ဘဝဗၠာဲ
ဘဝ ဗၠာဲ
“ဆလအ်ဂွံစရော” လိုက်ဝှ် သှ်ပဝါတုဲမ္ဂး မသၟာန် အၚ်တာဗျူဏံ ဒးသွဟ်ကၠုၚ်ဂၠိုၚ်ကဵု အလန်တုဲ မုက်ဂတဴကဵု ရဲအရာပ်၊ ရဲကွာန်တံတုဲ မိက်ဂွံဓလောပ်ပါဲနူကွာန်မွဲလစုတ်တုဲ ဂိတုကထိုန်လောန်တုဲမှ မိက်ဂွံစဴကွာန်ပၠန် ပ္ဍဲစိုတ်တေံဒှ်တိုန်ရ။ အဲဂှ်ဒၞာဲလဵုသက်ဂွံအာဟၟဲ ဒးမံၚ်ပ္ဍဲကွာန်ဟေၚ်တုဲ ဒးဒုၚ်စးကဵု သၟာန်ဏံတုဲ၊ ကာလ လထဴတံ ဟီုဗျံက်ကၠုၚ်မ္ဂး ဂွဂိအာ တၚက်က် ဒးအာအကြာညးတံရ။ မိမပိုယ်ဂှ် ကောန်ဗၠာဲ ဆလံဗှ်ေစှ်ေအိန်ထံၚ်ရော ညးဟွံသၟာန်မွဲလှ်ေ ရဲအရာပ်ပိုယ် ယှုက်မံၚ်မတ်ကဵု အဲဟွံစှ်ေဒၞာဲ။ ဒှ်ကမၠောန်ညးတံဟာ ပါ်ပါဲဟွံလေပ်ရ။ သွက်ဂွံစှ်ေဒၞာဲ ညးတံဓဍုက်ဓမက်ကၠုၚ်မ္ဂး ကလေၚ်ကူချပ်ဂွံအာ ပရူပရာ ကေၚ်ဝေၚ်ကၠုၚ်လဝ်ဝုတ်၊ သ္ကံရဲဇကု ကေၚ်တိုန်လဝ်ဘာမွဲစွံတံဂှ်ရ။
သ္ကံရဲပိုယ်တံ ညးပိတၠဂှ် အံၚ်ဘာတန်သၠုၚ် ပ္ဍဲကွာန်ပိုယ်သၞေဟ်ဗ္ဒဝ်၊ ပွိုၚ်ဍုၚ်မုဟ်တုဲ ကာလတိုန်လေဝ် မေဂျာ Zoo ပ္ဍဲတက္ကသိုလ် မတ်မလီု သီုညးပိတၠ ပၠန်ရ။ တန်တုပ်၊ ကွာန်တုပ်၊ မေဂျာတုပ်ကီုလေဝ် စိုပ်ကဵုလညာတ် ပိုယ်တံညးပိတၠ ဟွံတုပ်ညးသ္ကံ၊ ဆ္ဂးဒှ်မံၚ်သ္ကအ်ရဲ နူဍောတ်တ် စဵုလၟုဟ်ရ။ အဲဂှ် ဒုၚ်ဂိုၚ်ကေတ်လဝ်ဂှ် ဇကုလေပ်လိက်ဂွံတဆိပ်ကြာမှ ကောန်ကွာန်တံဂှ် ညးတံစိုတ်လုပ်စကဵု ပရေၚ်ပညာတုဲ ကောန်ညးတံ ညးတံစွံကၠုၚ်ဘာကဵု ကောန်ညးတံဏောၚ်။ ပ္ဍဲဒေသပိုယ်ဂှ် ဂၠာဲသြန်မာန်တှ်ေ ညးတၞဟ် ထိုၚ်သးတုဲ မၞိဟ်တိုန်ဘာတက္ကသိုလ်တံဂှ် ဒှ်ညးအာဂၠာဲဗြဴညးတံထေၚ်စရ။ ဟိုတ်ဍေံဂှ် ညးတံဗဵု (video)ရုပ်ဒမျီုတံဂှ် ကောန်သၟိၚ်တံဂှ် တိုန်ဘာမ္ဂး ဂစာန်မံၚ်လိက်မွဲအလန်လေဝ် ညးတံဟွံဆဵုတုဲ ဂစာန်ဂၠာဲမံၚ်ကဝေၚ် သၟးရဂၠိုၚ်။ သ္ပအဓိကကဵု ပရေၚ်ပညာတုဲ တက်လဝ်တံဂှ် ဆဵုစ အောန်တဴဗွဲမလောန်ရ။
မိမရာဇာတံဂှ် ကၠောန်မံၚ်ကမၠောန် ပ္ဍဲဍုၚ် (သောန်ဂပူ)သၞာံလံလးရ။ ရာဇာ မသုန်သၞာံ ဒးမံၚ်ဒၟံၚ် ပ္ဍဲမိနော်တံတုဲ ဇၞော်ဂေါဝ်ကၠုၚ်ရ။ ပညာဂှ်ဗ္တောန်တှ်ေတုဲရ၊ သြန်ၜိုတ်ကေတ် မိမဍေံတံ ပြၚ်နၚ်မံၚ်လၟိုန်ရ။ ကောန်ညးတံ ဂွံတဆိပ်ကြာနူကဵု တက္ကသိုလ် မတ်မလီုတုဲမ္ဂး ညးတံကော်ဏာ အာကၠောန်စဍုၚ်မ္ရးဏောၚ် ညးတံဟီုလဝ် သၞာံလံလးမံၚ်ရ။ ဒှ်မၞိဟ်ဂွံ ရပ်သြန်ဂၠိုၚ်တုဲ ပါဲနူကဵု ပိုယ်ညးၜါတုဲ ရဲညးတေံနွံမံၚ်ဂၠိုၚ်ဂၠေၚ်ရ။ ကွီလိုန်ဓါတ်ခိုဟ်ဟ်လေဝ်ဂွံဍိုက်ပၠန်၊ ရုပ်သာ်လေဝ်ယေန် ဝုတ်တ်တံ စိုတ်လုပ်ကဵု ဍေံဂၠိုၚ်ရောၚ်။
“ဘာတက္ကသိုလ်တုဲတှ်ေ ပ္ဍဲဍုၚ်ဗၟာဏံ အဲဟွံမံၚ်ပုဟ်၊ တိတ်ဍုၚ်မ္ရးတုဲ ဂၠာဲသြန်ဂၠိုၚ်ၚ်ဏောၚ်၊ ဒၟံၚ်ပ္ဍဲဍုၚ်ဏံဂှ် မုဂုဏ်ဖဵုလေဝ်ဟၟဲ အခိၚ်အိုတ်၊ တိုန်မံၚ်ဘာလၟုဟ်လေဝ် အဓိပ္ပာယ်ဟၟဲပုဟ် ဟိုတ်နူကဵု ဟွံမိက်စး၊ ဟွံမာန်အသံၚ်ပါၚ်မိမတုဲ တှ်ေ ဒးတိုန်မံၚ်ဘာလၟုဟ်ရ” ရာဇာ ဟီုတိုန်သာ်ဂှ်
သုတ “ၝ လ္ပထေၚ်သောဲကဵုပညာလေဝ်၊ ကဆံၚ်ပညာသၠုၚ်အိုတ် ပ္ဍဲဍုၚ်ပိုယ်ဏံဂှ် ပိုယ်စိုပ်မံၚ်ယျ၊ မိမပိုယ်တံ ၜိုန်ဏံလေဝ် ညးဂွံသၠုၚ်ကဵုဘဝပိုယ်မာန်၊ မုမိက်ဂွံထပ်ကေတ်မံၚ်ဏီရော?”
“ဒၞာဲဂွံထေၚ်ဇၞော် အဲဟွံဆဵုလေဝ်၊ မုၝမိက်ဂွံဟီုတှ်ေဟီုရ။ ၝတေံၝဏံရ လ္ပဟီုရ၊ လိက်ပိုယ်တံ ဗ္တောန်မံၚ်လၟုဟ်ဂှ် ဒၞာဲလဵု သုၚ်စောဲလုပ်ရော အဲဟွံတီ၊ သုၚ်စောဲလုပ်မံၚ် ဂယျိုၚ်လမျီုပိုယ်မာန်မံၚ် ညးမွဲလေဝ် ဒုၚ်တာလျိုၚ်ဟွံမာန်ပုဟ်၊ ကဵုအဲဟီုခိုဟ် မံၚ်ဏီဟာ၊ ဟ ဟ ဟ”
ဆာန်လောန် “ခိုဟ်ရ၊ပြေံရဟာ ကေတ်ဟွံဒးပုဟ်၊ ဗ္တောန်လိက်တှ်ေ ဗှ်လိက်လေပ်ဂွံရ၊ မုၝ ဣကေတ်”
မိမဆာန်လောန်တံဂှ် ဒှ်ညးသွံစဖျာတုဲ ပံက်လဝ်ဆေၚ်ဖျာသွံစ ကၠေၚ်မြေက်ကသီုတုဲ သွံခိုဟ်၊ ညးရာန်စလေဝ်ဂၠိုၚ်မံၚ်ရ။ အပါဆာန်လောန်တံဂှ် ခွတ်ထၜိုတ်၊ ကၠောန်ဝါ။ ရန်တၟံမိမ ဆာန်လောန်တံဂှ် မသ ညးတံ ညးမွဲလေဝ် ဟွံကေၚ်ဂွံလဝ် တဆိပ်ကြာမွဲလှ်ေဏီတုဲ စိုပ်အလန်ကောန်ဏံမ္ဂး မိက်ဂွံကဵုဂွံတဆိပ်ကြာမွဲတုဲ ဂိုဟ်ဂစာန်ကဵုမံၚ်ကောန် သွက်ဂွံ ဗ္တောန်ပညာ ဂှ်ရ။ သွံထၜိုတ်၊ သွံသြောံတုဲ ကဵုသြန်ကဵုဆာန်လောန်ထံက်ပၚ် သွက်ဂွံတိုန်ဘာရ။ ပါဲနူကဵုအဲတုဲ ဆာန်လောန်ကဵု ရာဇာ တိုန်ဘာ ရပ်သြန်ဖဴမံၚ်သီုညးၜါရ။
ဘဝဗၠာဲ ၜိုန်ရဟီုမံၚ်ဂၠာဲပညာကီုလေဝ်အခိၚ်တိုန်ဘာ ပ္ဍဲစိုတ်တေံ ၜိုန်ရထိၚ်မံၚ်ကီုလေဝ် မိက်ဂွံဂွံတိုန်ကဝေၚ်၊ မတ်ဇကုဂှ် ကၠတ်ကျေဝ်မံၚ်ညးဗြဴမွဲ ပ္ဍဲခန်ခဒန်တုပ်မံၚ်ဇကုဂှ်ရ။
မိကျေဝ်ဂေါဝ် ပ္ဍဲကဵု Major Zoo ဂှ် ဇၟာပ်သၟတ်ဗၠာဲဆဵုဒးမ္ဂး မိက်ဂွံအာတ်ပါန် အခေါၚ်ဆာန်နူဍေံရ။ ဆက်ဆောံခိုဟ်၊ ပ္ဍဲမွဲတန်ဂှ်တှ်ေ ဗဵုအာမ္ဂး ကျေဝ်နူကဵု ဂမၠိုၚ်။ လကျှန်ညးဗြဴ သြိုဟ်လး၊ ဂၞိန်ဝန်၊ ကရတ်ပိတန် အတိုၚ်ပ္ဍဲဒွက် ကီု ကျေဝ်အိုတ် ပ္ဍဲမွဲအတန်ရ။ ဥာဏ်ပညာပၠန်သ္ကေက်သ္ကာ သွဟ်လဝ်သၞာံတုဲ လုပ်အာ Qualifyရ။ ကောန်ကွးဘာတံလေဝ် စုတ်ကဵုလဝ်မာဲ Zoom Queen ရ။ ကာလအံၚ်ဘာတန်သၠုၚ်ဂှ် အံၚ်ကၠုၚ်ဘာကွာန်လှာ၊ ဇာတိကွာန်ယေန်ဒံၚ်ရ။ အခိၚ်ကာလတိုန်ဘာဂှ် ဟိုတ်ကဵု ကွာန်ကြပ်၊ ပွိုၚ်ဍုၚ်တုပ်တုဲ ဒှ်ကၠုၚ်သ္ကံရဲကဵု သ္ကံရဲပိုယ်တံရ။ ပရေၚ်ဆက်ဆောံ တုဲဒှ်အာ ဆၜိုတ်သ္ကံရဲဟွံသေၚ်။
မိယေန်ဆာန် “သုတ” ပါဲနူကဵု ရုပ်သာ်လစံက်မံၚ်ညိတုဲ၊ စိုတ်စရိုတ်လေဝ်ခိုဟ်မံၚ်။ သၠုၚ်ဟတဴလေဝ် ဒးရး၊ ဇကုဇဂေါဝ်ပၠန်လေဝ် ညံၚ်ရဴ (ဆလိုက်) ကာ အိန္ဒိယရံၚ်ယေန် ကွေံကွေံ၊ ကဝေၚ်ဗီုဂှ် ဗှ်ေဟွံကေတ်တှ်ေ ပရအ်ကဵုပိုယ် ကျေဝ်ဂေါဝ်” သ္ကံရဲတံ ဟီုထမက်ဗျံက်မံၚ်ရ။
“အဲဒးချပ်မံၚ်ဂှ် သုတကဵု ရာဇာ သ္ပလဝ်ကဵု propose ကဵုအဲ သီုညးၜါဏောၚ်။ ဍေံတံညးၜါဂှ် ဒှ်မံၚ်ရဲဏောၚ် ဒးရုဲမၞိဟ်မွဲတှ်ေ ညးဂှ်ဂွံရုဲရော?”
ယေန် “ယဝ်ရအဲတှ်ေ မၞိဟ်အဲဆာန်ရ အဲကေတ်”
“ဆာန်သၟးဒးစ ခရံက်ဂၟဳ အရိုဟ်တ္ရဲတှ်ေ ဆာန်ဂှ်ဟွံပဵုတိုန်ပုဟ်၊ က္ဍဟ်ညးသ္ကံရဒှ်ဂၠိုၚ်”
ရာဇာကဵုအဲ ဟိုတ်နူကဵုဒးစိုတ်တုပ်အာ ပိုယ်ညးၜါဆက်ဆောံ ကံက်ကၠုၚ်သိုက်က်ရ။ အရေဝ်အောန်ကၠုၚ်တုဲ ဆာန်လောန် မံၚ်ဟွံမာန်တုဲ ဟီုတိုန်နကဵု သ္ပပရေံကဵုပိုယ်ညးၜါ။
“ၝတံ ညးၜါဍေံကေတ်ညိဟာ၊ ဂွံဒးထေဲမံၚ်ညးသ္ကံ။ အတေံဂှ် ဗၠာဲတံ ကၠုၚ်ဟီုမံၚ်အရေဝ် ကဝေၚ် မွဲတ္ရဲ ၜိုတ်စှ်တၠ။ ဍေံဟွံဂွံရုဲ မၞိဟ်ဏီဂှ် ဇကုကဵုဇကု စမ်လုပ်ညးသ္ကံလံဟာ။ ပိုယ်ကၠုၚ်မံၚ်ဒၞာဲဏံဂှ် ကၠုၚ်ကတ်ပညာဏောၚ်၊ ကၠုၚ်ဂၠာဲ မဂဳဟွံသေၚ်ပုဟ်ရဲတံ လ္ပဝိုတ်စညိ၊ မွဲသၞာံမွဲအတန်ညံၚ်ဂွံအံၚ်၊ ကေတ်တဆိပ်ကြာတုဲ ညံၚ်မိမ ဂွံကေတ်ဂုဏ်စရာဲဂှ် ပိုယ်တံ ဒးဂစာန်၊ ရဲတံ လ္ပဂစာန် လ္ပာ်ဗၠေတ်ညိ မိက်ဂွံအာတ်မိက် သီုညးၜါရ’
ဟိုတ်နူကဵု ဒ:မရေဝ် “ဆာန်လောန်”တုဲ မၞိဟ်အရေဝ်ဂၠိုၚ်ပိုယ်ညးၜါ သ္ရိတ်ဇြအာတုဲ ကလေၚ်ဆက်ဆောံဟီုတိုန်အရေဝ်ပၠန်တုဲ စဵုကဵုဂွံတဆိပ်ကြာရ။ ဘာတုဲ ရာဇာ ဂှ် အတိုၚ်ဍေံဟီုဂှ်ရ တိတ်အာဍုၚ် Singapore အာကၠောန်စရ။ ဆာန်လောန်ဂှ် ခွတ်ထၜိုတ် ဟွံမာန်ဂးတုဲ တိတ်အာဍုၚ်သေံ။ အဲမွဲဟေၚ်သှ်ေမံၚ်ပ္ဍဲကွာန်တုဲ ဘိုၚ်ကၠောန်မံၚ်ကဵု မိမ ရ။
“ဗှ်ေဆလအ်ကၠုၚ်အာတ်ပ္ဍဲဇရေၚ် မိမ ပိုယ်ရော သုတ” အခိၚ်နွံပ္ဍဲဘာကီု၊ ဘာတုဲအာကီု ညံၚ်ဂွံဂွံသွဟ် နူကဵု ကျေဝ်ဂေါဝ် ၜိုတ်သၟဟ်အစောန်နွံ ညံၚ်ဂွံဂွံသွဟ်ဆာန်ဂစာန်မံၚ်တုဲ တ္ရဲဏံဂွံမိၚ်ကေတ်မရေဝ်ဏံဂှ် ပ္ဍဲစိုတ်တေံ သီုမိပ်၊ သီုလ္ရု ဒှ်တိုန်ပ္ဍဲစိုတ်ရ။ ၜိုန်ရ ကျေဝ်ဂေါဝ် သၟာန်မုဒှ်ရောကီုလေဝ်။ မုလေဝ် ဟွံကလေၚ်ဟီု။ နူဘာတုဲအာတုဲ သွက်ဂွံကယျိုၚ်လမျီုဂှ် ပါဲနူဝါဗ္ရတုဲ မုကမၠောန်လေဝ် ဟွံကေၚ်ကၠောန်ကၠုၚ်တုဲ ကာလသၟာန်သၟုက်အာတ်ကောန်ဝုတ်မွဲမ္ဂး ခေတ်ဏံ ဟလိုၚ်လဵုဒးကဵုရော တၟော်တိုန် ပ္ဍဲစိုတ်တေံသာသာရ။ ကဝေၚ်အဲဏံဂှ် ရုပ်သာ်လေဝ်ကျေဝ်၊ သိုက်လေဝ်သိုက်မံၚ် ဆ္ဂးခေတ်ဏံ မၞိဟ်ပတိုန် အာတ်ဍေံ ဟွံမာန်မ္ဂး ကဝေၚ်ဂလိုၚ်လဵုဆာန်ဆာန်ရ ဍေံဟွံကေတ်ပုဟ်။ မိမ ဍေံလေဝ်တုပ်စိုတ်ဟွံသေၚ်။ ချပ်က္ဍၚ် ဍောၚ်တိုန်စိုတ်ခ္ဍၚ်ရ။
ကာထပက်စိုပ်ကၠုၚ် ဂတမုက်သ္ရိ ကျေဝ်ဂေါဝ် တိတ်ကျောဝ်မွဲတဲဂှ် မၞိဟ်ဇၞော်ဇၞော် မသုန်တၠ လုပ်ကၠုၚ်၊ တိုန်စိုပ်ကၠုၚ်သ္ရိ သီု ရာဇာ လေဝ် ပါကၠုၚ်၊ ကျေဝ်ဂေါဝ် ဂွံဆဵုကေတ်ရ။ ပရောပရာညးတံကၠုၚ်စိုပ်ဇရေၚ်သ္ရိဂှ်လေဝ် မၞိဟ်တၠသ္ရိတံ တီမံၚ်တုဲတုဲ။
“ကၠုၚ်ကၠုၚ် အမူ နာဲ တံ ဂ္ဇံသုၚ်ဍာ်လဖက်” မိမ ကျေဝ်ဂေါဝ်တံ ဒုၚ်တၠုၚ်ကၟုဲ
“ကိစ္စ ပိုယ်ကၠုၚ်တ္ရဲဏံဂှ် အတိုၚ်အရေဝ်ညးတမ်မၠာတံ ဟီုကၠုၚ်လဝ် သ္ပတၠကောန်ဗၠာဲ ဒးကၜက်ယာတ်ဍောတ် ညးဟီုလဝ်နွံမံၚ်တုဲ၊ ပိုယ်တံ ကၠုၚ်သၟာန်သၟုက် ကောန်ဝုတ် ရဲတၠသ္ရိဏံရ”
ညးတံသွက်ဂွံအာတ်ကောန်ဝုတ် သ္ရိဏံဂှ် အပ်ပြာပ်ကဵု ထဝ်လျိုၚ် (၁၀)ပသာ၊ ကိုဋ် (၃၀၀) ညးတၠကောန်ဝုတ်တံ ဒုၚ်တဲမာန်ဟာ? ညးသၟာန် မိမ ကျောဝ်လာဲတံဂှ် ဂစာန်ဓညိက်က္ဍိုပ်ပြဟ်ဟ်ရ။ ပိုယ်ဒးသၟာန်စ ကောန်ဝုတ်ပိုယ်ရ ဍေံ ဒုၚ်တဲကီုဟာ?
သွက်ဂွံသ္ပမ္ရဵုထပ်တဲဂှ် ချပ်ခ္ဍၚ်ဂၠံၚ်တရဴကၠေံကၠက်တိုန်ခ္ဍၚ်တုဲ ထေဲပၞက်ကၠုၚ်ကမၠောန်ဇကုကၠောန်မံၚ်တုဲ သၟာန်တိုန် အပါ ဇကုတုဲ နကဵု ရမျှာၚ်ဟွံပေၚ်စိုတ်ရ။
သုတ - “ကမၠောန်ဝါဗ္ရ အဲကဵုအပါ ဂိုဟ်ဂစာန် ကၠောန်မံၚ်လၟုဟ်ဏံဂှ် သွက်အဲဂွံသ္ပမ္ရဵု၊ ဂွံအာတ်သၟတ်ဝုတ်မန်မွဲ မာန်ကီုဟာ?”
နာဲဗၠာဲ ကျေဝ်ကောန်ညးတေံတုဲ ကလေၚ်သွဟ်ကဵု မရေဝ်ပိုတ်တ်ရ “ဟွံမာန်ပုဟ်”၊ “သၟတ်ဝုတ်ခေတ်လၟုဟ်ဏံ ဒးပတိုန်ၚုဟ် မးသၠုၚ်ကွေံကွေံ ကိုဋ်ကၠံကၠံဏောၚ်၊ အကာဲအရာဒ:အာတ်ဝုတ်တံ ဗီုလၟုဟ် ဒှ်ဗၠာဲဟဇၞော်ရ ဂးတုဲ ဂြိုၚ်တိုန်ထတ်တ်ရ။ ဒှ်ဗၠာဲဍောတ် အခိၚ်(၂၅)တေံ စှ်ေဒၞာဲတှ်ေ ညးဗြဴဂှ် ဂွံညးတြုံမွဲရ။ စိုပ်ကၠုၚ်အခိၚ်တ္ရဲဏံ စှ်ေဒၞာဲ ပေၚ်ပွိုၚ်(၃၀)သၞာံဂှ် အခိုက်ကၞာပေါဲမ္ရဵု ထပ်တဲလေဝ် ပြံၚ်လှာဲ၊ ကမၠောန်လေဝ် ပြံၚ်လှာဲ၊ အခိုက်အလိုက်တံလေဝ် ပြံၚ်လှာဲအိုတ်ရ။ ဝုတ်တံခေတ်လၟုဟ် ကဝေၚ်ဍေံဟွံသေၚ်လေဝ် ဍေံကေတ်၊ ယဝ်ကဵုသြန်ဂၠိုၚ်ကောန်။ မိက်ဂွံစှ်ေဒၞာဲ ဒးဂစာန်ဂၠာဲသြန်ခိုဟ် အိုတ်ရ။ မိမပိုယ်ညးၜါတၠဂှ် ကောန်ညးဟွံမိက်ကဵုသာဲတိတ်အာနူသြိုဟ်ညးတံတုဲ ဟွံလောဲမုဟွံဒှ်၊ အိန်ထံၚ်ဇကု မၞိဟ်ပေၚ်ၚ် မံၚ်မှ အဓိပ္ပာယ်ပေၚ်ညးတံထေၚ်တုဲ ကဵုကၠောန်မံၚ်ကမၠောန် အဖဝ်ညးတံရ။
“ကၠောန်ဂွံဆၜိုတ်စရ လ္ပကၠောန်ရ ရာန်စ သ္ရု ဟွံခိုဟ်ပုဟ်ဟာ”
မုက်အပါဍာဲတုဲ ဒေါသတိတ်အာညိ ကေတ်ဆဵုကေတ်ပ္ဍဲမုက်ညးတုဲ ညးကလေၚ်ထိၚ်ထောံစိုတ်ညိတုဲ ရမျှာၚ်သ္ရိအာမွဲ လစုတ်ရ။
“ဟိုတ်နူဝါဗ္ရဏံတုဲ ကောန်ဘာတုဲကၠုၚ်ရ၊ လ္ပဝိုတ်စဂုဏ် ဝါဗ္ရညိ။ ဝါနွံတုဲ ဒးရာန်သ္ရုဂှ် အပါဂွမံၚ်ကောန်၊ မွဲအယုက်ပါ မွဲလှ်ေ ဟွံကေၚ်ရာန်စသ္ရုမွဲလှ်ေပုဟ်၊ သြောံပိုယ်တံကၠောန်ဂှ် စသုၚ်ကၠုၚ် မွဲအယုက်၊ ပါဲနူကဵုဝါတုဲ မုကမၠောန်လေဝ် အပါကၠောန်ဟွံလေပ်ပုဟ်၊ ကောန်ဟွံကၠောန်ဝါမ္ဂး မုအပါဂွံကၠောန်ရော?”
“ကောန်မိ မိက်ဂွံစှ်ေဒၞာဲ တီမံၚ်ရ၊ ဆ္ဂးၚုဟ်သြောံ” ဆၜိုတ်ပံက်တိုန်ပါၚ်ဂှ် “သုတ” ဂစာန်ဟီု
“ တီမံၚ်ရမိ လ္ပဟီုရ”
မိပိုယ်ဂှ် သွက်အဲဂွံစှ်ေဒၞာဲဂးတုဲ ဂၠာဲညးရာန်တိဗ္ရရ။ ၜိုန်ရၚုဟ်သြောံ ဟွံခိုဟ်ကီုလေဝ် ၚုဟ်တိဗ္ရဂှ် မွဲဨကမ္ဂး လုပ်တြဴထပှ်စှော်။ နကဵုစိုတ်ဓါတ်မၞိဟ်တြုံမွဲတၠ မိမဇကု သြောံတိဗ္ရတုဲမှ ဂွံစှော်ဒၞာဲဂှ် ပၟိက်ဟၟဲသက်သက်ရ။
ဗီုအပါပိုယ်ဟီုဂှ်ရ ရဲသၟာကၠောန်ဗ္ရ ဟွံဒှ်မံၚ်ပိုန်ဒြပ်လအ်လံကာဖာရ။ မုဟိုတ်ဂွံဆက်ကၠောန်မံၚ်ဖိုလ်ရော? ကာလ သၟာန်အပါမ္ဂး ဒှ်မံၚ်ကမၠောန်ညးတံနူဍောတ်တ်တေံကၠောန်မံၚ်တုဲ စိုပ်ကဵုကမၠောန်ဗ္ရဏံဂှ် ဒှ်မံၚ်ဘဝညးတံ အဲကၠိုဟ်ကေတ် လတူညးတံရ။ ဝါဗ္ရမွဲဨက သြောံတိတ် ပန်စှော်၊ အခိၚ်သြောံတိတ် ၚုဟ်အောန် ပ္ဍဲသၞာံဏံ ဂွံၚုဟ် စှ်ကိုဋ်။ အပါပိုယ်ဂှ်ကၠောန်မံၚ်ဗ္ရ စှ်ဨက မွဲသၞာံမှ ဂွံသြောံပန်ကၠံ။ သွံထောံဖအိုတ်ဂွံ သြန် (၄၀)ကိုဋ်။ ဒးကၠောန်ဗ္ရစရိတ်အိုတ်ဂှ် တၟော်မွဲဨကမ္ဂး ၜါကိုဋ်မ္ဂး မွဲသၞာံသှ်ေ (၂၀)။ စနူသၞာံ ၂၀၁၀ စဵုစိုပ်တ္ရဲဏံဂှ် ၂၀၂၀ သြောံဒှ်စၟဂၠိုၚ်ကၠုၚ် ဂွံဆဵုကေတ်ကၠုၚ်နကဵုမတ်ရ။ ကိုပ်ကၠာတေံ မၞိဟ်ဒးရပ်ဂဥုဲဂစိုတ်စၟ ဂှ်အောန်မံၚ်တုဲ စိုပ်အခိၚ်တ္ရဲဏံ ဝါဟွံဒးရပ်ဂဥုဲဂစိုတ်စၟဂှ် ဟၟဲဒှ်ကၠုၚ်ဂွံဆဵုကေတ်ရ။ ရဲသၟာကၠောန်ဝါကဵု ဌာနဝန်ဇၞော်တဵုလွီတံဂှ် ညံၚ်ကဵုညးတၞဟ်ဒှ်မံၚ်သၞတံ တၚ်ခက်ခုဲ ရဲသၟာဗ္ရတံဂှ် ညးမွဲလေဝ် ဟွံသ္ပကာ၊ ဗီုညးညးကၠောန် မံၚ်တုဲ သၞာံလံကၠုၚ်ညိဂှ် ရဲသၟာဗ္ရတံလေဝ် အတိုၚ်မိမ တမ်မၠာတံကၠောန်မံၚ်ဂှ်ဟေၚ်ဆက်ကၠောန်ကၠုၚ်တုဲ နဲကဲတၟိလေဝ်ဟွံဂွံကၠုၚ်ရ။ စိုပ်ကဵု ပရေၚ်တဵုလွီတုဲ ဗဟုသုတသဝ် ညးထ္ၜလ္ပာ်လေဝ်ဟၟဲအိုတ်ရ။
စိုပ်ကၠုၚ်အခိၚ်အခါတ္ရဲဏံ တိဗ္ရကၠံသွဝ်ညးတံဂှ် ဟွံမိက်ကၠောန်တုဲထောံလဝ်အတိုၚ်ဏံဂၠိုၚ်ကၠုၚ် သိုက်က်ရ။ သ္ရု ကၠုၚ်နူကဵု ဒေသညးတၞဟ်လုပ်ကၠုၚ်ဍုၚ်မန်ပိုယ် အရိုဟ်ဟ်၊ ဂၠိုၚ်တိုန်ဇၟာပ်ပ်သၞာံရ။ တွဵုရးဒေသမန်ပိုယ်ဂှ် အခိၚ်ကၠာတေံ ၜိုန်ရဒှ်မံၚ် ဒေသထၟာဲပုၚ်ညးဍုၚ်ကွာန်တံလေဝ် အခိၚ်တ္ရဲဏံဂှ် ညးတၞဟ် ဒးကလေၚ်ပလံၚ်မံၚ် သ္ရုပၠန်ယျ။ ဂၠိက်ပလောံမန်ပိုယ် ခၞံဗဒှ်လဝ် သ္ပစၞးကဵု ဝါဗ္ရ ဒှ်သက်သဳသာဓက မန်ပိုယ်ကီုလေဝ် မုစိသၞာံပၠန် ကမၠောန်ဏံ ဆက်သှ်ေမာန်ပၠန်ရော? ကသပ်ဒှ်တိုန်ရ။
သွက်သၟတ်သၟာကၠောန်ဗ္ရမွဲ ဂွံအာတ်သၟတ်ဝုတ်ကညာမန်မွဲမာန်မ္ဂး ဒးကၠောန်ကမၠောန်ပွိုၚ်စှ်သၞာံမှ ဒှ်မာန်ရ။ သၟတ်ဝုတ် ကညာဝုတ်မန်တံရော ပွိုၚ်စှ်သၞာံ ဝုတ်လဵုမွဲမၚ်မာန်ရော။
မၞိက်ရတ်
၉၊ ၁၀၊ ၂၀၂၁