ဝါဗ္ရကၠံသွဝ် မုက်ဍောတ်မတ်သဝ်
ဝါဗ္ရကၠံသွဝ် မုက်ဍောတ်မတ်သဝ်
လတူဍာံဇၞော် မတ်လီုမလီုကဵုရေဝ်ဂှ် ပ္ဍဲပွိုၚ်ဍုၚ်မုဟ် ကွာန်သၞေဟ်ဗ္ဒဝ်ဂှ် ဒှ်ကွာန်ပိုယ်ရ။ သ္ရောဲမံၚ်ကဵု ဍုၚ်မုဟ်ဍုၚ် (၁၀)တိုၚ်၊ လၟိဟ်သ္ရိ နွံ(၁၀၀၀)ပြၚ် ပ္ဍဲကွာန်ဝွံ ကောန်ဂကူမန်ဟေၚ် မံၚ်စံၚ်သ္ပဒတဴမံၚ်ရ။ ကမၠောန်သွက်ဂွံ ကယျိုၚ်ဗုၚ်ဂၞဴဂှ် ကၠောန်တဴ ဂူ၊ ဝါဗ္ရအိုတ်ရ။ လၟိုဟ်မၞိဟ် ဒ္စိတ်မသုန် က္ဍိုပ်ကၠံဂှ် ခွတ်ထၜိုတ်၊ တဵုသြောံ အိုတ်ရ။ အဓိက ကမၠောန်ဇၞော်အိုတ်ဂှ် ကၠောန်ဝါဗ္ရအိုတ်ရ။
----- ----- -------- ------------
နာဍဳစက်သပါတ်တြေံ ဗြုတိုန် ဍေၚ်ၚ် မသုန်ဝါ၊ မာံသုတလေဝ် စိုပ်ကၠုၚ်နူဝါ မိဂှ်သၟာန်တိုန်ကောန်ဗၠာဲ
“စိုပ်ပြဟ်ကွေံသိုအ် တ္ရဲဏံ”
“မိ ဝိုတ်စမံၚ်ဟာ နူဂဏေံတေံ ကျေဝ်လာဲဘိက်လဝ်”
“အဝ်ကွေံ”
ရမျာၚ် ဒယှ်ေဒွက် နူကဵု ခဒန်ဟုံဍာ် “ပြယာဲဗှ်ေလီစၞာဲ ဝါသနာဗှ်ေ ဠာန်ဂံၚ် မေတ္တာက္တၚ်ပ္ဍုၚ် လ္ပမံၚ် ဗဒါဲအဲရ ဒၞာဲဒးစိုတ်အာညိအာ အဲကဵုဗှ်ေတှ်ေ သာဲသာဲ အဵု -- အဵု” နာဲထဝ် သၟာန်တိုန် မိယေန်ကျေဝ်
“မဂဳ အလဵုကောန်ဇကုအာရော?၊ ဟုံဍာံပြဟ်မံၚ် သိုအ်”
“ကျေဝ်လာဲ ဘိက်လဝ် အာတ္ရဲဒှ်မၞိဟ်ဍေံ”
“ဆလအ်ဍေံစိုပ်နူ ဂျပါန်ရော?၊ အဲလေဝ်ဟွံမိၚ်၊ ဟွံဆဵုဍေံ မွဲတဲဏီ”
“ဇကုဂှ် အာဝါ၊ အာကၠအ် သၟးတှ်ေ အလဵုဂွံဆဵုရော…”
“ဟှ်ေ ကမၠောန်ဇကု နွံပ္ဍဲဝါကၠအ်တှ်ေ ဒအားဒၞာဲဂှ်ရ၊ နွံဍုၚ်ဂျပေါန်တှ်ေ ဒးအာဂျပေါန်ရ”
“ဒးဝါကၠံညးတှ်ေ ဒုၚ်ဟွံမာန်တွဵု၊ ဒေါအ်ရ ဒေါအ်ရ အရေဝ်လ္ပဂၠိုၚ်ရ၊ ဂုဏ်နူကောန်ညးတၞဟ် ဇကုကဵုဇကု အရေဝ်ဒးဂၠိုၚ် ညးသ္ကံ”
----- --------- --------
မာံသုတ ကျိုၚ်ဂွံကယျိုၚ်ကယျဝ် တၟိတၟိ၊ ပ္ဍုၚ်လဝ် ဍာ်မြမောဝ်တုဲ တိတ်အာတုဲ သ္ရိကျေဝ်လာဲတံ ဂွံဆဵုကေတ် မိမ ကျေဝ်လာဲတံ ဒုၚ်တၠုၚ်မံၚ်ပ္ဍဲပါၚ်တြၚ် “ကၠုၚ် သုတ လုပ်ကၠုၚ်”လေဝ် အပါကျေဝ်လာဲတံ နာဲရန်တၟံ ညးရပ်ဂွံ ပၞးတုဲ ညးဟီုတိုန် “တ္ရဲဏံ အၚ်္ဂလိက် (၂၂၊၉၊၂၀၂၁) ကျေဝ်လာဲ ဂွံအယုက်(၂၄)သၞာံ၊ ဗှ်ေကဵုဍေံၜံၚ်ခြာညးသ္ကံ မွဲၜါတ္ရဲရ”
အဲကဵု ကျေဝ်လာဲ တိုန်ဘာမူလ၊ တန်ဒေါဝ်၊ ကေတ် တဆိပ်ကြာနူဘာ တက္ကသိုလ်လေဝ် မွဲစွံရ။ ဒှ်ရဲဆာန်၊ ရဲပတှ်ေ နူဍောတ်တ်ရ။ ပိုယ်ညးၜါဟွံတုပ်ဂှ်မွဲဂှ် တၚ်ရန်တၟံ ပိုယ်ညးၜါ သ္ရောဲခြာဍာ်ကဵုကၠေၚ်ရ။
“ဘာတုဲမ္ဂးတိုန်ဍုၚ်လ္ဂုၚ် လ္ရတ်ဘာသာဍုၚ်ဂျပါန်တုဲ အာဂၠာဲသြန်ဏောၚ်၊ သြန်နွံတှ်ေ မုကေတ်မုဂွံ” အရေဝ်ကျေဝ်လာဲဟီု စဵုကဵုလၟုဟ် သှ်ေမံၚ်ပ္ဍဲကတောဝ်ဏီရ။ ဍုၚ်ညးတၞဟ်တှ်ေ ခိုဟ်မံၚ်လၟိုန် ဍုၚ်ဇကုဂှ် ၚုဟ်မးဟၟဲ “ကျေဝ်လာဲ”ညာတ်၊ လညာတ်အဲဂှ် ဍုၚ်ဇကုဟွံခိုဟ်မ္ဂး ညံၚ်ကဵု ဂွံခိုဟ်တိုန်ဂှ် တာလျိုၚ်ပိုယ်နွံမံၚ် ဒးကၠောန်ဇၞော်မောဝ်ကဵုမာန်မှ တဴတက်ခိုဟ်တိုန်ရောၚ်။ ကမၠောန်တိဍာ် မိမနော်နာဲဂှ် ဂွံထိၚ်ဒဝ်အာ ဒးဒှ်တာလျိုၚ်ပိုယ်ဏောၚ်။
“ခေတ်ဏံ ခေတ် ကၠောန်ကၠအ်၊ ကၠောန်ဝါ ဟွံသေၚ်ရပုဟ်၊ စိုပ်ကၠုၚ်ခေတ် ITယျ” ဗှ်ေလ္ပချပ်မံၚ် ကၠောန်ဗ္ရသၟး “သုတ” ပိုယ်ညးၜါ ဂွံတဆိပ်ကြာနူတက္ကသိုလ် မတ်မလီုတုဲ ကျေဝ်လာဲ တိုန်အာဍုၚ်လ္ဂုၚ် အာလ္ရတ်ဘာသာ ဂျပါန်တုဲ တိတ်အာဍုၚ်မ္ရး၊ အဲလေဝ် ဘိုၚ်ကၠောန်ကမၠောန်ကဵု မိမပိုယ်တုဲ လုပ်ဂကောံသၟတ် ချဳဒရာၚ်မံၚ် ပ္ဍဲကွာန်ရ။
နွံမံၚ်မၞိဟ် ဒ္စိတ်တၠ၊ ဂ္ဇံဝိုၚ်မံၚ်တုဲ လဒေါဝ်ဂှ် ခုၚ်ဍောတ်နွံမံၚ်မွဲမ၊ စွံလဝ်ကွာၚ် ကိတ် မွဲမဇၞော် ဗစူလဝ်ပၞာၚ် လတူကွာၚ်ပေၚ်မံၚ်ရ။ အဃောအဲလုပ်အာ ဂ္ဇံပ္ဍဲဝိုၚ်ဂှ် မတ်စှ်တြဴမ ဗစၚ်စူကၠုၚ်ဇရေၚ်အဲတုဲ ညံၚ်ကဵု မတ်ဍေံတံဟီုမံၚ်ကဵုအဲ ဆာန်ဍူကွေံ၊ မံၚ်ပ္ဍဲကွာန် ဒှ်ဒဒိုက်ကွေံ၊ ပညာသဝ်တှ်ေ ဒးဒှ်ဒဒိုက်ဗီုဏံရ။ ရဲစဴနူဍုၚ်သ္အာၚ်ဂှ် ညံၚ်ကဵုကဆံၚ်သၠုၚ်တုဲ ရဲနွံပ္ဍဲကွာန်ဂှ် ညံၚ်ကဵု ဒှ်မၞိဟ်ကဆံၚ် သဝ်မွဲရ မၞိဟ်နွံမံၚ်ပ္ဍဲဝိုၚ်ဏံ အထေၚ်မံၚ်ဗီုဏံဏောၚ်ဂှ် ညာတ်ဒးမုက်မတ်ဍေံတံ တော်ဒးမံၚ်ရ။ အဲ ခတ်အကာဲကေတ်ဍေံတံမ္ဂး စိုပ်ကၠုၚ်နူဍုၚ်မ္ရးဟွံလံဏီတုဲ ဖျူန်သွဍေံတံ ဗု သ္အးဇ္ရးမံၚ်ရ။ အဲမွဲဟေၚ် စှ်ေဝါ တိုန်ဂြိုပ်၊ ကၠောန်ဝါဂၠိုၚ်တုဲ ဖျုန်သွဇကုဂှ် ကြပ်စိုပ်မံၚ် က္ဆံၚ်ချး၊ သၞာံဇကုလေဝ် ကြပ်ဒှ်မံၚ် စၞာံဂြောန်ရ။
“ကျေဝ်လာဲ” ပတိတ်နၚ် ဂေတ်တာ တိၚ်တိုန်မဒွက် “Happy birthday to you” ရဲလ္ရဵုတက်ဗီု၊ ရဲညးလ္ရဵု ဗလးမံၚ် Live အိုတ်ရ။ ဒယှ်ေဒွက် ပလိုက်ပၞာၚ်တုဲ ဖျန်ဗ္စကွာၚ် ညးမွဲတုဲ ညးမွဲရ။ မွဲအယုက်အဲ မွဲလှ်ေလေဝ် ဟွံကေၚ်ကၠောန်မွဲလှ်ေ တ္ရဲကတဵု ဒှ်မၞိဟ်ဗီုဗီုဏံ။ “ၜံၚ်လဝ်ၝတုဲ ပိုယ်စဝ်ကပေါဝ် သြန်အိုတ်လဝ်တၟာဟလိုၚ် ဟွံဒ:ကၠောန်ရ တ္ရဲကတဵုဒှ်မၞိဟ်” အရေဝ်အပါပိုယ် ကလေၚ်ကူဂွံပၠန်။
“သုတ” မုသုၚ် ၝ” သုၚ်ဍာ် ဍာတ်တ်ရ ကျေဝ်လာဲ
“ မုၝ ဟကှ်ဟာ(အခြောက်၊ အစို ဟာ?) သုၚ်ဍာ်ဍာတ်တ်သၟး၊ နာၝ (အာဆဳယာန်) ဏံ သုၚ်စမ် မွဲခေါ်စမ်”
ဟလူနၚ်လ္ပာ်အဲ (အာဆဳယာန်)မ္ဂးဂှ် ဒးဍာ်တၞးဘိၚ် ဍုန်လဝ်တုဲ ဖက်စုတ်လဝ် မပ္တံကဵု ဂဥုဲထဍက်တံ ဂိုဝ်လာတံ နာနာတံ ပံၚ်ဗစိုပ်လဝ်ဂှ် သၟတ်ပိုယ်တံ ကဵုလဝ်ယၟု အာဆဳယာန်ရ။
“အဲဟွံသုၚ်ရပုဟ် ကျေဝ်လာဲ”
“မံၚ်ပ္ဍဲဝါလံ သုၚ်ဍာ်ရဟာလေပ် တုပ်အာ “အဗု၊အတာ” တံရဟာ?”
“ရံၚ်ရုပ်သာ်ဗှ်ေ လ္စံက် စိုပ်က္ဆံၚ် ကပ္ပလဳယျ၊ မုပ ဗှ်ေဂွံမိက်မံၚ်ဒၞာဲ အမက်ပြေၚ်ဏံဂှ် အဲချပ်ဟွံလေပ်ရ “သုတ”၊ ရုပ်သာ်ဗှ်ေ ယဝ်ဟွံဒးအာဝါ တုပ်မံၚ်ကဵု ကောန်သၟိၚ် ကိုဝ်ရဳယာရဏောၚ်၊ သၠုၚ်ဟတဴ၊ ဥာဏ်ပညာ ဒၞာဲလဵုရံၚ်ၚ် ထတ်စောန်မံၚ် ဟလိုၚ်ၚ်ဏံ ဘဝ ဒးအိုတ်အာ ပ္ဍဲဝါဗ္ရဟာဏံ? အဲဂိုဟ် ဘဝဗှ်ေကွေံ”
“ ဂွံကယျိုၚ်လမျီုမွဲမ္ဂး ဒးကၠောန်ကမၠောန်ဖအိုတ်ရ ဟွံသေၚ်ဟာ?” မုဟိုတ်ရဲညာတ် ဘဝအဲ၊ ကမၠောန်အဲ ကဆံၚ်သဝ်မံၚ်၊ ဂုဏ်စရာဲဟၟဲပုဟ် ဂွံစောတ်စောဲ သာ်ဏံရော?”
“ဟးညာတ်မံၚ်ဗီုဂှ်တှ်ေ ဒးဟီု ဗီုဏံရ၊ ကၠောန်ဗ္ရမုသှ်ေရော? ဂတှ်ရဒှ် သ္ပမံၚ်ကဵုကမၠောန်ဂှ် အခိၚ်အိုတ်”
ပိုယ်ညးၜါ ဒ္ဂေတ်နူဍောတ်တ်ရ၊ သက်ဒးဟီုနွံတှ်ေ ဟီုဟွံဒးညှာစိုတ်ညးသ္ကံရ။ ဆ္ဂးကာလဒးဒုၚ်ဟီု လဒေါဝ်ဝိုၚ် ဗီုဏံ ဂွကွေံကွေံရ။ ၜိုန်ရ မိက်ဂွံကတဵု စဴအာထဝါဲဂှ်ကီုလေဝ် ဒးကျောဝ် ပရေၚ်မၞိဟ်တုဲ ဒးတၚက်အာ ဗြီုဗြီုကီုရ။ စဴနူသ္ရိ “ကျေဝ်လာဲ” တံတုဲ ပုစ္ဆာသၟာန် သှ်ေဗာန်မံၚ်ဂၠံၚ်သြိုဟ် စိုတ်ဟွံမိက်ကဵု သွက်ညးသၟာဗ္ရတံရ၊ သွက်ညးတၞဟ် ဂွံစပုၚ် ဒုၚ်စေက် ကာယ ဂစာန်ကၠောန်မံၚ်ကီုလေဝ် ပ္ဍဲမတ်ညးတၞဟ်ဂှ် ညးမွဲဟွံထေၚ်ညးတၠဂုဏ်ရ၊ သီုညးတၞဟ် အထေၚ်သောဲဏီ။
--------- -------------- ----------
“ကၠောန်ဗ္ရ ဂွံဆဝိုတ်ဇွောံမ ရဟာ အပါ?”
“ကၠောန်ထၜိုတ်ဂှ် စဟွံဂွံပုဟ် ကောန်ဗၠာဲ၊ ကၠောန်ဗ္ရမှ ဒှ်ပုၚ်” အပါ သုတ ဟီုမံၚ်လၟိုန်ရ။
အပါဂှ် ဒှ်မၞိဟ်ညးဆာန်ဝါဗ္ရမွဲရ။ ဝါဗ္ရမ္ဂးဂှ် ဒှ်လမျီုညးရ။ ဟွံဂွံကၠောန်ဝါမ္ဂး စပုၚ်ဟွံဖဲပုဟ် အပါပိုယ်ဟီု မွဲခဏှမွဲခဏှရ။ မိမ ကလောမသပိုယ်တံ အဆက်ဆက် ကၠောန်ကၠုၚ်ဝါဗ္ရအိုတ်ရ။ စိုပ်ကဵုဝါဗ္ရမ္ဂးတှ်ေ အပါပိုယ်တီဗွဲမဂၠိုၚ်ရ။ ညးလ္ရတ်မံၚ် လ္ပာ်ဝါ၊ ဝါဲကီု၊ ဗီုဂွံတဵုသြောံကီု၊ မသြောံလဵု တဵုဂွံရော တိဍာ်ဏံ ညးတီမံၚ်ရ။ ကၠောန်မံၚ်ဝါဗ္ရလေဝ် မွဲအယုက်အဲ ဟွံကရ။
စိုပ်ကၠုၚ်အခေတ်တ္ရဲဏံ ဂၠးကဝ်ဒှ်ဗလးတုဲ အာကၠောန်စ ဍုၚ်သ္အာၚ်မ္ဂး ဂွံသြန်ဂၠိုၚ်တုဲ ညးတၠး ဝါဗ္ရတံ ထောံဝါတုဲ တိတ်အာကၠောန်စ ဍုၚ်မ္ရးဂၠိုၚ်ကၠုၚ်ရ။ တိဝါဗ္ရတံဂှ် ကာလသြောံၚုဟ်မးတိတံဂှ် ခိုဟ်ဗွဲမလောန်ရ။ ညးလ္ရဵုတံ ထောံလဝ်တိ အတိုၚ်ဏံ တၠတိ ဟွံကၠောန်ဂှ် မွဲသၞာံတုဲ မွဲသၞာံ ပဵုတိုန်ကၠုၚ်မံၚ် အရိုဟ်ဟ်သၞာံရ။ ညးလ္ရဵုကၠောန်ဟွံမာန်တုဲ ပအပ်ထောံကဵုညးတၞဟ် ဠိၚ်ကၠောန်တိတုဲ မၞိဟ်တၠတိတံ ဒးရာန်စ သ္ရု ဇၟာပ်ပ်သၞာံ နွံဂၠိုၚ်တိုန်ဂၠိုၚ် တိုန်ရ။
------- -------------- -------
“ပိုယ်ကၠောန်မံၚ်ဝါ သၞာံတၟာလံရ အပါ၊ ပရေၚ်တဴတက်ပိုယ် မုလေဝ်ဟွံဆဵုပုဟ် အခိၚ်သြောံတိတ် ၚုဟ်မး ဟၟဲ၊ အခိၚ်ကၠောန်ဗ္ရ ဂၠာဲမၞိဟ်ဝါတ် တိ ပိုယ်တံလေဝ်ကဵုဝါဲ ဟွံမာန်မ္ဂး သြောံဟွံတိတ်ရ”
“ဆဂှ်သၟးဟွံကပုဟ်ကောန်ဗၠာဲ အခိၚ်ကၠာတေံဂှ် သြောံပိုယ်ဟွံဒး စၟ ပုဟ်၊ နာမွဲၜါသၞာံဏံ ဇၟာပ်မၞိဟ် ဒးရပ်ဂဥုဲ ဂစိုတ်စၟး စရိတ်အိုတ်ပဵုတိုန်မွဲသာ်ပၠန်ရ၊ စၟ (ပိုဖလန်း) ဍေံလုပ်စ ပ္ဍဲကောန်ပေါဝ်သြောံတုဲ ဂစုတ် ဂဥုဲလေဝ်ဟွံဂွံ ဒးစၟ ဗီုဂှ်တှ်ေ အတိုၚ်မွဲခံက်ဂှ် သြောံမွဲမလေဝ်ဟွံဂွံရ၊ ဒုၚ်လဝ် ဒဒိုက်သွက်မွဲသၞာံဂှ် အိုတ်အာဒၞာဲဏံရ”
“ပိုယ်ကေတ်အဆက်ကဵု “ဝန်ဇၞော်တဵုလွဳ” (စိုက်ပျိုးရေးဝန်ကြီး)တံတုဲ အကာဲအရာ ပိုယ်တံ ဒှ်မံၚ်လၟုဟ်ဂှ် ပတိုန်ထ္ၜး ဟွံဂွံပုဟ်ဟာ?
“အခိၚ်ကၠာတေံဂှ် ဌာန တဵုလွဳတံ ပတိတ်ကဵုဝါဲ၊ ကဵုမ တံနွံမံၚ်ကီုရ၊ စလာပ်သ္ကာဂၠိုၚ်တုဲ သၞောဝ်တ်တံခိုဟ်မံၚ်ကီုလေဝ် လီုလာ်အာရ၊ အခိၚ်လၟုဟ်ဂှ် “ဝန်ဇၞော်တဵုလွဳ” (စိုက်ပျိုးရေးဝန်ကြီး)တံ မံၚ်ထောံ ညံၚ်ကဵု ဟွံဆေၚ်ကဵု ရဲသၟာဗ္ရတံရ။ ရဲသၟာဗ္ရတံဂှ် ကၠောန်မံၚ်ဗ္ရသၞောတ်တြေံဖိုလ်ရ လ္စုဲမံၚ်၊ တီမံၚ် ဝါဲ (ပုလဲ)ရ ကြာတ်ဖျေံဏာတှ်ေ သြောံခိုဟ်တိုန် လ္စံက်တိုန် မွဲလစုတ်ဓဝ်ရ။ ဒးသုၚ်စောဲဝါဲ ဗီုသၞောတ်စှ်ေစှ်ေလေဝ် ဟွံတီပုဟ်။ စုတ် ဝါဲ (ပုလဲ) ဂၠိုၚ်ခ္ဍၚ်တိလီု ခ္ဍၚ်၊ ယးသၞာံ ဒးကြာတ် ဂၠိုၚ်တိုန် ခ္ဍၚ်ဒှ်မံၚ်ဗီုဏံရ။”
“ယဝ်ရပိုယ်ကၠောန်ကေတ်တ်ဝါဲ သဘာဝတှ်ေရော? ဒှ်ဟွံမာန်ပုဟ်ဟာ? အပါ”
“သဘာဝဂှ် ညးတၞဟ်စိုတ်ဟွံလုပ်စပုဟ်၊ ဂွံပြဟ်ညာတ်ပ္ဍဲမတ်ပြဟ်ဂှ်ရ ညးတၞဟ်စိုတ်လုပ်စ ကောန်ဗၠာဲ”
သွက်ဂွံထ္ၜးသက်သဳ မန်ပိုယ် ကၠောန်ဝါဗ္ရဂးတုဲ ခၞံဗဒှ်လဝ်ဂၠိုၚ်မန်ပိုယ်ရ။ ပေၚ်ကၠုၚ်(၇၀)သၞာံယျ အခိၚ်တ္ရဲဏံ သၟာန်ရဲကၠောန်ဗ္ရမ္ဂး စိုတ်အိုတ်ကၠုၚ် ဇၟာပ်ပ်သၞာံဂွံဆဵုကေတ်ရ။ ညးထံက်ပၚ် ထ္ၜးလ္ဘာ်ဟၟဲ၊ နဲကဲပညာ ဟွံဂွံ၊ ကၠောန်ဟွံဒှ်ပိုန်ဒြပ်တုဲ ထောံကၠုၚ်ဗ္ရ သိုက်က်တုဲ ညးလ္ရဵု ခံက်ဝါတံ ဗဝ်တိ ကၠောန်ဂအာၚ်သ္ရိ သွံစမ္ဂးပြဲဂၠိုၚ်နူကဵု ကၠောန်ဗ္ရ ချပ်ကၠုၚ် ဗီုဏံ ဂွံဆဵုမံၚ်လေဝ်နွံ။ ဒေသမန်ပိုယ်လၟုဟ် ပါဲနူစၟသြောံ၊ အခိၚ်ဍာ်ဇၞော်ကၠုၚ်မ္ဂး ကၞု အရံၚ်သာ်ဗ္ကေတ် စသြောံလေဝ် ဒှ်ကၠုၚ်ဟွံလံဏီရ။ အန္တရာယ်မွဲသာ်ပၠန်ဂှ် ဇြုံဗုဲ ပ္ဍဲဝါ လေဝ် နွံကၠုၚ်ဂၠိုၚ်တိုန်ရ။ ညးဇၞော်လ္ရဵုတံဟီု ဒှ်ဟိုတ်။ ညးလ္ရဵုပၠန်ဂှ် ဂြိုပ် ဟွံမွဲတုဲ ဟဳစှ်ေကၠုၚ်တုဲ ဒှ်ကၠုၚ်ပ္ဍဲဝါ ဟီုမံၚ်နာနာရ။ ဟိုတ်ဍေံချိုတ်တ်ပၠိုတ်တ်ဂှ် ညးမွဲလေဝ် လဴဟွံမာန်ရ။ အခိၚ်ပြဲလေဝ် ဂူဟွံမှာန်တုဲ သြောံဒးဗြဲ ဒးပကောံရာန်လဝ်ယာတ် ပါတ်တူလေဝ်နွံ အခိၚ်ပၠိုန်သြောံ ဗြဲဂူမ္ဂးဂွံဂြေပ်ဂးတုဲ ဒးဖအိုတ်လဝ် သီုကဵု ကိုဋ်ပၠန်ရ။
အခိၚ်အခါတ္ရဲဏံ ကၠောန်ဗ္ရမ္ဂး ဒးကၠောန်ကဵုစက် သီုညးဖအိုတ်ရ။ ထဴတိမ္ဂး ထဴကဵုစက်၊ ပ္တန်မပၠန်လေဝ် မၞိဟ်ဟွံမွဲ ဠိၚ်မၞိဟ်ပတန်မဟွံမာန် ၚုဟ်က္ဍၚ်တိုန်တုဲ ပတန်ကေတ်ဂွံသြောံခိုဟ်တီကီုလေဝ် ဝါဗ္ရ ဗွဲမဂၠိုၚ်ဂှ် ဒးကြာပ်ကေတ် အတိုၚ်ဏံရ။ ဂွံရပ်သြောံမၞိဟ်ဟွံမွဲတုဲ ဒးဠိၚ်စက်ကာပၠန်၊ ဝါတံဗွဲမဂၠိုၚ်ဂှ် ဍာ်မၚ်မံၚ်တုဲ ကာဂွံစိုပ်ပၠန်လေဝ် ဒှ်ဒဒိုက်မွဲသာ်ပၠန်ရ။ အခိၚ်ကာလ သြောံစိုပ် ဇိုၚ်ကၞၚ်ပၠန်လေဝ် ဒးဖေက်ဗြဲဂူ ပၠန်ဒးဂစာန်ကၠောန်၊ သြောံဂွံစိုပ်သ္ရိပြဟ်။ ဒးထရဳသြောံကဵုကျာသဘာဝဂှ် အခိၚ်ဟွံဟၟဲတုဲ ဒးကေတ်ကျာပါန်ကာတုဲ ဒးထရဳသြောံရ။ ဗ္ရဂွံတုဲ မွဲမွဲသၞာံဂှ် ဒဒိုက်စိုတ်၊ ကာယ ဟွံဍောတ်ပုဟ်။
----------- -------- ------------
“သၞာံဏံ ပရေၚ်ဍုၚ်ကွာန်ဟွံခိုဟ် စုတ်ဝါဲမွဲရိုက်ရမာန် သုတ”
“စုတ်ဝါဲဂှ် ဆေၚ်မံၚ်ကဵု ပရေၚ်ဍုၚ်ကွာန်ဟာ အမူ”
အမူပိုယ်ဂှ် ဒှ်ညးကၠောန်ဗ္ရကီုလေဝ် ကလၚ်ပရိုၚ် ပရေၚ်ဍုၚ်ကွာန်အရိုဟ်တ္ရဲရ၊ လုပ်မံၚ်ဗော်ညဳသၟဟ်မန်တုဲ ချဳဒရာၚ်မံၚ်ပ္ဍဲဗော် ဒှ်မံၚ်ညးတာလျိုၚ်မွဲတၠကီုရ။
“ရဲလ္ပာ်(NUG) ကော်ဆဴကဵု ဒပ်ပၞာန်ဂှ် ၜိုတ်ညးကော်ပတိုန် ၚုဟ်ဖျာကီုရ၊ ရဲပရေၚ်ပိုန်ဒြပ်ဝေၚ်ၚုဟ်မွဲတဲဂှ် ဝါဲမွဲရိုက် ၂၅၀၀၀ ဂှ် ဒှ်အာ ၅၀၀၀၀ လက်ယျတှ်ေ ဗီုလဵုဂွံစုတ်မာန်ရော၊ စုတ်ဟွံမာန်တှ်ေ ဟွံဂွံသြောံပၠန် အာအတိုၚ်ဏံရ သံသာ သၟာဝါဗ္ရ၊ စရိတ်ကၠေၚ် ဂွံရပ်သြောံပၠန် စရိတ်ရပ်သြောံလေဝ် က္ဍၚ်တိုန် ၜါချ ပၠန်ရ။ ဇၟာပ်အရာဂှ် က္ဍၚ်ကၠုၚ် သီုဖအိုတ်ရ”
“ဒေသပိုယ်ဏံပါဲနူကဵု သြောံဇၞော်တုဲ မုသွံတဵုခိုဟ်ရော?”
“ကမၠောန်ဝါဏံဂှ် ဗီုညးဂမၠိုၚ်တဵုရ ဒးတဵု၊ နူသၞာံအာဏံ စိုပ်ရံၚ် မ တၟိတုဲ တဵုစမ်ရံၚ် မွဲဨက ကီု မဂှ် သတ်ပြဟ်မံၚ်တုဲ ဂစေံတံ ကၠုၚ်စထောံအိုတ်၊ မွဲဨကဂှ် ၜိုန်ရတိတ်ခိုဟ်၊ပြဟ်ကီုလေဝ် ဇကုမွဲဓဝ်ကၠောန်တှ်ေ ဟွံအံၚ်ဇၞးပုဟ်၊ အခိၚ်ညးတၞဟ်သတ် ဇကုသတ်မှ ဂစေအ်တံစဂှ် ဟွံတီစကွေံကွေံပုဟ်၊ ဗီုဂှ်ဟွံသေၚ်တှ်ေ တဵုဗ္စဝေၚ်ဂစေံ ဓဝ်ရ သုတ”
“ဍုၚ်သေံ ရဲကၠောန်ဝါ ဒှ်သေဋ္ဌဳ ညာတ်ဒးပ္ဍဲပရိုၚ် မိပ်စိုတ်၊ ကွးဘာတံ ဒးကၠုၚ်လ္ရတ်ပ္ဍဲဗ္ရညးတံ ပိုယ်တံဆလအ်ဂွံဒှ်ရော? အမူ”
“အလဵုအသဳ ဗီုဏံရတှ်ေ အပါခေန်ဟီု “ကဠဳတေံ”
------- -------------- ------------- -----------
“ရဲကၠောန်ဗ္ရဒှ် သေဌဳမာန်ဟာ အပါ?” “သုတ” ဟွံဂွံဇြဟတ်စိုတ်ကဵု ရဲသၟာဘဝတုဲ သၟာန်တိုန်သာဏံ
“ရဲသၟာဗ္ရတံ ဒးသၟာန်ထေက်တၟာလံရ၊ သၟာန်ဗီုဗီုဏံ။ ကောန်ဗၠာဲသၟာန်တှ်ေ အပါသွဟ်ကဵုဏောၚ်။ ယဝ်ရ ဒးတၟော်မ္ဂး ကၠောန်ဗ္ရမွဲဨကမ္ဂး ထဴတိ၊ ဗတမ်မ၊ ရပ်သြောံ၊ ပၠိုၚ်တုဲ သြောံစိုပ်သ္ရိမ္ဂး အိုတ်ၚုဟ်မး မွဲဨကမ္ဂး ၜါကိုဋ် ဒကေဝ်၊ မွဲဨက တိတ်(၄၀)၊ နှေန်သြောံ နွံ(၁၀)ကိုတ်မှ ပရဲ (၂)ကိုဋ် စိုပ်အခိၚ်သြောံတိတ်ဂှ် ရဲရာန်တံပတ်လဝ်သက်ဟီုဟွံမွဲရ၊ ရဲဗ္ရဂှ် သြောံတိတ်မ္ရးတှ်ေ ဒးသွံတွဵုရ ဒးကလေၚ်လေဲ သြန်ဘဏ်၊ ကျတီမံၚ်ကီုလေဝ် ဒးဒုၚ်ကဵုဏာအတိုၚ်ဏံရ၊ အကြာဏံ စရိတ်ဇြဟတ်ကာယ ပိုယ်ဂှ် ဟွံပါဏီပုဟ် ဝါဇကုကၠောန်ကေတ်တ်တှ်ေ”
“ဝါဂှ် ယဝ်ရဒးအာ စၟ သြောံတှ်ေ”
“သၞာံဂှ် လေဲဂတှ်လေဝ်ဟွံမာန်၊ ကၠောန်ဝါတုဲ ဒှ်မံၚ်ဂတှ်အတိုၚ်ဏံရ။ ကၠောန်ဗ္ရလအ် ခတှ်ရပဵုတိုန်။ ပ္ဍဲဒၞာဲဋ္ဌာန်ဒေသညးတၞဟ်ဂှ် ဂွံ ဝါမွဲဨက ဒှ်သေဋ္ဌဳမာန်ကီု လေဝ် ပ္ဍဲဒေသမန်ပိုယ်ဂှ် တိပိုယ်ဂှ်သုၚ်စောဲ အခိၚ်တဵုသြောံ နွံမံၚ် မွဲအခိၚ်ဓဝ်ရတုဲ အခေါၚ်ဂွံဒှ်သေဋ္ဌဳ ဟွံညာတ်ရ”
ရဲသၟာဗ္ရတံ ကၠောန်မံၚ် နူစတ္ရဲပံက် စဵုကဵုတ္ရဲပၠိုတ်ဂှ် ဂွံစလေဝ်မွဲဗုၚ်ဓဝ်ရဟာ?၊ ပရေၚ်ပိုန်ဒြပ်လေဝ် ဟွံဒှ်မ္ဂး ဂွံကယျိုၚ်လမျီုကဵု ဝါဗ္ရဏံရော အာလအ်လအ်မ္ဂး ညးစိုတ်လုပ်စမာန်ညိဟာ? စိုပ်ကာလမွဲတ္ရဲ ရဲသၟာ တၠဓနတံ သွက်ဂွံ ဓလိုက်တမ်ရိုဟ် ကၠုၚ်ရာန်တိပိုယ်မ္ဂး ပိုယ်ဂိုဟ် တိပိုယ် မာန်ညိဟာ?
----- ------ ------------------ ----------------- ---------------------- ---------------------------
မၞိက်ရတ်
(၂၄၊ ၉၊ ၂၀၂၁)
သၞေဟ်ဗ္ဒဝ်