ဒပ်မန်ရာမည
| ဒပ်မန်ရာမည | |
|---|---|
 အလာံဂကူမန် | |
| သီုမကော်စ | ရာမညမွန်တပ်တော် |
| က္ဍိုပ်သကိုပ် မဒက်ပတန် | ပံင်ကောံလဝ် နကု ဒပ်ပၞာန်ဗၠးၜးဍုင်မည် ကု ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်) |
| လဒက်ပတန် | ၂၄ မေ ၂၀၂၅ |
| စၟတ်တ္ၚဲ မချဳဓရာင် | ၂၄ မေ ၂၀၂၅ – လၟုဟ် |
| ရးနိဂီု | တွဵုရးဍုင်မန် (ရးနိဂီုဗၟာ) |
| ဗတိုက် ကု | |
ဒပ်မန်ရာမည (Ramonnya Mon Army - RMA, ရာမညမွန်တပ်တော်) ဂှ် ဒက်ပ္တန်လဝ် ပ္ဍဲ သၞာံ ၂၀၂၅ ဂိတုဨပြဳ ၂၆၊ လလောင်တြး ပ္ဍဲ ဂိတုမေ ၂၄။ ဒပ်မန်ရာမညဂှ် ဒက်ပ္တန်လဝ် ကြဴနူ ဒပ်ပၞာန် ဗၠးၜးဍုင်မည် ကု ဒပ်ပၞာန်ဗၠးၜးကောန်ဂကူမန် (MNLA-AD/NMSP-AD) ၜါ တုပ်စိုတ် ဒက်ပ္တန် မွဲဒပ်ရ။[၁]
ဝင်
[ပလေဝ်ဒါန် | ပလေဝ်ဒါန် တမ်ကၞက်]ဒပ်ပၞာန်မန်ပန် ဒပ်ပၞာန်ဗၠးၜးကောန်ဂကူမန် (MNLA-AD/NMSP-AD)၊ ဒပ်ပၞာန် ဗၠးၜးဍုင်မည် (MLA)၊ ဒပ်စဵုဒၞာဍုင်မန် (MSDF)၊ ဒပ်ပၠန်ဂတးဍုင်မန် (MSRF) ပံင်ကောံတုဲ ဒက်ပ္တန်လဝ် ကရောင်ပၞာန်ပံင်တောဲရာမည နဒဒှ် ကာလမစမ်ၜတ် ပွိုင်ပိဂိတု ပ္ဍဲသၞာံ ၂၀၂၅ ဂိတုဇာန္နဝါရဳ ၁၇ ရ။ သွက်ဂွံ ဒက်ပ္တန် ဒပ်မန်မွဲဂှ် နကုဒပ်ပန်ဝွံ ဆဵုဂဗ ရေင်သကအ် ပ္ဍဲ သၞာံ ၂၀၂၅ ဂိတုမာတ် ၁၇၊ ပ္ဍဲ ကောံဓရီုဂှ် ညးတာလျိုင် နူဒပ်စဵုဒၞာဍုင်မန် (MSDF) ကု ဒပ်ပၠန်ဂတးဍုင်မန် (MSRF) ဟွံဒုင်တဲ ဗီုပြင် မပံင် ကိစ္စ ပရေင်ဍုင်ကွာန်တုဲ ဟွံပံင်တောဲ၊ တုဲ အတိုင်လၟေင်ကမၠောန်ဂှ် ဒပ်ဇၞော်ၜါ ဒပ်ပၞာန်ဗၠးၜးကောန်ဂကူမန် (MNLA-AD/NMSP-AD) ကု ဒပ်ပၞာန် ဗၠးၜးဍုင်မည် (MLA)ဂှ် ဆက်ကၠောန်အာရ။
ဂိတုဨပြဳ ၂၆ ဂှ် ဒပ်ဇၞော် ဒပ်ပၞာန်ဗၠးၜးကောန်ဂကူမန် (MNLA-AD/NMSP-AD) ကု ဒပ်ပၞာန် ဗၠးၜးဍုင်မည် (MLA) ကလေင်ဆဵု ရေင်သကအ် သွက်ဂွံဖျေဟ် ဗီုပြင်လဒက်ပ္တန် သွာင်ပရေင်ဍုင်ကွာန်ကီု သီု ပရေင်ပၞာန်တုဲ ပ္ဍဲ တ္ၚဲဂှ် စၟတ်သမ္တီ ပဒတန် ကမၠောန်ဒက်ပ္တန် ဒပ်မန်ရာမည ရ။ မၞိဟ်စၞးအဓိက ပ္ဍဲ ကမ္မတဳပၞာန်ကီု ပ္ဍဲ ကမ္မတဳပရေင်ဍုင်ကွာန်ကီုဂှ် ပါဲစွံလဝ် ဒၞာဲ သွက် ဒပ်သၟတ်ၜါဂှ်၊ ဒပ်သၟတ်ၜါဂှ် အခိင်ဟွံရုဲ လုပ်ကၠုင်ကေတ်ဒၞာဲတအ်ဂှ် ဂွံရ။
ဂိတုမေ ၂၄ ဂှ် ဒပ်ပၞာန်ဗၠးၜးကောန်ဂကူမန် (MNLA-AD/NMSP-AD) ကု ဒပ်ပၞာန် ဗၠးၜးဍုင်မည် (MLA) လလောင်တြး ဒဒှ်ရ ဒပ်ၜါဝွံ ပံင်ကောံတုဲ ဒက်ပ္တန်လဝ် ဒပ်မန်ရာမည။[၁]
ဂိတုသေပ်တေမ္ဗာ ၁၈၊ ၂၀၂၅ ဒပ်ပၞာန်ဗၠးၜးမန် (MLF) ဂှ် ဂကောံကမ္မတဳအာက္ဍိုပ် ကောံ ကုဂကောံဒပ်ဂှ် လုပ်ကေတ် တာလျိုင် ပ္ဍဲ ကမၠောန်ပရေင်ဍုင်ကွာန်၊ ပရေင်ပၞာန် ပ္ဍဲ ဗော်ဍုင်မန်တၟိ (ဗ္တိုက်သရိုဟ်တၠအဝဵုပၞာန်)/ဒပ်မန်ရာမည (NMSP-AD/RMA) ရ။[၂] ဒပ်ပၞာန်ဗၠးၜးမန်ဂှ် ဒက်ပ္တန်လဝ် ပ္ဍဲ သၞာံ ၂၀၂၅ ဂိတုဖေဖဝ်ဝါရဳ ၁၂ ဒၞာဲဒေသပယဵုတၞင်သြဳ၊ ညးက္ဍိုပ်ဂှ် ဒှ် နာဲရဇ္ဇ။[၃]
ညးတာလျိုင်ဂမၠိုင်
[ပလေဝ်ဒါန် | ပလေဝ်ဒါန် တမ်ကၞက်]ဂကောံပၠတရဴ ဒပ်ဝွံ ဒက်ပ္တန်လဝ် ကမ္မတဳကေင်ကာပရေင်ဍုင်ကွာန်ပရေင်ပၞာန် နကု မၞိဟ်စၞး ၂၆ တၠ ပ္ဍဲဂှ် နူ ဗော်ဍုင်မန်တၟိ (အေဒဳ) ပါလုပ် သွာင်ပရေင်ဍုင်ကွာန် ၉ တၠ၊ သွာင်ပရေင်ပၞာန် ၇ တၠ။[၁]
ညးတာလျိုင် သွာင်ပရေင်ဍုင်ကွာန်
[ပလေဝ်ဒါန် | ပလေဝ်ဒါန် တမ်ကၞက်]- နာဲဇဲယျ (ဥက္ကဋ္ဌ)
- နာဲလျး (ဒု-ဥက္ကဋ္ဌ)
- နာဲဗညာလဴ (ညးအုပ်ကာနာနာ)
ညးတာလျိုင် သွာင်ပရေင်ပၞာန်
[ပလေဝ်ဒါန် | ပလေဝ်ဒါန် တမ်ကၞက်]- ဂဥုပ်သကိုပ်ဗိုလ် စၠန်ထဝ် (ဂဥုပ်ကာပၞာန်)
- ဇမၞော်သကိုပ်ဗိုလ် နာဲသဵုဝေန် (စိုးဝင်း) (ဒု-ဂဥုပ်ကာပၞာန် ၁)
- ဇမၞော်သကိုပ်ဗိုလ် နာဲကျဳသာန် (ကျည်ဆံ) (ဒု-ဂဥုပ်ကာပၞာန် ၂)
နိဿဲ
[ပလေဝ်ဒါန် | ပလေဝ်ဒါန် တမ်ကၞက်]- ↑ ၁.၀ ၁.၁ ၁.၂ " Statement on the unification of the New Mon State Party (Anti-military Dictatorship) NMSP (AD) and the Mon Liberation Arma - MLA. Open (May 24, 2025).
- ↑ လိက်လလောင်တြး ပရေင်ပံင်ကောံ ဗော်ဍုင်မန်တၟိ(ဗ္တိုက်သရိုဟ်တၠအဝဵုပၞာန်)/ဒပ်မန်ရာမည (NMSP-AD/RMA) ကေုာံ ဒပ်ပၞာန်ဗၠးၜးမန် (MLF). Open (September 18, 2025).
- ↑ လိက်လလောင်ပၟိင် (၁/၂၅). Open (February 12, 2025).