တာန်ယှိုဲ၊ နာဲ

နာဲတာန်ယှိုဲ
နာဲတာန်ယှိုဲ; ညးမရေင်တၠုင် ကမၠောန်ဒတုဲဖိုလ် ဂကူမန်
သၠးဂၠံဂဝ်	နိုင်သန်းရွှေ; အံက်တဝ်ဗါ ၁၈၊ ၁၉၆၈ (အာယုက် ၅၇); သက်၊ ပွိုင်ဍုင်ဇြပ်ဗု
ဂကူ	Monမန်
ကောန်ဍုင်	ကောန်ဍုင်ဗၟာ
ကဆံင်ပညာ	BA in History
ဌာန်ပညာ	တက္ကသိုလ်မတ်မလီု
ဂကောံ	ဂကောံတၠကၠအ်ရဝ်ဘာ (ညးအုပ်ကာ); Union Peace Dialogue Joint Committe (UPDJC); Nationalities Brotherhood Federation (NBF);
ဗော်	ဗော်ညဳသၟဟ်မန် (၂၀၁၉ - လၟုဟ်); ဗော်ဒဳမဵုကရေဇြဳအလုံရးမန် (၂၀၁၀ - ၂၀၁၉); ဗော်ဍုင်မန်တၟိ (၁၉၈၈ - ၂၀၀၅);
ချဳဓရာင်	သွက်အခေါင် ဂကူမန်
အိန်ထံင်	မိသြန်ဇျာ (ကော်) မိခေန်မျေတ်
ကောန်ဇာတ်	မိခၟောမ်သြန်; မာံသဳအးဉာဏ်; မိလျးပိုန်အာဲ;
အံက်	နာဲမိုင်ညဵု (နာဲသက်) (အပါ); မိင္ၚိုဲကျဳ (မိ);

နာဲတာန်ယှိုဲ (နိုင်သန်းရွှေ) (ၜံင် - ၁၈ အံက်တဝ်ဗာ ၁၉၆၈) ဝွံ ဒှ် အစာသုတေသနဝင်၊ ညးမစိုန်သကီု လပါ်သၞောဝ်ဥပဒေတုဲ နူ သၞာံ ၁၉၈၈ စဵု စိုပ် သၞာံ ၂၀၀၅ လုကဴ ပွိုင် ၁၆ သၞာံပေင်ပေင် ယိုက်ဂၠေင်လဝ် ကမၠောန်ပၠန်ဂတး သွက်ဗၠးၜးဂကူမန် ပ္ဍဲ ဗော်ဍုင်မန်တၟိ ဗွဲတၟေင် နဒဒှ် အစာဘာပၞာန်၊ အစာဘာသၞောဝ်ဥပဒေမွဲရ။ ကြဴနူ မဒေါအ်ဇူ နူ တာလျိုင် ဗော်ဍုင်မန်တၟိတုဲ လုပ်ချဳဓရာင်ကၠုင် ပ္ဍဲ ဗော်ပရေင်ဍုင်မန် အဆက်အဆက် စဵုစိုပ် အခိင်လၟုဟ်ရ။ သဘင်မာဲ သၞာံ ၂၀၂၅ ဏအ်မ္ဂး နာဲတာန်ယှိုဲ ဂွံဒှ် အလံင်အမာတ် ဗော်ညဳသၟဟ်မန် သွက်စၠတ်ဓဝ်ညးဍုင်ကွာန် ပွိုင်ဍုင်ဇြပ်ဗုရ။

ဘဝသၟတ် ကောံ ကုပရေင်ပညာ

နာဲတာန်ယှိုဲ က္တဵုဒှ် မၞိဟ် ပ္ဍဲ ကွာန်သက်၊ ပွိုင်ဍုင်ဇြပ်ဗု၊ ရးတၞင်သဳ (လၟုဟ် တွဵုရးဍုင်မန်) ဇရေင်မိမၜါ မနွံ ယၟု နာဲမိုင်ညဵု (ကော်) နာဲသက်၊ မိင္ၚိုဲကျဳ။ ပၞောဝ်ကောဒေအ်ဂမၠိုင် နာဲတာန်ယှိုဲ ဒှ် ကောန်ဂၠု (ကောန်ဇၞော်အိုတ်)ရ။ အခိင်ကာလ မဂွံ အာယုက် (၈) သၞာံ နာဲတာန်ယှိုဲ မံင် ဘာတန်မူလ ကွာန်သက်၊ ဘာတန်လဒေါဝ် ကောံ ကုတန်သၠုင်ဂှ် မံင်လဝ် ဘာကွာန်ကြုင်ခဍာ်၊ ပွိုင်ဍုင်ဇြပ်ဗု။ သၞာံ ၁၉၈၈ အံင် စှ်တန်တုဲ ပရေင်ကလိုက်ကမဵု က္တဵုဒှ်တုဲ စိုပ်အာ တိဗၠးၜး ဇရေင် ဗော်ဍုင်မန်တၟိ။ ဗွဲကြဴ ဆက်တိုန် ဘာတက္ကသိုလ်မတ်မလီုတုဲ သၞာံ ၂၀၀၃ ဂှ် ကလိဂွံ တဆိပ်တြာဗာစ္ဆလာဝိဇ္ဇာ လပါ်ဝင် (BA in History) ရ။^[၁]

ကမၠောန်ပရေင်ဍုင် ပရေင်ဂကူ

သၞာံ ၁၉၈၈ အခိင် ပရေင်ကလိုက်ကမဵု အလုံမွဲဍုင် မက္တဵုဒှ်ဂှ် နာဲတာန်ယှိုဲ ချဳဓရာင်လဝ် ပ္ဍဲ ပရေင်ချဳဓရာင်၈၈ဂှ် ဗွဲမကတိုင်ကမှ်ကီုတုဲ၊ ဟိုတ်နူ ပၞာန်သီအဝဵုဍုင်တုဲ သွက်ဂွံ ဆက်လုပ်အာ ပေါဲဗတိုက်တုဲ နာဲတာန်ယှိုဲ တိတ်အာ တိဗၠးၜး ဇရေင် ဗော်ဍုင်မန်တၟိ ရ။^[၁] ပ္ဍဲ ဗော်ဍုင်မန်တၟိဂှ် နာဲတာန်ယှိုဲ ဂွံယိုက်ဂၠေင်လဝ် တာလျိုင် သကိုပ်ဒပ်ဗိုလ်ဇၞော်၊ အစာဘာပၞာန်၊ အစာဘာသကိုပ်ဒပ်၊ အစာဘာသၞောဝ်ဥပဒေ ကောံ ကုအခေါင်အရာမၞိဟ် မြဴသာ်ဝွံ တာလျိုင်နာနာသာ်ရ။ ကြဴနူ မယိုက်ဂၠေင်ကၠုင် ကမၠောန်ပၠန်ဂတး သွက်ဗၠးၜးဂကူမန် ပ္ဍဲ ဗော်ဍုင်မန်တၟိ လုကဴ ၁၆ သၞာံတုဲ သၞာံ ၂၀၀၄ ဂိတုမာတ်ဂှ် နာဲတာန်ယှိုဲ ဒေါအ်ဇူ နူ ဗော်ဍုင်မန်တၟိရ။^[၁]

နာဲတာန်ယှိုဲ ဒေါအ်ဇူ နူ ဗော်ဍုင်မန်တၟိတုဲ ဆက်ချဳဓရာင်ဒၟံင် ပရေင်ဍုင်ကွာန်မန် အပ္ဍဲဍုင် နကုသွာင်နာနာရ။ သၞာံ ၂၀၁၀ အခိင်မဒက်ပ္တန် ဗော်ဒဳမဵုကရေဇြဳအလုံရးမန် ဂှ် နာဲတာန်ယှိုဲ ကေတ်လဝ် တာလျိုင် နဒဒှ် ကေင်ကာမွဲတၠ။^[၁] သဘင်မာဲ ၂၀၁၅ ဂှ် နာဲတာန်ယှိုဲ ဂွံဒှ် အလံင်အမာတ် ဗော်ဒဳမဵုကရေဇြဳအလုံရးမန် သွက်စၠတ်ဓဝ် ညးဍုင်ကွာန် ပွိုင်ဍုင်ဇြပ်ဗု။^[၂] သွက် ဗော်မန်ၜါ - ဗော်ဒဳမဵုကရေဇြဳအလုံရးမန် ကု ဗော်ကောန်ဂကူမန် ဂွံပံင်ကောံ မွဲဗော်ဂှ် နာဲတာန်ယှိုဲ ယိုက်ဂၠေင်လဝ် ပ္ဍဲ ဂကောံပ္ညဳပ္ညပ် စၞး ဗော်ဒဳမဵုကရေဇြဳအလုံရးမန်။ သၞာံ ၂၀၁၉ အခိင် ဗော်မန်ၜါ ပံင်ကောံတုဲ ဒက်ပ္တန် ဗော်ညဳသၟဟ်မန် ဂှ် နာဲတာန်ယှိုဲ ယိုက်ဂၠေင်ကၠုင် တာလျိုင် ဂကောံကေင်ကာဗဟဵု စဵုတ္ၚဲဏအ်ရ။^[၁] သဘင်မာဲ သၞာံ ၂၀၂၅ ဏအ်ဂှ် နာဲတာန်ယှိုဲ ဂွံဒှ် အလံင်အမာတ် ဗော်ညဳသၟဟ်မန် သွက်စၠတ်ဓဝ် ညးဍုင်ကွာန် ပွိုင်ဍုင်ဇြပ်ဗု။^[၃]

ပ္ဍဲ ကမၠောန်ပရေင်ဍုင်ကွာန် နာဲတာန်ယှိုဲ မကၠောန်ကၠုင်လဝ် ပ္ဍဲ ဗော်ကီု သီု ကုဂကောံမှာဇန်မန်မ္ဂး နာဲတာန်ယှိုဲ ပါလုပ် ပ္ဍဲ ဌာနသုတေသန ကောံကုမူဝါဒဗော်၊ ပ္ဍဲ ကမၠောန်ဓဇက် သၞောဝ်ဥပဒေသဇိုင် ကၟိန်ဍုင်ဖက်ဒရေဝ်၊ ပ္ဍဲ ဂကောံ မချူဓဇက် သၞောဝ်ဥပဒေသဇိုင်ရာမညဍုင်မန်၊ မူဝါဒတိဍာ်၊ မူဝါဒသၟတ်။ ဂကောံ နကဆံင်ကၟိန်ဍုင်မ္ဂး ဂွံပါလုပ် ဂကောံကောဒေအ်ကောန်ဍုင်အရင်ဂမၠိုင် (Nationalities Brotherhood Federation/ညီနောင်တိုင်းရင်းသားပါတီများဖက်ဒရေးရှင်း - NBF)^[၄] ကမ္မတဳပံင်တောဲ ပရေင်သဳကၠဳၜိုဟ်လလံကၟိန်ဍုင် (Union Peace Dialogue Joint Committe/ပြည်ထောင်စုငြိမ်းချမ်းရေးဆွေးနွေးမှုပူးတွဲကော်မတီ) ပါဲနူ ကမၠောန်ပရေင်ဍုင်ကွာန်တုဲ ပ္ဍဲ ဂကောံပရေင်မၞိဟ် ဂကောံတၠကၠအ်ရဝ်ဘာ မဒှ် ဂကောံစဵုဒၞာကဵုဂီုကၠီု ကုသၟာဂူယာလေဝ် နဒဒှ် ညးအုပ်ကာနာနာမွဲဂှ် ယိုက်ဂၠေင်ဒၟံင်ကီုရ။^[၁]

ပရေင်ပူဂိုလ်

နာဲတာန်ယှိုဲ ဒက်ဘဝ သ္ၚိကၟိန် ကုမိခေန်မျေတ် (ခ) မိသြန်ဇျာ၊ တုဲ ညးတအ် ကလိဂွံ ကောန်ပိ - မိခၟောမ်သြန်၊ မာံသဳအးဉာဏ်၊ မိလျးပိုန်အာဲ။^[၁]

နိဿဲ

↑ ^၁.၀ ^၁.၁ ^၁.၂ ^၁.၃ ^၁.၄ ^၁.၅ ^၁.၆ Shwe, Than (10 November 2025). "ဝင်နာဲတာန်ယှိုဲ" (PDF) (Interview). Interviewed by Monzel, Bee Htaw. Open.
↑ ပြည်သူ့လွှတ်တော်ကိုယ်စားလှယ်လောင်း တစ်ဦးချင်းစီ၏ ဆန္ဒမဲရရှိမှုအခြေအနေ (၂၀၁၅ ခုနှစ်၊ အထွေထွေရွှေးကောက်ပွဲ). Open.
↑ " မွန်ညီညွတ်ရေး ပါတီ ကိုယ်စားပြု သံဖြူဇရပ် မြို့နယ် ပြည်သူ့ လွှတ်တော် ကိုယ်စားလှယ်လောင်း ဦးသန်းရွှေ (ခ ) နိုင်သန်းရွှေ. Open (11 November 2025). “မွန်ညီညွတ်ရေး ပါတီ ကိုယ်စားပြု သံဖြူဇရပ် မြို့နယ် ပြည်သူ့ လွှတ်တော် ကိုယ်စားလှယ်လောင်း ဦးသန်းရွှေ (ခ ) နိုင်သန်းရွှေ”
↑ Su Mon Thant (2020). "Party Mergers in Myanmar: A New Development". Trends in Southeast Asia.

[shwe-1] ၁.၀ ^၁.၁ ^၁.၂ ^၁.၃ ^၁.၄ ^၁.၅ ^၁.၆ Shwe, Than (10 November 2025). "ဝင်နာဲတာန်ယှိုဲ" (PDF) (Interview). Interviewed by Monzel, Bee Htaw. Open.

[2] ပြည်သူ့လွှတ်တော်ကိုယ်စားလှယ်လောင်း တစ်ဦးချင်းစီ၏ ဆန္ဒမဲရရှိမှုအခြေအနေ (၂၀၁၅ ခုနှစ်၊ အထွေထွေရွှေးကောက်ပွဲ). Open.

[3] " မွန်ညီညွတ်ရေး ပါတီ ကိုယ်စားပြု သံဖြူဇရပ် မြို့နယ် ပြည်သူ့ လွှတ်တော် ကိုယ်စားလှယ်လောင်း ဦးသန်းရွှေ (ခ ) နိုင်သန်းရွှေ. Open (11 November 2025). “မွန်ညီညွတ်ရေး ပါတီ ကိုယ်စားပြု သံဖြူဇရပ် မြို့နယ် ပြည်သူ့ လွှတ်တော် ကိုယ်စားလှယ်လောင်း ဦးသန်းရွှေ (ခ ) နိုင်သန်းရွှေ”

[4] Su Mon Thant (2020). "Party Mergers in Myanmar: A New Development". Trends in Southeast Asia.

[၁]

[၂]

[၃]

[၄]