ထကတ်ၜင်

ထကတ်ၜင် (လဆောဝ် ကော် မုဒြာတ်) (Grape) စပျစ် ဂှ် ဒှ် တၞံဇုက် မနွံ ကုသတ်။ သတ်ထကတ်ၜင်ဂှ် စ ထၞေက် နဒဒှ် သတ်ဆု လေဝ်ဂွံ၊ ဍာ် မပတ်ပ္တိတ် နူ သတ်ထကတ်ဂှ် ကၠောန် ဍာ်ယာမ၊ အရက်ဝါင်လေဝ် ဂွံ၊ တုဲပၠန် စဲဗကှ်တုဲ ထကတ်ဇမ္ကဟ်လေဝ် ကၠောန်ဒၟံင်ကီုရ။ ထကတ်ၜင်ဂှ် နွံ နာနာသာ် မပ္တံ ကုအသာ်ဗကေတ်၊ အသာ်ကဴခဍောင်၊ အသာ်ဗတာင်၊ အသာ်သင္ၚေက်တအ်ရ။ သတ်ထကတ်ၜင် ခေတ်တၟိဂှ် ဖန်ဗဒှ်လဝ် ညံင်မဍေဟ် ဟွံမဲလေဝ် နွံရ။ တၞံထကတ်အရိုင်ဂှ် တိုန်ဒၟံင် အကြာ တၞံဆု သီု ပ္ဍဲ ဒဵုဂြိုပ် ဒေသရးမန်ကီုရ။ ဆဂး မၞိဟ်တအ် စၟတ်သမ္တီလဝ် နဒဒှ် တၞံရာမ်။

ဟိုတ်နူ ထကတ်ၜင်ဏအ်ဂှ် ကၠုင် နူ ဒေသသအာင်တုဲ နဘာသာမန် ကော်စ ထကတ်ၜင်။ ဗွဲမဂၠိုင် မန်တအ် ကော်စ ဗတ် ဗၟာ၊ စပျစ်။ အရေဝ်ဗၟာ စပျစ်ဂှ် နူ တမ်မူလ ကၠုင် နူ အရေဝ်ပါဠိ မုဒ္ဒိက၊ မုဒရက် ဗွဲကြဴ ဒှ်အာ စပျစ်။ မန်လ္ၚဵု ကော် မုဒြာတ် ဂှ် ကၠုင် နူ ပါဠိ မုဒ္ဒိက၊ မုဒြာတ်။

တၞးထကတ်ၜင်ဂှ်လေဝ် စဂွံဒၟံင် ကီုရ။ ပံင်အာရာပ်ဂှ် ဂွဳလဝ် နကု တၞးထကတ်ၜင်ရ။