တက္ကသိုလ်အပါ
တက္ကသိုလ် အပါ
ပ္ဍဲဌာန်ဒေသပိုယ် အခိုက်ကၞာတၟိကတဵုဒှ်ကၠုၚ်မွဲသာ်ဂှ် ကၠောန်ဗဒှ် တ္ၚဲက္တဵုဒှ်မၞိဟ် (Happy Birthday Party)ရ။
အခိၚ်တ္ၚဲမ္ဂး ပ္ဍဲကွာန်သၞေဟ်ဗ္ဒဝ်ပိုယ် ပါဲနူကဵု သ္ၚိပိုယ်တုဲ အတိုၚ်မွဲ ကွာန်သၞေဟ်ဗ္ဒဝ် ကြပ်ဇၟာပ်သ္ရိကၠောန်မံၚ် ဟီုစကြပ်ဂွံရ။ “စဝ်လဝ်ကပေါဝ် တုဲမံၚ်ရ မုဟွံဒးထပ်ကၠောန်ရ” အရေဝ်ပါပိုယ်ဟီု စးဟလန်အပါဟွံမာန်တုဲ တ္ရဲကတဵုဒှ်မၞိဟ်အဲ မွဲလှ်ေလေဝ်ဟွံကေၚ်ကၠောန်။ အခိုက်တၟိဏံ အပါပိုယ် ဟွံမိက်ဒုၚ်တဲကီုလေဝ် ဇာပ်လုပ်ကၠုၚ်မံၚ်သိုက်သိုက်ရ။ တ္ရဲဏံဂှ် သ္ကံရဲအဲ ရာဇာ ဘိက်လဝ် တ္ရဲက္တဵုဒှ်မၞိဟ်ဍေံ ညံၚ်ဂွံကၠုၚ်ဂှ် ထပ်ကဵုထပ် ဍေံဟီုလဝ်တုဲ ဟွံအာဟွံခိုဟ် ရဲဒၟံၚ်ကၠုၚ်လဝ်ဘာမွဲစွံ။ ကပအ်ပတိတ် ပလောံ၊ ဂၠိက်ယာတ် နူဒူ (ဘီဒို) ရုဲစှ်ေကေတ် ပလောံဗုတဲဇမၠိုၚ်ကဵုဂၠိက်မန် တၟိအိုတ်၊ ကြိုက်ကဵုဇကုအိုတ် ထေၚ်ပ္ဍဲစိုတ်ဇကုဂှ် ကျိုၚ်ဏာရ။
ၜိုန်ရကၠအ်သ္ရိ ရာဇာတံ သၠဲလးမံၚ်ကီုလေဝ် လုပ်စိုပ်ကၠအ်သ္ရိ ဗက်ဂးဂှ် ဂွံမိၚ်ရမျှာၚ်မဒွက် တ္ရဲက္တဵုဒှ်မၞိဟ် (Happy birthday) နူကဵု သံၚ်ပံက် (song box) ဍောတ်တ်တံ ပံက်ဒုၚ်တၠုၚ်မံၚ်ရ။ ပ္ဍဲကဵုစံၚ်ကၞိန်တိုန်သ္ရိၜါလ္ပာ်ဂှ် စုတ်လဝ် ယာတ်ဇာတံ၊ ပ္ဍဲခန်သ္ရိ ကွက်လဝ်ဗဝ် အသာ်ထဝ်၊ သာ်သြန်တံ ပေၚ်မံၚ်သ္ရိရ။ ဒှ်မံၚ်သ္ရိၜါထပ် သၟဝ်သ္ရိဂှ် ပြေန်စွံလဝ် ကွာၚ်၊စၞစသုၚ်နာနာတုဲ လတူသ္ရိတေံဂှ် စွံလဝ် ခန်ကၞာ တ္ရဲကတဵုဒှ်မၞိဟ် ဍောတ်တ်မွဲရ။ “ကၠုၚ် လုပ်ကၠုၚ် သုတ” မုက်မတ်သီုမိပ်အီဂြိုၚ် ညးကော်မံၚ်အဲဂှ် ဒှ်သ္ကအ်ရဲအဲ ရာဇာ။ အဲထေၚ်လဝ်ကယျိုၚ်အဲ တၟိအိုတ်ကီုလေဝ် ကာလဆဵု ကယျိုၚ်ညးတၞဟ် အှ်နူညးတၞဟ် တၟာဟလိုၚ်ဏောၚ်သိုအ် ပ္ဍဲစိုတ်ဟီုတိုန်သာသာရ။ ထပ်လတူသ္ရိဂှ် ကၠောန်ဗဒှ်လဝ် ခန်ကၞာမွဲ ဟွံဇၞော်ဟွံဍောတ် ၊ လတူမုက် ဗလး အခန်ကၞာဂှ် ဗဝ်သာ်ထဝ် မသုန်မွဲစုံ မွဲတဲ ဗဝ်သာ်သြန် မသုန်မမွဲစုံ မွဲတဲ ပ္ဍဲသရုၚ်လတူ နွံမသုန်စုမ် သၟဝ်ဂှ် ချူစွံလဝ်မလိက် Happy Birthday မလိက် ဇၞော်ဇၞော် အရံၚ်အသာ်ထဝ် ထေၚ်လဵုမံက်လတူ အခန်ကၞာဍောတ်ဂှ်ရ။ ပၞောန်သၟဝ်ဂှ် ချူလဝ် စၟတ်တ္ရဲ မလိက်ဍောတ်တ် (၂၂၊ ၁၀၊ ၂၀၂၁)။ ဂတးမုက်ဂှ် စွံလဝ်ခုၚ်ဇိုၚ်ပန်တၞုၚ်ဟွံဇၞော်ဟွံဍောတ်မတုဲ လတူခုၚ်ဂှ် ကွာၚ်ကိတ် (Birthday Cake) မွဲမဇၞော်ဇၞော်ရ၊ ပ္ဍဲကွာၚ်ဂှ် မာံရာဇာ ပေၚ်အယုက် (၂၅) ချူလဝ်တုဲ ဗစူလဝ်ပၞာၚ် ဍောတ်တ်လတူကွာၚ်ဂှ် ပေၚ်မံၚ်ဟဂှ်။ ဂွံမဏှေံဍောတ်ဂှ် ပိုယ်တံ ဒယှ်ေဒွက်တ္ရဲဒှ်မၞိဟ်၊ ရာဇာ ကရေက်ကွာၚ်တုဲ ဖျူန်ဗ္စ ညးမွဲတုဲမွဲရ။ အဃော ရာဇာ ဖျုန်ဗ္စမံၚ်ကွာၚ်ကဵုအဲဂှ် ကာမွဲမ ထပက်လုပ်ပ္ဍဲကၠအ်တုဲ ကဵုဟန်တုဲ အဲကဵုရာဇာ ဟွံဒးပညဳလဝ် ညးသ္ကအ်မွဲသာ် က္ဍိုပ်ပိုယ်ညးၜါ ရံၚ်စှ်ေအာ ညဳမံၚ်ဟဂှ်ရ။ ညးဗက်ကာ အမူ ရာဇာတံ ကဵုနၚ် တဆိပ်ၝောံတဲ။ အဲလေဝ် သၟာန်နကဵုအကာဲအရာ ဟွံဟီုကဵုအရေဝ်မွဲသာ် အဲသၠုၚ်ပတိုန်သော်ကၞေၚ်မတ်ကဵု ရာဇာ? ဍေံလုပ်ကၠုၚ် ဗကြပ်ကဵုကတောဝ်အဲတုဲ “ညးတံအာဖံက် ကတောဝ်ကဵု သၟတ်ဝုတ် မိယေန်------ ဍေံဒုၚ်တဲယျ” ဍေံကလေၚ်ဟီုဗက်ဂးဂှ် ပ္ဍဲစိုတ်အဲ ဆိုအ်ဗ ယီုဂြက်တိုန်၊ ကွာၚ်နွံမံၚ်ပ္ဍဲပါၚ်ဂှ်လေဝ် ရှ်သာ ဍာ်ကြောအ်တံဂှ်လေဝ် ဟၟဲ၊ အလဵုဇကုအဲမွဲ ညံၚ်ကဵုမရေဝ်ဂှ် ဇြာပ်ဏာဇြဟတ် အိုတ်အးတုဲ ဗတဴဟွံဓဝ် မတ်ဂၠုအာလဝါဲဂှ်ရ။ ကလေၚ်ကူချပ်အာ ပရူအတိတ်မွဲခဏရ။
------- ------------ ---------------------- ------------- ----------------- ------------- -----------
“ကောန်ဗၠာဲပိုယ် အံၚ်အာစှ်တန်ယျ မဂီ သွက်ဍေံဂွံတိုန် တက္ကသိုလ်ဂှ် ပကောံဂၠာဲလဝ် သြန်ညိ” အပါပိုယ်ၜိုန်ရ ဒှ်ညးကၠောန်မံၚ်ဗ္ရကီုလေဝ် စိုပ်ကဵုပရေၚ်ပညာမ္ဂး ညးကဵုဇြဟတ်ကွေံကွေံရ။ “ကောန်ပိုယ်ဂွံဂွံ တဆိပ်ကြာနူဘာတက္ကသိုလ်မ္ဂး ဖန်ပိုယ်ဒးဖျအ်စ ပုၚ်မွဲဂၟံက်ဟဍေံ ကဵုကောန်ပိုယ် ဗ္တောန်လိက်ဏောၚ်” အပါပိုယ် နူဒှ်မံၚ်ဘဝ ထပိုယ်တေံတုဲ အံၚ်လဝ်လိက် ပရိယတ် တန်ဍောတ်ကီုတုဲ စိုတ်ဓါတ်ဆာန်ဂကူ၊ ဆာန်ပညာ ဇၞော်သ္ကာတ်မံၚ်ရ။ ဟိုတ်နူကဵု လက်ထက် ဇကု ဟွံဂွံကတ်လဝ်တုဲ ကောန်ဇကုဂှ် ပညာပ္ဍဲဍုၚ်ဏံဒၞာဲသၠုၚ်အိုတ်ဂှ် ပလံၚ်ဗစိုပ်ကဵုဏောၚ်ဖျေံလဝ် အဓိဋ္ဌာန်သာ်ဏံရ။
သွက်ဂွံတိုန်ဘာ တက္ကသိုလ် မတ်မလီု ကလအ် မိမၜါတုဲ ညးဗ္ကန်“ဥာဏ်သၠုၚ်၊ ဂကူဂတဝ်၊ ဥာဏ်သဝ် ဂကူဗၠိုက် ဒှ်ဒၟံၚ်ဒဒိုခ်လၟိုန်။ ကောန် ပိုယ်တံသၠုဲလှာ်သြန်ဂၠိုၚ်တုဲ ပလံၚ်ဏာ ဘာတက္ကသိုလ် ကဵုကောန်ဟွံသေၚ်ပုဟ်၊ ကောန် ဒးလေပ်နူအပါမှ ဂကူပိုယ်တဴတက်ဏောၚ်၊ အပါၜိုတ်ဏံ စိုပ်လက်ထက်ကောန်စဴစောက်တံ ပညာဒးသၠုၚ်တိုန် ကဆံၚ်ကဵုကဆံၚ်မှ ကောန်ဂကူမန်ပိုယ် ဇၞော်မောဝ်တဴ တက်ရောၚ်၊ ဗီုဂွံဟွံသေၚ်မ္ဂး ဂကူပိုယ် ကဆံၚ်ဟွံသၠုၚ်တိုန်ပုဟ်၊ လ္ပဝိုတ်စညိဏး”
လ္ပာ်မိပၠန်လေဝ် “ကောန်ဗၠာဲ ကောန်ညးတၞဟ် ကေတ်ဟွံမာန်မ္ဂး လ္ပဟီုအရေဝ်ကဝေၚ်ကဵုဍေံ၊ စွံဓဝ်ကရုဏာ(ကိုယ်ချၚ်းစာ)တုဲ ကေတ်ဟွံမာန်မ္ဂး လ္ပစွံကဝေၚ်ညိဏး” မိဂှ် သေဲသေဲပြောဲပြောဲ ဟီုဟွံလေပ် ၜိုတ်အစောန်ဇကုနွံ ဂစာန်ဗ္ကန်မံၚ်ရ။ လ္ပာ်မိမပိုယ် ၜိုန်ရဗ္ကန်မရေဝ်နာနာသာ်ကီုလေဝ် အပါနော် ရာဇာ တံဂှ်
“ၝဏံအာဘာတှ်ေသောၚ်ရ၊ ဟွံဒးပံက်တြၚ်ဗ္တံဟဂၠု အာထောံပြဟ်ဟ်လေဝ်ဂွံမံၚ်ရ၊ ဂွံလဝ်ကောန်စဴမွဲ စိုတ်အိုတ်အာဟဂှ်ရ” ဟီုမံၚ်ကဵု တၠသ္ရိညးဂှ် ပ္ဍဲဂၠံၚ် ရဲတပ်အာတံဂှ် ၜိုန်ရဟွံမိက်ကလၚ်လေဝ်ဒးမိၚ်ရ။ “မိမ ဟွံဗ္တောန်ကောန်ဇာတ်ဒ္ဂေတ်ရိုၚ်” အရေဝ်ညးတမၠာ ကေၚ်ဟီုမံၚ်လဝ်နွံမံၚ် ကာလဆဵုဒး ရာဇာ တုဲ မအရေဝ်ဂှ် ဒှ်ကၠုၚ်သက်သဳရ။ ရာဇာဂှ် နူဍောတ်တ် ၜိုတ်အယုက် မသုန်သၞာံ မိမၜါ တိတ်အာဍုၚ်မ္ရးတုဲ ဒးမံၚ်ကဵု မိနော်အပါနော်တံရ။ ဗက်လဝ်အလိုက် ကောန်စဴဂၠိုၚ်တုဲ စဵုကဵု ဟီုဟွံကေတ်၊ ဝေတ်ဟွံဒုၚ် စိုပ်ကၠုၚ်ကဆံၚ်ဏံရ။ ရာဇာ ဒှ်ညးမညာဏ်သာမွဲတုဲ အံၚ်ကၠုၚ်စှ်တန်ကီုရ။
“တေံ ဝုတ် ဣတေံ ၝဟွံဒးစိုတ်ပုဟ်ဟာ “သုတ” ကျောဝ်မွဲတဲစမ်” အဲလေဝ်ကလေၚ်ကျေဝ်မွဲတဲ ဂြိုဟ်အဲ ဒှ်တိုန် “ထု ထု” ဒှ်မံၚ် “မိယေန်ဆာန်” အဲမွဲ မိပ်သက်ဟီုဟၟဲရ။ ဒှ်မံၚ်ရဲကွာန်ပိုယ် နူဍောတ်တ်တေံ ဒးမံၚ်စိုတ်ကဵုဍေံ ညးတၞဟ် ဟီုဓမက်ဗျံက် နူထပှ်တန်၊ ဒ္စာံတန်တေံ လအ်လမံၚ်ရ။ ဟိုတ်နူညးတၞဟ်ဗျံက်ဂၠိုၚ်တုဲ အခိုက်ပ္ဍဲကွာန်တေံ ဟွံဂံၚ်ဟီုအရေဝ်၊ ဟွံဂံၚ်တက်ကျာ ညးသ္ကအ်ရ။ အခိၚ်တ္ရဲဏံ ဂွံဆဵုကေတ်မုက်ခဝါ ယေန်ဆာန်တုဲ အခိၚ်ကျေဝ်ဗဵုမံၚ်ဂှ် “မုၝ ညံၚ်ကဵု ဟွံဆဵုညးဗြဴမွဲလှ်ေ” ရာဇာ ဟီုမှ ကလေၚ်ဂွံကၠုၚ်ဓဝ်သတိတုဲ ဂွအာကဵု အဲလေဝ် ရာဇာ ညိ။ ရုပ်သာ် ယေန်ကျေဝ် စိုပ်တက္ကသိုလ်တုဲမှ ကျေဝ်တိုန်နူ နွံပ္ဍဲကွာန် ၜိုတ်(၁၀)ဆ ဟိုတ်နူကဵု ကယျိုၚ်ကယျဝ်ကီု၊ ဒှ်ကဵုဂစေအ်ကီုတုဲ ယေန်ဆာန်မွဲ ကျေဝ်လ္တူကျေဝ်ဒှ်မံၚ်ရ။ ကွးဘာ တက္ကသိုလ် မတ်မလီုဂှ် ညးဗြဴတံအာဘာမ္ဂး တုပ်ညံၚ်ရဴညံၚ်တက် ဗီဒီယဵုရ ကျိုၚ်လဝ် (make up)တုဲ ပြိုၚ်ကျေဝ်မံၚ် ပ္ဍဲတက္ကသိုလ် အိုတ်ရ ။ “ရံၚ်စမ်ဇကုဇဂေါဝ်ဍေံ သြိုလ်လးဂၞိၚ်ဝန်၊ ကရတ်ကအ်ပိတန် လက်သန်ညးဗြဴခိုဟ်မွဲဏောၚ်” ရာဇာ ဟီုတိုန်တုဲ အဲထပ်ဟီု တုပ်ညံၚ် “အိန္ဒြာကျော်ဇၚ်” လေဝ်ဟီုကီုလေဝ်ကာလဂှ်မှ သော်ဂၠိုၚ် သၠုၚ်ဟတူဒးရး ဍေံဂွံပါလုပ်ကီုရ။ “ၝဂှ် (နေတိုး)ပအ်” ရာဇာဟီုတုဲ ဂြိုၚ်တိုန်ရ။
ရာဇာဂှ် သြန်လေဝ်ဂၠိုၚ် နူဍောတ်တ်တေံ မုကေတ်ကေတ်ဂွံမံၚ်သီုဖအိုတ်တုဲ ဒးညှာစိုတ်၊ ဒးဆာန်ဍူ ညးတၞဟ်ဂှ် လစွံစိုတ်ဍေံ ဟွံမွဲလးလး။ ဟိုတ်နူဂှ်စိုတ်ဓါတ်မိက်ဂွံဇၞးညးတၞဟ်၊ ကေတ်မာန်ညးတၞဟ်ဂၠိုၚ်ဂှ်ရ ညးမွဲလေဝ်ဟွံမိက်ပံၚ် သ္ပသ္ကံကဵုဍေံ။ စိုတ်ကဵုသၟတ်ဝုတ်တံပၠန်လေဝ်စိုတ်ဂၠိုၚ် ဆဵုညးဗြဴဟွံဂွံ ဒးမံၚ်စိုတ်ဖအိုတ် ညးဗြဴလ္ရဵုတံ ခုတ်ကဵုယၟုကဵုဍေံ သိုၚ်မုဟ် (နှားဘူး) အိုတ်ရ။ ကဝေၚ်ပၠန်လေဝ် မွဲတုဲမွဲ စတုဲထောံ၊ စတုဲထောံသၟးရဂၠိုၚ်ရ။ “မၞိဟ်တြုံဒးလေပ်လဝ်ဖအိုတ်ဏောၚ်” သ္ဂးတုဲ ပွသရာမ်ပါတ်သီုဖအိုတ်ဂှ် ကၠောန်လေပ်မံၚ်ဖအိုတ်ရ။ ပ္ဍဲဘာတက္ကသိုလ် တိုက်ဗှ်လိက်နွံဒၟံၚ်ဂှ် မွဲအလန်လေဝ်ဟွံအာဗှ်လိက်၊ တ္ရဲသဳ ဒးအာလ္ရတ်ကျာ်ပၠန်လေဝ် ကသေအ်ကၟဝ်ပၠန်လေဝ် ဟွံအာ ရာဇာဂှ် ဝါဒကဵုကမၠောန် ဟွံကိတ်ညဳကွေံကွေံပုဟ်။ ဒးလေပ်သီုဖအိုတ်ဂှ် ဟီုတုဲ ပါဲနူကဵု ခိုဟ်ဟ်တုဲ ကၠောန်လေပ်ဖအိုတ်ရ။
ဝါဒရာဇာကဵု ဝါဒ အပါပိုယ်တၞဟ်ခြာမံၚ်တၟာဟလိုၚ်ရ “ဇၟာပ်ကမၠောန်ဒးလေပ် သီုဖအိုတ်ဟွံသေၚ်ပုဟ် ဒးတီလဝ်ဏောၚ်။ ကွတ်ဟွံမွဲကဵုဒုဟ်တံ ဒးလေပ်၊ ကွတ်နွံကဵုဒုဟ်တံ ဒးဝေၚ်ပါဲ”
ဘာတက္ကသိုလ်ပံက်မ္ဂး အဲတိုန်ဘာတုဲ အခိၚ်ဘာကၟာတ်မ္ဂး အဲဒးဘိုၚ်ကၠောန်ကဵု အပါပိုယ် စှ်ေဝါ အဖဝ် ညးရ။ “ကောန်ဗၠာဲ အခိၚ်ကၠာတေံမ္ဂး စိုပ်ဂိတုစဲ ဖျေံအိက်ဂၠဴ ပ္ဍဲခံက်ဗ္ရတံတုဲ ဟွံဒးကလေၚ်ကြာတ်ဝါဲရ။ အခိၚ်လၟုဟ်ဂှ် ဂၠဴလေဝ်သွံထောံအိုတ်တုဲ ကၠောန်ဗ္ရကဵုစက်ဖအိုတ်ရ။ စဂိတုဇှ်ေ စဗဝ်မ ပေၚ်မွဲဂိတုမ္ဂး ရပ်ဂွံရ။ စိုပ်ကၠုၚ်တ္ရဲဏံ သွက်ဂွံပတန်မဂှ် ဠိုၚ်မၞိဟ်ဝါတ်ကၠုၚ်ကီု၊ ၚုဟ်ပတန်မးတံ သၠုၚ်တိုန်တုဲ မတံဂှ် တၠဝါဗ္ရတံဒးဂြာပ်ကေတ်ဂၠိုၚ်။ အပါလေဝ် ကြာတ်ကေတ်ဂှ် ဂွံစှ်သၞာံဒှ်ရ” မိၚ်ဒးအရေဝ်အပါဟီုတုဲ “အဝ် ဘာ အပါ ပိုယ်တံ သွက်ဂွံပတန်မးဂှ် ဂၠာဲမၞိဟ်ဟွံဂွံရပုဟ်သိုဝ်။ ဂွံဠိုၚ်မၞိဟ်လေဝ်ဝါတ်၊ ဒးကဵုသြန်ဂၠိုၚ်ကွေံကွေံ” ကၠောန်ဗ္ရ မွဲဨက တော်ထောံသီုဖအိုတ်မ္ဂး မွဲသၞာံ အိုတ်ၜိုတ် ၜါကိုဋ်ဒှ်ရ။ ဟိုတ်နူကဵု ပရေၚ်ကွာန်ဟွံခိုဟ်တုဲ စရိတ်ဖျာတံတိုန်ကၠုၚ်တုဲ စရိတ်ဝါဲတံလေဝ် မွဲရိုက် ပန်လက်ဂှ် ဒှ်ကၠုၚ်ထပှ်လက် ကြေတ်ဂြတ်ကၠုၚ် ညးဍုၚ်ကွာန်ကွေံကွေံ။ ညးလ္ရဵုတံ ကၠောန်စရိတ်ဂၠိုၚ်ကၠုၚ် အရိုဟ်ဟ်သၞာံတုဲ ထောံဝါဇကုတုဲ တိတ်ကၠောန်အာဍုၚ်မ္ရးအိုတ်ရ။
------ ------------ -------------------
ဂၠံၚ်ဘာ အဓိပတိ တက္ကသိုလ် မတ်မလီုကဵု ဂၠံၚ်အာဝါဗ္ရ အပါပိုယ်တၞဟ်ခြာဗွဲမလောန်ရ။ ဂၠံၚ်အဓိပတိ တက္ကသိုလ်ဂှ် ဇၞော်လှဲ ကာသၠာစှ် ၜါမ ပါဲလောဲလောဲမာန်ကီုလေဝ်၊ ဂၠံၚ်အာဝါ အပါပိုယ်ဂှ်နွံမံၚ်ဆၜိုတ် မၞိဟ်မွဲကွာ် လးစွံတၟံ ဍောတ်တ်မွဲသွာၚ်မတ် စဵုဂွံစိုပ် တိဗ္ရညးရ။ ပ္ဍဲသ္အာၚ်ဘာ တက္ကသိုလ်ဝွံ ၜိုန်ရသၠဲလးမံၚ်ကီုလေဝ် တၞံဆုအောန်တုဲ ဗရာန်တ္ရဲ တုပ်ညံၚ်ရဴ တိဗ္ရအပါပိုယ်ကီု ရ။ အဃောကူချပ်မံၚ်ဝါဗ္ရကဵု ဘာတၞဟ်ခြာဂှ် ရာဇာ သၟာန်တိုန်အဲတုဲ ချပ်မံၚ်တံဂှ်ပိုတ်အာရ။
“ၝကဵု ယေန်ဆာန် စိုပ်မံၚ်ကဆံၚ်လဵုရရော” ရာဇာ သၟာန်အဲ မအရေဝ်ဏံဂှ် ဍေံကဵုထ္ၜးမံၚ်အယောၚ်အလာ သွက်ဂွံဟီုအရေဝ်ဆာန် ကဵု မိယေန်ဆာန်ဏောၚ်ဂှ် ညိလေဝ် အဲဟွံယိက်လဝ်သက်သက်ရ။
“သဝ်တ္ရဲဏံ အဲဒးဗ္တောန်ကဵုၝဏောၚ် သုတ ဗီုလဵု ဂွံဟီုအရေဝ်ကဵုညးဗြဴ၊ ဒးဆက်ဆောံဗီုလဵု အဲထ္ၜး lecture(ထ္ၜးပညာ) ကဵုၝဏောၚ်” တ္ရဲဂၠု ၜိုတ်(၉း၀၀)ဗ္တံ ရာဇာ ပ္တိတ် ကွီလိုန်ဓါတ်တုဲ “ကှ်ေတိုန် သုတ” အဲလေဝ်ဗက်အာ ရာဇာတုဲ ဒၞာဲအာဍေံအာဂှ် အဲလေဝ်ဟွံတီ။ ယဝ်ရမံၚ်ပ္ဍဲ (အဆောၚ်)မ္ဂးညးတံဟွံကဵုအခေါၚ်တိတ်မ္ရးဗ္တံရ။ ဆ္ဂးပိုယ်တံ ညးမွဲသ္ကံဠိုၚ်ကေတ်သ္ရိမွဲမ သက်က်တုဲ အခိၚ်လုပ်တိတ်တံဂှ် ပွိုၚ်(၂၄)နာဍဳ ပံက်သြိုဟ်ရ။ ရာဇာ ဒဳဏာ ကွီလိုန်ဓါတ်နူ (ကုန်းထိပ်) စိုပ်ကၠုၚ် အရာပ်မျာၚ်သာယာတုဲ ပိုယ်တံညးၜါ စိုပ်အာဒၞာဆေၚ် သုၚ်ဘဳယာမွဲတုဲ ဒဳလုပ်အာဟဂှ်ရ။ “ကၠေံမံၚ်လံရဏာ” ညးဒုၚ်တုၚ်ကၟုဲ ဂှ်ဟီုကဵု ရာဇာ တာတဲတုဲ ခဒမ်နွံမံၚ်သှ်ေမံၚ်ဏီဟာ? ဟီုကဵု ညးဒုၚ်တၠုၚ်ကၟုဲ။ ဍေံဓညိက်က္ဍိုပ်တုဲ ကော်ဏာပိုယ်တံညးၜါ လုပ်စိုပ်အာ ခဒမ်မွဲတုဲ ပၟတ်တံဂှ် ဟွံတၟးဂၠုဂၠမံၚ် ဂတမုက်ပိုယ်ဂှ် TV နွံမံၚ်မွဲမ၊ “ကေတ်မံၚ်သ္ကံဏီဟာ ညးဒုၚ်ကၟုဲသၟာန်ကၠုၚ်” ရာဇာ ဗစူဏာတဲၜါတၞုၚ်ရတုဲ တိတ်ကသေဲကဵု ညးဒုၚ်တၠုၚ်ကၟုဲ (စားပွဲထိုး) ချိုန်ခဏဂှ် ဘီယာ Whisky စိုပ်ကၠုၚ်။ ညးဗြဴလေဝ်ၜါ စိုပ်ကၠုၚ်ဗ္ဒာဲ ပိုယ်ညးၜါရ။ ဠိၚ်ခဒမ်မွဲတုဲ ကော်ဟပၠုပ်ညးဗြဴတံဂှ်တုဲ သုၚ်ဗီယာ၊ Whisky တံ တုဲ အတိုၚ်ပၟိက်စိုတ် ဒယှ်ေဒွက်မာန်။ အဲဂှ် စိုပ်အလန်ကိုပ်ကၠာအိုတ်တုဲ တၟေၚ်လေဝ်တၟေၚ်၊ ဂြိုဟ်လေဝ်ချဳ၊ ဂွလေဝ် ဂွမံၚ် ဒၞာဲဗီုဏံ သွက်ဘဝအဲ အလန်ကိုပ်ကၠာအိုတ်ရ။ အခိၚ်ကာလဂှ် ရာဇာ ကၠတ်တက်မံၚ်ဗီု အဲကဵုညးဗြဴဂှ် ဂ္ဇံမံၚ်ဗ္ဒာဲအဲလေဝ်ဟွံတီပုဟ်။
“ညးဗြဴနွံမံၚ်ဒၞာဲ ပ္ဍဲခဒမ်ဏံ ကဵုဍေံသြန်မာန်မ္ဂး ဗန်လေဝ်ဂွံ၊ ကိတ်ပါၚ်လေဝ်ဂွံ၊ ရပ်(ပေါက်စီ) သြိုဟ်လေဝ်ဂွံ၊ ကဵုသြန်ဂၠိုၚ်ခ္ဍၚ် အလုံခန္ဓမွဲ ညံၚ်ဂွံ လာၚ်သောန် တဲပါၚ်ဇကု ဒၞာဲဒးစိုတ်အာ ပံက်သြိုဟ် ဂၠာံရပ်ဂွိဟ် ဂွံဖအိုတ်ရ” ရာဇာဟီုတိုန် ညးဗြဴဂ္ဇံမံၚ်ဗ္ဒာဲအဲဂှ် မုက်ဍေံခ္ဍမ်မ်၊ သော်ကၞေၚ်မတ်ထေၚ်ၚ်၊ မုက်မတ်ဍေံ တုပ်မံၚ် (ကုလာဇေန်)၊သော်ဂၠိုၚ်ၚ်၊ ကတက်လဝ်ပလောံ အရံၚ်ဍာဲဍာဲ တဲမွဲလပှော်၊ သြိုဟ်ၜါဂုဟ်တေၚ်၊ စကာတ်ဂှ် ဂၠေံဂၠေံ ဒဳဍေံၜါဗုအး၊ သၟူအမြာဲနူဇကုဍေံပၠန်လေဝ် ဖဍုၚ်လဝ် (ရေးမွှေ) ပ္ဍးမံၚ်ဟဂှ်ရ။ အဃောကျောဝ်မံၚ် ညးဗြဴဂှ် “သရုပ်” ဆုၚ်ဏာမုက်အဲမွဲတဲတုဲ ဂြိုဟ်အဲချဳ ခ္ဍဳလျုတ်တိုန်၊ ညံၚ်ရဴဂၠုၚ် ဒးလပှ်ကျာ လဒေါဝ်ဝဳကီုရ။
“ကောန်သ္ရောဲအာနူကဵု မိမ ဒၠောံဗ္တောန်ညိဓဝ် အတိုၚ်ပၟိက် ဆန္ဒစိုတ်ဇကု မိက်ဂွံမိပ်အလိုက် မိက်ဂွံကၠောန်ဒှ်ကၠုၚ်” ပ္ဍဲစိုတ်တေံ ဒှ်ကၠုၚ်တုဲ “သုရာမေရိယ ၜိုန်ရကျာ် ညးစွံလဝ်လကြဴအိုတ်ကီုလေဝ် ကိစ္စဇၞော်အိုတ်ရ၊ ဍေံလုပ်ဂွံအာတုဲ သှ်ေမံၚ်ပန်တေံဂှ် လောဲလောဲရလီု ကောန်ဗၠာဲ” အရေဝ် အပါ ဟီုမံၚ်ကလေၚ်ဂွံတိုန် ဓရ်သတိတုဲ အဲညိလေဝ် ဟွံသုၚ် ဘဳယာဂှ်ရ။ ညးဗြဴဗ္ဒာဲအဲဂှ်လေဝ် အဲကဵုဍေံအာထောံ နူဗ္ဒာဲအဲဂှ်ရ။ ရာဇာဂှ် ဒှ်အာ 2 in 1 တုဲ မိပ်ဇြိပ်လဟိၚ်မံၚ်ကဵု ညးဗြဴၜါဂှ်ရ။ ပိုယ်တံညးၜါဂ္ဇံပေၚ်မွဲဍဳတုဲ ရာဇာဒုၚ်ဏာ Waiter သြန်မွဲကိုဋ်ဒကေဝ်တုဲ ဗ္တံ(၁၁း၃၀) က္တဵုစဴကၠုၚ်နူဆေၚ်ရ။ အခိၚ်စဴကၠုၚ် လတူကွီလိုန်ဓါတ်ဂှ် အဲကလေၚ်ကူချပ်ဂွံအရေဝ်အပါပိုယ် “မၞိဟ်ခိုဟ်ဟ် ဗ္တံဂၠု ဟွံ အာကၠုၚ်ပုဟ်”
“ရာဇာ ပွမကၠောန်မံၚ်သီုဖအိုတ်ဂှ် ဟွံကိတ်ညဳကဵု ကွးဘာတက္ကသိုလ်မွဲပုဟ်၊ ဆာန်ဍူမံၚ်ကဵု မိမကီု” ဟိုတ်နူကဵု မအရေဝ်ဂှ်ဂှ်တုဲ “သုတ ၝလ္ပဗ္တောန် ၜိၚ်ဍာ်ကဵုကျာံ အရေဝ်ၝဒေါံၜိုတ်ဏံရ” ရာဇာ ဟီုကဵုမအရေဝ်ကြံၚ်ၚ်တုဲ စနူတ္ရဲဂှ် အရေဝ်အောန်အာ ညးသ္ကံရ။ အတိုၚ်ဝတ်ရဲ ဍေံကၠောန်မံၚ်ပွ ဗီုဏံဂှ် ဒးဟီုဒးပဒေါံထေက်မံၚ် အဲစှ်ေစိုတ်တုဲ ဟီုကဵုသတိကီုလေဝ် သီုထေဲအာကဵုအဲ။ ရာဇာ အာမံၚ်ဒၞာဲသုၚ်စတံဂှ် အာမံၚ်လၟိုန်ကီုလေဝ် အာသုၚ်မံၚ်ဗီုဏံဂှ် အဲဟွံတီ။ ဍေံသုၚ်စောဲဏာ မွဲခဏဍောတ်ဂှ် သွက်အဲဂွံစသုၚ် ကြပ်မွဲဂိတုဒှ်မံၚ်။ အဲဂိုဟ်သၠုဲ သုၚ်စောဲဒၞာဲ ဂုဏ်ဖဵုဟၟဲဂှ်ရ။
------ ---------- ------------- -------------
သ္ကံရဲအဲ မာံရာဇာ ပိုယ်ညးၜါၜိုန်ရဒှ်မံၚ် ရဲညးသ္ကံကီုလေဝ် စရိုတ်ကမၠောန်၊ ပွမဒးစိုတ်တံဂှ် တၞဟ်ခြာကွေံကွေံရ။ ဍေံပၠံက်ဇိုၚ်အဲတုဲ ကၠတ်ဟီုမံၚ် အရေဝ်ကဝေၚ်ကဵု ယေန်ဆာန်ဂှ်လေဝ် လကြဴဏံအဲတီကၠုၚ်တုဲ သ္ပကလော်ညံၚ်ဟွံတီတုဲ မံၚ်ကၠုၚ်ရ။
စိုပ်ကိစ္စ ရာဇာ စိုတ်လုပ်စကဵု မိယေန်ဆာန်တုဲ ၜိုတ်ကၞက်မံၚ် အစောန်စရာဲပိုယ်ညးၜါ နူသ္ကံရဲဍေံမွဲကဆံၚ် ဂွံကေတ် ပရောပရာ နွံညိညကီု။ “သုတဂှ် ဂစံက်ယေန်မံၚ်၊ သမၠုၚ်ဒတဴလေဝ် ဟွံသၠုၚ်ဟွံသဝ်။ မံၚ်စံၚ်ဆက်ဆောံကဵုညးဂမၠိုၚ်လေဝ် ဒးရး မသ ကလောကောဒေံလေဝ် ပွဳပွိုၚ်ဇၞော်၊ ဒ္ဂေတ်ပဋိပတ် စိုတ်စရိုတ်လေဝ် ခိုဟ်နူ ရာဇာ ဍာ်ကဵုကၠေၚ်ရ။ စိုပ်ကဵုညးဗြဴမ္ဂး သုတ မံၚ်သောၚ်ကွေံကွေံ ပတှ်ေစှ်ေစိုတ်ဂွံမံၚ်။ ဟီုအရေဝ် ယဵုလ္ဂူယေန်သၞာၚ်၊ တီဝတ် မိမအ္စာကွေံကွေံရ။” ရာဇာ ဂှ် ရုပ်သာ်ကျေဝ်ဂေါဝ်ကီုလေဝ် ကဝေၚ်လေဝ်ဂၠိုၚ်မံၚ်၊ ဟီုအရေဝ်မ္ဂးသၠုဲဟွံပါဟွံတုဲ ဇၟာပ်အရာဂှ် ဖျေံသ္ကုတ်သွာတ် ကဵုသြန်ဖအိုတ်ရ။ စိုပ်ကဵုဝတ်လောကပၠန်လေဝ် ညိလေဝ်ဟွံဒးတီ။ ပါဲနူကဵု ပရေၚ်ပိုန်ဒြပ်နွံတုဲ ဒၞာဲ သက်ဂွံဒးဟီုထိုၚ်သးဂှ် အဲလေဝ်ဟွံဆဵုမွဲသာ်ရ။ ဒးဒှ်ဓဝိၚ်မွဲဂှ် ရာဇာဂှ် ၝဍေံမိက်ဂွံဂွံဂှ် နဲကဲနာနာ ဍေံပတိတ်ဥာဏ် ပပ်ပ်ပဳပဳတုဲ ကေတ်လေပ်မံၚ် ဏောၚ်။ ဍေံတံညးၜါတုပ်မွဲဂှ် Major Botany သၞာံဒုတိယမွဲဟေၚ်ရတုပ်ညးသ္ကံ။
အဲဂှ်ညံၚ်ဂွံအံၚ်လၟေၚ်သၞာံ မွဲသၞာံမွဲတန် ဂစာန်မံၚ်လိက်ရ။ ဆ္ဂး သၞာံဒုတိယဂှ် ရာဇာ စှ်ေအာတုဲ ဒေါံထောံနူဘာတက္ကသိုလ် တိတ်အာဍုၚ် သၚ်္ဂပဝ် အဖဝ်မိမဍေံရ။ ပွမ ဂစာန်ဂွံဂွံသွဟ်နူကဵု ယေန်ဆာန်ဂှ် ဆက်ဂစာန်မံၚ် နဲကဲ လတူလပှ်ကျာဏီ ယေန်ဆာန်လဴ အဲဂွံတီကေတ်ရ။ စိုပ်ကၠုၚ်သၞာံလကြဴ အဲလေဝ်ဒှ်ကၠုၚ်ကဝေၚ်ကဵု မိယေန်ဆာန်တုဲ ပ္ဍဲလောကဏံ မိပ်နူအဲဂှ် ဟၟဲရအဲထေၚ်ကေတ်။ ဆ္ဂးဂှ် မိပ်အဲဂှ် ညံၚ်ရဴမတ်ဗြဴဒးကျာ သွဝ်ကၠေံမွဲခဏဍောတ်ဓဝ်ရ။ မိယေန်ဆာန်တံ မိၚ်ဒးပရိုၚ် ဒှ်ကဝေၚ်ကဵုအဲတုဲ ဠိုၚ်နၚ်ကာစိုပ်ကၠုၚ် (အဆောၚ်) ယေန်ဆာန်တံတုဲ “ဗှ်ေမိက်ဂွံဂွံတြုံ အဲဂၠာဲကဵုကေတ်တ်ဂးတုဲ လ္ပဆက်မံၚ် မၞိဟ်ဒိုက်ဂတ်တံဂှ်ညိ” မိမ ယေန်ဆာန်တံဟီုတုဲ ကလေၚ်စဴအာ နူသ္ကံရဲယေန်ဆာန်တံ ဂွံမိၚ်ကေတ်ရ။ နူဂှ် ယေန်ဆာန်ကဵု ကြပ်မံၚ်ကီုလေဝ်သ္ရောဲအာနူညးသ္ကံရ။ ယေန်ဆာန်ဂှ် ဒှ်မၞိဟ်ကလၚ်စ အရေဝ်မိမတုဲ မိမဟီု ဆုတှ်ေဆု၊ ဒုန်တှ်ေဒုန် ဗီုမိမ မိက်ဂွံဒှ် ကၠောန်ဗက်ဏာဖအိုတ်ရ။
မိမ ယေန်ဆာန်တံဂှ် ဒှ်ညးမဒးဂၞပ်ကဵု ဂုဏ်ပကာသနတုဲ အာတ်မိတ်ကောန်ညးတံ ကိုဋ်လ္ရီကၠံမှ ညးတံဒးစိုတ် ကဵုမံၚ်ရမျှာၚ်ရ။ “ကောန်ပိုယ်စွံလဝ် ကွးဘာတက္ကသိုလ်ဂှ် သွက်ဂွံနွံဂုဏ်စရာဲ၊ သွက်ဂွံဒှ်အရၚ် ဗၠာဲဒုဲဗၠာဲဒုတ်တံ ဟွံသေၚ်ပုဟ်” စိုပ်ကၠုၚ်ခေတ်ကာလလၟုဟ်ဂှ် မိမညးဍုၚ်ကွာန်မန်ပိုယ်တံ ဒှ်မံၚ်ယဲကၠောန်စဍုၚ်မ္ရးဂၠိုၚ်ရ။ ယဝ်ဟွံအာကၠောန်စ ဍုၚ်မ္ရးမ္ဂး ညံၚ်ကဵု မၞိဟ်သုၚ်စောဲဟွံဂွံ။ အာဍုၚ်ကိုဝ်ယာက္ဍၚ် ညးတံမိက်ဂွံကဵုစကောန်ဝုတ်ညးတံက္ဍၚ်၊ ညးတံကၠုၚ်ဗက်စာတ် ကေတ်ဝုတ်ဇကု။
“အခိုက် ကောန်ထဝ်နာၚ်ဂှ် ဗှ်ေဒးဒးစိုတ်ကီု၊ ဍေံအာတ်ဗှ်ေ မုစိမာန်။ ကိုဋ် (၂၀)ရ လ္ပကဵုဍေံကၠုၚ် အဲဟွံတုပ်စိုတ်ပုဟ်၊ ဟွံဒုၚ်တဲပုဟ်ဏး၊ ဟီုလဝ်ကဵုဍေံဟတုဲ” ကေတ်မိၚ်ကေတ်ရမျာၚ်နူဂှ်တုဲ စနူဘာတုဲ ဂစာန်ကၠောန်ကမၠောန်နာနာ၊ အခိၚ်ဝါဇူ အာကၠောန်ပရံ ၜိုန်ရဒှ်မံၚ်ကွးဘာတက္ကသိုလ်မွဲကီုလေဝ် ဖေက်ပကောံသြန်ဟွံမာန် ကမၠောန်လဵုဟွံရုဲ ဂစာန်ကၠောန်ရုန်ကၠုၚ်ရ။ ပိုယ်ဗၠာဲတၞဟ်ဟ် အာပေါဲသဘၚ်မိပ်လဟိၚ်တံဂှ် ထိၚ်လဝ်စိုတ်တုဲ ဟွံအာကၠုၚ် ပကောံသြန်မွဲရတီ။ တိုၚ်ပ္ကဴရန်တၟံအဲဂှ် သွက်ဂွံပံၚ်ဖက်အာ မၞိဟ်ဇကုဆာန်၊ ဂွံအာတ်ၚုဟ် ပတိုန်သြန်ဂၠိုၚ်ဂၠိုၚ်မဒှ်ရ။
ပ္ဍဲဒေသပွိုၚ်ဍုၚ်မုဟ်ဍုၚ်ပိုယ် သွက်ဂွံပတိုန်ၚုဟ်မးအာတ်ဝုတ်တံဂှ် ၚုဟ်မးသၠုၚ်တိုန်ကၠုၚ်ရ။ ကိုဋ်ကဵုကၠမ် ဒးပတိန်ၚုဟ်မး။ သွက်ညးကၠောန်ဗ္ရ ဗီုပိုယ်ဂှ် ဒးဒိုက်ဇၞော်ကဵုဇြဟတ်ဗွဲမလောန်ရ။ ဂိုဟ်ဂစာန် ကၠောန်ကမၠောန် သွက်မွဲသၞာံ သြန်သှ်ေ ၜိုတ် (၁၀)ကိုဋ်ဓဝ်ရ။ ယဝ်မိမ ထံက်ကဵုဟွံမာန်မ္ဂး ကောန်ဇာတ်တံဂှ် မုက်ဍောတ်မတ်သဝ်ကွေံကွေံရ။ သၟတ်ဗၠာဲတံ ဂွံအာတ်ဝုတ်မွဲမ္ဂး “မူစိ ရော?” ရဲအရာပ်တံဟီုဂးစလေပ်ရ။ ဟွံတီမ္ဂး ကၠုၚ်အာတ်ကောန်ဝုတ်ညးဂှ် ညံၚ်ကၠုၚ်ရာန် ကပေါတ်မွဲမွဲသာ်။
------------- ---------------- -------------
“ဗီုလဵုသၞာံဏံ သြောံဗဵုဟာ နာဲထဝ်နာၚ်” နာဲလွီမန်သၟာန်ကၠုၚ် အပါပိုယ် “သြောံပဵုအရိုဟ်သၞာံရ။ ကာလဖျေံဂှ် မွဲနရတှ်ေ လၟုဟ်ဒးဖျဴကဵု ကာ ဏောၚ်”ၜိုန်ရဟီုမံၚ်ကီုလေဝ် ကာလ အပါသောၚ်ကလး စိုပ်ကဵုတိဗ္ရဂှ် “လၟုဟ်အပါ ဂွံအယုက် (၅၅) ရ ကၠောန်မံၚ်ဗ္ရ မွဲ အယုက်ကောန်ဟွံကရ သၞာံဏံဂှ် ဂွံသြောံအောန်အိုတ်ရ ကောန်” နကဵုရမျှာၚ်စိုတ်ဟွံမိပ်ဟီုတိုန်ရ။ လောန်ကၠုၚ်ၜိုတ်စှ်သၞာံ တေံဂှ် သြောံမွဲဨကမ္ဂး တိတ်မံၚ် (၇၀)၊ စိုပ်ကၠုၚ်အခိၚ်လၟုဟ်ဂှ် ဟိုတ်နူဗတမ်ကေတ်တ်ဟွံမာန်ကီု ရှ်တိဟွံခိုဟ်ကီုတုဲ သြောံတိတ် မွဲဨက (၃၅) နတၟာကလေံ။ ဂွံပတန်မဂှ် ဠိုၚ်မၞိဟ်ဝါတ်တုဲ ကြာတ်ကေတ်တ်တုဲ သြောံတိတ်အောန်။ အခိၚ်ကၠာတေံ ဟွံဒးစုတ်ဝါဲဂၠိုၚ်ပုဟ်၊ စိုပ်ကၠုၚ်တ္ရဲဏံ ဟွံစုတ်ဝါဲမ္ဂး ဟွံဂွံသြောံရ။ အပါ ပိုယ်တံဂှ် စိုပ်ကိစ္စတဵုလွီမ္ဂး မပ္တံကဵု တန်ဗ္တောန်မွဲမွဲလေဝ် ဟွံကေၚ်တိုန်လဝ်မွဲလှ်ေရ။ နူလက်ထက် အပါနော်တံ ဟီုကၠုၚ်ကၠောန် ကၠုၚ်လဝ်ဂှ်ဟေၚ် ကၠောန်မံၚ်တိဗ္ရ အခိုက်တြေံရ။ တိဗ္ရတံဂှ် ပါဲနူကဵု တဵုသြောံမွဲတုဲ မုလေဝ် ကၠောန်ဟွံဂွံ၊ ကၠောန်ဟွံလေပ်အိုတ်ရ။
“လၟုဟ် အပါတံ ဂလေအ်သြန်ဘဏ် အလဵုသဳဂွံညိဂှ် သွက်ရဲသၟာဗ္ရတံ ဒးကဵုသြန်အိက်သက်သာညိ အစဳဇန်ဏံဂှ် ဟွံပရေအ်ပုဟ်” စိုပ်ကဵု ဂွံသြန်ဘဏ်တုဲ အပါပိုယ်မိပ်စိုတ်ရ။ စိုပ်နဲကဲဂှ် အလဵုအသဳတံဟွံထံက်ပၚ်ကီု၊ နဲကဲဟွံခိုဟ် ကမၠောန်တိဗ္ရတံဂှ် ကၠောန်လအ်ခ္ဍၚ်၊ ခတှ်ဂၠိုၚ်တိုန်ခ္ဍၚ် စိုပ်ကၠုၚ်အကာဲအရာဏံရ။ ကြာတ်ဝါဲပ္ဍဲကဵုတိဝါမ္ရး အပါပိုယ်တံ တီမံၚ် ဝါဲ (ပုလဲ+ဇုတ်) ရတုဲ တိတံဂှ် ဒးကေတ်ဓါတ်တံဂှ်ဟာ ဟွံတီချိုတ်တ်ပၠိုတ်တ်တုဲ ကြာတ်ခ္ဍၚ်၊ တီလိုန်ကၠုၚ်ခ္ဍၚ်ဂှ် ညးတံဟွံတီ သက်က်ရ။ ညးတံထေၚ်မံၚ်တိဗ္ရတံ ရှ်အောန်တိုန် ညးတိုန်ဗီုဏံရ။ ကၠောန်ဗ္ရတုဲဒှ်အိုတ် စိုပ်ကၠုၚ် အခိၚ် သြောံသတ်တိုန်မ္ဂး ရဲသၟာဗ္ရတံ ဒှ်ဒဒိုက်ဇၞော်ကဵုဇြဟတ်မွဲပၠန်ဂှ် စၟသြောံရ။ ညးလ္ရဵုတံ အတိုၚ်မွဲဨကဂှ် ဂွံသြောံ ၜါနဓဝ်တုဲ ၜိုန်ဂစာန်လဝ်မွဲသၞာံ၊ ကေတ်လဝ် သြန်ဘဏ်တံကီုလောဲဟွံမာန်။ အခိၚ်သြောံတိတ်မ္ဂး ၚုဟ်မးသြောံ ထပက်စှ်ေအာ လဝါဲဂှ်ရ။ ယဝ်ရဟွံသွံမ္ဂး သွက်ဂွံလောဲဂတှ်တံဂှ်ကီု၊ သွက်ဂွံသုၚ်စောဲစောဲနာနာတံ နွံမံၚ်တုဲ ဂွံၚုဟ်အောန်လေဝ် ထ္ၜေတ်မတ်တုဲ ဒးကဵုဏာ ညးကူသာန် သွံရာန် သြောံတံဂှ်ရ။ အခိၚ်ကာလ သြောံပ္ဍဲတဲသၟာဗ္ရတံဟၟဲကၠုၚ်မ္ဂး ၚုဟ်မးသြောံ ဒှ်တိုန် စှ်ကိုဋ် ခလာက်တိုန်ကၠုၚ်ရ။
အပါပိုယ်ကၠောန်ဗ္ရမွဲသၞာံမှ ယဝ်ဒးတော်ကဵု ဨကမ္ဂး မွဲသြောံတိတ်(၄၀)မှ ဂွံပရဲ မွဲဨကမ္ဂး (၂)ကိုဋ် ဒကေဝ်ဓဝ်ရ။ ၚုဟ်ကာယ ဒးစေက်မံၚ် လၟေၚ်သၞာံရ။ ဆ္ဂးဂွံတရဴစးကဵုဗ္ရဂှ် မွဲလှ်ေလေဝ် ဟွံချပ်။ ဟိုတ်ဍေံဂှ် ကမၠောန်ဝါဗ္ရတဵုလွဳဏံဂှ် ဒှ်အာဲကၟာဲ ကောန်ဂကူမန်ပိုယ် ညးဒုၚ်ဂိုၚ်ကေတ်လဝ်ဗီုဏံရ။ “ဝန်ဇၞော်တဵုလွီတံဂှ် ဝိုတ်မံၚ် သၟာဗ္ရပိုယ်ဂၠိုၚ်ကဵုသၞာံရ” လ္ဆောဝ် အပါပိုယ် ဟီုတိုန်ဂရေတ်တိုန်မံၚ်ကီုရ။
အဲ မာံသုတ ၜိုန်ရတိုန်ဘာတက္ကသိုလ်တုဲကီုလေဝ် ဟိုတ်နူဘာတံ ကမၠောန် သွက်ဂွံဂယျိုၚ်လမျီုဂှ် ဟွံဒှ်အထံက်အရီု သက်သက်ရ။ တက္ကသိုလ် အပါပိုယ် ဝါဗ္ရဂှ်လေဝ် မုဟွံတၟေၚ်တၞဟ်ခြာမံၚ်ကဵု ဘာအဲကီုရ။ မုလျိုၚ်လေဝ်ဟၟဲ (အာမခံ) က္တဵုဒှ်မၞိဟ် ပ္ဍဲဍုၚ်ဏံဂှ် ကုသိုလ်ဟာ၊ ကမ်ဇကုဟာ ဟီုလဴဟွံလေပ်ရ။
ပရောပရာအတိတ်တေံမွဲပိုဒ် အခိၚ်ကလေၚ်စဴကၠုၚ်နူသ္ရိ ရာဇာတံဂှ် ကလေၚ်ကူချပ်ဂွံရ။ “ရာဇာ အာတ် ယေန်ဆာန် ကိုဋ် (၃၀၀)၊ ထဝ် လျိုၚ်(၁၀)” ရဲအရာပ်တံ ဟီုဂးထိုၚ်သးညးမပတိုန်ၚုဟ်မာန်တံဂှ်ရ။ အဝ် မိယေန်ဆာန် မုဟိုတ်ရော ဍေံဂွံဒုၚ်ဏာတဲ အဲဟွံပြေစိုတ်ဂၠိုက်ဂၠာဲ ပရောပရာဂှ်တုဲ ဟိုတ်နူကဵု မိမ ယေန်ဆာန်တံ ကဵုဇြဟတ်ဒးရိုဟ်ကီု၊ ဟိုတ်နူဗီုမွဲတၞး တ္ရဲအာလဝ် (KTV) ရာဇာကၠတ်တက်လဝ်ဗီုတုဲ ဍေံထ္ၜးကဵု ယေန်ဆာန်တုဲ ဍေံထေဲ၊က္ဍဟ်ဇမၠေံအာအဲ လွာဲဂှ်တုဲ ပြဟ်ဟ်ဟေၚ် ဍေံဒုၚ်ဏာတဲကဵုအဲရ။ ရာဇာ မုဟိုတ် ဘိက်အဲဂၠိုၚ်ၚ်ကဵုအလန် အာတ္ရဲက္တဵုဒှ်မၞိဟ်ဍေံဂှ် ဍေံမိက်ဂွံဆဵု၊ ဗဵု ပေါဲအံၚ်ဇၞးဍေံရောၚ် အဲကၠိုဟ်အာရ။ ပ္ဍဲဗ္တံ ရာဇာ ကော်ဏာအဲတုဲ သ္ပဒၞက် ကဵုအဲဏောၚ်ဂှ် ကာလအဲကၠိုဟ် လဇုဲအာ သီုဖအိုတ်ရ။
မၞိက်ရတ်
(၂၃၊ ၁၀၊ ၂၀၂၁)
သၞေဟ်ဗ္ဒဝ်