ဓရ်ညဳသာ

နူ ဝဳကဳပဳဒဳယာ

                    ❤ဓရ်ညဳသာ❤

                    ပြကိုဟ်ဝၚ်သာသနာ

                    ပြကိုဟ်ရာဇာဝံသဂါထာ

                    ပြကိုဟ်သၠပတ်မန်

                         ✍ရာမည-မာံဝါန်ဇျာဲ✍


#ပ္ဍဲလ္တူဂၠးတိဇၞော်ပိုယ်ဏံဝွံဓရ် ညဳသာဂှ် ဒှ်ဇြဟတ်ခိုဟ်မွဲရောၚ်။ ယဝ်ခါရ ဟီုဏါမ္ဂး ဍေံဗၠေတ်ထောံဟွံမာန်ပုဟ်ဂှ် မ္ဒးထ္ၜးပ္တိုန်ဏာဂံၚ်ဂံၚ်ရ။ ဓရ်ညဳသာဂှ် လုပ်လၟိဟ်ကမၠောန် ကိစ္စဇၞော်မွဲရောၚ်။ ဟီုဂးစထေက်ရ။ ဓရ်ညဳသာဟီုဂှ် ဒှ်ကၠုၚ်နူလဵုရော။ ယဝ်ရဒးက္လေၚ်ဂၠိုက်ဂၠာဲထောံပၠန်မ္ဂး ဓရ်ညဳသာဂှ် ဒှ်ကၠုၚ်နူကဵုတမ်ရိုဟ်ကၞက်ကြက်ဓရ်မေတ္တာတေံဗွဲမဇြိုဟ်နက်ရ။ မေတ္တာဟွံမွဲမ္ဂး ဓရ်ညဳသာလေဝ်ဟွံမွဲမဒှ်ကီုရ။ ညးမွဲကေုာံညးမွဲ ဓရ်မေတ္တာနွံလ္တူညးသ္ကံတုဲမှဓရ်ညဳသာဂှ် ဍေံဂွံမံက်ဂတဝ်ပြာကတ်တိုန်မာန်ရောၚ်။ ဓရ်ညဳသာဟီုဂှ် နွံဒၟံၚ်ဂၠိုၚ်ဂၠိုၚ်ကဵုဒၞဲါရ။ မပ္တံကဵု လ္ပါ်ဂကူကဵုဒှ်လ္ပါ်လိက်ပတ်ယေန်သၞာၚ်ဇကုကဵုဒှ် လ္ပါ်ကမၠောန်ကဵုဒှ်။ဓရ်ညဳသာနွံမှ ကမၠောန်ဂှ်ဍေံဂွံအံၚ်ဇၞးကၠုၚ်မာန်ရောၚ်။ဟိုတ်ဂှ်ရ ဒၞဲါညးကဵုညးဓရ်ညဳသာဂှ် ဒးနွံဒၟံၚ် ဇၟာပ်ဇၟာပ်ဒၞဲါအလုံအိုဿီုရ။ ကောန်ဂကူပိုဲတံညးဂမၠိုၚ် ယဝ်ခါရကၠောန်ပရေၚ်ဂကူဏောၚ်ဟီုမ္ဂး ညံၚ်ရဴဂကူပိုဲဂွံဇၞော်မောဝ်တဴတက်တိုန်အာမာန် ညံၚ်ဂကူပိုဲဂွံက္လိဂွံဗၠးၜးမာန်ဂှ် အလုံကောန်ဂကူမန် ဒေသရးရာမညသီုဖအိုတ် ဒးဒှ်မွဲကသပ်မွဲဂၞန် မွဲကရောံမာန်တုဲမှ ဌာန်ဂတတေံတိုၚ်ပ္ကဴပိုဲရန်တၟံလဝ်တံဂှ် ဍေံဂွံအံၚ်ဇၞးစိုပ်အာတိုၚ်ပ္ကဴဗၠးၜး ပိုဲမာန်ရောၚ်။ ဂွံဒှ်မွဲဂကောံဗီုဏံမာန်ဂှ် ဗွဲကိုပ်ကၠာ ဓရ်ညဳသာဟေၚ်ဒးနွံလဝ်ပ္ဍဲလ္တူ ဂကူပိုဲကၠာရောၚ်။ ကောန်ဂကူမန်ပိုဲညးဂမၠိုၚ် ညံၚ်ရဴဂကူပိုဲ ဂွံတိတ်ဗၠးအာနူကဵုဘဝဍိက်မာန်ဂှ် ဒှ်တာလျိုၚ်အလုံကောန် ဂကူပိုဲသီုဖအိုတ်ပၠန်ရဟွံသေၚ်ဟာ။ဆမၞိဟ်မွဲဓဝ်ဟေၚ် ၜိုန်ရဒုၚ်ကၠောန်မံၚ် ညံၚ်ကဵုဍိက်ဂိုတ်ညံၚ်ဂၠဴဂစာန်ရေၚ်တၠုၚ်ကၠောန်ကၠုၚ်ပရေၚ်ဂကူဆာန်မံၚ်ဂကူဂှ် တ္ၚဲလဵုလေဝ်ဂွံကလိဂွံ ဗၠးၜးဂှ်ဒှ်ဟွံမာန်သက်သက်ရ။

      ဟိုတ်ဂှ်ရ ဥပမာညံၚ်ရဴဍာ်လတိုပ်မွဲထၞဟ် ဗဒှ်ကဵုဍာ်ဟွံမာန်ကီုရ။ ယဝ်ရ ပံၚ်ပကောံထောံဗွဲမဂၠိုၚ်ဂၠၚ်မ္ဂး ဍေံဒးဒှ်ဍာ်ၜဳမာန်တွဵုရ။ ပိုဲကောန်ဂကူမန်တံလေဝ် တုပ်တဴညံၚ်ရဴသာ်ဝွံကီုရ။ နူမွဲထၞဟ် ညံၚ်ဂွံဒှ်ဍာ်ၜဳမာန်ဂှ် ဓရ်ညဳသာဒးနွံတဴညးသ္ကံရောၚ်။ ဂကူမန်ပိုဲညးဂမၠိုၚ် ယဝ်ရဟွံညဳသာမ္ဂး ဂကူပိုဲလေဝ် ဂွံဇၞော်မောဝ်တဴတက်ဖောအ်ဗြေဝ် ယးတၟးတိုန်အာအကြာဂကူတၞဟ်သ္အာၚ်ဟွံမာန်ရ။

      ယွံလေဝ်ကလောမန်ပိုဲ ညးမဆာန်ဂကူလိက်ပတ်တံညးဂမၠိုၚ်အဴ။ က္လေၚ်ကူချပ်ပါ်ပဲါရံၚ်အာအိုတ်ညိ။မုဟိုတ်ရော ဂကူမန်ပိုဲဒးဒုၚ်သၟဝ်တဲညးသ္အာၚ်တံရော ဇၟာပ်ပ်ပံက်ပါၚ်ရမျာၚ် ဂွံဒးကရောတ်မုက်ဍောတ်မတ်သဝ်ဒၟံၚ်တွဵုဂှ်ရော။ က္လေၚ်ဂၠိုက်ဂၠာဲထောံပၠန်မ္ဂး မုက်ဂၞန်မွဲ ဟိုတ်နူကဵုဓရ်မေတ္တာဓရ်ညဳသာ ဟွံကၠောံက္ဍညးသ္ကံမဒှ်ရ။ ညးမဆာန်ဂကူဆီဇာတိမန်တံညးဂမၠိုၚ် ၜိုန်ရနွံပၟိက်မိက်ဂွံကဵုဂကူဇကုဇၞော်မောဝ်ဗၠးၜး မိက်ဂွံဆဵုဂကူညဳသာ ဂိုတ်ဂစာန်ပ္တိတ်ဇြဟတ်လွဳပရာဒၟံၚ်မဗွဲမလံလ ဂၠိုၚ်ကဵုအခိၚ်အခါကီုလေဝ် ဒၟါနူကဵုပူဂိုလ်သမၠီုဒိုဟ်ဓီု ဟွံဂွိၚ်ကဵုဂကူလီု ဂကူကၠက် မၚ်ပဠက်ဒၟံၚ်ဂကူ မၚ်ဍဵုဍိုက်ဂကူ ဗက်ဟီုဗျိပျုတ်ဂၠာဲစုတ်ဒုဟ်လၟိုန် ညံၚ်ရဴမန်ဂကူရိပၞက် ဟွံတီရှ်ဂကူတံဂှ် စွံလဝ်အလံၚ်ရပ်လဝ်မာနတွဵုတုဲ ဓရ်ညဳသာဟီုဂှ် ဒးတၞီဗၠိုက်စှ်ေမံၚ်သိုက်သိုက်ရိုဟ်ဒဒှ်တ္ၚဲရ။

    ယြဴပူဂိုလ်ဂကူလဵု မွဲဟွံဟီုဓရ်ညဳသာဟွံမွဲမ္ဂး တိုၚ်ပ္ကဴရန်တၟံလဝ်တံဂှ် ဟွံအံၚ်ဇၞးအိုတ်ညိ။က္လေၚ်ရံၚ်အာကဵုပုံအာဂီုညးတမၠာတံဟီလဴလဝ်ညိ။ ပ္ဍဲကာလမတုဲကၠုၚ်တေံ ချေံသိန္ဓဴမွဲသွက်ဗုၚ်ဂၞဴဂွံပေၚ်အာဂၠာဲစချောဲ စိုပ်အာဇရေၚ်ကၞုမပဒေတဴတုဲ။ ကာလဂှ် က္တဵုဒှ်ပဋိပက္ခစှ်ေအးအဴညးသ္ကံရ။ ဟိုတ်နူကေတ်မာန်လ္တူညးသ္ကံတုဲ ပြိုၚ်လံၚ်ဂြိုပ်ရ။ ကာလဂြိုပ်ဂှ် ချေံသိန္ဓဴဝွံ ၜိုန်ဍိုက်ပေၚ်တဴကဵုဇြဟတ်ထတ် အစောံမြက်စာဒၟံၚ်ဟလိုၚ်ကီုလေဝ် ဒးဒုၚ်ကျအာကၞုသၟးဟွံသေၚ်လမျီုလေဝ်ဒးအိုတ် အာဒၞဲါဂှ်ရ ဟွံသေၚ်ဟာ။ မူဟိုတ်ရောဟီုတှ်ေ ချေံသိန္ဓဴဝွံ ဟိုတ်နူကဵု ဇြဟတ်ညဳသာဇကုဟွံမွဲတုဲ ဆဇကုမွဲဓဝ်ဟေၚ် ဂိုတ်ဂြိပ်ထဍေၚ်မံၚ်တုဲ ဍောၚ်ၜိုတ်ချိုတ်ဇိုၚ်တဲဗွဲမလောန်ရ။ဂြိုဟ်ဒးကးအာရ။ ကၞုဝွံၜိုန်ရ အာဒၟံၚ်အိၚ်အိၚ်ကီုလေဝ် ဟိုတ်နူကဵုပရေၚ်လေဝ်မၞိဟ်ခိုဟ်ဓရ်ညဳသာသၟဟ်န် နွံလ္တူညးသ္ကံတုဲ ဂွံအံၚ်ဇၞးအာချေံသိန္ဓဴဗွဲမလာဲသွာရ။ ညံၚ်ရဴညးတမၠာတံ ဟီုလဝ်ဂလာန်ညဳမ္ဂးသာအာမ္ဂးစိုပ်ကီုရောၚ်။

        ဟိုတ်ဂှ်ရ ပိုဲကောန်ဂကူမန်တံညးဂမၠိုၚ် ရံၚ်ကဵုသက်သဳသာဓကဗီုအာဂီုလ္တူတေံတုဲ ထေက်ကဵုဒးကေတ်လဝ်နဲကဲဓရ်သတိ ဗွဲမဇၞော်ကဵုဇြဟတ်ကီုရ။ ညံၚ်ရဴညဳသာ ဒှ်မွဲဇြဟတ်မာန်ဂှ် ဒှ်တာလျိုၚ် ကောန်ဂကူမန်တံ သီုညးဖအိုတ် ညးညးအဲအဲဂိုတ်ဂစာန်လွဳပရာပတိုန်အိုတ်ညိ။ ယဝ်ရ ဂကူပိုဲဟွံညဳသာညးသ္ကံမ္ဂး ညးတၞဟ်သ္အာၚ်တံ ဍေံကၠုၚ်ပ္ဍဵုပ္ဍိုက်ကးစသော်ကၞၚ်မတ်လ္တူဂကူပိုဲမန်တံ ဗွဲမလောဲသွာရ။ ပူဂိုလ်ညးမဆာန်ဂကူ ကၠောန်ဏာကမၠောန်သွက်ဂကူလိက်ပတ်ဂွံဆာန်လိက်ပတ်ဂွံဇၞော်မောဝ်တိုန်မ္ဂး ပူဂိုလ်တဝ်မုဲတအ် ဟိုတ်နူစိုတ်ဆာန်ဂကူဆာန်လိက်ပတ်ဟွံမွဲတုဲ ညံၚ်ဂွံညဳသာဂှ် ဟွံစွံလဝ်ပဓာနတုဲ က္လေၚ်ဗဝ်ဒၟံၚ်ဂကူလိက်ပတ်ဇကုဂှ် ဍေံအံၚ်ဇၞးမာန်မံၚ်ဏီဟာ။ ဂကူပိုဲမန် ဒးဒုၚ်ဇြောတ်ဒၟံၚ်ဆီဗွဲမဇၞော်ကဵုဇြဟတ်တုဲ သွက်ဂွံယးတၟးပြာကတ်တိုန်ကၠုၚ်ဟွံမာန်ရ။

        မန်ဂကူ(တဝ်မုဲ)တံဂှ် မံက်ဂတဝ်တိုန်ပ္ဍဲဂကောံမွဲမွဲတုဲမ္ဂး ယဝ်ရပိုဲဝးပကဝ်ကၠေံ ဟွံမာန်မ္ဂး လိက်ပတ်ပိုဟ်ဂှ် ဒးကၠေံဗ္ဒန်အာဍာံဍာံရောၚ်။ မုက်ဂၞန်(၁)လိက်ပတ်ကၠေံ

ဗ္ဒန်အာမ္ဂး ယေန်သၞာၚ်ပိုဲလေဝ် ဒးယုတ်သဝ်စှ်ေအာ ဂကူပိုဲလေဝ်ဒးဒုၚ် ၚိတ်ဏာဂျိ ဒးဟောံဗြံအာ။ ညံၚ်ရဴတၞံဆုနွံမံၚ် ပ္ဍဲလ္တူသၟန်ၜဳကီုရ ကာလလပှ်တေံ ဇီုဓဗတ်လဵုကၠုၚ်မ္ဂး ပြဟ်ကဵုလဇုဲ ဒးဒေါမ်ကၟိုၚ်အာတွဵုရ။

    ဟိုတ်ဂှ်ရ ပိုဲကောန်ဂကူမန်တံညးဂမၠိုၚ် ညံၚ်ရဴဂွံဒှ်အှော်မွဲစန်မာန် ဓရ်ညဳသာကေတ်လဝ်ညိ။ ဂိုၚ်စွံလဝ်ပ္ဍဲကဵုဂၠံသြိုဟကဟဒယတေံ ဗွဲမဗိုန်ဗတ်အိုတ်ညိ။ အှော်မွဲတၞုၚ်ၜိုန်ရဝးကဝ်အာဗွဲမလောဲသွာကီုလေဝ် ဒှ်အာမွဲစန်တုဲမ္ဂး ဂွံဝးကဝ်ဂှ် ဍေံဟွံလောဲသွာရ။ ပိုဲဂကူမန်တံညးဂမၠိုၚ်လေဝ် ဥပမာညံၚ်ရဴသာ်ဝွံကီုရ။ မၞိဟ်မွဲဟေၚ်ၜိုန်ရ ညးတၞဟ်သ္အာၚ်တံပ္ဍဵုပ္ဍိုက်မာန်ကီုလေဝ် ယဝ်ရပိုဲမံၚ်ကဵုဂကောံဂွံစန်ဒက်လဝ်ခိုၚ်ခိုၚ်ကၠိုက်ကၠိုက်မ္ဂး ညးကၠုၚ်ပ္ဍဵုပ္ဍိုက်ပိုဲမာန်မံၚ်ဏီဟာ။ ညံၚ်ဂွံဒှ်ဂကောံမွဲမွဲမာန်ဂှ် ဗွဲကိုပ်ကၠာ ဒးဂၠာဲတဴဓရ်ညဳသာညးသ္ကံပၠန်ရ။ ဓရ်ညဳသာဂှ် ပိုဲက္လိဂွံတုဲမှ ဂကောံဂှ်ဒှ်ကၠုၚ်မာန်ရောၚ် ဟိုတ်ဂှ်ရ ဓရ်ညဳသာဟီုဂှ် ဒှ်တၚ်အဓိကကဇၞော်မွဲရောၚ် ဒးဟီုဂးစထေက်ရ။

       အိုတ်ကဵုဂကူမန်တံ ညးဂမၠိုၚ်မုပဂွံဇြိုပ်ဇြုဲအိုပ်အုဲ ဓီုဓုဲမံၚ်ဟလိုၚ်ဏံဂှ်ရော။ ဂကူညးတၞဟ်တံဒှ်အာတၠပညာအိုတ်ရ ဒှ်သေဋ္ဌဳအိုတ်ရ။ ဂကူမန်ပိုဲဂှ် လၟုဟ်ဟွံညဳသာ ညးသ္ကံဏီဟာ အခိၚ်အခါလဵုမှဂွံက္လိဂွံဓရ်ညဳသာညးသ္ကံမာန်ဂှ်ရော။ ပိုဲဟွံညဳသာညးသ္ကံမ္ဂး ဗီုလဵုမှ ဂကူပိုဲဂွံပ္စူလ္ပုဟ်တဲ အကြာဂကူညးတၞဟ်သ္အာၚ်တံမာန်ဂှ်ရော။ သွက်ဂွံတိတ်ဗၠးအာနူကဵုဘဝဍိက် ညံၚ်ဂွံဒှ်ဘဝနာဲမာန်ဂှ် တ္ၚဲလဵုမှဂွံက္လိဂွံဗၠးၜးမာန်ဂှ်ရော။ ဟိုတ်ဂှ်ရ က္လေၚ်ရံၚ်ကဵုဂလာန်အတိုၚ်မသၟာန်လဝ်တံဂှ်တုဲ အလုံဂကူမန်တံဖအိုတ်စနူကဵုအခိၚ်ဝွံတုဲ ဆီဍိက်ဂှ်ကၠဟ်ထောံကဵုသ္ၚောဲ ဆီအာဇာနဲဂှ်ဂိုၚ်ကေတ်တုဲ ညံၚ်ရဴဂွံဒှ်မွဲကရောံ မွဲဂကောံ မွဲကြုတ် မွဲဗုၚ်ဂၞဴ ညံၚ်ရဴကောန်မွဲမိမာန် သ္ဂောံသ္ဍိုက်ဆာန်တံညးသ္ကံမာန် ဂွံပံၚ်ဖက်ညးသ္ကံဂွံဂှ် ဓရ်ညဳသာဂှ် ညးညးအဲအဲ ဂိုတ်ဂစာန်လွဳပရာတိုန်အိုတ်စိုအ်ဂှ် နကဵုဂလာန်မတိတ်ကၠုၚ်နူဂၠံသြိုဟ်သီုကဵုလၟေၚ်ဓရ်မေတ္တာစိုတ် မိက်ဂွံဖ္တိုက်ဖ္အောဝ်ဏာ ဗွဲမဇြိုဟ်ဟ်နက်နက်အလုံဂကူမန်ပိုဲသီုဖအိုတ်ရအဴ။

ကလေၚ်သီကေတ်လဝ် နူ "https://mnw.wikipedia.org/w/index.php?title=ဓရ်ညဳသာ&oldid=29600"