ညးလွပ်:Wunchay Rukchaytdee
ယဝ်ရဍုၚ်ဗၟာ ဟွံကလိဂွံအခေါၚ်သ္ပစၞး ပ္ဍဲယူအေန်မဂး ဒဵုဗျု ဂိတုသာပ်တေမ်ဗာ ၁၆၊ တ္ၚဲဗြဴဗတိ၊ ၂၀၂၁ သွက်ဂွံပၠံၚ်အဝဵုဒၞာဲခုၚ် ပ္ဍဲဂကောံကုလသမဂ္ဂ ဍေံမစိုန်ဒှ်တဴဒၞာဲ ဂွံဟီုသ္ပစၞးကၟိန်ဍုၚ်ဗၟာဂှ် ကံၚ်သဳပၞာန်ကဵုဂကောံအေန်ယူဂျဳ မ ဒးဒုၚ်သီအဝဵုတအ် ဗီုညးညးဂစာန်လွဳပရာကၠုၚ်ဂှ် မဟာမိတ်ညးတအ်ဇၞော်အိုတ် အမေရိကာန်ကဵုကြုက် လုပ်စမွဲမွဲလပါ်ဂှ်တုဲ ညးတအ်သီုၜါဂကောံဂှ် မွဲဂှ် ကလိဂွံအခေါၚ်တိုန်စိုပ်တုဲ ဟွံကလိဂွံအခေါၚ်ဟီုဂးမွဲမွဲသာ်၊ မွဲဂှ် ဟွံကလိဂွံအခေါၚ်တိုန်စိုပ်သက် သက်၊ ပြဟ်ဟ်ဏံဒးဟီုစ ညးကျအဲကျ၊ ညးဟွံဇၞးအဲဟွံဇၞးဂှ်တုဲ သွက်ဂကောံကံၚ်သဳပၞာန် ဂွံဒှ်အာဗဗွဲဓဝ် ပ္ဍဲအဆံၚ်ဂၠးတိဂှ်လေဝ် လပါ်အမေရိကာန် မဒှ်မဟာမိတ်ကဵုအေန်ယူဂျဳဂှ် ဗက်ဒစဵုဒစးမံၚ်ပေၚ်ၚ်ဂှ်တုဲ အခိၚ်တ္ၚဲဏံပၠန် နကဵုဍုၚ်ပြၚ်သေတ်လေဝ် ထပ် လလောၚ်တရးဏာ ညးသ္ပလဝ်စၟတ်သမ္တီကဵု သွဟ်ပေဲါရုဲမာဲဖိုဟ်ဂှ်တုဲ၊ ဂလာန်ညးတအ်ဂှ် ကလိဂွံအဓိပဲါ ညးတအ်သ္ပလဝ် စၟတ်သမ္တီ နဒဒှ်အလဵုအသဳအေန်အေဝ်ဒဳဂှ် ဒှ်အလဵုအသဳဗဗွဲဓဝ်တုဲ ကံၚ်သဳပၞာန်(ဝါ)အလဵုအသဳမၚ်ဍုၚ်ကွာန်ဂှ် ဟွံဗဗွဲဓဝ်ရောၚ်။ ရံၚ်ကဵုဒတဴလိုၚ်ဍုၚ်အမေရိကာန်ကေုာံမဟာမိတ်ညးတအ် ညံၚ်ရဴဍုၚ်ပြၚ်သေတ်၊ ယူခေတအ်ဂှ်မဂး ညးတအ်ကေတ်စလပါ် အလဵုအသဳအံၚ်ဆာန်စုကျဳတအ်ပေၚ်ၚ်ဂှ်တုဲ၊ ဒတဴလိုၚ်ဍုၚ်ကြုက်ကဵုရာတ်သာတအ်ဂှ် ညးတအ်ကေတ်စလပါ်ကံၚ်သဳပၞာန် ပေၚ်ၚ်ပၠန်ဂှ်တုဲ ဇြဟတ်တံၚ်ဂြဲဂၠးတိတအ်ဂှ် ဟိုတ်နူဇၞော်လောန်ဂှ်တုဲ ပေဲါပြိုၚ်ပကာန်အဝဵုအကြာဗော်ဗၟာၜါ ဂွံအုပ်ဓုပ်ဍုၚ်ဗၟာဂှ် လောဲလောဲသွာသွာ တုဲဒှ်အာဟွံမာန်ရ။ ပၞာန်ဂှ်လေဝ် ဂွံဒှ်ဗဗွဲဓဝ် ပ္ဍဲအဆံၚ်ဂၠးတိဂှ် ဟွံလောဲ၊ ဂကောံအေန်ယူဂျဳတအ်ဂှ်လေဝ် ဂွံကလေၚ်ဒှ်အလဵုအသဳ ကလေၚ်ဂွံအဝဵုပၠန်ဂှ် ဟွံလောဲသွာ။ ၜါလပါ်ဏံ ညးဂွံကေတ်ဇၞးလတူအဲ အဲဂွံကေတ်ဇၞးလတူညးဂှ် ဖန် လောဲသွာတဴဟွံသေၚ်ရောၚ်ဂှ် ရံၚ်ကဵုအကာဲအရာသတ္တာဟဏံ ဗီုကတဵုဒှ်မံၚ် ပ္ဍဲအဆံၚ်ကောံဓရီုယူအေန်ဂှ်မဂး ကၠးကေတ် မာန်ရ။ ပရိုၚ်တအ်ဟီုတဴဂှ် အမေရိကာန်ကဵုကြုက် ကၠတ်ပညဳညးသကအ် ကိုပ်ကၠာဟွံစိုပ်ကောံဓရီုယူအေန်က္ဍၚ်ဂှ်တုဲ ကလိဂွံ တၚ်တုပ်စိုတ်၊ ဆက်ဒုၚ်အာတဲကဵုအမာတ်ကုလသမဂ္ဂ နူအေန်ယူဂျဳ နာဲကျဝ်မိုဝ်ထောန်၊ ဆဂး ဟွံကဵုညးတေံဟီုဂလာန် ညံၚ်ရဴကၠာကၠာတေံကီု၊ ဟွံဒုၚ်တဲကဵုအမာတ်ကံၚ်သဳပၞာန်မခါန်ကၞက်လဝ် နာဲအံၚ်သူရိန်ဏီဂှ်တုဲ စိုပ်ဂိတုနောဝေမ်ဗာတေံမဂး ကမ္မတဳစၟဳတ်အစောံစရာဲ ကော် Credentials Committeeဂှ် ဒးစၟဳတ်ညးစၞးနူဍုၚ်ဗၟာတအ်ဂှ်တုဲ ဒးပလံၚ်ဗစိုပ်ကဵုသဘၚ်သဳကၠဳ ဇၞော်ယူအေန် သွက်ဂွံသ္ပစၟတ်သမ္တီ နဒဒှ်ညးစၞးဗဗွဲဓဝ်ဒဒက်တဴကဵုဍုၚ်ဗၟာရောၚ်။ အကြာဏံဂှ် လပါ်လဵုမွဲလေဝ် အခေါၚ်ကဵုသ ဂုတ်သွာတ်ကံကုသဵုကၟိန်ဍုၚ်ဗၟာဟွံမွဲဏီဒးဟီုရောၚ်။ စိုပ်အခိၚ်တေံလေဝ် သဂုတ်သွာတ်မွဲမွဲသာ် ကၠးကၠးမးမးစှေ်ကၠုၚ်မာန် ဟာဂှ် ဒးမၚ်ဗဵုအာဏီရ။ ယဝ်ရပိုဲရံၚ်အာကဵုမတ်ဓမ္မတာမဂး ကံၚ်သဳပၞာန်ဂှ် ညးတအ် ကေမ်္ၚာပ်ဂွံလဝ်အဝဵုအလဵုအသဳ ပ္ဍဲဍုၚ်ဗၟာပေၚ်ၚ်ဂှ်တုဲ မူမွဲကီုပကဵု ညးတအ်ဟွံမာန်ဂးကီုလေဝ် ဆဂး ဂကောံဍုၚ်ဒဳမဝ်ကရေဇြဳဇၞော်ဇၞော် ညံၚ်ရဴအမေရိကာန် ကေုာံ မဟာမိတ်ညးတအ် ယဝ်ရ ဟွံသ္ပစၟတ်သမ္တီ နဒဒှ်ဗဗွဲဓဝ် ပ္ဍဲအဆံၚ်ကုလသမဂ္ဂမဂး သွက်ဂွံသ္ပစၞးဍုၚ်ဗၟာဂှ် ကံၚ်သဳပၞာန်တအ် ဖန်က်ဟွံဂွံဂှ်တုဲ အကာဲအရာဝွံ ဍေံဒှ်အာဇြဟတ်စိုတ်ကဵုဂကောံအေန်ယူဂျဳတအ် ဇၞော်ကဵုဇြဟတ်ဂှ်တုဲ သွက်ဂွံဝေၚ်အာပေဲါပၞာန်အပ္ဍဲဍုၚ်ဂှ်လေဝ်ကီု၊ သွက်ဂွံက လေၚ်သီဗၜေါဝ်ဇြဟတ် ကောန်ဍုၚ်အရၚ်တအ်လေဝ်ကီုဂှ် ဒှ်အာအထံက်အပၚ်ဇၞော်ဇၞော်ရ။ ယဝ်ရစိုပ်အခိၚ်သဘၚ်သဳကၠဳဇၞော် ဂိတုနောဝေမ်ဗာတေံ ကံၚ်သဳပၞာန်တအ် ဒှ်အာဗဗွဲဓဝ်မဂး ဂကောံအေန်ယူဂျဳဂှ် သွက်ဂွံဒေါံကၟိုၚ်စှေ်အာမာန်ရောၚ်။ ဆဂး ညံၚ် ဟွံဂွံဒှ်အာဗီုပြၚ်သာ်ဂှ်မာန် အလဵုအသဳအမေရိကာန်တအ် ဂစာန်လွဳပရာမံၚ်ပေၚ်ၚ်ရောၚ်ဟီုဂှ် သက်သဳသာဓကတ္ၚဲဏံ ပိုဲ ညာတ်ကေတ်မာန်ရ။ မွဲလပါ်ပၠန်ဂှ် ညးစၞးကုလသမဂ္ဂ သွက်ဍုၚ်ပိုဲဂှ်လေဝ် ညးတအ်လုက်စုက်မံၚ်ကဵုဂကောံရပ်လွဟ်ကောန် ဍုၚ်အရၚ်တအ်ကီုဂှ်တုဲ ရမ်သာၚ်ကောန်ဍုၚ်အရၚ်တအ်ဂှ်လေဝ် လျောဝ်ဗက်မံၚ်လပါ်အေန်ယူဂျဳကီုရောၚ်ဂှ် ညာတ်ကေတ် မာန်ပၠန်ရ။ ရံၚ်ကဵုဝၚ်မွဲပ္ၚံက်မဂး ဗော်ပရေၚ်ဍုၚ်ကွာန် ကေုာံ ဗော်ရပ်လွဟ်ကောန်ဍုၚ်အရၚ်တအ်ဂှ်လေဝ် ကၠောံဍမံၚ်ကဵုအ မေရိကာန်ဂၠိုၚ်ကီုရောၚ်ဂှ် ပိုဲဒးညာတ်ကေတ်သာ်ဂှ်မာန်ကီုရ။ ယဝ်ရပ္ဍဲအဆံၚ်ကုလသမဂ္ဂတေံ အမေရိကာန် ကေုာံ မဟာမိတ်ညးတအ် ဗလံက်ထောံ ဟွံဒုၚ်တဲကဵုညးစၞးကံၚ်သဳပၞာန်တအ်ဂှ် မဂး ပၞော်တိတ်တၞဟ်ဟ် သွက်ကံၚ်သဳပၞာန်တအ် နွံသာ်လဵုဏီရောဂှ် ပိုဲဒးဂၠိုက်ဂၠာဲရ။ ညးစၞးနာဲကျဝ်မဵုထောန်ဂှ် ဟိုတ်နူနွံမံၚ်ပ္ဍဲ ဍုၚ်အမေရိကာန်ဖိုဟ်ဂှ်တုဲ ၜိုန်ရကြုက်ဟွံတုပ်စိုတ်ကီုလေဝ် ညးတေံ အာစိုပ်ဂတမုက်ရုၚ်ကုလသမဂ္ဂ အခိၚ်ကောံဓရီုမာန်ဏီ ဂှ်တုဲ မွဲနဲမွဲဗီု ညးတေံကလိဂွံအခေါၚ်ဟီုဗၟံက်မွဲမွဲသာ်မာန်ဏီဂှ်တုဲ သွက်အေန်ယူဂျဳဂှ် သာမံၚ်ရ။ ဂကောံအေန်ဂျဳအိုဝ်ဇၞော်ဇၞော် တအ် ထံက်ဂလာန်ညးတေံလေဝ် ဒှ်မာန်ဏီရ။ ပ္ဍဲမ္ၚးကောံဓရီုဂှ် ညးတေံ ဒုၚ်ဆဵုကဵုအစာပရိုၚ်တအ်တုဲ ဟီုပတိတ်လညာတ် ဂွံ မံၚ်တၟာဂလိုၚ်ဏီရ။ ညးစၞးကံၚ်သဳပၞာန်ဂှ် အမေရိကာန် ဟွံကဵုလုပ်ဍုၚ် ဟွံပတိတ်ကဵုဗွဳဇြာမဂး အကာဲအရာဂှ် ဂတးဂတန် အာမွဲမွဲဗီုလေဝ်မာန်ဏီရ။ ဍုၚ်ဇၞော်ဇၞော်တအ် ဝေၚ်နဲကလုတ်ညးသကအ်မဂး သီုညးစၞးၜါလပါ်ဂှ် ဟွံကလိဂွံတိုန်စိုပ်ကောံဓရီု ပ္ဍဲယူအေန်မဂး အခိၚ်ဂှ် သွက်နာဲကျဝ်မဵုထောန်ဂှ် အာထ္ၜးဆန္ဒပ္ဍဲမ္ၚးရုၚ်ယူအေန်မာန်ဏီဂှ်တုဲ သွက်အေန်ယူဂျဳတအ် သာမံၚ်ညိ ဏီဒးဟီုရ။ အကာဲအရာဂိတုနောဝေမ်ဗာတေံဂှ် ညးစၞးနူကံၚ်သဳပၞာန်တအ် ဂွံတိုန်သ္ပစၞးပေၚ်ၚ် ပ္ဍဲယူအေန်ဂှ် ကြပ်ဒှ်ဟွံမာန်ရ။ ယဝ်ရယူအေန် တုပ်စိုတ်ကဵုညးစၞးအေန်ယူဂျဳမဂးရော သာ်လဵုမကတဵုဒှ်မာန်ဂှ်ရော ဂလာန်စောဒနာသာ်ဝွံလေဝ် ကတဵုဒှ်ကၠုၚ် မာန်ဏီရ။ ဆဂး ဂွံတုပ်စိုတ်ဂှ် ဝါတ်မံၚ်ရောၚ်ဟီုဂှ် သက်သဳကြုက်ကဵုအမေရိကာန် မကလိဂွံတၚ်တုပ်စိုတ်အကြာဏံဂှ် ကၠးမံၚ် တုဲတုဲရ။ ယဝ်ရပၞာန်တအ် ဒှ်အာဗဗွဲဓဝ် ပ္ဍဲအဆံၚ်ယူအေန်မဂး အကာဲအရာဒဳမဝ်ကရေဇြဳ ပ္ဍဲဂၠးတိပိုဲဏံ သုန်စှေ်အာစိုပ်ဂၠးဂတာမာန် ရောၚ်။ ဝါဒဒဳမဝ်ကရေဇြဳဂှ် ဓဝ်ပတှေ်ညးဂၠးတိတအ် အောန်စှေ်အာဇၞော်ဇၞော်ရ။ ဝါဒတၠအဝဵုပၞာန်တအ်ဂှ်လေဝ် ပ္ဍဲဍုၚ်ဗွဲမဂၠိုၚ် တအ် မံက်ဂတဝ်ကၠုၚ် ဗွဲမဂၠိုၚ်မာန်ကီုရောၚ်။ ပရေၚ်သီအဝဵုနူအလဵုအသဳ မဇၞးလဝ်မာဲတအ်ဂှ်လေဝ် ကတဵုဒှ်ဇၟာပ်ပ်ဒၞာဲမာန်ကီု ရောၚ်။ ဟိုတ်ဂှ်တုဲ တၠအဝဵုပၞာန်ဗၟာတအ် ဂွံဒှ်ဗဗွဲဓဝ် ပ္ဍဲအဆံၚ်ကုလသမဂ္ဂဂှ် ဝါတ်မံၚ်တၟာလှေ်ရောၚ် တော်ဆကေတ်မာန်ရ။ ဗီုကတဵုဒှ်မံၚ်တ္ၚဲဏံ စပ်ကဵုပေဲါပြိုၚ်ပကာန် ဂွံသ္ပစၞးပ္ဍဲယူအေန်ဂှ် ကၠာကၠာတေံ ခေတ်ကာလနေဝေန်၊ ခေန်ညောအ်တအ်ဂှ် ဟွံ ကေၚ်နွံကၠုၚ်ဂှ်တုဲ ဍေံဒှ်ဗီုသာ်ဝွံမာန်ရောၚ်ဂှ် ညးဂှ်မွဲ ဟွံကေၚ်တော်ဆလဝ်ရ။ ကၠာတေံ ပၞာန်သီအဝဵုတုဲဗက်ဂှ် ညးစၞးသွက် ယူအေန်ဂှ်လေဝ် ဍေံဒှ်အာညးစၞးသွက်ပၞာန်တအ်ကီုရ။ လၟုဟ်ဝွံ ဟိုတ်နူနာဲကျဝ်မဵုထောန် ဟွံလျောဝ်ဗက်လပါ်ပၞာန်ဂှ်တုဲ အ ကာဲအရာဂှ် ဒှ်အာဂတးဂတန်ရောၚ်။ အလဵုအသဳအမေရိကာန်လေဝ် သ္ပလဝ်စၟတ်သမ္တီ ဒုၚ်လဝ်တဲညးတေံပၠန်ဂှ်တုဲ အကာဲအ ရာဍာံဍာံဂှ် ဗီုဆိၚ်ဂှ်သၟိၚ်ဟွံစၟတ်ရ။ တုဲကၠုၚ်ခြာဟွံလအ်တေံပၠန်ဂှ်လေဝ် ကံၚ်သဳပၞာန်တအ် ဗလးမၞိဟ်ကဵုကၠတ်ဂစိုတ်ညးတေံ ပၠန်ဂှ်တုဲ ဟိုတ်အမေရိကာန် ဂွံလုပ်စလပါ်နာဲကျဝ်မဵုထောန် လပါ်အေန်ယူဂျဳဂှ် လောန်တုဲခိုၚ်ဗိုန်ဂၠိုၚ်အာရ။ ပ္ဍဲဂကောံကုလသမဂ္ဂဂှ် ယဝ်ရဂကောံကံၚ်သဳပၞာန်တအ် ဟွံကလိဂွံအခေါၚ်သ္ပစၞးမဂး သာ်လဵုညးတအ် ချဳဒရာၚ်အာပ္ဍဲကေၚ်ကာ ဂၠးတိဂှ်ရော။ ယဝ်ရအေန်ယူဂျဳ ကလိဂွံအခေါၚ်သ္ပစၞးမဂး အကာဲအရာပရေၚ်ဍုၚ်ကွာန် ဍုၚ်ပိုဲ ဗီုလဵုကြက်ဒှ်အာမာန်ဂှ်ရော၊ ယဝ် ရညးတအ်ကီု အေန်ယူဂျဳကီု ဟွံကလိဂွံအခေါၚ်သ္ပစၞးမဂး သာ်လဵုကံကုသဵုဗၟာ ကတဵုဒှ်အာမာန်ဂှ်ရော။