ပရင်တဲသၞာံတၟိ(၂၀၂၀)
ပ္ဍဲကဵုသၞာံတၟိ(၂၀၂၀)ဏံဟီုတှ်ေ ပရၚ်တဲမွဲပိုဒ်သွက်ကောန်ဂကူမန်ပိုဲခိုဟ်အိုတ်နူအဲဝိညာဏ်ထဝ်ဏံဂှ်တှ်ေ (ကံသဵုခိုဟ်ကုသဵုပရေံဟီုဂှ်နွံဒၟံၚ်ပ္ဍဲကမၠောန်ပိုဲဏံရ)၊ ဟိုတ်ဒှ်သာ်ဂှ်တုဲ ကုသဵုခိုဟ်ဟီုဂှ်ဇၟာပ်ညးအဲနွံဗၟိက်မံၚ်ဖ္အိုတ်ရ၊ ကုသဵုခိုဟ်ညံၚ်သ္ဂောံလုပ်ကၠုၚ်ပ္ဍဲဘဝပိုဲတံကီု ပ္ဍဲကဵုဂကောံအိန်ထံၚ်ပိုဲတံမာန်ကီုဂှ် ဟိုတ်ဍေံဂှ်ကၠုၚ်နူကဵုကမၠောန်ပိုဲဏံမွဲဟေၚ်မကၠောန်ကေတ်ဍေံဇေတ်ဇေတ်ရ။
မန်ပိုဲနဒဒှ်ကောန်ဗုဒ္ဓဘာသာတုဲ ဗီုဂၠံၚ်ဍာန်အပါပိုဲဂေါတမချူစွံလဝ်ဂှ် ပိုဲကောန်တံလေဝ်ဒးကွာ်ဗက်အာကီုရ၊ အဃောပိုဲတံမကွာ်ဗက်အာဂၠံၚ်ဍာန်အပါပိုဲဏံဂှ်ဟေၚ်ရ ညးလ္ၚဵုတံကွာ်ဒးဖက်နှဴကဵုအခေတ်လေပ်ဂတာပ်အခိၚ်ကာလဒေသတုဲ ဂၠံၚ်တသိုက်ဍာံဍာံသွက်ဘဝဂှ်လေဝ် ညးတံဂွံဒုၚ်စသိုၚ်ပေၚ်ပေၚ်ပ္ဍဲဘွပစ္စုပ္ပန်တ္ၚဲဏံဟီုစ(ကုသဵုခိုဟ်)ဂွံမိၚ်မံၚ်အိုတ်ရ။
ပိုဲတံဂွံဟီုပ္တိတ်မအရေဝ်(ကုသဵုခိုဟ်)ဏံမာန်ဂှ် ဒးဒှ်ကမၠောန်မွဲဟေၚ်တုဲ ကမၠောန်ခိုဟ်ကုသဵုခိုဟ်တံဂှ်လေဝ်ဒှ်ဟိုတ်ခိုဟ်ခိုဟ်မွဲတုဲ ဖဵုမတိတ်ကၠုၚ်တံဂှ်ကုသဵုခိုဟ်ပိုဲဟီုစအိုတ်ရ၊ ယဝ်ရဟိုတ်မွဲဟွံမွယ်တုဲမံၚ်ထောံညိၚ်ညိၚ်မုရောဟွံကၠောန်သ္ပမွဲသာ်တှ်ေ ဖဵုခိုဟ်ကုသဵုခိုဟ်ဂှ်ပိုဲတံဟွံဂွံဟီုပတိတ်နူသၟန်ပါၚ်ပိုဲဏံကီုရ၊ ယဝ်ရဟီုသောၚ်လဴကၠးကၠးတှ်ေ (ဟိုတ်နွံမှဖဵုဒှ်ရ) ၊ ယဝ်ရဟိုတ်ပရေံတှ်ေ ကုသဵုပိုဲလေဝ်ပရေံဟီုစအိုတ်ရ၊ ယဝ်ရဟိုတ်ခိုဟ်တှ်ေကုသဵုခိုဟ်လေဝ်ဟီုစအိုတ်ရ၊ ဣဏံဟီုဂှ်သဘာဝမွဲဟေၚ်တုဲညးလဵုမွဲလေဝ်ဟွံဘိုၚ်ကၠောန်ပဠေဝ်လဝ်ရ၊ သၞောတ်သၞောဝ်သဘာဝဟေၚ် ဍေံကၠောန်ကမၠောန်ကေတ်ကေတ်အတိုၚ်သဘာဝအိုတ်ရ၊ (သဘာဝဟီုဂှ်ဓရ်လေဝ်ဟီုဟွံဗၠေတ်ပုဟ်)။
ညံၚ်ရဴပိုဲကောန်ဂကူတံသ္ပကၠောန်ကုသဵုပ္တုဲဒါန်ဂှ်ကီု တ္ၚဲဏံပိုဲတံကၠောန်ကမၠောန်ခိုဟ်ဟိုတ်ခိုဟ်မွဲတုဲ သွက်သ္ဂောံဂွံကုသဵုဂၠိုၚ်ဂၠိုၚ် ချိုတ်အာဂွံတိုန်ဍုၚ်သွဝ်ဂွံလုပ်နိဗ္ဗာန်ပိုဲပတှ်ေကေတ်သာ်ဏံတုဲ ဇၟာပ်ညးအဲလေဝ်ကၠောန်သ္ပကုသဵုပ္တုဲဒါန်အိုတ်ရ၊ ဂွံတိုန်ဍုၚ်သွဝ်ဂွံစဴနိဗ္ဗာန်ဟီုဂှ်ဘဝအနာဂတ်တေံတုဲ သွက်ဘဝပစ္စုပ္ပန်တ္ၚဲဏံဟီုဂှ်ဣလဵုရော၊ ကဏ္ဍဏံဟေၚ်ရပိုဲတံဒးသၠာဲထောံဗီုကၠိုဟ်စိုတ်ဗၠေတ်ဗၠေတ်ဂွံရပ္ဍဲကဵုအခေတ်တ္ၚဲဏံအိုတ်ညိ၊ ၜိုန်ရပိုဲချိုတ်အာတုဲဂွံတိုန်ဍုၚ်သွဝ်ဂွံလုပ်နိဗ္ဗာန်ဒှ်ဍာံစၟတ်ကီုလေဝ် သွက်တ္ၚဲဏံအဃောလမျီုသှ်ေနွံမံၚ်ဏီ အဃောတာလျိုၚ်ဒးဆက်ကေတ်အာဒၟံၚ်ဗဝ်သအဝ်တံဂှ် တသိုက်လောကဳထေက်ကဵုဂွံဒုၚ်စသိုၚ်မာန်မှ ဒှ်ဂၠံၚ်ဍာန်ဗုဒ္ဓဘာသာပိုဲဇေတ်ဇေတ်မာန်ရ။
ဥပမာဥပမေယျ − မိက်သ္ဂောံဒှ်သေဋ္ဌဳတုဲ သြန်စွံလဝ်သွက်ကောန်ဇာတ်ဇကုဂွံကတ်ပညာဂှ်ကၠောန်သ္ပထောံကုသဵုပ္တုဲကဵုဒါန်ဖ္အိုတ်တှ်ေ လအ်ဂွံချိုတ်ဂွံတိုန်ဍုၚ်သွဝ်ဂွံစဴနိဗ္ဗာန်ဂှ် ပ္ဍဲတ္ၚဲဏံ နာဍဳမိဏေတ်စက္ကဏံဂှ် သွက်ဘဝပိုဲဟွံဒှ်ပြသၞာဇၞော်ကဵုဒြဟတ်ပုဟ်ဟာ၊ ယဝ်ဒှ်ကၠုၚ်ပြသၞာပ္ဍဲဂကောံအိန်ထံၚ်ဇကုမ္ဂးတှ်ေ လဆောဝ်လေဝ် ကမၠောန်ဗၠေတ်သၞောဝ်တံဂှ်စကၠောန်ကၠုၚ်သွက်ဂွံမၚ်မွဲအာဗုၚ်ဂၞဴဂကောံအိန်ထံၚ်ဇကုလေဝ်ဒှ်မာန်ရ၊ ဣဏံဗွဲတုန် − − − ။
သ္ပကုသဵုပ္တုဲဒါန်ဟီုဂှ် မိက်သ္ဂောံပဠေဝ်စိုတ်ပိုဲဏံမွဲဟေၚ်ရ၊ သ္ပကုသဵုကဵုဒါန်လေဝ်နကဵုစိုတ်အးအးဟွံရန်လဝ်ကေတ်စမုက်မတ်ကဵုညးတၞဟ်တီဆဵုညာတ်ကီု၊ သ္ပကုသဵုကဵုဒါန်လေဝ် ဟွံမွယ်ကဵုစိုတ်ပြိုၚ်ပကာန်ကဵုညးတၞဟ်ဂှ်ကီု၊ ၜိုတ်ဒြဟတ်ပိုဲနွံအရာထေက်ကြိုက်ဂှ်ဟေၚ်ကၠောန်သ္ပကုသဵုပ္တုဲဒါန်တှ်ေဂွံကုသဵုပေၚ်ပေၚ်ရ၊ ဂွံကုသဵုပေၚ်ပေၚ်ဟီုဂှ်တၞဟ်ဟွံသေၚ်ပုဟ် တီၜိုတ်ဆစိုတ်ဏံမွဲဟေၚ်ရၜိုဟ်သိုဟ်ညိၚ်ဝတ်တုဲ ဆဵုကေတ်ဘဝဇေတ်ဇေတ်ဟီုဂှ် သွဝ်နိဗ္ဗာန်နရက်ဂှ်နွံဒၟံၚ်ပ္ဍဲစိုတ်ပိုဲမၞိဟ်ဏံကီုရ။
ပ္ဍဲအခိၚ်စိုတ်ပိုဲပဳတိဂှ်တှ်ေ လညာတ်ပိုဲဏံဂှ်လေဝ်သ္အးဇ္ၚးကွေံရ၊ ဟီုဂးအရေဝ်ဆက်ဆောံကဵုညးတၞဟ်ကီုလေဝ် ဟီုလေပ်ကတောဝ်ညးတၞဟ်ကွေံရ၊ ကၠောန်ကမၠောန်လေဝ်စိုတ်ညိၚ်တုဲ သမာဓိဂှ်လေဝ်ညိၚ် ကမၠောန်မကၠောန်ပ္တိတ်နၚ်တံဂှ်ဖအိုတ်လေဝ် ဒးအၚာပ်စိုတ်ကဵုသေဋ္ဌဳနာဲတၠသ္ကံရဲမိတ်သဟာဲတံဗွဲမလောန်ရ၊ ယဝ်ရကၠောန်ကမၠောန်ဇကုပၠန်လေဝ် ဆဵုကေတ်ၚုဟ်မးကမၠောန်ပြဟ်ပြဟ်ရ၊ ဂွံဒှ်သာ်ဏံဂှ် ဟိုတ်ဍေံကၠုၚ်နူ(စိုတ်)မွဲတုဲ စိုတ်ဏံမွဲဟေၚ်ရစကာဖန်ဗဒှ်ကဵုအရာနာနာပ္ဍဲဘဝပိုဲဂွံက္တဵုဒှ်ကၠုၚ်ဖဵုခိုဟ်ဖဵုပရေံ ကုသဵုခိုဟ်ကုသဵုပရေံလေဝ်ဟီုမာန်အိုတ်ရ။
သီုဖ္အိုတ်တံဂှ်နွံဒၟံၚ်ပ္ဍဲစိုတ်ပိုဲဏံရ၊ ခန္ဓကာယအလုံ(၃၂)ပ္ဍဲပိုဲဏံဂှ် စိုတ်မွဲဒှ်နာဲတၠတုဲ ခန္ဓကာယပိုဲဏံဂှ်ဒှ်ဍိက်မွဲရ၊ ဟိုတ်ဒှ်သာ်ဂှ်တုဲ လ္ပကဵုဒှ်ဍိက်စိုတ်ညိဂှ်လေဝ် အရေဝ်ဏံကေၚ်မိၚ်မံၚ်ရဟွံသေၚ်ဟာ၊ ညံၚ်ကဵုပိုဲတံဟွံဂွံဒှ်ဍိက်စိုတ်လပါ်ဗၠေတ်ဗၠေတ်ပရေံပရေံဏီဂှ် ပိုဲတံထေက်ကဵုဒးပဠေဝ်စိုတ်ကၠာဟေၚ်တှ်ေ ဂတာပ်အခေတ်မွဲတုဲ တုပ်ကဵုနဲကဲဗုဒ္ဓဘာသာအပါပိုဲဗ္တောန်လဝ်ဂှ်ရ၊ ဟီုစိုပ်အာတၚ်ဏံတုဲ တ္ၚဲဏံပိုဲကောန်ဂကူတံညးလဵုမွဲဒှ်ဒၟံၚ်ဍိက်စိုတ်ဂှ်ကီုရော၊ ဒၟာနူစိုတ်စကာတုဲ စဵုကဵုတ္ၚဲဏံခန္ဓကာယပိုဲဒှ်ဒၟံၚ်ဒဒိုက်ဒးကၠောန်ဒၟံၚ်ကမၠောန်ဟွံဂွံဇူဂှ်ရော။
စိုတ်ဏံမိက်သ္ဂောံကျေဝ်၊ စိုတ်ဏံမိက်သ္ဂောံသိုက်လောဲ၊ စိုတ်ဏံမိက်သ္ဂောံတၟေၚ်အာနူညးတၞဟ်၊ စိုတ်ဏံမိက်သ္ဂောံကၠောန်သ္ပကုသဵုကဵုဒါန်ဂၠိုၚ်နူညးတၞဟ်၊ စိုတ်ဏံမိက်သ္ဂောံဂတာပ်အခေတ်ကဵုညးတၞဟ်ထိုၚ်သး၊ စိုတ်ဏံဗက်အရီုအခေတ်တုဲ ညးကွဳစက်ကာတှ်ေအဲလေဝ်ကွဳစက်ကာကီု၊ ညးတၞဟ်သိုၚ်သ္ၚိပိပန်ကၠံကိုဋ်တှ်ေ အဲလေဝ်ဒးသိုၚ်ပန်မသုန်ကၠံကိုဋ်မှမေၚ်နူဍေံ၊ ဟိုတ်သာ်ဏံလေဝ်စိုတ်ပိုဲစကာတုဲ ပိုဲဏံလေဝ်ကြအ်ဗက်စိုတ်အိုတ်ရ၊ စဵုကဵုတ္ၚဲဏံလေဝ် စိုတ်ဏံစကာလဝ်ကဵုပိုဲကၠောန်လဝ်တုဲတုဲကၠုၚ်တေံဂှ် စဵုကဵုတ္ၚဲဏံလေဝ် ၜိုန်ရလောန်ၜက်ကၠုၚ်မသုန်သၞာံစှ်သၞာံကီုလေဝ် ခန္ဓကာယဏံဂှ်ဒးကေတ်တာလျိုၚ်တုဲဆက်ကၠောန်ဒၟံၚ်ကမၠောန်ဖိုဟ်ရ၊ ဟိုတ်ဏံဟေၚ်ရပိုဲတံဒးပဠေဝ်စိုတ်မွဲရ။
စိုတ်ဏံမွဲဟေၚ်ရဒှ်ညးစကာကဵုခန္ဓကာယပိုဲဏံကၠောန်ကမၠောန်တုဲ ဖဵုခိုဟ်ဖဵုပရေံတံဂှ်လေဝ် တိတ်ကၠုၚ်နူကမၠောန်ပိုဲတံအိုတ်ရ၊ ယဝ်ခိုဟ်တှ်ေ ပိုဲဟီုစကုသဵုပိုဲတံခိုဟ်ရ၊ ယဝ်ပရေံတှ်ေ ပိုဲတံဟီုစိုပ်အာကုသဵုပိုဲပရေံအိုတ်ရ၊ ဒၞာဲလ္ၚဵုလ္ၚဵုတံဂှ်လေဝ် ကမၠောန်ဂှ်တီမံၚ်ရပရေံဗၠေတ်ဇကုသာသ္ပအ်ပတှ်ေကုသဵုတုဲ ကၠောန်အာကြာန်ကြာန်ရ၊ လဆောတ်လဆောတ်တှ်ေ ကမၠောန်မကၠောန်အာဂှ်ပြသၞာဟွံမွယ်တုဲ မိပ်စိုတ်ဟီုစကုသဵုနူအတိက်တေံနွံတုဲပြသၞာတံဂှ်ဟွံမွယ်ဟွံဒးဆဵုရ၊ ယဝ်ရကမၠောန်ဂှ်ဗၠေတ်လီုလာ်အာကီု ပြသၞာဇၞော်ကဵုဒြဟတ်က္တဵုဒှ်ကၠုၚ်မ္ဂးတှ်ေ ဟီုညာတ်ဒုဟ်ဏာကဵုကုသဵုဇကုပရေံအိုတ်ရ၊ ယဝ်ရစိုတ်ကောန်ဂကူဗုဒ္ဓဘာသာပိုဲတံဒှ်မံၚ်သာ်ဏံမ္ဂးတှ်ေ ဗၠေတ်မံၚ်ကဵုဂၠံၚ်ဍာန်အပါပိုဲလးလဝ်ဗွဲမလောန်ရ၊ အရေဝ်ဝေတ်ဗ္တောန်အပါပိုဲသီုဖ္အိုတ်တံဂှ်လေဝ် ဂတာပ်အခေတ်သက်ဟီုဟွံမွယ်တုဲ ပိုဲကောန်ဂကူတံရသုၚ်စောဲစကာကၠိုဟ်စိုတ်ဗၠေတ်ဗၠန်အာအိုတ်တုဲ ဖဵုကမၠောန်မတိတ်ကၠုၚ်တံဂှ်ဒှ်ကၠုၚ်ပြသၞာပ္ဍဲကဵုဘဝလၟေၚ်လၟေၚ်တ္ၚဲဏံဂှ်ရ၊ အရေဝ်ဗ္တောန်အပါပိုဲဂှ် ညးကဵုချပ်ဗ္စာပါ်ပဲါ၊ ညးကဵုသုၚ်စောဲအစောံစရာဲပညာဇကု၊ ညးကဵုလ္ၚတ်ကၠိုဟ်တီကၠး၊ ညးကဵုဒှ်မၞိဟ်ဗဂဵုလဟဵုမွဲ၊ ညးကဵုပြံၚ်သၠာဲညံၚ်ဂွံဂတာပ်အခေတ်အရာဖဵုဇၞော်အိုတ်သွက်ဘဝဗွဲတုန်၊ ပ္ဍဲတ္ၚဲဏံလေဝ် ပိုဲကောန်ဂကူတံပတှ်ေကေတ်မွဲလပါ်တုဲ ညံၚ်ဂွံဂတာပ်အခေတ် ထေက်ကဵုဒးပြံၚ်သၠာဲဗီုလဵု ဗီုလဵုဂွံဗဂဵုလဟဵုဇၟောဝ်ဍာ်အခေတ်မာန်ဂှ် ဟွံမွယ်စကွေံပ္ဍဲစိုတ်ကောန်ဂကူပိုဲတံအိုတ်တုဲ နဲကဲသုၚ်စောဲဘဝလၟေၚ်လၟေၚ်တ္ၚဲဂှ်လေဝ် ဂွံဆဵုကေတ်တသိုက်အောန်ဒဒိုက်ဂၠိုၚ်ရ၊ ညံၚ်ဒဒိုက်ဂွံအောန်တသိုက်ညံၚ်သ္ဂောံဂၠိုၚ်တိုန်ဂှ် နွံဒၟံၚ်ပ္ဍဲဂၠံၚ်ဍာန်အပါပိုဲဂေါတမဏံဖ္အိုတ်ရ၊ အရေဝ်အဲညးချူလိက်ဟီုလဴဏာဖ္အိုတ်ဏံလေဝ်လ္ပပတှ်ေပြဟ်ညိအဴ၊ ထေက်ကဵုဒးချပ်စ္စာ ထေက်ကဵုဒးပါ်ပဲါ ထေက်ကဵုဒးဗဂဵုလဟဵု ထေက်ကဵုဒးကၠောန်စမ်ရံၚ်ကၠာအိုတ်ညိ၊ ပ္ဍဲအခိၚ်ကၠောန်တုဲဆဵုကေတ်ဓဝ်ဍာံ ပ္ဍဲအခိၚ်ကၠောန်တုဲဆဵုကေတ်ဘဝဇေတ်ဇေတ်ဏံနွံဗၟိက်ဇၞော်အိုတ်မူရော၊ ပ္ဍဲအခိၚ်ကၠောန်တုဲဆဵုကေတ်ပြသၞာဂှ်သှ်ပ္တိတ်ဂွံတဴလောဲသွာမာန်တှ်ေ ဣဏံရအရေဝ်အဲဟီုလဝ်ဂှ်ဒးဍာံစၟတ်ဒုၚ်တဲမာန်ရ၊ ယဝ်ရကောန်ဂကူတံဟွံဂွံကၠောန်စမ်ရံၚ်ကၠာဏီတှ်ေ လ္ပပတှ်ေအိုတ်ညိ၊ အရေဝ်ဝေတ်ဗ္တောန်ကီု၊ အရေဝ်ဟီုလဴသောၚ်ကဠးကီု၊ ဗဟုသုတပိုဲတီကၠိုဟ်လဝ်တၟာဒဵုတံဂှ်ကီု၊ ပိုဲကေၚ်ဗှ်လဝ်လိက်သၠုၚ်သ္ၚိတိုက်စှ်ထပ်ကီုလေဝ် တၚ်သွဟ်ခိုဟ်အိုတ်ဂှ်တှ်ေ နွံဒၟံၚ်ပ္ဍဲကဵုပိုဲတံစရပ်ထ္ၜးရုပ်ရဴကမၠောန်ရ၊ ဒးရံၚ်ဖဵုကမၠောန်ဂှ်တုဲတီကၠးကၠးရအဴ၊ ကံသဵုခိုဟ်ကုသဵုပရေံဟီုဂှ်နွံဒၟံၚ်ပ္ဍဲကမၠောန်ပိုဲဏံကီုရ။
စိုတ်ဒှ်နာဲတၠ ဍိက်ရခန္ဓ ဘဝဟွံသိုက်သၠိၚ် ၊
စိုတ်မွဲပြိုၚ်ပ္ကာန် ဗၠေတ်ဍာန်ဗုဒ္ဓ ဘဝလေဝ်အေဲဇြ
စိုတ်မွဲကၠိဗ္စံက် ဂကောံမွဲပြံက်အာ ဘဝဏံမှာရ။
စိုတ်မွဲအံၚ်ဇၞး ဘဝတိုၚ်ပ္ကဴရန် ဨကန်စိုပ်ပြဟ်၊
စိုတ်မွဲယဝ်မာန် ဋ္ဌာန်သွဝ်နိဗ္ဗာန် ဆဵုမာန်ညးအဲ၊
စိုတ်မွဲပဠေဝ်ပြဟ် သွက်ဘွသွဟ်ဍာံ အိုဿီုတၟးကၠုၚ်၊
စိုတ်ဗုဒ္ဓပိုဲ ဟိုဲဂကူမန်တံ လ္ပသာသ္ပအ်ညိ။'