ဌာန်သဇိုၚ်အဲနာဲ
နိဒါန်[ပလေဝ်ဒါန် | ပလေဝ်ဒါန် တမ်ကၞက်]
ဌာန်သဇိုၚ်အဲနာဲသွဝ်လ္ပအ်မွဲ စပ္တမ်တုဲ နပွမဟီုလဴဟေၚ် ပရေၚ်ထၟံက်ရုပ်ရဴတအ် မံက်တိုန်ကၠုၚ်၊ ဒှ်တိုန်အစဳအဇန် ဂွံကၠုၚ်ပရေၚ်ချဳဒရာၚ်အိုတ်ရ။ လဂွံဍေံဂှ် တၚ်လၟေၚ်ဒတုဲဖိုလ် သွက်မဟာဇန် ဂွံခိုဟ်ၜိုဟ်လလံသာယာမာန် ဒှ်ပဓာန်ရ။
သွဝ်လ္ပအ်မတၟအ်ကၠုၚ်လဝ် နူသၞာံ ၂၀၁၄ တေံဂှ် အခိၚ်စိုပ်သၞာံ ၂၀၁၆ စထမံက်ဟီုတိုန်တုဲ လၟုဟ်မ္ဂး ချဳဒရာၚ်ကၠုၚ်ပေၚ် ၂ သၞာံရ။ ပ္ဍဲသၞာံ ပထမ သီုဒုၚ်သဇိုၚ်ကဵု ပရေၚ်ချဳဒရာၚ် ဒက်ပတန်ဇြဟတ်သၚ်သၟတ်မန် ကေုာံ ဂွံသၠုၚ်ပတိုန်ကွတ်ပညာ IT အြကာသၚ်သၟတ်မန်တအ်ရ။ ဂွံဒုၚ်သဇိုၚ်လ္တူမူဝါဒထံက်ပၚ်ၜါဏအ်ဂှ် မွဲလ္ပာ်ပၠန်ဂှ် ဌာန်သဇိုၚ်ဒးဒုၚ်ကေတ်ပရေၚ်ထံက်ပၚ်နူသ္ကအ်ရဲမိဿဟာဲ ကေၚ်ပံၚ်တောဲလဝ်တြေံ မပ္တမ်သၚ်သၟတ် ကေုာံ သၟတ်မန်တအ်ရ။ သၞာံ ပထမ ညးမလေပ်ကဵုထံက်ပၚ် ဌာန်သဇိုၚ် လၟိုဟ် (၉) တၠဒှ်တုဲ သၞာံ ဒုတိယ ၂၀၁၇ ဏအ်မ္ဂး သီုတၟိတြေံ ပံၚ်မ္ဂး ဒှ်ကၠုၚ်လၟိုဟ် ၁၉ တၠလုပ်ထံက်ပၚ် ဌာန်သဇိုၚ်အဲနာဲရ။
ဗွဲမညဳသၟဟ်ကဵု မူဝါဒထံက်ပၚ်ၜါဂှ်ဟေၚ် သၞာံပထမဂှ် သွက်အစဳအဇန် ဒက်ပတိုန်ဇြဟတ်သၚ်သၟတ်မန်ဂှ် ပံၚ်တောဲချဳဒရာၚ်ကေုာံ ဇာနှိက်သၚ်သၟတ်မန်တုဲ၊ သွက်အစဳအဇန် သၠုၚ်ပတိုန်ကွတ်ပညာ IT ဂှ်ပံၚ်တောဲချဳဒရာၚ် စၚ်ပါ်ပရအ်နဲကဲကွတ်ပညာ Sharearena တအ်ရ။ သၞာံဒုတိယပၠန် သွက်အစဳအဇန်ၜါဏအ်ပၠန်ဂှ် ထပ်ပံၚ်တောဲ ကဵု ပရေၚ်ကမၠောန်ၜါသွာၚ်ဏအ်ပၠန်တုဲ ဗွဲတၟေၚ် ဂကောံလွဳမာန်ဇမ္ဗူဒိပ်ဂှ် ဂွံအခေါၚ်ဂွံဒုၚ်သဇိုၚ်ဗၞတ်ညိညးသၟးဟွံက ပ္ဍဲအစဳအဇန်လှာဲဂတးလညာတ်သၚ်သၟတ်မန် သၞာံ ၂၀၁၇ ဏအ်ဂှ်လေဝ် ဂွံအခေါၚ်အရာတၟေၚ်သွက် ဌာန်သဇိုၚ်အဲနာဲမွဲကီုရ။
ဌာန်သဇိုၚ်အဲနာဲဏအ်ဂှ် ဇြဟတ်ညးထံက်ပၚ်တအ်ဂှ် ကောပ်ကာဲသီစွံကေတ် နကဵုဇြဟတ်သၞောတ်စွံလၟိုန်တုဲ သွက်ဂွံဒုၚ်သဇိုၚ်တအ်ဂှ် ကလိဂွံကေတ် နူဇြဟတ်ညးဒက်ပတန်လဝ် ဌာန်သဇိုၚ်ရ။ ပရၚ်ဒုၚ်သဇိုၚ်တအ်ဂှ် ဗွဲလၟေၚ်ကဆံၚ်ကမၠောန်ဟေၚ် ဗွဲကိုပ်ကၠာ ဌာန်သဇိုၚ်လလောၚ်တြး ဗၞတ်ဒုၚ်သဇိုၚ်၊ တုဲမ္ဂး ဒုၚ်တုဲလိက်တၞးပတိုန်အာတ်အခေါၚ် ကေတ်ဇြဟတ်ဒုၚ်သဇိုၚ်တုဲမ္ဂး ဗွဲသီုညးၜါလ္ပာ် သီကလီတုပ်စိုတ်ရေၚ်သ္ကအ်ဟေၚ် လလောၚ်တြးအာ ညးပံၚ်တောဲ မကလိဂွံဇြဟတ်သြန်ဒုၚ်သဇိုၚ်တအ်ရ။
ဌာန်သဇိုၚ်ဏအ်ဂှ် ကလာစိုပ် ၂၀၂၀ တေံမ္ဂး ရန်လဝ်သွက်ဂွံဆက်မိတ်ဒုၚ်စဳရေၚ် ကဆံၚ်ဂကူရန်လဝ်နွံရ။ အြကာဏအ်ဗွဲလၟေၚ်သၞာံ ပတိတ်ဏာလိက်ဒုၚ်စဳရေၚ် လၟေၚ်သၞာံ ဗွဲလၟေၚ်ၚ်ဟေၚ်ရ။ တုဲပၠန် ကိစ္စသွက်ဂွံသၠုၚ်ပတိုန် ပရေၚ်ဒုၚ်စဳရေၚ် ပရေၚ်လလောၚ်တြး ပရေၚ်ပံက်ထ္ၜးညာတ်ကၠး သီုဌာန်သဇိုၚ် သီုမဟာမိတ်တအ်ဂှ်လေဝ် စွံလးဏာလဝ် အစဳအဇန်အဓိကကီုရ။
ဌာန်သဇိုၚ်ဝွံ ပွိုၚ်ၜါသၞာံဏအ် နွံကၠုၚ်ကဵုညးထံက်ပၚ်လၟိုဟ် ၁၉ တၠကီုတုဲ ပဵုတိုန်နူသၞာံ ပထမ ၁၀ တၠရ။ ပူဂိုလ်နူသၞာံ ပထမတအ်ဂှ် ကာလစိုပ်သၞာံ ဒုတိယဏအ် ယှအ်ဖျေံပရေၚ်ထံက်ပၚ်၊ လၟိုဟ်ယအ်စှေ်မွဲၜါတအ်ဂှ် ရံၚ်ကေတ်တုဲ ပရေၚ်ဂစာန်ဌာန်သဇိုၚ်ဝွံ ဒှ်မံၚ်တၚ်ကောဆဴဏောၚ် ညာတ်ကၠုၚ်ရ။ လ္တူနူဏအ်ပၠန်ဂှ်လေဝ် သွက်ဂွံသၠုၚ်ပတိုန်ပရေၚ်ဒုၚ်သဇိုၚ်တအ်မာန်ဂှ် ပရေၚ်ဇြဟတ်သြန်သဇိုၚ် ကေုာံ ဍာ်ဒကေဝ်ဂွံကောပ်ကာဲ ပရေၚ်ကမၠောန်တအ်ဂှ်လေဝ် နွံပၟိက်ကၠုၚ် ဗွဲကာတၟေၚ်ရ။
တၚ်နွံပၟိက်နာနာသာ်တအ်ဂှ် အခါစိုပ်သၞာံ ၂၀၂၀ မ္ဂး မူဝါဒ ကေုာံ ပရေၚ်ဒက်ပတန်ဌာန်သဇိုၚ်ဂွံပေၚ်ကၠုၚ်ကဆံၚ်ဆက်မိတ် ကုကောန်ဂကူမာန်ဂှ် မိက်ဂွံကသေံအာတ်မိတ်ပရေၚ်မိဿဟာဲတအ်ပါလုပ်ရေၚ်တၠုၚ်ကီုရ။ ဌာန်သဇိုၚ်ဝွံ နူကဆံၚ်ပူဂိုလ်ပတန်ဂှ် သွက်ဂွံပြံၚ်စၠောံကေတ်ပရေၚ်ကောပ်ကာဲ ဗွဲသၞောတ်ဂကောံဂှ် ညးဒက်ပတန်ရုန်ဂစာန်မံၚ်လၟိုန်ရ။
၂။ ဝၚ်စးဌာန်သဇိုၚ်[ပလေဝ်ဒါန် | ပလေဝ်ဒါန် တမ်ကၞက်]
ဂလာန်ညးက္ဍိုပ်သ္ကိုပ်နာဲယက္ခ မဟီုမြော်လဝ် သွက်ပူဂိုလ်ဆာန်ဂကူမွဲ ဂွံကၠောန်အာကမၠောန် ရေၚ်တၠုၚ်ဂကူ ဗွဲဂတာပ်ခေတ်ဍာ်ဇမၠိုၚ်မာန် ဂွံနွံဂှ်
(၁) စိုတ်ဓာတ်ဆာန်ဂကူ
(၂) ဍာ်ဒကေဝ်သုၚ်စောဲ ကွတ်ပညာ (IT)
(၃) ဇြဟတ်သြန်ပူဂိုလ် အရာပိဏအ် ဒးဍိုက်ပေၚ်ဟေၚ်ရ။ ဒုၚ်သဇိုၚ်ကဵု ကသပ်လညာတ် ညးဟီုမြော်တုဲ သွက်ပူဂိုလ် မိက်ဂွံပတုဲရေၚ်တၠုၚ်ပရေၚ်ဂကူ ဘာသာ သာသနာမွဲ ပ္ဍဲပူဂိုလ်မွဲကီု ပ္ဍဲဂကောံမွဲကီု ဒးဍိုက်ပေၚ်လဝ်ဏောၚ် ညာတ်ကေတ်ရ။ ဟိုတ်ဒှ်သာ်ဂှ်တုဲ ညးဒက်ပတန် ဌာန်သဇိုၚ်ဏအ် ကူချပ် ဇန်ဗဒှ်ကၠုၚ် ဗွဲကိုပ်ကၠာ ပရေၚ်ပါ်ကေတ်သြန်ဘဏ္ဍာဇကု အလဵုဇကုရ။ သြန်ဘဏ္ဍာပူဂိုလ်တအ်ဂှ် သွက်ပူဂိုလ်ရပ်စပ် သွက်ကမၠောန်ဒတုဲဖိုလ် သာ်ဝွံပါ်ပတိတ်ရ။ နူသြန်သွက်ဗွဝ် ကမၠောန်တအ်ဂှ် တၞဟ်နဂွံချဳဒရာၚ်လောဲကီု ပရေၚ်ထံက်ပၚ်ကဵုဒါန် ဂွံနွံကဵု ပရေၚ်ပံက်ထ္ၜးညာတ်ကၠး ဂွံနွံကဵုဂၠံၚ်တရဴဗျူဟာဍာ်ဇမၠိၚ်ကီုတုဲ အလဵုပူဂိုလ်ဇကု နကဵုညးမွဲဟေၚ် စခၞံဒက်ပတန်ကၠုၚ်ရ။ ဌာန်သဇိုၚ်အဲနာဲဏအ်ဂှ် နကဵုအလဵုပူဂိုလ်မွဲ စပတမ်ကီုလေဝ် သွက်ရဂွံကၠောန်အာ ဂွံကောပ်ကာဲအာ နကဵုဗီုပြၚ် ပရေၚ်ပံၚ်ကောံဂှ်လေဝ် ရန်လဝ်ဖျေံဇန်လဝ် ဂၠံၚ်တရဴနွံဟေၚ်ရ။
ဒုၚ်သဇိုၚ်ဂလာန်မြော်နာဲယက္ခကီု ကလိဂွံနၚ်ပရေၚ်ဆဵုဂဗ နူပံၚ်တောဲကၠောန်လဝ် ကရောံဇာနှိက် ပရေၚ်ဖေအ်ဗြေဝ် ဒဳမိုကရေဇြဳ ACDD ကီုတုဲ ယဝ်ရထိၚ်ပခိုၚ်လဝ် ဇြဟတ်ဘဏ္ဍာ နကဵုထံက်ပၚ်သွာၚ်မွဲမ္ဂး သွက်သွာၚ်ဂှ်လေဝ် ဂွံကၠောန်ချဳဒရာၚ်အာ ပရေၚ်သဇိုၚ်နတဲ ဇြိုဟ်ဟ်နက်က်မာန်ဏောၚ် စှ်ေစိုတ်ကၠုၚ်လဝ်ရ။ ဟိုတ်နူ ပတှေ်စှေ်ကေတ်စိုတ်သာ်ဏအ်တုဲ ကသပ်လညာတ်ဒက်ပတန်ဌာန်သဇိုၚ်ဂှ် စပတန်ကၠုၚ်ပဋိသန္ဓိ နူသၞာံ ၂၀၁၄ တေံရ။ ဗွဲကိုပ်ကၠာ ဗက်သွံလညာတ်ကသပ်ဇကု အြကာသကအ်ရဲ ခမဳသၚ်သၟတ်မန်တအ်ကီုလေဝ် ဗွဲဒုၚ်သဇိုၚ်ဗီုပြၚ် ပရေၚ်ဘဝကောန်ကတ်လိက်မွဲတုဲ တၞဟ်နဂွံထံက်ပၚ်ရေၚ်တၠုၚ် ဌာန်သဇိုၚ်မွဲမွဲဂှ် ဟွံကိတ်ညဳ ဟွံဒှ်ဆောခိုဟ်ကဵု ဗီုပြၚ်ဘဝနတဲ သာ်ဝွံတၚ်ကော်ဆဴတအ် မံက်ဂတဝ်အိုတ်ရ။
ကသပ်လညာတ် ဒက်ပတန်ဌာန်သဇိုၚ်ဏအ် စဒီုကၠုၚ်ပဋိသန္ဓိဗက်ဂှ် ညးဒက်ပတန်ဌာန်သဇိုၚ်ဏအ် စကောပ်ကာဲကၠုၚ် ပရေၚ်ဘဏ္ဍာသုၚ်စောဲတအ်ရ။ ဗွဲတၟေၚ်ပါ်တြး ပတိတ်ထောံ သြန်လုပ်ပူဂိုလ်တအ်ဂှ် နကဵုဗွဝ်သွက်ဂွံကၠောန်ကမၠောန်ဂကူ ဘာသာ သာသနာမွဲ သြန်သွက်သုၚ်စောဲရပ်စပ်ပူဂိုလ်မွဲဗွဝ် သာ်ဝွံတိတ်ကၠုၚ်ၜါဗွဝ်ရ။
ဒးဟီုမြော်ပရေၚ်ဘဏ္ဍာညးဒက်ပတန်ဌာန်သဇိုၚ်ဏအ်မ္ဂး ဗွဲကိုပ်ကၠာသ္ဒးတၚ်ဂုဏ်ကုပူဂိုလ် သကအ်ရဲဗီုအ္စာ တၠဂုဏ်ဃောသက (လမိုၚ်) ရ။ မုဟိုတ်ရောတှေ် ညးဒက်ပတန်ဌာန်သဇိုၚ်ဂှ် အခိၚ်ကတ်မံၚ်ပရိယတ္တိတေံဂှ် ဟိုတ်နူကလောကောဒေံ (ခေတ္တမလေယှာ) တအ်ကီု နူကဵုမိမကီု နူဒါယကာတအ်ကီု ကဵုဒါန်ထံက်ပၚ်လဝ်တအ်ဂှ် နွံဗွဲမဗွဲထေက်ကြိုက်တအ် ညံၚ်ဂွံပကောံပြုပြေၚ်လဝ် သွက်ဂွံကတ်ပညာ တက္ကသိုလ်ဍုၚ်မ္ၚးတုဲ ညးကဵုပကောံစွံလဝ်နွံရ။ ဟိုတ်နူသြန်သွက်ဂွံကတ်ပညာ တက္ကသိုလ်တအ်ဏအ်နွံတၚ်မံၚ် ဗၞတ်ရုမ်ဂပ်ကဵုကတ်ပညာတအ်တုဲဂှ် ဒှ်ဟိုတ်သွက်ဂွံပါ်ပတိတ်ပရေၚ်သုၚ်စောဲပ္ဍဲကမၠောန် ရေၚ်တၠုၚ်ပရေၚ်ဂကူ ဘာသာ သာသနာ တအ်ဒှ်ကၠုၚ်ရ။
ပဟိုတ်နူကဵု ဝါသနာကတ်လ္ၚတ်ပရေၚ်ကောပ်ကာဲသွာၚ်ဘဏ္ဍာတအ်နွံတုဲ ကာလဒးကောပ်ကာဲသြန်ဘဏ္ဍာတအ်ဂှ် ဂွံကၠုၚ်အထံက်အပၚ် ဗွဲမဂၠိုၚ်ရ။ သြန်ဘဏ္ဍာတအ် ဂွံနွံကဵုပရေၚ်ဂီုကၠီုကီု ဂွံကောပ်ကာဲအတိုၚ်ဇကုရန်လဝ်တအ်ကီုတုဲ အာပကောံဂိုၚ်စွံလဝ် ပ္ဍဲတိုက်ဘဏ်တအ်ရ။ နပွမဂိုၚ်စွံလဝ် ပ္ဍဲတိုက်ဘဏ်သြန်တအ်ဂှ်ဟေၚ် ကလေၚ်ဒှ်အထံက်အရီုကဵု သွက်ဂွံကလေၚ်ဖောအ်ဗြေဝ်ပတိုန်သြန်ဌာန်သဇိုၚ်တအ်ပၠန်ရ။
ဒးဟီုတပ်ပ်မ္ဂး ဗွဲမဟိတ်ဇြသီုဟွံပံက်ထ္ၜးကဵုညးမွဲမွဲ ဇကုဇန်ကၠောန်မံၚ်သိုက်က်ကီုလေဝ် ဟိုတ်နူပရေၚ်ကံကုသိုလ်အတိက်ဟာ ဟိုတ်နူပရေၚ်ရေၚ်တၠုၚ်လဝ်ကမၠောန် ချဳဒရာၚ်ပရေၚ်မၞိဟ် ပရေၚ်ဂကူနာနာတအ် နွံညိညဟာဟွံတီ ကလိဂွံလာဘ်ကတ်ပညာ ပ္ဍဲတက္ကသိုလ်မဟိဍိုန် နကဵုအစဳအဇန် ပရေၚ်ထံက်ပၚ်အလဵုအသဳဍုၚ်နေဝ်ဝေတအ်ဂှ်ရ သွပ်လ္ပအ် ပွမဒက်ပတန်ဌာန်သဇိုၚ်ဂှ် ဂံၚ်ထမံက်ကၠုၚ်အြကာညးဂမၠိုၚ် သ္ပကၠုၚ်ပရေၚ်ပံက်ထ္ၜးညာတ်ကၠးအြကာကောန်ဂကူရ။
နကဵုယၟု ဌာန်သဇိုၚ်အဲနာဲ (Aue Nai Foundation) ဂှ် သၞာံ ၂၀၁၆ စဌာန်သဇိုၚ်ကဵုထံက်ပၚ်ကီု၊ ဒုၚ်ကေတ်သြန်ဒါန်ထံက်ပၚ် ညးမိက်ဂွံဘိုၚ်ပါလုပ်တအ်ကီုရ။ သၞာံစပတမ် ဒုၚ်သဇိုၚ်ဂှ် ထဇက်ကေတ်မူဝါဒ ထံက်ပၚ် လလောၚ်တြးပတိုန်အကြာဌာန်မဳဒဳယာ ဆက်စၠောံမၞိဟ်တအ် နွံကၠုၚ်ရ။ ဆ္ဂးကီုလေဝ် သၚ်္ကေတဌာန်သဇိုၚ်ကီု တဆိပ်ကြာဌာန်သဇိုၚ်တအ်ကီု မုရဲမွဲလေဝ် ဟွံဂွံကၠောန်သ္ပဒတန်လဝ် ဗွဲမချိုတ်ပၠိုတ်ရ။ သၞာံစ ပထမဂှ်ရ ကသေံကၟဝ် ဆဝ်မ္ၚုဟ်ကေတ်သ္ကအ်ရဲ ခမဳသၚ်သၟတ်မန် မချဳဒရာၚ်မံၚ်မွဲစွံတအ် ဘိုၚ်ပါလုပ်ပ္ဍဲကဏ္ဍ ပရေၚ်ထံက်ပၚ်ဌာန်သဇိုၚ်တအ်ရ။ ဟိုတ်နူသၞာံ ပထမဗွဲကိုပ်ကၠာဂှ်ရ သီုကဵုဟွံဂံၚ် ပံက်ဟီုအြကာဂကူ ဗွဲသၠာဲသၠာဲလးလးရ။ သၞာံ ဒုတိယ ၂၀၁၇ လေဝ် ကဆံၚ်ကောန်ဂကူ ဟွံပံက်တြးဟီု ဟွံကသေံကၟဝ်ဏီဖိုလ်ရ။ ပ္ဍဲစိုတ်ညးဒက်ပတန်ဌာန်သဇိုၚ်ဂှ် သၞာံ ၂၀၁၇ ဏအ်မ္ဂး ဇန်လဝ် မိက်ဂွံဆက်မိတ်ကဵု ကောန်ဂကူတအ် ဌာန်သဇိုၚ်အဲနာဲဏအ်ဏောၚ် ရန်လဝ်ကီုလေဝ် သၞာံရအိုတ်အာ ကမၠောန်ဂှ်ဒှ်ကၠုၚ်ဟွံမာန်ဏီရ။ ဟိုတ်နူ တၚ်ကောဆဴ ကေုာံ တၚ်ပတိုက်နူပွဳပွိုၚ်တအ်နွံကၠုၚ်မံၚ် ဆေၚ်စပ်ကဵုကိစ္စဘဏ္ဍာနွံတုဲ ညးဒက်ပတန် လဇကေတ်မံၚ်အခိၚ် သီုအသိၚ်ညိကီုရ။
ဌာန်သဇိုၚ်ဏအ်ဝွံ အခိၚ်လၟုဟ်မ္ဂး ပြုပြောၚ်စမံၚ်သွက်ဂွံသၠာဲပတိတ်ဗွိုက်ဒုၚ်သဇိုၚ်ကီု၊ သွက်ဂွံသၠာဲပတိတ် ပရေၚ်ဒုၚ်ထံက်ပၚ်တအ်ကေတ်ကီု နွံတဴရ။ သ္ပဟိုတ်ကဵုပရေၚ်ရန်လဝ် ဂၠံၚ်တရဴနွံဿာ်ဏအ်တုဲ သၚ်သၟတ်မန် ကေုာံ သၟတ်မန် ညးမညာတ်ကေတ် ပရေၚ်အနာဂတ်
ဌာန်သဇိုၚ်ဏအ် ဂွံတဴတက် ဂွံဒှ်ဒတုဲဖိုလ် မဟာဇန်မန်ဂၠိုၚ်ၚ်မာန်တအ်ဂှ် မိက်ဂွံကဵုဘိုၚ်ပါလုပ် ပ္ဍဲပရေၚ်ကောပ်ကာဲ ပရေၚ်ချဳဒရာၚ် အြကာညးလေပ်ထံက်ပၚ် ညးကေတ်ထံက်ပၚ် ကုဌာန်သဇိုၚ်ဏအ်ရ။ ဌာန်သဇိုၚ်ဝွံ စပ္တမ်လဝ်တုဲ သွက်ဂွံဒှ်အထံက်အပၚ် ဌာန်သဇိုၚ်ခိုၚ်ၚ်မွဲ ဗွဲဇမၠိၚ်မာန်ဂှ် တၠပညာ ခမဳသၚ်မန်ပိုယ်တအ် အလုံအိုတ်သီု ပါ်ပဲါကဵုကသပ်လညာတ် ဗွဲမဗၠးဗၠးၜးၜးမာန်ဏောၚ် အာတ်မိက်ဏာနူလိက်ဒုၚ်စဳရေၚ်သၟတ်ဝွံရ။