ညးလွပ်:အမ်သဝ်နာဲ
နဲပခိုင်စိုတ်ဓါတ်
-----------------------------------
( ၁ )
သၟာန် ။ ။
စိုတ်ဓါတ်ဟီုဂှ် ဒှ်အရာဣဓိ အနုဘဴ လောကဇၞော်ဏအ်ရ ဟွံသေင်ဟာ တုပ်တဴညံင်ရဴပၟတ်ရ ပၟတ်ဂှ်သုင်စောဲလေပ်တေှ် ဍုန်ဗစိန်ကဵု တၞဟ်တၞဟ်မာန်ရ သုင်စောဲဟွံလေပ်တေှ် တူလေင်ထောံ ညးလောကတအ်မာန်မံင်ဏောင် နဲကဲ ဂွံသုင်စောဲ စိုတ်ဓါတ်လေပ်ဂှ်လေဝ် ဒးဂၠာဲလ္ၚတ် ဒၞာဲလဵုရော?
သွဟ် ။ ။
ဟွံမောဝ်သၟူလိက် ပေင် (၅) တ္ၚဲမ္ဂး ဟီုဂလာန် အဓိပ္ပါဲ ဟွံဍိုက်ပေင်ရ ရှ်သာ လေဝ်ဟွံမွဲရ ဟွံသေင်ဟာ ဟိုတ်ဂှ်ရ ညံင်စိုတ်ဓါတ် ဝါသနာဗှ်လိက် ဂွံနွံ သ္ဒးပ္ကတ်ပ္ကေင်လဝ်ရ နဲက္ဆံင်ပထမ လိက်လဵုမိက်ဂွံဗှ်ဂှ် ကံက်ဗှ်ရံင် စဵုကဵုအိုတ်ညိ နဲက္ဆံင်ဒုတိယ ဗက်ဗှ်လိက် အသဝ်ဂုဏ်ဇကုညိ နဲက္ဆံင်တတိယ ရုဲဗှ်လိက် ပရူတဵုလွဳ စိုတ်ဓါတ်ဂွံခိုင်ကၠိုက်ညိ မၞးတော်ရံင်စမ် ဗှ်လိက်မာန်မှ ဒှ်တၠပညာမာန်ရ ဒှ်က္ဍိုပ်သ္ကိုပ်မာန်ရ ။
-----------------------------------------------------
(၂)
သၟာန် ။ ။
ပညာ အဝဵု ပိုန်ဒြပ် ၜိုတ်လဵုဂၠိုင်ဂၠိုင် ယဝ်ဟွံထတ်ယုက် အေဲဇြ ကှ်မံင်မ္ဂး ဟွံကလိဂွံ တသိုက်စိုတ်ရ ဂွံထတ်ယုက်ဂှ်လေဝ် ဒးကၠောန် နဲလဵုရော?
သွဟ် ။ ။
မံင်သောင်သောင် အးအးညိ စၞဒှ်အာဟာရ သြဇာဂှ် ရုဲစသုင်ညိ တိက်ဖဲဖဲညိ ယီုလုပ် ယီုတိတ်ဖဲဖဲညိ ခြာဟွံလအ် ပြေလၟောင်စိုတ်ညိ ဆက်ကၠောန်အာကမၠာန် စဵုကဵုကွိုင်ကွုဲ ဍောင်ၜိုတ်တေှ် ဇြဟတ်စိုတ်ဇြဟတ်စိုတ်ဓါတ် အေဲဇြ ကှ်ကၠုင်မာန်ဏောင် သွက်ဂွံထတ်ယုက် ဒးနွံကဵု အခိင်ဇူရ ဒးဝေင်ဓတ် ဒးချဳဓရာင်ခန္ဓကာယ ဗွဲမစေှ်သၞောတ်ရ ။
-----------------------------------------------------
(၃)
သၟာန် ။ ။
သွက်ဘဝပိုဲ ဂွံဇၞော်မောဝ် သ္ဂောံဒှ်တသိုက်စိုတ်မာန်ဂှ် ဒးဝေင်ပါဲ မုကီုရော?
သွဟ် ။ ။
ဟိုတ်ဘဝပိုဲ ဂွံယုတ်သဝ်စေှ်ဂှ် နွံပန်သာ်ရ
(၁) ဖ္အိုတ်ဝေင် အခိင်ကီု ၊
(၂) သ္ပကိစ္စဇၞော်ကဵု ကမၠောန်သောဲသောဲဗြောဲဗြောဲတအ်ကီု ၊
(၃) ပွမကယျာန်ဓဝါတ် ညးသ္ကအ်ကီု ၊
(၄) ကၠောန်သ္ပဟီုဂး ချပ်ဟွံမွဲကဵု ၚုဟ်မးကီု ၊
မပ္တံသာ်ဝွံ ယဝ်ရအခိုက်ဇကု နွံမံင်မ္ဂး ကၠဟ်ထောံဗွဲမပြဟ်ညိ အဵုဟိုတ်အခိုက်သာ်ဏံနွံတုဲ ဆလအ်ဟွံဇၞော်မောဝ်ရ ဟွံဒှ်တသိုက် စိုတ်မပြဲရ ဘဝမၞိဟ် စိုတ်ဓါတ်မၞိဟ် အေဲဇြမံင်တွဵုရ စိုတ်လေဝ် ဂၠိလောဲသွာရ ။
-----------------------------------------------------
(၄)
သၟာန် ။ ။
တ္ၚဲမာန်စိုတ်ဇကုဂှ် ဒှ်တ္ၚဲဇၞော်မောဝ် ဇကုဇကုရ ဂွံကေတ်မာန် စိုတ်ဇကုဂှ် ဒးသ္ပသဇိုင်ကဵု နဲကဲလဵုရော?
သွဟ် ။ ။
ညးကၠောန်ကမၠောန်ခိုဟ်ဂှ် စိုတ်ကၠိခ္ဍက် စိုတ်သောက စိုတ်အကုသိုလ်တအ်ဂှ် အခေါင်မံက်ကၠုင်လေဝ်ဟွံမွဲရ ဒှ်သာ်ဝွံတုဲ ပွမကၠောန်ကမၠောန် လ္ပာ်ခိုဟ်ဂှ် ဒှ်နဲအာယုက်ဂၠိင် ခိုဟ်မွဲကီုရ ဒှ်သွက်ဇၞော်မောဝ်တိုန်ကီုရ ဟိုတ်ဂှ်ရတေှ် သွက်တ္ၚဲယးတေံ ဗီုလဵုဂွံဂွံကမောန် ဂၠိုင်ဂၠိုင်ဂှ်ရော အခိင်ဗ္တမ်ဂှ် ဒးဖန်ဖက် ချူစွံလဝ်ကဵုတၞးလိက်ညိ တ္ၚဲယး ရံင်တၞးလိက်ဂှ်တုဲ ကမၠောန်ဖန်ဖက်လဝ် ဗွဲမဂၠိုင်တအ်ဂှ် ကၠောန်စဵုကဵု စိုပ်ဒတုဲညိ ။
-----------------------------------------------------
(၅)
သၟာန် ။ ။
ညးနွံကဵုသတ္တိဂမၠိုင် စိုတ်ဓါတ်ခိုင်ကၠိုက်တုဲ တင်ရန်တၟအ်ဘဝညးဂှ် ရုပ်ရဴမံက်ကၠုင် မွဲတုဲမွဲရ ညးတအ်ကလိဂွံဘဝ အံင်ဇၞးရ သွက်စိုတ်ဓါတ် ဂွံခိုင်ကၠိုက်ဂှ် ဒးလွဳသတ္တိ သာ်လဵုရော?
သွဟ် ။ ။
တ္ၚဲဏံကၠောန်ကမၠောန်ဏံဏောင် ချပ်လဝ်ပ္ဍဲစိုတ် ကမၠောန်မွဲမွဲဂှ် တ္ၚဲဏံကၠောန် ညံင်ဂွံအံင်ဇၞးမ္ဂး ဒှ်ဒ္ဂေတ်လ္ၚတ် ကိစ္စဇၞော် သွက်စိုတ်ဓါတ် ဂွံခိုင်ကၠိုက်မွဲရ ယဝ်ရ ဒးကၠောန်ကမၠောန်နွံမံင်မ္ဂး (တ္ၚဲဂၠုရ တ္ၚဲက္တဴ ကာတ်လောန်ရ) မပ္တံသာ်ဏအ် လ္ပယှအ်ထောံစိုတ် လ္ပယှအ်ထောံကမၠောန်ညိ ။
-----------------------------------------------------
(၆)
သၟာန် ။ ။
အခိင်ဂှ် ၚုဟ်မးဇၞော်နူကဵုဒြပ်ဏီရ ဒြပ်ရတ်ဂှ် ၜိုန်ဂၠာဲနကဵုအခိင် ဂွံမာန်ကီုလေဝ် အခိင်ဂှ် အခိင်ဂှ် ဂၠာဲကေတ်နကဵုဒြပ်ရတ် ဟွံဂွံရ နကဵုဗီုပြင်လဵုမွဲ ဂွံသုင်စောဲအခိင်ဂှ်ရော?
သွဟ် ။ ။
ပၠအ်အခိင်မ္ဂး ဘဝဗၠိုက်ဏောင် ဂိုတ်ဘဝမ္ဂး ဒးဂိုတ်အခိင်ဏောင် ပွမပၠေင်ကၠေံအခိင် ဟွံမွဲကဵုၚုဟ်မးဂှ် တုပ်တဴညံင်ရဴ သွံစဘဝ ဇကုဆကုကီုရ ဟိုတ်ဂှ်ရ အခိင်ဟီုဂး ချိင်လဝ်ဂှ် အာဒဵုစိုပ်ညိ ဥပမာ ချိင်လဝ်ဒ္စါံနာဍဳမ္ဂး နူကၠာဟွံဂွံ တက်ဒ္စာံ ဗၞတ်( ၅ )ဗိဇ္ဇာ( မိနေတ် ) အာစိုပ်မာန်မ္ဂး ခိုဟ်အိုတ်ရ ။
-----------------------------------------------------
(၇)
သၟာန် ။ ။
လေပ်ပညာမွဲဓရ်မှ လ္ဒောဝ်ညးဟလိုင် ဂွံရာင်ဆာဲဟာ လဟီုအရေဝ်ခိုဟ်လေဝ် လ္ဒောဝ်ညးဟလိုင် ရာင်ဆာဲမံင်ကီုရ ဟွံသေင်ဟာ ဒးဒ္ဂေတ်ဗက် ဗီုလဵုမှ ဂွံဟီုအရေဝ်ခိုဟ်လေပ် ဂှ်ရော?
သွဟ် ။ ။
ဟီုဂလာန်လေပ်ဂွန်စေှ်ပတေှ် ညးတၞဟ် ရေှ်သေှ်ရဴဂဴ တွဵုရ ဟိုတ်ဂှ်ရ ကၠာဟွံဂွံဟီုဂလာန်မွဲမွဲ ဟီုထေက်/ဟွံထေက် ချိင်ဆရံင် လ္ပဟီုလေဝ် ဂွံမံင်မ္ဂး လ္ပဟီုညိ ဟိုတ်ဖဵုဟွံမွဲ မွဲသာ် ပရူညးတၞဟ်ပရေံ လ္ပဟီုညိ ဂွံဗၠးဘဲ အန္တရာဲ ဗွဲကြဴမာန်ရောင် ။
-----------------------------------------------------
(၈)
သၟာန် ။ ။
လမိင်လညာတ်ခိုဟ်ခိုဟ် ဂလာန်ပ္ဍဲလိက်ကၞပ်ခိုဟ်ခိုဟ် ပကောံပကေဝ်လဝ် ပ္ဍဲလိက် ဗဗိုတ် (လိက်စၟတ်သမ္တီ) တေှ် မွဲတ္ၚဲမ္ဂးဒှ်ပညာသွက်ဇကု ဒှ်အ္စာခိုဟ်အိုတ်ရ အဵုဂလာန် လမိင်လညာတ်ဂှ်ကီု ဂလာန်ပကောံပကေဝ်လဝ် တအ်ဂှ်ကီု ဗီုလဵု ဂွံပါ်ပါဲရော?
သွဟ် ။ ။
ပွမချပ်ပါ်ပါဲဂှ် ဍေံရနုက်ဗပေင်ကဵု လညာတ်ဇြိုဟ်နက် ပ္ဍဲမၞးမာန်ကီု ဒှ်သွက်ဘဝမၞး မာန်ကီုရ ကိစ္စပါ်ပါဲဂှ် ဒုင်တဲ ဗွဲမၜိုဟ်သြိုဟ်ညိ တုဲမှ ချပ်ရံင် ကိစ္ဒပါ်ပါဲ ဒးစွံလဝ် ဂရုဟာ ဟွံဒးစွံဂရုဟာ ဂှ်စၟဳစၟတ်ရံင် ၜိုဟ်ၜိုဟ်သြိုဟ်သြိုဟ်ညိ ။
-----------------------------------------------------
(၉)
သၟာန် ။ ။
စိုတ်ကၠိခ္ဍက် ဂွံဟဲမာန်ဂှ် နွံမွဲနဲဓဝ်ရ ဒးဂစာန်ကၠောန်ကမၠောန် ဗွဲမစိုတ်လုပ်စဟေင်ရ သ္ပပ္တမ်သာ်လဵုတုဲ စိုတ်ကၠိခၠက်ဂွံဟဲအာမာန် ဂှ်ရော?
သွဟ် ။ ။
စိုတ်ပွမကၠိခ္ဍက်ဒၟံင်ဂှ် ဒးသ္ပသၞကဵုပရေင်စိုတ်ဓါတ် ဟွံမွဲကီု နူအဝဲဍောတ်ဍောတ်ဏံလေဝ် စုတိချိုတ် မာန်မံင်ဏောင် ဟိုတ်ဂှ်ရ မပ္တံခုင်လိက် ဒၞါဲသတိက် ကပေါတ်အရပ်စပ် တအ်ဂှ် စွံဒၞာဲဍေံကဵုဍေံ ဗွဲမစေှ်သၞောတ်ညိ အခိင်နွံပၟိက် မိက်ဂွံဂွံကပေါတ်ဂှ် နကဵုနဲဝွံ ဟိုတ်ကလိဂွံလောဲသွာတဲု သ္ဂောံစာ်စ္ဍးနူစိုတ်မကၠိခ္ဍက်မာန်ရ ။
-----------------------------------------------------
(၁ဝ)
သၟာန် ။ ။
ညံင်တၞံဆုကှ်ကှ်တအ် တူလောဲသွာဂှ် ညးမၞုံကဵု ဒေါသစိုတ်ဂှ်လေဝ် စံင်တူလောဲသွာရ ညံင်ဒေါသဂွံအောန် ဗီုလဵုဂွံဗ္စာရဏာရော?
သွဟ် ။ ။
ပ္တောံၜတ်ပတုပ်ကဵုစိုတ်ဇကုညိ ပတုပ်ကဵုစိုတ်ဇကု တီစိုတ်ညးတၞဟ်မ္ဂး ပၟတ်ဒေါသတူဟွံလောဲသွာရ ပၟတ်ဒေါသဟွံတူတေှ် သ္ၚိဓါတ်ကောန်တၟအ် ၜိုဟ်သြိုဟ်ရ သ္ၚိဓါတ်ကောန်တၟအ် ၜိုဟ်သြိုဟ်မ္ဂးစိုတ်ဓါတ် ခိုင်ကၠိုက်ရောင် ။
-----------------------------------------------------
(၁၁)
သၟာန် ။ ။
စိုတ်ဓါတ်ဍိုန်လျမ္ဂး မုဟွံချိုတ်ပၠိုတ်ရ ဗီုစိုတ်ဗ္ဂေတ်ဂှ် ဒးဒုင်ဂေတ်ဂၠိုင်ရ ယဝ်ဆဵုဂဗကၠုင်တင်ခက်ခုဲမ္ဂး ညံင်ဂွံကြံင် ဗီုပသဲက္ဍိုင်ဂှ် ဗီုလဵုဂွံ ဗ္စာရဏာရော?
သွဟ် ။ ။
ဇၟာပ်ချပ်ကမၠောန်မွဲမွဲ စိုတ်ဂွိင် စိုတ်ဖေက် မမိက်ကဵုမွဲမွဲ မံက်ကၠုင်မ္ဂး ဍိုန်လျကဵု အရာစိုတ်ဓါတ်ဂွံခိုင်ကၠိုက်ရ ဆဵုဗဂဒှ်ကၠုင်ဗီုဏံတေှ် နဲဂွံလွဳခိုဟ်အိုတ်ဂှ် ကမၠောန်ဏံသွက်ဂွံဒး ဂွိင်ဖေက်ဟွံမွဲ ဍာံ/ဟွံဍာံ ဒးချပ် ဂၠိုက်ဂၠာဲဏောင် ဒးကၠောန်စမ်ရံင်ဏောင် ။
-----------------------------------------------------
(၁၂)
သၟာန် ။ ။
ဆဵုဗဂကၠုင်လောကဓရ် မပ္တမ်ညးဆာန် ညးက္ဍုဟ် ညးဟွံသ္ပဂရုမ္ဂး ဗီုလဵုသ္ဂောံ ဗ္စာရဏာရော?
သွဟ် ။ ။
ညးဆာန်ဇကုဂှ် ဗ္တောန်ကဵုသွက်ဂွံသိပ်ဂၠိပ်ဇပ်ဍပ်ရ ညးက္ဍုဟ်ဇကုဂှ် ဗ္တောန်ကဵု သွက်ဂွံဂွံစွံဓရ်သတိရ ညးဟွံသ္ပဂရုကဵုဇကုဂှ် ဗ္တောန်ကဵု ဇကုဇကုသွက်ဂွံကလေင်ပတေှ်စ ဇကုဇကုပၠန်ရ ယဝ်ရုပ်သာ် ဟွံကျေဝ်ဂေါဝ်မ္ဂး စိုတ်လ္ပလီုလာ်ညိ ရုပ်ဥပဇိ ညံင်ဂွံသပ္ပါဲဂှ် မံင်စံင်ညိ ( ဥပမာ ပွမမံင်စံင် သောင်သေင်အးအး ဗွိုက်လ္တက် သိပ်ဂၠိပ် ကၠောန်သ္ပ ဟီုဂး ဗွဲအိန်ရဳ စစၞလ္ပကဵုၜက်ညိ ။
-----------------------------------------------------
(၁၃)
သၟာန် ။ ။
မၞိဟ်လၞုဟ် ပၠေင်ပုင်ဂှ် ပရေံယုတ်သဝ်နူကဵု မၞိဟ်စုတိချိုတ်အာဂှ်ဏီ ညံင်ဟွံဂွံလၞုဟ် (ဝါ) ညံင်ဟွံဂွံသၠးဂှ် သ္ဒးစဳဇန်လဝ် ဗီုသာ်လဵုကီုရော?
သွဟ် ။ ။
မုကမၠောန်မွဲ ဟွံသ္ပတီမံင်ထောံသၟးသၟးဂှ် လုပ်အာက္တဵုဗဒှ်ကဵု စိုတ်ဓါတ်ပရေံပရေံမာန်ရ လအ်ကၠုင်တေှ် စိုတ်ဓါတ်ထုဲကၠုင် သွက်ဂွံပ္တဝ်မုက်အကြာညးလိုက်လောက အရာရာဂှ် ဇြိုင်ကၠုင်ဒိုတ်ရ အကုသိုလ်စိုတ်ကီု ပွမဗျဵုတဟင်ကီု ပၟတ်သဝာက စံင်ပၠေင် တအ်ဂှ်လေဝ် က္တဵုဒှ်ကၠုင်မာန်ရ ဟိုတ်ဂှ်ရ ညံင်ဟွံဂွံသၠးဂှ်လေဝ် ဒးဓဇက်လဝ် သ္ၚိအင် ပ္ဍဲဂၠမ်သြိုဟ်တေံ အခိင်မၞုံကဵု ဂုဏ်ဖိုလ်ဂှ် ထေက်ရ ။
-----------------------------------------------------
(၁၄)
သၟာန် ။ ။
ဘဝပိုဲ ဂွံခိုဟ် ဂွံပရေံမာန် စနူကၠေင်က္ဍဟ် ပွမချပ်ဗ္စာဂှ်ရ တီသာ်ဏအ်တုဲ ဗီုလဵုဂွံသုင်စောဲ ကၠေင်က္ဍဟ်ဂှ်ရော?
သွဟ် ။ ။
ညးသုင်စောဲကၠေင်က္ဍဟ် ဂ္စာန်ကၠောန်ကမၠောန်နကဵုကၠေင်က္ဍဟ်ဂှ် အခါရကၠေင်က္ဍဟ် ဍောင်ၜတ်ကၠုင် သွက်ဂွံဇူဒီု နူကမၠောန်ဂှ် ကိစ္စဇၞော်ကွေံရ ပရေင်ကမၠောန် ဂွံစိုပ်ဒတုဲပြဟ်ဟေင် ဃရေက်ကၠောန်ဒၟံင် လအ်ကၠုင်မ္ဂး ဒးဒုင်စသိုင် ယဲစိုတ်ဇၞော်ကဵု ဇြဟတ်မာန်ဏောင် ။
-----------------------------------------------------
(၁၅)
သၟာန် ။ ။
ပွမတဵုလွဳ ပရေင်စိုတ်ဓါတ်ဂှ် ကိစ္စအမှုအရာဟွံသေင် ဒှ်ဟိုတ်ပါရမဳဟေင် ဟိုတ်ဂှ်ရ လောကဓရ် ဇီုကပိုက်ကၠုင်မ္ဂး ဗီုလဵုဒးစွံစိုတ်ဓါတ်ရော?
သွဟ် ။ ။
စွံတင်ရန်တၟအ် မွဲမွဲသာ်တုဲ ညံင်ဂွံစိုပ်ဒတုဲ ဂိုတ်ဂစာန်ညိ နနဲသာ်ဝွံ ဟိုတ်တတ်ကၠောံ တၞဟ်တၞဟ်မာန်တုဲ နူဆဵုဂဗ မွဲက္ဆံင်ကဵုမွဲက္ဆံင်ဂှ် စိုတ်ဓါတ်ခိုင်ကၠိုက်ကၠုင်မာန်ရ ။
-----------------------------------------------------
(၁၆)
သၟာန် ။ ။
ကံကုသိုလ်ဇကု ဒှ်ကၠုင်သ္ၚု ညံင်ဂွံဒှ်ကွာင် မၞုံကဵုၚုဟ်မးဂှ် ဗီုလဵု သ္ဒးဂိုတ်ကၠောန်ရော?
သွဟ် ။ ။
ၜိုတ်ကလိဂွံအခေါင်ဂှ် ကၠောန်ပ္တိတ်စဵုကဵု ပရဲဂွံတိတ် ဂၠိုင်ဂၠိုင်ညိ ဟိုတ်ဂှ်ရ သွက်ဂွံကၠောန် ကမၠောန်တ္ၚဲယးဂှ် ဖန်ဖက်လဝ် ဟတဲု ၜိုန်ဂှ်လေဝ် စိုတ်လ္ပကဵုကၠိခ္ဍက်အာညိ ကမၠောန်တုဲမာန်တ္ၚဲဏံဂှ် လ္ပကဵုသေှ်ၜက်ထောံ တ္ၚဲယးတေံညိ ။
-----------------------------------------------------
(၁၇)
သၟာန် ။ ။
ပ္ဍဲလောက ကေတ်မ္ဂး ဒးဂွံ အာမ္ဂး ဒးစိုပ် ကၠောန်မ္ဂး ဒးဒှ်ဏောင် ၜိုန်စွံလဝ်ဆန္ဒ သ္ကာတ်သ္ကာတ်မြဟ်မြဟ် ကီုလေဝ် ညံင်စိုတ်ဓါတ် ဟွံဂွံဍိုန်လျဂှ် ဗီုလဵုသ္ဂောံ ဗ္စာရဏာရော?
သွဟ် ။ ။
ကၠောန်မ္ဂး ဂွံဒုင်စသိုင်ဏောင် ( ဟွံဗၠေတ် ဟွံယောင်ပုဟ် လ္ပတော်လဝ် ချိုတ်ချိုတ်ပၠိုတ်ပၠိုတ်ညိ ) အတိုင်ထေင် ဟွံဒှ်ကၠုင်မ္ဂး ဗီုလဵုဂွံပ္တဝ်မုက် စွံစိုတ်ရော မပ္တမ်သာ်ဝွံ ချပ်စောန်စာ ပဠေဝ်ပဠေတ်လဝ်ညိ နဲဏံဝွံ ဆေဝ်ဒဝ်ကဵု စိုတ်ဓါတ် ဍိုန်လျတအ်ရ ။
-----------------------------------------------------
(၁၈)
သၟာန် ။ ။
ကံနူအတိက် ကဵုဖဵုပ္ဍဲခဏ ပ္တန်ပဋိသန္ဓိပိုဲတုဲ ပ္ဍဲကဵုပစ္စုပ္ပန် အခိင်လဵု ဍေံကၠုင်ကဵုဖိုလ် ကဵုပိုဲရော? ဟိုတ်နူပိုဲညာတ်ကေတ် ဟွံမာန်တုဲ ပတေှ်ကမ်အတိက် သၟးလေဝ် ဟွံတုဲရ ဘဝဇကုဂွံဇၞော်မောဝ်ဂှ် နွံပာဍဲအစောန်စရာဲဇကုတုဲ ပတေှ်ဗေဒင်သၟးလေဝ် ဟွံတုဲရ ဟွံသေင်ဟာ?ကၠောန်ကမၠောန်မွဲမွဲ ဒးဍိုက်ပေင် အဂႅမူစိသာ်မှ ဂွံအံင်ဇၞးမာန်ရော?
သွဟ် ။ ။
(၁) ကာယဗလ ဒးဍိုက်ပေင်ကဵု ညးဒုင်ကၠောန်ပ္တိတ်ဇြဟတ်မာန်
(၂) ဉာဏ ဗလ ဒးဍိုက်ပေင်ကဵု ညးကဵုကသပ်ဉာဏ်ကီုမာန်
(၃) ဘောဂ ဗလ ဒးဍိုက်ပေင်ကဵု ညးပ္တိတ် ပိုန်ဒြပ်မာန်
(၄) မိတ္တ ဗလ ဒးဍိုက်ပေင်ကဵု မိဿဟာဲ ခိုဟ်ဆာဲမာန်
(၅) စာရိတ္တ ဗလ ဒးဍိုက်ပေင်ကဵု ညးမၞုံကဵု ဒ္ဂေတ်မပြဲမာန်
အဵုဍိုက်ပေင်ကဵုအဂႅ(၅)သာ် ဏံတေှ် မုကမၠောန်ကၠောန်ကၠောန် ဒးအံင်ဇၞးမာန်ဟေင်ရ ။
-----------------------------------------------------
(၁၉)
သၟာန် ။ ။
ကၠောန်သွက်ဂကူ ညးလဵုဟွံဍဵုဍိုက်တုဲ ဂၠံင်တရဴဗောဓိသတ် ပိုဲရ ဟွံသေင်ဟာ ကမၠောန်ခိုဟ် ပြဲနူဏံဂှ် ဟွံမွဲရ မုဟိုတ်ညးလ္ၚဵု စိုတ်ဓါတ် ဂွံအေဲဇြအာ မာန်ဂှ်ရော?
သွဟ် ။ ။
ကၠောန်ကမၠောန် သွက်ညးဟလိုင်မ္ဂး ညးဟလိုင်ထိုင်သးတုဲ ဂွံဒုင်စသိုင်ဂှ် လ္ပစၟဳညိ ယဝ်ရစၟဳမံင် ဗီုဂှ်တေှ် နူကဵုကမၠောန်ဇကု ဇၞော်မောဝ်ကၠုင် ညးပါ်ပါဲညးဟီုဂရိုဟ်တေှ် စိုတ်ဓါတ်လီုလာ်မာန်ရ ညံင်တၞံဆုဒုန်တအ်ဂှ် ပကောံပကေဝ်နင် ရှ်သာနာနာ မပ္တမ်တိဍာ်တအ်တုဲ ညးတၞဟ်တအ်ကၠုင်ၜှ်ဏာ သတ်ဆုဒုန်ဇကုဂှ် ဗီုလဵုညးတၞဟ် ဂွံထိုင်သး ဂွံဆာပ်ဂုဏ် ဇကုဂှ် ဟွံစၟဳတဴရ ပူဂဵုမၞုံကဵုစိုတ်ဓါတ် ဗီုဏံဂှ် ဒှ်ပူဂဵုအာဇာနဲပၠတရဴ ကောန်ဂကူပိုဲဍာံဍာံတုဲ ကမၠောန်ဇကု မရန်တၟအ်လဝ်ဂှ် အံင်ဇၞးကၠုင်မာန်ရောင် ။
-----------------------------------------------------
(၂ဝ)
သၟာန် ။ ။
ပ္ဍဲဂၠးတိဏံ ဂကူပိုဲမန်ဂှ် ဒှ်ဂကူတမ်မူလ မွဲဂကူကီုရ ဂကူမန်ပိုဲတအ် ပြးဇးမံင် ပ္ဍဲဂၠးတ်ဏအ်ဂှ် ဂၠိုင်နူကဵုဂကူတၞဟ်တအ်ဏီရ ဟိုတ်နူ ဂကူမန်ပိုဲ ဝိဝိင်ဟိုတ်မာဲဒၟံင် နာနာသာ်တုဲ ကြပ်ပေင်ကၠင် (၂၅ဝ) သၞာံရ ဟွံသေင်ဟာ ကၠောန်နဲကဲ သာ်လဵုမှ ဂကူမန်ပိုဲ က္ဆံင်ဂွံသၠုင်တိုန်မာန်ရော?
သွဟ် ။ ။
(၁) ဒးဗ္တောန်ကဵုလိက်မန် ကွတ်ပညာ ကာဆံင်သၠုင်သၠုင်ရ
(၂) လေပ်လိက်မန်တုဲ ဗှ်လ္ၚတ်ရံင် မပ္တမ်လိက်ဝင်မန် လိက်မန်နာနာသာ်မာန်တုဲ စိုတ်ဓါတ် ဆာန်ဂကူမန်ဍာံဍာံဂှ် မံက်ကၠုင်မာန်ရ
(၃) စိုတ်ဓါတ်နွံတုဲ သၠးအတ္တတုဲ ဗွဲမသၟဟ်အစောံကဵုဇကုဂှ် လုပ်ယိုက်ဂၠေင်တာလျိုင် သွက်ဂကူမန်မာန်ရ (ယိုက်ဂၠေင်လဝ် တာလျိုင် သွက်ဂကူမန်တုဲညံင်ဂွံဍိုက်ပေင် စိုပ်ဒတုဲမာန်ဒးဂံင်ကၠောန်မှ ဂွံဒှ်မၞိဟ်ခိုဟ်မွဲရ )
(၄) သၠးအတ္တမာန်တုဲ လညာတ်ဍာံ လညာတ်သၠုင်နွံမှ ကၠောန်ပရေင်ဍုင်ကွာန် သွက်ဂကူမန် ဂတာ်ခေတ်မာန် စန်ဒက်အာဂတ သွက်ကောန်ဂကူမန်ပိုဲမာန် စိုတ်ဓါတ်ရာဇာဓိရာဇ် မံက်ဂတဝ်ကၠုင်မ္ဂး ဂွံအံင်ဇၞးပ္ဍဲအရာကမၠောန်ဇကု မရန်တၟအ်လဝ်ဂှ် မာန်ရ ။
-----------------------------------------------------
(၂၁)
သၟာန် ။ ။
အခိင်တ္ၚဲဏံ ကောန်ဂကူမန်ပိုဲ လညာတ်ဟွံတုပ် ရမျာင်က္ညာင်ဟွံညဳ ပါ်မံင်ဆီမာနသၠုင် ပ္တဝ်က္ဍိုပ်ညးသ္ကအ် ဟွံမာန်တုဲ ဟွံတိတ်ဗၠးနူဘဝ ဍိက်ဂၠုဲဏံရကၠောန်နဲလဵုမှ ဂွံအံင်ဇၞး ဂွံဗၠးနူဒဒိုက် ဘဝဍိက်ဂၠုဲဏံရော?
သွဟ် ။ ။
ညးကၠောန်ဗက်စဇကု ဟွံမာန်တုဲ လာပဟီုဂရိုဟ် လ္ပသ္ပသၞ လ္ပဍဵုဍိုက်ညိ ညံင်ဂွံကၠောန်အာ သွက်ဂကူ မွဲစွံမာန်ဂှ် ဒးဂံင်ဒုင်ပါ်ပါဲ ဒးသၠာဲဂတးလညာတ်ဉာဏ် ဆဵုဂၠံင်တရဴဍာံတုဲ ဂကူမန် မတန်တဴမံင် ပ္ဍဲဂၠးတိဏအ် ဖ္အိုတ်ဂှ် ဒးဂံင်ကၠောန်အာ သွက်ဂကူမန် နကဵုဗီုပြင် နဒဒှ်ညဳညဳသာသာဂှ် မၞိဟ်ညး မၞိဟ်အဲ လ္ပရံင် လ္ပပါ်ဆီ ညးမၞုံကဵုဍာ်ဒကေဝ် ပေင်ပေင်ဂှ် ကဵုညးအာဂတ ပၠတရဴနဒဒှ်ဗီုပြင်(ဗဟိုရ်) မန်ဖအိုတ်ဒ္ဂေတ်ဗက်သၞောဝ် မွဲ(ဗဟိုရ်)ဓဝ် ရပ်ဇုက်တုဲ ကၠောန်အာ ဍိုက်ဍိက်ပေင်ပေင်မာန်မ္ဂး ဂွံဗၠးတ်တ်နူဘဲ ဘဝဒဒိုက်ဍိက်ဂၠုဲ ဟေင်ရ ညးလဵုမွဲလေဝ် ဟွံဂံင်ဍဵုဍိက်ကောန်ဂကူမန် ပိုဲတအ်ရ ။
လိက်ဝွံ ကံက်ပ္တိတ်နူ လိက်ကၞပ် လဂါံအာဇာနဲ ကၞပ် (၃)
မုက်လိက် (၂၁) အ္စာကၞေဟ် ရတ်ရတ် မဒှ်ရ
ညးမကံက်ပ္တိတ် အမ်သဝ်နာဲ အၜဝ်