ညးလွပ်:Naijavana
ဝၚ်ကျာ်တြဲဂေါတမ
ကျာ်ဇၞော်အ္စာဘဒ္ဒန္တဝိဇ္ဇာနန္ဒ (ဝေဒဂူ)
နွံပိုဉ် ဘာမဟာဗောဓိ ၊ ကွာန်ဝၚ်ဒုန် ၊ ပွိုၚ်ဍုၚ်မုဟ်ဍုၚ် ၊ ဍုၚ်မန် (၁၃၂၆−၁၃၆၉) ချူခၞံလဝ် သၞာံတက်တြး သာသနာကျာ် ၂၅၅၅ သက္ကရာဇ် ၁၃၇၃
နိဒါန်
နမော တဿ ဘဂဝတော အရဟတော သမ္မာသမ္ဗုဒ္ဓဿ
နူမူလကဝ် တိဒှ်ဒကှ်တိုန်တေံ ကောန်မၞိဟ်ဂမၠိုၚ် ၜိုန်ရဟီုတဴအရေဝ် မွဲဂကူဓဝ် (အရေဝ်ပါဠိမာဂဓ) ကီုလေဝ် ဗွဲကြဴဏအ် ဗက်ကဵုဌာန်ဒေသ ဥတု တိဍာ်တအ်တုဲ အရေဝ်ဒှ်တိုန်ဂၠိုၚ်ကဵုသာ် ပါ်တိတ်ကၠုၚ် ဂၠိုၚ်ကဵုဂကူရ။ ပ္ဍဲလတူဂၠးကဝ်ဝွံ ပၞောဝ်ကဵုဂကူဂမၠိုၚ် နွံတဴကၠံမွဲ(၁၀၁) ဘာသာတအ်ဂှ် ဂကူမန်ပိုဲလေဝ် လုပ်လၟိဟ်မွဲကီုရ။ မူဟိုတ်ဂွံကော်ခဴစမန်ဂှ်ရော? ယဝ်သၟာန်တဴမ္ဂး "ပဌမံ ရတနတ္တယံ မနတိ ဇနတဳတိ မနံ" ယံ− ယြဴၚ်ဂကူမွဲ၊ ပဌမံ−ဗွဲကိုပ်ကၠာနူဂကူသအာၚ်၊ ရတနတ္တယံ−န်ဂကောံဂုဏ်ရတ်ပိပြကာမတွံဂး ကျာ် ဓရ် သၚ်၊ မနတိ ဇနတိ− ပ္ဍံလေပ်တီတဴရ၊ ဣတိ တသ္မာ− ဟိုတ်သတ္တိမလေပ်တီတဴ ပရဲဂုဏ်ရတ်ပိပြကာ ကိုပ်ကၠာနူဂကူသအာၚ်ဂှ်ရ၊ တံ− ၚ်ဂကူဂှ်၊ မနံ− မန်မ္ဂးယၟုရ။
အဓိပ္ပါယ်တုန်−− ယြဴဂကူမွဲ လေပ်တီတဴပရဲဂုဏ်ရတ်ပိပြကာ ကိုပ်ကၠာနူဂကူသအာၚ်ရ၊ ဂကူမလေပ်တီတဴ ပရဲဂုဏ်ရတ်ပိပြကာ ကိုပ်ကၠာနူဂကူသအာၚ်ဂှ် မန် မ္ဂးယၟုရ။
ဂလာန်ဂှ် ဍာံဗွဲမလောန်− အဲဂံၚ်ဟီုရ၊ မူဟိုတ်ရော? ကလိလောန်တုဲ ဗၞတ်ၜါလ္ၚီမသုန်ကၠံသၞာံပြၚ်တေံ ကျာ်တြဲဂေါတမ ကတဵုဒှ်ကျာ် ဂြၚ်တီဓရ် ပ္ဍဲသၟဝ်တၞံဇြဲဗောဓိ လတူပၞၚ်ရတ် ပ္ဍဲဂယာသဳသ မလုပ်လၟိဟ်တွဵုရးဍုၚ်ဣန္ဒိယ လၟုဟ်ဝွံရ။ ဒှ်ကျာ်တုဲ ဒုၚ်စသိုၚ် တသိုခ်ဖလသမာပတ် ပ္ဍဲသၟဝ်တမ်ဇြဲဗောဓိ ပ္ဍဲလတူပၞၚ်ရတ် ပလ္လၚ်္ကသတ္တာဟ လုကဴဗၞတ်ထပှ်တ္ၚဲတုဲ ဗွဲလၟေၚ်လၟေၚ် ကတဵုတိတ်အာ ဒုၚ်စသိုၚ်ဖလသမာပတ် ပ္ဍဲအနိမိတ္တသတ္တာဟ၊ စၚ်္ကမသတ္တာဟ ၊ ရတနဃရသတ္တာဟ ၊ အဇပါလသတ္တာဟ ၊ မုစလိန္ဒသတ္တာဟ လုကဴဗၞတ်ထပှ်ထပှ်တ္ၚဲတုဲ ပ္ဍဲကာလမအာစိုပ် ရဇာယတနသတ္တာဟ မရနုက်ကဵုထပှ် ဃောဒုၚ်စသိုၚ်ဒၟံၚ်တသိုခ်ဖလသမာပတ် ပ္ဍဲတမ်ဆုဗပိုန်ဂှ် နူတွဵုရးဂၠးတိရာမည ဇနပိုဒ်ဥက္ကလာပ ဍုၚ်ပေါက္ခရဝတဳ− တေံ (ဍုၚ်လ္ဂုၚ် ကော်လၟုဟ်) ဟိုတ်မၞုံကဵုကၟာလစဇၞော် မၞုံယၟုကၟာဇၞော် ( ဂါန်ကျဳ၊ အေန်ယျာဂါန်) ကၟာရတ်တအ်ဂှ်တုဲ ဍုၚ်ပေါက္ခရဝတဳ ရဴသာ်ဝွံ ကော်ခဴလဝ်ယၟု ဗွဲဘာသာပါဠိရ။
ပါဠိမ္ဂး ပေါက္ခရဝတဳဂှ် တွံအရထမ္ဂး ကၟာလစရ။ (ပ္ဍဲလိက်လ္ၚဵု ဍုၚ်အသိတဉ္ဇန ရဴဝွံလေဝ် ချူတဴအိုတ်ရ။) ကောန်ညးဗၞိက်ၜါ ကောကဵုဒေံ တပူ၊ တဗဝ် ဂးယၟု (ဗွဲဘာသာပါဠိ −တဖုဿ ၊ ဘလ္လိက ဂးယၟု)ရ။ တၞဟ်နသွံရာန် လှာဲဂတးစဗၞိက်တုဲ