ဗော်ဍုၚ်မန်တၟိကဵုဂကူသ္ကုတ်(၄)

1. ဗော်ဍုၚ်မန်တၟိကဵုဂကူမန် သ္ကုတ်(၄)

✍️ဝိဉာဏ်ၜိုပ်

◼️မန်ပိုဲလ္ၚဵုတံဂှ် ပရေၚ်တံဏံဝိုတ်ဒၟံၚ်တုဲ ဟီုထိုၚ်သးပရေၚ်ဒပ်ပၞာန်ရခေၚ်အေအေတံ ဟွံထ္ပက်လိက်ကသုက် NCA တုဲ ဖျေံကဝုဗော်ဍုၚ်မန်တၟိ ထ္ပက်လဝ်လိက်ကသုက် NCA ရ၊ ဍာံဍာံတေံဂှ် အေအေဂှ် ဟွံထ္ပက်လိက်ကသုက် NCA ဟွံသေၚ် အလဵုသဳပၞာန်ဗၟာတံ ဟွံကဵုအခေါၚ်ထ္ပက်တုဲ သှ်ေအာရ၊ လိက်ကသုက်ဂှ် ချူလဝ်ခိုဟ်ဒၟံၚ်ရ၊ ဆ္ဂး ညံၚ်ဟွံဂွံဒှ်ထမံက်ရုပ်ရဴ အတိုၚ်လိက်ကသုက်ဂှ် ဗၟာတံဖန်ဗ္ဂေတ်တံၚ်ပဇာဒၟံၚ်အခိၚ်တုဲ ရုပ်ရဴကမၠောန်ဟွံမံက်ဒှ်မံၚ်သာ်ဂှ်ရောၚ် ညာတ်ကေတ်ရ၊ အတိုၚ်ဟီုလဝ် ထမံက်ရုပ်ရဴရောဟွံမာန်ဒၟံၚ်ရ မုပဒးပၠေၚ်ဒၟံၚ်အခိၚ်ရော ဖံက်တိတ်ထောံနူ NCA တုဲ ပန်စဂွံရ၊ သာ်ဏံလေဝ် မန်ပိုဲတံဟီုဂးဒၟံၚ်လေဝ်နွံရ၊ ဟီုဂှ်ဟီုလောဲလောဲဖအိုတ်ရ၊ ဂွံထမံက်ရုပ်ရဴနဇိုၚ်နတဲဂှ် ဟွံလောဲဗီုဟီုရ၊ အကာဲအရာတိဍာ်ဇကု မံၚ်တန်တဴဂှ် ဒးရံၚ်ချိုတ်တ်ပၠိုတ်ရ၊ ဇြဟတ်ဇကုလေဝ်ဒးရံၚ်ရ၊ မန်ပိုဲလ္ၚဵုဟီုဂှ် ကာလဒှ်ပန်ကဵုဗၟာတှ်ေ ကောန်ပၞာန်ဂၠိုၚ်ကၠုၚ်ဏောၚ်ဂး ဂလာန်ဟၟဲကဵုတၚ်ဒုၚ်လျိုၚ်ဂှ် ဟီုဂွံမံၚ်ပြးရ။

🔸ဗော်ဍုၚ်မန်တၟိဂှ် ၜိုတ်အဲတီ ၜိုတ်အဲကေၚ်ဆဵုမ္ဂး အကာဲအရာပ္ၚံက်ပရေၚ်ဍုၚ်ကွာန်ပြံၚ်လှာဲမ္ဂး ညးပါ်တာလျိုၚ်နူအဆံၚ်ဗဟဵုတေံတုဲ စှ်ေပၠတရဴ သောၚ်က္လးကေတ်ဆန္ဒနူခၟဳသၚ် ညးဍုၚ်ကွာန်တံလၟိုန်ရ၊ ဂွံတီဆန္ဒခၟဳသၚ်ညးဍုၚ်ကွာန်တံတုဲ ကမ္မတဳရေၚ်တၠုၚ်ကေၚ်ကာတံ သဳကၠဳဖျေံသ္ဂုတ်သွာတ်ရ၊ အတိုၚ်လၟေၚ်ကမၠောန်ညးတံဂှ် ဖျေံသ္ဂုတ်သွာတ်တုဲ ထမံက်ရုပ်ရဴရ၊ အဲညးချူလိက်ဏံ ဒုၚ်ဝန်မွဲဂှ် ပ္ဍဲအရာကမၠောန်အဆံၚ်ကေၚ်ကာ ဗော်ဍုၚ်မန်တၟိဂှ် နကဵုအဲညးချူလိက်ဏံ နဇိုၚ်နတဲ ကေၚ်ဆဵုလဝ်ဟၟဲတုဲ အတိုၚ်လ္ၚတ်ဂွံဟေၚ် တီပရေၚ်ရ၊ ပရေၚ်စှ်ေပၠတရဴ အကြာခၟဳသၚ်ညးဍုၚ်ကွာန်တံဂှ် ဆဵုလဝ်သၟးဟွံက သီုကေၚ်ကဵုလဝ်လညာတ် ပတိုန်ထ္ၜးလဝ်လေဝ် နွံဒၟံၚ်ကီုရ။

🔸ဗော်ဍုင်မန်တၟိဂှ် နကဵုမူဝါဒညး ဂၠံၚ်တရဴညး အာဒၟံၚ်ဗီုညးကဵုညးဟွံသေၚ် ညးနိဿဲကဵုခၟဳသၚ် ညးဍုၚ်ကွာန်ဆာန်ဂကူတံတုဲ အာဒၟံၚ်ရ၊ ၜိုန်ဂှ်လေဝ် ပ္ဍဲဂကောံမွဲမွဲ ပ္ဍဲဗော်မွဲမွဲ မၞိဟ်ခိုဟ်နွံ မၞိဟ်ပရေံနွံရ၊ ဒၟါနူကဵုမၞိဟ်ပရေံနွံမွဲၜါဂှ် ဖျေံထောံမိဂ္ဂး ဗော်ဍုၚ်မန်တၟိပရေံ ဟွံထေက်မိက်ဂွံသ္ဂးရ၊ ဗော်ဍုၚ်မန်တၟိပရေံမ္ဂး ကောန်ဂကူမန်ဟွံခိုဟ်ရ၊ ကောန်ဂကူမန်ဟွံခိုဟ်မ္ဂး ဗော်ဍုၚ်မန်တၟိလေဝ် ပရေံရ၊ ဗော်ဍုၚ်မန်တၟိကဵုကောန်ဂကူမန်ဂှ် တၞဟ်ခြာထောံညးသ္ကံဟွံဂွံရ၊ ဒးမၚ်မွဲထိၚ်ကြာပ်အာညးသ္ကံရောၚ်၊ ဗော်ဍုၚ်မန်တၟိဟွံခိုဟ် ညးဍုၚ်ကွာန်ဂကူမန်တံ ထံက်ထ္ၜးကၠုၚ်နကဵုစေတနာမ္ဂး ညးတာလျိုၚ်အဆံၚ်ၚ်ဗော်ဍုၚ်မန်တၟိတံ သ္ပထောံထေဲဟွံဂွံ သ္ပထောံမဇ္ဇျဟ်ဟွံဂွံ သ္ပထောံဥပေက္ခာဟွံဂွံ၊ မ္ဒးက္လေၚ်သ္ၚဳဂၠိပ် ဇွိတ်သပေါတ် လ္တူပရေၚ်ထံက်ထ္ၜးလဝ်တံဂှ်တုဲ ဒၞါဲဒးဂှ်ကေတ် ဒၞါဲဗၠေတ်ဂှ်ပါဲ ဒးပလေဝ်အာ အရာဟွံခိုဟ် အရာဟွံဒးရးတံဂှ်ရောၚ်။

🔸ညးဍုၚ်ကွာန်ဂကူမန်တံဂှ်လေဝ် အရာဟွံခိုဟ်ဆာဲ အရာဟွံဒးရး အပ္ဍဲဗော်ဍုၚ်မန်တၟိ ယဝ်ဆဵုညာတ်မ္ဂး ထံက်ထ္ၜး၊ ပတိုန်ထ္ၜးကဵုညးတာလျိုၚ်အဆံၚ်ၚ်ညိ၊ အခေါၚ်ထံက်ထ္ၜး ပတိုန်ထ္ၜးဂှ် ဗော်ဍုၚ်မန်တၟိပံက်လဝ်ကဵုပေၚ်ၚ်ရ၊ ကာလထံက်ထ္ၜးပတိုန်ထ္ၜး လ္ပထံက်ထ္ၜးနနဲဖျေံကဝု ဟီုပျုတ်ဗဒေက်ဗော်ညိ ဒှ်မာန်တှ်ေ လ္ပထံက်ထ္ၜး ပတိုန်ထ္ၜးလ္တူလပှ်ကျာဏီတှ်ေ ခိုဟ်ရ၊ လ္ပပတိုန်တာဒၞါသာ်ဂှ်ဟွံသေၚ် ပါ်ပါဲဝေါဟာအးအးညိ လ္ပပတိုန်ဏီ မုဟိုတ်ဂွံဟီုသာ်ဏံရောမ္ဂး အရာဟွံခိုဟ်အရာဟွံဒးရးဏောၚ်ဟီုမ္ဂး သၟိက်မိက်ဂွံကဵုသဳကၠဳကေတ်မွဲမွဲသာသာကၠာရ၊ ဗော်ဍုၚ်မန်တၟိကဵု ညးဍုၚ်ကွာန်ဂကူမန်ဂှ် မိက်ဂွံကဵုလဝ်လဝ်ပ္ဍဲစိုတ်တေံ ခန္ဓကာယမၞိဟ်မွဲရ ဇိုၚ်ဂိတှ်ေ ဇကုရဂိ တဲဂိလေဝ် ဇကုရဂိ (ဥပမာ) ကွာ်အာမံၚ် ဇိုၚ်ထဍိၚ်ဒးတုဲ ဇိုၚ်မုပဂွံထဍိၚ် ကေတ်လေံၜုၚ်တက်စုတ်ဇိုၚ်မ္ဂး ညးဂှ်ဒးဒုၚ်ဂိ ဇကုပၠန်ရဂိရောၚ်။

🔸ဟိုတ်ဂှ်ရ ဗော်ဍုၚ်မန်တၟိဂွံခိုဟ် ဂွံနွံကဵုစရာဲဂှ် ပိုဲညးဍုၚ်ကွာန်တံ နနဲသၟာတဵုကၠအ်ဥဒျာန်မွဲ သ္ဒးလဝ်စိုတ်တုဲ ကၠအ်ဥဒျာန်ပိုဲဂွံဍိုပ်ဍဴ ကျေဝ်ဂေါဝ်ရာၚ်ဆာဲဂှ်....

👉သ္ကုတ်(၅) ဆက်ပတိုန်ကဵုပၠန်ရောၚ်...

1. ဗီုရုပ်👉Lin Hitke