ရတနတ္တယပဏာမ-ကေုာံ-ပတ္တနာ
ရတနတ္တယပဏာမ-ကေုာံ-ပတ္တနာ
နမောတဿ၊ ပဏာမလိက်ပတ်။ ဗုဒ္ဓဓမ္မ၊ သီုသဳဃံရတ်။ အဲဍိက်ရှ်ေသှ်ေ၊ ဖျေံက္ဍိုပ်သ္ပဝတ်။ ဣန်ဗြီုယီုမာ၊ဒေဝါပြကတ်။ နွံဂၠိုၚ်ပြးဇး၊ဂးဗးဟုဝတ်။မိကဵုမၜါ၊ အ္စာဇၞော်သွတ်။ကဝိပန်ဌာန်၊ ဥာဏ်ညံၚ်သၞာ်ရတ်။ ဂုဏ်ညးတအ်ဂှ်၊ဒှ်ဗဇ္ဇဗတ်။ အတိက်လေဝ်ကီု၊သီုအနာဂတ်။အဲဍိက်သ္ပဝတ်၊ပ္ဍဲပစ္စုပ္ပန်။
ဖျေံက္ဍိုပ်စိန်ဝုန်၊ ယိုက်လဝ်ဂုဏ်ပၠန်။ ဖိုလ်အဲရဴဂဴ၊ဇဴထပှ်တန်။ကမ္မကဵုစိ၊ ပိစှော်ၜါပၠန်။ ဝေဒနာတုန်၊ ၜါဣသုန်ဗ္ဂန်။ ပရိုက်ဥပဒြဴ၊ စှ်တြဴတန်။ အန္တရာယ်စှ်၊ ဒဏ်စှ်မွဲဒွန်။အိုတ်ကပ်ပိကီု၊ သီုဝဲမသုန်တန်။ဂြိုဟ်ပါပပၠန်၊ သီုဒဏ်အန္တရာယ်။
အိုတ်သီုယဲဗော်၊ ကလော်တာဲဗြဲ။ ဗၟုဲဘုတ်ပြိုတ်၊အိုတ်သီုသရာဲ။ ပရိစ္ဆေဒ၊ ဘဝဇၟာပ်ဒၞဲါ။သၞနိမိတ်သၞဲ၊ ကဵုဍေံသ္ၚောဲသာဲ။ သၟိၚ်ဍာ်ပၟတ်၊ ကမၠက်စိုတ်စၞာဲ။ ကဵုဍေံပြးဆာဲ ပဲါဒဴအာညိ။
ယိုက်ဂုဏ်တုဲပၠန်၊ ဆန်ဗ္ဒက်လိက်စိ။ ညးမဒှ်ကၠာ၊အ္စာကဝိ။ တံၚ်ပိုအ်ရးဇြာ၊ ကွာန်ဂှ်ဇာတိ။ အဲမာံတောအ်ကၠာ၊အ္စာကဝိ။ဥာဏ်ဒှ်မြမောဝ် လ္ၚောဝ်ရးမန်ပိ။ အာယုဒဳဃ၊လာဘသုခိ။လာပ်ကဵုစိုပ်ကၠုၚ်၊ ညံၚ်နုၚ်နိဓိ။အာယုက်ကဵုဂၠိၚ်၊ညံၚ်သၟိၚ်နေမိ။ ဂွံဒှ်မြမောဝ်၊ဒေါဝ်ရးမန်ပိ။ဝၚ်တြေံတြဟ်၊ဆန်ဗ္ဒက်တၟိ။ ဂကူမန်ကၠာ၊ဂွံတီအာညိ။ ဗၟာယုတ်ပျဲလဝ်၊ညံၚ်ကဝ်အဂ္ဂိ။တူဂြောတ်ဂဵုဒၟံၚ်၊ညံၚ်ရဴပ္တေၚ်ဂျိ။သွက်မန်ဂွံတီ၊တၞီမံၚ်ဒမၠိ။တီတုဲသတိုက်၊ စွံစိုတ်ကဵုဂိ။ ညံၚ်ဂွံချပ်မာန်၊ဂစာန်တိုန်ညိ။ညးအဲလ္ပဝိုတ်၊ ဂိုတ်ကဵုဗိုန်ဂၠိ။မန်ပိုယ်ဗၠိုက်မံၚ်၊ဘိုၚ်ဟံၚ်အိုတ်ညိ။ယဝ်ဟံၚ်ဂွံကၠာ၊ လာဘသုခိ။ လာပ်ဂွံစိုပ်ကၠုၚ်၊ညံၚ်နုၚ်နိဓိ။ အာယုက်ဂွံဂၠိၚ်၊ ညံၚ်သၟိၚ်နေမိ။ဇဲယသိဒ္ဓိ၊ကဵုဒှ်ညိမန်။
မၞိဟ်ဒေဝတဴ၊ ကလောသ္ၚောဲညန်။တၞောဝ်ဂကူစိဇာတိပိုယ်မန်။တဆိပ်ၜိုပ်ကၠာ၊ဟံသာထဝ်သောန်။ရာဇာဝၚ်တၞမ်၊ တမၠာလအ်လောန်။ နူသၟိၚ်ပိုယ်မန်၊ စှ်ေနူနန်ထဝ်။
ဍုၚ်ဟံသာဟေၚ်၊ ညးတၟေၚ်ဂွံလဝ်။ ၜိုပ်ကျအာမြာ်၊သြိုဟ်ပါ်သၞေၚ်ထဝ်။ပြာသာဒ်ရတ်ထ္ၜိုၚ်၊ က္ဍိုၚ်ဗ္တာၚ်နန်ထဝ်။ဘုတ်ဘာသီုသ္ၚိ၊ တိဍာ်ကၠအ်သွဝ်။ဍုၚ်ဗဂေါကၠာ၊ တၟာမဗ္ဒဝ်။ဟွံသှ်ေလေၚ်အိုတ်၊ ဟိုတ်ဝဲတမ်ကဝ်။ သာ်ဝွံဆတ္တဝ်၊ ပြာကတ်လဝ်ရောၚ်။
သမ္ပတီယောၚ်၊ မွဲတောၚ်ချူဇန်။ နူရာဇာဝၚ်၊ ရံၚ်ကေတ်နၚ်ဂြန်။ ပ္ဍဲဇာတာထဝ်၊ သ္ပလဝ်ကိုန်ခန်။သ္ၚဳဂၠိပ်တုဲပၠန်၊ဆန်ဗ္ဒဟ်မၚ်ဇေန်။
ဘာသာမန်အဴ၊ ကြဴဂွံဆက်ဆေန်။ ကလောမိတ်စှ်၊တုဲဂွံဗှ်ပ္ဍေန်။သ္ပလိက်မၚ်ဇေန်၊ မာံတောအ်ဟေန်ဆာဲ။
ဍုၚ်ဗဂေါလီု၊ ဗီုကဝ်တူပြာဲ။ ဒဒိုက်ပိုယ်မန်၊ ကောန်ယာံကဵုယာဲ။ မိယာံကဵုကောန် အောန်စိုတ်ဇၟာပ်ဒၞဲါ။ဝုတ်ယာံကဵုဗၠာဲ၊ ဆာန်တုဲသာဲအာ။
တၞောဝ်ရာဇာဝၚ်၊ အိုတ်လၚ်ဂတာ။ ဂကူမည၊ ဝံသပိုယ်ကၠာ။ ဒှ်ဍိက်ဗၟာရ၊ သဗ္ဗကေၚ်ကာ။ပိုယ်ဒးဒှ်လၞီ၊ ကြအ်ဆီသိၚ်သာ။အတိက်တမၠာ၊ နူကၠာတေံဂှ်။
ဒဒိုက်ပိုယ်မန်၊ဇၞော်လောန်သ္ကာတ်မြဟ်။ ဒးချိုတ်ဘဲပၟတ်၊ တူဂြောတ်ဟေၚ်ဟဟ်။လေၚ်သီုဒြပ်ရတ်၊ပိဋကတ်သၟဟ်။ လေၚ်ဘုတ်လေၚ်ဘာ၊ လေၚ်ဝါတိရှ်။ လေၚ်ဍုၚ်လေၚ်ကွာန်၊ လေၚ်ဌာန်ဒိုဟ်စှ်။ လေၚ်သၟိၚ်နာဲတၠ၊ လေၚ်မသထပှ်။ပိုယ်လဴခၠေဝ်သှ်၊ ဂတှ်ဝိပက်။
ဂွံတီညာတ်ရ၊ ဂတမွဲအဆက်။ ဒှ်စိတ္တဥာဏ်၊ ဂလာန်ဒှ်ကြက်။ ကောန်ဇာတ်ဗွဲကြဴ၊ စဴစေက်သှ်ေၜက်။ ဂွံတီညးအဲ၊မွဲၜါအဆက်။လိက်နွံဂွံဗှ်၊ မန်စှ်ကိုဋ်ဠက်။ဝၚ်မန်ပိုယ်ဟေၚ်၊ ဗီုတၟေၚ်ဒးကၠက်။ဗၟာသတ်အဟိုတ်၊ ဂစိုတ်မန်ညံၚ်ကၠက်။သ္ပလဝ်ရိုဟ်ကၞက်၊ ဨကဂ္ဂတာ။
ရာဇဝၚ်ရ၊ နူသၠပတ်ကၠာ။ သ္ပမၚ်ဇေန်ပ္ညုၚ်၊ဍုၚ်မန်ဟံသာ။ အဲချူဆန်ဗ္ဒဟ်၊ ဂွံဗှ်သေၚ်ဟာ။ ဝၚ်ပိုယ်ဖအိုတ်၊ ပၠောပ်စိုတ်လောဲသွာ။ ချူကှ်ေပိုဒ်ဗျဥ်၊ ဆန္ဒလကႅာ။ဗီုပိုယ်ဒှ်ကၠုၚ်၊ ဍုၚ်မန်ဟံသာ။ သ္ဂောံစေန်ဆက်အာ၊ ပြာကတ်လဝ်ရောၚ်။
မၞးတအ်ကလၚ်၊ ပၚ်မှိၚ်မွဲတောၚ်။ထံၚ်လဝ်သောတ၊စိုတ်ပကဵုယောၚ်။မညာဘာသာ၊ မေတ္တာအခေါၚ်။ ဆာန်ဂကူရောၚ်၊ ဟီုလဴသောၚ်ထ္ၜး။
ဟိုဲတၞောဝ်မည၊ဝံသဗော်သွး။ဂကူပိုယ်ကၠာ၊ ညဳသာသၟဟ်တး။ ဟွံဒးလီုလာ်၊ ဟွံပါ်ဒကး၊ဍိက်ကဵုတၠနာဲ၊ ဟွံဒးသာဲပြး။ ပၚ်မှိၚ်ညိဏး၊ ယွံကွးဘာမန်။
အတိက်တေံကၠာ၊တမၠာလအ်လောန်။ ဟံသာဝတဳ၊ဍုၚ်ကျာ်သြဳမန်၊ သၟိၚ်ဨကရာဇ်၊သီုအမာတ်ဝန်။မၞိဟ်မွဲဍုၚ်ကွာန်၊ ဇၟာပ်ဌာန်သ္ၚောဲညောန်။ သ္ကိုပ်ပၞာန်ဂှ်၊ ဟိုတ်ဟွံသၟဟ်သၟန်။ညိရောဒးဗီု၊ ဒးလီုလ္ၚုလ္ၚန်။ဟံသာဍုၚ်မန်၊ နန်ထဝ်က္ဍိုၚ်ဗ္တာၚ်။
ဒးထောံကၠေံသ္ကဲ၊ လုပ်တဲညးသ္အာၚ်။ သၟိၚ်ဒဴဗညာ၊ ရာဇာတြုံသာၚ်။ က္တဴက္တာန်မံၚ်၊ ညံၚ်ၜိုဟ်ကဵုကၠာၚ်။ ဒးထောံကၠေံဂအာၚ်၊ ကၟာၚ်ဍုၚ်ဒေါဝ်ဝါ။
ဂၠုက်ရာပ်ဂၠုက်အုပ်၊ ဒဴလုပ်ဒျူဒျာ။ ဍိုက်ဂွံဂၠုၚ်က္ၜၚ်၊လှၚ်ဒေါဝ်ဂဂႅါ၊ သၟိၚ်ဨကရာဇ်၊အမာတ်ဒဴဗညာ။ဝံသဒတောဝ်၊တၞောဝ်မန်ရာဇာ။ဖေက်အဲအနိုၚ်၊ ဝၚ်သၟိၚ်ယုတ်ဗၟာ။မန်ပိုယ်ဒဴပၞာန်၊ ထောံကွာန်ဂွံဝါ။ ဂြိပ်ဒဴထောံဗၟာ၊ ပ္ၚောံဒျူဒျာရောၚ်။
သာ်ဝွံမွဲတောၚ်၊ ဟွံယောၚ်ဒှ်ဍာံ။ ဍုၚ်ဗဂေါဝွံ၊ လ္ၚုလုံဒိုဟ်ဒ္စံါ။ တၞောဝ်ပိုယ်မည၊ ညံၚ်ကဒဴကျာံ။ သ္ပကာဝရာံ၊
သၞာံဂှ်လ္အိတ်။
ကၞိရောၚ်ဒးဘဲ၊ ဗ္ဂဲရပ်ကိတ်။ သက္ကရာဇ်ဍုၚ်၊ ကၠုၚ်စိုပ်လ္အိတ်။ လ္ၚီကၠံဟီုတွံ၊ ကဵုစှ်ဒ္စိတ် (၁၁၁၉)။ မန်ကျအာဗၟာ၊ ရာဇာတၞောဝ်သိဒ်။ တၞောဝ်မညပြဲ၊
စိုပ်ဘဲဍာ်ဒ္စိတ်။ ပ္ဍဲဇမ္ဗုဒိပ်၊ဂြိပ်ဒဴဗၟာၚိတ်။ တိုန်ဒဵုကၠဆာ်၊ စှ်ေဍာ်ကျာံကိတ်။ ညံၚ်သာ်ဂှ်ကၠာ၊ ဥပၟာလ္အိတ်။ ညံၚ်သာ်ဂှ်လေဝ်၊ သရေနိမိတ်။ မန်ဒးထောံဍုၚ်၊ သုၚ်ဝိပရိတ်။ ဆၚ်ဒဴနူနန်၊ ယောန်အာဟိတ်ဟိတ်။လုပ်အာဂြိုပ်ဂၞိၚ်၊ ကြာကၠစိၚ်သိတ်။ ဂၠိုၚ်ကဵုဝိဝဲ၊ ဂၠိုၚ်ဘဲလ္အိတ်။ဒးအေၚ်ပုၚ်ဍာ်၊ ကွာ်အာမံၚ်ဍိတ်။ဒဒိုက်စိုပ်သိဒ်၊ လ္အိတ်ပိုတ်သ္ကုတ်။
ဍုၚ်ဟံသာရော၊ ဗဂေါညးခုတ်။ လုပ်စိုပ်တဲဗၟာ၊ ရာဇာအယုတ်။ ဂးအံၚ်ဇေယျ၊ စိုတ်ညံၚ်ကၠဂြုတ်။တၞောဝ်ၜိုပ်ထဝ်ကွေံ၊ ဍေံရပ်ပရှ်ဍုတ်။ ဂၠာဲဒုဟ်ဂၠိုၚ်နဲ၊ ဂၠာဲစောဲဂဗုတ်။လဟုက်ထေဲထုတ်၊ စုတ်ဒုဟ်ကဵုမန်။
သၟိၚ်ဗၟာယုတ်လေဝ်၊ ဨကရာဇ်ဝန်။ညံၚ်ကလော်ကြုက်၊မုက်ညုဓညောန်။ ဍေံဂွံအဝဵု၊ ဍဵုဍိုက်ပျဲလောန်။ ခမဳသၚ်မန်၊ကြပ်ညောန်သ္ၚောဲသာဲ။
ကဵုကော်နၚ်ကၠာ၊ ဗၠးဏာသရာဲ။ ကၠုၚ်စိုပ်ဆတ္တဝ်၊ပ္တောံလဝ်မွဲဒၞဲါ။ညာတ်ဒှ်ဒေါသ၊ ညံၚ်ကၠရပ်သ္ၚာဲ။ ဟၟဲမေတ္တာ၊အာဏာလောန်ကာဲ။ မုက်အံၚ်ဇေယျ၊ ဒေါသဗ္တေတ်ဍာဲ။မၚ်မွဲဓုတၚ်၊ သၚ်ခမဳဗၠာဲ။ ဒးအလီရ၊ ဗၟာသ္ပပြယာဲ။ ဗၟာယုတ်စိုတ်စၞာဲ၊ ဥပါယ်အဟိုတ်။
ကေတ်စိၚ်ဒြၚ်ဗိုန်၊ ကဵုလိုန်ဂစိုတ်။ နကဵုလွဟ်ပၠန်၊ ပန်ဗာ်ဖအိုတ်။ ဒးဒုၚ်ပယျဲ၊ ဘဲကမ်ဒးချိုတ်။ ဗုၚ်လိုက်ကအ်ပိုတ်၊ ချိုတ်ၜိၚ်မံၚ်ဆီ။
ကွးသၚ်အရဳ၊ခမဳမန်ပိလ္ၚီ (၃၀၀၀)။ စုတိစဴသွဝ်၊ သီုဓဝ်လၞီ။ဒးဒုၚ်ကၠုၚ်ပၠန်၊ ဘဲဒဏ်ကၠံလ္ၚီ။ သာ်ဝွံခပ်သီ၊ သမ္တီလဝ်ညိ။
ဣတ္တဳဗြဴမန်၊ သီုဂဝ်သန္ဓိ။ပ္ဍဲဗော်ရာဇာ၊ ဗၟာယုတ်ဒိဋ္ဌိ။ပန်ဗာ်ထပက်၊ ၜုၚ်တက်ကဵုရိ။ ညာတ်ဒှ်ဗဟေက်၊ ဖေက်ဖေက်ဂိဂိ။ လရိုအ်ယာံဟာဲ၊ ဗက်ဂၠာဲကော်မိ။ ပၞာန်ဗၟာတဲဂံၚ်၊ ညံၚ်နာ်သတ်ဂျိ။ ညးဒၞဲါဟွံမွဲ၊ ဂၠိုၚ်နဲလက်ဗျိ။ စိုတ်ယုတ်လောန်ကာဲ၊ဟာဲသတ်ရိုၚ်ရိ။ ဗြဴသီုသန္ဓိ၊ အိုတ်ဇဳဝိတ။
မၞိဟ်ထပှ်လ္ၚီ၊ တီကၠးဍာံပြ။ (၇၀၀၀) ဂကူပိုဲကၠာ၊ဘာသာမည။ အဆက်သၟိၚ်ပိုတ်၊ အိုတ်တၞောဝ်ဝံသ။ ညံၚ်ဂွံကၠက်အာ၊ ဘာသာပိုယ်ပၠ။ ဗၟာယုတ်စိုတ်စၞာဲ၊ ဍေံဗက်ဂၠာဲသၞ။ကောန်ၚာ်တြုံရ၊ သ္ပမံၚ်ကွးဘာ။
ဍေံဒဳနၚ်သ္ကဲ၊ ညံၚ်ဂၠဴပ္ဍဲဝါ။ ဗာ်ထပက်ပန်၊ ပ္ကီုဒဏ်နာနာ။ဆီဇွောဝ်ဒှ်ဍာ်၊ ကောန်ၚာ်ကွးဘာ။ဗုၚ်လိုက်ကအ်ပိုတ်၊ ချိုတ်ထပ်လောတ်လ္ၚာ။ ပဲါရောဟွံဗၠး၊ ဒးဘဲလွဟ်ဗၟာ။ ဗာ်ထပက်ပန်၊ကဵုဒဏ်နာနာ။အသမ်ရာဇာ၊ ဗၟာသတ်အလီ။
ဂစိုတ်ထောံပၠန်၊ သၟတ်မန်မသုန်လ္ၚီ။ (၅၀၀၀) ဒးဘဲလမျီု၊ ဗီုစိၚ်မံၚ်ဆီ။ ဒဒိုက်ဠက်ဆ၊ ဟွံကကၠံလ္ၚီ။ ဟိုတ်နူဗၟာ၊ကွးဘာဒှ်လၞီ။ လိက်နွံဂွံတီ၊ သီပရူဒဒှ်။
ဆဏအ်ရောသေၚ်၊ တၟေၚ်တိုန်နူဂှ်။ကောန်ၚာ်သၟတ်မန်၊ ဒှ်မံၚ်ကောန်တှ်။ အံၚ်ၚေဝ်လရိုအ်၊ ဂွံဆဗက်ဂြဟ်။ မွဲသာ်ရောကၠိုဟ်၊ဂၠုက်သြိုဟ်မဴတှ်။သၟတ်မန်တြဴလ္ၚီ (၆၀၀၀)၊ ဗက်သီကေတ်ပြဟ်။ ပ္ကောံလဝ်တုဲပၠန်၊ ဟွံတန်ချပ်ဗှ်။ ဂစိုတ်ထောံသၟဟ်၊ ကဵုလွဟ်မၞုဟ်ဇြၚ်။
သုသာန်ကောန်ၚာ်၊ဆီဒှ်ဍာ်ဝၚ်။ ဇွမန်ပြးမံၚ်၊ တုပ်ညံၚ်သွးဂၚ်။ ဂၠိုၚ်ကဵုဠက်ကိုဋ်၊ ချိုတ်မွဲသဘၚ်။ ဂးအံၚ်ဇေယျ၊သၟိၚ်တၠမၞုဟ်ဇြၚ်။ ဓဇန်လောန်ကာဲ၊ ဂၠာဲကော်ပ္ကောံနၚ်။ ဗၟာသတ်အယုတ်၊ ကုတ်ထောံဂၠိုၚ်ဂၠၚ်။ ကောန်တှ်ကောန်သၟတ်၊ လောတ်လောချိုတ်လၞၚ်။ ဆီဒှ်ၜဳဂၚ်၊ ဘိၚ်ဘၚ်လောန်ကၠာ။
ဂကူပိုယ်မန်၊တၟေၚ်ဂၞန်သၚ်္ချာ။ အဃောဂှ်ရ၊ ဆမန်ချိုတ်အာ။ ပ္ဍဲဍုၚ်ဟံသာ၊ ၜါဠက်မွဲလ္ၚီ။ (၂၁၀၀၀) ရာဇဝၚ်ထၟိက်၊ လိက်နွံဂွံတီ။ ဆဗၞတ်ဂှ်ဟေၚ်၊ တုဲဟွံသေၚ်ဏီ။ ဗၟာဗက်ဂစိုတ်၊ဠက်ကိုဋ်ကၠံလ္ၚီ။ အလုံဍုၚ်မွဲ၊ ရိုဟ်တ္ၚဲဗက်လီ။ အသမ်တၠနာဲ၊ ဗက်ဂၠာဲဗက်သီ။ မန်ပိုယ်ကြအ်ဆီ၊ ဆဵုလၞီဇၞော်။
မညဘာသာ၊ နွံကြာဂရော်။ ဇၟာပ်ဒိုဟ်သတိုတ်၊ ပလိုတ်ဗၟံက်။ ဒိုဟ်ဥတ္တရ၊ဒက္ခိဏဗော်။ ပ္ဍဲဒိုဟ်ပန်ဟာန်၊ဒ္စံါဌာန်ညးကော်။ ဍေံဗက်ဂၠာဲအာ၊ ကြာဒဵုဂရော်။ ဒဴလေဝ်ဟွံဗၠး၊ဒးစိုပ်ဘဲဇၞော်။ဆမန်နွံကၠာ၊ ဍေံအာဗက်ကော်။ ဍေံရပ်နၚ်တုဲ၊ဟွံရုဲဍောတ်ဇၞော်။ တြုံဗြဴဝုတ်ဗၠာဲ၊ သီုကၟာဲဍေံကော်။ဒိုက်သိုက်ဟွံရော်၊ ဍေံကော်ဖအိုတ်။
တၟော်မၞိဟ်ရောတီ၊ ကၠံလ္ၚီဠက်ကိုဋ်။အံၚ်ဇေယျဝွံ၊သၟိၚ်ဒုစရိုတ်။မောဟဒွိဟိုတ်၊ စိုတ်ညံၚ်ဂျိနာဲ။
အိုတ်ဂကူမန်၊ ၝောံမၞိဟ်ကောန်ၚာ်။ အကြာဍုၚ်ကွာန်၊ဌာန်ၜဳပ္ဍဲဍာ်။ဍေံဗက်သ္ၚဳဂၠာဲ၊ ဇၟာပ်တာဲဇၟာပ်ရာ်။ ပ္ဍဲသ္ၚိဂြိုပ်ဝါ၊ဘုတ်ဘာသီုကျာ်။ ဆနွံဗက်ဂၠာဲ၊ ဒၞာဲဂၠိုၚ်ဇဳသာ်။ဗၟာမၞိဟ်အရိုၚ်၊ဒှ်သၟိၚ်ပိုၚ်သၞာ်။ ဒဳပ္ကောံနၚ်မန်၊လက်ဒေါန်သ္အဵုသ္အာ်။ စိုတ်ဍေံမ္ၚိုဟ်ကြံၚ်၊ တုပ်ညံၚ်ဂျိနာ်။ ပါၚ်စက်လ္တာ်၊ ကွာ်လဇုဲဗာ်ထောံ။
မန်ဖေက်ဍေံစိ၊ စိုတ်ညံၚ်တိကလောံ။ ညံၚ်ဂၠဴသ္ကအ်ရ၊ဖေက်ကၠကွေံသွံ။ဇၟာပ်ဒိုဟ်ဇဳကၠောံ၊ ဍောတ်ဇၞော်ကြောံဇြာဲ။
မဂဳလထဴ၊ နှဴသီုကၟာဲကၟာဲ။ ကောန်ၚာ်ညးခုတ်၊ ဝုတ်ဝုတ်ဗၠာဲဗၠာဲ။ ကောန်ဍောတ်ဂွံဆဵု၊ လ္ၚဵုမဴတှ်ယာဲ။ ဗျုဗျုဗျဗျ၊မိမနော်နာဲ။ တဲရပ်ဂစုန်၊ ရုန်ရုန်ဂဲါဂဲါ။ သၠုၚ်သဝ်ဂၠိုၚ်စွံ၊ ကြောံကြောံဇြာဲဇြာဲ။ ပၞာန်ဗၟာဒဳနၚ်၊ ဒေါသလၚ်ဍာဲ။ ထေဲပၞောတ်လောန်ကာဲ၊ အသမ်နာဲစာ။
မုက်မတ်ကှ်ဇြ၊ ဘယလောန်အာ။ ဖေက်ဟွံဂံၚ်ကျောဝ်၊ လၚ်ဇွောဝ်ပူဆာ။ ဒးယာံဓဇူ၊ ဗ္ဂူဗြဲမတ်ၜါ။ ဂၠိုၚ်ဘဲပရိုက်၊ ဂၠိုၚ်ဒဒိုက်သၞာ။ဒးယာံရၚ်သ္ကအ်၊ ပ္ဍဲဒၞာဲဏအ်ကၠာ။ယာံရေဝ်ကရောတ်၊ ဂစောတ်သာသာ။ ဗၟာဒဳပ္ကောံနၚ်၊ရပ်ဇြဲတဲၜါ။အသမ်သၟိၚ်ကၠာ၊ ယာံဗက်အာဍေံ။
လရိုအ်သေဲသေဲ၊ ကရေဲညံၚ်ချေံ။ ဗၟာယုတ်မိစ္ဆာ၊ ရပ်ဏာတုဲကွေံ။ ညံၚ်ညးဗက်ချေံ၊ ဍေံဒဳပၠောပ်စာတ်။
ပိုယ်မန်တမၠာ၊ ဍုၚ်ဟံသာကၞာတ်။ ကိုဋ်ဠက်ကၠံလ္ၚီ၊ ဟွံတီလောဲဝါတ်။ပါၚ်ဟီုတဲချဳ၊ ဍေံဒဳပၠောပ်စာတ်။ ၜုၚ်တက်ဒှ်တမ်၊ အသမ်လေဝ်သ္ကာတ်။ မန်သီုဖအိုတ်၊ လၞီစိုတ်ဂွံညာတ်။မွဲစာတ်ပေၚ်ထာတ်၊ ပ္ဍဲစာတ်က္ဍန်ဂြက်။
ဒှ်လၞီသောက၊ မောဟညံၚ်ယက်။လရိုအ်ယာံဒၟံၚ်၊ ညံၚ်ဍုၚ်နရက်။ဍိက်ရာဇဝတ်၊ ကြမ်ကြထတ်မြက်။ ဍေံမိၚ်စုတ်ဗက်၊ လက်ဗျိပၠုက်မန်။
ဂကူပိုယ်ကွေံ၊ မိၚ်ဍေံဗျိဒေါန်။ သြိုဟ်ညံၚ်ကဵုဖဲါ၊ ယာဲယာံကဵုကောန်။ ဒဒိုက်ကၠံလ္ၚီ၊ ဒှ်လၞီဂၠိုၚ်လောန်။ ကြိုၚ်လဝ်ပ္ဍဲစာတ်၊ ကၟာတ်လဝ်ကၟောန်ကၟောန်။ ဗၟာသတ်အယုတ်၊ စိုတ်အုတ်လက်ဒေါန်။ ဒေါသဂဵုမံၚ်၊ ညံၚ်ကၠကဟောန်။ ဂကူပိုယ်လေၚ်၊ ပၠေၚ်ထောံရောအောန်။လၞီဂၠိုၚ်လောန်၊ကောန်ကဵုမိမ။
သမ္ဘာယာံအဵု၊ ကဵုတၠသ္ၚိပၠ။ ဗြဲမတ်ၜါပြိုဟ်၊ ဂတီုသြိုဟ်ရ။ တြုံတၠသ္ၚိကၠာ၊ သာမိဘာဂ။ ညာတ်မိတ်ဘမ္ဘာ၊ ဖေက်ဘဲရာဇ။ ဍာ်ရမတ်ဍုက်၊ မုက်ညံၚ်ပ္ကဴဇြ။
သောကစံၚ်ပၠေၚ်၊ပေၚ်ဟဒယ။ပ္ဍဲကဵုသ္ၚိစာတ်၊ ပါတ်လုံခန္ဓ။ လၞီဇၞော်ဂိ၊ စိုတ်ဂျိနာဂ။ညးဒှ်ဗဴလ၊ ဇုဇသဳမူ။
ဆဵုညာတ်စဴကၟိန်၊ ယွာံဟွံတီဇၞူ။ ဍာ်ရမတ်ပြဟ်၊ ထၞဟ်စှ်ေဓဇူ။ အလုံစာတ်အဵု၊ ပၟတ်ဂဵုဝူဝူ။ညံၚ်ဂိတုဘတ်၊ ကျာထတ်ဗြဲဂူ။ လၞီဇၞော်ဂၠိၚ်သ္ၚောဲ၊ ဟွံမွဲကဵုဇၞူ။ဒးယာံဓဇူ၊ ဆာန်ဍူကောန်စဴ။
သဳမူကဵုကၟိန်၊ ယာံထဂၠိန်နှဲ။ ညာတ်မံၚ်ပ္ဍဲစာတ်၊ကအ်အာတ်ပါၚ်ဠဴ။ ယာံမံၚ်သေဲသေဲ၊ ကမြေဲကမြဲ။ ဒုၚ်ဂုဏ်ဟွံဂွံ၊လရိုအ်အာတ်စဴ။ ဗၟာယုတ်ဒိုဟ်ဂွိုက်၊ ဍဵုဍိုက်ဗွဲကြဴ။ပၟတ်ဂဵုဗြံၚ်ဗြံၚ်၊ စံၚ်စာတ်ဖအဴ။ဗြဴမိတၠကောန်၊မိန်လဝ်ကောန်ဂၞဴ။မိန်ဗၟဴဖျုၚ်တှ်၊ ပါၚ်ဂှ်ယာံတဴ။ကောန်ဍောတ်ဟွံတီ၊ အီကဵုမိဂၞဴ၊မိညာတ်ဒးဗက်၊ သြိုဟ်ဂြက်ကွေံအဴ။ကောန်ဍောတ်ဂှ်မိန်၊ကောန်ဇၞော်ဂၠိန်နှဴ။ ကောန်ဇၞော်ဂှ်ယာံ၊ မိလေဝ်ယာံတဴ။တြုံကဵုသမ္ဘာ၊ ယာမုက်ဗွဲကြဴ။ဂၠိုၚ်ကဵုယွာံ၊ ဒေံယာံကဵုကော။ကၟိန်ကဵုနာဲတြ၊ ဗဴကဵုလထဴ။ၝဲယာံကဵုဒေံ၊ ကာယပၠောတ်ပၠဴ။ ထုဲၜန်မံၚ်ပၠန်၊ ညံၚ်ချံက်စန်နှဴ။ညံၚ်ၚဴတမ်သၞာံ၊ ယာံမံၚ်ရေဲရဴ၊ညံၚ်ဗရုဂဂဵု၊ဗြုသဓဵုတဴ။ဇၟာပ်ဒိုဟ်ရော၊ယာံတဴဖဳဒွါ။
ပိုယ်မန်ဗျုဇၞော်၊လုပ်ဗော်ဇရာ။ ဂွိၚ်ဖေက်တၠိၚ်ဒိုဟ်ရိုဟ်ရေၚ်နာနာ။ ဟိုဲလေဝ်ဣတ၊ လေၚ်ရမွဲဝါ။ပိုယ်ကၠက်ဂကူ၊ဂုဏ်နူသၟိၚ်ဗၟာ။ ပိုယ်ဒးဒုၚ်ပၠန်၊ ဘဲဒဏ်နာနာ၊ စံၚ်ဂစိုတ်ပြဟ်၊ဒှ်သၠာတ်ပ္ဍဲဝါ။ ပ္ဍဲကဵုစာတ်ဗၟာ၊ ဘဲရာဇာအနိုၚ်။
မန်ချိုတ်တူဂြောတ်၊ ပ္ဍဲပၟတ်စာတ်သၟိၚ်။ ဒးသ္ကန်ကလိ၊ စုတိသီုဂဝိၚ်။ ရမ္သာၚ်ထတ်ကၠာ၊ ယာံပြာကတ်ပၟိၚ်။ ဗၟာယုတ်ပၟၚ်ထံၚ်၊ မၚ်မံၚ်စာတ်သၟိၚ်။ တြုံဗြဴဗျုထဴ၊ ယာံတဴမံၚ်ဗျိၚ်။ကၠာဍေံဟွံစံၚ်၊ ပၟၚ်ထံၚ်ဂွံမိၚ်။ ဒေါသဇၞော်တိုန်၊ မွဲချိုန်ဂွံမိၚ်။ဍေံဟွံချပ်ဗ္စာ၊ ကရုဏာသိၚ်။ အပိုၚ်အနိုၚ်၊ ဍေံဖျေံပၟိၚ်ဟေၚ်။
ဗၟာအံၚ်ဇေယျ၊ သ္ပပိုယ်ဗီုပြေၚ်။ ဍေံစက်ကဵုပသဲ၊ သ္ကဲပိုယ်ဗွဲလၟေၚ်။ဂကူဂွံယုတ်၊ ဍေံဂၠာဲစုတ်ပၠေၚ်။ပလီုကျာ်သြဳကၠာ၊ ဘာသာမန်ဟေၚ်။ တၞောဝ်ရာမည၊ဍေံကော်ဣတလေၚ်။ဇၟာပ်ဇၟပ်စာၚ်ဟေၚ်၊ကွာ်ရေၚ်ဗက်ဗဵု။
တက်တဲဂေတ်ရ၊ သ္ပဝေၚ်စရဵု။ ဣတလေၚ်ဣတလေၚ်၊ ပိုယ်ရပၠေၚ်ကဵု။ ဍေံဖအဴဂေတ်ကွေံ၊မ္ၚးစာတ်ဂှ်အဵု။မန်ဘဝဍိက်၊ ဒှ်ကၠိက်ဒှ်ကၠဵု။ကျညးမုက်ဍောတ်၊ညံၚ်ပ္ကေတ်ဒးခပဵု။ညံၚ်ဂၠုၚ်က္ၜၚ်ဗြမ်၊ ကမ်အကုသိုလ်။လၚ်ဇွောဝ်ကၠၚ်ပြဵု၊ ပ္ဍဲသ္ၚိစာတ်။
ဗၟာသတ်အဟိုတ်၊ စိုတ်ဍေံယုတ်သ္ကာတ်။ဍေံပြိုက်စုတ်ဂြုဲ၊ ဂဥုဲသေနာတ်။ရဲသၟိၚ်ရာဇာ၊ ဗၟာဗာဇ္ဇခါတ်။ဍေံစံၚ်ပၠေၚ်အဵု၊ ကဵုအဂ္ဂဓါတ်။ပၟတ်ဗ္ကေတ်ဂဵုဍာဲ၊ တူဂၠိုက်ဂၠာဲသ္ကာတ်။ကၠံလ္ၚီဠက်ကိုဋ်၊ ချိုတ်အိုတ်သီုစာတ်။ဗဂေါလ္ၚုလ္ၚုန်၊ ပိုယ်မန်ဂွံညာတ်။ လုံဍုၚ်ကွာန်ရး၊ ဒးဖေက်သမ္ၚာတ်။ ချိုတ်ဂုဏ်ပယျဲ၊ ပ္ဍဲစိုတ်ဒှ်ဝါတ်။ သီုဂကူလေၚ်၊ ဂြောတ်မံၚ်ပေၚ်စာတ်။ဖျုန်ဇုတ်စၞာံဂှ်၊ ဒှ်အာပ္တေၚ်ဓါတ်။ပိုယ်မန်ဂွံညာတ်၊သမ္ၚာတ်ကွေံဏး။
ပ္ဍဲဍုၚ်ဗဂေါ၊ အဃောဂှ်သၟး။ဒ္စိတ်စာတ်သွံ၊စံၚ်ထောံကၠးကၠး။ဍေံစံၚ်ပၠေၚ်မန်၊ အောန်စိုတ်ကွေံဏး။ ဗြဲမတ်စရိုဟ်၊တသိုက်တဟး။ ဆဝွံရောသေၚ်၊လ္ပထေၚ်မၞိဟ်သၟး။ ဗၟာစိုတ်ဟွံပြေ၊ အံၚ်ဇေယျဏး။ ပဲါနူမၞိဟ်ဟေၚ်၊ တၟေၚ်နူဂှ်မ္ဂး။ ကပေါတ်မန်ကွေံ၊ ဍေံဗက်ဂၠာဲသၟာန်။
အကြာၜဳကြုၚ်၊ အလုံဍုၚ်ကွာန်၊ ကၠအ်သွဝ်တိဗ္ၚ ဇွောံမမွဲဟာန်။ဘုတ်ဘာဒေါဝ်ဍုၚ်၊ဇြပ်ဇၞူရုၚ်ဒါန်။သိမ်ဥပုသ်ကၠာ၊ ရုၚ်ဖျာသ္ၚိဌာန်။သ္ၚိသွာၚ်ဒိုဟ်ပန်၊ ဒဒန်ဂၠံၚ်ဍာန်။ဆအပေါတ်မန်၊ ကၠောန်လဝ်ကွေံကြာန်။ ဂိုဟ်မံၚ်ဟာနာဲဍေံဟွံဂၠာဲသၟာန်။ ဗၟာယုတ်တအ်သွံ၊ စံၚ်ထောံကြာန်ကြာန်။နန်ထဝ်သ္ၚိကၠတ်၊ ဒြပ်ရတ်ပိုန်ဟာန်။ ဂၠိုၚ်လောန်သတိုတ်၊ရိုဟ်အိုတ်ဟွံမာန်။ တမ်ဂြန်ကိုန်ဆန်၊ အၚ်ယန်နွံဥာဏ်။
ဗေဒၚ်ပန်ဗော်၊ ဗိုတ်ဇၞော်ပကာန်။ ဓဝ်ပိဋကတ်၊ လိက်ပတ်ဇၟာပ်ဌာန်။ သိဒ္ဓိ ဗလသဗ္ဗထုဲကြာန်။ ဗၟာအယုတ်တအ်၊တၟအ်ဍုၚ်တၟအ်ကွာန်။ စံၚ်ထောံသီုဘာ၊ ဝါဒဒပ်ပၞာန်။ ဂြန်ဂဥုဲဒဗျ၊ ရောဂနိဒါန်။စံၚ်လိက်စံၚ်ကျာ်၊ လီုလာ်ထုဲတၞာန်။ဂၠာဲဂွံဗက်စံၚ်၊ ကမၠက်ဂၠံၚ်ဍာန်။ဍဵုဍိုက်ပိုယ်မန်၊ ဂၠိုၚ်လောန်ကွေံကြာန်။ ယွံဗော်အဟော၊ ကလောမန်ဆာန်။ ဒဒှ်ဟိုတ်ဖိုလ်၊ သမ္တီကဵုမာန်။ ဗကတ်လဝ်ညိ၊ ပ္ဍဲကဵုဝိဥာဏ်။ ဂိုတ်လွဳညိမန်၊ ညံၚ်ဂွံနန်ယာန်။ ဒဵုစိုပ်နိဗ္ဗာန်၊ ဆာန်ဂကူအိုတ်ညိ။
ရာဇာမူလ၊ ဝံသသၟိၚ်နန်။ တၞောဝ်ဨကရာဇ်၊ သီုအမာတ်ပန်။ ဗိန္ဒောဟောရာ၊ ပညာဇၞော်လောန်။သ္ကိုပ်ပၞာန်ရ၊ညးတၠအစောန်။ဒဴထောံနူနန်၊ ယောန်လုပ်ဒျူဒျာ။
ဂိုၚ်သမ္တီရ၊ လ္ပဝိုတ်ပြောဲဇွာ။ ဒဒိုက်မန်ဂှ်၊ ဒှ်နူပၞာန်ဗၟာ။ ပၠောပ်စာတ်တုဲစံၚ်၊ ဒှ်ညံၚ်သၠာတ်ဝါ။ ပန်ဗာ်ဂစိုတ်၊ လေၚ်အိုတ်နာနာ။ ဂကူအယုတ်၊ စံၚ်ဘုတ်စံၚ်ဘာ။ ဒဒိုက်ပိုယ်ဂှ်၊ဒှ်ကၠုၚ်နူဗၟာ။ချူစွံလဝ်ပြဲ၊ ပ္ဍဲသၠရိုတ်တာ။ ဒုမဂႅလ၊ ပ္ဍဲဘဒ္ဒကၠာ။ဂိုၚ်သမ္တီလဝ်၊ ဓဝ်သတိပမှာ။ မန်ရာမည၊ ဂယဏအ်ကၠာ။သၟတ်ဝုတ်ဗၠာဲတအ်၊ တၟအ်ညးအဲမှာ။က္တဵုတိုန်တၟိကၠာ၊ ပဝိုယ်မှာတဴ။
နူဂှ်သေၚ်ဟာ၊ အခါဗွဲကြဴ။ ဆမန်သှ်ေဂး၊ ပြးဇးဂြိပ်ဒဴ။ပ္ဍဲဂြိုပ်ဇၞော်ဟေၚ်၊ ဇရေၚ်လ္ဂောဝ်အဴ။ ကၠောန်ဂွဲသြောံဇွောံ၊ ဂၞဴဂွံဒုၚ်တဴ။ သိုၚ်သ္ၚိတက်တာဲ၊ ဗြဴကၟာဲလထဴ။မံၚ်လအ်ညိပၠန်၊ဗၟာဗက်လန်နှဴ။ ပ္ဍဲသက္က ရာဇ်၊လောကဓါတ်သ္ဍဴ။ လ္ၚီကၠံပိစှော်၊ပန်ဂှ်ပံၚ်နှဴ။ (၁၁၃၄) ဗၟာယုတ်ဂွံလဝ်၊ နန်ထဝ်က္ဍိုၚ်ပ္ကဴ။ ရးမန်ပိအဴ၊ က္တဴက္တာန်ရောၚ်။
သမ္တီပယောၚ်၊ သောၚ်သောၚ်ပံက်ပါၚ်။ ဂကူမန်ရ၊ ညံၚ်ကပ္ဍဲကၠာၚ်။က္တဴက္တာန်အဵု၊ကဵုမံၚ်ရမ္သာၚ်။ ဗညာစိၚ်ကၠာ၊အာထောံဍုၚ်ဂြာၚ်။ က္ဍိုပ်သ္ကိုပ်မန်၊နန်ထဝ်က္ဍိုၚ်
ဗ္တာၚ်။ ဒးထောံဂအောၚ်၊ အောပ်ညံၚ်စာၚ်ဂြိုပ်။
ပိုယ်မန်သေၚ်ဟာ၊ ဗြဲမတ်ၜါရိုပ်။တွဵုရးမုဟ်ရး၊ ဒးသ္ပဗ္ဒိုပ်။ သက္ကရာဇ်ဍုၚ်၊ ရိုဟ်ကၠုၚ်အာစိုပ်။ လ္ၚီမွဲကၠံကိုပ်၊ စိုပ်မသုန်ဣသုန်။(၁၁၅၅)
ဆမန်သှ်ေအဴ၊ မံၚ်ရောစိန်ဝုန်။ဒဴလုပ်ဒျူဒျာ၊ ထောံဂြိုပ်ဝါတုန်။ လ္ၚီမွဲကၠံအဴ၊ တြဴစှော်ဟီုပ္ဍုန်။ (၁၁၆၀) ဆမန်သှ်ေမံၚ်၊ညံၚ်ကဵုစၟဂြုန်။ လုပ်ဒျူဒျာတုန်၊ လ္ၚုသုန်ဒေၚ်ၚုၚ်။
သမ္တီဒဵုချိုတ်၊ စိုတ်လ္ပကေဝ်ဇြုၚ်။ဖေက်အံၚ်ဇေယျ၊ညးတၠပိုၚ်ဍုၚ်။ လ္ၚဵုဂှ်ကွာ်တိုက်၊ ဍိုက်က္ၜၚ်ဍိုက်ဂၠုၚ်။ မန်ဒဴဗၟာ၊ ဂြိုပ်ဝါတိသၠုၚ်။ နွံမွဲဂလာန်၊ဥာဏ်ပ္သရုၚ်။စိုပ်သက္ကရာဇ်၊ပိုၚ်ကၞာတ်လဝ်ပ္ညုၚ်။လ္ၚီကၠံဟီုတွံ၊ ထ္ပက်စှော်စုတ်ကၠုၚ်။ (၁၁၇၀) ရးမန်ပိကၠာ၊ ဟံသာလ္ဂုၚ်။ ဗၟာယုတ်အဂွိုက်၊ ဂးမှကျိုက်ပဠုၚ်။ ဍေံဍိုက်ကအ်စိၚ်၊ ပသၟိၚ်ပိုၚ်ဍုၚ်။ ဍဵုဍိုက်မန်ပ္ညုၚ်၊ဒုၚ်ဒဝ်ဟွံမာန်။
ဟွံမဲဂဗုတ်၊ ဂၠာဲစုတ်ဂလာန်။ သ္ၚိလံက်ခပဵု၊ ကဵုဒဏ်စုတ်ဒါန်။ ပ္ဍဲဍုၚ်ကြာရး၊ မ္ဒးက္တဴက္တာန်။ ဗၟာယုတ်အဂွိုက်၊ကျိုက်ပဠုၚ်သ္ပမာန်။ ဗက်ကၠောန်ဗၠေတ်ဗၠေတ်၊ ကေတ်ဇၞးကေတ်မာန်။ မန်ပိုယ်ၚုၚ်ၚ၊ ဘဝကျပၞာန်။တုပ်ညံၚ်ပၟတ်ဖဴ၊ ဂမ္တဴမ္တာန်။အရေဝ်ဂလာန်၊ သ္ၚိဌာန်ဂမြိၚ်။
ဆမန်သှ်ေမံၚ်၊ ညံၚ်ဟွံဂွံယုတ်ဂၠိၚ်။ ဖေၚ်ပူက္ဍိုပ်ကၠာ၊ ပြာကတ်ဂွံမိၚ်။ အသမ်ရာဇာ၊ ဗၟာယုတ်ဒှ်သၟိၚ်။ဂၞိန်မၞိဟ်ဗြဴကွေံ၊ ဍေံကဵုပူဂဵုကွိၚ်။ ဟိုတ်ဒှ်ဂၞိန်ဂး၊ ပိုဲဒးကေတ်ထၟိၚ်။မန်ပိုယ်ဂွံယုတ်၊ ဍေံစုတ်အသိၚ်။ ဒေါသလဟုက်၊ မုက်ဍေံညံၚ်ဂြိၚ်။ ဍေံဖျေံအမိၚ်၊ ဂွံမိၚ်ကေတ်ကီု။
ညာတ်မၞိဟ်ဟွံကော်၊ ဍောတ်ဇၞော်ပဟီု။ ယဝ်မိၚ်ဒးမ္ဂး၊ထဗးထၞိက်ပ္ကီု။ တပ်ဒဏ်ကဵုဘဲ၊ ဂြဲကၠေၚ်တက်တ္ၚီု။ စန်ဇိုၚ်ကၠေၚ်တဲ၊ စဲပ္ဍဲတ္ၚဲကီု။ဆဂှ်ဟွံသေၚ်၊ တၟေၚ်ဂၠိုၚ်ကဵုဗီု။ ဂလာန်ၜဴပါၚ်၊ လာၚ်မုက်လေဝ်ကီု။ လဳမုက်ရောၚ်ဂး၊ ပိုယ်ဒးဗက်ကီု။ညံၚ်ဂွံဟိဏ္ဏ၊ မညအိုတ်သီု။ ဍေံရောၚ်ပလီု၊ ကဵုပိုယ်ဟီုစုတ်။
ကောန်ၚာ်တြုံဗြဴ၊ အာနုဘဴဂွံဟုတ်။ဂကူမန်ဂှ်၊ ဒှ်မၞိဟ်ဂွံယုတ်။ ဝေါဟာဥပဲါ၊ ကဵုကၞာဲဒးစုတ်။ ဍေံဗ္ဂေတ်ထောံပၠန်၊ပိပန်ဟွံသ္ကုတ်။ ဂကူပိုယ်ကၠာ၊ ပညာဂွံဆုတ်။ မိကောန်ၚာ်ဂး၊ဇံၚ်နးဍေံစုတ်။ သၠးသန္ဓိကောန်၊ မန်ပိုယ်ဂွံယုတ်။ ညံၚ်ကွိုန်ဂွံဟုတ်၊ ဇံၚ်နးစုတ်ညိ။
ဍေံကဵုတက်မံၚ်၊ လ္တူဇံၚ်အဂ္ဂိ။ ဂလာန်ဂှ်ကၠာ၊ ခါဟွံစၟတ်ညိ။ ဗၟာယုတ်သ္ပဝဲ၊ ဍေံပျဲမတှ်၊ ပါၚ်ကှ်ဖိဖိ။ အိုတ်ဇိုၚ်တဲမာ၊ကၠာဟွံချိုတ်ညိ။ ကာလဒးဘဲ၊ ဒှ်ယဲဗျာဓိ။ ကောန်ဂၞဴဂှ်စိ၊ မိဂွံဆဵုကၠာ။
ကောန်ၚာ်သၟတ်ပြဲ၊ လောန်မွဲအခါ။ ပိုယ်ဂကူမန်၊ယဝ်ကၠောန်ဇာတာ။ ညံၚ်ကၠိုက်လ္ၚၚ်ရ၊ ဟိဏ္ဏလောန်အာ။ဒုန်ဓလိၚ်ဇွ၊ ဂဗသေၚ်ဟာ။ ကဵုဂကူမန်၊ကၠောန်သ္ပဇာတာ။အသမ်ရာဇာ၊ ဗၟာယုတ်မိစ္ဆာ။ပြဝေဏဳတၞမ်၊ ဝါဒိတမၠာ။သၠရိုတ်သၠတာ၊ ကၠောန်ဇာတာရ။
ဗၟာယုတ်တအ်အဵု၊ ယဝ်ဍေံဆဵုပၠ။ လဟုက်ကဟောန်၊ကောန်သီုယာဲတ။စန်ဇိုၚ်တဲပ္ညဳ၊ ဖုံပၠဳမိက်ရ။ပၠေတ်အသုဘ၊ညံၚ်ဇွပသ။ပၠေဲစဲတ္ၚဲကၠာ၊ ကြာဂြိုပ်ဝါဗ္ၚ။ကၠာဟွံချိုတ်ညိ၊သှ်ေဇဳဝိတ။ တုဲဗလးဖျဴ၊ကြဴတပ်ဒဏ်ရ။ ဗၟာယုတ်စိုတ်သၠုၚ်၊ကၠုၚ်ပိုၚ်ပိုယ်ပၠ။ ဍေံဓဇန်လောန်၊ ပျဲပိုယ်မည။ ညံၚ်လကိုဟ်,ကၠန်၊ ကုမ္ဘဏ်ယက္ခ။ ဗၟာသတ်အဟိုတ်၊ စိုတ်နာ်စိုတ်ကၠ။ ဂၠိုၚ်ကဵုပယျဲ၊ ပျဲပိုယ်မန်ရ။ ဂကူမန်အဴ၊ ဗွဲကြဴဂတ။
လၟုဟ်ပစ္စက်၊သွက်ရာမည။ မိၚ်လိၚ်ဝွံပၠန်၊ ပ္တန်လဝ်စိတ္တ။ ပၠံၚ်ဍုၚ်ဗက်အာဲ၊သၠာဲကဵုဇဳဝ။ ဒၞာဲချပ်ဒၞာဲဂွ၊ လ္ပဝိုတ်ဒညဟေၚ်။
ဒးစှ်ေနူနန်၊ ကောန်ဗြဴယိုက်လေၚ်။ မိုၚ်သဝ်နာမ၊ ဗၟာရခေၚ်။ ဒဏ်ရာဇဝတ်၊ဇြဟတ်စိၚ်ဟေၚ်။ ကြောံကၠေၚ်ကျေဝ်ဂေါဝ်၊ ဗဵုလ္ၚောဝ်ဍိုက်ပေၚ်။ပ္ဍဲရးမည၊ သ္ပသၟိၚ်ဍေံပၠေၚ်။ ဍဵုဍိုက်ပိုယ်မန်၊ နန်ထဝ်ဒးလေၚ်။ ပွိုၚ်မွဲသၞာံကၠာ၊ အခါလဵုဟွံဝေၚ်။ ဍေံပၠေၚ်ပိုယ်ဟေၚ်၊ ဗွဲတၟေၚ်ပျဲပျာံ။
ပ္ဍဲသက္ကရာဇ်၊ဂွံညာတ်ဍာံဍာံ။ အေက်ၜါသပ်ၜါ၊ ဟွံမှာဒှ်သၞာံ။ (၁၁၁၇) ကၠံလ္ၚီဠက်ကိဋ်၊အိုတ်မန်မွဲဂံါ။ဘဲသၟိၚ်ရာဇာဖေက်ဗၟာဗက်ဒံါ။ ဂွိၚ်ဂွိၚ်ယံၚ်ယံၚ်၊ ညံၚ်ကၞိဒးတာံ။ ပဲါဘဲယုတ်ဗၟာ၊ လုပ်ဒျူဒျာသ္ဍာံ။ သမ္တီလ္ပဝိုတ်၊ ဟိုတ်ဍေံပျဲပျာံ။ ဖေက်ဗၟာအိုတ်ရ၊ ကလုပ်ပါၚ်ကျာံ။ တုပ်ညံၚ်သာ်ဂှ်၊ သၟဟ်ကဵုပယျာံ။ဗွဲကြဴတုန်သ္အး၊ အတးၜက်သၞာံ။ လ္ၚီကၠံဟီုတွံ၊ ထပှ်စှော်ဒ္စံါ။(၁၁၇၈) သၟိၚ်ဒါဝန်သ္ဍာံ၊ နာမ်နာမအဴ။
သီုဗိုလ်ပၞာန်ရ၊ ထဥဒှ်တဴ။ဇက်လုပ်ဒျူဒျာ၊ အဝဇ္ဇာထဴ။ယိုက်လဝ်ဇၞော်မာန်၊ ဝေၚ်ပၞာန်ဒှ်ဆဴ။ဍေံဗက်လုပ်ပၠန်၊ လီၜန်ဗက်နှဴ။ ပန်ဗာ်ဗက်ဗ္တိုက်၊ လိုက်ဍုၚ်သေံအဴ။ ပ္ဍဲသက္ကရာဇ်၊ မိၚ်ညာတ်ကော်ခဴ။လ္ၚီမွဲကၠံဂှ်၊ ထပှ်ဣသုန်နှဴ။ (၁၁၇၅) ရးမန်ပိအဴ၊ က္တဴက္တာန်ရိၚ်က္တၚ်။
ဥတုပိကီု၊ ကသီုကညၚ်။သြောံသ္ၚုခၞေဝ်သွ၊ ဖျုန်ကၚုဟ်က္ဍၚ်။ က္ဍၚ်ဇဳဒှ်ကၞောဝ်၊ ကၠောဝ်ဗျဵုတဟၚ်။ ဝတ်ဓမ္မတာ၊သံသာဍာ်ဂၚ်။ ဖျာတိုက်ကွဳပ္ညုၚ်၊ ဖျာဂၠုၚ်ဖျာက္ၜၚ်။ၚုဟ်မးအနဳ၊အိုတ်ဇၟာပ်ဇဳက္ဍၚ်။ ဒှ်ဂ္ညိဂ္ညောန်အဵု၊ အလဵုဍေံကၠောန်နၚ်။ ပ္တိုန်ၚုဟ်မးက္ဍၚ်၊ ကၠောန်နၚ်ဒကေဝ်နှဳ။
ကၠောန်သၠဒကေဝ်၊ အလေဝ်ဍေံဟွံတီ။လောဘလောန်ကာဲ၊ဆာဲဥာဏ်အလီ။ ပၠောပ်သၠဒကေဝ်၊ ကေဝ်တုဲဍေံသီ။ ဟီုလဝ်အရေဝ်၊ၚုဟ်အလေဝ်နှီ။လျိုၚ်ညဳသတိုတ်၊တုပ်စိုတ်ဂြိုၚ်အီ။ ကၠောန်သ္ပသာ်ဂှ်၊ ဟွံဒှ်ဗၞိက်အလီ။ ပ္ဍဲကဵုရးမန်၊ ကမၠောန်ကၠံလ္ၚီ။ ကေတ်ကေတ်ကဵုနှီ၊ ဂွံတီတၟော်ရော်။
ပ္ဍဲသက္ကရာဇ်၊ သမ္ၚာတ်စိုတ်ဇၞော်။ ထအုကမြဴ၊ စိုတ်ဂၠိုက်က္တဴသၞော်။ဗၟာမၞိဟ်အရိုၚ်၊ ဒှ်သၟိၚ်ပိုၚ်ဗော်။ စိုတ်ဍေံမ္ၚိုဟ်ကြံၚ်၊ ညံၚ်ဘုတ်ကလော်။ ဗၟာဗၟုဲနာံဗ္ဂဲ၊ ပျဲမန်ဂၠာဲကော်။ ဂွံတုဲဒဳဏာ၊ အကြာဂရော်။ နာမ်ကၞိဂှ်မန်၊ ဆီနန်တော်တော်။ကၠဗ္ဂဲရပ်ကိတ်၊သ္ၚာဲၚိတ်ကြော်ကြော်။ မန်ကဵုဗၟာရ၊ သၞကဝ်ညးကော်။ ယဝ်ရဒးတၟော်၊ တော်ညိတီတဴ။
ကၞိကဵုဗ္ဂဲ၊ ဒှ်ဝဲထုဲနှဴ။ စိုပ်ကၠုၚ်ပၠန်သွံ၊ ဟွံလအ်ဗွဲကြဴ။လ္ၚီမွဲကၠံဂှ်၊ ထပှ်စှော်တြဴ။ (၁၁၇၆) ဒပ်မန်ဗၠးၜး၊ပၠန်ဂတးအဴ။ဒှ်ကလိုက်ကၟဵု၊ ကွဵုဍုၚ်တှ်ေကြဴ။ မံၚ်စံၚ်ဟွံမာန်၊ ဟိုတ်ဍုၚ်ကွာန်က္တဴ။ ထအုကမြဴ၊ စိုတ်ဂၠိုက်က္တဴသၞော်။
နူတြိကုမ္ဘုၚ်၊ လ္ဂုၚ်ဍုၚ်ဇၞော်။ ထောံကၠေံကျာ်လေဝ်၊စေတဳဓါတ်သော်။ ပ္ၚောံလုပ်ဍုၚ်သေံ၊ တိတြေံဒှ်ဆော်။ ဒဴလုပ်ဗြိုဟ်ဗြိုဟ်၊ ပုဗ္ဗဒိုဟ်ဗၟော်။ ဍာ်ရမတ်တော်တော်၊ စိုတ်သၞော်ကတဴ။
ဒှ်ဍိက်ညးကီု၊ လေၚ်သီုဂကူ။ ပိုယ်မန်ကွေံကြာန်၊ညံၚ်ပၞာန်အသူ။ ဒးဒုၚ်ဍဵုဍိုက်၊ ဗၠိုက်စှ်ေဖြဴဖြဴ။ဗၟာယုတ်တအ်ပၠန်၊ ပ္တန်ၚုဟ်မးအဴ။ မၞိက်ရတ်ဂကူ၊ ဝိပူရသာဲ။
ဇာတိကုလ၊မညၜိုပ်ကၠာ။ မ္ဒးထောံလဝ်၊ နန်ထဝ်ဟံသာ။ ဍုၚ်ဗဂေါလီု၊ စွံဗီုဥပၟာ။ လ္ၚုလ္ၚန်ဒၟံၚ်၊ ညံၚ်ဂြိုပ်အၚ်လှာ။ဗၟာဗၟုဲစံၚ်ပၠေၚ်၊ ဒှ်ပ္တေၚ်သေၚ်ဟာ။ ဘာတူကျာ်ပိုတ်၊ မန်ချိုတ်ဟွံသာ။သှ်ေပ္တေၚ်သှ်ေချး၊သၟးသုသာန်ကၠာ။ ထောံဍုၚ်ထောံနန်၊ မန်တအ်ဒဴအာ။ ချပ်စိုပ်သိၚ်သာ၊ အခါယောၚ်ယာ။
မန်ပိုယ်ဒးချိုတ်၊ ဟိုတ်နူဗၟုဲဗၟာ။ မဒးထောံလဝ်၊ နန်ထဝ်ဗၠဲဂွါ။ လီုဒၟံၚ်အပၠိတ်၊ ပေၚ်ဒ္စိတ်ဝါ။ သန္တာန်မန်တြေံ၊ ဍုၚ်သေံဒျူဒျာ။အာသ္ပနိဿာဲ၊ သ္ပရဲပြောဲဇွာ။ မန်ဒးယာံဓဇူ၊ဟိုတ်နူဗၟုဲဗၟာ။ ဘဲအဝိဇ္ဇာ၊ဂလာဗက်အာဲ။
ဟိုတ်ဂွံတိုပ်လဝ်၊ ထးထဝ်ဂဵုဍာဲ။ ဣတ္ထဳရာဇာ၊ သ္ဂောံမြာဒှ်နာဲ။ ဍုၚ်မန်ဍုၚ်ဗၟာ၊ ဗၠဲဂွါရာၚ်ဆာဲ။ ဂလာသ္ပသၟိၚ်၊ သိုက်လှိၚ်ပိုန်အာဲ။ ပိုၚ်ရးနိဂီု၊ ဇူဒီုဒှ်နာဲ။ ဟံသာသဓီု၊ မတ်မလီုဆာဲ။ဍုၚ်မတ်တၟ၊ ဒေသဇၟာပ်ဒၞာဲ။ ဒယှ်လောန်ကာဲ၊ နာဲညးပိုၚ်တဴ။
သ္ပတံနူဂှ်၊ ဍုၚ်မြဟ်ကွေံအဴ။ လအ်လလောန်သန်၊ဒတန်ဗွဲကြဴ။ဂလာမုက်ဗု၊ ညံၚ်ကၞုဲဗျုထဴ။ လ္ၚီမွဲကၠံသ္ဍာံ၊ကဵုဒ္စံါစှော်တြဴ။ (၁၁၈၆) သက္ကရာဇ်ဍုၚ်၊ ကၠုၚ်ခုတ်လဝ်အဴ။ဒဒှ်အိုတ်သီု၊ ဟီုတုဲအီစဴ။ စိုပ်ဍုၚ်တေံအဴ၊ မံၚ်တဴဒၞာဲဂှ်။
ပ္ဍဲသက္ကရာဇ်၊ ဟီုကၞာတ်ဒဒှ်။ လ္ၚီမွဲကၠံသ္ဍာံ၊ဒ္စံါအဋ္ဌသၟဟ်။(၁၁၈၈) ပ္တန်မတ်မလီုရ၊ ဒေသဒဒှ်။လ္ၚီၜါကၠံပၠန်၊ ပန်စှော်ထပှ်။(၁၂၄၇) သၟိၚ်အၚ်ဝပ္ညဳ၊ ဒဳဗဝ်ဒယှ်။ ဍေံရပ်ဏာသ္ဍာံ၊ ပ္ဍဲကဵုသၞာံဂှ်။လ္ၚီပိကၠံပိ၊ ယုတ္တိဒဒှ်။ (၁၃၀၃) ကြုက်ဂျပါန်ဂှ်၊ ဒှ်သၟိၚ်ပိသၞာံ။
ဍုၚ်ပိုယ်မန်ဝွံ၊ လ္ၚုလုံဒိုဟ်ဒ္စံါ၊ ညးတၞဟ်ပိုၚ်အဵု၊ ဒဵုကဵုလၟုဟ်ဍာံ။ သၟိၚ်ဗၟာဒှ်ဇၞော်၊ ပိုၚ်ဗော်သံက်စၞာံ။ မန်ပိုယ်ဒးကျ၊ကလုပ်ပါၚ်ကျာံ။ ဘဝဍိက်ပၠက်၊ ညးတက်ပျဲပျာံ။ သမ္တီလဝ်ရ၊ သ္ပလဝ်ပတ္တာံ။ ဗၟာမၞိဟ်အရိုၚ်၊ ပိုၚ်မန်ဍာံဍာံ။ ဘဝဍိက်ဂၠုဲ၊ထုဲလအ်ပယျာံ။ ဂကူပိုယ်မန်၊ လအ်လောန်ကဵုသၞာံ။ လ္ၚုလ္ၚန်သုန်ဂြာံ၊ ဟွံတီအိုတ်ဟာ။
ယွံကလောမန်၊ တၠနန်ဟံသာ။ ဍုၚ်ွာန်ပိုယ်ဂှ်၊ ညးတၞဟ်ဂွံဏာ။ဗၟာတအ်ပိုယ်မန်၊ လအ်လောန်အခါ။ ပိုယ်ဒးဒုၚ်ပျဲ၊ဘဲညးတၞဟ်ကၠာ။ဂၠိုၚ်ဂိတုသၞာံ၊ ပယျာံအခါ။ လၟုဟ်ဂွံတီရ၊စိုတ်လ္ပသ္ပအ်သာ။ညံၚ်ဂွံတိတ်ဗၠး၊ နူဍိက်ညးကၠာ။ညံၚ်ဂွံဒှ်နာဲ၊ဂၠာဲဂစာန်အာ။ ညးကီုအဲကီု၊ပြီုလွဳပရာ။ဆီတၠဆီနာဲ၊ဝုတ်ဗၠာဲကညာ။ သမ္တီလ္ပမှာ၊ ချ်ဗ္စာညိ။ ဝၚ်နူအာဒိ၊ကေတ်ကၠာညိအဴ။
ဝၚ်မန်အတိက် တုဲဆဝွံရအဴ။
✯ ✯ ✯ ✯
ယၟုအ္စာကၞေဟ်➲မာံတောအ်✍✍✍