ထံက်ပၚ်ကွးဘာတက္ကသိုလ်သၚ်မန်-ဍုၚ်သေံ၊ဂကောံ

ဂကောံထံက်ပၚ်ကွးဘာတက္ကသိုလ်သၚ်မန်-ဍုၚ်သေံ (အၚ်္ဂလိက်: Society of Supporting for M.B.S.S.T.) ပ္ဍဲစၟတ်တ္ၚဲ 15 Jan, 2016 အခိၚ်လဒေါဝ်တ္ၚဲ ပ္ဍဲဌာန ဘာတက္ကသိုလ် မဟာဇူလာလောန်ဂေန် MCU အယုဒ္ဓယာဂှ် အတိုၚ်ဂကောံကွးဘာတက္ကသိုလ်သၚ်မန်-ဍုၚ်သေံ မကဵုအခေါၚ် သ္ပသမ်တီလဝ်ဂှ် တ္ၚဲဏအ် သ္ပသမ္တီဏာ သွာၚ်ခရှ် သွာၚ်သၚ်ပ္ဍဲကောံဓရီုရ။

ကောံဓရီု ဒက်ပတန်သ္ပသမ္တီဝွံ နူကဵုညးစၞး ကွးဘာ တက္ကသိုလ် MCU တၠဂုဏ်အ္စာ ပုပ္ဖဟံသာ၊ တၠဂုဏ်အဲနာဲ (ပညာစိုတ်) ညးစၞးကွးဘာတက္ကသိုလ် MU ကီု၊ တၠဂုဏ် အိန္ဒ (က) ဂုဏ်ဍောတ် ညးစၞးကွးဘာ တက္ကသိုလ် MBU တအ်ညးပိတၠ သောၚ်ကၠး ပရေၚ်ကွးဘာတအ်ရ။ တုဲဂှ် ဂကောံသွာၚ်ခရှ် ညးနွံပမိက် မိက်ဂွံထံက်ပၚ် သၚ်မန်ကတ်ပညာတက္ကသိုလ် ဍုၚ်သေံတအ် ကၠုၚ်ကဵုစရၚ် ညးစၞးဂအုပ်ညး ဂအုပ်ညးအိုတ်ရ။

ဂကောံထံက်ပၚ်ကွးဘာတက္ကသိုလ်သၚ်မန်-ဍုၚ်သေံ ဒှ်ကဆံၚ်ကမ္မတဳ ဂကောံကွးဘာတက္ကသိုလ်သၚ်မန်-ဍုၚ်သေံတုဲ အခိၚ်ပေၚ် ၃ ဂိတုမ္ဂး ဒးချူပစိုပ်လိက်ဒုၚ်စဳရေၚ် ကုဂကောံရောၚ်။ တုဲပၠန်ကိစ္စ သွက်ဂွံဆက်ချဳဒရာၚ်အာ အရာရာဂွံရေၚ်တၠုၚ်ကောပ်ကာဲ သွက်ဂွံပြေပြံၚ်မာန် ရန်တၟအ်တုဲ နူဂကောံ ကွးဘာတက္ကသိုလ်သၚ်မန်-ဍုၚ်သေံ ရုဲစှ်ပအပ်ကဵုတာလျိုၚ်

1. တၠဂုဏ်အ္စာဇဳနဓဇ (ဍုၚ်ပံၚ်) တက္ကသိုလ် မဟာစူဠာ
2. တၠဂုဏ်အဲနာဲ (ဍုၚ်လၟိုၚ်) တက္ကသိုလ် မဟိဍိုန်
3. တၠဂုဏ်ထေရိန္ဒ (ကံဍောတ်) တက္ကသိုလ် မဟာစူဠာ
4. တၠဂုဏ် အိန္ဒ (ကံဒုန်ကံပၞဟ်) တက္ကသိုလ် မဟာမၚ်ဂုတ်
5. တၠဂုဏ်အ္စာ ပုပ္ဖဟံသာ (ကြုၚ်ကြုက်) တက္ကသိုလ် မဟာစူဠာ

တအ် ညး၅ တၠရ။

ပ္ဍဲအစဳအဇန်တ္ၚဲဏအ် ကိစ္စဖပ်သၚ်ကီု ကိစ္စဒက်ပတန်သ္ပသမ္တီဂကောံကီု ကိစ္စပွမဒုၚ်ပူဇဴ နူညးဒါယကာထံက်ပၚ်ကီုတုဲ ဆေၚ်စပ်ကု သွက်ဂွံသီကၠဳနာနာတအ်ဂှ် ဆိၚ်ၜတ်လဝ် အခိၚ်မွဲတ္ၚဲပၠန်ရ။

တၠဂုဏ်မွဲတလဟီု "သၚ်မန်တအ် ကၠုၚ်တိုန်မံၚ်တက္ကသိုလ် ဍုၚ်သေံ လောန်ကၠုၚ် ၈ သၞာံပြၚ်ၚ်ရ၊ ဆ္ဂး တ္ၚဲဏအ် ဂကူမန်ပိုယ် စွံအာရီု ရီုဗၚ်ထံက်ပၚ်ကၠုၚ် ဂကောံကွးဘာတက္ကသိုလ် သၚ်ကတ်လိက်တအ်ဂှ် မိပ်စိုတ်သက်ဟီုဟွံမွဲရ"။

သၞာံကတ်ပညာ ၂၀၁၆-၂၀၁၇ ဏအ်ဂှ် သၚ်မန် တိုန်ကတ်မံၚ်ပညာ တက္ကသိုလ် နာနာ နွံ ၂၉ တၠရ။ အပ္ဍဲဂှ် Ph.D, M.A. ကေုာံ B.A. တအ် နွံတန်နာနာရ။ အပ္ဍဲဂှ်လေဝ် သၚ်လ္ၚဵု သွာၚ်ဗုဒ္ဓဘာသာ၊ သၚ်လ္ၚဵု သွာၚ်ပရေၚ်နာနာ၊ သွာၚ်ပရေၚ်မၞိဟ် သွာၚ်ပရေၚ်အုပ်ဓုပ်ကောပ်ကာဲ သွာၚ်ပရေၚ်ပညာ ကေုာံ သွာၚ်ဘာသာ တအ်နွံနာနာရ။