ပေဲါပၞာန်ရာတ်သာ- ယူကရိန်ဂှ် ပၞော်တိတ်ဟွံမွဲရဟာ
ပေဲါပၞာန်ရာတ်သာ- ယူကရိန်ဂှ် ပၞော်တိတ်ဟွံမွဲရဟာ ဒဵုဗျု ဂိတုမေ 16၊ တ္ၚဲစန်၊ 2022 ပေဲါပၞာန်အကြာရာတ်သာကဵုယူကရိၚ် ဍေံမကၠောအ်ထၞာန်ဒံၚ်သၠာ်စိုပ်အာအလုံတိုက်ယူရောပ် ကေုာံ လိုက်မွဲဂှ် လၟုဟ်ဝွံပၠန် ဖအုံဗွဝ်ပၟတ်လေၚ်ကဝ်ဂှ် ကလေၚ်ထပ်စုတ်ဏာသၞပရက်တၟိမတွံဂး ဍုၚ်ဝှေန်လာန်ကဵုသွိဒေန် ဂွံလုပ်ဂကောံမဟာမိတ်နေတိုဝ် ပၠန်ဂှ်တုဲ အကာဲအရာပဋိပက္ခဝွံ ဍေံတုပ်သၟဟ်အာကဵုပၟတ်ဂြိုပ်တူ နူပန်ကၠၚ်ဒစာံဒိုဟ်တုဲ သတ်ဂြိုပ်တအ် ဂၠာဲဂၠံၚ်ပၞော်တိတ် ဂွံပဲါဘဲဟွံလောဲသွာရောၚ်။ သရုပ်ရံၚ်လညာတ် ကေုာံ ဗီုကတဵုဒှ်မံၚ် ပ္ဍဲအပ္ဍဲပဋိပက္ခပေဲါပၞာန်ဝွံမဂး- ဍုၚ်သွိဒေန်ကဵုဝှေန်လာန် ဂစာန်လွဳပရာ ပတိုန်စရၚ်သွက်ဂွံလုပ်ကၠုၚ်ဂကောံနေတိုဝ် နူကဵုဘဝမမံၚ်လ္ဒေါဝ်ဂှ် ဂကောံဍုၚ်နေတိုဝ်တအ် တုပ်စိုတ်ဂၠိုၚ်၊ ဆအယာံမာတ် ဍုၚ်တူရကဳမွဲ ဒစဵုဒစးဂှ်တုဲ သဂုတ်သွာတ်ဂကောံမဟာမိတ်ပၞာန်ဂှ် ဂွံဖျေံဂှ် ဝါတ်တဴညိရောၚ်။ ပ္ဍဲတ္ၚဲဝွံပၠန် ဍုၚ်ဟာန်ဂေရဳ ဟွံမိက်ဒုၚ်တဲတုဲ ဟီုပါ်ပဲါဏာနေတိုဝ် ဒၟာနူကဵုဇြဟတ်ဂရိုဟ် သွက်ဂွံကၟာတ်ကၠေံသၟုဟ်ဓါတ်(ဂိတ်)ရာတ်သာ ဍေံမအာဇီုလပိုက်ကဵုဍုၚ်ညးတအ်ဇၞော်လောန်ဂှ်တုဲ လညာတ်အကြာညးတအ်ကဵုအဳယူတအ် ထကးပြးကၠုၚ်ရ။ တုပ်ညံၚ်ရဴတူ ရကဳဟွံစှေ်စိုတ်ကဵုလညာတ်နေတိုဝ် စပ်ကဵုဂွံဒုၚ်တဲဝှေန်လာန်ကဵုသွိဒေန်ဂှ်ကီု ဍုၚ်ဟာန်ဂေရဳလေဝ် ဟွံစှေ်စိုတ်ကဵုနေတိုဝ် စပ်ကဵုသွက်ဂွံကၟာတ်လဒဵုကုတ်ထပိုတ်အဆက်ပၠံၚ်ကၠေၚ်သၟုဟ်ဓါတ်ရာတ်သာဂှ်ကီုရ။ ယဝ်ရဍုၚ်နဝ်ဒေတ်ၜါဍုၚ်ဂှ် ပြံၚ်လှာဲ ပဝ်လဇြဳတုဲ ဍေမ်လုပ်ဂကောံနေတိုဝ်မဂး နကဵုဍုၚ်ရာတ်သာညးတအ် ဂပ်ဝ်ဒးဒှ်ဂဝိၚ်ဂှ်တုဲ လညာတ်ညးတအ်ၜါဍုၚ် မတန် တဴကၠုၚ်လဒေါဝ်ဂှ် ညးတအ် ကၠဟ်ပဲါကၠေံဂှ် ဒှ်အရာသဂုတ်သွာတ်ဗၠေတ်ဗၠေၚ်ဇၞော်ဇၞော်မွဲဂှ်တုဲ ဍေံဟွံဒှ်ဒတုဲဖဵုသွက်ဂီု ကၠီုအဳယူ ဂှ်တုဲ အကာဲအရာဝွံ ဍေံဒှ်ဟိုတ်ပဋိပက္ခဂွံဂဵုသၠံၚ်ဂၠိုၚ်တိုန်ရောၚ်ဂှ် ဒုတိယဝန်ဇၞော်ဍုၚ်သအာၚ်ရာတ်သာ နာဲ သာဂျဳ ရာယာဗ် ကဗ် Sergey Ryabkov ဟီုတုဲ ချူလဝ်ပ္ဍဲဌာနပရိုၚ်အေဝ်ဂျာဇြဳရာ ပ္ဍဲတ္ၚဲဏံရ။ ပဋိပက္ခအကြာရာတ်သာကဵုယူကရိန်ဂှ် လၟုဟ်ဝွံ ဍေံသီုကၞာန်အာကဵုဝှေန်လာန်ကဵုသွိဒေန်ပၠန်ဂှ်တုဲ ပုစ္ဆာစပ်ကဵုအခက်အခုဲဝွံ ထေက်ကဵုဒးထပ်သၟာန်ပၠန်ဂှ်- ယဝ်ရနေတိုဝ် ဒုၚ်တဲဍုၚ်နဝ်ဒေတ်ၜါဂှ်မဂး ဗီုလဵုရာတ်သာ စွံစိုတ်ရော၊ ဍုၚ်ၜါဂှ် ကိုပ်ကၠာ ဟွံ လုပ်စိုပ်ဂကောံနေတိုဝ်ဏီဂှ် ညးတအ် လုပ်သီကေတ်ထောံကၠာဟာ။ ဍုၚ်ၜါဂှ် ဟိုတ်နူဒှ်ဍုၚ်ဂကောံနေတိုဝ်ဟွံသေၚ် ဏီဂှ်တုဲ နကဵုဂကောံနေတိုဝ် ဂွံလုပ်စဵုဒၞာပေၚ်ၚ် ဒှ်မာန်ဟာ။ ဆအယာံမာတ် အဆံၚ်ထံက်ပၚ်နာနာ ကုယူကရိန်လၟုဟ်ဟေၚ် ညး တအ်ထံက်ပၚ်အာဟာ။ အကာဲအရာကြပ်ကဵုအခိၚ်နေတိုဝ်ဒုၚ်တဲညးတအ်မဂး ရာတ်သာ ဟွံလုပ်သီရောၚ် ဂံၚ်ဟီုမာန်ဟာ။ ယဝ်ရတူရကဳလေဝ် ဟွံဒစဵုဒစးဗီုလၟုဟ်တုဲ ဆက်ဒုၚ်တဲၜါဍုၚ်ဂှ် ညံၚ်ရဴဍုၚ်ဂကောံနေတိုဝ်တၞဟ်တအ်ကီုမဂး ရာတ်သာ ထေဲဂၠိုၚ်တုဲ ထ္ၜးဟိုတ်အန္တရာဲဂီုကၠီုဍုၚ်ဇၞော်ဇၞော်တုဲ ဗၜေက်မတ်လုပ်သီဗတိုက်ဍုၚ်ၜါဂှ် ဒှ်ဟွံမာန်ဟာ။ က္ဍိုပ်သကိုပ်ဍုၚ် အမေရိကာန်တအ် ကာလလဵုလေဝ် ဟွံမိက်သဳကၠဳတက်ကျာကဵုရာတ်သာဂှ်တုဲ ဒဲါယျာလံက် ဂွံဂၠာဲသွဟ် သွက်တိုက်ယူရောပ် တအ်ဂှ် ဒှ်မာန်ဟာ။ ရာတ်သာ သရိုဟ်စှေ်တုဲဟေၚ် ဍေံၜိုဟ်သြိုဟ်အာမာန်ရောၚ် လညာတ်ကၟိန်ဍုၚ်အမေရိကာန် နွံမံၚ် သာ်ဝွံပၠန်ဂှ်တုဲ နကဵုလညာတ်သာ်ဝွံဟေၚ် က္ဍိုပ်သကိုပ်ဇမၞော်ဍုၚ်အမေရိကာန်တအ် အာဂေတ်လန်စိုပ်မံၚ်ယူကရိၚ်ရောၚ်ဂှ်တုဲ လုကဴကာလအကြာရာတ်သာကဵုအမေရိကာန် တက်ကျာညးသကအ်ဟွံဂွံဏီမဂး ပဋိပက္ခဝွံ ပၠိုတ်လလမ်အောန်စှေ်အာ ဒှ်မာန်ဟာ။ ပဋိပက္ခပၞာန် အကြာရာတ်သာမွဲလပါ်ကဵုနေတိုဝ်မွဲလပါ်ဝွံ ဍုၚ်ကြုက်ဂှ် ဒးဟီုစနွံလပါ်ရာတ်သာတုဲ၊ ဂျဳ(၇) နွံလပါ်နေတိုဝ်၊ အေန်ဒဳယျ နွံလပါ်ရာတ်သာဂၠိုၚ်ညိ၊ ကုလသမဂ္ဂ နွံလပါ်နေတိုဝ်ဂၠိုၚ်ညိ၊ ညးဂၠးတိတအ် နွံလပါ်အဳယူဂၠိုၚ်၊ ဍုၚ်ဍောတ်တ်ပန် မသုန်ဍုၚ်- ဗဳလာရာတ်၊ အမေနိယျာ၊ ကာဇြေတ်သတာန်၊ ကာဂျေတ်ကာတ်သတာန်၊ တာဂျေတ်ကာတ်သတာန်တအ် ဒတဴလိုၚ်မွဲစွံကဵုရာတ် သာတုဲ ဟီုဒစဵုဒစးကဵုဂကောံဍုၚ်ပလိုတ်တအ် နဒဒှ်မဂိုၚ်ကေတ်လဝ်လညာတ်နာဇြဳရောၚ်။ ယဝ်ရဝှေန် လာန်ကဵုသွိဒေန် လုပ်စိုပ်အာဂကောံနေတိုဝ်မဂး ညးတအ်ကလိဂွံအခေါၚ် တရးစွံဒပ်ပၞာန် ပ္ဍဲမွဲဒမြိပ်ပယျဵုရာတ်သာဂှ်တုဲ ယဝ်ရနေတိုဝ်ဖျေံသဂုတ်သွာတ်သွက်ဂွံဒုၚ်တဲမဂး အကာဲအရာဂၠးတိပိုဲ ပြံၚ်လှာဲအာဇၞော်ဇၞော်မာန်ရောၚ် ခယျကေတ်ပ္ဍဲစိုတ်ရ။ ဒပ်ပၞာန်နေတိုဝ် စိုပ်အာဇိုၚ်ပယျဵုရာတ်သာမဂး အတိုၚ်ဏံ ရာတ်သာစွံလဝ်ဟွံဂွံ၊ ဒးကၠောန်သ္ပပရေၚ်ပြံၚ်လှာဲမ နွံကဵု အန္တရာဲဇၞော်ဇၞော်မွဲ ဍေံမတုပ်သၟဟ်ကဵုလုပ်သီယူကရိန်ဒှ်မာန်ကီုရောၚ် ပရဟ်ညာတ်ကေတ်လဝ်သာ်ဝွံရ။ ကာလဂှ်မဂး ရာတ်သာလေဝ် ဆုတ်ဟွံဂွံ၊ နေတိုဝ်လေဝ် ဆုတ်ဟွံဂွံဂှ်တုဲ ဂကောံကုလသမဂ္ဂလေဝ် စိုပ်အခါဂှ်မဂး ဒးဟီုစ လမျီုဟၟဲ၊ စက်ယာန်လီုလာ် အာတုဲရောၚ်။ မွဲလပါ်ပၠန်ဂှ် ယဝ်ရပိုဲရံၚ်အာကဵုအကာဲအရာဍုၚ်ပိုဲ ကေုာံ အာဇြဳယာန်မဂး ရာတ်သာကဵုအမေရိကာန် ဂွံလဝ်မွဲမွဲလပါ်ဂှ်တုဲ ပ္ဍဲ ကောံဓရီုအမေရိကာန်ကဵုအာဇြဳယာန်ဂှ် အမေရိကာန် ကော်ဘိက်သ္ပစၟတ်သမ္တီအေန်ယူဂျဳဂှ်တုဲ ရာတ်သာဂှ် ပတေၚ်ပ တိုန်လဝ်အသိၚ်မဟာမိတ်ကဵုကံၚ်သဳပၞာန်တအ်ရ။ အာဇြဳယာန်လေဝ် နကဵုဇြဟတ်တံၚ်ဂြဲအကြာသူပါပါဝါၜါဍုၚ်ဂှ် ကြပ်ဒှ် မံၚ်ၜါကရေက်ကီုရောၚ်ဂှ်လေဝ် ညာတ်ကေတ်မာန်ရ။ ကံၚ်သဳပၞာန်ဂှ် ပရေၚ်ဆက်ဆောံကြပ်ကဵုရာတ်သာလောန် ကေုာံ ကြပ်ကဵုဍုၚ်ကြုက်လောန်ဂှ်တုဲ၊ အေန်ယူဂျဳဂှ် ကြပ်ကဵုအမေရိကာန်လောန်ဂှ်တုဲ အနာဂတ်ဏံ ဍေံလျောဝ်ဗက်အာမံၚ် ညံၚ်ပဋိပက္ခဇၞော်ဇၞော်ဂွံကတဵုဒှ် ဍေံမတုပ်သၟဟ်ကဵုထာဲဝါန်ကေုာံဟံၚ်ကံၚ်မာန်ရ။ ဂကောံဇာဒိသိုၚ်တအ်၊ ဂျဖောတ်တအ် တိတ်ပ္ဍဲဂၠံၚ်ထ္ၜးဆန္ဒ ထံက်ဂလာန်ကဵုကံၚ်သဳပၞာန် ပ္ဍဲနေပျဳဒဝ်ဂှ် ဗမ်ခတိုဟ်ဗၞတ်ၜါအ လန်ဂှ်တုဲ ကမၠောန်သာ်ဝွံ ဂွံကၠောန်သ္ပမာန်ဂှ် ပ္ဍဲအေန်ယူဂျဳ ဇြဟတ်နွံမံၚ်ဟွံဍောတ်ရောၚ် ညာတ်ကေတ်မာန်ဂှ်တုဲ မွဲလ ပါ်ကဵုမွဲလပါ် ဂွံကေတ်ဇၞးညးသကအ်ဟွံလောဲသွာရောၚ်ဂှ် တော်ဆကေတ်မာန်ရ။ ဍုၚ်ရာတ်သျှာ ညံၚ်ရဴကေတ်ဇၞး ကုဍုၚ် သၟတ်ယူကရိန်ဟွံလောဲသွာဂှ်ကီု ကံၚ်သဳပၞာန်တအ်ဂှ်လေဝ် ကေတ်ဇၞးကုအေန်ယူဂျဳဟွံလောဲသွာရောၚ်ဂှ် ကၠိုဟ်ကေတ်မာန်ရ။ ဍုၚ်ယူကရိန် ညံၚ်ရဴလှေက်လှံၚ်ဒၟံၚ်နကဵုဘဲပၞာန်ဂှ်ကီု ဍုၚ်ပိုဲလေဝ် ဟွံသာလးလးရ။ ညးဒဒိုက်ဒဴပၞာန်တအ် ၜိုန်ရသာနူ ကရိၚ်ညိညကီုလေဝ် ဆဂး ဘဝညးဍုၚ်ကွာန်တအ် ဒးဖေက်ဘဲပၞာန်ဂှ် ဟွံကွာရောၚ်။ ယဝ်ရဗှ်ပရိုၚ်ဗဳဗဳဇြဳ၊ ဗဳအိုဝ်အေတအ်မဂး ဇၟာပ်တ္ၚဲ ညးဍုၚ်ကွာန် ဒးချိုတ်ဒၟံၚ်၊ ဍုၚ်ကွာန်ဒးတူလေၚ်ဒၟံၚ်နကဵုဘဲပၞာန်ရ။ ဂကောံသုၚ်ဆီတအ် မံက်ကၠုၚ် ဍေံမတုပ်သၟဟ် ကဵုတၠုၚ်လအာဂကောံပဳဒဳအာဖ် မကၠတ်ဂစိုတ်မၞိဟ်တအ်ပၠန်ဂှ်တုဲ ညးဗက်ဂစိုတ်အဲ အဲဗက်ဂစိုတ်ညးတုပ်ပ်အိုတ်ရ။ ဂွံက ညာၚ်ကရေဲအာတ်အရီုအဗၚ်ယူအေန်ပၠန်လေဝ် ဂကောံယူအေန်ဂှ် အဃောဒးကၟာတ်လဝ်မုဟ် နကဵုစၟကပ်ယဲပၠန်ဂှ်တုဲ ဂၠးတိ ပိုဲဏံ ဒးဟီုစအဃောလီုလာ်သံၚ်ဗြံၚ်မံၚ်ရောၚ်။ ဂွံဗဵုကလၚ်ကေတ်သၚ်သၟတ်ဂကူဗၟာ မဟီုတွံမံၚ်သွက်မဟာဗျူဟာ အေန်ယူဂျဳ သွက်ဂွံကေတ်ဇၞးကုသၞကံၚ်သဳပၞာန် နကဵုဆီပါ်ဍာ်ဇွောဝ်ပၠန်ဂှ်တုဲ ပေဲါပၞာန်ခေတ်ဏံ ခမဳမသၠောမ်လတက်လဝ်သ္ၚာဍာ်လွံက်လေဝ် ပါလုပ်မံၚ်ကီုဂှ်တုဲ ကပ်ဏံ ဒှ်ကပ်ဓမ္မတာမွဲ ပ္ဍဲဝၚ်ပိုဲမၞိဟ်ဟွံသေၚ်ရောၚ် စှေ်စိုတ်ရ။ ပေဲါပၞာန်အကြာရာတ်သာကဵုယူကရိန်ဂှ် ညးဂှ်ဇၞးမာန် ညးဂှ်ကျမာန် ၊ ညးဂှ်ဗၠေတ် ညးဂှ်ဒး ၜိုန်ရစိုတ်ဟွံလုပ်စကီုလေဝ် ဆဂး ဍုၚ်ယူကရိန်မွဲ လှေက်လှံၚ်အာ၊ ညးဍုၚ်ကွာန်ဂၠိုၚ်ကဵုစှော်ကိုတ် ဒးဂြိပ်ဒဴလလဴဇိုၚ်ဂှ်တုဲ ဂွံကလေၚ်ဒက်ပတန်ဍုၚ်ယူကရိန် ဂွံဒှ်ဗီုပြၚ်တြေံပၠန်ဂှ် ဂပ်ဝ်ဒးဇြိုၚ်စိုတ်ရ။ ပ္ဍဲကဵုဌာနပရိုၚ်အေပဳ မချူလဝ်တ္ၚဲဏံ ဂွံဗှ်လ္ၚတ်ကေတ်ဂှ်တုန် - “ ပေဲါပၞာန်ဏံ ယူကရိန်ဇၞးမာန် ရောၚ် Ukraine can win this war ” ဂလာန်သာ်ဝွံ ညးအုပ်ကာနာနာ ဂကောံနေတိုဝ် နာဲဂျေန် သတိုဝ်တေန်ဗာဂ် Jens Stoltenberg ဟီုသဂးဏာ ပ္ဍဲ ကောံဓရီု မကၠောန်ဗဒှ် ပ္ဍဲဗာလေန်၊ ဍုၚ်ဂျာမနဳ မဒှ်ဒၞာဲက္ဍိုပ်သကိုပ်ကလုတ်ဂကောံနေတိုဝ်တအ် မကောံဓရီုတိုန်စိုပ် ဂြုဂြုဂြီုဂြီုဂှ်ရောၚ်။ ပေဲါပၞာန်ဝွံ အတိုၚ်မဝ်သကိုဝ်ဖျေံလဝ်အစဳအဇန်ဂှ် ဟွံဒှ်ရောၚ် သာ်ဝွံလေဝ် ညးဟီုရ။ ပေဲါပၞာန်ဏံ ဂကောံမဟာမိတ်ပၞာန်ညးတအ် ဒးဆက်ထံက်ပၚ်ရီုဗၚ်အာယူကရိန်ရောၚ်ဂှ်လေဝ် ဟီုကဵုဏာဇြဟတ်စိုတ်ရ။ မွဲအဆက်ဓဝ် ပ္ဍဲတ္ၚဲအဒိုတ်တုဲကၠုၚ်ဏံ ဍုၚ်ဝှေန်လာန်အာတ်လုပ်ဂကောံနေတိုဝ်ဂှ်တုဲ တ္ၚဲဏံပၠန် ဍုၚ်သွိဒေန်လေဝ် ဖျေံသဂုတ်သွာတ်ဂွံအာတ် လုပ်နေတိုဝ်ပၠန်ဂှ်တုဲ ညးအုပ်ကာနာနာဂှ် ညးမိပ်စိုတ်လောန်ရ။ ဆဂး ယဝ်ရတူရကဳဟွံတုပ်စိုတ်မဂး ရန်တၟံၜါဍုၚ်ဂှ် ဒှ်ကၠုၚ် ဟွံမာန်ဂှ်တုဲ ညံၚ်တူရကဳဟွံဂွံကၟာတ်ဂှ် အမေရိကာန်တအ် ပတိတ်မံၚ်ဇြဟတ်ရ။ ဍုၚ်ၜါဝွံ လုပ်စိုပ်ဂကောံနေတိုဝ်ပၠန်မဂး ဍုၚ်အဳယူဂှ် လုပ်စိုပ်အာသၟဝ်သကေမ်တဲနေတိုဝ် မဒှ်ဂကောံအမေရိကာန် မက္ဍိုက်ပ်ဂှ်တုဲ ဂတဏံ စပ်ကဵုပရေၚ်ပၞာန်ကီု ပရေၚ်ပိုန်ဒြပ်ကီု အမေရိကာန် အုပ်ဓလီုကၠေံမာန်ရောၚ်ဂှ် တၠပညာဍုၚ်ကြုက် နာဲဝၚ်ရှော Wang Shuo မစိုန်ဒှ်တဴပူဂဵု ပါမောက္ခ မလ္ၚတ်မံၚ်ကေၚ်ကာဍုၚ်သအာၚ် ဟီုတုဲ ချူလဝ် ပ္ဍဲဂလပ်ဗဴထာၚ်ချာၚ်ဏာ ပ္ဍဲတ္ၚဲဝွံပၠန်ရ။ ပေဲါပၞာန်မလအ်ကၠုၚ်လဝ်ၜိုတ်ပိဂိတု နူဖေဖဝ်ဝါရဳ(၂၄)တေံဂှ် တဲကၠာဝါဒိတေံ ထေၚ်ဂး ရာတ်ရှာ သီကေတ်လောဲလောဲကီု လေဝ် တ္ၚဲဏံ နကဵုအရီုအဗၚ်မဟာမိတ်ပၞာန်နေတိုဝ်တအ်၊ နကဵုစိုတ်ဓါတ်ကောန်ဍုၚ်ယူကရိၚ် မဆာန်ဍုၚ်တအ်ဂှ် ညးတအ်ဒုၚ် ပၞာန်ကဵုရာတ်သာမာန်ဂှ်တုဲ ဗွဲမလောဲသွာ ရာတ်သာ ကေတ်ဇၞးကုယူကရိၚ်ဟွံမာန်သၟးဟွံက ကောန်ပၞာန်ရာတ်သာတအ် စဟွံဍာတ်ရောၚ်ဂှ် ဗှ်ကေတ်ပရိုၚ်တအ်ဂှ်မဂး တီညာတ်ကေတ်မာန်ရ။ ပေဲါပၞာန်ဝွံ ယဝ်ရဟွံတက်ကျာညးသကအ်မဂး ဆက်တုဲဂၠိၚ်သ္ၚောဲအတိုၚ်ဏံမာန်ရောၚ်။ ကောန်ပၞာန်ရာတ်ယှာတအ် ၜိုန်ရချိုတ်သၟးကီုလေဝ် ကောန်ဍုၚ်ယူကရိန်တအ် သီုချိုတ် သီုဒးဒဴနူဍုၚ် သီုဍုၚ်ကွာန်လီုလာ်ဂှ်တုဲ ဂွံကလေၚ်ဒက်ပတန်ဘဝတၟိဂှ် ဝါတ်မံၚ်တၟာအကးရ။ ဟိုတ်ဂှ်တုဲ ပေဲါပၞာန်ဝွံ နကဵုရာတ်သာကီု နကဵုယူကရိၚ်ကီု နကဵုအမေရိကာန်ကီု နကဵုနေတိုဝ်ကီု ကျမံၚ်တုဲတုဲရောၚ်ဂှ် ဒးဟီုနကဵုလညာတ်မံၚ်အဒေါဝ် ရ။ ပေဲါပၞာန်ဝွံ ဂကောံယူအေန်လေဝ် ဒးကျဇၞော်ဇၞော်ရောၚ်ဟီုမာန်ရ။ တြုံဟွံမွဲကဵုဗြဴ၊ သမ္ဘာဟွံမွဲကဵုတၠသ္ၚိ၊ ကောန်ဇာတ်ဒးလသာမိမ၊ မိမဒးလေၚ်ကောန်ဇာတ်၊ မှာဇန်အဝယ်ဘဝလီုလာ်၊ သုသာန်ပေၚ်ကဵုဇွ၊ အနိဌာနရီုပၞာန် ဇၞော်လောန်ပ္ဍဲဝၚ်ပိုဲမၞိဟ်တအ်ရ။ တက်ကျာကဵုကေတ်ညးသကအ်ဟွံသေၚ်မဂး သွဟ်ဟွံမွဲဟေၚ်ရ။