ညးလွပ်:လျးအရံၚ် ရးဇြာ

အတ္ထုပ္ပတ္တိ

တၠဂုဏ်အာလောက (ခ) လျးအရံၚ် ရဇြာဝွံ ပ္ဍဲသက္ကရာဇ်ဍုၚ် ၁၃၅၆ သၞာံ၊ ဂိတုဘဒ် (၆) စွေက်၊ တ္ၚဲအဒိုတ် (25.09.1994)ဂှ် မိိမၜါ မၞုံယၟု နာဲဖိုလ်အံၚ်+မိသာန်ၚိုဲ က္လိဂွံညာတ်ကေတ်မုက်ခွါ ကောန်ရတ် ပ္ဍဲဌာန်ဍုၚ်ကၟာဝက် အရာပ်ကျာ်ကောံ ပွိုၚ်ဍုၚ်မုဟ်ဍုၚ် တွဵုရးဍုၚ်မန်မဒှ်ရ။

လၟောဝ်တၠဂုဏ်ဝွံ နူအဝယ်မဍောတ်တေံ မိမၜါ တၚ်ခုတ်လဝ်ကဵုယၟု မာံအာဲရတ် (မောၚ်အောၚ်သူလတ်)ရ၊ နူမက္လိဂွံအာယုက် ၂ သၞာံဟေၚ် မအံက်အန္တဂုဏ် စုတိပြဟ်ကလုဲအာတုဲ ဇၞော်ဂေါဝ်ကၠုၚ်အကြာမိယာဲ၊ ကောဒေံဂမၠိုၚ်ရ၊ အခါမစိုပ်အဝယ် ကတ်ဗတောန်ပညာ မိယာဲအန္တဂုဏ် ပအပ်ကဵုဘာတန်အလဵုသဳ ကတ်ဗတောန်ကၠုၚ်ပညာက္လိမွဲတန်ဂှ် ဟိုတ်နူမိယာဲ ဒှ်အခက်ခုဲကဵုပြေၚ်ပိုန်ဒြပ်တုဲ နူကဵုဘာအလဵုသဳဂှ် ပြံၚ်ဗစိုပ်ဏာ ဘာပရေၚ်ပညာကောန်ဂကူမန် ပ္ဍဲကဵု အရာပ်ကြုၚ်ဟလိုၚ် ဗဒါဲဘာလွဳမာန်ထဝ်တုဲ ဆက်ကတ်ဗတောန်အာပညာ ဃောတိုန်ဒၟံၚ် ၂ တန်ဂှ် ဟိုတ်နူ ပရေၚ်ပါရမဳကံအတိက် ဆဝ်ဗ္ၚုဟ်ကၠုၚ်တုဲ အာစိုပ်ဒဒှ်ဘဝ ကွးဘာလကျာ် ဇရေၚ်ကျာ်ဇၞော်အစာ ဘဒ္ဒန္တဣန္ဒဝံသ ဘာသ္ကိုပ်ဍုၚ်၊ အရာပ်ဝါယာပ်၊ ဍုၚ်ကၟာဝက်တုဲ ကတ်ဗတောန်ကၠုၚ် နမော ကခ၊ ဒ္ဂေတ်ဝတ်ကွးဘာ ဒှ်တမ် လုကဴပွိုၚ်ၜါသၞာံတုဲ ပ္ဍဲကဵုသက္ကရာဇ် ၁၃၆၈ အခါမဂွံအာယုက် ၁၂ သၞာံဂှ် ပြံၚ်စိုပ်ဒဒှ် ဘဝသာမဏဳ သ္ပဒတဴဇရေၚ်အစာ ကတ်ဗတောန်ကၠုၚ် သၠပပရိုတ်၊ ဒ္ဂေတ်ဝတ်သာမဏဳ၊ သုတ်စန်၊ အဘိဓရ် ပွိုၚ် ၜါသၞာံတုဲ

ပ္ဍဲသက္ကရာဇ်ဍုၚ် ၁၃၇၀ သၞာံဂှ် ဂွံအာစိုပ် သုၚ်ရှ်ပညာ ပ္ဍဲတိုက်ပရိယတ်မန် ဘာမဟာယျေန် ကွာန်ကဒဵု ပွိုၚ်ဍုၚ်မတ်မလီု၊ ဇရေၚ်အစာ ကျာ်ဇၞော်အစာအာဒိစ္စမဟာထေရ်၊ တၠဂုဏ်အစာဝိဝေကာနန္ဒ၊ တၠဂုဏ်အစာသြဘာသ၊ တၠဂုဏ်အစာအာနန္ဒ၊ ဒှ်တမ် အစံၚ်အစာဗွဲမဂၠိုၚ်ဂၠေၚ် နိဿဲ ကတ်ဗတောန်အာပညာ တန်ဥပစာ၊ တန်မူလ၊ တန်ဍောတ်၊ တန်ဒေါဝ်၊ တန်ဇၞော်၊ ဂွံအံၚ်အာပ္ဍဲအလဵုဇၟာပ်ပ်သၞာံတုဲ ပ္ဍဲသက္ကရာဇ်ဍုၚ် ၁၃၇၅ သၞာံ ဃောမက္လိဂွံအာယုက် ၁၉ သၞာံဂှ် ပြံၚ်တိုန်အာ ဍုၚ်ဇၞော် ကော်ဂးလဂုၚ်တုဲ လုပ်စိုပ်သုၚ်ရှ်ပညာ ပ္ဍဲတိုက်လိက်မန်ဒယှ် ဘာဗိုလ်လ္ၚီ ဍုၚ်လဂုၚ် ဇရေၚ်ကျာ်ဇၞော်အစာ ဘဒ္ဒန္တကေသရ၊ တၠဂုဏ်အစာနိပုဏ ကတ်လ္ၚတ်အာတန်ဓမ္မာစရိယ ပွိုၚ် ၄ သၞာံပၠန်တုဲ ပ္ဍဲကဵုသက္ကရာဇ်ဍုၚ် ၁၃၇၈ သၞာံဂှ် က္လိဂွံအံၚ်ဇၞးအာတန်ဓမ္မာစရိယ မဒှ်ရ။

ပစ္စုပ္ပန်လၟုဟ် ဃောကတ်လ္ၚတ်မံၚ် တန် BA ပ္ဍဲတက္ကသိုလ် နာဂါနန္ဒ ဍုၚ်ကောလမ္ဗ ကၟိန်ဍုၚ်သိရဳလၚ်္ကာ (တ္ကအ်သိၚ်ဃိုလ်) မဒှ်ရအဴ။