်။ ညးဂှ် ဒုၚ်က္တောဝ်မာန်ရော သာ်ဝွံ ဟီုအိုတ်ရ။ ၆၁ဂလာန် သာ်ဝွံ ဒဒှ်တွးတံနၚ်ဒုဟ်စောဒနာဂှ် ယေသှုတီကေတ်ပ္ဍဲစိုတ်တုဲ ဟိုတ်နူဂလာန်ဂှ် စိုတ်မၞးတံလီုအိုတ်ဟာ။ ၆၂ကောန်မၞိဟ်ဝွံ ဒဒှ်မက္ညတိုန်ပ္ဍဲဒေသဒမံၚ်ကၠာဂှ် ဂွံညာတ်တုဲ ပသာ်သၠေဟ်အိုတ်ရော ၆၃ဆဝိညာန်ဂှ် ကဵုဂျိုၚ်လမျီုရ။ ဖျုန်ဝွံဂှ် မူဂုန်မွဲမွဲဟွံမွဲ။ ဂလာန်အဲမဟီုဂှ် ဒှ်ဝိညာန်ရ။ လမျီုဂှ်လေ မဂွံဒှ်ရ။ ၆၄ၜိုန်ဂှ်လေ အပ္ဍဲမၞးတံညးလ္ၚဵုဟွံပ္တေဟ်တံဂှ် နွံကီုရ။ ၆၅ဟိုတ်ဂှ်ရ မအံက်အဲဝွံ ဟွံကဵုအခေါၚ်တုဲ မူရဴညးမွဲကၠုၚ်ဇရေၚ်အဲဟွံမာန် သာ်ဝွံ နူကၠာတေံဂှ် အဲဟီုတုဲရ။ သာ်ဝွံ တွံပၟိၚ်ရ။ ဒဒှ်မတွံပၟိၚ် သာ်ဝွံ မ္ဂးဂှ်။ ယြဴညးမွဲဂှ် ဒဒှ်ဟွံပ္တေဟ်ဂှ်လေကီု။ ယြဴညးမွဲဂှ် ဒဒှ်မပ္အပ်ဇကုဂှ်လေကီု။ နူတံပထမဂှ် ယေသှုတီဒၟံၚ်ရ။
၆၆မပ္တံနူကာလဂှ်တုဲ တွးဗွဲမဂၠိုၚ်တံဝွံ ဟွံအာမွဲစွံကဵုတဳလပိုန်မ္ဂး ဆုတ်အာအိုတ်ရ။ ၆၇ဟိုတ်ဂှ်ရ ယေသှုဝွံ ပ္ဍဲတွးညးစှ်ၜါဇကုတံဂှ် မၞးတံဂှ်လေ ဒဒှ်သၟိက်ဂွံတိတ်အာဂှ် ပၟိက်နွံကီုဟာ သာ်ဝွံ သၟာန်တုဲ ၆၈သိမောန်ပေတရုဂှ်လေ တလအဲ။ ပိုဲဍိက်တံဝွံ မူရဴပ္ဍဲဇရေၚ်ညးမွဲဂှ် ဂွံအာညိရော။ ဂလာန်လမျီုထာဝရဂှ် နွံဒၟံၚ်ပ္ဍဲတဳလဂုန်ရောၚ်။ ၆၉တဳလပိုန်ဝွံ ဒဒှ်မဒှ်ခရေတ်မတွံဂးဒဒှ်မဒှ်ကောန်ကျာ်ဂမျိုၚ်ဂှ် ပိုဲဍိက်တံပ္တေဟ်သ္ဍာံသၟတ်အိုတ်တုဲရ သာ်ဝွံ ပ္တီရ။ ၇၀ယေသှုဂှ်လေ မၞးတံညးစှ်ၜါဇကုတံဂှ် အဲရုဲကံက်တုဲ ဟွံသေၚ်ဟာ။ ၜိုန်ဂှ်လေ ပ္ဍဲမၞးတံဂှ် သတ်တြုနွံမွဲရောၚ် သာ်ဝွံ ဟီုပၟိၚ်ရ။ ၇၁လဟီု သာ်ဝွံ မ္ဂးဂှ် လုပ်ဂကောံညးစှ်ၜါဂှ်ဒှ်တုဲ ညးမပ္အပ်တဳလပိုန်ကောန်သိမောန်ယုဍသကာရုက်ဂှ် သၟိက်ဂးရောၚ်။