ဓဝ်ဆာန်မိယာဲ

နူ ဝဳကဳပဳဒဳယာ

လိက်အုပ်ဏံမၞုံယၟု (ဓဝ်ဆာန်မိယာဲ)


တ္ၚဲကောန်ဆာန်က္တဵုဒှ်မၞိဟ်ဂှ် ဒှ်တ္ၚဲချိုတ်မိယာဲမွဲတ္ၚဲကီုရ၊ ပ္ဍဲတ္ၚဲပိုဲကောန်တအ်က္တဵုဒှ်ကၠုၚ်မၞိဟ်ဂှ်တှ်ေ ကဵုဂွံဗှ်ဗၞုဟ်ကူချပ်ဂွံအာလပါ်မိယာဲဆာန်မွဲအိုတ်ညိအဴကောန်တအ်။

ဓဝ်ဆာန်မိယာဲမွဲဂှ် နွံကဵုၚုဟ်မးတ္ၚဲတြေံတြဟ်အာဟွံမွယ်တုဲ လျးတၟးရာင်ဆာဲဒၟံင်ဇၟာပ်အခိင်အခါသွက်ဘဝကောန်ဆာန်တံရ။


ဓရ်ဆာန်မိယာဲ[ပလေဝ်ဒါန် | ပလေဝ်ဒါန် တမ်ကၞက်]

(ဓဝ်ဆာန်နွံဒၟံင်လ္တူကောန်တံဂှ် တ္ၚဲလဵုမှလေဝ်ဝိုတ်ကၠေံအိုတ်အာဟွံမွယ်)

တ္ၚဲမိဟီုမ္ဂးဂှ်တှ်ေ တ္ၚဲမိယာဲပိုဲတံက္တဵုဒှ်ကၠုင်မၞိဟ်တ္ၚဲဂိတုသၞာံလဵုဂှ်တှ်ေကော်ခဴစတ္ၚဲမိပိုဲတံကီုရ၊ ဟိုတ်ဒှ်သာ်ဂှ်တုဲ ပ္ဍဲကဵုအလဵုသဳဍုင်သ္အာင်တံဂှ်လေဝ် ထ္ၜးကၠုင်ရုပ်ရဴတ္ၚဲမိယာဲအိုတ်ကီု ညံင်ရဴဍုင်သေံဗွဲတုန်၊ ဒှ်သွက်ကဵုညးဍုင်ကွာန်တံသီုညးဖ္အိုတ် ဂွံကူစိုပ်တဴဒၟံင်တွဵုဟီုဂှ်တှ်ေ ပိုဲဏံမွဲကၠုင်နူကဵုမိယာဲပိုဲဏံကီုရ၊ ပိုဲတံက္တဵုဒှ်ကၠုင်နူကဵုခၞော်ဆုပထောင်ဒုန်ဟွံသေင်တုဲ ကၠုင်နူကဵုပ္ကဴဒကှ်ဝှါတံလေဝ်ဟွံသေင် ဆဂး'ဂှ် က္တဵုဒှ်ကၠုင်မၞိဟ်နူကဵုမိယာဲ နူကဵုမိမပိုဲတံမဒှ်ကီုရ။

ၚုဟ်မးပ္ဍဲကဵုမိမၜါလ္တူကောန်တံ[ပလေဝ်ဒါန် | ပလေဝ်ဒါန် တမ်ကၞက်]

မိမၜါကၠောန်ပတိုန်မာန်ဂွံနင်ပိုဲကောန်တံဂှ် ဇၟာပ်မိမတံဖ္အိုတ်လေဝ် လညာတ်ခိုဟ်ခိုဟ်သွက်သ္ဂောံဂွံကေတ်ကောန်ဇာတ်မာန်ပ္ဍဲကဵုအခိင်သ္ပမ္ၚဵုထပ်တဲစှ်ေဒၞာဲညးသ္ကံတုဲ ညးတံမိက်သ္ဂောံဂွံတဴကောန်အိုတ်ရ၊ မူဟိုတ်ဒးကေတ်ကောန်ရောဟီုတှ်ေ သွက်မဇဇကုညံင်ဟွံဂွံကၠေံကၠက်အာကီု သီုကဵုအဆက်မဇမၞိဟ်တံညံင်ဟွံဂွံကၠေံအိုတ်အာလ္တူဂၠးတိဇၞော်ဏံကီုတုဲ ဗွဲသဘာဝဟေင် ညးတံစဳရေင်ဖန်ဗဒှ်ကၠုင်ပိုဲကောန်တံရ၊ ညးလဵုမွဲစှ်ေဒၞာဲဒှ်တြုံဗြဴညးသ္ကံဗွဲမလအ်လတုဲတှ်ေ ဟွံကေတ်ကောန်ဂှ်နွံမံၚ်ကီုဟာ၊ လအ်ကဵုပြဟ်ဟေၚ်ညးတံဒးကေတ်ကောန်ဇာတ်ဖ္အိုတ်ရ၊ ဗွဲမဂၠိုၚ်တှ်ေ ညးတံမိက်သ္ဂောံဂွံတဴကောန်ဇာတ်ဇၟာပ်မၞိဟ်ရ၊ သွက်မၞိဟ်မိက်သ္ဂောံဂွံတဴကောန်တုဲ ယဝ်ရညးတံဟွံဂွံတဴကောန်မ္ဂးတှ်ေ ဂကောံအိန်ထံၚ်ညးတံဂှ်လေဝ်နွံကဵုဒဒိုက်စိုတ်ဟွံသာရ၊ လ္ၚဵုဂှ်တှ်ေ ဒးအာကေတ်နၚ်ကောန်ဇာတ်ညးတၞဟ်တုဲတှ်ေ သ္ပကောန်သွီုဇကုလွဳပရာအာအိုတ်ရ၊ ဆဂးဂှ်တှ်ေ ဍေံဂွံတုပ်ဗီုကဵုကောန်ဇကုအရၚ်ဟီုဂှ်ဒှ်အာဟွံမာန်ရ၊ သွက်ညးဂွံကောန်ဝါတ်တံဂှ် ၜိုန်ရပိုဲတံအာကေတ်နၚ်ကောန်ညးတၞဟ်လွဳလဝ်ကီုလေဝ် အဓိကဟီုဂှ် ညံၚ်ဂွံဒှ်မၞိဟ်ခိုဟ်မွဲမာန်ဂှ် ဒးလွဳဒးမၚ်မွဲအာရ၊ (ဗီုလဵုဂွံသ္ပရော ကောန်ဇကုဟွံမွယ်တှ်ေ ဒးလွဳအာကေတ်နၚ်ကောန်ညးတၞဟ်ရဒှ်) ၊ ပ္ဍဲကဵုအခေတ်တ္ၚဲဏံဂှ်တှ်ေ ယဝ်ရဒးဟီုဗီုဗုဒ္ဓဘာသာမ္ဂးတှ်ေ (ညးၜံၚ်ပ္တိတ်နၚ်ကောန်တံဂှ် လောဲသွာနူကဵုညးဒးမၚ်မွဲလွဳပရာကောန်ၚာ်တံဂှ်ကီုရ)၊ ၜံၚ်တုဲထောံလဝ်ပေၚ်ပြးဏောၚ်တှ်ေ မုဖဵုဟွံမွယ်သွက်လိုက်လောကဏံရ၊ မၞိဟ်ဒးလွဳပရာမၚ်မွဲကောန်ၚာ်တံ မၞိဟ်ဒးဇုက်အိက်အေၚ်သတိက်တံဂှ် ဒှ်တဴမိမကောန်ၚာ်တံဇေတ်ဇေတ်မွဲ ဗီုအဲညးချူလိက်ဏံကၠိုဟ်လဝ်စိုတ်ဂှ်ရ၊ ကောန်ဇကုလေဝ်ခိုဟ်နွံပရေံနွံရ၊ လွဳလဝ်ကောန်ညးတၞဟ်လေဝ်ပရေံနွံခိုဟ်နွံကီုရ၊ အဓိကဂှ်တှ်ေ တိုန်တဴကဵုပိုဲတံလွဳပရာမၚ်မွဲလဝ်ကောန်ၚာ်တံဂှ်ရ။


လညာတ်ဗီုဏံဟီုမ္ဂးဂှ်တှ်ေ ဇၟာပ်မိမတံသီုညးဖ္အိုတ်ဒးနွံမာန်ရ၊ ယဝ်အခါရညးလဵုမွဲဟွံဂွံကောန်ဇာတ်မ္ဂးတှ်ေ ပိုဲတီပိုဲကၠိုဟ်ဒှ်ဒဒိုက်စိုတ်မာန်ရ၊ ပိုဲတံဂွံဆဵုညာတ်ကေတ်မိမလ္ၚဵုလ္ၚဵုတံဂှ် စှ်ေဒၞာဲဒှ်တြုံဗြဴတၟာလအ်ကီုတုဲ ညးတံမိက်သ္ဂောံဂွံတဴကောန်ၜိုတ်ဂလိုင်လဵုကီုလေဝ် အိုတ်ကၞောတ်ဟေင်ညးတံဟွံဂွံကောန်ရ၊ (ဂွံကောန်ဝါတ်လေဝ်ဟီုစရ) ဟိုတ်ဏံဟေင်ရက္တဵုဒှ်ကၠုင်ဒဒိုက်စိုတ်ပ္ဍဲကဵုဘဝမိမတံဂှ်ဗွဲမဂၠိုင်မာန်ရ၊ ယဝ်ရပိုဲတံချိုတ်အာမ္ဂးတှ်ေ ပိုန်ဒြပ်တံဏံလေဝ် ညးလဵုမွဲဂွံဆက်ဗဂဵုလဟဵုမင်မွဲထိၚ်ဒက်အာပၠန်ရော၊ အခိင်သော်ဗုဗျုထဴဇရာကၠုင်မ္ဂးတှ်ေ ကဵုညးဂှ်လဵုမွဲဂွံလွဳပရာမင်မွဲရံၚ်စံင်ဂှ်ရော၊ ကူစိုပ်ဂွံသာ်ဏံတုဲ မိမဟွံဂွံကောန်တံဂှ် ပဵုတုဲဒှ်ဒဒိုက်စိုတ်ကွေံကွေံရ၊ (ဒဒိုက်ဗျုထဴဇရာ)ဏံဂှ် ဒှ်ဟိုတ်ဟွံမွယ်ကဵုကောန်ဇာတ်မဒှ်ရ၊ ဟိုတ်ဏံဟေင်တုဲ အတိုင်သဘာဝဟေင် မိမတံထေက်ကဵုဒးကေတ်ကောန်အိုတ်ရ။

တာလျိုင်မိမၜါ[ပလေဝ်ဒါန် | ပလေဝ်ဒါန် တမ်ကၞက်]

အခိင်ကောန်တံက္တဵုဒှ်ကၠုင်မၞိဟ်တုဲတံဂှ်ပၠန် ၜိုန်ရမိမၜါတံ မိက်သ္ဂောံဂွံတဴကောန်တြုံကောန်ဗြဴစေတနာညးတံနွံမံင်ကီုလေဝ် အခိင်ၜံင်ပ္တိတ်တုဲဗက်ဂှ် ဒှ်ကောန်တြုံကီုကောန်ဗြဴကီုဂှ် ညးတံဖျေံစိုတ်ဒှ်ကောန်ဖျုန်ဂြိုဟ်ညးတံဍာံဍာံတုဲ ညးတံဆာန်ဇေတ်ဇေတ်အိုတ်ရ၊ ဆာန်ကောန်လောန်တုဲ မင်မွဲလွဳပရာကေတ်ကၠုင်စိုတ်ကောန်တံ ဗဂဵုလဟဵုအရာနာနာၜိုတ်ညးတံကေတ်တာလျိုင်မာန်ၜိုတ်ပိုန်ဒြပ်ညးတံနွံရ၊ (ဥပမာတုန်) ဟွံမိက်ကဵုကောန်တံကၠောန်သ္ပပရေင်ဗၠေတ်ဗၠေတ်ကီု၊ စၞောန်ထ္ၜးဏာကဵုဂၠံင်ဍာန်ကဵုကောန်တံခိုဟ်ခိုဟ်ကီု၊ ကဵုကောန်တံကတ်ပညာနာနာၜိုတ်ထေက်ကြိုက်ကဵုပိုန်ဒြပ်ညးတံနွံဂှ်ကီု၊ ဖန်ဖက်ကဵုသဘင်မ္ၚဵုထပ်တဲၜိုတ်ထေက်ကြိုက်ကဵုညးမွဲကဵုညးမွဲကီု၊ ဇိုန်အပ်ပြာပ်ကဵုပိုန်ဒြပ်အာဲညဳညဳသာသာဂှ်ကီု၊ သီုဖ္အိုတ်ဏံဂှ် ဒှ်တာလျိုင်မိမတံဒးကၠောန်လ္တူကောန်တံအိုတ်တုဲ အခိင်မိမၜါတံဟွံမွယ်မ္ဂးတှ်ေ သွက်ဂွံဆက်ပြိုင်အာဘဝဗပေင်အာဗုၚ်ဂၞဴအနာဂတ်တေံမာန်ရ၊ ဟိုတ်သာ်ဏံဂှ် ဇၟာပ်မိမတံတာလျိုၚ်နွံဒၟံင်လ္တူကောန်ဇာတ်ညးတံဖ္အိုတ်ရ။

ကမၠောန်သာ်ဏံဟီုဂှ်တှ်ေ (တာလျိုင်)ဇၟာပ်မိမတံဒးနွံရ၊ ညးတံကၠောန်အာၜိုတ်ညးတံကၠောန်ဂွံမာန်ရ၊ တ္ၚဲဏံပိုဲကောန်တံသီုညးဖ္အိုတ်လေဝ် က္တဵုဒှ်ကၠုင်မၞိဟ်အဝယ်လေဝ်ဇၞော်ကၠုင်ယျတုဲ ဂရုဏာလ္တူမိမတံညိဟီုဂှ် ယဝ်ပိုဲဏံမိမဟွံမွယ်မ္ဂးတှ်ေ ပိုဲတံဂွံက္တဵုဒှ်ကၠုင်မၞိဟ်ဗီုလဵုရော၊ တုဲပၠန် က္တဵုဒှ်ကၠုင်မၞိဟ်တုဲ ယဝ်ညးတံဟွံမင်မွဲလွဳပရာကၠုင်ပိုဲတံတုဲ ညးတံအာထဝေင်ကၠဟ်ထောံပ္ဍဲနခၟိက်စေါဝ်ကြုင်တေံမ္ဂးတှ်ေ ပိုဲတံက္တဵုဒှ်ဒဒိုက်တုဲ ဘဝဏံထုဲထံၚ်ကွေံကွေံရ၊ ပိုဲတံက္တဵုဒှ်ကၠုင်ကောန်ၚာ်ဟွံမွယ်ကဵုမိမယဝ်ရညးတံဟွံလွဳပရာလဝ်ပိုဲ၊ ဟိုတ်ဒှ်သာ်ဏံတုဲ မိမတံဂှ်ဒှ်ညးတၠဂုဏ် ဒှ်ညးတၠမေတ္တာမွဲဇေတ်ဇေတ်ရ၊ ယဝ်ရဟီုနကဵုဗုဒ္ဓဘာသာမ္ဂးတှ်ေ ကျာ်နွံပ္ဍဲစိုတ်ရ။

မေတ္တာမိယာဲဆာန်[ပလေဝ်ဒါန် | ပလေဝ်ဒါန် တမ်ကၞက်]

ပ္ဍဲကဵုအခိင်ကောန်တံဂွံဒုင်ကေတ်ဒဒိုက်မာန် အခိင်ဒှ်ကၠုင်ပြသၞာအရာနာနာတံဂှ်တှ်ေ ညးမရီုဗင်ပိုဲတံဒှ်မၞိဟ်ကၠာအိုတ်ဟီုဂှ်တှ်ေ မိမပိုဲဏံရဒးရီုဗင်ပိုဲကောန်တံကၠာအိုတ်ကီုရ၊ ပ္ဍဲကဵုမိမၜါဂှ်တှ်ေ မိယာဲမွဲဟေင်ဒးကၠုင်ကၠာအိုတ်တုဲ မိယာဲမွဲဟေင်ရဒှ်ဓဝိၚ်စံင်တူလ္တူကောန်တံဂၠိုင်နူကဵုအပါမွဲဏီ၊ မိယာဲမွဲဟေင်ရကူစိုပ်အာလပါ်ကောန်တံကၠာရ၊ တုဲပၠန် ဂြိပ်လုပ်ဓဝဲါဂှ်မိဗန်လဝ်ကောန်မွဲရ၊ ၜိုန်ရသ္ၚိအဃောပၟတ်တူ ပၟတ်အဃောဂြင်ဍာဲမံင်ဂှ်လေဝ် ဟိုတ်နူကဵုကောန်ဒတုံနွံဒၟံင်ပ္ဍဲကဵုပၟတ်ဗၟဝ်တေံတုဲ မိယာဲမွဲဒးထပါ်လုပ်အာတူတူ မိန်ယိုက်ဗန်ကေတ်ကောန်တုဲ ဂြိပ်တိတ်ကၠုင်ရ၊ ဣဏံဟီုဂှ် ဍာ်စိုတ်ဍာ်မေတ္တာမိယာဲနွံဒၟံင်လ္တူကောန်တံရ၊ တုဲပၠန် မင်မွဲလွဳပရာဗဂဵုလဟဵုအာကောန်တံနာနာသာ်မာန်ကီု၊ ကောန်တံအရာမိက်သ္ဂောံဂွံမူရောတှ်ေ ဗွဲမပြဟ်ဒုင်ကအ်ပါင်တုဲ ဒးအာဂၠာဲကၠောန်ကေတ်နင်ကဵုကောန်တံလၟိုန်ရ၊ ဟွံမွယ်ဂှ်ဟွံဟီုကဵုကောန်တံတုဲ ဒးဂၠာဲအာကေတ်နင်ညံင်သ္ဂောံဂွံမာန်ရ၊ ဟိုတ်နူကဵုကောန်တံမိက်သ္ဂောံဂွံအရာတေံတွဵု၊ စၞစမိယာဲပိုဲဒးစိုတ်မိက်သ္ဂောံစဂှ်လေဝ် ပိုဲကောန်တံတီကေတ်ဟွံမာန်တုဲ ဟိုတ်နူကဵုစၞစနူကဵုကောန်တံစလဝ်ဟွံအိုတ်တံဂှ်တှ်ေ မိယာဲမွဲစဂွံဖအိုတ်ရ၊ ဟီုစိုပ်အာဖဵုဏံတှ်ေ ကူစိုပ်ဂွံအာမိယာဲအဲညးချူလိက်ဏံကွေံကွေံရ၊ နူဍောတ်ဍောတ်တေံ အခိၚ်ပိုဲစကွာၚ်ကီု စပုၚ်ကီုမ္ဂးတှ်ေ ကွာၚ်ပိုဲစလဝ်ဟွံအိုတ်တံဂှ် မိယာဲမွဲကပှ်စဂွံဖအိုတ်ရ၊ အခိၚ်စပုၚ်ပၠန်လေဝ် ကဇုတ်ဂၠိုၚ်ဂၠိုၚ်ဂှ်ရပ်ထောံပ္ဍဲပ္ၚာၚ်စပုၚ်မိယာဲတုဲ ကပိုဲကောန်တံဟွံစဂှ်လေဝ် မိယာဲစဂွံဖအိုတ်ရ၊ သၠးအခေါၚ်ညိဏး ဟီုစိုပ်အာဘဝညိည၊ ဣဏံဟီုဂှ် မေတ္တာမိယာဲမွဲနွံဒၟံၚ်လ္တူကောန်တံရ။


မေတ္တာဆာန်ဇေတ်ဇေတ် ရီုဗင်ပိုဲတံဇေတ်ဇေတ် ဒှ်ဓဝိင်စံင်တူလ္တူပိုဲဏံဇေတ်ဇေတ် ဟွံရန်လဝ်ဂုဏ်ဖဵုမွဲသာ်ဗီုကဵုမိယာဲပိုဲဏံမွဲဂှ်တှ်ေ မၞိဟ်ဗြဴလဵုမွဲဂှ် ဂွံပတုပ်သၟဟ်ကဵုဗီုမိယာဲပိုဲဏံမာန်ရော၊ ညးဗြဴလဵုနွံမံင်မွဲဂၠာဲဆဵုမံင်ကီုဟာ၊ မိယာဲပိုဲဏံမွဲဟေင်ရဒှ်ညးဂွံလဝ်အဆိပ်မွဲတွဵုရ၊ ပိုဲကောန်တံဒှ်ကၠုင်ဝုတ်ဗၠာဲဇၞော်ဂေါဝ်တိုန်ကၠုင် နွံကဵုဒှ်ကၠုင်မၞိဟ်ဆာန် ဆဂးဂှ်တှ်ေ ဟွံတုပ်ကဵုဗီုမိယာဲဆာန်ပိုဲဏံရ၊ ဣဏံဟီုဂှ် ညးကော်စဆာန်မွဲမွဲဗီု၊ မိယာဲဆာန်ပိုဲဟီုဂှ် ဆာန်သက်ပ္တောံၜိုတ်ဟွံမွယ် ဆာန်ဇေတ်ဆာန်ကွေံ ဆာန်ဟွံမွယ်ကဵုဟိုတ်ဖဵု ဆာန်ဟွံရန်တၟံလဝ်ဖဵုမွဲမွဲလ္တူပိုဲကောန်တံကီုရ၊ ဆာန်နကဵုဍာ်မေတ္တာဗွဲမဇြိုဟ်နက် ဆာန်နူကဵုပ္ဍဲစိုတ်တေံပေင်ပေင်တုဲ ဟွံမွဲကဵုအခိင်က္ဍုဟ်မၠိ ဟွံမွယ်ကဵုဒဒိုက်ၜိုတ်ဆတၟာတၞုင်သော်လ္တူကောန်တံရ၊ ဣဏံဟီုဂှ် မေတ္တာမိယာဲဓဝ်ဆာန်မိယာဲပိုဲရ။


အတိုၚ်သဘာဝပကတိတှ်ေ မိယာဲမွဲဂှ်ဟွံကၠောန်ကဵုကောန်တံဒးယှုက်ထုဲစိုတ်မာန်တုဲ ယဝ်ရဆဵုဒးကောန်တံဒှ်ကၠုင်ပြသၞာမ္ဂးတှ်ေ ပြသၞာအခက်ခုဲတံဂှ်ညံင်သ္ဂောံအိုတ်အးမာန်ဂှ်ဟေင် မိယာဲမွဲဒုၚ်ကေတ်လဝ်ဖ္အိုတ်ကီုရ၊ ဒုင်ကေတ်တာလျိုင်ညးမွဲဓဝ်ရ၊ ပရေင်ဖဵုဏံဝွံ ဒှ်ဂုဏ်ဖဵုမိမသီုညးဖ္အိုတ်တံဒးဍိုက်ပေင်ကၠုင်လ္တူကောန်တံမာန်ရ၊ ပိုဲကောန်တံသီုညးဖ္အိုတ်လေဝ် ထေက်ကြိုက်ဒးကူချပ်ဗ္စာရဏာပ္ဍဲကဵုတ္ၚဲမိယာဲမွဲတ္ၚဲဓဝ်လေဝ်ဟွံသေင်တုဲ ပိုဲကောန်တံဒးကူချပ်စိုပ်ဂွံမံင်တွဵုလ္တူမိမၜါတံဇၟာပ်ဇၟာပ်တ္ၚဲအိုတ်ညိ၊ မၞိဟ်ကၠာတေံဗ္တောန်လဝ်ဂှ်တှ်ေ အခိင်လုပ်တိက်မ္ဂးတှ်ေ ဒးဖျေံပဝတ်ကဵုဂၞဳ ဒးကလအ်ကျာ်ဗုဒ္ဓ ဒးကလအ်မိမၜါ ဒးကူစိုပ်ညးတၠဂုဏ်ဇၟာပ်တ္ၚဲအခိင်လုပ်တိက်အိုတ်ညိ၊ အခိင်ပိုဲတံၚုဟ်က္တဵုကၠာဟွံဂွံအာကၠောန်ကမၠောန်ဏီဂှ်တှ်ေ ဂ္ဇံမွဲချိန်ခဏတုဲ ဂုဏ်မိမၜါ ဂုဏ်မိဗျုအပါဗျု(မိယုအပါယု) ဂုဏ်စံၚ်အ္စာကီု သီုကဵုကျာ်ဓရ်သင် ဂုဏ်ဖဵုညးမွဲတေံကေင်နွံကၠုင်လဝ်ကဵုဂုဏ်လ္တူပိုဲဏံကီု၊ ပိုဲတံပွပရှ်ေသှ်ေဒၟံင်ညးလဵုကီုတုဲ ပိုဲတံဒးကူချပ်စိုပ်ဒၟံင်ဂုဏ်ဖဵုတံဏံတွဵုမာန်ရောင်၊ သၟတ်တ္ၚဲဏံ အခိင်တိက်ဖျေံဝတ်ကလအ်ကျာ်ကလအ်မိမၜါဂှ်နွံအောန်ကၠုင်ရ၊ ဒၞာဲဏံလေဝ် မိမၜါတံ ထေက်ကဵုဒးထ္ၜးဏာဂၠံၚ်ဍာန်သွက်ကောန်တံအိုတ်ညိ။


မၞိဟ်ကူစိုပ်ဂွံဒၟံင်လပါ်မိမၜါတွဵုတံဂှ်တှ်ေ မၞိဟ်တံဏံဂှ်လေဝ် ဟွံကွာ်အာဂၠံင်ဍာန်လပါ်ဗၠေတ်ဗၠေတ်ပရေံပရေံတံတွဵုကီုရ၊ ပရေင်ပိုဲကောန်တံဟွံကၠောန်အာလပါ်ပရေံလပါ်ဗၠေတ်တံဂှ် ဟိုတ်နူကဵုကောန်တံကူစိုပ်ဂွံဒၟံင်လပါ်မိမၜါတွဵုကီု ဆာန်မိမၜါကွေံလောန်တုဲ ဟွံကၠောန်သ္ပကဵုမိမၜါဒးဒှ်ဒဒိုက်မာန်ရ၊ မၞိဟ်ဆာန်မိမၜါတံဂှ် ညးတံဟွံဂံင်ကၠောန်ကမၠောန်ပရေံပရေံဗၠေတ်ဗၠေတ်တံတွဵုရ၊ ညးတံဂွိင်ဖေက်မိမယာဲအပါတံဒှ်ဓဝိင်စံၚ်တူစိုတ် ဂွိင်ဖေက်မိမၜါဒှ်ဒဒိုက်စိုတ်တုဲ မၞိဟ်တံဏံဂှ်လေဝ် ဟွံကၠောန်လပါ်ပရေံပရေံဗၠေတ်ဗၠေတ်အရာဟွံခိုဟ်ဟွံဆာဲသွက်ဘဝကီုရ၊ ဓရ်တီဓရ်လီုလာ်စာ်ထောင်သာ်ဏံဂှ် ဒှ်ကောန်တီဂုဏ်မိမဇၞော်ကဵုဒြဟတ်တုဲ ဒှ်ကၠုင်ပဠောအ်ခြပ်ထပှ်ထပ် မင်မွဲစေဒၞါလဝ်အန္တရာဲနာနာသာ်သွက်ကောန်တံရ။

ကောန်ခိုဟ်ဟီုမ္ဂးဂှ်ဗီုလဵုရော[ပလေဝ်ဒါန် | ပလေဝ်ဒါန် တမ်ကၞက်]

ကောန်ခိုဟ်ဟီုမ္ဂးဂှ်တှ်ေ ဒးဒှ်မၞိဟ်တၠပညာစောန်အိုတ်လေဝ်ဟွံသေင်၊ ဒးဒှ်ညးနွံကဵုထဝ်သြန်တၟာဗွဝ်ဒဵုဟဒင်လေဝ်ဟွံသေင်၊ ဒးဒှ်ညးနွံကဵုအဝဵုသုင်စောဲလပှော်တဲသၟးလေဝ်ဟွံသေင်တုဲ ယဝ်ရကောန်တံဒှ်မၞိဟ်ခိုဟ်မွဲတှ်ေ ဣဏံရမိမၜါတံနွံဗၟိက်ဇၞော်အိုတ်ပ္ဍဲကောန်တံရ၊ထဝ်သြန်ဟီုမ္ဂးဂှ်တှ်ေ ဇၟာပ်မိမရမိက်သ္ဂောံဂွံတဴဒၟံင်ဖ္အိုတ်ရ၊ ယဝ်ရဟီုစိုပ်အာသွက်ဘဝဇေတ်ဇေတ်မ္ဂးတှ်ေ ထဝ်သြန်ဏံဂှ်ၚုဟ်မးဍေံအောန်နူကဵုစၞစအဟာရဂၠိုင်ဂၠိုင်ကဵုဆဏီရ၊ စၞစဟီုဂှ်ခန္ဓကာယပိုဲဏံနွံဗၟိက်ဇၞော်အိုတ်ရ၊ ယဝ်ရသြန်ဗွဝ်ဂှ် ဂွံနင်ဟွံမွယ်ကဵုစေတနာခိုဟ်ဏောင်တှ်ေ သိုင်ဗဒှ်ကဵုညးသုင်စောဲစကာသြန်တံပြသၞာပေၚ်နွံဒၟံၚ်ဇၟာပ်စက္ကရ၊ မိမၜါလွဳလဝ်ကောန်တံတုဲ အခိင်ညးဗျုကၠောန်ကမၠောန်ဟွံမာန်တေံဂှ် ညးတံမိက်သ္ဂောံကဵုကောန်လွဳလွတ်ညးတံအိုတ်ရ၊ ဆဂး တ္ၚဲဏံကောန်တံကၠောန်စလေဝ်ဟွံဒှ်ပရေင်ပိုန်ဒြပ်သၟးဟွံကတုဲ ဂွံမိင်မံင်ပရောကောန်တံ သုင်ချေံသုင်တၞးအရက်သုရာ ဒှ်ဒၟံင်ပြသၞာတွဵုဏောၚ်တှ်ေ ဣဏံဟေင်ရပ္ဍဲကဵုစက္ကဂှ် မိမၜါတံနွံဗၟိက်ကဵုတသိုက်စိုတ်တုဲ ထဝ်သြန်ကောန်တံဟွံမွယ်ဗၟိက်ရ၊ မိမၜါတံနွံဗၟိက်ဇၞော်အိုတ်ဟီုဂှ် မိက်ဂွံမိင်ပရိုင်ကောန်တံခိုဟ်ခိုဟ် ဂကောံအိန်ထံင်ကောန်တံၜိုဟ်သိုဟ်ညိင်ဝတ်တှ်ေတုဲရ၊ သွက်မိမၜါတံဂွံဆက်အာလမျီုသွက်တ္ၚဲယးတေံဂှ် ပုင်နွံတှ်ေညးတံစကဵုၜဵုလေဝ်ဂွံမံင်တုဲ ကဵုဂွံမိင်ပရိုင်ကောန်တံခိုဟ်ခိုဟ်တှ်ေတုဲရ၊ စက္ကဏံဟေင် မိမၜါပိုဲတံ ညးတံနွံဗၟိက်တသိုက်စိုတ်ညိညဓဝ်ရ၊ ဟိုတ်ဏံဟေင်ညးတံမိက်သ္ဂောံကဵုကောန်တံဒှ်မၞိဟ်ခိုဟ်အိုတ်ရ၊ ကောန်ဒှ်ကၠုင်မၞိဟ်ခိုဟ်မွဲဏောင်ဟီုတှ်ေ တာလျိုင်မၞိဟ်မွဲဂှ် ဆက်ထ္ၜးအာရုပ်ရဴသာ်လဵုညးအဲတီကေတ်မာန်အိုတ်ရ၊ ဟိုတ်ဂှ်ရ ၜိုတ်ဆပိုဲကောန်တံဒှ်မၞိဟ်ခိုဟ်ဂှ်လေဝ် ကၠောန်ကဵုသွက်မိမၜါဟွံဂွံဂှ်လေဝ်နွံဒၟံင်ဗဝ်သအဝ်ရ၊ ညးတံမိက်သ္ဂောံကဵုကောန်တံဒှ်မၞိဟ်ခိုဟ်ဟီုဂှ် ဂုဏ်ဖဵုသွက်ဘဝကောန်တံသက်သက်ရ၊ ဂုဏ်ဖဵုသွက်မိမၜါဂှ်နွံညိညဓဝ်တုဲ ကောန်ခိုဟ်ဟီုမ္ဂးဂှ်တှ်ေဗီုလဵုရောယဝ်ဒးသၟာန်တှ်ေ လိုက်ဂၠးကဝ်ဏံဂွံကျေဝ်ဂေါဝ်ၜိုဟ်သိုဟ်ညိၚ်ဝတ်အာမာန်ဂှ် နွံဗၟိက်ကဵုမၞိဟ်ခိုဟ်ဟေင်ရ။

ဒးကလေင်ရော်ဂုဏ်မိမၜါညိ[ပလေဝ်ဒါန် | ပလေဝ်ဒါန် တမ်ကၞက်]

(နူဍောတ်ဍောတ်တေံဂှ် ညးတံလွဳပရာကၠုင်လဝ်ပိုဲကောန်တံစဵုကဵုဇၞော်ဂေါဝ်တိုန်ကၠုင်တုဲ ပိုဲတံလေဝ်ဒးကလေင်လွဳပရာမင်မွဲညးတံစဵုကဵုဗျုထဴဇုတ်စိုပ်တိအိုတ်ညိအဴ)

တ္ၚဲဏံယဝ်ရမိမကောန်ဂကူတံသှ်ေလမျီုနွံမံၚ်ဏီမ္ဂးတှ်ေ ပိုဲကောန်တံလေဝ် ဒးကလေင်ရော်ဂုဏ်ညးတံ ဗီုညးတံမင်မွဲလွဳပရာလဝ်ပိုဲဂှ်အိုတ်ညိအဴ၊ မူညးတံကေတ် မူညးတံမိက်သ္ဂောံစသုင်စၞစလဵုရောတှ်ေ ပိုဲကောန်တံဒးအာဂၠာဲကေတ်နင်လွဳပရာဖ္ဍိုက်ဗပေင်ကဵုတသိုက်စိုတ်ညးတံကီု၊ ကဵုညးတံဂွံဒုင်ကေတ်တသိုက်စိုတ်ၜိုတ်အခိင်ညးတံသှ်ေနွံမံင်ဂှ်အိုတ်ညိ၊ ဒးကေတ်စိုတ်ရှ်ေသှ်ေရဴဂဴကလင် အရာမံင်စံင်နာနာတံကဵုဂွံဍိုက်ပေင်ပြေပြံင်တုဲ ဂွံတုပ်ကဵုဘဝပိုဲနူကဵုဍောတ်ဍောတ်တေံမာန်ညိအဴ၊ မိမၜါလွဳပရာမင်မွဲလဝ်ပိုဲကောန်တံဗီုလဵုလေဝ် တ္ၚဲဏံဟေင် ပိုဲကောန်တံသီုညးဖ္အိုတ်လေဝ် စိုပ်ကၠုင်အခိင်ယျဒးလွဳပရာမင်မွဲညးတံပ္ဍဲကဵုအခိင်ဗျုထဴဇရာပွမယဲဍောတ်ယဲဇၞော်မွဲဝါပၠန်အိုတ်ညိ။


အခိင်ညးတံပြံင်အာဘဝတုဲလေဝ်ကီု ပိုဲကောန်တံဒးသ္ပကုသဵုပါ်ပရအ်ဏာကဵုညးတံကီု၊ ပရေင်ဏံဝွံဒှ်ပရေင်ဒးကၠောန်ပ္ဍဲဂုဏ်မိမၜါမလွဳပရာလဝ်ပိုဲရ၊ ဗီုတံဏံဂှ် သိုင်ဗဒှ်ကဵုပိုဲကောန်တံစိုတ်တေံသောင်ၜး သွက်သ္ဂောံဆက်ကွာ်အာသွက်ဘဝတ္ၚဲဂတမသှ်ေမံင်တံဂှ်ပၠန်ရ၊ ဟိုတ်ဒှ်သာ်ဂှ်တုဲ ပ္ဍဲကဵုတ္ၚဲမိမွဲတ္ၚဲ ကဵုပိုဲကောန်တံဒးတီလဝ်သီုညးဖ္အိုတ်တုဲ သွက်သ္ဂောံဒှ်ဂဥုဲဒြဟတ်မွဲသွုင်ခိုဟ်ခိုဟ်သွက်ဘဝကီု၊ တုဲပၠန် ပိုဲတံဒးလ္ၚတ်ဗ္တောန်ကွာ်ဒၟံင်ပ္ဍဲကဵုဂၠံင်ဍာန်မခိုဟ်အးမွဲတၞုင်တွဵုလၟိုန်တုဲ ဒှ်သွက်ညံင်ရဴကလေင်ရော်မံင်ဂုဏ်ကဵုမိမၜါတံကီုရ၊ ကမၠောန်ဟွံခိုဟ်ပွမကွာ်မ္ၚးဂၠံင်ဍာန်တံ ပွမဟွံကေတ်ဂၠံင်ဍာန်သွက်မိမတံဒးဒှ်ဒဒိုက်စိုတ်တံဂှ်ဖ္အိုတ်လေဝ် တ္ၚဲဏံပိုဲကောန်တံဒးကလေင်ပဠေဝ်ထောံစိုတ်တၟိ ပဠေဝ်ဒ္ဂေဝ်ပွစဳပၞောန်တၟိ လုပ်လွဳပရာမင်မွဲမိမၜါတံအိုတ်ညိ၊ အခေါင်ညးတံညံၚ်ဂွံတုပ်ကဵုအခိၚ်ညးတံလွဳပရာလဝ်ပိုဲနူကဵုဍောတ်ဍောတ်ဍောတ်တေံကီုညိ၊ အခိင်ညးတံကူစိုပ်ဂွံအာလပါ်ပိုဲကောန်တံမ္ဂးတှ်ေ ကဵုညးတံဂွံနွံကဵုတသိုက်စိုတ်တွဵုညိ၊ ကဵုညးတံဂွံအီဂြိုင်အကြာသ္ကံရဲညးတံပ္ဍဲကဵုအခိင်တက်ကျာဟီုစိုပ်အာပရောကောန်ဇာတ်တံဂှ်ညိ၊ (ဟွံသေင်ညးလ္ၚဵုတံဂှ် ယဝ်ရကူစိုပ်ဂွံအာလပါ်ကောန်တံမ္ဂးတှ်ေ ဍာ်ရမတ်ဇွောဝ်ပေင်မုက်မတ်တုဲ ရပ်ဂွံပဠောအ်ဂ္စါန်ဇုက်ဍာ်ရမတ်ဂွဖေက်ညးတၞဟ်ဆဵုညာတ်ဒး) ၊ ပရေင်ဗီုဏံဂှ် သ္ပဟိုတ်နူကဵုပိုဲကောန်တံဟွံကေတ်ဂၠံင်ဍာန် ပိုဲကောန်တံဟွံဆာန်မိမၜါ ပိုဲကောန်တံဟွံဆာန်ဘဝဇကုအိုတ်တုဲ တီဆဇကုမွဲဓဝ်(အတ္တ) ဒှ်မၞိဟ်သုင်စောဲစဟွံဂွံကော်စကောန်အဝုရ၊ ဟိုတ်ဂှ်ရတှ်ေ ညံၚ်ပိုဲကောန်တံဂွံဒှ်မၞိဟ်ခိုဟ်မွဲမာန်ကီု ပိုဲကောန်တံရော်ဂုဏ်လ္တူမိမၜါသာ်ဏံဂွံတုဲ ဒှ်ကောန်ခိုဟ်မွဲဗီုမိမတံမိက်သ္ဂောံဆဵုသွက်ဘဝညးတံဇေတ်ဇေတ်ရ၊ စနူတ္ၚဲဏံတုဲ ဘဝဂှ်ဆက်ကွာ်အာဒၟံင်အတိုင်သဘာဝဍေံရ၊ မိမပိုဲချိုတ် ဟွံလအ်ပိုဲကောန်ဏံလေဝ်ဗက်ချိုတ်အာကီုတုဲ သှ်ေဒၟံင်ကောန်ဇာတ်ပိုဲကောန်စဴစေက်ပိုဲတုဲ ဍေံတံလေဝ်သုင်စောဲဘဝအတိုင်သဘာဝပၠန်ရ၊ ဣဏံဟီုဂှ်သဘာဝဇေတ်ဇေတ်ဘဝဍာံဍာံဇၟာပ်ညးအဲဒးဆဵုကေတ်မာန်ဖ္အိုတ်ရ။


မိဟီုမ္ဂးဂှ်ဒှ်ညးသိုင်မာန်ပ္တိုန်လဝ်ဂၠးတိဏံရ၊[ပလေဝ်ဒါန် | ပလေဝ်ဒါန် တမ်ကၞက်]

မိပိုဲတံဇေတ်ဇေတ်ဟီုဂှ်ဗီုလဵုရောတှ်ေ မိယာဲမွဲဟေင်ရဒှ်ညးသိုင်မာန်ပ္တိုန်လဝ်ဂၠးတိဇၞော်ဏံကီုရ၊ ယဝ်ရမိယာဲမွဲဟွံမွယ်တှ်ေ အလုံသဗ္ဗနာနာဂွံတိုန်တဴအာမာန်ဂှ်ဟွံလောဲသွာရ၊ မိယာဲမွဲဟီုဂှ် ဒှ်ညးဒုင်ဒဒိုက်ဂၠိုင်နူကဵုအပါမွဲတုဲ ဒှ်ညးဂံင်သၠးဖဵုအတ္တသွက်ကောန်တံ(၂၄)နာဍဳကီုရ၊ မိယာဲလ္ၚဵုတံ အခိင်ၜံင်ပၟတ်သၠးပဋိသိန္ဓိဒးချိုတ်အာလေဝ်နွံတဴဗွဲမဂၠိုင်ရ၊ တြုံဗြဴပြးဆာဲဂွံအိန်ထံင်တၟိကီုလေဝ် ကောန်ဇာတ်တံဂှ်နွံဒၟံင်ပ္ဍဲလပါ်မိယာဲဖ္အိုတ်ရဂၠိုင်၊ အပါဟီုဂှ် ၜိုတ်ဆရေင်တၠုင်အာဖဵုဍောတ်ဍောတ်သောဲသောဲကရောံမိယာဲပိုဲညိညကီုရ၊ လ္ၚဵုဂှ်ဗြဴဗုင်တိတ်ဟီုမံင်ဂွံမိင်ဂှ်လေဝ် ညးလဵုဒှ်အပါကောန်ၚာ်တံလေဝ်ဟွံတီတုဲ မိယာဲမွဲပၠန်ဟေင်ရဒးဆက်ကေတ်အာတာလျိုင်မင်မွဲလွဳပရာအာကောန်တံပၠန်ရ၊ လပါ်မၞိဟ်တြုံဂွံလွဳကောန်တံဂှ်နွံအောန်မံင်တုဲ ဗွဲမဂၠိုင်တှ်ေမိယာဲမွဲဟေင်ရဒှ်ညးလွဳပရာကောန်ဇာတ်တံရ၊ ယဝ်ရးဟီုကၠးကၠးသောင်သောင်တှ်ေ အပါနွံလပါ်မ္ၚးတုဲ မိယာဲမွဲဟေင်ရနွံလပါ်ပ္ဍဲသွက်ကောန်တံရ၊ ဥပမာ − မိမ ၊ ယာဲအပါ ၊ မိယုအပါယုဗွဲတုန်ဂှ် မူဟိုတ်မိယာဲမွဲဒးကော်စွံလဝ်ဗွဲမလိက်ကၠာရောတှ်ေဆဵုကေတ်မာန်ရ၊ ညံင်ရဴပ္ဍဲအဝေါင်ပၞာန်ကီုလေဝ် ၝောံဒပ်မွဲၝောံဒပ်ၜါလေဝ်ညးကော်စရ၊ ၝောံဒပ်ဏံဂှ်ပ္ဍဲဂကူသေံတံသုင်စောဲမံင်စဵုကဵုတ္ၚဲဏံရ၊ ညံင်ရဴၝောံတဲၝောံဇိုင်ပိုဲမၞိဟ်ဏံကီု စၞးဒးကော်ၝောံတဲၝောံဇိုင်ဂှ် မူပရောဟွံကော်ကၟက်တဲကၟက်ဇိုင်ရော၊ ယဝ်ကော်ကၟက်တဲကၟက်ဇိုင်တှ်ေကၠိုဟ်မံင်အိုတ်ဏီဟာ ၊ ဒၞာဲဏံလေဝ်ၝောံဟီုဂှ်ဒှ်စၞးဗြဴလေဝ်ဟီုစဂွံရ၊ ဣဏံလေဝ်ၝောံဒးနွံမံင်ဂတပၠန်ရ၊ (ဟိုတ်ၝောံဒးမံင်ဂတဂှ်လေဝ် ညးလဵုမွဲဂၠာဲဟိုတ်ဖဵုမာန်တှ်ေလဴစကီုညိအဴ)၊ ဟွံအိုတ်ဏီပုဟ် ဆက်နွံအာညိညဏီ၊ ညံင်ရဴခၟတ်ဂြုန်စၟစၟောန်တံဂှ်လေဝ် မူပပိုဲတံဒးဟီုစၝောံဍေံနွံမံင်ဒၞာဲလဵုရော၊ ကၟက်ဍေံနွံမံင်အလဵုဂှ်လေဝ်မွဲတုဲမှဟွံကေင်မိင်မွဲလှ်ေဏီရ၊ နူပိုဲဍောတ်ဍောတ်ကေင်ဍန်ကတုဲ အခိင်ဍန်ဂွံကဇၞော်ဇၞော်တှ်ေ ပိုဲကော်စၝောံကရ၊ ယာဲကလေဝ်ဟီုရ၊ ကၟက်ကဂှ်ရဲပိုဲဍန်ကညးမွဲမှဟွံဟီုကဵုပိုဲဂွံမိၚ်ကေတ်အိုတ်ရ။


လပါ်ဍာ်တုဲယျတှ်ေ ဟီုစလပါ်သတ်တၠသၞေင်ညိညကီုဏောင်၊ ပိုဲဆဵုမံင်စာင်အဒါတံဂှ် အပါအဒါစာင်တံနွံမံင်မွဲစွံကီုဟာ ဆဵုဒၟံင်ဂှ်မိယာဲစာင်တံအဒါတံသၟးရလွဳပရာမံင်ကောန်တံလၟေင်လၟေင်တ္ၚဲတွဵုရ၊ ကောန်စာင်ကောန်အဒါတံဂှ် ဍေံတံဟွံတီညးလဵုဒှ်အပါဍေံတံရ၊ ဆယၟုအပါလေဝ်ဍေံတံဟွံတီကီုရ၊ ကောန်ကၠဵုတံလေဝ်သာ်ဏံကီုရ မိယာဲမွဲဟေင်ရမင်မွဲလွဳပရာမံင်တုဲ ညးလဵုလုပ်ကၠုင်ဗဒဲါပိုဲကောန်ကၠဵုတံဂှ်ဏောင်တှ်ေ မိယာဲပိုဲညးကဳဟွံကဵုအခေါင်လုပ်ရပ်ပိုဲတံကီုရ၊ ဣဏံဂှ် ဆဵုကေတ်ကၠးကၠးရဂှ် အပါမွဲနွံမံင်အလဵုရောကောန်ကၠဵုတံဟွံတီရ၊ ကောန်ကၠဵုတံတီဆမိယာဲမွဲဟေင်ရဒှ်ညးတၠဂုဏ်ဇၞော်မဟာတဴဗွဲမလောန်ရ၊ ဟိုတ်ဏံဟေင်ရ မိယာဲဟီုမ္ဂးဂှ် ဒှ်ညးသိုင်မာန်ပ္တိုန်လဝ်ဂၠးတိဇၞော်ဏံကီုရ။ အပါဟီုဂှ်ပရေံအာဟွံသေင်ပုဟ်ဏး ယဝ်ရဒးပါ်ပဲါစမ်ရံင်ဂွံတီတှ်ေ မိယာဲမွဲဂုဏ်ဖဵုနွံလ္တူကောန်ၜိုတ်ဂလိုင်လဵုရောကီုရ၊ မိမၜါဟီုဂှ်ဒးဆာန်စွံၚုဟ်မးတုပ်တုပ်ရ။


ဗွဲလက္ကဴအိုတ်ဏံတှ်ေ သၟတ်တံသီုညးဖ္အိုတ်လေဝ် မုပိုဲတံကၠောန်ကၠောန်ဟီုဂှ် ထေက်ကဵုဒးကူချပ်ဂွံအာလပါ်မိမၜါကၠာတွဵုညိ၊ ဆာန်မိမၜါကဵုဂၠိုင်ဂၠိုင်အိုတ်ညိ၊ ယဝ်ရပိုဲဒှ်ကောန်ခိုဟ်သွက်မိမၜါဏောင်တှ်ေ ကောန်ဇာတ်ပိုဲတံဂှ်လေဝ် ဍေံဆဵုဒၟံင်ဗီုပြင်ခိုဟ်ခိုဟ်နူပိုဲဏံဂှ်တုဲတှ်ေ ကောန်ဇာတ်ပိုဲတံဂှ်လေဝ် ကေတ်ကၠုင်ဗီုပြင်ခိုဟ်ခိုဟ်သွက်သ္ဂောံကၠောန်သ္ပကဵုပိုဲဏံပၠန်ရ၊ ဣဏံရသဘာဝ သဘာဝဏံရညးဟီုစဓရ်မွဲကီုရ၊ အုပ်ကၠေံနိဂီုဆဝွံကၠာရအဴ ။


လိက်အုပ်ဏံ တ္ၚဲဏံချူလဝ်ဗွဲက္ဍန်ရ၊ သွက်တ္ၚဲဂတးတေံဟီုဂှ် ဆက်ချူဗပေၚ်စုတ်အာသိုက်သိုက်ကီုရ၊ စဵုကဵုဒှ်လိက်အုပ်ခိုဟ်ခိုဟ်မွဲအုပ်မာန်ဂှ် ကောန်ဂကူမန်တံလေဝ်မၚ်စၟဳဗှ်အိုတ်ညိ၊ မလိက်ဗၠေတ်ဒးပဵုယအ်ယဝ်နွံတှ်ေ ပဠေဝ်တုဲဗှ်အာအိုတ်ညိ၊ တၚ်ဂုဏ်ရအဴ။


နိဿဲ[ပလေဝ်ဒါန် | ပလေဝ်ဒါန် တမ်ကၞက်]

  • ကၠုၚ်နူပရေၚ်ဆဵုဂဗလၟေၚ်လၟေၚ်တ္ၚဲ