ပရေင် ဒဿန ဗဟုသုတ
(၁) ။ လိက်ပတ်ဟီုမ္ဂးဂှ်တှ်ေ ဒှ်သ္ကံတဲပိုဲမၞိဟ်တံခိုဟ်အိုတ်ရ၊ ဟိုတ်ဒှ်သာ်ဂှ်တုဲ ယဝ်ရပိုဲကောန်ဂကူတံလေပ်လဝ်လိက်ဂကူဂၠိုင်ဟေင် ဗဟုသုတပရေင်ဆဵုဂဗပရေင်ကၠိုဟ်စိုတ် နဲကဲသုင်စောဲဘဝလေဝ်ဒှ်ဖဵုဇၞော်ကဵုဒြဟတ်ကွေံကွေံရ၊ ပ္ဍဲကဵုလိက်ဗၟာလေဝ် ယဝ်ရပိုဲကောန်ဂကူတံလေပ်ဂၠိုင်ဟေင် ပေတုဲဒှ်ဖဵုသွက်ပိုဲမန်တံရ၊ (ပိုဲထေဲကဵုဗၟာတုဲ ပိုဲဟွံဗှ်ဟွံချူဟွံလ္ၚတ်လိက်ဗၟာမ္ဂးတှ်ေ ဗီုလဵုဂွံကလေင်ဒစဵုဒစးကဵုဍေံဂွံဂှ်အိုတ်ရော နဲလဵုပိုဲဂွံမာန်ဍေံဂှ်ရော)၊ ဟိုတ်ဂှ်ရတှ်ေ ပိုဲထေဲကဵုဍေံက္ဍင်တှ်ေ ထေက်ကြိုက်ပိုဲတံဒးတီဒးကၠိုဟ်လဝ်လိက်ဍေံအရေဝ်ဍေံမှ ပိုဲတံဂွံတီမူဍေံကၠောန်သ္ပမူဍေံဟီုဂးတုဲ ပိုဲတံဂွံရပ်ဇိုင်ဍေံဒးရ။ (ပိုဒ် − ၁) ။
(၂) ။ တင်သၟာန်ဟီုမ္ဂးဂှ်တှ်ေ ဒးတင်ဂုဏ်ကဵုညးမသၟာန်နင်လဝ်တံဂှ်ဇၞော်ကဵုဒြဟတ်ရ၊ ယဝ်ရပိုဲကၠောန်ဍာံကၠောန်ဇေတ်မ္ဂးတှ်ေ ဒၞာဲသၠေဟ်ပၟာတံဂှ်ဒှ်ကၠုင်တင်သၟာန်တုဲ ဣဏံဟေင်ရအခေါင်သွက်ဂွံထ္ၜးဓဝ်ဍာံကမၠောန်ဇကုမကၠောန်ဒၟံင်တံဂှ်ဟေင်ရ၊ တင်သၟာန်ဟွံမွဲမ္ဂးတှ်ေဟွံဒှ်ကၠုင်တင်သွဟ်ပုဟ်၊ ယဝ်ရတင်သွဟ်ဟွံမံက်ကၠုင်ရုပ်ရဴမ္ဂးတှ်ေ ဓဝ်ဍာံဟီုဂှ်ဟွံမွဲပ္ဍဲကမၠောန်မကၠောန်ဒၟံင်ဂှ်ရ၊ ဟိုတ်ဒှ်သာ်ဂှ်တုဲ မူကမၠောန်ကၠောန်ကၠောန်အခက်ခုဲပြသၞာဟွံမွဲဂှ်ဒှ်အာဟွံမာန်တုဲ အတိုင်သဘာဝဟေင်ပိုဲဒးသှ်ဗလးပ္တိတ်ကေတ်မာန်ရ၊ ယဝ်ရပိုဲကၠောန်ဍာံဟီုဍာံမ္ဂးတှ်ေ ဟွံဒးသုင်စောဲကၠေင်က္ဍဟ်တုဲ ကလေင်သှ်ဟီုလဴမာန်ဗွဲမလောဲလောဲသွာသွာရ၊ (ဓရ်ဍာံဟီုဂှ်ဒးဒှ်သဘာဝမွဲဟေင်)ရ၊ ယဝ်ရသုင်စောဲက္ဍဟ်ဒးကူချပ်လအ်လမ္ဂးတှ်ေ ဣဏံဂှ်အရေဝ်ဓရ်ဍာံဟွံသေင်ရ။ (ပိုဒ် −၂) ။
(၃) ။ ညးလဵုမွဲဒှ်မၞိဟ်ဍိုဟ်ကေက်စဳကၠးသ္ကေက်သ္ကာတံဂှ်ချပ်ကဵုအိုတ်အးမံင်ညိဏး၊ လ္ပဟီုကြဴမံင်အဲဏံဒှ်မၞိဟ်ဍိုဟ်ကေက်စဳကၠးအိုတ်မွံ၊ ဆဂးဂှ် ဇၟာပ်မၞိဟ်ဍိုဟ်ကေက်တံဂှ်ဒှ်အာမၞိဟ်ခိုဟ်ဖအိုတ်လေဝ်ဟွံသေင်ပုဟ်၊ ပ္ဍဲမၞိဟ်ဍိုဟ်ကေက်တံဂှ်လေဝ် ကၠောန်ဗၠေတ်နွံမံင်ကီုရ၊ ယဝ်ရဍေံတံကၠောန်ဗၠေတ်လီဠာန်တ္ၚံက်စၞာဲမ္ဂးတှ်ေ ပေဂၠိုင်နူကဵုမၞိဟ်ဒိုဟ်ဓီုတံဂၠိုင်ဂၠိုင်ကဵုဆဏီတင်ဏံချပ်ရံင်ကဵုအိုတ်အးမံင်ညိအဴကောန်မန်တံ။ (ပိုဒ် −၃) ။
(၄) ။ သြန်ဂှ် ဝါတ်လောဲလေဝ်သုင်စောဲဂွံဖအိုတ်ရ၊ ယဝ်ရသုင်စောဲဟွံလေပ်မ္ဂးတှ်ေ သေဋ္ဌဳကီုမၞိဟ်ဝါတ်ကီုဂှ် ဂွံကၠုင်ပြသၞာတုပ်တုပ်ကီုရ။ (ပိုဒ် −၄) ။
(၅) ။ (မတ်)အရီုပွမဆဵုညာတ် (ကတောဝ်)အရီုဂွံမိင် (မုဟ်)အရီုဂွံဒုင်ကေတ်ကျာ (လတာ်)အရီုဂွံဒုင်ရှ်သာ (စၞာံဇကု)အရီုစုတ်လုက်မဒှ်ရ၊ အရီုမသုန်ဏံဂှ်ဟေင်ရ ဖန်ဗဒှ်ဘဝပိုဲသတိဒးလီုလာ်။ (ပိုဒ် −၅) ။
(၆) ။ ကောန်ၚာ်ၜါတက်ၜုင်ညးသ္ကံမ္ဂးတှ်ေ ပိုဲမိယာဲတံ ဒးစၟဳစၟတ်(ဟိုတ်ဖဵု)ဍေံကၠးကၠးတုဲ ကောန်ၚာ်မွဲလပါ်ဂှ်ဒးဗၠေတ်နွံရ၊ နကဵုဆာန်ကောန်တုဲ ကောန်ဒးဟွံဒုင် နကဵုဒေါသသ္ကာတ်သ္ကာတ် ဂံင်ထ္ၜးအစောန်စရာဲကဵုညးဍုင်ကွာန်ဗဵုဝေင်အိုတ်ရ။ (ပိုဒ် −၆) ။
(၇) ။ ပိုဲတံသၟာန်မံင်ခန္ဓကာယပိုဲဏံကီုဟာ(ဘဝအဲဗီုဒ်ှနွံဒၟံင်တ္ၚဲဏံဂှ်ပေင်ဗၟိက်စိုတ်ရဟာ)၊ ယဝ်ရပိုဲသၟာန်ဒၟံင်စိုတ်တေံတွဵုဏောင်တှ်ေ တ္ၚဲဂွံပေင်စိုတ်ပိုဲမၞိဟ်ဏံဂှ်အခိင်ပေင်ဟွံမွဲရ၊ ဟိုတ်ဒှ်သာ်ဂှ်တုဲ (စိုတ်)ဏံမွဲဟေင်ရဒှ်နာဲတၠဘဝပိုဲဏံကီုရ၊ စိုတ်အာလပါ်ပရေံတှ်ေဘဝပိုဲလေင်ရ၊ စိုတ်အာလပါ်ဂၠံင်တရဴတပ်ဓဝ်ဏောင်တှ်ေ ဘဝပိုဲဏံလေဝ်ဂွံတသိုက်ပ္ဍဲအခိင်မသှ်ေဒၟံင်သီုဖအိုတ်ဏံရ။ (ပိုဒ် −၇) ။
(၈) ။ ဘဝမလောန်ကၠုင်နူအတိက်တုဲကၠုင်တေံဂှ် ပိုဲတံလ္ပဂၠာဲဒုဟ်လ္တူညးသ္ကံအိုတ်ညိအဴ၊ ထေက်ကြိုက်ဒးရံင်ပစ္စုပ္ပန်တ္ၚဲဏံညိ၊ သဘာဝမၞိဟ်ဟီုဂှ် အခိင်ပြံင်သၠာဲနွံတုဲ ပိုဲတံလ္ပရံင်ဆဵုကေတ်ဘဝဍေံဗီုတြေံတေံဂှ်တွဵုညိ၊ ပိုဲဒးရံင်ပစ္စုပ္ပန်တ္ၚဲဏံဍေံ သုင်ဘဝဗီုလဵု ဟီုဂးအရေဝ်ဗီုလဵုဂှ်အိုတ်ညိ၊ ယဝ်ရသာ်ဂှ်ဟွံသေင်မ္ဂးတှ်ေ ပိုဲရံင်ညးတၞဟ်ဒှ်ဒၟံင်လပါ်အနှုက်တွဵုရ။ (ပိုဒ် − ၈) ။
(၉) ။ တသိုက်မိမၜါဇၞော်အိုတ်ဟီုဂှ်တှ်ေ (ကောန်ဒှ်မၞိဟ်ခိုဟ်မွဲ ရီုဗင်ဘဝဇကုမာန်)တှ်ေ ဣဏံရတသိုက်မိမၜါဇေတ်ဇေတ်၊ ယဝ်ရနဲကဲသုင်စောဲဘဝကောန်တံဒှ်ဒၟံင်အခက်ခုဲပြသၞာတွဵုတှ်ေ ပ္ဍဲအခိင်တေံဂှ် မိမၜါလေဝ်ဗျုဇရာတုဲ ညးဂှ်ဂွံရီုဗင်မင်မွဲလွဳပရာညးတံအိုတ်ရော၊ ဟိုတ်ဂှ်ရတှ်ေ ၜိုတ်ဆဘဝကောန်တံဍေံဟွံပြေပြံင်ဏောင်တှ်ေ ဗီုလဵုဂွံရီုဗင်မိမၜါရော။ (ပိုဒ် − ၉) ။
(၁၀) ။ ဒ်ှမၞိဟ်တၠပညာဟွံဂွံ ဒှ်မၞိဟ်တၟေင်လေဝ်ဟွံလောဲတှ်ေလ္ပအောန်စိုတ်ညိ၊ မၞိဟ်တၟေင်ဟွံဂွံဒှ်တှ်ေဒးဒှ်မၞိဟ်ဓမ္မတာမွဲညိ၊ ဒှ်မၞိဟ်ဓမ္မတာမွဲဟေင်ခိုဟ်အိုတ်ရ၊ ဓမ္မတာဂှ်သဘာဝ သဘာဝဂှ်လေဝ်ဓရ်ရ၊ ဒှ်မၞိဟ်ဓမ္မတာမွဲဟေင်ဘဝဏံသၠးဗွးတုဲ ဂွံဆဵုကေတ်ဘဝပိုဲဏံဇေတ်ဇေတ်ကၠးကၠးမာန်ရ။ (ပိုဒ် − ၁၀) ။
(၁၁) ။ မူပပိုဲဏံဒးက္တဵုဒှ်ကၠုင်မၞိဟ်ဂှ်ရော၊ အဃောပိုဲဂျိုင်မံင်အခိင်မသှ်ေတံဂှ်လေဝ်မူပိုဲတံဒးကၠောန်ဒးသ္ပအိုတ်ဂှ်ရော၊ (သွဟ်ဍေံဟီုဂှ်တှ်ေ) ပိုဲတံက္တဵုဒှ်ကၠုင်မၞိဟ်ဂှ်တှ်ေ ဒးကၠုင်ကၠောန်ဖဵုခိုဟ်မွဲရ၊ အခိင်မသှ်ေဒၟံင်တံဂှ်ပၠန်လေဝ်ဒးကၠောန်ဖဵုခိုဟ်ပၠန်ရ၊ ဖဵုခိုဟ်ဟီုဂှ်ဒှ်ကမၠောန်လပါ်ခိုဟ်မွဲဟေင်ရ။ (ပိုဒ် − ၁၁) ။
(၁၂) ။ လ္တူလပှ်ကျာ(Online)အခေတ်တ္ၚဲဏံဂှ်ဂတာပ်အခေတ်ကွေံကွေံရ၊ ဆဂးဂှ်တှ်ေ ဒှ်ညံင်ရဴကဵုၜုန်ကေက်ဒၟံင်သီုၜါလပါ်ကီုတုဲ ယဝ်ရပိုဲကောန်ဂကူတံသုင်စောဲစကာဍေံဟွံလေပ်မ္ဂးတှ်ေဗဒှ်ကဵုဘဲအန္တရာဲသွက်ဘဝပိုဲဏံမာန်ရ၊ ယဝ်ရပိုဲကောန်ဂကူတံသုင်စောဲစကာဍေံဒှ်မ္ဂးတှ်ေ ဗဒှ်ကဵုဘဝပိုဲကောန်ဂကူတံဂွံကၠုင်ဂုဏ်ဖဵုနာနာမာန်ရ။ (ပိုဒ် − ၁၂) ။
(၁၃) ။ ယဝ်ရပိုဲဒှ်မၞိဟ်ကၠောန်ကမၠောန်မွဲ ဒှ်မၞိဟ်ဆာန်ကမၠောန်မွဲတှ်ေ အခိင်ဟီုမ္ဂးဂှ်ပြဟ်တဴကွေံကွေံရ၊ အခိင်မသှ်ေဒၟံင်ပ္ဍဲမွဲဘဝဂှ်နွံကဵုၚုဟ်မးဗွဲမလောန်ရ၊ ဟိုတ်ဒှ်သာ်ဂှ်တုဲ ပိုဲမၞိဟ်ဏံဂှ်ကၠောန်ဂွံတဴအရာတၟေင်တၟေင်ဗွဲမဂၠိုင်ပ္ဍဲအခိင်မသှ်ေဒၟံင်ဏံဂှ်ရ၊ အခိင်ချိုတ်အာတုဲ ဘဝဏံဂှ်ဒှ်အာသုညရ၊ အခိင်မသှ်ေဒၟံင်တ္ၚဲဏံဟေင်ရ မူပပိုဲတံဖအိုတ်မံင်အခိင်မွဲတ္ၚဲတုဲမွဲတ္ၚဲဂှ်အိုတ်ရော၊ (ပိုဒ် − ၁၃) ။
(၁၄) ။ သွပ်လ္ပအ်တံဂှ်လဆောဝ်လဆောဝ်တှ်ေ ဘဝဇေတ်ဇေတ်ဏံလေဝ်ဒှ်ကၠုင်မာန်ဏောင်၊ သွပ်လ္ပအ်လ္ၚဵုဂှ် ယဝ်ရတုပ်မံင်ကဵုတိုင်ပ္ကဴပိုဲတံမရန်တၟံလဝ်ဏောင်တှ်ေ ပိုဲဏံဂွံကၠုင်ဂ ဥုဲဒြဟတ်မွဲသွုင်တုဲ သွက်ဂွံဆက်ပြိုင်အာဘဝညံင်ဂွံစိုပ်အာတိုင်ပ္ကဴတေံမာန်လောဲလောဲရ၊ ယဝ်ရဓဝ်ပတ်ှေပိုဲနွံ ပိုဲဆာန်မံင်တိုင်ပ္ကဴတေံဏောင်တှ်ေ ဟီုစဟွံဂွံရဂှ် ဗီုပိုဲတိက်လ္ပအ်နူဗ္တံဂှ်ဒှ်မာန်ဏောင်ဟာဟွံတီ၊ ဟိုတ်ဂှ်ရတှ်ေ ဘဝဂှ်ပိုဲတံလ္ပသာသ္ပအ်အိုတ်ညိအဴ။ (ပိုဒ် − ၁၄) ။
(၁၅) ။ ယဝ်ရပိုဲဒှ်ကောန်ဗုဒ္ဓဘာသာမ္ဂးတှ်ေ ဗီုအပါပိုဲလးလဝ်ဂၠံင်ဍာန်တံဂှ် ယဝ်ရပိုဲကောန်တံဗက်ကွာ်အာမ္ဂးတုဲ နဲကဲသုင်စောဲဘဝ နဲကဲပြိုင်ပ္ကာန်ကဵုပြသၞာ နဲကဲဗပေင်ဗုင်ဂၞဴ နဲကဲရေင်တၠုင်ဖဵုနာနာအရာဆေင်စပ်ကဵုဘဝပိုဲတံဂှ်တှ်ေ အပါပိုဲဗုဒ္ဓစဳရေင်ဗ္တောန်လဝ်တုဲဒှ်မံင်အိုတ်ရ၊ ယဝ်ရပိုဲကၠိုဟ်ဗုဒ္ဓဘာသာမ္ဂးတှ်ေ ဂၠံင်ဍာန်အပါပိုဲလးလဝ်ဂှ်ပိုဲတံဆက်ကွာ်အာသိုက်သိုက်မ္ဂးဟေင် ဂွံစိုပ်အာတိုင်ပ္ကဴဘဝမာန်ရ၊ ဟိုတ်ဒှ်သာ်ဂှ်တုဲ နဲကဲသုင်စောဲဘဝယဝ်ရပိုဲကောန်တံဂၠာဲတသိုက်ဟွံဆဵုမ္ဂးတှ်ေ ဂၠံင်ဍာန်ပိုဲကွာ်ဒၟံင်တ္ၚဲဏံဂှ်ဒှ်ဂၠံင်ဍာန်အပါပိုဲလးလဝ်ဟွံသေင်ပုဟ်၊ ပိုဲကွာ်ဒးအာဂၠံင်ဍာန်ဗၠေတ်ဗၠေတ်ကီုရ၊ (ယဝ်ရဂၠံင်ဍာန်ဗုဒ္ဓဘာသာမ္ဂးတှ်ေ အရာနာနာဆေင်စပ်ကဵုဘဝပိုဲတံဂှ်တှ်ေဒးလောဲသွာဖအိုတ်မာန်)ရ၊ ဂၠံင်ဍာန်အပါပိုဲဂှ်ဒှ်ဒၟံင်ဂၠံင်ဍာန်သဘာဝမွဲတုဲ ဟိုတ်ဂှ်ဟေင်ရ သဘာဝဂှ်သာမညဓမ္မတာမွဲရ၊ ဟိုတ်ဏံဟေင် ဂၠံင်ဍာန်ဗုဒ္ဓဘာသာဟီုမ္ဂးအရာဆေင်စပ်ကဵုဘဝပိုဲဏံဂှ်တှ်ေဒးလောဲသွာဖအိုတ်ရ၊ ဣဏံရဂၠံင်ဍာန်အပါပိုဲဇေတ်ဇေတ် ဣဏံရဒှ်ဂၠံင်ဍာန်ဗုဒ္ဓဘာသာသွက်ပိုဲဇေတ်ဇေတ်ရ။ (ပိုဒ် − ၁၅) ။
(၁၆) ။ ကၠောန်ကုသဵုတုဲတြုံဗြဴဒှ်သၞသေက်ဇဵုညးသ္ကံဂှ်ဍေံဟွံဒှ်ကုသဵုကီုရ၊ ကၠောန်ကုသဵုတုဲဖဵုကုသဵုဂှ်ဒးသုင်စောဲဂွံပ္ဍဲပစ္စုပ္ပန်တ္ၚဲဏံရ၊ ကၠောန်ကုသဵုဟီုမ္ဂးဂှ် (ကၠောန်ခိုဟ် ကၠောန်ဖဵု ရေင်တၠုင်ဖဵုလေဝ်)ဟီုစဂွံတုဲ ဖန်ဗဒှ်ကဵုစိုတ်ပိုဲညိင်ဝတ်သ္အးဇ္ၚးတုဲ ကၠောန်ကမၠောန်လေဝ်စိုပ်အာတိုင်ပ္ကဴပြဟ်ပြဟ်မာန်ရ၊ ဇေတ်ဇေတ်ဂှ်တှ်ေၜိုတ်ဆဗဂဵုလဟဵုစိုတ်ပိုဲမဒှ်ရ၊ စိုတ်မွဲခိုဟ်အာတုဲ အရာနာနာသီုဖအိုတ်ပ္ဍဲဘဝပိုဲဏံဂှ်တှ်ေ (စိုတ်ဒှ်နာဲခန္ဓဒှ်ဍိက်)တုဲ နာဲကွာ်အာဍာန်တပ်အးမွဲတၞုင်တှ်ေ ခန္ဓဘဝပိုဲဏံဂှ်လေဝ်ဂွံဒှ်တသိုက်မာန်ရ ဇေတ်ဇေတ်ဂှ်တှ်ေၜိုတ်ဏံဓဝ်ရ၊ သဗ္ဗနာနာဍေံက္တဵုဒှ်ပ္ဍဲဘဝပိုဲဏံဂှ်တှ်ေ(ဒးနွံကဵုဟိုတ်ဖဵု)ဟေင်ရ၊ ပိုဲဒးသမ္တီလဝ်တွဵုညိဏး ဟိုတ်နွံမှဖဵုဒှ်ဏောင်၊ ယဝ်ရဟိုတ်လေဝ်ဟွံမွဲတှ်ေ ဖဵုလေဝ်ဟွံဒှ်ဟွံမံက်ကၠုင်ရ၊ ဟိုတ်ဒှ်သာ်ဂှ်တုဲ (ဓရ်ဂှ်သဘာဝမွဲတုဲ သဘာဝဂှ်သုည)ရ။ (ပိုဒ် − ၁၆) ။
(၁၇) ။ ပ္ဍဲကဵုကောန်ၚာ်(၃၀)တၠဂှ် ယဝ်ပိုဲစကာကဵုလံက်စုတ်ဍာ်ဂဉုဲအရံင်နာနာပ္ဍဲကဵုပ္ၚာန်လက်ဖက်ဂှ်တှ်ေ ယဝ်ပိုဲကဵုလံက်စုတ်ဗီုပိုဲစကာမွဲအရံင်မ္ဂးတှ်ေ ပိုဲဂွံကၠုင်ပ္ၚာန်လက်ဖက်မွဲအရံင်တုဲဒှ်ညံင်ပ္ၚာန်လက်ဖက်မွဲမကီုရ၊ ယဝ်ရပိုဲသၠာဲထောံနဲကဲတၟိမ္ဂးတုဲ ကဵုလဝ်အခေါင်သၠးဗွးဇၟာပ်ကောန်ၚာ်တံဂှ်မ္ဂးတှ်ေ ဗီုညးကဵုညးဒးစိုတ်အရံင်ဗီုလဵုဂှ်လံက်စုတ်မာန်ရ၊ ယဝ်ရပိုဲကဵုလဝ်အခေါင်ဗီုဏံဏောင်တှ်ေ စိုတ်ကောန်ၚာ်တံဂှ်လေဝ်ဟွံကြေပ်ဂြတ်တုဲ ၜိုတ်အစောန်ညးနွံဂှ်ဂံင်တံင်ပ္တိတ်နင်သုင်စောဲအိုတ်ရ၊ ဗွဲလက္ကရဴဟေင်ပိုဲတံဂွံကၠုင်ပ္ၚာန်လက်ဖက်(၃၀)မပိစှော်အရံင်ဟွံသေင်ဟာ။ (ပိုဒ် − ၁၇) ။
(၁၈) ။ (လောဲမှဒိုအ်အရက်ဒိုအ်ချေံ)အရေဝ်ဝွံကလေင်ဂတးထောံစမ်ညိအဴ၊ (ချေံဒိုအ်အရက်ဒိုအ်မှလောဲ)၊ ဗီုလဵုရော ၜိုတ်ဆဂတးထောံမအရေဝ်ဂှ်ဟေင် ဘဝဂှ်ပြံင်သၠာဲဒှ်အာမၞိဟ်လောဲလောဲဟဂှ်သေင်။ (ပိုဒ် − ၁၈) ။
(၁၉) ။ ပိစှော်တ္ၚဲပၠန်ယဝ်ပိုဲဒးချိုတ်ဏောင်ဟီုတှ်ေ အခိင်မသှ်ေဒၟံင်(၂၉)တ္ၚဲဂှ်ဗီုလဵုပိုဲဒးသုင်စောဲဘဝအိုတ်ရော၊ ဇၟာပ်ညးအဲမိက်သ္ဂောံကၠောန်ဟီုဂှ်တှ်ေ ဖဵုခိုဟ်မွဲဟေင်ဒးကၠောန်တဴရ၊ အခိင်မသှ်ေဒၟံင်ဇၟာပ်ဇၟာပ်တ္ၚဲဂှ် အရာဍေံဒှ်ဖဵုဇၞော်အိုတ်သွက်ဘဝဂှ်ဒးဂ္စါန်ကၠောန်တဴအိုတ်ရ၊ ဟိုတ်ဒှ်သာ်ဂှ်တုဲ အခိင်ဟီုမ္ဂးဂှ်ၚုဟ်မးဍေံဇၞော်တဴဗွဲမလောန်ကွေံကွေံရ၊ ယဝ်ရပိုဲတီကၠိုဟ်ကၠးကေတ်သာ်ဏံတုဲ မူပရောပိုဲတံသာသ္ပအ်ဒၟံင်ကဵုအခိင်ဂှ်အိုတ်ရော၊ တ္ၚဲဏံဟာတ္ၚဲယျးဟာပိုဲတံဒးချိုတ်ဟီုဂှ်ညးမွဲမှတီကေတ်ဟွံမာန်ရ၊ အရာပိုဲတီကေတ်ဟွံမာန်ဂှ်ဒးဖေက်ကွေံကွေံရ၊ ဟိုတ်ဂှ်ရတှ်ေ တ္ၚဲဏံဟေင်ဒးကၠောန်ဖဵုခိုဟ်ခိုဟ်ၜိုတ်အစောန်ပိုဲနွံဂှ်ဒးဂ္စါန်ကၠောန်တဴအိုတ်ညိအဴ။ (ပိုဒ် − ၁၉) ။
(၂၀) ။ ယဝ်ရပိုဲဂၠုဓီုဒၟံင်ပ္ဍဲကဵုဂကောံဘဝပတောံဇၟာပ်ဇၟာပ်တ္ၚဲမ္ဂးတှ်ေ ဘဝဇေတ်ဇေတ်ဟီုဂှ်ပိုဲတံဆဵုကေတ်ဟွံမာန်ရ၊ ဟိုတ်ဒှ်သာ်ဂှ်တုဲ လဆောဝ်လဆောဝ်တှ်ေပိုဲဏံဒးမံင်မၞိဟ်မွဲသ္ၚိတ်သ္ၚိတ်ကီု ဒးကဵုအခိင်သွက်ဘဝပိုဲမံင်ညိင်ညိင်ညးမွဲဂှ်ကီု သာ်ဂှ်ဟွံသေင်တှ်ေ ထေက်ကြိုက်ဒးမံင်ကဵုသဘာဝညးမွဲတုဲ ပ္ဍဲအခိင်ဂှ်ဟေင်ပိုဲဏံဂွံဆဵုကေတ်ဘဝဇေတ်ဇေတ်မာန်ရ၊ ဘဝဇေတ်ဇေတ်ဟီုဂှ် လဆောဝ်လဆောဝ်တှ်ေဍေံနွံဒၟံင်ပ္ဍဲကဵုဘဝမၞိဟ်ဓမ္မတာမွဲတုဲ ဍေံဟွံကျေဝ်ဂေါဝ် ဍေံဟွံဒယှ်တှ် ဍေံဟွံဂတာပ်အခေတ် ဟွံမွဲကဵုပွမထိုင်သးတုဲဟွံမွဲကဵုလာပ်ဗဇဴရ၊ ယဝ်ရပိုဲကၠိုဟ်ကေတ်ကၠးကၠးဏောင်တှ်ေပ္တိုန်ၚုဟ်မးဟွံမာန်ရ၊ ဖဵုဏံမွဲဟေင်ရဘဝဂှ်နွံဗၟိက်ဇၞော်အိုတ်တုဲ အခိင်ပိုဲမသှ်ေဒၟံင်သီုဖအိုတ်တံဂှ် ဂွံသုင်စောဲဘဝဟီုဂှ်တှ်ေ(တသိုက်)ရ။ (ပိုဒ် − ၂၀) ။
(၂၁) ။ တ္ဍဲဏံဇွောံမစၞစအဟာရလေဝ်ဍိုက်ပေင်ဒၟံင်ရတှ်ေ မူပရောဒှ်ဒၟံင်ပေဲါပြိုင်ပ္ကာန်ဂှ်အိုတ်ရော? ဘဝဟီုဂှ်စွံလဝ်တိုင်ပ္ကဴဗီုလဵုအိုတ်ရော? တသိုက်ပ္ဍဲဘဝဇေတ်ဇေတ်ဂှ်လေဝ်ဗီုလဵုအိုတ်ရော? ဂျိုင်ဒၟံင်တ္ဍဲဏံဂှ်လေဝ်မူအဓိပ္ပဲါရော? ပိုဲဒးသမ္တီလဝ်တွဵုမွဲဂှ်တှ်ေ ဘဝပိုဲဏံဂှ်အခိင်အိုတ်ကၠုင်မံင်သိုက်သိုက်ကီုရ၊ အခိင်ဂှ်ယဝ်ပိုဲကၠိုဟ်ကေတ်ၚုဟ်မးဍေံမ္ဂးတှ်ေ ဒှ်တဴဖဵုသွက်ဘဝပိုဲဗွဲမလောန်ရ၊ ဟိုတ်ဂှ်ရတှ်ေ ပေဲါပြိုင်ပ္ကာန်လပါ်ဘဝမ္ၚးပၞောန်ဂှ်လ္ပဆက်ကွာ်အာအိုတ်ညိအဴ။ (ပိုဒ် − ၂၁) ။
(၂၂) ။ တာလျိုင်စံင်အ္စာဟီုမ္ဂးဂှ်တ်ှေ ဗဂဵုလဟဵုကောန်ကွးဆာန်တံဂွံဒၟံင်ပွိုင်(၂၄)နာဍဳပေင်ပေင်ရ၊ ပိုဲစံင်အ္စာတံဟွံဒးမင်အလဵုသဳတုဲ ဗီုဗၟိက်စိုတ်ပိုဲဆဵုကေတ်ဖဵုခိုဟ်ခိုဟ်ဏောင်တှ်ေ ဗဂဵုလဟဵုတဴဂွံဒၟံင်လၟိုန်ရ၊ ဖဵုခိုဟ်ခိုဟ်လ္တူကွးဆာန်နွံဒၟံင်ပ္ဍဲကဵုစဳပၞောန်ကီုမ္ၚးသၞောဝ်ကီုဂှ် ယဝ်ရပိုဲဆဵုကေတ်ဖဵုဇၞော်တဴကဵုဒြဟတ်ဏောင်တှ်ေ ဗဂဵုလဟဵုဂွံတဴလၟိုန်အခိင်အခါရ၊ ဟိုတ်ဒှ်သာ်ဂှ်တုဲ နဲကဲဗဂဵုလဟဵုဟီုဂှ် ဒှ်ၚုဟ်မးဇၞော်တဴသွက်ဘဝကွးတံရ၊ နဲကဲဗဂဵုလဟဵုနာနာလေဝ် ပိုဲစံင်အ္စာတံဒးဂၠာဲဒၟံင်လၟိုန်အခိင်အခါသွက်ကွးတံရ။ (ပိုဒ် − ၂၂) ။
(၂၃) ။ နဲကဲဗဂဵုလဟဵုဂကူဟီုမ္ဂးဂှ်တှ်ေ မၞိဟ်တၠအစောန်မၞိဟ်တၠပညာသီုဖအိုတ် ကောံဒၟံင်မွဲကလောံမွဲဂကောံဂှ်လေဝ် ဒှ်နဲကဲခိုဟ်မွဲဟွံသေင်ရ၊ ဟိုတ်ဒှ်သာ်ဂှ်တုဲ ဒးနွံကဵုဂၠိုင်ကဵုဂကောံ ဂၠိုင်ကဵုကသပ်လညာတ် ဂၠိုင်ကဵုတင်သၟာန် ဂၠိုင်ကဵုနဲကဲဒစဵုဒစးတုဲဟေင် ကမၠောန်ပိုဲကၠောန်ဒၟံင်တ္ၚဲဏံဂှ် ဂွံဆဵုကေတ်ဂၠံင်တိတ်အးမွဲတၞုင်(ဓရ်ဍာံ)ခိုဟ်ရ၊ ဂကောံနာနာ လညာတ်ကသပ်နာနာတံဂှ် မိက်သ္ဂောံဆဵုကေတ်ဂၠံင်ဍာန်တပ်အိုတ်မွဲတၞုင်တုပ်တုပ်တုဲ ဒးဖန်ဂၠာဲတဴညးသ္ကံညဳညဳသာသာတုဲတိုင်ပ္ကဴဂှ်တုပ်တုပ်ရ။ (ပိုဒ်−၂၃) ။
(၂၄) ။ ဓရဳဂှ်ဍာ်ပေင်ဒၟံင်တုဲ ၜိုန်ရပိုဲကၟံက်နင်ဍာ်ကီုတုဲစဝ်ဗပေင်စုတ်ပ္ဍဲဓရဳဂှ်မ္ဂးတှ်ေ ဍာ်ပိုဲမကၟံက်နင်လဝ်တံဂှ်လေဝ်ဟွံလုပ်ဓရဳတုဲကၟိုဟ်တိတ်အာအိုတ်တးကီုရ၊ ဟိုတ်ဒှ်သာ်ဂှ်တုဲ ပိုဲဒးကၠိုဟ်လဝ်မွဲဟီုဂှ်တှ်ေ နဲကဲဗဂဵုလဟဵုပ္ဍဲဘဝပိုဲမၞိဟ်ဏံဂှ်တ္ၚဲဍေံအိုတ်အာဟွံမွယ်ကီုရ၊ အရာနာနာဒၞာဲပိုဲတံဟွံကၠိုဟ်ဟွံတီဟွံကၠးဂှ်နွံဒၟံင်ဗဝ်သအဝ်ဏီပ္ဍဲလ္တူလောကဏံသွက်ပိုဲတံဂွံလ္ၚတ်ဂွံဗဂဵုလဟဵုဂှ်လေဝ်နွံဒၟံင်တၟာဟလိုင်ဏီရ။ (ပိုဒ်−၂၄) ။
(၂၅) ။ ဇၟာပ်မၞိဟ်တၠပညာဟီုဂှ် ဒှ်မၞိဟ်ခိုဟ်အာဖ္အိုတ်ဟွံသေင်ပုဟ်၊ ဇၟာပ်မၞိဟ်တၠပညာတံဂှ်လေဝ်ကၠောန်ဗၠေတ်နွံမံင်ကီုဏောင် ယဝ်ရဍေံတံကၠောန်ဗၠေတ်လီဠာန်တ္ၚံက်စၞာဲမ္ဂးတှ်ေ ပဵုဂၠိုင်နူကဵုမၞိဟ်ဒိုဟ်ဓီုတံဂၠိုင်ဂၠိုင်ကဵုဆဏီတင်ဏံချပ်ရံင်ကဵုအိုတ်ညိဏးကောန်ဂကူတံ၊ ယဝ်ရပညာနွံတုဲ ဒှ်ဒ္တုဲဖဵုကွာ်အာဂၠံင်ဍာန်တပ်အးမွဲတၞုင်ဏောင်တှ်ေ ထေက်ကြိုက်ဒးထိုင်သးမာန်ရ၊ ဟိုတ်ဒှ်သာ်ဂှ်တုဲ ပညာနွံတုဲ ညံင်ဂွံဒှ်ဒ္တုဲဖဵုမာန်ဂှ်ဂိုတ်ဂစာန်အိုတ်ညိကောန်ဂကူတံ။ (ပိုဒ်−၂၅) ။
(၂၆) ။ တ္ၚဲဏံလမျီုသှ်ေမံင်ဏီဏောင်တှ်ေ ဒၞာဲပိုဲမိက်သ္ဂောံကၠောန်တံဂှ်လေဝ်နွံဒၟံင်တၟာဂလိုင်ဏီရ၊ ဟိုတ်ဒှ်သာ်ဂှ်တုဲ ဒၞာဲပိုဲကၠောန်ဟွံဂွံကၠောန်ဟွံဒှ်ဂှ်ဟွံမွယ်ရ၊ သီုဖ္အိုတ်တံဂှ် အိုတ်ပိုတ်ကၠုင်ဒၟံင်(နဲကဲဗဂဵုလဟဵု)မွဲရ၊ နဲကဲဗဂဵုလဟဵုနာနာဂှ်ဟေင် ယဝ်ကေတ်နင်ပ္ဍဲဘဝပိုဲမ္ဂးတှ်ေ အရာနာနာတံဂှ်လေဝ်ကၠောန်ဂွံကၠောန်ဒှ်ဖအိုတ်ရ။ (ပိုဒ်−၂၆) ။
(၂၇) ။ ပ္ဍဲအခိင်ကဵုဒါန်မသြန်ဂှ် နကဵုတၞးသြန်မွဲကလောံထပ်လဝ်ဂၠိုင်ဂၠိုင်သၠုင်သၠုင်ဂှ် ဟွံမိက်ဆဵုညာတ်ကေတ်ကွေံကွေံရ၊ နဲကဲခိုဟ်အိုတ်ဂှ်တှ်ေ ယဝ်ရသြန်ဟွံဂၠိုင်မ္ဂး စုတ်လဝ်ကဵုထိုင်လိက်တုဲ ကဵုဒါန်ဗစိုပ်ကဵုညးဒုင်ကေတ်ဒါန်ဂှ်ညိ၊ ယဝ်ရမသြန်ဂၠိုင်အာဏောင်တှ်ေ ချူလဝ်မလိက်လၟိဟ်သြန်ကဵုဒါန်တုဲ ကဵုဒါန်ဗစိုပ်ကဵုညးဒုင်ဒါန်ဂှ်ညိ၊ နဲဏံမွဲနဲဟေင် ဒှ်နဲကဲဂတာပ်အခေတ်တုဲရံင်စလေဝ်စှ်ေဗီုပြင်ဗွဲမလောန်ရ၊ အခေတ်တ္ၚဲဏံဂှ် ဒှ်အခေတ်လပှ်ကျာဂတာပ်အခေတ်မွဲတုဲ အရာနာနာတံဂှ်မြက်တဴကွေံကွေံရ၊ ဟိုတ်ဒှ်သာ်ဂှ်တုဲ ကၠာတင်သၟာန်ဟွံစိုပ်ဂှ် ညးကဵုဒါန်ကီု ညးဒုင်ကေတ်ဒါန်ဂှ်ကီု ထေက်ကြိုက်ပိုဲဒးသ္ပကၠောန်ဗီုလဵုညံင်ရဴဟွံဂွံဒှ်တင်သၟာန်နာနာဂှ်ကၠောန်တဴအိုတ်ညိကဵုဒါန်အိုတ်ညိဒုင်ဒါန်အိုတ်ညိအဴ။ (ပိုဒ်−၂၇) ။
(၂၈) ။ တ္ၚဲဏံယာဇိုင်ကွာ်အာမွဲဂံါတှ်ေ တရဴတိုင်ပ္ကဴပိုဲတေံဂှ်ယအ်ဂၠိစှ်ေကၠုင်မွဲဂံါကီုရ၊ ၜိုတ်ဆပိုဲတံယာဇိုင်ဂှ်တိုင်ပ္ကဴတေံကြပ်ကၠုင်အရိုဟ်တ္ၚဲရ၊ ဟိုတ်ဂှ်ရတှ်ေ အခိင်ဂှ်လ္ပဖ္တိုတ်ထောံဍေံသၟသၟးအိုတ်ညိအဴ၊ ပိုဲမၞိဟ်ဂျိုင်ဒၟံင်တ္ၚဲဏံဂှ်ထေက်ကြိုက်ဒးကၠောန်ဖဵုခိုဟ်မွဲဟေင်ရ၊ မူကၠောန်ကၠောန် မူဟီုဟီု မူချပ်ချပ် ကမၠောန်ဂှ်ဒှ်ဖဵုဏောင်တှ်ေ ဆက်ချပ်ဆက်ဟီုဆက်ကၠောန်အာညိအဴ။ (ပိုဒ်−၂၈) ။
(၂၉) ။ ပစ္စုပ္ပန်တ္ၚဲဏံခိုဟ်ဟေင်အတိက်အနာဂတ်လေဝ်ခိုဟ်အာဖ္အိုတ်မာန်ရ ဟွံဒးမင်ကံကုသဵုဇာတာပါရမဳပုဟ်ဏး စကၠောန်ဂှ်ဟေင်ဂွံဒုင်စသိုင်ဖဵုဍေံဓဝဲါဂှ်မာန်ရ၊ ကံကုသဵုဇာတာပါရမဳခိုဟ်ဂှ်နွံဒၟံင်ပ္ဍဲကမၠောန်ပိုဲတံမကၠောန်ဂှ်ဟေင်ရ။ (ပိုဒ်−၂၉) ။
(၃၀) ။ ရဲပတှ်ေဒၟံင်ကံကုသဵုဇာတာပါရမဳတံဂှ်ဒှ်မၞိဟ်လၞုဟ်မွဲ ဒှ်မၞိဟ်အစောံစရာဲအောန်မွဲ ဒှ်မၞိဟ်သာသ္ပအ်မွဲ ဒှ်မၞိဟ်အတ္တမွဲ ဒှ်မၞိဟ်သုင်စောဲစဟွံဂွံတုဲ မင်ဒၟံင်ကဵုအိန်ဗြီုဒေဝတဴတံကၠုင်ဇိုန်ကဵုကုသဵုကၠုင်ပအပ်ကဵုပါရမဳရ၊ ဆဂး အိန်ဗြီုဒေဝတဴတံဂှ်ညးဟွံဆာန်ပုဟ်မၞိဟ်လၞုဟ်ကဵုကမၠောန် မၞိဟ်ဆာန်ကမၠောန်တံဟေင်ရကံကုသဵုပါရမဳတံဂှ်ညးပ္အပ်ပြာပ်ကဵုရ။ (ပိုဒ်−၃၀) ။
(၃၁) ။ ၜုန်မြကေက်ဒၟံင်တ္ၚဲဏံဂှ် စွံလဝ်ၜါပိဂိတုသီုကဵုဟွံဆူပကေက်တဴမွဲသာ်တုဲ ပ္ဍဲအခိင်စကာသုင်စောဲပၠန်တှ်ေဍေံဂွံကေက်တဴဗီုတြေံတေံဂှ်ဒှ်အာဟွံမာန်ရ၊
လ္ပထေင်ၜုန်မြဇကုကေက်ဒၟံင်(၂၄)နာဍဳအိုတ်ညိအဴ၊ အရာနာနာဆေင်စပ်ကဵုဘဝပိုဲဟီုဂှ်တှ်ေဒးနွံကဵုနဲကဲဗဂဵုလဟဵုကေုာံပွမပြံၚ်သၠာဲအရာတၟိတၟိလၟိုန်အခိင်အခါအိုတ်ညိအဴ။ (ပိုဒ်−၃၁) ။
(၃၂) ။ အခိင်လၟုဟ်ပိုဲဂွံဏံစပုင်ပ္ဍဲသ္ၚိဂွံတိက်ပ္ဍဲသ္ၚိဂွံဆဵုကောန်ဇာတ်ဗြဴဆာန်တုဲတသိုက်ၜိုတ်ဏံဂှ်ပိုဲတံဟွံပေင်စိုတ်အိုတ်ဏီဟာ၊ ပ္ဍဲကဵုအခိင်ဏံပၠန် ညးလ္ၚဵုတံဂှ်အေင်ဒၟံင်ပုင် ပ္ဍဲသ္ၚိလေဝ်ဟွံဂွံတိက်ကောန်ဗြဴလေဝ်ဟွံဂွံဆဵုတုဲဒဒိုက်ၜိုတ်ဏံဂှ်ပိုဲတံဟွံဖေက်အိုတ်ဏီဟာ၊ ပ္ဍဲအခိင်ဂွံမံင်မွဲစွံညးသ္ကံဂှ် ဂုဏ်ဖဵုခိုဟ်ခိုဟ်အရေဝ်ဝါစာဍာတ်ဍာတ်စေတနာပြဲပြဲဂှ်ဂိုတ်ဂစာန်ကၠောန်တဴလ္တူညးသ္ကံအိုတ်ညိအဴ၊ အခိင်ညးမွဲချိုတ်အာတုဲကလေင်ဗှ်သၞာအခိင်ဗီုဒှ်ဒၟံင်တ္ၚဲဏံဂှ်လေဝ်ကလေင်ကေတ်ဟွံဂွံရ၊ ဟိုတ်ဂှ်ရတှ်ေ ပစ္စုပ္ပန်တ္ၚဲဏံလၟုဟ်ဏံဟေင်ဒှ်အဓိကဇၞော်တဴကဵုဒြဟတ်ရ၊ အိန်ထံင်ဟီုဂှ်ၚုဟ်မးဇၞော်တဴဗွဲမလောန်ရ။ (ပိုဒ်−၃၂) ။
(၃၃) ။ သြန်ဟီုမ္ဂးဂှ်တှ်ေ အန္တရာဲဍေံဇၞော်တဴကဵုဒြဟတ်ရ၊ ပြသၞာအခက်ခုဲတ္ၚဲဏံမကတဵုဒှ်ဒၟံင်လၟေင်လၟေင်တ္ၚဲဂှ်လေဝ်တမ်ဍေံကၠုင်နူကဵုသြန်မွဲဟေင်ရ၊ ၜိုန်ရထဝ်သြန်ဂၠိုင်တုဲယဝ်ပိုဲတံသုင်စောဲဟွံလေပ်တှ်ေ သြန်ဂှ်ဟေင်ရဍေံကလေင်ကဵုဒဒိုက်ဘဲအန္တရာယ်ပ္ဍဲဘဝပိုဲတံဇၞော်ကဵုဒြဟတ်မာန်ရ။ (ပိုဒ်−၃၃) ။
(၃၄) ။ အဓိကဟွံသေင်ပုဟ်ပ္ဍဲအခိင်ဗှ်ေသိုက်လောဲညးလဵုမွဲကၠုင်မံင်ဗ္ဒဲါဗှ်ေ၊ ဆဂးဂှ် အဓိကဇၞော်အိုတ်ဟီုဂှ်တှ်ေ ပ္ဍဲကဵုအခိင်ဘဝဗှ်ေတံမူရောဟွံမွယ်မွဲသာ်မ္ဂးတှ်ေ ပ္ဍဲကဵုအခိင်တေံဂှ်ဟေင်ရညးလဵုမွဲသှ်ေနွံဒၟံၚ်ပ္ဍဲဗ္ဒဲါဗှ်ေတံဂှ်ဏီရော။ (ပိုဒ်−၃၄) ။
(၃၅) ။ ဗှ်ေတံဂွံသြန်ဂိတုၜိုတ်ဂလိုင်လဵုကီုလေဝ်အဓိကဇၞော်ဟွံသေင်ပုဟ်၊ အဓိကဇၞော်အိုတ်ဟီုဂှ်တှ်ေ ပ္ဍဲကဵုဂိတုအိုတ်ဂှ်သြန်သှ်ေမူစိဒ္ကေဝ်ဂှ်ကော်ခဴစသြန်ဇကုသှ်ေရတုဲဒှ်မသြန်ဗှ်ေတံအပိုင်ဂွံဂိုင်ဒေပ်ကေတ်ရ၊ ဒ:သ္ဂုတ်သွာတ်ကေတ်ပ္ဍဲမသြန်သှ်ေဂှ်ညိဟွံသေင်ရံင်ကေတ်ပ္ဍဲသြန်ဂိတုဂၠိုင်။ (ပိုဒ်−၃၅) ။
(၃၆) ။ ပွမကၠောန်ကမၠောန်ဟီုမ္ဂးဂှ်တှ်ေ ကၠောန်ဗဒှ်ကဵုပိုဲတံဍိုက်ပေင်ကဵုၚုဟ်မးသီုကဵုတာလျိုင်ရ၊ ယဝ်ရကမၠောန်ဟွံမွယ်မ္ဂးတှ်ေဘဝဂှ်လေဝ်ဒှ်အာသုညအဓိပ္ပဲါဟွံမွယ်တုဲ ဂုဏ်ဖဵုနာနာတံဂှ်လေဝ်ပ္ဍဲပူဂဵုဂှ်အိုတ်ပိုတ်ကၠုၚ်မာန်ရ ။ (ပိုဒ်−၃၆) ။
(၃၇) ။ ပေဲါဗ္တိုက်ပ္ဍဲကမၠောန်ဟီုမ္ဂးဂှ်တှ်ေညးသ္ဂုတ်သွာတ်ကေတ်ပ္ဍဲကမၠောန်ခိုဟ်ရ၊ (ဟွံသေင်သ္ဂုတ်သွာတ်ကေတ်ပ္ဍဲမအရေဝ်)။ (ပိုဒ်−၃၇) ။
(၃၈) ။ ယဝ်ရပ္ဍဲတ္ၚဲဏံအိုတ်ဒြဟတ်တှ်ေဂစာန်တိက်ပြဟ်ပြဟ်တဴညိ၊ ဗ္တံဏံၜက်အာတုဲ တ္ၚဲယျးတေံတၟးဒြဟတ်ပေင်တုဲအရာနာနာခိုဟ်တိုန်ဟာဟွံတီ။ (ပိုဒ်−၃၈) ။
(၃၉) ။ အတ္တအောန်အာပ္ဍဲဗှ်ေတံမ္ဂးတှ်ေ ဗှ်ေတံဂွံဆဵုကေတ်ရတသိုက်ဇေတ်ဇေတ်မာန်ဏောင်၊ သဳမသုန်သဳဒ္စာံသဳစှ်ၜိုန်ရမၚ်မွဲဒ္ဂေတ်ဗက်ဟွံမာန်ကီုလေဝ် သဳအတ္တဏံမွဲယဝ်ပိုဲတံမၚ်မွဲလဝ်မာန်မ္ဂးတှ်ေ အရာနာနာပ္ဍဲဘဝပိုဲကောန်ဂကူတံဂှ်တုဲဒှ်မံၚ်ရ ။ (ပိုဒ်−၃၉) ။
(၄၀) ။ လဒေါဝ်ၜဳဇၞော်တေံဍိုက်ပေင်ကဵုလပှ်ကျာဂှ်ပိုဲတံရပ်စကာကျာဟွံမာန်ကီုလေဝ် ဆဂးဂှ်တှ်ေ ပိုဲကၠောန်ပတိုန်ကေတ်ယာတုဲသုင်စောဲကေတ်ဖဵုနူကဵုကျာဂှ်မာန်ရ။ (ပိုဒ်−၄၀)။
(၄၁) ။ မၞိဟ်စွံလဝ်တိုင်ပ္ကဴမိက်သ္ဂောံဒှ်သေဋ္ဌဳဏောင်တှ်ေ ၜိုန်ရဂွံဘာပိတန်ကီုလေဝ်ဒှ်သေဋ္ဌဳမာန်ရ၊ မၞိဟ်ဘာတက္ကသဵုတုဲအာတံဂှ်ပၠန်လေဝ် ယဝ်ရကူချပ်ဒှ်ဆကောန်ကမၠောန်ညးတၞဟ်တွဵုဏောင်တှ်ေ ဗွဲစၟတ်ဨကန်တဟေၚ်ဒှ်တဴကောန်ကမၠောန်ညးဒှ်တဴဍိက်ညးအတိုင်မွဲဘဝရ။ (ပိုဒ်−၄၁) ။
(၄၂) ။ ပိုဲဏံဇၞော်တိုန်မွဲတ္ၚဲဂှ်မိမပိုဲၜါဂှ်လေဝ်ဗျုဇရာစှ်ေအာမွဲတ္ၚဲကီုရ၊ ပိုဲခိုင်ကၟောန်မ္ၚိုဟ်ကြံင်တိုန်မွဲတ္ၚဲဂှ်ပၠန်လေဝ် မိမပိုဲၜါဂှ်ဒြဟတ်အိုတ်အောန်စှ်ေအာမွဲတ္ၚဲပၠန်ရ၊ ဟိုတ်ဒှ်သာ်ဂှ်တုဲ စိုပ်အခိင်သၞာံဂိတုတ္ၚဲပိုဲဏံစိုပ်အာတိုင်ပ္ကဴတေံဂှ် လဆောဝ်လဆောဝ်ဟေင်မိမၜါလေဝ်လောတ်စှ်ေပိုဲဟွံဂတာပ်ဟာဟွံတီ။ (ပိုဒ်−၄၂) ။
(၄၃) ။ လိုက်ဏံဂှ် ဟွံမွယ်မအရေဝ်လဇုဲအာယျသွက်မၞိဟ်စမပ္တံတ္ၚဲဏံ။ (ပိုဒ်−၄၃) ။
(၄၄) ။ အဲဏံဂှ်ဒှ်မၞိဟ်ကွာ်တရဴအိၚ်မွဲကီုရ၊ ဆဂးတှ်ေ အဲဟွံကေၚ်ဆုတ်ကလေၚ်မွဲလှ်ေပုဟ်။ (ပိုဒ်−၄၄) ။
(၄၅) ။ လပါ်လက္ကရဴပ္ၚာၚ်စပုၚ်ဂှ် ၜိုန်ရညးဟွံသုၚ်စောဲကီုလေဝ် ပ္ဍဲကဵုအခိၚ်ကြဴကြာတ်သ္အးဇ္ၚးဂှ်တှ်ေညးဒးကြဴကြာတ်သီုၜါလပါ်ကီုရ၊ မၞိဟ်ပိုဲဏံဂှ်လေဝ် ယဝ်ရမိက်သ္ဂောံဒှ်မၞိဟ်ခိုဟ်မွဲတှ်ေ ဒးခိုဟ်တဴသီုဂတမုက်သီုကဵုလက္ကရဴမုက်ဂှ်ကီုညိ။ (ပိုဒ်−၄၅) ။
(၄၆) ။ ဝါစာဂှ်နွံကဵုအန္တရာဲဟွံအောန်ဟိုတ်နူကဵုပ္ဍဲစိုတ်တေံနွံကဵုဂျိ၊ ဝါစာဂှ်ဟွံမွယ်ကဵုၚုဟ်မးဟိုတ်နူကဵုဟီုပ္တိတ်နၚ်ဟွံကူချပ်မွဲသာ်၊ ဝါစာနွံကဵုဂျိဘဝဏံဂိဓဇောဝ်တဴလောန်၊ ဝါစာမောဝ်ဗ္ဍးဘဝလေဝ်ယျးတၟးရာၚ်ဆာဲ၊ ဝါစာဍာတ်ကြောအ်ဘဝလေဝ်ခိုဟ်ဆာဲ၊ ဝါစာပသအုဲဒှ်ဂၠုဲမွဲအာယုက်ရ။ (ပိုဒ်၀၄၆) ။
(၄၇) ။ ညးတၞဟ်သ္ပစပရေံပိုဲဏံတှ်ေကဵုအခေါၚ်ဍေံပေၚ်ပေၚ်အိုတ်ညိ၊ ပိုဲဏံဒးသမ္တီလဝ်တွဵုဟီုဂှ်တှ်ေ ဇကုဇကုဘဝပိုဲဏံဂှ် ပိုဲလ္ပသ္ပစပရေံတွဵုညိတှ်ေတုဲဒှ်မံၚ်ရ ။ (ပိုဒ်−၄၇)။
(၄၈) ။ ဂွံကောန်လ္ပပတုပ်ကဵုကောန်ညးတၞဟ်ညိ၊ ဂွံတြုံဗြဴလေဝ်လ္ပပတုပ်ကဵုဗြဴတြုံညးတၞဟ်အိုတ်ညိ၊ လောကဏံဂှ်ယဝ်ရတုပ်မံၚ်ဖအိုတ်ဏောၚ်တှ်ေ ပေဲါပြိုၚ်ပ္ကာန်ကေတ်ဇၞးမာန်ညးသ္ကံဂှ်က္တဵုဒှ်ကၠုၚ်ဟွံမာန်ရ။ (ပိုဒ်−၄၈)။
(၄၉) ။ လ္ပဒှ်မၞိဟ်ဍိုဟ်ကေက်စဳကၠးတုဲဟွံမွယ်ကဵုမေတ္တာစေတနာသွက်ညးဂမၠိုၚ်၊ ထေက်ကြိုက်ပိုဲဏံဒးဒှ်မၞိဟ်ဓမ္မတာမွဲတုဲဍိုက်ပေၚ်ကဵုမေတ္တာစေတနာစိုတ်ရီုဗၚ်လ္တူညးတၞဟ်နွံဒၟံၚ်လၟိုန်၊ ဟွံတီဆဇကုမွဲဓဝ် အတ္တဂှ်ထဝေၚ်ကၠဟ်ဖအောန်ထောံညိ ။ (ပိုဒ်−၄၉) ။
(၅၀) ။ မၞိဟ်ဒိုဟ်ဓီုတံဂှ် ရံၚ်ၚုဟ်မးဘဝမၞိဟ်ပ္ဍဲကဵုတၞးလိက်ဘာ(ကော်စလိက်စၟတ်သမ္တီဘာတုဲ)၊ မၞိဟ်ဍိုဟ်ကေက်တံဂှ်လေဝ် ရံၚ်ၚုဟ်မးမၞိဟ်ပ္ဍဲကမၠောန်ကဵုတာလျိုၚ်စိုတ်စရိုတ်ယေလ္ဂူတပ်တးသ္အးဇ္ၚးဏောၚ်။ (ပိုဒ်−၅၀) ။
(၅၁) ။ ပိုဲဒးဝါတ်စမ်ရံၚ်ညိအဴ တုဲတှ်ေဂွံတီကေတ်စိုတ်မၞိဟ်နွံဗွဳဗွိုၚ်ပိုဲတံဂှ်ထ္ၜးကၠုၚ်ရုၚ်ရဴသာ်လဵုတှ်ေပိုဲတံတီရ၊ တ္ၚဲပိုဲဝါတ်ဂှ်ဟေၚ်ဂွံဆဵုကေတ်ရဘဝဂွံကၠိုဟ်ကေတ်ရဓဝ်ဍာံမွဲ၊ တ္ၚဲဏံဟေၚ်ရပိုဲတံဂွံတီစိုတ်ကောန်ဂကူဗုဒ္ဓဘာသာတံတုဲ ဗီုအပါပိုဲဗ္တောန်လဝ်ဂှ်ဗၠေတ်မံၚ်ညံၚ်ဍာ်ကဵုကၠေၚ်ရသွံ။ (ပိုဒ်−၅၂) ။
(၅၂) ။ ထေက်ကြိုက်ဒးသ္ပမၞိဟ်ညံၚ်ရဴဟွံတီတဴမွဲသာ်ကီုတုဲ နဲဏံမွဲနဲဟေၚ်အခေါၚ်ပိုဲဂွံတီဂၠိုၚ်တိုန်ကီုရ၊ ယဝ်ရဒှ်မၞိဟ်တီတဴဒၟံၚ်ဖအိုတ်ဏောၚ်တှ်ေ အရာနာနာအာဂတနူဏံတှ်ေ သွက်သ္ဂောံတီအာဂှ်အခေါၚ်ပိုဲဟွံမွယ်ရ၊ ဟိုတ်ဂှ်ရတှ်ေ ဘဝဟီုဂှ်လဆောဝ်တှ်ဒးသ္ပမၞိဟ်မုရောဟွံတီမွဲသာ်တုဲဒှ်ဖဵုကဵုပိုဲဏံကွေံကွေံရ။ (ပိုဒ်−၅၂) ။
(၅၃) ။ ဒးဗ္တောန်ကောန်ကဵုအာဂၠာဲရပ်စကကီုညိဂှ်ခိုဟ်နူကဵုပိုဲဂၠာဲရပ်နၚ်ကတုဲကဵုကောန်တံမၚ်စ၊ ယဝ်ရဒှ်တဴဗီုဏံမ္ဂးတှ်ေ ပိုဲဏံဒးဂၠာဲနၚ်ကကဵုကောန်တံစအတိုၚ်မွဲဘဝရဏောၚ် ။ (ပိုဒ်−၅၃)။
(၅၄) ။ ဍေံလက်နၚ်ပိုဲတှ်ေဒှ်ပရေၚ်ပရောဍေံရ၊ ဆဂးဂှ် ပိုဲဏံကေတ်ဟာဟွံကေတ်ဟာဂှ်တိုန်တဴကဵုပိုဲဏံပၠန်ရ၊ မအရေဝ်လက်တံတိတ်ကၠုၚ်နူသၟန်ပါၚ်ညးလဵုဂှ်တှ်ေဒှ်တဴမအရေဝ်ညးတေံဂှ်ရ၊ ဍေံကဵုပိုဲတုဲပိုဲတံဟွံဒုၚ်ဂိုၚ်ကေတ်မ္ဂးတှ်ေ မအရေဝ်လက်တံဂှ်လေဝ်ဒးကလေၚ်စဴအာဒၞာဲဍေံမကၠုၚ်လဝ်ဂှ်ဖအိုတ်ရ။ (ပိုဒ်−၅၄) ။
(၅၅) ။ မအရေဝ်ပြးကၠုၚ်နကဵုသၟန်ပါၚ်တံဂှ်ဟွံသေၚ်တိတ်ကၠုၚ်နူကဵုပ္ဍဲစိုတ်ဍေံတံဇေတ်ဇေတ်ရ၊ ၜိုန်ရဍေံတံဟီုဍာတ်ကြောံအိုတ်အစောန်ဍာ်သာဲဒးဒုၚ်ကျကီုလေဝ် မုရောၚုဟ်မးဟွံမွယ်သွက်သ္ဂောံသမ္တီဂိုၚ်ဒေပ်ကေတ်ရ။ (ပိုဒ်−၅၅) ။
(၅၆) ။ ပ္ဍဲအခိၚ်ဒးဗ္တောန်ညးတၞဟ်တှ်ေလ္ပဝေတ်ဗ္တောန်နကဵုအရီုဒေါသအဃောဒှ်ဂှ်ညိ၊ ဟိုတ်နူကဵုမၞိဟ်ဒးဒုၚ်ဝေတ်ဗ္တောန်တံဂှ်ရုဲစှ်ကေတ်ဟွံဒးတုဲ ဣဏံဂှ်ဗ္တောန်ဟာလက်ဗျိဟာ၊ ဟိုတ်ဒှ်သာ်ဂှ်တုဲ ဖဵုမတိတ်ကၠုၚ်တံဂှ်ဖေက်ဗၠေတ်အာနူကဵုစေတနာပိုဲဏံကီုရ၊ (ပိုဒ်−၅၆) ။
(၅၇) ။ ဒဒိုက်ဂှ်ဍေံလုပ်ကၠုၚ်ဇူပ္ဍဲပိုဲဏံမွဲလစုတ်ဓဝ်ဟေၚ်ရ၊ ဆဂးဂှ် ပိုဲမၞိဟ်ဏံဟေၚ်ရကၠောန်ဗဒှ်ဆက်ဏာအာယုက်ကဵုဍေံဂွံဂၠိၚ်အာတုဲ ဂွံမိၚ်ဒၟံၚ်မအရေဝ်ပေၚ်ပြးဍုၚ်ကွာန်ဂှ်ဒဒိုက်ဒဒိုက်ဒဒိုက်ဟွံပိုတ်သ္ကုတ်နူသၟန်ပါၚ်ညးတံရ။ (ပိုဒ်−၅၇) ။
(၅၈) ။ ၚုဟ်မးက္ဍၚ်အိုတ်ဂှ်ခိုဟ်တဴဖအိုတ်လေဝ်ဟွံသေၚ်၊ စခိုဟ်နွံကဵုရှ်သာတံဂှ်ပၠန်လေဝ်ဒှ်ကၠုၚ်ပရေၚ်ထတ်ယုက်ဖအိုတ်ဟွံသေၚ်ကီုရ၊ လောဲအိုတ်ဂှ်ပၠန် ဂွံတိက်မံၚ်နကဵုတသိုက်စိုတ်ဖအိုတ်လေဝ်ဟွံသေၚ်တုဲ ဘဝဟီုမ္ဂးဂှ်တှ်ေၜိုန်ရဟွံဍိုက်ပေၚ်တဴဖ္အိုတ်ကီုလေဝ်ဂၠာဲတသိုက်သွက်ဘဝဇကုဇေတ်ဇေတ်ဂွံမံၚ်ကီုဏောၚ်။ (ပိုဒ်−၅၈) ။
(၅၉) ။ ယဝ်ရညးတၞဟ်ကၠောန်ဟွံခိုဟ်ကဵုပိုဲထေဲကဵုပိုဲတှ်ေလ္ပကလေၚ်ထေဲကဵုဍေံတံဂှ်ညိအဴ၊ ယဝ်ရပိုဲကလေၚ်ထေဲကဵုဍေံတံဏေၚ်တှ်ေ ပိုဲဏံဂှ်ဒိုဟ်ဓီုတဴဂၠိုၚ်နူကဵုဍေံတံဂှ်ဏီရ၊ ဟိုတ်ဒှ်သာ်ဂှ်တုဲ ဒးဒှ်မၞိဟ်ဍိုဟ်ကေက်မွဲညိ ဒးဆာန်ဍူညာတ်စိုတ်ဍေံတံဂှ်တှ်ေ ဂကောံဍေံတံဂှ်အဃောကလိဂွံသရစိုတ်ယဲစိုတ်ဇၞော်ဇၞော်မွဲဏောၚ်။ (ပိုဒ်−၅၉) ။
(၆၀) ။ လ္ပဗ္တောန်ကောန်ဒှ်ဗီုသေဋ္ဌဳညိ၊ ဆဂးဂှ် ဒးဝေတ်ဗ္တောန်ကောန်ညံၚ်သ္ဂောံဒှ်မၞိဟ်မမ္မတာမွဲညိ၊ ဟိုတ်ဒှ်သာ်ဂှ်တုဲ ပ္ဍဲအခိၚ်ကောန်ပိုဲဇၞော်ဂေါဝ်တိုန်ကၠုၚ်ဟေၚ် ဍေံသ္ဂုတ်သွာတ်ကေတ်ညးတၞဟ်နကဵုအဓိပ္ပါဲဟွံသေၚ်နကဵုသြန်) ။ (ပိုဒ်−၆၀) ။
(၆၁) ။ လ္ပကူချပ်လဝ်ညးတၞဟ်က္ဆံၚ်သၠုၚ်အာနူကဵုပိုဲဏံညိကၠောန်ဗဒှ်ကဵုဘဝပိုဲဏံဟွံမွယ်ကဵုဂဥုဲဒြဟတ်မာန်ရ၊ လ္ပကူချပ်လဝ်ညးတၞဟ်က္ဆံၚ်သဝ်အာနူကဵုပိုဲဏံညိကၠောန်ဗဒှ်ကဵုဘဝပိုဲဏံမာနသၠုၚ်တိုန်တုဲဟွံမွယ်ကဵုအဓိပ္ပဲါ၊ လ္ပကူချပ်လဝ်ညးတၞဟ်က္ဆံၚ်တုပ်သၟဟ်ကဵုပိုဲဏံညိကၠောန်ဗဒှ်ကဵုဘဝပိုဲတံပြိုၚ်ပ္ကာန်ကေတ်ကျမာန်တဴညးသ္ကံမာန်ရ၊ ထေက်ကြိုက်ဒးကူချပ်လဝ်တွဵုဟီုဂှ်တှ်ေ ဇၟာပ်မၞိဟ်သီုဖ္အိုတ်နွံဒၟံၚ်ဗွဳဗွိုၚ်ပိုဲတံဏံဂှ်ဒှ်တဴသ္ကဴရဲမိတ်သဟာဲပိုဲမွဲစွံတုဲ တတ်ထပါ်ကၠုၚ်တသိုက် တတ်ထပါ်ကၠုၚ်ဒဒိုက်မွဲစွံမွဲကရောံတုပ်တုပ်တုဲ ဒှ်ဗျုယဲချိုတ်သီုဖ္အိုတ်မွဲစွံညးသ္ကံကီုရ ။ (ပိုဒ်−၆၁)
(၆၂) ။ မၞိဟ်ရံၚ်ဘဝသ္ၚောဲတံဂှ်ထေက်ကြိုက်ဆဵုညာတ်ကေတ်အခေါၚ်ပ္ဍဲအခိၚ်ဒှ်တဴပြသၞာလၟိုန်ရ၊ မၞိဟ်ရံၚ်ဘဝဂၠိဂၠိဂၠုဂၠုတံဂှ်ပၠန်လေဝ်ဍေံတံဆဵုညာတ်ကေတ်ပြသၞာတွဵုပ္ဍဲအခိၚ်ဂွံအခေါၚ်ရ။ (ပိုဒ်−၆၂) ။
(၆၃) ။ အရာလဵုပိုဲတံမူကၠောန်ကၠောန်ထေက်ကြိုက်ဒးကၠောန်တဴၜိုတ်အစောံစရာဲနွံဂှ်အိုတ်ညိ၊ ပ္ဍဲအခိၚ်ပိုဲကၠောန်ပြေပြံၚ်တုဲဒှ်ဟေၚ် ၜိုန်ရညးတၞဟ်ဟွံတီကီုလေဝ် ဇကုပိုဲဏံတီမံၚ်တှ်ေတုဲဒှ်မံၚ်ရ၊ ဘဝဂှ်ဒှ်အခေါၚ်ပိုဲဏံအပိုၚ်ဏောၚ်ဂှ်လေဝ်ကဵုကၠိုဟ်လဝ်အိုတ်ညိ။ (ပိုဒ်−၆၃) ။
(၆၄) ။ ၜိုန်ရအဲဏံတီကၠိုဟ်ကေတ်ဖ္အိုတ်ဟွံသေၚ်ကီုလေဝ် ဆဂးဂှ်အဲဏံဂ္ဇံဒၟံၚ်ဗ္ဒဲါဗှ်ေလၟိုန်တုဲဒှ်မၞိဟ်ကဵုကေတ်ကသပ်ခိုဟ်မွဲမာန်သွက်ဗှ်ေရ။ (ပိုဒ်−၆၄) ။
(၆၅) ။ သ္ၚိဍိုက်ပေၚ်ကဵုဓဝ်ဆာန်ဂှ်ၜိုန်ရဒှ်သ္ၚိဍောတ်ဍောတ်မွဲမကီုလေဝ် ဆဂး ပ္ဍဲသ္ၚိဂှ်ဍိုက်ပေၚ်ကဵုဓဝ်ဆာန်ဓဝ်ဂီုကၠီုပ္ဍဲဂကောံအိန်ထံၚ်တုဲ ဣဏံဟေၚ်ရဒှ်သ္ၚိၜိုဟ်သိုဟ်တဴမွဲအိန်ထံၚ်တုဲ ဂွံမံၚ်အာနကဵုတသိုက်စိုတ်မွဲအာယုက်ကီုရ။ (ပိုဒ်−၆၄) ။
(၆၆) ။ ဒးရံၚ်ကေတ်ပြသၞာဟီုဂှ်တှ်ေညံၚ်ရဴမဗ္တဳဂှ်ညိ၊ ဗ္တဳဂှ်ၜိုန်ရနွံဂၠိုၚ်ရိုဟ်လၟိဟ်ဟွံမာန်ကီုလေဝ် ဆဂးတဳတံဂှ်ဍောတ်သောဲတဴလောန်ရ။ (ပိုဒ်−၆၇) ။
(၆၇) ။ ပ္ဍဲတ္ၚဲဏံယဝ်ရဗှ်ေတံဟွံတီတသိုက်မ္ဂးတှ်ေ ဗှ်ေတံကလေၚ်ရံၚ်အာကောန်ၚာ်လ္ပါ်သ္ကဲဂၠံၚ်အဃောခရေၚ်အာတ်စဒၟံၚ်တံဂှ်ညိအဴ၊ ယဝ်ဗှ်ေတံဟီုဒေါန်ရုပ်သာ်ဟွံကျေဝ်ဂေါဝ်ဒှ်တဴသံယောဇိုန်ဟွံပေၚ်စိုတ်မ္ဂးတှ်ေ ဗှ်ေတံဒးကျောဝ်ဗဵုရံၚ်အာမၞိဟ်ဝဲလီုလီုကွာ်အာမွဲဒ္ဂုတ်မွဲဒ္ကူဓဇက်အာဓဇက်ကၠုၚ်ဂှ်အိုတ်ညိ ။ (ပိုဒ်−၆၇) ။
(၆၈) ။ ယဝ်ရဗှ်ေတံပဝ်ကေတ်ဟွံဂွံတှ်ေဂြိပ်ကေတ်အိုတ်ညိအဴ၊ ယဝ်ရဗှ်ေတံဂြိပ်ကေတ်ဟွံဂွံတှ်ေကွာ်ကေတ်အိုတ်ညိအဴ၊ ယဝ်ရဗှ်ေတံကွာ်ကေတ်ဟွံဂွံတှ်ေဂမာကေတ်အိုတ်ညိအဴ၊ ယဝ်ရဗှ်ေတံဂမာကေတ်လေဝ်ဟွံဂွံတှ်ေဗီုလဵုပပညံၚ်သ္ဂောံၜက်အာဂတဂတတေံမာန်ဂှ် ကၠောန်သ္ပအရာမွဲမွဲသာ်ညိအဴ။ (ပိုဒ်−၆၈) ။
(၆၉) ။ ဍောၚ်အိုတ်ဂၠိုၚ်နူကဵုဒးကၠောန်ကမၠောန်ဟီုဂှ်တှ်ေ မၞိဟ်နွံဒၟံၚ်ဗ္ဒဲါပ္ဍဲပိုဲဏံဂှ်ရဟွံကၠိုဟ်စိုတ်ကေတ်စိုတ်ညးသ္ကံတုဲဍောၚ်အိုတ်ရ။ (ပိုဒ်−၆၉) ။
(၇၀) ။ ဒၟာနူကဵုဇကုဂွံသၠုၚ်တိုန်အာဂှ် လ္ပကဵုညးတၞဟ်ဒးသဝ်စှ်ေအာညိ။ (ပိုဒ်−၇၀) ။
(၇၁) ။ ပ္ဍဲကဵုတ္ၚဲဏံဗှ်ေတံဒးဆဵုကေတ်ပြသၞာနာနာသာ်ဍေံလုပ်ကၠုၚ်ပ္ဍဲဘဝဗှ်ေတံၜိုတ်ဂလိုၚ်လဵုကီုလေဝ် ထေက်ကြိုက်ဒးသမ္တီလဝ်တွဵုဟီုဂှ်တှ်ေ ပ္ဍဲကဵုအခိၚ်ဍေံလုပ်ကၠုၚ်ဂွံဂှ်တှ်ေဍေံကလေၚ်တိတ်အာဂွံကီုရဏောၚ်ဂှ်လ္ပယှုက်ထုဲကၠေၚ်က္ဍဟ်အိုတ်ညိအဴ၊ ဘဝဟီုမ္ဂးဂှ်တှ်ေသဘာဝမွဲဟေၚ်ကဵုသွဟ်ခိုဟ်အိုတ်ရ။ (ပိုဒ်−၇၁) ။
(၇၂) ။ ဒၟာနူကဵုဍာ်တုဲဂၠုၚ်ဂွံဂတဝ်အာမာန်ရ၊ ဍာ်ဂှ်ပၠန်လေဝ်ကၠောန်ဗဒှ်ကဵုဂၠုၚ်ဂွံဗၠိုက်စှ်ေအာမာန်လောဲလောဲလေဝ်နွံကီုရ။ (ပိုဒ်−၇၂) ။
(၇၃) ။ တိုၚ်ပ္ကဴဟီုမ္ဂးဂှ်တှ်ေပိုဲတံဒးကၠောန်မာန်ပ္တိုန်ကေတ်ဍေံဏောၚ် ပတှ်ေကံကုသဵုတုဲမၚ်ဒၟံၚ်ဂှ်လေဝ်ဘဝဟွံသေၚ်ရ၊ အရာမွဲမွဲဍေံဒးက္တဵုဒှ်ကၠုၚ်မာန်ဂှ်ဒးနွံကဵုဟိုတ်ဖဵုဟေၚ်ရ၊ ဟိုတ်ဂှ်ရတှ်ေ သီုဖ္အိုတ်တံဂှ်ဍေံကၠုၚ်နူကဵုကမၠောန်ပိုဲဏံမွဲဟေၚ်ရ။ (ပိုဒ်−၇၃) ။
(၇၄) ။ အစောန်စရာဲခိုဟ်တှ်ေဗ္တိုက်ဂွံသၞမွဲၜါကီုရ၊ ယဝ်ကၠေၚ်က္ဍဟ်ခိုဟ်ဟေၚ် ဗ္တိုက်သၞတံဂွံကၠုၚ်လ္ၚီလက်ကိုတ်ရ။ (ပိုဒ်−၇၄) ။
(၇၅) ။ ယဝ်ရဗှ်ေတံဟွံဂွံကၠောန်ဏီဏောၚ်တှ်ေ လ္ပဖျေံထောံစိုတ်ညိကၠောန်ဟွံဂွံသ္ပဟွံဒှ်ဂှ်ညိ၊ အရာနာနာဒၞာဲပိုဲမၞိဟ်တံကၠောန်ဟွံဒှ်ကၠောန်ဟွံဂွံဂှ်ဟွံမွယ်ရ၊ သီုဖ္အိုတ်ဂှ်ဟေၚ် ဒးနွံကဵုနဲကဲဗဂဵုလဟဵုအရာပိုဲမကၠောန်ဂှ်မာန်ညံၚ်သ္ဂောံဂတာပ်အခေတ်အခိၚ်ကာလဒေသညိ။ (ပိုဒ်−၇၅) ။
(၇၆) ။ ယဝ်ဂြိပ်ဗက်မၞိဟ်ဟွံဆာန်ပိုဲမ္ဂးတှ် ဂြိပ်ဗက်ၜိုတ်ဂလိုၚ်လဵုကီုလေဝ်ဍေံဟွံဆာန်ရ၊ အိုတ်ကၞောတ်ဂှ်ဟေၚ်မၞိဟ်ဒးဍောၚ်သီုအခိၚ်အိုတ်ဂှ်ပိုဲဏံမွဲဟေၚ်ရ၊ ထေက်ကြိုက်ဒးဆာန်မၞိဟ်ဍေံဆာန်ပိုဲဏံဂှ်အိုတ်ညိ သာ်ဏံဟွံသေၚ်မ္ဂးတှ်ေပိုဲတံဒးဂြိပ်ဗက်ဒၟံၚ်ဍေံအတိုၚ်မွဲဘဝဏံရ။ (ပိုဒ်−၇၆) ။
(၇၇) ။ သွက်မၞိဟ်အိက်လၞုဟ်တံဂှ် ၜိုန်ရအခိၚ်နွံမံၚ်ကီုလေဝ်တုပ်တဴညံၚ်ရဴအခိၚ်ဟွံမွယ်အိုတ်ရ၊ ၜိုန်ရဍေံတံကမၠောန်ကၠောန်နွံဒၟံၚ်ကီုဂှ်လေဝ်တုပ်ညံၚ်ရဴကဵုကမၠောန်ကၠောန်ဟွံမွယ်အိုတ်ရ၊ ၜိုန်ရဍေံဂွံအခေါၚ်ဂှ်ကီုလေဝ်တုပ်ညံၚ်ရဴအခေါၚ်ဟွံမွယ်သွက်ဘဝဍေံတံရ၊ မၞိဟ်လၞုဟ်လၞုဟ်တံဂှ်အပါပိုဲညးဟွံကဵုအရီုဗၚ်တုဲလာပ်ဗဇဴတံဂှ်လေဝ်ညးဟွံပ္အပ်ပြာပ်ကဵုတွဵုဗွဲစၟတ်ဨကန်တရ။ (ပိုဒ်−(၇၇)) ။
(၇၈) ။ သ္ၚိတ်အာဂှ်အရေဝ်သွဟ်ဟွံမွယ်ဟွံသေၚ်တုဲ ဆဂး ၜိုန်ရပိုဲဟီုလဴပ္တိတ်ဏာကီုလေဝ်ဟွံဒှ်ကၠုၚ်ဖဵုခိုဟ်မွဲသာ်တုဲဒးသ္ၚိတ်အာကီုရ၊ ပ္ဍဲအခိၚ်သ္ၚိအာမွဲလစုတ်ဂှ်ဟေၚ်ပိုဲဏံဂွံကၠိုဟ်ကေတ်ဘဝတၟာဂ လိုၚ်ရ၊ သ္ၚိတ်တုဲမံၚ်ထောံညိၚ်ညိၚ်မွဲချိန်ခဏဂှ်လေဝ် ဍေံကဵုသွဟ်သွက်ဘဝပိုဲဏံဇၞော်ကဵုဇြဟတ်ဂွံတီကေတ်ရ။ (ပိုဒ်−၇၈) ။
(၇၉) ။ တိုၚ်ပ္ကဴဘဝအဲဟီုဂှ်တှ်ေ တ္ၚဲအဲဂွံဒုၚ်ကေတ်တဆိပ်ခြာဘာတက္ကသဵုဟွံသေၚ်ပုဟ်၊ ဆဂးဂှ် ဒှ်တဴတ္ၚဲအဲဂွံဆဵုဂွံကၠိုဟ်ဂွံတီကေတ်ဘဝကေုာံဂဥုဲကၠေၚ်က္ဍဟ်တုဲ ဒှ်သွက်သ္ဂောံရီုဗၚ်မၚ်မွဲလွဳပရာမိမကောဒေံမိတ်သဟာဲဂကူဘာသာမာန်ဂှ်တှ်ေဣဏံရတိုၚ်ပ္ကဴအဲ။ (ပိုဒ်−၇၉) ။
(၈၀) ။ ပိုဲဒးဒုၚ်စောဗ္ကစကဵုညးတၞဟ်လၟိုန်လၟိုန်တုဲကဵုဍေံတံဆက်စောဗ္ကစအာညိအဴ၊ ပိုဲဂွံတီကေတ်မွဲဟီုဂှ်တှ်ေ ဘဝပိုဲဏံဂှ်ဇီုကပိုက်ဒၟံၚ်ကဵုဘဝဍေံတံဇၞော်ကဵုဒြဟတ်ဏောၚ်သွံဟာ၊ ဆဂး ဘဝဍေံတံဂှ်တှ်ေတၟာဒဳရုဲလေဝ်ဟွံဇီုကပိုက်ကဵုဘဝပိုဲဏံကီုရ၊ ဟိုတ်ဂှ်ရတှ်ေ ဘဝဟီုမ္ဂးဂှ်ယဝ်ကၠိုဟ်စိုတ်တှ်ေလောဲလောဲသွာသွာရ။ (ပိုဒ်−၈၀) ။
(၈၁) ။ ကပေါတ်မၞုံကဵုၚုဟ်မးဂှ် မံၚ်ကဵုမၞိဟ်ဟွံတီကေတ်ၚုဟ်မးမ္ဂးတှ်ေဒှ်အာကပေါတ်ဟွံမွယ်ကဵုၚုဟ်မးရ၊ ကပေါတ်ဟွံမွယ်ကဵုၚုဟ်မးဂှ်ပၠန်လေဝ် စိုပ်အာပ္ဍဲကဵုမၞိဟ်ဆဵုကေတ်ၚုဟ်မးဍေံမ္ဂးတှ်ေ ထေက်ကြိုက်နွံကဵုၚုဟ်မးဗွဲမလောန်ရ။ (ပိုဒ်−၈၁) ။
(၈၂) ။ စၟစၟောန်ခၟတ်ဍောတ်ဍောတ်သောဲသောဲတံချိုတ်ကၠေံအာလ္တူဂၠးတိဏံၜိုတ်(၅၀)သၞာံမ္ဂးတှ်ေ ပိုဲမၞိဟ်ဂမၠိုၚ်လ္တူဂၠးတိဏံလေဝ်ဒးချိုတ်အာဖအိုတ်မာန်ရ၊ ယဝ်အခါရပိုဲမၞိဟ်တံချိုတ်အိုတ်အာလ္တူဂၠးတိဏံမ္ဂးတှ်ေ သတ်မၞုံကဵုလမျီုအလုံသီုဖအိုတ်တံဂှ်လေဝ်ဍိုက်ပေၚ်ကဵုတသိုက်အတိုၚ်သဘာဝဍေံအိုတ်ရ။ (ပိုဒ်−၈၂) ။
(၈၃) ။ မိယာဲမွဲတီအိုတ်ကောန်တံမူဒးစိုတ်စစၞမူရော? ဆဂးဂှ် ကောန်တံဟွံတီမိယာဲမွဲဒးစိုတ်မိက်သ္ဂောံစမူစၞရော?ဟိုတ်နူကဵုမိယာဲမွဲစဂွံဖအိုတ်စၞနူကဵုကောန်တံစလဝ်ဟွံအိုတ်တံဂှ်ရ။ (ပိုဒ်−၈၃) ။
(၈၄) ။ ဓရ်ဟီုမ္ဂးဂှ်တုပ်တဴညံၚ်ရဴကဵုကျာပြဳပြဳတုဲ ရံၚ်ကေတ်လေဝ်ဟွံညာတ်ရပ်တဴလေဝ်ဟွံဂွံကီုရ၊ ဆဂးဂှ် ယဝ်ရပိုဲတံဂွံလုပ်ဗ္ဒဗ္ဒါဲဇူကေတ်မ္ဂးတှ်ေ ဂွံကၠိုဟ်တီကေတ်ဟီုဂှ်ၜိုဟ်သိုဟ်ညိၚ်ဝတ်ကွေံရ။(ပိုဒ်−၈၄) ။
(၈၅) ။ ကောန်စှ်မိမွဲလွဳပရာလဝ်ကောန်တံစဵုကဵုဇၞော်ဂေါဝ်တိုန်ကၠုၚ်ပ္ဍဲတ္ၚဲဏံမာန်ရ၊ ဆဂးဂှ် မိယာဲမွဲဟေၚ်ကောန်တံစှ်လွဳပရၚ်မၚ်မွဲကေတ်ဟွံဂွံဏီရ။ (ပိုဒ်−၈၅) ။
(၈၆) ။ ဂျိုၚ်ဒၟံၚ်လ္တူလိုက်ဏံၜိုတ်အာယုက်လ္ၚီသၞာံကီုလေဝ်အဓိကဇၞော်တဴဟွံသေၚ်ရ၊ အဓိကဇၞော်အိုတ်ဟီုဂှ်တှ်ေသုၚ်စောဲဘဝဗီုလဵု။ (ပိုဒ်−၈၆) ။
(၈၇) ။ ပွမကဵုခိုဟ်အိုတ်ဟီုဂှ် ကဵုတုဲဟွံရန်လဝ်ဖဵုမွဲသာ်၊ ဒှ်မၞိဟ်ခိုဟ်အိုတ်ဂှ်ပၠန်လေဝ် ဒှ်မၞိဟ်ဓမ္မတာမွဲဟေၚ်ခိုဟ်အိုတ်ကီုရ။ (ပိုဒ်−၈၇) ။
(၈၈) ။ တၞံတာနွံဒၟံၚ်ပ္ဍဲလဒေါဝ်ဝါတေံဂှ် သဝ်နူကဵုတၞံချောဲနွံဒၟံၚ်ပ္ဍဲက္ဍဟ်ဒဵုဏံကီုရ။ (ပိုဒ်−၈၈) ။
(၈၉) ။ ကဆံၚ်ပညာစိုပ်အာတန်လဵုလေဝ်အဓိကဟွံသေၚ်ပုဟ်၊ အဓိကဂှ်တှ်ေဒးကၠောန်ကမၠောန်လေပ်ရ။ (ပိုဒ်−၈၉) ။
(၉၀) ။ ဘဝဟီုမ္ဂးဂှ်တှ်ေအရာဂွံဒးဖေက်ဂှ်မူရောဟွံမွယ်ရတုဲ နွံဆပိုဲတံဒးကၠိုဟ်စိုတ်ကေတ်ဍေံတုဲ ဒးတတ်ထပါ်အာဇၟာပ်ပြသၞာဇၟာပ်အခက်ခုဲအတိုၚ်သဘာဝမာန်ရ။ (ပိုဒ်−၉၀) ။
(၉၁) ။ လ္တူဂၠးတိဏံဟွံမွယ်မအရေဝ်ပြသၞာမ္ဂးတှ်ေ မၞိဟ်ပိုဲဏံဂှ်လေဝ်ဟွံတီအစောံစရာဲဇကုအိုတ်ကီုရ။ (ပိုဒ်−၉၁) ။
(၉၂) ။ ပ္ၚာၚ်လက်ဖက်ဗ္ကပ်လဝ်ပ္ဍဲလဒေါဝ်ဗြဲဂှ် ၜိုန်ရဗြဲဂူစှ်ေအတိုၚ်မွဲဗ္တံကီုလေဝ်ဍာ်ပေၚ်အာဟွံမာန်ကီုရ၊ မၞိဟ်ဟွံပံက်စိုတ်လ္ၚတ်ဏောၚ်တှ်ေ ၜိုန်ရဂၠာဲကေတ်နၚ်တၠပညာတံစှ်တၠဒၠောံဗ္တောန်ကီုလေဝ် ဒိုဟ်ဓီုမံၚ်ဗီုတြေံဂှ်ရ။ (ပိုဒ်−၉၂) ။
(၉၃) ။ ယဝ်ရပိုဲတံဖျေံစိုတ်ဒးကွာ်အာဂတတေံမ္ဂးတှ်ေ လ္ပဆုတ်ကလေၚ်ထောံဒၟာနူကဵုအိက်ကၠဵုမွဲကလောံဍောတ်ဂှ်ညိ။ (ပိုဒ်−၉၃) ။
(၉၄) ။ မူအရာပိုဲတံကၠောန်ကၠောန်ဒှ်တဴအရာခိုဟ်မ္ဂးတှ်ေ ၜိုန်ရညးတၞဟ်ညာတ်ကေတ်ဗၠေတ်ဗၠေတ်ကီုလေဝ်လ္ပစွံအဓိကညိ၊ အောန်အိုတ်ဟီုဂှ် ပိုဲဏံဂွံကၠောန်ကေတ်ဏာဖဵုခိုဟ်ခိုဟ်ကီုရ၊ ဟွံတုပ်ကဵုဍေံတံတုဲ ၜိုတ်ဆကူချပ်လပါ်ခိုဟ်ဂှ်လေဝ်ဍေံတံကၠောန်သ္ပဟွံဂွံဏီရ။ (ပိုဒ်−၉၄) ။
(၉၅) ။ ပ္ဍဲဘဝပိုဲဏံဟီုဂှ်လ္ပသမ္တီလဝ်တွဵုပိုဲကေၚ်ကၠောန်ခိုဟ်လဝ်ကဵုညးတၞဟ်တံဂှ်ညိ၊ ဆဂးဂှ် ထေက်ကြိုက်ဒးသမ္တီလဝ်တွဵုဟီုဂှ်တှ်ေ ညးလဵုကေၚ်ကၠောန်ခိုဟ်လဝ်လ္တူပိုဲတံဂှ်ညိ။ (ပိုဒ်−၉၅) ။
(၉၆) ။ ဟွံဟီုဂှ်လ္ပထေၚ်ဟွံတီ၊ သ္ၚိတ်ဇြအာဂှ်လေဝ်လ္ပခယျဒိုဟ်ဓီုညိ၊ ဆဂးဂှ် ဒှ်မၞိဟ်ဍိုဟ်ကေက်စဳကၠးမွဲတုဲဟွံဟီုသ္ၚိတ်အာတုဲမံၚ်ထောံညိၚ်ညိၚ်ရ။ (ပိုဒ်−၉၆) ။
(၉၇) ။ လ္ပဆာန်ညးတၞဟ်ဂၠိုၚ်အာနူကဵုပိုဲဏံညိ၊ ဇကုပိုဲပိုဲဏံရဟွံဆာန်မ္ဂးတှ်ေညးတၞဟ်တံဂှ်လေဝ်ဟွံဆာန်ဇကုပိုဲဏံကီုရ၊ ဟိုတ်ဂှ်ရတှ်ေ ကၠာဟွံဂွံဆာန်ညးတၞဟ်ဏီဂှ်ဇကုပိုဲဏံဂှ်ဒးဆာန်ကၠာညိအဴ။ (ပိုဒ်−၉၇) ။
(၉၈) ။ ကၠောန်ကုသဵုမိက်သ္ဂောံကဵုညးတၞဟ်ဆဵုဂှ်ဒှ်ကုသဵုဇေတ်ဇေတ်ဟွံသေၚ်ရ၊ ကၠောန်ဒုဟ်ဖေက်ညးတၞဟ်တီဂှ်ရဒှ်တဴဒုဟ်ဇေတ်ဇေတ်ဒုဟ်ဍာံဍာံရ။ (ပိုဒ်−၉၈) ။
(၉၉) ။ ဂွံနၚ်သီုကဵုက္ကိုပ်ဂှ်လ္ပထေၚ်ဒှ်ဆတာလျိုၚ်သွက်သော်ဂွံတိုန်မွဲသာ်ဂှ်ညိ၊ ဟိုတ်ဂှ်ရတှ်ေ က္ဍိုဟ်နွံတုဲက္ဍဟ်ဒးနွံထေက်ညိ၊ က္ဍိုပ်ဗီုက္ဍိုပ်ၚုဲဂှ်လ္ပကဵုဒှ်ညိ။ (ပိုဒ်−၉၉) ။
(၁၀၀) ။ သိုက်လောဲကီုဒိုက်ဝါတ်ကီုဂှ်ဂွံပိုၚ်အခိၚ်(၂၄)နာဍဳတုပ်တုပ်ဖ္အိုတ်ရ၊ အဓိကဟီုဂှ်တှ်ေ နဲကဲသုၚ်စောဲဘဝညးမွဲကေုာံညးမွဲဂှ်ဒှ်ၚုဟ်မးသွက်ဘဝမသှ်ေမံၚ်ဂှ်ဟေၚ်ရ၊ သွဝ်ကဵုနရက်ဂှ်လေဝ်ဍေံနွံဒၟံၚ်ပ္ဍဲကဵုဘဝပိုဲဏံဖအိုတ်ရ၊ ဟိုတ်ဂှ်ရ နဲကဲသုၚ်စောဲဘဝဟီုဂှ်ဒှ်အဓိကဇၞော်ကွေံကွေံရ။ (ပိုဒ်−၁၀၀) ။
(၁၀၁) ။ အခိၚ်တက်ကျာကဵုမိယာဲဂှ်တှ်ေ − − − အဲအာဝေၚ်ဒၞာဲတေံမွဲလစုတ်ဏးမိယာဲ? သဝ်တ္ၚဲဏံမုဂွံစရောမိယာဲ? ကဵုသြန်ညိလေဝ်မိယာဲ? ပဠောအ်မွဲဟတှ်ေဂှ်နွံမံၚ်အလဵုမိယာဲ? ဗျဵုပုၚ်ကွေံရမိယာဲ? ၊ အခိၚ်တက်ကျာကဵုအပါဂှ်ပၠန်တှ်ေ အပါမိယာဲမွဲအာဣလဵုရော။ (ပိုဒ်−၁၀၁) ။
(၁၀၂) ။ ဒးမှာတဴအတိုၚ်မွဲဘဝဟီုဂှ်တှ်ေ ဆဵုအ္စာခိုဟ်တုဲပိုဲဟွံကတ်ဗ္တောန်၊ ဆဵုရဲသဟာဲခိုဟ်တုဲပိုဲဟွံပံက်ဖက်၊ တုဲတှ်ေ ဆဵုကေတ်အခေါၚ်တုဲပိုဲဟွံတံၚ်ဂြဲကေတ်ဗွဲမပြဟ်မာန်ဂှ်ဒှ်လလေၚ်ဇၞော်ကဵုဒြဟတ်ပ္ဍဲဘဝပိုဲဏံရ။ (ပိုဒ်−၁၀၂) ။
(၁၀၃) ။ ပရိုၚ်ပ္တောံသိုၚ်မာန်ပ္တိုန်ကေတ်နၚ်နူကဵုမၞိဟ်က္ဍုဟ်မွဲ၊ တုဲတှ်ေ ဍေံပလံၚ်ဗစိုပ်ဏာကဵုပ္ဍဲမၞိဟ်ကူချပ်ဟွံလေပ်တံတုဲ ခက်ဗါန်အာပ္ဍဲမၞိဟ်ကတောဝ်သာသာတံဂှ်ပၠန်ရ။ (ပိုဒ်−၁၀၃) ။
(၁၀၄) ။ အဓိကဟွံသေၚ်ပုဟ်ပိုဲတံဒးပ္တောံဒှ်မၞိဟ်ခိုဟ်ကဵုညးဂမၠိုၚ်တီ၊ ၜိုတ်ဆတီကေတ်ပိုဲဏံဂှ်ဒှ်မၞိဟ်ခိုဟ်မွဲဂှ်တှ်ေတုဲဒှ်မံၚ်ရဏောၚ်သွက်ဘဝ။ (ပိုဒ်−၁၀၄) ။
(၁၀၅) ။ ဒးသုၚ်စောဲဘဝပိုဲညံၚ်သ္ဂောံဍိုက်ပေၚ်ကဵုတသိုက်စိုတ်အိုတ်ညိအဴ၊ အတိက်မလောန်ကၠုၚ်ဒၞာဲသှ်ပလးကေတ်ဟွံဂွံတံဂှ်လေဝ် ဒးထောံလသာလဝ်အတိုၚ်သဘာဝတုဲ စပ္တံတ္ၚဲဏံဒှ်အဓိကမွဲရ၊ ၜက်အာတုဲထောံလသာသၠးဗွးတဴညိ၊ ထေက်ကြိုက်ဒးစပ္တံကၠောန်တၟိညံၚ်သ္ဂောံခိုဟ်နူကဵုဗီုတြေံတေံဂှ်အိုတ်ညိ။ (ပိုဒ်−၁၀၅) ။
(၁၀၆) ။ မၞိဟ်ပရေံဟွံမွယ်တှ်ေ မၞိဟ်ခိုဟ်လေဝ်ဟွံမံက်တိုန်ရ၊ ဟတှ်ဟွံမွယ်တှ်ေ ဟွံတီကေတ်နဲကဲသုၚ်စောဲသြန်ရ၊ ဆိၚ်လဝ်ဟွံမွယ်မ္ဂးတှ်ေဟွံတီကေတ်အခိၚ်ဂှ်နွံၚုဟ်မးၜိုတ်လဵုကီုရ၊ ယဝ်ရဍာ်ရမတ်ဟွံတိတ်မ္ဂးတှ်ေဟွံတီကေတ်စိုတ်ပိုဲမၞိဟ်ဏံရ။ (ပိုဒ်−၁၀၆) ။
(၁၀၇) ။ ပ္ဍဲဗ္တံဂၠုအိုတ်ဂှ် ပိုဲတံဂွံဆဵုကေတ်ဍောၚ်သၞံၚ်တံကၠးအိုတ်တဴဗွဲမလောန်ကီုရ၊ ပ္ဍဲတ္ၚဲပိုဲတံဒှ်ဒဒိုက်ဇၞော်ကဵုဒြဟတ်ပၠန်လေဝ်ပိုဲတံဂွံဆဵုကေတ်မာန်ညးလဵုမွဲဆာန်ပိုဲက္ဍုဟ်ပိုဲကီုရ။ (ပိုဒ်−၁၀၇) ။
(၁၀၈) ။ ပိုဲဏံဂှ်အခေါၚ်ဟွံမွယ်ဂွံကၟာတ်ထောံကသပ်လညာတ်ညးတၞဟ်ကီုရ၊ ဆဂးဂှ် ပိုဲဏံအခေါၚ်နွံသုၚ်စောဲဘဝဗီုပိုဲဒးစိုတ်ညံၚ်သ္ဂောံဂတာပ်အခေတ်ပေၚ်ပေၚ်မာန်ရ။ (ပိုဒ်−၁၀၈) ။
(၁၀၉) ။ ကၠောန်ခိုဟ်တှ်ေပိုဲကလေၚ်ဂွံကၠုၚ်ဖဵုခိုဟ်ဏောၚ်သေၚ်ဟာ၊ ဆဂး ပ္ဍဲအခိၚ်တ္ၚဲဏံတီကၠိုဟ်ကေတ်ဟီုဂှ်တှ်ေ ကၠောန်ခိုဟ်တှ်ေကၠောန်ကဵုဒးမၞိဟ်ညိ၊ ယဝ်ရကၠောန်ဗၠေတ်မှာအာမၞိဟ်ဏောၚ်တှ်ေ ၜိုတ်ဆဍေံဟွံညာတ်ကေတ်ဂုဏ်ဖဵုလ္တူပိုဲသၟးဟွံကတုဲ သီုကဵုဍေံတံကၠတ်လက်မံၚ်ပိုဲဗွဲလက္ကရဴဏီရ။ (ပိုဒ်−၁၀၉) ။
(၁၁၀) ။ လ္တူလိုက်လောကဏံဂှ်ဟွံမွယ်မအရေဝ်တသိုက်ကဵုဒဒိုက်ရ၊ နွံတဴဆမရေဝ်ပေၚ်စိုတ်ကဵုဟွံပေၚ်စိုတ်မဒှ်ကီုရ၊ ပ္ဍဲအခိၚ်ပိုဲတံပေၚ်စိုတ်ကမၠောန်ပိုဲမကၠောန်မံၚ်ဂှ်တှ်ေ ဟွံတီတဴဒဒိုက်ဇြိုၚ်သာမွဲသာ်ကီုရ။ (ပိုဒ်−၁၁၀) ။
(၁၁၁) ။ အခေါၚ်ဟီုမ္ဂးဂှ်တှ်ေပိုဲဆဵုကေတ်ဒၞာဲညးဂမၠိုၚ်ဟွံဂွံကၠောန်ဏီတံဂှ်ဒှ်တဴအခေါၚ်မွဲကီုရ၊ ၜိုန်ရဆဵုကေတ်သာ်ဏံကီုလေဝ်ဂွံစိုပ်တိုၚ်ပ္ကဴဂှ်ဟီုကေတ်ဟွံဂွံဏီရ၊ ဣဏံဟီုဂှ်ဒှ်ဆအခိၚ်စပ္တံသွက်ဂွံစိုပ်အာတိုၚ်ပ္ကဴရန်လဝ်ဂှ်မာန်ရ။ (ပိုဒ်−၁၁၁) ။
(၁၁၂) ။ ပွမဟီုတပ်တပ်ဓဝ်ဓဝ်တံဂှ်ဒှ်တဴဖဵုခိုဟ်အိုတ်မွဲရ၊ ဆဂးဂှ်တှ်ေ ယဝ်ရဟီုဟွံကိတ်ညဳကဵုမၞိဟ်ဟွံကိတ်ညဳကဵုပရေၚ်ပရောဟွံကိတ်ညဳကဵုအခိၚ်အခေတ်ကာလဒေသမ္ဂးတှ်ေ ဟီုတဴအခိၚ်လဵုလေဝ်ဒှ်တဴပြသၞာအခိၚ်တေံမာန်ရ။ (ပိုဒ်−၁၁၂) ။
၁၁၃) ။ သုၚ်စောဲသြန်ဟွံလေပ်တှ်ေဒှ်တဴဍိက်သြန်မာန်ရ၊ သုၚ်စောဲဍာ်ဟွံလေပ်တှ်ေဒှ်တဴဍိက်ဍာ်မာန်ရ၊ သုၚ်စောဲအှ်ေဟွံလေပ်တှ်ေဒှ်တဴဍိက်အှ်ေမာန်ရ၊ ဟိုတ်ဂှ်ရတှ်ေ သုၚ်စောဲအရာလဵုလေဝ်ၜိုတ်ထေက်ကြိုက်ဟေၚ်သုၚ်စောဲတဴအိုတ်ညိ၊ ပိုဲတီအခေတ်တုဲဒးကၠောန်သ္ပဗက်ဗီုအခေတ်လေဝ်ဟွံသေၚ်ပုဟ်၊ ပိုဲကၠိုဟ်စိုတ်အခေတ်တုဲဟေၚ်ညံၚ်သ္ဂောံမာန်ကေတ်အခေတ်ဂှ်ပိုဲတံဒးကၠောန်ဗက်အိုတ်ညိ၊ ယဝ်ရဟွံကၠိုဟ်စိုတ်အခေတ်တုဲဗက်ၜက်အာအခေတ်မ္ဂးတှ်ေ ဒဒိုက်နာနာဟေၚ်ပြသၞာနာနာဟေၚ် သံယောဇိုန်နာနာဟေၚ် လေပ်စိုပ်ကၠုၚ်ပ္ဍဲဘဝပိုဲဏံမာန်လောဲလောဲရ။ (ပိုဒ်−၁၁၃) ။
(၁၁၄) ။ မိက်သ္ဂောံဒှ်မၞိဟ်ဍိုဟ်ကေက်မွဲတှ်ေဒးကလၚ်ဗက်ညးတၞဟ်ကီုညိအဴ၊ ဒၞာဲပိုဲဒးကလၚ်ညးတၞဟ်လေဝ်ဒးကလၚ်ထေက်ရ၊ ယဝ်ရပိုဲဒးကလၚ်ညးတၞဟ်ဂၠိုၚ်ဂၠိုၚ်မ္ဂးတှ်ေ ပိုဲဏံဂွံကၠိုဟ်ကေတ်စေတနာညးတၞဟ်ကၠးကၠးမာန်ရ။ (ပိုဒ်−၁၁၄) ။
(၁၁၅) ။ ဖဵုခိုဟ်ခိုဟ်သွက်ဘဝဂှ်ဒးဂိုၚ်စွံလဝ်သွက်ဂွံကူချပ်ဂွံဒှ်ဂဥုဲဒြဟတ်မွဲသွုၚ်ထေက်ရ၊ အရာပရေံပရေံမလောန်ၜက်ကၠုၚ်တံဂှ်ပၠန်လေဝ်သမ္တီလဝ်ဍေံတုဲ ဣဏံရအ္စာပိုဲညံၚ်ဟွံဂွံဆက်ကၠောန်ဗၠေတ်မွဲဝါပၠန်ရ ။ (ပိုဒ်−၁၁၅) ။
၁၁၆) ။ လ္ပဖအိုတ်ထောံအခိၚ်ဂၠာဲတဴမိတ်ဒါန်ဆာန်ဇေတ်ဆာန်ဍာံလအ်လကဵုအခိၚ်အခါညိအဴ၊ ပိုဲတံဝိုတ်ထောံအိုတ်ယျဟာဂှ် ပ္ဍဲကွာန်ပိုဲဏံဂှ်လေဝ် သၟတ်တြုံသၟတ်ဗြဴခိုဟ်ခိုဟ်လေဝ်နွံတဴဗဝ်သအဝ်ရဟွံပတေဟ်မ္ဂးတှ်ေကလေၚ်သ္ၚဳကျောဝ်ရံၚ်မွဲဝါညိ။ (ပိုဒ်−၁၁၆) ။
(၁၁၇) ။ မုရောဟွံတီတဴမွဲသာ်မ္ဂးတှ်ေခိုဟ်နူကဵုတီဒၟံၚ်တတတံတံၚ်ဂှ်ဏီရ၊ ဟိုတ်ဂှ်ရတှ်ေ ဟွံတီတှ်ေဟွံတီဂှ်ဟီုညိ ယဝ်တီတှ်ေတီဂှ်ဟီုတဴညိ။ (ပိုဒ်−၁၁၇) ။
(၁၁၈) ။ က္တဵုဒှ်ကၠုၚ်မၞိဟ်ဝါတ်မွဲတုဲလ္ပဟီုဖျေံဏာဒုဟ်ကဵုကံကုသဵုပရေံဂှ်အိုတ်ညိ၊ ဒၞာဲပိုဲတံမိက်သ္ဂောံက္တဵုဒှ်မၞိဟ်ဂှ်ရုဲကေတ်ဟွံဂွံရ၊ ဆဂး ပိုဲဏံဒှ်ကၠုၚ်မၞိဟ်မွဲတုဲ ဂၠံၚ်တရဴတိုၚ်ပ္ကဴဘဝဂှ်ပိုဲဏံသ္ဂုတ်သွာတ်ရုဲစှ်ကေတ်ဂွံမာန်ပေၚ်ပေၚ်ရ။ (ပိုဒ်−၁၁၈) ။
(၁၁၉) ။ ယဝ်ရညးတၞဟ်ဟီုဒှ်ကွေံတှ်ေလ္ပထေဲကဵုဍေံညိဟိုတ်နူကဵုပရေၚ်ပရောဂှ်ဒှ်ဍာံကွေံ၊ ယဝ်ရညးတၞဟ်ဟီုဟွံဒှ်ဂှ်လေဝ်လ္ပထေဲကဵုဍေံညိဟိုတ်နူကဵုပရေၚ်ပရောဂှ်ဟွံဒှ်ဍာံၜိုတ်ဏံဂှ်တှ်ေတုဲဒှ်မံၚ်ရဘဝဏံ ဒၞာဲဂွံဒးဒှ်ပြသၞာသေက်ဇဵုညးသ္ကံဂှ်ဟွံမွယ်ရ။ (ပိုဒ်−၁၁၉) ။
(၁၂၀) ။ ဒဒိုက်ဂှ်နွံတဴဇၟာပ်မၞိဟ်သီုညးဖ္အိုတ်ကီုရ၊ ဆဂးဂှ်တှ်ေ ၜိုတ်ဆဍေံလဴကဵုပိုဲဏံတီကီုရ၊ မၞိဟ်လ္ၚဵုတံဂှ်ဒဒိုက်ဂၠိုၚ်နူပိုဲဏံဂှ်လေဝ်မူပညးတံဒ္တူဂျိုၚ်ဒၟံၚ်ဂွံဂှ်ရော၊ ဟိုတ်နူကဵုညးတံဒုၚ်ကေတ်ဍေံကၠိုဟ်ကေတ်ဍေံဂှ်ဣဏံရဒှ်သဘာဝသွက်သတ်ဂျိုၚ်တဴဒၟံၚ်လ္တူလိုက်ဏံဖအိုတ်တုဲထေက်ကြိုက်ပိုဲတံဒးမံၚ်ကဵုဍေံအတိုၚ်သဘာဝအိုတ်ညိ။ (ပိုဒ်−၁၂၀) ။
(၁၂၁) ။ ကမၠောန်ညးခံင်ဂှ်ကၠောန်အာညိ ကမၠောန်မကၠောန်ဂှ်ဒးဒှ်ဖဵုခိုဟ်ဟ်မွဲဟေင်။
(၁၂၂) ။ ပိုဲကၠောန်ဂွံၜိုတ်ဏံဂှ်တၟေင်ရလ္ပထေင် သွက်ညးမွဲတေံဂှ်ဒှ်ဒၟံင်ကမၠောန်ဝေင်ကောန်တာဲဏောင်၊ ဗီုလဵုဂွံပဝါသနာညးကဵုညးရလေဝ်။
(၁၂၃) ။ နဲကဲဗဂဵုလဟဵုမွဲဟေင်နဲကဲပြံၚ်သၠာဲမွဲဟေၚ်ဒ်ှဖဵုဇၞော်အိုတ်သွက်ပိုဲမၞိဟ်ဏံရ၊ ယဝ်ရအိုတ်ပိုတ်ကၠေံဒၟံင်နဲကဲဗဂဵုလဟဵုနဲကဲပြံၚ်သၠာဲဏောင်တှ်ေ ဘွဂှ်ဒှ်အာသုညရ။
(၁၂၄) ။ နရက်နွံပ္ဍဲစိုတ်သွဝ်လေဝ်နွံပ္ဍဲစိုတ်နိဗ္ဗာန်လေဝ်နွံပ္ဍဲစိုတ်ရဏောင်တှ်ေမူပရောပိုဲဂၠဲါဟွံဆဵု၊ ပ္ဍဲအခိင်ပိုဲဆဵုစိုတ်ဟေင် ပိုဲဆဵုရနရက်ဍုင်သွဝ်နိဗ္ဗာန်ဇေတ်ဇေတ်။
(၁၂၅) ။ ဂျိုင်မံင်သွက်ဂွံစဟာ စသွက်ဂွံဂျိုင်အာဟာ။ (ယဝ်ရဒးသွဟ်ကဵုတှ်ေ စသွက်ဂွံဂျိုင်ရ)။
(၁၂၆) ။ ကြက်မၞိဟ်ဆပုင်ဏောင်တှ်ေစၞစအဟာရဂှ်ဒှ်အဓိကရ၊ ယဝ်ရပိုဲမံင်ကဵုသဘာဝမ္ဂးတှ်ေသြန်ဟီုဂှ်ပိုဲဟွံဒးအာဂၠာဲကေတ်ဍေံရ။
(၁၂၇) ။ တာလျိုင်မၞိဟ်မွဲၜိုတ်ကၠောန်ဂွံဂှ်ကၠောန်ညိ၊ ဟွံဒးပတုပ်ကဵုညးတၞဟ်ပုဟ်။
(၁၂၈) ။ လ္ပဂၠာဲဒုဟ်ညးသ္ကံအိုတ်ညိ၊ တာလျိုင်ညးကဵုညးကၠောန်ညံင်ဂွံပြေပြံင်ဂှ်ဒှ်အဓိကရ။
(၁၂၉) ။ ဟွံတီဂှ်ပရေံအိုတ်ရ၊ တီမံင်ဖိုဟ်ဟွံဒုင်ကေတ်တဲဂှ်ပရေံလ္တူပရေံရ။
(၁၃၀) ။ မၞိဟ်တိက်သၠိင်ဂှ်ဟတဵုလောဲ၊ ၚုဟ်မံင်ရသ္ပညံင်တိက်သၠိင်ဂှ်ဟတဵုဝါတ်ကွေံကွေံရ။
(၁၃၁) ။ ဇၟာပ်ညးအဲအတိက်နွံမံင်ဖအိုတ်ရ၊ အတိက်ဂှ်လ္ပကဵုဍေံပလီုပိုဲညိ၊ ပစ္စုပ္ပန်တ္ၚဲဏံ ဒးချပ်ဒးဟီုဒးကၠောန်ညံင်ဂွံနွံကဵုဖဵုခိုဟ်ခိုဟ်အိုတ်ညိ။
(၁၃၂) ။ မၞိဟ်တြုံဒးကၠောန်ဗက်ဂှ်ဒ်ှဟိုတ်ကျဗြဴတုဲဒးကၠောန်အာဟွံသေင်ပုဟ်၊ ဟိုတ်နူကဵုဆာန်ညှာစိုတ်စွံၚုဟ်မးလ္တူညးသ္ကံအိုတ်တုဲဒးကၠောန်အာရ။
(၁၃၃) ။ တြုံဗြဴဟီုဂှ်ပံင်ဖက်ညးသ္ကံလအ်က္ဍင် ပ၆ုတုဲဒးညှာစိုတ်ညးသ္ကံဂၠိုင်ဂၠိုင်ဏောင်။
(၁၃၄ ။ ကောန်အဲဘာတက္ကသဵုတုဲတ်ှေဒှ်အဓိကဟွံသေင်ပုဟ်၊ ယဝ်ဒှ်မၞိဟ်ခိုဟ်မွဲတှ်ေၚုဟ်မးဇၞော်အိုတ်ရ။
(၁၃) ။ ဟွံဒးတှ်ေဟွံတီသၞောဝ် ကာလဒးတှ်ေဟလောန်နာဲဟလောတ်ရ၊ စွံသတိညိ။
(၁၃၆ ။ ဒၞာဲမၞိဟ်ခိုဟ်နွံဂၠိုင်ဂှ်မၞိဟ်ပရေံတံနွံအောန်ရ၊ ဒၞာဲမၞိဟ်ပရေံတံနွံဂၠိုင်ဂှ်လေဝ်မၞိဟ်ခိုဟ်တံဂှ်နွံအောန်ရ၊ (သဘာဝဂှ် ဍေံပါ်ပဲါလဝ်တုဲတုဲရ)။ ။
(၁၃၇ ။ ဘဝဟီုဂှ်ဟွံဒးပတုပ်ကဵုညးတၞဟ်ညိ၊ ယဝ်ရတုပ်မံင်ဖအိုတ်ဏောင်တှ်ေ လ္တူဂၠးကဝ်ဏံဂှ်ဟွံမွဲကဵုပေဲါပြိုင်ပ္ကာန်ရ။
(၁၃၈ ။ ဒၞာဲအိန်ထံင်ပိုဲမိက်သ္ဂောံက္တဵုဒ်ှမၞိဟ်ဂှ်ရုဲကေတ်ဟွံဂွံရ၊ ဆဂးတှ်ေ နဲကဲသုင်စောဲဘဝဂှ်ပိုဲဏံရုဲကေတ်ဂွံ(၂၄)နာဍဳပေင်ပေင်ရ။
(၁၃၉ ။ အခိင်ဂွံစညးသ္ကံတၟိတၟိဂှ်ညှာစိုတ်ညးသ္ကံအိုတ်အစောန်သက်ဟီုဟွံမွဲရ၊ လၟုဟ်ဏံဂှ် မူဒ်ှအာရော။
(၁၄၀ ။ (ကောန်)−အပါကဵုအဲသုင်ၜံက်ကီုလေဝ်၊ (အပါ)−ၜံက်ဂှ်အန္တရာဲဍေံဇၞော်မံင်ဏောင်ကောန်၊ (ကောန်)−ဟီုသာ်ဂှ်တှ်ေမူပအပါဂွံဒးသုင်ဂှ်ရော။
(၁၄၁) ။ နဲကဲဗဂဵုလဟဵုမွဲဟေင်ဒ်ှကုသဵုခိုဟ်အိုတ်ဇေတ်ဇေတ်ရ။
(၁၄၂) ။ ကမၠောန်မွဲဟေင်ဒှ်ကုသဵုခိုဟ်အိုတ်ဇေတ်ဇေတ်ရ။
(၁၄၃) ။ ယဝ်ရပိုဲပတှ်ေဒၟံင်ကုသဵုခိုဟ်ပရေံမ္ဂးတှ်ေ − (မအရေဝ်ဓဝ်အေင်ဒုင်အစောံစရာဲနဲကဲဗဂဵုလဟဵုတံဂှ်မူအဓိပ္ပဲါနွံရော)။
(၁၄၄) ။ ထပိုတ်ဂဉုဲချေံထပိုတ်ၜံက်ထပိုတ်အရက်ဂှ်လောဲလောဲရ၊ မွဲတ္ၚဲ(၁၀၀၀၀၀)ယဝ်ဂွံသြန်တှ်ေထပိုတ်မာန်ဟာ၊ ယဝ်ထပိုတ်ဟွံမာန်တ္ၚဲယျးတေံဒးချိုတ်ဏောင်တှ်ေ ဂံင်ထပိုတ်ဟာ။
(သီုဖအိုတ်ဂှ်နွံပ္ဍဲစိုတ်ပိုဲဏံရ)ဂၠံင်ဒးစိုတ်ဂှ်ရုဲကေတ်ညိ၊ ယဝ်ရပိုဲဟွံမာန်စိုတ်ဏံမ္ဂးတှ်ေဂွံဗၠးကေတ်ဒုဟ်လောကအခေတ်တ္ၚဲဏံဂှ်ဒှ်အာဟွံမာန်ရ၊ ပြသၞာတ္ၚဲဏံပိုဲဒးယှုက်ထုဲဒၟံင်ဂှ်ဍေံကၠုင်နူပိုဲဟွံမာန်စိုတ်ဏံဗွဲမဂၠိုင်ဖအိုတ်ရ။
(၁၄၅) ။ ကၠောန်လောဲတုဲဇကုဒးကလေင်ဒှ်ဒဒိုက်၊ ကၠောန်ဝါတ်တုဲဇကုကလေင်ဂွံတသိုက်စိုတ်မ္ဂးတှ်ေ ဣဏံဟီုဂ်ှတိုန်တဴကဵုပိုဲရအဴ။
(၁၄၆) ။ ယဝ်ရဂကောံတဵုလွဳတၞံဆုနွံတှ်ေ ဂကောံမင်မွဲလွဳပရာတၞံဆုတံဂှ်လေဝ်ဒးနွံထေက်ဏောင်။
(၁၄၇) ။ ဂၠံင်ဓရ်ဟီုဂှ် ဒှ်ဂၠံင်တပ်ဂၠံင်အးမွဲတၞုင်တုဲ (ဒးကွာ်အာဍာန်ဓဝ်ဓဝ်တပ်တပ်)ကီုရ။
(၁၄၈) ။ ၜိုန်ရအဲဏံဒှ်မၞိဟ်တီကၠိုဟ်ကေတ်ဖအိုတ်ဟွံသေင်ကီုလေဝ် ဆဂးဂှ်တှ်ေအဲဏံဂ္ဇံဒၟံင်ဗ္ဒဲါဗှ်ေလၟိုန်တုဲဒှ်မၞိဟ်ကဵုကေတ်ကသပ်ခိုဟ်မွဲမာန်။
(၁၄၉) ။ ဗၠေတ်မ္ဂးဒးသောင်ထ္ၜး၊ ဟွံကၠးမ္ဂးဒးသၟာန်။ ဗၠေတ်ဟွံသောင်ထ္ၜးညးတၞဟ်စိုတ်ဟွံအး၊ ဟွံကၠးယဝ်ဟွံသၟာန်ဂမြင်ညာဏ်ဟွံတၟး။ (သိုက်လွဳ ဟံသာဝတဳ)။
(၁၅၀) ။ တာလျိုင်ဂကူမွဲ ၜိုတ်ဂွံအခိင် ၜိုတ်ဂွံအခေါင် ၜိုတ်အစောံစရာဲနွံဂှ်ဒးယိုက်ဂၠေင်ဒၟံင်လၟိုန်ကာလဟေင်ရ၊ သၞိင်ဗၠးၜးဂှ်ဒှ်သၞိင်ဆုဇူၜိုဟ်သြိုဟ်အိုတ်ရ၊ သၞိင်မိမၜါဂှ်လေဝ်ဒှ်သၞိင်ၜိုဟ်သြိုဟ်မွဲသၞိင်ကီုရ။
(၁၅၁) ။ ကၠောန်သွက်ဂကူဟီုဂှ်လောဲလောဲရ၊ ၜိုတ်ဆဒှ်မၞိဟ်ခိုဟ်မွဲဟေင်နာဲဂှ်ဒှ်မၞိဟ်တၟေင်မွဲပ္ဍဲဂကူဂှ်ရ။
(၁၅၂) ။ ကၠောန်ဗက်တာလျိုင်တုဲဒးဒုင်ဗက်ပ္တိတ်ထောံနူကဵုကမၠောန်ဂှ်ခိုဟ်နူကဵုဟွံကၠောန်ဗက်ဗီုဂွံလဝ်တာလျိုင်တုဲဒးနှုက်ပ္တိတ်ထောံနူကဵုကမၠောန်။
(၁၅၃) ။ ပိုဲဒှ်မၞိဟ်က္ဍိုပ်သ္ကိုပ်ဂကောံအိန်ထံင်တုဲတှ်ေ တာလျိုင်ပိုဲဒးကေတ်လဝ်ဗွဲကၠာအိုတ်ဂှ်လ္ပဝိုတ်ထောံညိဏး၊ တာလျိုင်ဂကူလေဝ်ဒးကၠောန်ၜိုတ်ပိုဲဂွံအခိင်အကြာတင်ဝါတ်ဂါတ်နာနာမာန်ဂှ်ကၠောန်အာအိုတ်ညိ၊ ဒဒိုက်ကီုတသိုက်ကီုပြသၞာဗွဲမဂၠိုင်မၞိဟ်ဒးဆဵုညာတ်ကေတ်ဍေံတွဵုဂှ်ဂကောံအိန်ထံင်ကောန်ဗြဴပိုဲဏံမွဲဟေင်ရတီကၠိုဟ်ကေတ်ဖ္အိုတ်နာနာမာန်ရ၊ ဟိုတ်ဒှ်သာ်ဂှ်တုဲ ညးတၞဟ်ထိုင်သးနာဲဂှ်ဒှ်မၞိဟ်ဆာန်ဂကူမွဲကီုလေဝ် ဆဂးဂှ် ယဝ်ရကျောဝ်အာဂကောံအိန်ထံင်ကောန်ဗြဴဇကုတသိုက်ဟွံမွဲပ္ဍဲဘဝလၟေင်လၟေင်တ္ၚဲဏောင်တှ်ေ နာဲဒုင်လဝ်ယၟုက္ဍိုပ်သ္ကိုပ်ဂကောံအိန်ထံင်ဂှ်ၜိုတ်ဆဒုင်လဝ်ယၟုသၟးသၟးရ၊ ဂကောံအိန်ထံင်မွဲဍောတ်ဏံဂှ်နာဲကေတ်တာလျိုင်ဟွံပြေပြံင်ဏောင်တှ်ေဗီုလဵုနာဲဂွံသ္ပက္ဍိုပ်သ္ကိုပ်မၞိဟ်ဆာန်ဂကူဂှ်ရော၊ (ဍောင်တီတုဲဇူညိ၊ ဇူဖဲဟေင်ဆက်ကွာ်အာပၠန်ညိ)၊ သိုက်သိုက်ဂှ်ကွာ်အာတပ်တပ်ညိ၊ အဲမွဲစောန်အိုတ် အဲမွဲတၟေင်အိုတ် အဲမွဲကၠိုဟ်အိုတ် လညာတ်အဲကေတ်ဍုင်ဂွံဏောင်၊ လညာတ်ဗီုတံဏံဂှ်နာဲလ္ပချပ်လဝ်တွဵုညိဏး ၊ ယဝ်ရသာ်ဂှ်ဟွံသေင်တှ်ေ တသိုက်ဇေတ်ဇေတ်အဃောနာဲဂျိုင်မံင်တ္ၚဲဏံဂှ်လေဝ်နာဲဂၠာဲဟွံဆဵုပုဟ်။
(၁၅၄) ။ ဒၞာဲပိုဲဏံမကၠောန်လဝ်ဗၠေတ်ဗၠေတ်တံဂှ်လေဝ် ပိုဲဟွံဂံင်လဴကဵုညးတၞဟ်တီမ္ဂးတှ်ေ ယဝ်ရပိုဲကလင်ကေတ်အရေဝ်မွဲလပါ်ဏောင်တုဲဣလဵုရောဓဝ်ဍာံဂှ်ဂၠာဲဟွံဆဵုပုဟ်။
(၁၄၅) ။ ကမၠောန်မွဲဟေင်ကဵုသွဟ်အရာနာနာမာန်ရ၊ ၚုဟ်မးမၞိဟ်ဂှ်နွံပ္ဍဲကမၠောန်ရ၊ ယဝ်ရကမၠောန်ဟွံမွယ်ဟွံဆာန်ကမၠောန်မ္ဂးတှ်ေဘဝဂှ်လေဝ်ဟွံမွယ်ကဵုအဓိပ္ပါယ် ၚုဟ်မးမၞိဟ်လေဝ်ဟွံမွယ်ရ။
(၁၅၆) ။ စၞစလ္ၚဵုဂှ်သြန်အိုတ်တုဲဒှ်ပရေင်ထတ်ယုတ်ဏောင်တှ်ေထေက်ကဵုသြန်ဒးအိုတ်ဒးဂံင်ရာန်စထေက်ရ၊ စၞစလ္ၚဵု − လ္ၚဵု − လ္ၚဵု − လ္ၚဵုဂှ်ပၠန်တံဂှ် သီုကဵုသြန်ဒးအိုတ်တုဲဇီုကပိုက်ကဵုပရေင်ထတ်ယုက်ဇၞော်ဇၞော်ဟွံသာတုဲမၞိဟ်ဗွဲမဂၠိုင်တံဂှ်လေဝ်ဂံင်ဖအိုတ်သြန်ဂံင်ဖအိုတ်အခိင်ဂံင်ဖအိုတ်ၚုဟ်မးမၞိဟ်တုဲ ဂၠာဲရာန်စသုင်မိပ်မိပ်အိုတ်ရ၊ (စိုပ်အခါမွဲတ္ဍဲတှ်ေ ကံကုသဵုအဲပရေံဂှ်လ္ပကဵုဒးမိင်ညိ)၊ ကံကုသဵုခိုဟ်ပရေံဂှ်ပိုဲဏံမွဲဟေင်ရဒှ်မၞိဟ်မကၠောန်ကေတ်နင်ဍေံကေတ်ကေတ်ရ။
(၁၅၇) ။ ဇၟာပ်ဇၟာပ်ညးအဲ ဒှ်ဒၟံင်မၞိဟ်တၠအစောန်တၟေင်တၟေင်သီုညးဖအိုတ်ရ၊ ဟိုတ်ဒှ်သာ်ဂှ်တုဲ ယဝ်ရပိုဲကဵုကၜိင်လ္တူကျာကဵုဂစေံပဝ်သၟဝ်ဍာ်မ္ဂးတှ်ေသာ်လဵုသ္ပလေဝ်ဒှ်အာဟွံမာန်ရ။
(၁၅၈) ။ ဂွံလဝ်ခန္ဓကာယဘဝဏံတုဲတှ်ေ ယဝ်ရပိုဲတံသုင်စောဲစကာဟွံလေပ်မ္ဂး ဒဒိုက်နာနာသံယောဇိုန်နာနာတံဂှ်လေဝ်ပေင်ဒၟံင်ပ္ဍဲကဵုဘဝပိုဲတံဇၟာပ်မိနေတ်နာဍဳစက္ကဟွံပိုတ်သ္ကုတ်ရ၊ ခန္ဓဏံဂှ်ချိုတ်အာတုဲခြာဟွံလအ်ဟေင်မၞိဟ်တံဝိုတ်အာအိုတ်ဂှ်ဒှ်ပရေင်သဘာဝရ၊ ဟိုတ်ဏံဟေင်ရ အရာခိုဟ်ခိုဟ်ဒၞာဲတၟေင်တၟေင်ထေက်ကဵုမၞိဟ်မွဲကၠောန်ဂွံဂံါအာစိုပ်ဂှ်ဒှ်တာလျိုင်ပိုဲမၞိဟ်အဃောဂျိုင်မံင်ဏံဟေင်ရ၊ ချိုတ်အာတုဲဟီုဂှ်ဒှ်သုညရဘွရ၊ မအရေဝ်သီုဖအိုတ်ယဝ်ရပကောံထောံတုဲတှ်ေ − − −− −ဂျိုင်ဒၟံင်တ္ဍဲဏံဂှ် ပိုဲမၞိဟ်တံဒးကၠောန်ဖဵုခိုဟ်ခိုဟ်မွဲဟေင်ရ၊ ဂၠံင်ဏံမွဲဂၠံင်ဟေင်ရဒှ်ဂၠံင်တပ်အးမွဲတၞုင်ဒှ်ဍာန်ဓဝ်ဓဝ်မွဲတၞုင်တုဲဒဒိုက်လေဝ်အောန်သာအိုတ်ဖဵုလေဝ်ဇၞော်ဂၠိုင်အိုတ်နဒဒှ်ပိုဲကောန်ဗုဒ္ဓဘာသာ
မွဲရ၊ (ဂၠံင်ဍာန်ဏံမွဲတၞုင်ဟေင်ရ ထေက်ကဵုပိုဲတံဒးကွာ်အိုတ်ညိ)။
(၁၅၉) ။ အဲဝါတ်ဟီုဂှ်ဂံင်ဒုင်ကအ်ပါင်ထတ်ထတ်ကီုရ၊ ဆဂး _ _ _ ယဝ်ရဒးပံင်ဖက်ကဵုမၞိဟ်ဒၟာနူကဵုသြန်ဏောင်တှ်ေ ဆအယာံမာတ်တၟာဒဳရုဲလေဝ်ဟွံမွယ်ပ္ဍဲက္ဍဟ်ရ။
(၁၆၀) ။ ပ္ဍဲအခိင်ပိုဲစကဂှ် မူပရောပိုဲတံဟွံသၟာန်ကဂှ်ကေတ်ဂွံနင်နူလဵုရော ကဂှ်လွဳလဝ်စၞစကဵုမုရော ယဝ်ရကဂှ်ကၠတ်နင်ကီုလွဳလဝ်နကဵုအိက်ကီုဏောင်တှ်ေနာဲဂံင်စဟာကဂှ်၊ ယဝ်ရနာဲဟွံသၟာန်နာဲဟွံတီကဂှ်ဂွံနင်နူလဵုလွဳလဝ်ကဵုမူစၞစရောဏောင်တုဲ နာဲလေဝ်စအာကဂှ်ဂွံဂယျိုင်အာလမျီုရဟွံသေင်ဟာ၊ ယဝ်ရဒးဟီုသောင်သောင်ကၠးကၠးဓဝ်ဓဝ်တပ်တပ်မ္ဂးတှ်ေ ပိုဲဂွံစကဂွံစစၞတုဲခန္ဓကာယပိုဲဏံလေဝ်ဒှ်ကၠုင်ဒြဟတ်ဂှ်ဣဏံရဖဵုဇၞော်အိုတ်ဟွံသေင်ဟာ၊ (စကလ္ပသၟာန်ကၟာ) − − − ပိုဲဒးရံင်မုဖဵုပိုဲဏံဂွံကၠုင်ရောဂှ်ဒှ်အဓိကဇၞော်ကဵုဒြဟတ်ရ၊ လဆောဝ်လဆောဝ်တှ်ေ အတိုင်ပိုဲကတ်လ္ၚတ်ဗ္တောန်ကၠုင်လဝ်ဖအိုတ်တံဂှ်သုင်စောဲဂွံဇၟာပ်ဒၞာဲလေဝ်ဟွံသေင်ပုဟ်၊ ပိုဲဒးရံင်ကဵု အခိင်အခေတ်ကာလဒေသတုဲအရာလဵုမွဲဒှ်ဖဵုခိုဟ်အိုတ်ဒှ်ဂၠံင်ဍာန်ဓဝ်တပ်အးအိုတ်ဂှ်သုင်စောဲတုဲမၞိဟ်မၞုံဗွဳဗွိုင်ပိုဲတံဂှ်လေဝ်ဂွံဒုင်စသိုင်ဖဵုဇၞော်အိုတ်ဒဒိုက်သာအောန်အိုတ်ဂှ်တုဲ ဘဝဂျိုင်ဒၟံင်တ္ၚဲဏံဟီုဂှ်နွံကဵုၚုဟ်မးနွံကဵုအဓိပ္ပဲါရဟွံသေင်ဟာ။
(၁၆၁) ။ သြန်စောဲသြန်ဟွံလေပ်တှ်ေ ဒှ်တဴဍိက်သြန်မာန်ဏောၚ်၊ သြန်စောဲဍာ်ဟွံလေပ်တှ်ေ ဒှ်တဴဍိက်ဍာ်မာန်ဏောၚ်၊ သုၚ်စောဲအှော်ဟွံလေပ်တှ်ေ ဒှ်တဴဍိက်အှော်မာန်ဏောၚ်၊ ဟိုတ်ဂှ်ရတှ်ေ သုၚ်စောဲအရာလဵုလေဝ် ၜိုတ်ထေက်ကြိုက်ဟေၚ် သုၚ်စောဲတဴအိုတ်ညိ။
(၁၆၂) ။ ခန္ဓကယပိုဲဏံဂှ် နွံကဵုဆီပတိုဟ် နွံကဵုဖျုန်လတေၚ်တုဲ ထေက်ကြိုက်ဒးဂိလေပ် ထေက်ကြိုက်ဒးမှာလေပ် ထေက်ကြိုက်ဒးဒှ်လီုလေပ်တုဲ အရာနာနာလ္တူလိုက်လောကဏံဂှ် ဍေံဂွံဍာံစၟတ်ဍာ်ကၠံပေၚ်ပေၚ်မာန်တွဵုဂှ် ဒှ်အာဟွံမာန်ရ။
(၁၆၃) ။ အခေါၚ်ဟီုမ္ဂးဂှ် ဒှ်တဴၚုဟ်မးဇၞော်အိုတ်သွက်ဘဝပိုဲမၞိဟ်တံရ၊ ညးလ္ၚဵုတံကၠိုဟ်လဝ်စိုတ်ဂှ်တှ်ေ အခေါၚ်ဟီုဂှ် ဒးကၠုၚ်နူကဵုညးမွဲလပါ်တေံ ဗစိုပ်နၚ်ကဵုပိုဲဏံတုဲမှ ဒှ်တဴအခေါၚ်မွဲကီုရ၊ ဗွဲမဂၠိုၚ်တှ်ေ ကၠိုဟ်လတ်စိုတ်သာ်ဏံလေဝ်နွံတဴရ၊ ဇေတ်ဇေတ်ဂှ်တှ်ေ အခေါၚ်ဟီုမ္ဂးဂှ် တိုန်ဒှ်ကဵုပိုဲတံရံၚ်ဍေံဆဵုဗဵုဍေံဒှ်မှ ဒှ်တဴအခေါၚ်မွဲရ၊ အခေါၚ်ဟီုဂှ် ပိုဲတံဂွံဒုၚ်ကေတ်ဍေံလၟိုန်လၟိုန်ဟေၚ်အိုတ်ရ၊ ဟိုတ်နူကဵုပိုဲတံရံၚ်ကေတ်ဍေံဆဵုဟွံကၠးဖ္ဍးတုဲ အခေါၚ်တံဂှ်လေဝ် ဟွံက္တဵုဒှ်ရုပ်ရဴမွဲတုဲ ဖဵုနာနာတံဂှ်လေဝ် လီုလာ်ကၠုၚ်ပ္ဍဲမဂွံအခေါၚ်ဂှ်အိုတ်ရ၊ ဇၟာပ်ပ်တ္ၚဲဟေၚ် ပိုဲတံဂွံကၠုၚ်အခေါၚ်သီုကဵုညးဖအိုတ်တုပ်ပ်ရ၊ ဆဂးဂှ် ပိုဲတံဟွံကေမ်ရပ်ကေတ်ဍေံတုဲ အခေါၚ်တံဂှ်လေဝ် ပြးဇးသွဝ်ကၠေံအာဂတမတ်ပိုဲမၞိဟ်တံအိုတ်ရ၊ အခေါၚ်ဂှ် ပိုဲဏံမွဲဟေၚ်ရဒးကၠောန်သိုၚ်မာန်ဗဒှ်ကေတ်ဍေံကေတ်ကေတ်ရ၊ ယဝ်ရပိုဲတံမၚ်ဒၟံၚ်ကဵုအိန်ဗြီုဒေဝတဴ ကံကုသဵုသၟးမ္ဂးတှ်ေ ညံၚ်ရဴကဵုကၠဵုစၟဳမၚ်ဒၟံၚ် (မယှလူ)စိၚ်ကီုရ။
(၁၆၄) ။ သ္ၚိနွံ ဒၞာဲဇူဒၞာဲတိက်နွံ ဗြဲဟွံဒးတ္ၚဲဟွံကါတ်ပ္ဍဲအခိၚ်တိက်၊ စၞးစနွံ ဇွောံမနွံ မပ္တံကဵုသၞေဝ်ကေဝ်သတ်ဆုသတ်ဒုန်၊ ဂဥုဲနွံ ပရေၚ်ထတ်ယုက်ခိုဟ်၊ ပညာဒးနွံၜိုတ်ကြိုက် အရာဒးသုၚ်လၟေၚ်တ္ၚဲ၊ ဖဵု(၄)တၚ်ဏံဂှ်တှ်ေတုဲဒှ်မံၚ်အိုတ်ရသွက်ဘဝပိုဲမၞိဟ်တံ၊ မၞိဟ်တံမၞုံဗၟိက်ဇၞော်အိုတ်ဟီုဂှ်တှ်ေ ဖဵုပန်သာ်ဏံကီုရ၊ မ္ၚးနူဏံသီုဖအိုတ်ဂှ် လုပ်ကၠုၚ်ပ္ဍဲဘဝခန္ဓကာယပိုဲဏံဂှ် ဒှ်တဴဘဝပတောံအတုဖအိုတ်ရ၊ ဖဵုပန်သာ်ဏံ ညးရဴလဵုမွဲကၠိုဟ်စိုတ်ကေတ်သောၚ်ၚ်ကၠးကၠးမ္ဂးတှ်ေ ညးတေံဟေၚ်ရဂွံဆဵုကေတ်သဘာဝဘဝဇေတ်တ် ဓရ်တပ်တပ်ရ၊ သဘာဝမွဲဟေၚ်ရၜိုဟ်သိုဟ်သာယာညိၚ်ဝတ်အိုတ် သဘာဝမွဲဟေၚ်ရ အန္တရာဲအောန်အိုတ်၊ သဘာဝမွဲဟေၚ်ရကဵုသွဟ်ခိုဟ်အိုတ်မွဲ၊ ဟိုတ်ဒှ်သာ်ဂှ်တုဲ ဇၟာပ်ညးအဲဆာန်သဘာဝအိုတ်ညိအဴ။
(၁၆၄) ။ ကောန်ဖျေံစိုတ် ကော်ဏာမိယာဲဗျုဇကုတုဲ လုပ်အာဂြိုပ်ဇၞော်တေံသွက်သ္ဂောံပၠေဲထောံ၊ အဃောကော်ဏာမိယာဲ မကွာ်လုပ်အာဂြိုပ်ဇၞော်တေံဂှ် ၜိုန်မိယာဲမွဲတီကေတ်ကသပ်ကောန်ကီု မွဲၜါလေဝ်ဟွံဟီုမွဲသာ်တုဲ နွံဆဝးကေတ်ကၞာၚ်ဆု ထောံကၠုၚ်သိုက်သိုက်သ္ကဲဍာန်မကၠုၚ်ဂှ် −−− ဟွံလအ်စိုပ်အာပ္ဍဲလဒေါဝ်ဂြိုပ်ဇၞော်တေံတုဲ ကောန်စွံလသာလဝ်မိယာဲမွဲဓဝ်ဟၟဲကဵုအဖဝ်တုဲ တက်ပြယာဲအာတရဴသၟတ် ဆဂး ကောန်ကၠတ်စဴကၠုၚ်ညးမွဲဓဝ် −−− ခြာဟွံလအ် မိယာဲဗျုဂၠာဲကောန်ဟွံဆဵု ကညာၚ်ကရေဲကော်ကောန် −−− ဟာဲကောန်အဲ ဗှ်ေနွံအလဵုရော −−− ဗှ်ေတၠိၚ်ဂၠံၚ်စဴသ္ၚိဟွံဒးမ္ဂးတှ်ေ ကၞာၚ်ဆုမိဝးထောံလဝ်ဂှ်ဗက်အာတုဲ စိုပ်သ္ၚိဟေၚ်ရကောန် ။
(၁၆၅) ။ ပ္ဍဲအခိၚ်ပိုဲဏံတီဆာန်ကၠုၚ်ဘဝပိုဲဗွဲစၟတ်ယျဏောၚ်တှ်ေ ပွမဇီုကပိုက်ဒဒိုက် နခန္ဓကီု နပ္ဍဲစိတ္တဖအိုတ်ဂှ် ပိုဲဏံသှ်ပလးပြသၞာတံ ဗွဲမပြဟ်ပြေဟ်လောဲလောဲသွာသွာမာန်တုဲ ဟွံရန်လဝ်ကဵုညးလဵုမွဲလေဝ် ဒးကၠုၚ်ကဵုအာရီုဗၚ်ဟေၚ်၊ ၜိုန်ရပိုဲဏံမံၚ်ပံၚ်ဖက်ကဵုအကြာညးဂမၠိုၚ်ကီုလေဝ် ပိုဲဏံနွံကဵုတသိုက်စိုတ်ပကတိ၊
ဆဂး-ပ္ဍဲအခိၚ်ပိုဲဏံသှ်ေဆညးမွဲဓဝ်ဂှ်ပၠန် တသိုက်ဇေတ်ဇေတ်နွံတဴပ္ဍဲပိုဲဂှ် ဍိုက်ပေၚ်ဒၟံၚ်အတိုၚ်ပကတိဖိုဟ်တုဲ ပိုဲဏံဒှ်ညံၚ်ရဴဗ္ဂဲမွဲ ဗီုနဲလဵုထောံထောံဖျေံဂှ် ကာလစှ်ေ ဒးစှ်ေလပါ်ဇိုၚ်တွဵုဏောၚ်။
(၁၆၆) ။ ဇၟာပ်မၞိဟ်မကၠောန်ကမၠောန်ခိုဟ်တံဂှ်လေဝ် ဂွံဒှ်အာသေဌဳဖအိုတ်ဟွံသေၚ်၊ ယဝ်ရပိုဲတ္ၚအ်ဗၠေတ်အာဒၞာဲမ္ဂးတှ်ေ ၜိုန်ရတ္ၚအ်ဂစာန်ကၠောန်ၜိုတ်စှ်သၞာံကီုလေဝ် ဘဝဂှ်ဍေံဟွံပြံၚ်သၠာဲအာတုဲ နွံဒၟံၚ်ဗီုတြေမ်ဂှ်ပၠန်ရ။
ဟိုတ်ဒှ်သာ်ဂှ်တုဲ ယဝ်ရမိက်သ္ဂောံပြံၚ်သၠာဲဘဝခိုဟ်အာနူကဵုတ္ၚဲဏံမ္ဂးတှ် ထေက်ကြိုက်ဒးရံၚ်ကမၠောန်ပိုဲ ကမၠောန်ဂှ်ဒးနွံကဵုအနာဂတ်ကဆံၚ်လဵု ဟဂှ်ဟွံသေၚ်တှ်ေ ကမၠောန်ဂှ်ရီုဗၚ်ဘဝပိုဲဂွံၜိုတ်လဵုတုဲ ပ္ဍဲကဵုအခိၚ်ဂွံအခေါၚ်ခိုဟ်မ္ဂးတှ်ေ ဒးဂံၚ်ပြံၚ်သၠာဲ ဒးဂံၚ်ကွာ်ထပါ်အာ ဗီုပိုဲဏံမစွံလဝ်တိုၚ်ပ္ကဴဘဝဂှ်အိုတ်မ္ဂးတှ်ေ ဘဝဂှ်ပြံၚ်သၠာဲဟေၚ်ရ၊ ဆဂး ဒှ်သေဌဳဗီုညးအဲကၠိုဟ်လဝ်ဂှ် တိုန်တဴကဵုညးမွဲကေုာံညးမွဲသုၚ်စောဲဘဝဟွံတုပ်သၟဟ်တုဲ ယဝ်ရံၚ်အာကဵုဗွဲသဘာဝမ္ဂးတှ်ေ "တိုန်တဴကဵုပိုဲဏံပေၚ်ဖ္ဍိုက်ကဵုဘဝၜိုတ်လဵု" ဂှ် ဣဏံ လညာတ်ပူဂဵုအဲညးချူလိက်ဏံတှ်ေ "ဒှ်သေဌဳ" မွဲတုဲတုဲမံၚ်ယျ ။
(၁၆၇) ။ မၞိဟ်တ္ၚဲဏံ ပညာသိပ္ပံလညာတ်ဂတာပ်ခေတ်ဍိုက်ပေၚ်စဳတုဲ ချူစွံလဝ်တိုၚ်ပ္ကဴဘဝတုပ်မွဲဟီုဂှ် “ဗီုလဵုဂွံဒှ်သေဌဳ, နဲကဲလဵုကၠောန်သြန်ဂွံဂၠိုၚ်” ဣဏံ လညာတ်မၞိဟ်ဂတာပ်ခေတ်တ္ၚဲဏံ၊ လညာတ်သာ်ဏံလေဝ်စကၠုၚ်အခေတ် သုၚ်စောဲဒၟံၚ်ကဆံၚ်ဂၠးတိမွဲတုဲ မၞိဟ်လ္ၚဵုတံလေဝ် ဒးဗက်ဒၞာဲအရၚ်ဇိုၚ်ညးဂၠးတံဂး ။ ဆဂး “ဗီုလဵုအဲဂွံသုၚ်စောဲဘဝ ဂွံနွံကဵုတသိုက်ဇေတ်ဇေတ်တ္ၚဲဏံမာန်ရော” လညာတ်သာ်ဏံလေဝ် ပ္ဍဲကောန်ဂကူဗုဒ္ဓဘာသာပိုဲရဂှ် တုပ်သၟဟ်ညံၚ်ရဴဂၠာဲတၞိၚ်သၟဝ်ဂတာၜဳမှာသၟိတ်တေံ ဂွံဆဵုနွံအောန်ကွေံကွေံ။ ယဝ်ရပိုဲရံၚ်ပြသၞာပ္ဍဲဂကူပိုဲကီု အလုံညးဂၠးတိမွဲသီုဖအိုတ်ဂှ် ပြသၞာမွဲသှ်ပလးပတိတ်ဟွံအိုတ် သှ်ပလးဟွံဂွံရဂှ် ဟိုတ်နူတိုၚ်ပ္ကဴဘဝမစွံလဝ် (ဗီုလဵုဂွံဒှ်သေဌဳ, နဲကဲလဵုကၠောန်သြန်ဂွံဂၠိုၚ်) သာ်ဝွံတုဲ ပေါဲပြိုၚ်ပ္ကာန်နာနာဒှ်လေပ်ရ၊ ကမၠောန်ဗၠေတ်သၞောဝ်ဍုၚ် ကၠောန်လုပ်ကၠုၚ်ရ၊ ဇီုကပိုက်ညးမွဲကေုာံညးမွဲ ဒှ်လေပ်ရ၊ ဂစိုတ်ဂယိုၚ်ညးမွဲကေုာံညးမွဲ ဒှ်လေပ်ရ၊ ထ္ပက်ဇိုၚ်ပလီုဇြဟတ်ညးမွဲကေုာံညးမွဲ ဒှ်လေပ်ရ၊ ဟိုတ်နူဒှ်လညာတ်(အတ္တ)ပေၚ်ဍတ်ဒၟံၚ်ပ္ဍဲလညာတ်တံဂှ်တုဲ ပြသၞာလ္ၚီလက်ကိုတ်ဇဳဇဳသာ် ဒးဆဵုဒၟံၚ်ပ္ဍဲဘဝလၟေၚ်လၟေၚ်တ္ၚဲဏံ ဆက်သှ်ေၜက်အာစဵုကဵုကဝ်တူတေံဏောၚ်။ ပြသၞာဂွံအိုတ်အးအာ ဂွံကိတ်ညဳကဵုသဘာဝခိုဟ်မွဲဟီုဂှ်တှ်ေ ဒးကၠိုဟ်ဒးသုၚ်စောဲဘဝ (ဗီုလဵုအဲဂွံသုၚ်စောဲဘဝ ဂွံနွံကဵုတသိုက်ဇေတ်ဇေတ်တ္ၚဲဏံမာန်ရော) ယဝ်ကၠိုဟ်စိုတ်တၚ်ဏံမ္ဂးတှ်ေ ကိတ်ညဳကဵုသဘာဝသတ်နွံကဵုလမျီုမွဲတုဲ တသိုက်ဇေတ်ဇေတ်သွက်ဘဝဂှ်လေဝ် ဒှ်ကၠုၚ်မၞိဟ်ဟွံမှာဘဝမၞိဟ်ဂှ် ဂွံဒုၚ်စသိုၚ်ပေၚ်ပေၚ်ဨကန်တံမာန်၊ ယဝ်ရကောန်သာကျဝၚ် ဗုဒ္ဓဘာသာပၠန်တှ်ေ ပဵုတုဲဍိုက်ပေၚ်ကဵုသဘာဝဟိုတ်ဖဵုဏံကွေံကွေံဏောၚ်။
(၁၆၈) ။ ဘာတုဲနူဍုၚ်လဵု, ဂွံလဝ်တဆိပ်ကြာမူစိတၞးကီုလေဝ်၊ ယဝ်ရပရေၚ်ပြံၚ်သၠာဲကေုာံဗဂဵုလဟဵုဟွံမွဲဟွံမံက်ကၠုၚ်မ္ဂးတှ်ေ၊ ကမၠောန်မၞးမကၠောန်တဴဒၟံၚ်လၟုဟ် ဒှ်ဆဗျူဟာတြေမ်မွဲတုဲ နာဲဂှ်လေဝ် ဒးဆက်ကွာ်ဗက်အာ အရၚ်ဇိုၚ်ညးတၞဟ်လၟိုန်တုဲ အရၚ်ဇိုၚ်ဇကုဇေတ်ဇေတ်ဂှ် တ္ၚဲလဵုလေဝ် ဟွံမံက်ဟွံမွဲရ။
(၁၆၉) ။
(၁၇၀) ။
(၁၇၁) ။
စိုပ်ဂွံၜိုတ်ဏံရ။
(၂၄၁) ။ က − ကၞေဟ်ချူလိက်ကှ်ေ ခ − ခပဳထဝ်မိတဵုလဝ် ဂ − ဂကူမန်နွံကဵုနန်ကီုလေဝ် (လ္ပကဵုဒှ်အာ ဂ_ဂကူမန်ဟွံညဳလောန်)ဂှ်ညိ။ (29-7-2019) တ္ၚဲအဒိုတ်။ (ပိုဒ်−၂၄၁) ။
(၂၄၂) ။ ဘဝဟီုမ္ဂးဂှ်တှ်ေ တုပ်တဴညံင်ရဴကဵုနခၟိက်မွဲမပ္ဍဲဗ္ဒဲါဍာန်ဂၠံင်ဂှ်ကီုရ၊ ပ္ဍဲနခၟိက်ဂှ်ပၠန် နွံတဴသီုခၞော်ဒူရေန်မင်ဂုတ်ပလင်အရက်ဓုပ်ၜံက် သီုကဵုကောန်ရုပ်ကာတောန်ဟရိုဟ်ဟရိုဟ်ပိုတ်ပိုတ်တံနွံတဴဂၠိုင်ကဵုနာနာသာ်ရ၊ ဟိုတ်ဂှ်ရတှ်ေ အရာလဵုပိုဲကၠဟ်ထောံစုတ်ဖျေံပ္ဍဲနခၟိက်ဂှ်တှ်ေ ဒှ်တဴနခၟိက်အရာတေံမာန်ရ၊ (29-7-2019) တ္ၚဲအဒိုတ်။ (ပိုဒ်−၂၄၂) ။
(၂၄၃) ။ ဂကူမန်ပိုဲဟွံညဳညးသ္ကံတှ်ေ ဗီုလဵုဂွံဆက်ကွာ်အာတရဴအနာဂတ်တေံရော။ ကသပ်နဲကဲဟွံတုပ် လညာတ်တၞဟ်ခြာဒၟံၚ်ညးသ္ကံကီုလေဝ် ရုပ်ရဴကမၠောန်ဂှ်ဒးရံၚ်ဖဵုခိုဟ်ဇၞော်အိုတ်သွက်ဂကူမွဲဟေၚ်ဒှ်အဓိကကၠာရ။ (29-7-2019) တ္ၚဲအဒိုတ်။ (ပိုဒ်−၂၄၃) ။
(၂၄၄) ။ ယဝ်ရပိုဲတဵုလွဳလဝ်တၞံကြုက်တှ်ေ လဆောဝ်လဆောဝ်မ္ဂး ကၠာပိုဲဟွံဂွံချိုတ်အာဂှ် သတ်ကြုက်ဂှ်လေဝ်ပိုဲတံဂွံစပ္ဍဲဘဝဏံရ၊ ယဝ်ရပိုဲတံချိုတ်အာကၠာဏောၚ်တှ်ေ ဗွဲစၟတ်ဨကန်တ ကောန်စဴပိုဲကောန်စေက်ပိုဲတံဂွံစဍာံဍာံမာန်ရ၊ ယဝ်ရရံၚ်အာသၟာတဵုလွဳလ္ၚဵုလ္ၚဵုတ္ၚဲဏံတံမ္ဂးတှ်ေ ပ္ဍဲဘဝဏံဂွိၚ်ဖေက်စသတ်ကြုက်ဂှ်ဟွံဂတာပ်တုဲဟွံဂံၚ်တဵုလွဳချိုတ်တ်ပၠိုတ်တ်အိုတ်ကီုရ၊ တက်ပြယာဲညံၚ်ရဴတဵုလွဳလဝ်တၞံကြုက်တုဲ ဇကုလေဝ်ဟွံစုတ်ဝဲါဟွံကဵုဍာ်တၞံကြုက်ဂှ်တုဲ ဗက်ကၠတ်ၜှ်ပလှ်စအာသတ်ကြုက်ပ္ဍဲကၠအ်ညးတၞဟ်မတဵုလဝ်ဂှ်ရ။ (29-7-2019) တ္ၚဲအဒိုတ်။ (ပိုဒ်−၂၄၄) ။
(၂၄၅) ။ ဇြိုင်ဂှ်တီမံင်ရ ဆဂး မူဒှ်ဒးယိုက်လဝ်ဍေံရော၊ ဒဒိုက်ဂှ်ကီု ပြသၞနာနာအရာဟွံမွယ်ကဵုဖဵုခိုဟ်တံဂှ် တီမံင်ရဖဵုဟွံမွဲတုဲ မူပရောပိုဲတံဒးယိုက်လဝ်ဍေံဂှ်ရော၊ တီရဒှ်ဇြိုင်တုဲ ထပ်ယိုက်လဝ်ဏောင်တှ်ေ ဇြိုင်လ္တူဇြိုင်ရ၊ တီရဒှ်ဇြိုင်တုဲ ယဝ်ပိုဲဖျေံထောံ ပိုဲဟွံယိုက်ကေတ် ပိုဲသၠးဗွးထောံမာန်ဏောင်တှ်ေ ခန္ဓပိုဲဏံတီကေတ်သာတိုန်ရ၊ ဇြိုင်ဂှ်တီမံင်ရ ဆဂး ဖဵုလပါ်ခိုဟ်ဂှ်နွံဂၠိုင်တုဲ ဆက်ယိုက်အာလေဝ် ဒှ်မၞိဟ်တၠအစောန်နွံကဵုသတ္တိမွဲပေင်ပေင်ရ၊ ဇြိုင်ဂှ်တီမံင်ရ ဖဵုဟွံမွဲလေဝ်ကၠိုဟ်မံင်ရတုဲဏောင်တှ်ေ ယဝ်ဆက်ယိုက်အာပၠန်ဏောင်တှ်ေ ဒှ်မၞိဟ်ဒိုဟ်ဓီုမွဲ ဒှ်ပူဂဵုအစောန်စရာဲၚေတ်ပေတ်မွဲတုဲ ဘဝညးတံကီု ပွဳပွူညးတံဖအိုတ်ဂှ်လေဝ် နွံကဵုပြသၞာဒးမိပ်အာကဵုအခက်ခုဲလၟေင်လၟေင်တ္ၚဲရ။ (30)7-2019) တ္ၚဲအၚာ ။ (ပိုဒ်−၂၄၅) ။
(၂၄၆) ။ ပရေင်ပြံင်သၠာဲမွဲမွဲဟီုဂှ် ဒှ်မၞိဟ်နွံကဵုသတ္တိမွဲ ဒှ်မၞိဟ်တၠအစောန်မွဲရ။ ( ၃၁−၇−၂၀၁၉) တ္ၚဲအၚာ ။ (ပိုဒ်−၂၄၆) ။
(၂၄၇) ။ ပိုဲဒှ်မၞိဟ်က္ဍိုပ်သ္ကိုပ်ဂကောံအိန်ထံင်တုဲတှ်ေ တာလျိုင်ပိုဲဒးကေတ်လဝ်ဗွဲကၠာအိုတ်ဂှ်လ္ပဝိုတ်ထောံညိဏး၊ တာလျိုင်ဂကူလေဝ်ဒးကၠောန် ၜိုတ်ပိုဲဂွံအခိင်အကြာတင်ဝါတ်ဂါတ်နာနာမာန်ဂှ်ကၠောန်အာအိုတ်ညိ၊ ဒဒိုက်ကီုတသိုက်ကီု ပြသၞာဗွဲမဂၠိုင် မၞိဟ်ဒးဆဵုညာတ်ကေတ်ဍေံတွဵုဂှ် ဂကောံအိန်ထံင်ကောန်ဗြဴပိုဲဏံမွဲဟေင်ရတီကၠိုဟ်ကေတ်ဖ္အိုတ်နာနာမာန်ရ၊ ဟိုတ်ဒှ်သာ်ဂှ်တုဲ ညးတၞဟ်ထိုင်သးနာဲဂှ်ဒှ်မၞိဟ်ဆာန်ဂကူမွဲကီုလေဝ် ဆဂးဂှ် ယဝ်ရကျောဝ်အာဂကောံအိန်ထံင်ကောန်ဗြဴဇကု တသိုက်ဟွံမွဲပ္ဍဲဘဝလၟေင်လၟေင်တ္ၚဲဏောင်တှ်ေ နာဲဒုင်လဝ်ယၟုက္ဍိုပ်သ္ကိုပ်ဂကောံအိန်ထံင်ဂှ် ၜိုတ်ဆဒုင်လဝ်ယၟုသၟးသၟးရ၊ ဂကောံအိန်ထံင်မွဲဍောတ်ဏံဂှ် နာဲကေတ်တာလျိုင်ဟွံပြေပြံင်ဏောင်တှ်ေ ဗီုလဵုနာဲဂွံသ္ပက္ဍိုပ်သ္ကိုပ်မၞိဟ်ဆာန်ဂကူဂှ်ရော၊ (ဍောင်တီတုဲဇူညိ၊ ဇူဖဲဟေင်ဆက်ကွာ်အာပၠန်ညိ)၊ သိုက်သိုက်ဂှ်ကွာ်အာတပ်တပ်ညိ၊ အဲမွဲစောန်အိုတ် အဲမွဲတၟေင်အိုတ် အဲမွဲကၠိုဟ်အိုတ် လညာတ်အဲကေတ်ဍုင်ဂွံဏောင်၊ လညာတ်ဗီုတံဏံဂှ်နာဲလ္ပချပ်လဝ်တွဵုညိဏး ၊ ယဝ်ရသာ်ဂှ်ဟွံသေင်တှ်ေ တသိုက်ဇေတ်ဇေတ်အဃောနာဲဂျိုင်မံင်တ္ၚဲဏံဂှ်လေဝ်နာဲဂၠာဲဟွံဆဵုပုဟ်။ (ပိုဒ်−၂၄၇) ။
(၂၄၈) ။ ဒၞာဲဟွံပေင်တံဂှ် မင်ဒၟံင်သွက်ဂွံဗပေင်စုတ်မာန်(၂၄)နာဍဳရ၊ ဟိုတ်ဒှ်သာ်ဂှ်တုဲ ပ္ဍဲမၞိဟ်ပညာသဝ် ပ္ဍဲမၞိဟ်ဗဟုသုတအောန်တံဂှ် ပိုဲတံလ္ပရံင်ဘဝညးတံဟွံမွဲကဵုၚုဟ်မးညိ၊ သွက်ညးတံဂှ်တှ်ေ အရာဍေံဟွံပေင်နာနာသာ်တံဂှ် သွက်ဂွံဗပေင်စုတ်မာန်ပွိုင်(၂၄)နာဍဳရ၊ သွက်ညးပေင်ဒၟံင်တံဂှ်ပၠန်လေဝ် ယဝ်ရဗဂဵုလဟဵုဟွံဒှ်တှ်ေအရာတၟိတၟိသွက်ဂွံစုတ်ဗပေင်ဂှ်စုတ်ဟွံလုပ်တုဲကၟိုဟ်တိတ်အာအိုတ်ကီုရ၊ (ပိုဒ်−၂၄၈) ။
(၂၄၉) ။ ယဝ်လွဳစာင်တှ်ေဒးလိုန်အိက်စာင်ဂှ်ဒှ်ဓမ္မတာရ၊ ယဝ်လွဳလဝ်ကၠိက်တှ်ေဒးလိုန်အိက်ကၠိက်ဂှ်လေဝ်ဒှ်ဓမ္မတာပၠန်ရ၊ ယဝ်မံင်ဍုင်မၞိဟ်တှ်ေဒးလိုန်အိက်မၞိဟ်ဂှ်လေဝ်ဒှ်ပရေင်ဓမ္မတမွဲဇေတ်ဇေတ်ရ၊ အိက်မၞိဟ်ဟီုဂှ်ဒှ်ပရေံအာဖ္အိုတ်လေဝ်ဟွံသေင်ပုဟ်၊ ဒၞာဲဒှ်ဖဵုလုပ်ဂဥုဲတှ်ေစကာသုင်စောဲအာညိ၊ ဒၞာဲဖဵုဟွံမွဲတံဂှ်ပၠန်လေဝ် တိုပ်ထောံကဵုတိအိုတ်တုဲကျာပသဍေံဟွံမွဲရ။ (ပိုဒ်−၂၄၉) ။
(၂၅၀) ။ ကေင်လိုန်လဝ်အိက်တုဲအခေါင်လုပ်အရှာမ်ဘာဟွံမွဲဟာ၊ တ္ၚဲဏံဇိုင်လိုန်ဒးလဝ်အိက်မွဲအခိင်တေံဂှ်ကြာတ်ကြဴသ္အးထောံတုဲယျ၊ (အဓိကဂှ် ပိုဲလ္ပကလေင်အာလိုန်အိက်ဗွဝ်ဂှ်ပၠန်ညိ)။ (ပိုဒ်−၂၅၀) ။
(၂၅၁) ။ ထောံလသာလဝ်သဘာဝလိုက်ညိ၊ တ္ၚဲဏံ ပိုဲချပ်ခိုဟ် ဟီုခိုဟ် ကၠောန်ခိုဟ်တှ်ေဒှ်အဓိကရ၊ မ္ၚးနူဖဵုပိဏံတုဲကဵုသဘာဝသ္ဂုတ်သွာတ်ကတ်ကေတ်ညိ။ (ပိုဒ်−၂၅၁) ။
(၂၅၂) ။ ဂျိုင်ဒၟံင်တ္ၚဲဏံဂှ်ဒးကၠောန်ဖဵုခိုဟ်မွဲဟေင်ရ၊ ဖဵုခိုဟ်ဟီုဂှ် ၜိုတ်ပိုဲကၠောန်ဂွံအိုတ်အစောန်ဂှ်ဒှ်ဖဵုဇၞော်ကဵုဒြဟတ်ရ၊ ဘဝဟီုဂှ်မူရောဟွံမွဲပုဟ် ပြသၞာနာနာဍေံလုပ်ကၠုင်ကဵုပိုဲဏံတီဆဵုညာတ်တံဂှ် ၜိုတ်ဆဍေံစမ်ရံင်အစောန်သတ္တိမၞိဟ်မွဲကီုရရဲ၊ ဘဝဂှ်ဒးမိပ်ကဵုဍေံဏောင် ယဝ်ရပိုဲမိပ်ကဵုဍေံမှ ပိုဲဏံဂွံကၠုၚ်ဂဥုဲဒြဟတ်သွက်ဂွံဆက်ကွာ်အာတရဴသံသာဏံဗွဲမလအ်လကာဖါရရဲ။ (ပိုဒ်−၂၅၂) ။
(၂၅၃) ။ သုညဟီုဂှ် ၚုဟ်မးဟွံမွယ်ညးအဲထေင်ကေတ်အိုတ်ရ၊ ၀၀၀၀၀၁ − ဣဏံဂှ် ၜိုန်ရသုညဂၠိုင်မံင်ကီုလေဝ် ၚုဟ်မးဍေံဂှ်မွဲဒ္ကေဝ်ရ၊ ၁၀၀၀၀၀−ဣဏံဂှ်ပၠန် ၚုဟ်မးဍေံဂှ်ဒှ်အာမွဲကိုဋ်ဒ္ကေဝ်ရ၊ ဟိုတ်ဂှ်ရတှ်ေ သုညဟီုဂှ် တိုန်တဴကဵုပိုဲတံစွံရ၊ ယဝ်ပိုဲစွံဗၠေတ်တှ်ေၚုဟ်မးဍေံဟွံမွယ်ရ၊ ယဝ်အခါရပိုဲစွံဒၞာဲဍေံဒးဏောင်တှ်ေ ဒှ်တိုန်ၚုဟ်မးဗွဲမဂၠိုင်ရ။ (ပိုဒ်−၂၅၃) ။
(၂၅၄) ။ ဇၟာပ်မၞိဟ်ဟီုဂှ်ၚုဟ်မးဒၞာဲညးကဵုညးနွံမံင်ဖ္အိုတ်ရ၊ ၜိုတ်ဆပိုဲတံကဵုဒၞာဲညးကဵုညးဟွံဒးတုဲ ရုပ်ရဴကမၠောန်မတိတ်ကၠုင်ဂှ်လေဝ် ဒှ်ဗၠေတ်အာဗီုစေတနာပိုဲသ္ဂုတ်သွာတ်လဝ်ဂှ်ရ၊ က္တဵုဒှ်ကၠုင်ပြသၞာဇၟာပ်ဇၟာပ်တ္ၚဲတုဲ ညးဂၠာဲဒုဟ်အဲ အဲလေဝ်ဂၠာဲဒုဟ်လ္တူညးသ္ကံအိုတ်ရ၊ ဇၟာပ်ဇၟာပ်မၞိဟ်သီုဖ္အိုတ်လေဝ် ၜိုတ်အစောန်စရာဲဇကုနွံဂှ် ယဝ်ကၠောန်အာကမၠောန်မ္ဂးတှ်ေ ၚုဟ်မးဍေံအောန်ကဵုဂၠိုင်မံက်တိုန်မာန်ရ၊ ယဝ်ရပိုဲတံကၠောန်ၜက်အာၜိုတ်အစောန်စရာဲနွံတုဲ သ္ပညံင်မၞိဟ်တီအိုတ်လေပ်အိုတ် ပၠံင်သ္ပအ္စာဂွံအာဂတမှကၠောန်ဏောင်တှ်ေ ရုပ်ရဴကမၠောန်ပိုဲတံဂွံဆဵုမံင်ဂှ် ၚုဟ်မးဍေံအောန်တဴဗွဲမလောန်ကွေံကွေံရ။ (ပိုဒ်−၂၅၄) ။
(၂၅၅) ။ တီမံင်ရဂၠံင်ဍာန်ဏံဒှ်ဖဵုခိုဟ်အိုတ်မွဲတုဲ ယဝ်ရပိုဲတံဟွံဒုင်ကေတ်တဲဟွံပံင်ကောံညးသ္ကံမ္ဂးတှ်ေ လ္ပကဵုဒှ်အာ ညံင်ရဴဒက်လဝ်ပ္ဍဲတိုင်ဂှ်ကီု ၜိုန်ရဂၠဴဂှ်ဂြိပ်ဂေတ်ဂၠိုင်က္ဍင်လေဝ် ဇုက်မဒက်လဝ်ပ္ဍဲကအ်ဂၠဴဂှ် ပူအာပ္ဍဲတိုင်ဂၠိုင်ဂၠိုင်တုဲဂၠိစှ်ေအာသိုက်သိုက်ကီုရ၊ အိုတ်ကၞောတ်ဟေင် ဇုက်ဂှ်လေဝ်အိုတ် ဂၠံင်တရဴဂွဴဆက်ကွာ်အာဂှ်လေဝ်ပိုတ်ကၠုင်ရ။ (ပိုဒ်−၂၅၅) ။
(၂၅၆) ။ မကၟောန်ပဠောံကၠာအိုတ်ဂှ်ယဝ်ရပိုဲတံစုတ်ဒးတှ်ေ မကၟောန်လ္ၚဵုလ္ၚဵုတံဂှ်လေဝ် ပိုဲတံဟွံဒးရံင်မွဲသာ်တုဲ ရပ်စုတ်ဒးအာအတိုင်သဘာဝဍေံကေတ်ကေတ်ရ၊ ကၟောန်ပဠောံမကၠာအိုတ်ဂှ်ယဝ်ပိုဲတံရပ်စုတ်ဗၠေတ်အာမ္ဂးတှ်ေ မလ္ၚဵုလ္ၚဵုတံပၠန်လေဝ်ဗၠေတ်အာတိုတ်တးရ၊ ဟိုတ်ဒှ်သာ်ဂှ်တုဲ တ္ၚဲဏံပိုဲဒးကလေင်ရံင်ဂၠံင်တရဴမကွာ်ဒၟံင်ဂှ် မူဒှ်ရောဟွံဆဵုရုပ်ရဴတိုင်ပ္ကဴဂှ်ဏီရော၊ ဗွဲစၟတ်ဨကန်တဂွံဆဵုကေတ်ဂှ် ပ္ဍဲပိုဲဏံအိုတ်ပိုတ်ကၠုင်ဒၟံင်နဲကဲဗဂဵုလဟဵုနာနာထေက်ကဵုဒးဗဂဵုလဟဵုဂှ်ကီု၊ သွာင်နာနာ ၜိုတ်ထေက်ကြိုက်ကဵုအခေါင်ပိုဲကၠောန်ဂွံကေတ်မာန်ဂှ်လေဝ် အိုတ်ပိုတ်ဒၟံင်ဂှ်ကီုတုဲ ညံင်ရဴကဵုပိုဲတံရပ်စုတ်ကၟောန်ပဠောံဗၠေတ်အာမကၠာအိုတ်ဂှ်ရ၊ ယဝ်ရစၟဳစၟတ်ရံင်ညးဂှ်မွဲဂွံအခေါင်ရပ်စုတ်ကၟောန်ပဠောံမကၠာအိုတ်ဂှ်တှ်ေ ဣဏံရဒှ်အဓိက၊ ညးမဂွံလဝ်အခေါင်စုတ်ကၟောန်ပဠောံမကၠာအိုတ်ဂှ်တှ်ေ ဒးရံင်စေတနာညးတံရ၊ မွဲဂှ်တ်ှေ စေတနာညးတံမိက်သ္ဂောံကဵုဗၠေတ်လဝ်တုဲတုဲရဟာ၊ ၜါဂှ်ပၠန် စေတနာညးတံဟွံမိက်ကဵုဗၠေတ်တုဲဍေံဗၠေတ်အာရ၊ယဝ်ရပိုဲတံဆဵုကေတ်ကၠးကၠးစေတနာညးတံတုဲ နဲကဲဂွံကလေင်သှ်ပလး ဂွံကလေင်သၠာဲနဲကဲတၟိတၟိညံင်ဂွံကိတ်ညဳကဵုအခိင်ကာလဒေသဂှ် ပိုဲဒးကဵုကေတ်သၟာန်သွဟ်ညးသ္ကံညဳညဳသာသာဏောင်၊ တင်သွဟ်လၟေင်ၜါဂှ်ဒှ်ဂၠံင်ဓဝ်တပ်မွဲ ဟွံမွယ်ကဵုလောဘဒေမောဟမာနတုဲ နကဵုစေတနာခိုဟ်အးပံက်စိုတ်သၠာဲဂတးလညာတ်ညးသ္ကံဂံင်ဒုင်တဲမာန်ဖ္အိုတ်ရ၊ ဗီုညးစောန်ကမၠောန်ညးခံင်ဂံင်ကဵုကေတ်တာလျိုင်တုဲ ကၟောန်ပဠောံစုတ်လဝ်မဗၠေတ်ကၠာအိုတ်ဂှ် ကလေင်ရပ်စုတ်ကေတ်တၟိညံင်ဂွံဒးတုဲ ရန်တၟံလဝ်ဖဵုဇၞော်အိုတ်သွက်ဂကူဗဂဵုလဟဵုအာအတိုင်သဘာဝမ္ဂး တိုင်ပ္ကဴပိုဲမရန်လဝ်ဂှ်ဟွံလအ်ဟေင်ကလေင်ဆဵုကြပ်ကၠုင်အရိုဟ်တ္ၚဲရ၊ ယဝ်ရဒှ်တင်မွဲဂှ်ဏောင်တှ်ေ ဓဝ်အတ္တမွဲမဍိုက်ပေင်ဒၟံင်တုဲ ယဝ်ရညးတံဆက်ကေတ်အာတာလျိုင်ဏီဏောင်တှ်ေ ညံင်ရဴဒက်လဝ်ဂၠဴပ္ဍဲတိုင်ကၞက်ဂှ်တုဲ ခြာဟွံလအ်ဟေင်ဇုက်ဂၠဴဂှ်ဂၠိကၠုင်ဇၟာပ်စက္ကမိနေတ်နာဍဳရ၊ သီုဖ္အိုတ်ဂှ်နွံပ္ဍဲစိုတ်ပိုဲကောန်ဂကူတံရ ယဝ်ရပိုဲဆဵုဍာန်အးဍာန်ဓဝ်ဍာန်တပ်ယျဏောင်တှ်ေ ဣဏံဂှ်တိုန်တဴကဵုပိုဲကောန်ဂကူတံရ၊ (လညာတ်ဝွံၜိုတ်ဆတိတ်ကၠုင်နူပၞော်ပထောင်ဒုန်မွဲဍောတ်ကီုရ)။ (ပိုဒ်−၂၅၆) ။
(၂၅၇) ။ ကၠောန်ကုသဵုယဝ်အောန်ကဵုပညာမ္ဂးတှ်ေ ဒှ်မၞိဟ်ဂၠုဓီုမွဲရ၊ ကၠောန်ခိုဟ်ဟွံမွယ်ကဵုပညာဂှ်လေဝ် ဒှ်မၞိဟ်တမြအ်မွဲရ။ (ပိုဒ်−၂၅၇) ။
(၂၅၈) ။ မၞိဟ်ဟွံကေင်ကၠောန်ဗၠေတ်တံဂှ် အတိုင်မွဲဘဝဍေံတံ တၟာဒဳရုဲလေဝ်မုရောဍေံတံဟွံကေင်ကၠောန်ကၠုင်လဝ်မွဲသာ်ရ။ (ပိုဒ်−၂၅၈) ။
(၂၅၉) ။ မအရေဝ်ဒြဟတ်လ္ၚဵုလ္ၚဵုတံဂှ် ဗဒှ်ကဵုစိုတ်ပိုဲဓရ်ပတှ်ေအောန်စှ်ေအာလေဝ်နွံရ၊ မအရေဝ်လ္ၚဵုတံဂှ်ပၠန် ဖန်ဗဒှ်ကဵုစိုတ်ပိုဲဏံ ဓရ်ပတှ်ေဂၠိုင်တိုန်တုဲ ဇၟာပ်ဇၟာပ်ပြသၞာလောဲသွာကၠုင်မာန်ရ။ (ပိုဒ်−၂၅၉) ။
(၂၆၀) ။ ကေင်ကၠောန်လဝ်ဗၠေတ်ဗၠေတ်တုဲဏောင်တှ်ေ အာဂတနူဏံသွက်ဂွံဗၠေတ်အာပၠန်ဂှ်အောန်တဴဗွဲမလောန်ရ၊ ဟိုတ်ဂှ်ရ မၞိဟ်ကေင်ကၠောန်လဝ်ဗၠေတ်တံဂှ် ပရေင်ဆဵုဂဗဂၠိုင်နူကဵုမၞိဟ်ညာတ်ဆဒုဟ်ညးတၞဟ်တံဂှ်ရ။ (ပိုဒ်−၂၆၀)
(၂၆၁) ။ ဇၟာပ်ညးအဲနွံဒၟံင်လ္တူဂၠးတိဏံဝွံ ဇၟာပ်ဇၟာပ်စက္ကမိနေတ်နာဍဳ အခိင်ဂှ်အောန်ကၠုင်သိုက်သိုက်တုဲ ဓရ်ချိုတ်ဟီုဂှ်မင်ဒၟံင်ပိုဲဂတတေံရ၊ လၟုဟ်ဏံတ္ၚဲဏံတ္ၚဲယျးဒးချိုတ်ဂှ် ညးမွဲမှဟွံတီကေတ်အိုတ်ရ၊ ဟိုတ်ဂှ်ရတှ်ေ တသိုက်ဟီုဂှ်ဍေံနွံဒၟံင်ဒၞာဲဣလဵုရော၊ ယဝ်ရပိုဲတံကၠောန်သွက်စိုတ်မ္ဂးတှ်ေ တ္ၚဲဂွံဆဵုတသိုက်ဂှ်ဟွံမွယ်ရ၊ ယဝ်ရပိုဲတံတီဖ္ဍိုက်ကၠောန်သွက်ဘဝမ္ဂးတှ်ေ တသိုက်ဟီုဂှ်ပိုဲတံဂွံဆဵုပစ္စုပ္ပန်လၟုဟ်တ္ၚဲဏံဇေတ်ဇေတ်ဟွံဒးမင်တိုန်ဍုင်သွဝ်တေံပုဟ်။ (ပိုဒ်−၂၆၁) ။
(၂၆၂) ။ ပၠန်ဂတးပ္ဍဲကဵုကောန်ဂကူမန်ပိုဲဗၟာတံဍေံဖေက်အိုတ်ဟီုဂှ်တှ်ေ မွဲဂှ်−ဍေံဖေက်ကောန်ဂကူမန်ပိုဲဒှ်မၞိဟ်ခိုဟ်၊ ၜါဂှ်−ဍေံဖေက်ကောန်ဂကူမန်ပိုဲညဳသာညးသ္ကံ၊ ပိဂှ်−ဍေံဖေက်ပရေင်ပိုန်ဒြပ်ကောန်ဂကူမန်ပိုဲတဴတက်ဣဏံဗွဲတုန်−ပၠန်ဂတးပိတင်ဏံဗၟာဂှ်ဍေံဖေက်အိုတ်တုဲ နကဵုပြယာဲနဲကဲနာနာသာ်ဟေင် ဍေံဗက်ပလီုကၠုင်ကောန်ဂကူမန်ပိုဲ ဗွဲတၟေင်ပိုဲတံဂွံဆဵုကေတ်နမတ်ကၠးကၠးပ္ဍဲတ္ၚဲဏံဟွံပိုတ်သ္ကုတ်အာရ၊ ယဝ်ရဒးဟီုအရေဝ်အောန်အောန်မ္ဂးတှ်ေ သွက်ဖဵုပူဂဵုပိုဲဏံကီု သွက်ဖဵုဂကူပိုဲဏံကီု သွက်ဖဵုဘာသာပိုဲဏံကီု သွက်ဖဵုလိုက်လောကဂွံကျေဝ်ဂေါဝ်ၜိုဟ်သိုဟ်အာဂှ် တင်မွဲဂှ် ဗွဲစၟတ်ပိုဲဒးပၠန်ဂတးပ္ဍဲကဵုဇကုပိုဲဘဝပိုဲဏံဟေင် ဗွဲတၟေင်ညံင်ဂွံဒှ်မၞိဟ်ခိုဟ်မွဲဂှ် ပိုဲကောန်ဂကူမန်တံဒးပၠန်ဂတး(၁၉)နာဍဳပေင်ပေင်ရောင်။
(၂၆၃) ။ ပ္ဍဲကဵုဘဝပိုဲဏံ ဒးနွံကဵုပွမပြံင်သၠာဲညံင်ဂွံဒှ်အာလပါ်ခိုဟ်မာန်ဂှ် ဣဏံဟေင်ရပိုဲတံဒးပၠန်ဂတးဗွဲကိုပ်ကၠာအိုတ်ရ။ (ပိုဒ်−၂၆၃) ။
(၂၆၄) ။ လိုက်ဏံနွံဗၟိက်ကဵုမၞိဟ်ခိုဟ်ကီုရ၊ ယဝ်ရဂကူမွဲမွဲနွံဗၟိက်ကဵုမၞိဟ်ခိုဟ်ခိုဟ်ဏောင်တှ်ေ ဂကောံအိန်ထံင်ပ္ဍဲကဵုဂကူဂှ်လေဝ် နွံဗၟိက်ကဵုမၞိဟ်ခိုဟ်ပၠန်ရ၊ ပ္ဍဲကဵုဂကောံအိန်ထံင်ဂှ်နွံဗၟိက်ကဵုမၞိဟ်ခိုဟ်မ္ဂးတှ်ေ ဗွဲစၟတ်ဨကန်တရ မၞိဟ်နွံဒၟံင်ပ္ဍဲကဵုအိန်ထံင်ဖအိုတ်ဂှ်ဒးဒှ်မၞိဟ်ခိုဟ်မွဲဟေင်ရ၊ ၜိုတ်ဆပိုဲဏံဒှ်အာမၞိဟ်ခိုဟ်မွဲတုဲ လာပ်ဗဇဴဖဵုသွက်ပူဂဵုပိုဲဏံသၟးဟွံကတုဲ ဒှ်တဴဖဵုသွက်ဂကူဘာသာပိုဲဇၞော်ကဵုဒြဟတ်ရ၊ ဆဂှ်သၟးဟွံကတုဲ ဂၠးကဝ်ပိုဲဒတူဒၟံင်တ္ၚဲဏံလေဝ် ၜိုဟ်သိုဟ်ညိင်ဝတ်အာနကဵုအသိင်အစောန်စရာဲမၞိဟ်ခိုဟ်မွဲမာန်ရ၊ ဟိုတ်ဒှ်သာ်ဂှ်တုဲ ၜိုတ်ဆပိုဲဏံဂံင်ပြံင်သၠာဲပၠန်ဂတးဂွံဒှ်အာမၞိဟ်ခိုဟ်မွဲဂှ် ဂွံရီုဗင်ဏာဘဝပိုဲဏံကီုသီုကဵုဂကောံအိန်ထံင်ပိုဲဏံဟွံကတုဲ သီုကဵုဂကူဘာသာဂၠးကဝ်ဇၞော်ဏံလေဝ်ဇၞော်ကဵုဒြဟတ်ရ။ (ပိုဒ်−၂၆၄) ။
(၂၆၅) ။ ဒၠောံဗ္တောန်မၞိဟ်နွံကဵုပညာမ္ဂးတှ်ေ ညးမိပ်စိုတ်တုဲတင်ဂုဏ်ဗွဲမလောန်ရ၊ ယဝ်ရအာဝေတ်ဒၠောံဗ္တောန်ဒးမၞိဟ်ဒိုဟ်ဓီုတံမ္ဂးတှ်ေ ဍေံထေဲသၟးဟွံကတုဲသီုကဵုကလေင်ဂၠာဲသ္ပသၞကဵုပိုဲမာန်ရ၊ (ပိုဒ်−၂၆၅) ။
(၂၆၆) ။ ဒးဍာံစၟတ်တီတုဲဗှ်ေတံဟွံဒုင်ကေတ်တဲဟွံကၠောန်ဗက်အာမ္ဂးတှ်ေ ဒှ်ဆမၞိဟ်အဝုမွဲ(သုင်စောဲဟွံဂွံရ)။ (ပိုဒ်−၂၆၆)။
(၂၆၇) ။ သရနွံဒၟံင်ပ္ဍဲစိုတ်ပိုဲမၞိဟ်ဏံဂှ် ဒးလွဳသုင်စောဲအခိင်တၟာလအ်ဏီဏောင် ။ (ပိုဒ်−၂၆၇)။
(၂၆၈) ။ ယဝ်ရပိုဲတံဒးသိုင်သ္ၚိမွဲမမ္ဂးတှ်ေ ဗွဲကိုပ်ကၠာအိုတ်လၟေင်မွဲဂှ်တှ်ေ ဗီုပြင်ရုပ်ရဴသ္ၚိဒးဆဵုအနာဂတ်ဂှ် ညးအာက္ဍိုပ်ပၠတရဴဂွံလဝ်တာလျိုင်သိုင်မာန်ပ္တိုန်သ္ၚိဂှ်ဟေင်ရတီကေတ်မာန်ရ၊ ယဝ်ရညးအာက္ဍိုပ်သိုင်သ္ၚိတံ ဟွံတက်လဝ်ကျာကဵုတၠသ္ၚိဂှ်မ္ဂးတှ်ေ သိုင်အာၜိုတ်ဓမ္မတာနဒဒှ်သ္ၚိမွဲမတုဲ ကၟဳစိင်တေံလေဝ်ထောင်ဗြဲဓဇူမံင်တှ်ေ တၠသ္ၚိဂှ်ကီု ဂကောံအိန်ထံင်ပ္ဍဲကဵုသ္ၚိသီုဖ္အိုတ်ဂှ်ဒှ်ဒဒိုက်တုဲ အခိင်တိက်လေဝ်ဒ:မၠာ်လဝ်မတ်မွဲဒိုဟ်တွဵုရ၊ ဟိုတ်ဒှ်သာ်ဂှ်တုဲ ညးတာလျိုင်သိုင်သ္ၚိတံဂှ်ကီု သီုကဵုညးတၠသ္ၚိတံဂှ် ဒးတက်ကျာသဳကၠဳအးအးတၟးတၟး ဓဝ်ဓဝ်တပ်တပ်တုဲမှ ပြသၞာနာနာအနာဂတ်တေံဂှ်လေဝ် ဂွံအောန်အာကီုရ။ (စေတနာညးတာလျိုင်သိုင်သ္ၚိဂှ် ဒှ်ဖဵုသွက်ဂကောံအိန်ထံင်ပ္ဍဲသ္ၚိဂှ်ရ)။ (ပိုဒ်−၂၆၈) ။
(၂၆၉) ။ ပ္ဍဲဍာ်မွဲဗြံက်ဂှ် ယဝ်ရပိုဲထောံစုတ်ၜဵုမွဲဇန်မ္ဂးတှ်ေ ပိုဲဂွံတီကေတ်ရှ်သာဍာ်ဂှ်ဖ္ဍုင်အာကီုရ၊ ယဝ်ရပိုဲကေတ်နင်ဍာ်မွဲထၟာဲဇၞော်ဇၞော်တုဲ စုတ်ဖျေံၜဵုမွဲဇန်ဂှ်ပၠန်တှ်ေ ရှ်သာဖ္ဍုင်ပ္ဍဲဍာ်ထၟာဲဂှ်အောန်အာကီုရ၊ ၜဵုမွဲဇန်ဂှ်ပၠန် ယဝ်ပိုဲအာကၠဟ်စုတ်ပ္ဍဲဍာ်ကၟာတေံမ္ဂးတှ်ေ ရှ်သာ်ဖ္ဍုင်ဖ္ဍုင်ဂှ်နွံမံင်ဏီဟာ၊ စိုတ်ပိုဲမၞိဟ်ဏံလေဝ်ညံင်ရဴသာ်ဂှ်ကီု ယဝ်ရစိုတ်ပိုဲကြေပ်ဂြတ်မံင်ဏောင်တှ်ေ ၜိုတ်ဆမအရေဝ်မွဲၜါမဓဝ်ဂှ် ဖန်ဗဒှ်ကဵုစိုတ်ပိုဲက္တဵုဒှ်ဒေါသညးသ္ကံမာန်လောဲလောဲရ၊ ယဝ်ရစိုတ်ပိုဲတံသၠောဲလးညံင်ရဴကၟာဇၞော်ဂှ်ကီုတှ်ေ ၜိုတ်ဆမအရေဝ်အုဲအုဲပသပသမွဲၜါမတံဂှ် ဂွံဖန်ဗဒှ်ကဵုစိုတ်ပိုဲတံဂွံချဳသွဝ်အာဂှ်ဟွံလောဲသွာမာန်ရ။ (ပိုဒ်−၂၆၉) ။
(၂၇၀) ။ ဂွံတီအတိက်ဗီုလဵုဒှ်လီုကၠုင်ဂှ်မိပ်စိုတ်တင်ဂုဏ်ဇၞော်ကဵုဒြဟတ်ရ၊ တ္ၚဲဏံအနာဂတ်မန်ပိုဲ ဗီုလဵုဂွံဆက်ကွာ်အာနဒဒှ်အခေါင်အရာမန်ပိုဲဍာံဍာံဂှ် သွာင်နာနာသဇိုင်နာနာပ္ဍဲကဵုမန်ပိုဲဂှ်မိက်ဂွံကလင်ကွေံကွေံရအဴ။ (အတိက်ဂှ်ထေက်ကဵုပိုဲတံဒးသမ္တီ၊ ပစ္စုပ္ပန်တ္ၚဲဏံဂှ်ဟေင်ထေက်ကဵုပိုဲတံဒးကၠောန်၊ တ္ၚဲယျးအနာဂတ်တေံဂှ်ဟေင်ရ ပိုဲမန်တံဂွံဒုင်ကေတ်ဖဵုကမၠောန်မကၠောန်ဒၟံင်တ္ၚဲဏံရ)။ (ပိုဒ်−၂၇၀)။
(၂၇၁) ။ ပိုဲမံင်ဍုင်ညးတှ်ေ သၞောတ်သၞောဝ်ဍုင်ညးချူလဝ်ဂှ်ပိုဲတံဒးဒ္ဂေတ်ဗက်ပေင်ပေင်ဏောင်၊ ပြသၞာယဝ်က္တဵုဒှ်ကၠုင်မွဲမွဲတှ်ေ အခေါင်အရာမၞိဟ်မွဲဒးတုပ်ဂှ်လေဝ် ပိုဲတံဒးတီလဝ်ထေက်ဏောင်၊ ဟိုတ်ဒှ်သာ်ဂှ်တုဲ ၚုဟ်မးမၞိဟ် အဓိပ္ပဲါမၞိဟ်ဂှ်ဒှ်အာသၟးသၟးရ။ (ပိုဒ်−၂၇၁)။
(၂၇၂) ။ ၜိုန်ရဘာတုဲဂွံလဝ်တဆိပ်ခြာဂၠိုင်ကဵုတၞးကီုလေဝ် ယဝ်ရဟွံဆက်လ္ၚတ် ဟွံဆက်ချူ ဟွံဆက်ဗှ်မ္ဂးတှ်ေ ပညာဍေံတံဂွံလဝ်ဂှ် ဆုတ်ကလေင်ကၠုင်သိုက်သိုက်ရ၊ တ္ၚဲဏံပိုဲကောန်ဂကူတံ ၜိုန်ရချူဒးဗှ်ဒးညိညကီုလေတ် ဒးသ္ပမၞိဟ်ညံင်ရဴဗျဵုတဟင်မံင်ပညာတုဲ နဲကဲနာနာတံဂှ် ယဝ်ပိုဲတ္ၚအ်လ္ၚတ် တ္ၚအ်ချူ တ္ၚအ်ဗှ်မံင်တွဵုမ္ဂးဏောင်တှ်ေ အခိင်ဂှ်ဍေံကဵုကၠုင်သွဟ်ကဵုပိုဲကေတ်ကေတ်ရ၊မၞိဟ်တၠပညာခိုဟ်မွဲဟီုဂှ်တှ်ေ ဒးလ္ၚတ် ဒးဗှ် ဒးချူမံင်လၟိုန်အခိင်အခါၜိုတ်ဂွံအခိင်မာန်မှဟီုစဂွံဂှ် ဒှ်မၞိဟ်တၠပညာနွံကဵုအစောန်စရာဲမွဲရ။ (ပိုဒ်−၂၇၂)။
(၂၇၃) ။ ယဝ်ရပိုဲစွံလဝ်င်ပ္ကဴချိုတ်တ်ပၠိုတ်တ်ဏေင်တှ်ေ နဲကဲနာနာ ဗီုဂွံအာစိုပ်တိုင်ပ္ကဴပိုဲကောန်ဂကူတံစွံလဝ်ဂှ် ယဝ်ဗဂဵုလဟဵုဂတာပ်ခေတ်တှ်ေ သွပ်လ္ပအ်ဂှ်ဒှ်င်ဍာံဍာံရ၊−ဆက်ကွာ်အာညိ တ္ၚဲဏံဟွံဒှ် တ္ၚဲယျးနွံင်ဏီ (ဘဝဟီုဂှ် ဒၞာဲပိုဲတံတီလဝ်တုဲတုဲတံဂှ်လေဝ်တၟာဟင်ရ၊ ဒၞာဲပိုဲတံဟွံတီ ဟွံဂွံလ္ၚတ်ဟွံဂွံဗဂဵုလဟဵုတံဂှ်လေဝ် နွံဒၟံၚ်ဗဝ်သ္အဝ်ဏီလ္တူလိုက်ဏံ)။ (ပိုဒ်−၂၇၃)။
(၂၇၄) ။ ယဝ်ရပိုဲတံတီကၠး ပ္ဍဲဘဝပိုဲဏံၚုဟ်မးနွံမံင်တုဲ ပရေင်ဆီမဇဘာသာဂကူဂှ် ဒးဂံင်ပံက်ပါင်ကညာင်ကရေဲကဵုညးလောကတံမိင်ထတ်ထတ်ရ၊ ယဝ်ရဂျိုင်မံင်တ္ၚဲဏံဂှ် မုဖဵုလေဝ်ဟွံမွယ် ၚုဟ်မးပူဂဵုဂကူဘာသာမုရောဟွံမွဲပ္ဍဲဘဝဇကုမ္ဂးတှ်ေ သီုကဵုဒးကလေင်သၟာန်မံင်ခန္ဓဇကုဏီဂှ် (အဲဏံဂှ်မုဂကူဘာသာရော)၊ ယဝ်ရဟီုအာအးအးမ္ဂးတှ်ေ ၚုဟ်မးမၞိဟ်ဂှ် နွံဒၟံင်ပ္ဍဲကမၠောန်ပိုဲဏံမကၠောန်ဂှ်ဟေင်ရ။ (ပိုဒ်−၂၇၄)။
(၂၇၅) ။ မဂၠဟ်ဏံဂှ် ကၠုင်နူစိုတ်ပူဂဵုအတ္တတံရ ယဝ်ရစိုတ်ပရဟိတနွံဒှ်ဖဵုလ္တူသွက်ဂကူဏောင်တှ်ေ မဂၠဟ်ဏံဂှ်ဟွံမွယ်ရ၊ (ပိုဒ်−၂၇၅)။
(၂၇၆) ။ တာလျိုင်ဂကူဟီုဂှ် ဇၟာပ်ညးအဲနွံဒၟံင်တုပ်တုပ်ဖ္အိုတ်ရ၊ အဓိကဂှ် အခေါင်ကၠောန်ယိုက်ဂၠေင်ဟေင်ဍေံတၞဟ်ခြဟ်အာကီုရ၊ ၜိုန်ရဍေံတၞဟ်ခြာအာကီုလေဝ် အခေါင်ကၠောန်ဂှ်ဟွံမွယ်ဟွံသေင်ပုဟ်၊ ရံင်ကဵုဒြဟ်ဇကု ရံင်ကဵုအခိင်ဇကုကၠောန်ဂွံကဵုဒြဟတ်ထေက်ဂှ်တှ်ေ ဂွံဒၟံင်(၂၄)နာဍဳရ၊ ညးလဵုမွဲဟီုအဲအခိင်ဟွံမွယ် အဲအခေါင်ကၠောန်ဟွံမွယ်တံဂှ် ဒှ်ဆမၞိဟ်ဂျိုင်ဒၟံင်တ္ၚဲဏံဂှ် မင်ဆချိုတ်မွဲသာ်ရ။ (ပိုဒ်−၂၇၆) ။
(၂၇၇) ။ မၞိဟ်နွံဒၟံင်လ္တူလိုက်ဏံဖ္အိုတ်ဂှ် ယဝ်ရဒးလဴသောင်ကဠးဖ္အိုတ်ဂှ်လေဝ်ဒှ်အာဟွံမာန်ရ၊ ဟိုတ်ဒှ်သာ်ဂှ်တုဲ မၞိဟ်မၞုံဗွဳဗွိုင်ဗ္ဒါဲဗ္ဒါဲပိုဲဏံဂှ်ကၠိုဟ်စိုတ်ဟေင်ဒှ်အဓိကရ၊ ၜိုန်ရမၞိဟ်မွဲပြံင်သၠာဲဂၠးကဝ်ဏံမာန်ကီုလေဝ် ဗီုအၚါပ်စိုတ်မၞိဟ်မွဲကဵုမွဲဂှ် ပိုဲဂွံဗ္ဍိုက်ဗပေင်မာန်ဂှ်ဒှ်ဝါတ်အဴရ။ (ပိုဒ်−၂၇၇)။
(၂၇၈) ။ ဘဝဟီုမ္ဂးဂှ်တှ်ေ တုပ်ညံင်ရဴသၟာဒဳကွဳစက်ကာမွဲမကီုရ၊ ပစ္စုပ္ပန်တ္ၚဲဏံအဃောဒဳအာကွဳစက်ကာဂှ်ဒးဒှ်အဓိကမွဲသွက်ဂွံအာစိုပ်တိုင်ပ္ကဴအနာဂတ်တေံမာန်ရ၊ အဃောဒဳအာကွဳစက်ကာဂှ်လေဝ် အတိက်လေဝ်အဓိကဇၞော်မံင်တုဲ ပိုဲဒးကလေင်ရံင်လက္ကရဴကွဳစက်ကာဂှ်ကီု ဂွံတီဂွံဆဵုကွဳစက်ကာဗက်ကၠုင်ဍုတ်ပိုဲကီုဟာ သ္ၚောဲကြပ်ၜိုတ်လဵုပိုဲဂွံသၠာဲဍာန်ဂွံရောဂှ်လေဝ် အတိက်ဂှ်နွံဗၟိက်ဇၞော်သွက်ညးဒဳမံင်ကွဳစက်ပစ္စုပ္ပန်တ္ၚဲဏံညံင်ဂွံစိုပ်အာအနာဂတ်တိုင်ပ္ကဴတေံမာန်လောဲလောဲရ၊ အတိက်ဂှ်ဒှ်အ္စာခိုဟ်မွဲတုဲ သွက်ပိုဲတံဒၞာဲဒးဗဂဵုလဟဵုနွံတံဂှ်ဒး
ဆက်ကၠောန်အာညံင်ဂွံဂတာပ်အခေတ်တုဲ အဃောပိုဲဒဳမံင်ကွဳစက်ကာပ္ဍဲပစ္စုပ္ပန်တ္ၚဲဏံဂှ်ဒှ်အဓိကတုဲ ဒးနွံကဵုသတိလညာတ်ညံင်ကဵုအခေတ်ဒှ်လီုမံင်တ္ၚဲဏံတုဲ ဗီုလဵုကွဳစက်ကာပိုဲဏံဂွံအာစိုပ်တရဴတိုင်ပ္ကဴအနာဂတ်တေံမာန်ဂှ် ဒးမံင်ကဵုပစ္စုပ္ပန်တ္ၚဲဏံအဃောဒဳအာမံင်ကွဳစက်ကာဂှ်အိုတ်ညိ။ (ပိုဒ်−၂၇၉)။
(၂၇၉) ။ ဖေက်ညးစောန်အာလ္တူအဲ ဖေက်အဲသဝ်အာလ္တူညး ဒှ်မံင်သံသယဟွံဂံင်သၠးပွးအိုတ်တုဲ ယဝ်ရဟီုကၠးကၠးတှ်ေ အတ္တပေင်က္ဍဟ်။ (ပိုဒ်−၁၇၉)။
(၂၈၀) ။ သဳမသုန်သဳဒ္စာံသဳစှ်မင်မွဲဟွံမာန်ကီုလေဝ် မင်သဳမွဲ(အတ္တ)ဏံဂှ်တှ်ေတုဲဒှ်မံၚ်ရ။ (ပိုဒ်−၂၈၀) ။
(၂၈၁) ။ မိပ်စိုတ်လေဝ်သတိမွဲလ္ပကဵုလီုအာ၊ အောန်စိုတ်လေဝ်သတိမွဲလ္ပကဵုလီုအာ၊ ပၞောန်လဒေါဝ်ဟီုဂှ်ဒှ်ဘဝဇေတ်ဇေတ်မွဲရ၊ သတိမွဲလ္ပကဵုဝိုတ်ကၠေံအာပ္ဍဲနဲကဲသုၚ်စောဲဘဝလၟေၚ်လၟေၚ်တ္ၚဲပိုဲတံဏံအိုတ်ညိ။
(၂၈၂) ။ ဒးတၟအ်ကလောံတုဲကမၠောန်ဂှ်ဒှ်ၚုဟ်မးသွက်ဂကူဏောၚ်တှ်ေ ထေက်ကဵုဒးတၟအ်ကလောံလေဝ်ဂံၚ်ဒုၚ်မာန်မှ ဓဝ်ပတေဟ်ပ္ဍဲပူဂဵုဂှ်ဂတာပ်အခေတ်ပေၚ်ပေၚ်ရ၊ ပူဂဵုမွဲရဲတံဂှ်လေဝ် ဂွိၚ်ဖေက်ဟွံဂွံပ္ကဴတုဲ ဇကုလေဝ်ဒးဗက်
အာအၚာပ်စိုတ်ညးတၞဟ်ကီုတုဲ အရာပြံၚ်သၠာဲမွဲပ္ဍဲဓဝ်ပတေဟ်ပူဂဵုဇကုဂှ်တၟာဒဳရုဲလေဝ်ဟွံမွယ်ရ၊ ဟီုမံၚ်ကၠောန်သွက်ဂကူဆာန်ဂကူဂှ်ဗီုဏံရဟာ၊ အရာပြံၚ်သၠာဲမွဲယဝ်ရဟွံမံက်ကၠုၚ်ရုပ်ရဴပ္ဍဲဂကူမန်ပိုဲပ္ဍဲသၟတ်မန်ပိုဲမ္ဂးတှ်ေ ပြသၞာပ္ဍဲကဵုတ္ၚဲဏံဒးဆဵုဒၟံၚ်လၟေၚ်တ္ၚဲဏံဂှ် ညံၚ်ရဴဂၠဴပလန်သြောံဂေတ်အာဂေတ်ကၠုၚ်မွဲဒၞာဲဂှ်တုဲ အခိၚ်အိုတ်အာအတိုၚ်ဏံရ၊ နကဵုဓဝ်ပတေဟ်ပူဂဵုဇကုလေဝ်တီမံၚ်ရဣဏံဒှ်ဖဵုသွက်ဂကူပိုဲဏောၚ်တုဲ ဇကုဖေက်ဒးတၟအ်ကလောံရန်လဝ်ပ္ကဴတုဲဇကုလေဝ်ဟွံဂံၚ်ပြံၚ်သၠာဲစိုတ်ဓါတ်ညးတၞဟ်တှ်ေ အရာဇကုမတီလ္ၚတ်လဝ်တံဂှ်ဒှ်အာမးမးဖအိုတ်ရ၊ နကဵုပူဂဵုမွဲတၠအရာပွမပြံၚ်သၠာဲပ္ဍဲဂကူဇကုဂွံဂှ် ၜိုန်ရအခေါၚ်ကၠောန်အခေါၚ်ပြံၚ်သၠာဲနွံကီုလေဝ်ဇကုဟွံကၠောန်ဏီတှ်ေ မုမန်မၚ်မံၚ်ဏီဂှ်ရော။
(၂၈၃) ။ ယဝ်ဆာန်ဍေံဒၟာနူကဵုဍေံဒှ်မၞိဟ်ခိုဟ်မွဲဏောၚ်တှ်ေ စိုပ်မွဲတ္ၚဲယဝ်ဗှ်ေတံဆဵုဒးအာမၞိဟ်ခိုဟ်နူကဵုဍေံမ္ဂးတှ်ေ ဗှ်ေတံဒးသၠာဲပၠန်ရ၊ ယဝ်ဆာန်ဍေံဒၟာနူကဵုရုပ်သာ်မ္ဂးတှ်ေ စိုပ်မွဲတ္ၚဲယဝ်ဗှ်ေတံဆဵုဒးအာမၞိဟ်ရုပ်သာ်ကျေဝ်အာနူဍေံမ္ဂးတှ်ေ ဗှ်ေတံဒးသၠာဲပၠန်ရ၊ ယဝ်ဆာန်မၞိဟ်သိုက်လောဲမ္ဂးတှ်ေ စိုပ်မွဲတ္ၚဲယဝ်ဗှ်ေတံဆဵုဒးအာမၞိဟ်သိုက်လောဲနူဍေံမ္ဂးတှ်ေ ဗှ်ေတံဒးသၠာဲပၠန်ရ၊ ယဝ်ပိုဲတံဒးဆာန်မၞိဟ်မွဲမ္ဂးဏောၚ်တှ်ေ ပိုဲဒးဆာန်ဗီုဍေံဒှ်နွံဒၟံၚ်ပ္ဍဲပစ္စုပ္ပန်တ္ၚဲဏံဂှ်တှ်ေ ဣဏံရဆာန်မွဲအာယုက်ဆာန်တ္ၚဲက္ဍုဟ်အာညးသ္ကံဟွံမာန်ကီုရ။
(၂၈၄) ။ သၟာတက်ဗန်(လက်ပၠုဲ)တအ်ဂှ်လေဝ် ယဝ်ရဟွံဗဂဵုလဟဵုနဲကဲတက်ဗန်မ္ဂးတှ်ေ ပ္ဍဲကဵုတ္ၚဲဏံလေဝ်ဟွံဂွံဒုၚ်ကေတ်ယၟုသၟာတက်ဗန်(လက်ပၠုဲ)စောန်အိုတ်လ္တူဂၠးတိဏံကီုရ၊ အ္စာကၞေဟ်ဒယှ်တှ်ေဒၟံၚ်ပ္ဍဲကဵုတ္ၚဲဏံတံဂှ်လေဝ် နူတမ်မူလကၠာအိုတ်ဂှ်လေဝ်ဒှ်မၞိဟ်ချူလိက်စောန်စောန်မွဲရဟွံသေၚ်တုဲ ညးတံနွံကဵုဆာန်လိက်ပတ် ညးတံနွံကဵုဆာန်ချူ ညးတံနွံကဵုဆာန်ဗှ် ညးတံနွံကဵုဆန်လ္ၚတ်မွဲတုဲဟေၚ် ခြာဟွံလအ်လေဝ်ညးတံဒှ်ကၠုၚ်အ္စာကၞောဟ်အ္စာချူလိက်မြဟ်မြဟ်မွဲညးတၞဟ်ဒုၚ်တဲမာန်ကၠုၚ်စဵုကဵုတ္ၚဲဏံကီုရ။
(၂၈၅) ။ ဗှ်လိက်ချူလိက်ဟီုဂှ်ဒှ်စၞစကၠေၚ်က္ဍဟ်ဒှ်ဂဥုဲကၠေၚ်က္ဍဟ်ခိုဟ်အိုတ်မွဲရ၊ ညံၚ်ရဴကဵုၜုန်မြဇြၚ်တံဂှ်ကီုတုဲ ယဝ်ပိုဲတံဆူဒၟံၚ်ဍေံအရိုဟ်ဒဒှ်တ္ၚဲဏောၚ်တှ်ေ ကေက်ဒၟံၚ်လၟိုန်အခိၚ်အခါတုဲ ယဝ်ပိုဲတံသုၚ်စောဲစကာဗက်တှ်ေ ၜုန်မြဇြၚ်တံဂှ်ကေက်ဒၟံၚ်တုဲကၠောန်ကမၠောန်ပြေပြံၚ်မာန်လောဲလောဲသွာသွာရ၊ လ္ၚဵုဂှ်ပၠန်လေဝ် တ္ၚဲဏံၜုန်မြဇြၚ်ဇကုကေက်ဒၟံၚ်ကီုလေဝ် ယဝ်စွံလဝ်ၜါပိဂိတုဟွံဆူတဴမွဲလှ်ေတှ်ေ အခိၚ်သုၚ်စောဲစကာဂှ်လေဝ်ကေက်အာဟွံမာနတုဲ ကမၠောန်ဂှ်ဟွံစိုပ်ဒ္တုဲရ၊ တ္ၚဲဏံပိုဲတံက္ဍဟ်ခိုဟ်ပညာနွံဒၟံၚ်ကီုလေဝ် ယဝ်ပိုဲတံဟွံချူဟွံဗှ်ဟွံလ္ၚတ်ဒၟံၚ်တွဵုမ္ဂးတှ်ေ ပညာပိုဲတံမလေပ်လဝ်တံဂှ်လေဝ်ယအ်အောန်စှ်ေကၠုၚ်သိုက်သိုက်တုဲ စဵုကဵုကှ်ဇြအုဲဂြုဲအာတုဲ စကာကမၠောန်ဟွံဂတာပ်အခေတ်ကီုရ၊ အဓိကဂှ်တှ်ေ ညးတၠပညာဍာံမွဲဂှ်တှ်ေ ဒးချူဒၟံၚ်တွဵု ဒးဗှ်ဒၟံၚ်တွဵု ဒးလ္ၚတ်ဗဂဵုလဟဵုဒၟံၚ်တွဵုမှ ဂွံဒုၚ်ကေတ်ယၟုတၠပညာဂတာပ်အခေတ်မွဲရ။
(၂၈၆) ။ တၠပညာၜါဗီု၊ (၂)ဂှ် တီဓဝ်ဍာံမွဲတုဲလပါ်လဵုဟွံလုပ်စဂှ် လပါ်လဵုလေဝ်မုဓဝ်ဍာံဟွံမံက်ကၠုၚ်ကီုရ၊ (၂)ဂှ်တှ်ေ တီဓဝ်ဍာံတုဲလုပ်စလပါ်မၞိဟ်ကၠောန်ဒးအရာဓဝ်ဍာံမွဲဟေၚ်ထ္ၜးကၠုၚ်ရုပ်ရဴမွဲဂွံဒှ်ကၠုၚ်ဖဵုနာနာမာန်ရ၊ တ္ၚဲဏံဟီုဂှ်တှ်ေ တၠပညာလၟေၚ်ၜါဂှ်ဂွံဆဵုစနွံအောန်ကွေံကွေံတုဲ လၟေၚ်မွဲဂှ်ဟေၚ်မံက်ဂတဝ်ဂတာပ်အခေတ်ပ္ဍဲကဵုတ္ၚဲဏံကီုရ၊ တၠပညာလၟေၚ်မွဲဂှ် တီမံၚ်ရညးမွဲလပါ်ဂှ်ကၠောန်ဒးကၠောန်ဍာံတုဲ သီုကဵုဟွံလေပ်စတုဲ မံၚ်သ္ၚိတ်ထောံညံၚ်ရဴမုဟွံဆဵုမုဟွံတီကီုရ၊ ယဝ်ဒှ်သာ်ဏံတှ်ေ ပညာဇကုတီကၠိုဟ်လဝ်သီုဖ္အိုတ်တံဂှ်မုဖဵုဟွံမံက်ကၠုၚ်မွဲသာ်ရ၊ တီဆဖဵုပူဂဵုဇကုသၟးတုဲထ္ၜးရုပ်ရဴရဂၠိၚ်ညးတၠပညာလၟေၚ်မွဲဂှ်။
(၂၈၇) ။ ဗၠေတ်ညံၚ်ဂွံဒှ်ကၠုၚ်ဓဝ်ဍာံ၊ ကၠောန်ဍာံဂှ်လေဝ်ညံၚ်ဂွံဒှ်ကၠုၚ်ကၠောန်ဗၠေတ်တံဂှ် ညးတၠပညာမွဲဂကောံကၠောန်မာန်ပ္တိုန်ဂွံလောဲလောဲသွာသွာရ၊ ပူဂဵုတၠပညာသာ်ဏံဂှ် မၞိဟ်အခေတ်တ္ၚဲဏံထိုၚ်သးကဵုတဴလာပ်ဗဇဴဟွံပိုတ်သ္ကုတ်ရ၊ လပါ်မၞိဟ်ဓဝ်ဍာံတံဂှ်လေဝ် ဟိုတ်နူသြန်အောန်အဆက်ဟွံမွယ်တုဲ အခေါၚ်နာနာသွက်သ္ဂောံထ္ၜးဓဝ်ဍာံဂှ်အိုတ်ပိုတ်ကၠုၚ်နူအဝဵုညးသြန်ဂၠိုၚ်အဆက်ဂၠိုၚ်တံတုဲ ဗၠေတ်ဒှ်ဒး ဒးဂှ်လေဝ်ဒှ်အာဗၠေတ်အိုတ်တးရ၊ ယဝ်ရရံၚ်အာကၠးကၠးသောၚ်သောၚ်မ္ဂးတှ်ေ စိုတ်ပိုဲမၞိဟ်တံဏံဂှ် အတ္တလုပ်ကၠုၚ်သိုက်သိုက်တုဲ တီဆဇကုမွဲဓဝ်တုဲ လိုက်လောကပိုဲဏံလေဝ် အာဂတနူဏံမ္ဂးတှ်ေ သွက်ညးကဆံၚ်သဝ်တံ သွက်ညးပညာအောန်တံ သွက်ညးအဆက်ဟွံမွယ်တံဂှ်လေဝ်ဒးမံၚ်သၟဝ်ညးနွံကဵုအဝဵုတံဂၠိုၚ်တိုန်ကၠုၚ်ဇၟာပ်စက္ကကီုရ၊ သၞောဝ်ဓဝ်ဂၠးတိၜိုန်နွံကီုလေဝ် အိုတ်ကၞောတ်ဂှ်ဟေၚ် အတ္တပေၚ်ဒၟံၚ်ဇၟာပ်ဒၞာဲတုဲ ရံၚ်ကေတ်ဖဵုလပါ်ဂကောံဇကု ရံၚ်ကေတ်ဖဵုလပါ်ဂကူဘာသာဇကုအိုတ်တုဲ ဓဝ်ဍာံကၠးကၠးမွဲဂှ်ဟွံမံက်ကၠုၚ်လ္တူလိုက်လောကဏံရ၊ ၜိုန်နွံကီုလေဝ်နွံအောန်ကၠုၚ်သိုက်သိုက်ရ။
(၂၈၈) ။ ညးမစိုပ်အာတိုၚ်ပ္ကဴညးတံဗွဲမဂၠိုၚ်ဂှ်တှ်ေ ၜိုတ်ဆချူစွံလဝ်တိုၚ်ပ္ကဴလၟေၚ်တ္ၚဲသၟးဟွံဟေၚ်တုဲ ညးတံဒးဂစာန်ကၠောန်ဒးဂစာန်ပ္တိတ်ဒြဟတ်ညးတံဒးဗက်ဗဂဵုလဟဵုဟေၚ်တုဲ တ္ၚဲဏံဟေၚ်ဘဝညးတံဂွံစိုပ်အာတိုၚ်ပ္ကဴဗီုညးတံချူစွံလဝ်တ္ၚဲတေံမာန်ရ။
(၂၈၉) ။ အရာပ္ဍဲဘဝပိုဲကောန်ဂကူတံလၟေၚ်လၟေၚ်ဏံဟီုဂှ်တှ်ေ ယဝ်ရပိုဲတံကၠောန်ဂွံပြသၞာဍေံဟွံမွယ်မ္ဂးတှ်ေ ကုသဵုခိုဟ်လေဝ်ပိုဲဏံဟီုစအိုတ်ရ၊ ဆဂး ယဝ်ရဗီုပိုဲသ္ဂုတ်သွာတ်လဝ်ဍေံဟွံဒှ်ကၠုၚ်တုဲဒးဆဵုပြသၞာနာနာမာန်တှ်ေ ဣဏံဂှ်ပိုဲဒးစွံလဝ်စိုတ်ဒးကေတ်လဝ်ခန်လ္ၚတ်သွက်တ္ၚဲဂတတေံအိုတ်ညိ။
(၂၉၀) ။ လဆောဝ်တှ်ေဘဝဇေတ်ဇေတ်ဏံဂှ်ပိုဲတံဒးကွာ်ဗက်အာဒၟံၚ်ဒၞာဲအရၚ်ဇိုၚ်ညးတၞဟ်တွဵုလေဝ်ဟွံသေၚ်ရ၊ ယဝ်ပိုဲတံကွာ်ဗက်ဒၟံၚ်လက္ကရဴအရၚ်ဇိုၚ်ညးတၞဟ်တွဵုဏောၚ်တှ်ေ အရၚ်ဇိုၚ်ပိုဲဏံဇေတ်ဇေတ်ကၠးကၠးတပ်တပ်သောၚ်သောၚ်ဂှ်တ္ၚဲလဵုမှလေဝ်ဟွံဆဵုရုပ်ရဴရ။
(၂၉၁) ။ ဒးတၚ်ဂုဏ်ကဵုမအရေဝ်သ္ပစပရေံပိုဲဏံညိ၊ ဒးတၚ်ဂုဏ်ကဵုမအရေဝ်ဟီုဖျေံဍဵုဗၠိုက်ပိုဲဏံဂှ်ညိ၊ ဒးတၚ်ဂုဏ်ကဵုမအရေဝ်နာဲဗှ်ေကၠောန်ဟွံဒှ်ပုဟ်၊ ဒးတၚ်ဂုဏ်ကဵုမအရေဝ်ပညာဗှ်ေတံသဝ်တ္ၚဲလဵုမှအာစိုပ်တရဴတိုၚ်ပ္ကဴဟွံလောဲပုဟ်၊ မအရေဝ်ဗီုဗီုသာ်ဏံဇၟာပ်ညးအဲဍေံကေၚ်လုပ်ကၠုၚ်ပ္ဍဲဘဝပိုဲလၟေၚ်လၟေၚ်တ္ၚဲနွံဖ္အိုတ်ရအောန်ကဵုဂၠိုၚ်၊ ဟိုတ်ဒှ်သာ်ဂှ်တုဲ ဒးတၚ်ဂုဏ်ကဵုမအရေဝ်တံဏံတုဲ သွက်ပိုဲဏံဂွံဆက်ဗဂဵုလဟဵုပြိုၚ်ပ္ကာန်အာကဵုပြသၞာလၟေၚ်တ္ၚဲဂွံစိုပ်အာတိုၚ်ပ္ကဴတေံလောဲလောဲရ၊ ဣဏံဂှ်ဒှ်အ္စာပိုဲကဵုမံၚ်ဂဥုဲဒြဟတ်သွက်ပိုဲဏံလၟိုန်ရ။
(၂၉၂) ။ အရာလဵုမွဲယဝ်ရပိုဲဏံပတေဟ်ကေတ်ပိုဲဏံကၠောန်ဂွံဏောၚ်တှ်ေ ဣဏံဂှ်ဒှ်အာပွမအံၚ်ဇၞးပ္ဍဲကမၠောန်ဂှ်ကွက်တရဴတုဲတုဲယျ၊
(၂၉၃) ။ ပိုဲဏံဒးလောတ်စှ်ေဟီုဂှ်ဒှ်ပရေၚ်ဓမ္မတာမွဲရ၊ ဆဂးဂှ် ဇၟာပ်ဇၟာပ်ပိုဲဏံလောတ်စှ်ေတုဲပိုဲဏံကတဵုကေတ်ဂွံနကဵုဇိုၚ်တဲဒြဟတ်ပိုဲဏံဂွံဟီုဂှ်တှ်ေ ဣဏံဂှ်ဒှ်မၞိဟ်ဓမ္မတာသာမညမွဲဟွံသေၚ်ရ။
(၂၉၄) ။ လ္ပဖေက်ဍောၚ်ကာယအိုတ်ညိ၊ ပိုဲဍောၚ်တုဲတှ်ေပိုဲဏံတိက်သၠိၚ်ဓဝိၚ်အောန်ဟွံမွယ်ကဵုဒဒိုက်စိုတ်မ္ဂးတှ်ေဒုၚ်ဍောၚ်ထောံညိ၊ ဝါတ်ဟီုဂှ်ပိုဲဏံဒးဖေက်ဍေံတုဲ ၜိုန်ရပိုဲဏံတိက်ဟွံက္တဵုကၠံတ္ၚဲလ္ၚီတ္ၚဲလေဝ်က္တဵုဗက်ဂှ်တှ်ေဝါတ်ဂှ်နွံမံၚ်ဒၞာဲဂှ်ပပန်ရ။
(၂၉၅) ။ မၞိဟ်ဟီုအရေဝ်ယေလ္ဂူတပ်တးဓဝ်သောၚ်တံဂှ် ၜိုန်ရညးတံသ္ကံရဲမိတ်သဟာဲနွံအောန်ကီုလေဝ်ခိုဟ်နူကဵုညးဟီုအရေဝ်ဗက်အၚာပ်စိုတ်ညးတၞဟ်တုဲနွံကၠုၚ်ကဵုသ္ကံရဲလ္ၚီလက်ဏီရ။
(၂၉၆) ။ လောကပိုဲဏံနွံမံၚ်ဂှ်အရာတၟေၚ်တၟေၚ်ပိုဲဏံဟွံဆဵုမွဲလှ်ေပ္ဍဲဘဝဏီဂှ် ယဝ်ရပိုဲတံဂံၚ်ကွာ်တိတ်ကၠုၚ်နူပထောၚ်ဒုန်ဂှ်ဏောၚ်တှ်ေဆဵုကေတ်မာန်လောဲလောဲရ။
(၂၉၇) ။ တ္ၚဲဂွံကလေၚ်သှ်ပဠေဝ်အတိက်ဂှ်ဟွံမွယ်တုဲ နွံဆစနူစက္ကဏံတုဲပိုဲဏံဒးပဠေဝ်ဒးပြံၚ်သၠာဲဒးဗဂဵုလဟဵုတ္ၚဲဏံၜိုတ်အစောန်စရာနွံဂှ်ဒှ်အဓိကရ။
(၂၉၈) ။ တိုၚ်ပ္ကဴပိုဲစွံလဝ်ဂှ်လ္ပပြံၚ်သၠာဲထောံညိ၊ အရာထေက်ကဵုဒးပြံၚ်သၠာဲဟီုဂှ်တှ်ေ နဲကဲမွဲဟေၚ်ဒးပြံၚ်သၠာဲအိုတ်ညိ။
(၂၉၉) ။ ဘဝဂွံနွံကဵုတသိုက်ဏောၚ်ဟီုမ္ဂးဂှ်တှ်ေ အရာလဵုထေက်ကဵုဒးဝိုတ်ထောံ၊ အရာလဵုထေက်ကဵုဒးသမ္တီလဝ်၊ အရာလဵုထေက်ကဵုဒးသၠးဗွးထောံအိုတ်ညိ၊ ဘဝဟီုမ္ဂးဂှ်တှ်ေအရာနာနာဒးလောဲသွာမှတသိုက်ဇေတ်ဇေတ်ဟီုဂှ်ဒှ်ကၠုၚ်ပ္ဍဲပိုဲဏံမာန်လောဲလောဲရ။
(၃၀၀) ။ ပြသၞာနာနာမလုပ်ကၠုၚ်ပ္ဍဲဘဝပိုဲကောန်ဂကူတံလၟေၚ်လၟေၚ်တ္ၚဲဏံဟီုဂှ်တှ်ေ ညံၚ်ရဴဇုက်ဒက်လဝ်ဂှ်တုဲ ယဝ်ပိုဲဒက်လဝ်ကၟောန်ကၟောန်ဗိုၚ်ဗိုၚ်ခိုၚ်ခိုၚ်ဏောၚ်တှ်ေသှ်ေစဝါတ်တဴရ၊ ယဝ်ရပိုဲဒက်လဝ်လာဲလာဲတုဲအခိၚ်သှ်ပလးတှ်ေသှ်တဴလောဲလောဲသွသွာမာန်ရ၊ အဓိကဂှ်တှ်ေ ပိုဲဏံဒးသုၚ်စောဲအခိၚ်ညိညတုဲစိုတ်လ္ပက္တဴပြဟ်အာညိတှ်ေ ပြသၞာဟီုဂှ်ညံၚ်ရဴဇုက်ဒက်လဝ်ကၟောန်ကၟောန်တုဲ ခြာဟွံလအ်ဟေၚ်သှ်ပ္တိတ်ဂွံမာန်ရ။
(၃၀၁) ။ မၞိဟ်ကုသဵုပရေံဟွံမွယ်ပုဟ် နွံဆမၞိဟ်ဟွံညာတ်ကေတ်ၚုဟ်မးမၞိဟ်အဃောလမျီုသှ်ေနွံဒၟံၚ်ပ္ဍဲမိဏေတ်စက္ကနာဍဳဏံ။
(၃၀၂) ။ ဇၟာပ်မၞိဟ်ဂွံပိုၚ်အခိၚ်တုပ်တုပ်ဖအိုတ်ရ၊ ဆဂး ဇၟာပ်မၞိဟ်တံဂှ်ပၠန်လေဝ်သုၚ်စောဲအခိၚ်ဟွံတုပ်ညးသ္ကံအိုတ်ရ။
(၃၀၃) ။ ဂကူမန်ပိုဲကၠေံကၠအ်အိုတ်အးအာလ္တူဂၠးတိဏံကီုလေဝ် ဆဂး ဗုဒ္ဓဘာသာဟီုဂှ်ဆက်သှ်ေနွံအာမံၚ်ဏီဏောၚ်။
(၃၀၄) ။ ကၠောန်ကုသဵုဂှ်ယဝ်ပိုဲသၠာဲထောံမအရေဝ်ကၠောန်ဖဵုခိုဟ်မ္ဂးတှ်ေဂတာပ်အခေတ်ဟာဟွံတီ။
(၃၀၄) ။ လကျာ်ဂွံလီုနွံၜါသာ် (၁) ပရေၚ်မၞိဟ်ဗြဴ၊ (၂) ပရေၚ်သြန် ။
(၃၀၅) ။ ဒးပအပ်လဝ်ဘဝပိုဲဏံ ပ္ဍဲသတိကဵုပညာညိ၊ လ္ပပ္အပ်လဝ်ကဵုကံကုသဵုဇာတာအရာရံၚ်ဟွံဆဵုတံဂှ်တွဵုညိ။
(၃၀၆) ။ မၞိဟ်ကဵုအခေါၚ်ခိုဟ်အိုတ်သွက်ပိုဲဏံဂှ်တှ်ေ ဒှ်ဇကုပိုဲဏံဟေၚ်တုဲ မုဟွံဆေၚ်ကဵုညးတၞဟ်ပုဟ် ။
(၃၀၇) ။ ဒးပေၚ်စိုတ်အရာပိုဲဏံနွံဒှ်ဒၟံၚ်ပ္ဍဲပိုဲဏံဂှ်ညိတုဲ လ္ပပတုပ်ကဵုညးတၞဟ်အိုတ်ညိ။
(၃၀၈) ။ ပိုဲဏံက္တဵုဒှ်ကၠုၚ်မၞိဟ်ဟီုဂှ် ဒးကၠောန်တာလျိုၚ်မၞိဟ်မွဲညံၚ်ဂွံပြေပြံၚ်ဟေၚ်ရ။
(၃၀၉) ။ ဘဝဟီုမ္ဂးဂှ်တှ်ေ ဒးဆက်ကွာ်အာဂတဂတတေံဟေၚ်တုဲ လဆောဝ်တှ်ေအိၚ် လဆောဝ်တှ်ေမြက်လေဝ်နွံရ၊ အဓိကဂှ် ညံၚ်သ္ဂောံခိုဟ်နူတြေံတှ်ေတုဲရ၊ ( ဒးခိုဟ်နူညးတၞဟ်တွဵုဂှ်လေဝ်အဓိကဟွံသေၚ်ပုဟ်) ။
(၃၁၀) ။ တ္ၚဲဏံပိုဲလောတ်စှ်ေ တ္ၚဲယးတေံလေဝ်ၜိုန်ရပိုဲဒးလောတ်စှ်ေမွဲဝါပၠန်လေဝ် ညံၚ်ဟွံဒးဂိဗီုနူလောတ်စှ်ေအလန်ပထမဂှ်ပိုဲဒးကၟောန်လဝ်တွဵုညိ။
(၃၁၁) ။ အခေါၚ်ပိုဲဏံဟွံမွယ်ဂွံကၟာတ်ထောံကသပ်လညာတ်ညးတၞဟ်တံဂှ်တုဲ အခေါၚ်ပိုဲနွံပေၚ်ပေၚ်ဟီုဂှ်တှ်ေ ပိုဲဏံသုၚ်စောဲဘဝဗီုလဵု။
(၃၁၂) ။ လ္ပကူချပ်ကလေၚ်ပဠေဝ်အတိတ်တေံညိ၊ နွံဆပစ္စုပ္ပန်တ္ၚဲဏံပိုဲဒးဗဂဵုလဟဵုဟေၚ်ရ။
(၃၁၃) ။ ပလၞုဟ်ဏောၚ်တှ်ေ ကဵုအခိၚ်လ္ၚတ်တုဲ ဟွံလံဒှ်မံၚ်ညးတၠပညာမွဲဏီဏောၚ်ဂှ်ဖျေံလဝ်စိုတ်အိုတ်ညိအဴ၊ တ္ၚဲဏံဒှ်ဒၟံၚ်ညးတၠပညာမွဲကီုလေဝ် ယွံရပူဂဵုဂှ်အိက်လၞုဟ် သာသ္ပအ်ဒၟံၚ်ဏောၚ်တှ်ေ ဟွံလံဒှ်အာမၞိဟ်ဓီုမွဲရ။
(၃၁၄) ။ လဆောဝ်တှ်ေ ၜိုန်ရပိုဲဏံတီမံၚ်ရဂွံအောန်တုဲ ဒးဂစာန်ကၠောန်အာရ၊ ၜိုန်ရပိုဲဏံဂစာန်ကၠောန်မံၚ်ဟွံဇူကီုလေဝ် ဂွံဆစညိညကီုရ၊ တုဲတှ်ေ ယဝ်ရပိုဲဟွံကၠောန်မ္ဂးတှ်ေ ပဵုတုဲမုရောဟွံဂွံစဂှ် ဗွဲစၟတ်ဨကန်တရ။
(၃၁၅) ။ အာယုက်ဇၞော်တိုန်တုဲ လဆောဝ်တှ်ေ ကၠောန်ဗဒှ်ကဵုမတ်ပိုဲဏံၜါရံၚ်ဟွံညာတ်ဟွံကၠးကၠုၚ်သိုက်သိုက်မာန်ရ၊ ဆဂး တ္ၚဲဂိတုသၞာံလောန်ၜက်အာဂၠိုၚ်ၚ်ကဵုသၞာံတံဂှ် ကၠောန်ဗဒှ်ကဵုပိုဲဏံဆဵုကေတ်ဘဝဇေတ်ဇေတ် ကၠိုဟ်ကေတ်စိုတ်မၞိဟ်ဏံဍာံဍာံဗွဲမကၠးဖ္ဍးမာန်ရ။
(၃၁၆) ။ #ပိုဲဏံပဒိုအ်ဂစေံလ္ပကဵုပဝ်တတ်အာလ္တူက္ဍိုပ်ပိုဲဏံဂှ်ဟွံဂွံပုဟ်၊ ဆဂး − ပိုဲဟွံကဵုအခေါၚ်ဂစေံ ကၠုၚ်သိုၚ်ဒက်ခပေါဲလ္တူက္ဍိုပ်ပိုဲဏံဂှ်ဂွံမာန်ရ၊ ကၠောခိုဟ်ဟီုဂှ် ဆက်ကၠောန်အာညိတုဲ လ္ပဆုတ်ကလေၚ်ထောံ နကဵုမအရေဝ်ပသပသအုဲအုဲနူညးမွဲတေံဂှ်တွဵုညိ၊ ဟိုတ်ဖဵုပိုဲမၞိဟ်ဏံ မုဟွံဒးထ္ၜးသက်သဳဂၠိုၚ်ပုဟ်တုဲ နွံဆပိမနူစေတနာပိုဲဏံဇေတ်ဇေတ်ကၠးကၠးဟီုဂှ်တှ်ေ (၁) ချပ်ခိုဟ် (၂) ဟီုခိုဟ် (၃) ကၠောန်ခိုဟ်−မဒှ်ရ။
(၃၁၇) ။ #ဟွံဒးရုဲမၞိဟ်ကျေဝ်အိုတ်လောဲအိုတ်ဂှ်တုဲ ပိုဲတံဒးရုဲကေတ်မၞိဟ်ကၠောန်ဗဒှ်ကဵုဘွပိုဲဏံဂွံသၠုၚ်ဂွံနွံကၠုၚ်ကဵုၚုဟ်မးဂှ်အိုတ်ညိ၊ ပိုဲမၞိဟ်ဏံဂှ် ဒးမံၚ်ပံၚ်ဖက်အာညးသ္ကံမွဲခဏဟွံသေၚ်တုဲ ဟိုတ်ဂှ်ရတှ်ေ သီုညးၜါလပါ် ညံၚ်ဂွံကၠိုဟ်စိုတ်ညးသ္ကံဟီုဂှ် ၚုဟ်မးလ္တူညးသ္ကံဒးစွံလဝ်တွဵုညိ၊ သာ်ဏံမှ ဂွံမံၚ်ပံၚ်ဖက်အာ ဒဒိုက်ဍောတ်ဒဒိုက်ဇၞော် ညဳညဳသာသာမွဲလအိက်အာယုက်မာန်ရ၊ ပြသၞာမွဲမွဲလုပ်ကၠုၚ်ပ္ဍဲဘဝပိုဲမ္ဂးတှ်ေ နဲကဲလဵုမွဲဂွံပသောၚ်ထောံမာန်ဂှ်လေဝ် ညးၜါဒးကဵုသၟာန်သွဟ်ကေတ်ကသပ်ထေက်ရ၊ ဟွံသေၚ်ဗီုဏံတုဲ ဆဵုပြသၞာညိဂှ် ဗက်ဂၠာဲမံၚ်ဒုဟ်လ္တူညးသ္ကံဂှ် ဣဏံ ထ္ၜးကၠုၚ်သက်သဳဗီုပြၚ်ဂကောံအိန်ထံၚ်ပိုဲဏံထ္ကးကၠုၚ်သိုက်သိုက်မာန်ရ။ ( စွံသတိညိ) ဟိုတ်ဒှ်သာ်ဂှ်တုဲ ကျေဝ်လောဲဟီုဂှ်ဒှ်အဓိကဟွံသေၚ်သွက်ဘဝတုဲ ပိုဲတံဒးရုဲကေတ်မၞိဟ်ကၠောန်ဗဒှ်ကဵုဘဝပိုဲဏံဂွံသၠုၚ် ဂွံနွံကၠုၚ်ကဵုၚုဟ်မးအရာကၠိုဟ်စိုတ်သွက်ဘဝဏောၚ်တှ်ေ ဣဏံရတသိုက်စိုတ်အခိၚ်မသှ်ေနွံဒၟံၚ်မူစိနာဍဳမိဏေတ်စက္ကဂှ်ရ။
(၃၁၈) ။ လၞုဟ်မွဲမ ယဝ်ရနွံဒၟံၚ်ပ္ဍဲပူဂဵုဂှ်မ္ဂးတှ်ေ ၜိုန်ရဂွံလဝ်တဆိပ်ခြာကၠံတၞးကီုလေဝ် တုပ်သၟဟ်တိုပ်စွံထဝ် ပ္ဍဲသၟဝ်တိကီုရ။
(၃၁၉) ။ ပရေၚ်ထတ်ယုက်ခိုဟ် တုဟ်သၟဟ်ထဳပိုက်လ္ၚဳလက်ကိုတ် ၜိုန်သိုက်တိက်လ္တူသြန်ကီုလေဝ် ယဝ်ပရေၚ်ထတ်ယုက်ဟၟဲမ္ဂး ဘွဂှ်မူအဓိပ္ပါယ်နွံရော −−− ?
(၃၂၀) ။ မၞိဟ်စောန်စောန် နွံကဵုလက်ကိုတ်၊ မၞိဟ်ကၠောန်ကမၠောန်ဂှ် မွဲမှဂၠာဲဝါတ် ။
(၃၂၁) ။ (၁)−သ္ၚိတ်အာဟိုတ်နူ ၜိုန်ရဟီုပတိတ်ကီုလေဝ် မုဖဵုဟၟဲ ။(၂)−သ္ၚိတ်အာဟိုတ်နူ ကဵုအခိၚ်စၜက်အိုတ်အာသိုက်သိုက် ။ (၂)−သ္ၚိတ်အာဟိုတ်နူ ညာတ်ကေတ်ဓရ်တုဲ ထိၚ်ထောံစိုတ် ။ (၄)−သ္ၚိတ်အာဟိုတ်နူ သွက်သ္ဂောံဟီုပ္တိတ်ပေၚ်တၟိုဟ်ဒၟံၚ်တုဲ သက်ဂွံပ္တောံၜိုတ်ဟၟဲ ။ (၅)−သ္ၚိတ်အာဟိုတ်နူ အရာနာနာကဵုသွဟ်ခိုဟ်အိုတ် ။
(၃၂၂) ။ စဖျး အေၚ်ဍာတ်ဍာတ်၊ အေၚ်လဝ်ဖျးတှ်ေ ဂွံစဍာတ်ဍာတ်၊ ဟိုတ်ဒှ်သာ်ဂှ်တုဲ ဓရ်အေၚ်ဒုၚ်မွဲမဏံဂှ် နွံတဴၚုဟ်မးကွေံကွေံ။
(၃၂၃) ။ ဓဝ်ပတေဟ်ညးဍုၚ်ကွာန်လီုအာဂှ် တုဟ်သၟဟ်ပေါဲဗတိုက်ကျလဝ်ကဝက်တုဲတုဲ ။
(၃၂၄) ။ ဂါံကၠာအိုတ်ဂှ် တီကၠးလိုန်ဒးအိက်တုဲ ဟွံဂံၚ်ကြာတ်မ္ဂးတှ်ေ ဂါံၜါဂါံပိဂတဂတတေံပၠန် ဆက်လိုန်အာအိက်ဂၠိုၚ်တိုန်သိုက်သိုက်ဟေၚ် ။
(၃၂၅) ။ ဟွံချူဂၠိုဂၠိုၚ် ဟွံဗှ်ဂၠိုၚ်ဂၠိုၚ်မ္ဂးတှ်ေ − ဆလအ်မှလိက်မန်ပိုဲသွံရာန်စဂွံမာန်ရော? − ချူလိက်မှဒးဂွံသြန်ဏောၚ် ယဝ်စွံစိုတ်မ္ဂးတှ်ေ ပူဂဵုပိုဲဏံဂှ် ဒှ်ပူဂဵုစေတနာအောန်ကွေံကွေံ ။
(၃၂၆) ။ မၞိဟ်ဒိုဟ်ဓီုဂှ် ဍေံတံမချပ်လဝ်တွဵုဟီုဂှ်တှ်ေ အဲဒးခိုဟ်နူညးတၞဟ်တွဵုဟေၚ် ဇၟာပ်ကျာယီုလုပ်ယီုတိတ်ဍေံတံရ။
(၃၂၇) ။ သွာၚ်လဵုဒှ်ဒှ် ယဝ်ရမၞိဟ်ကၠောန်ကမၠောန်ဇေတ်ဇေတ်ဟၟဲမ္ဂးဂကူဂှ် ဍုၚ်ကွာန်တံဂှ် သွက်သ္ဂောံတဴတက်အာမာန် လဇုဲလဇကွေံကွေံ၊ သွာ်လ္ၚဵု ၜိုန်ရမၞိဟ်ကၠောန်ကမၠောန်နွံကီုလေဝ် ယဝ်ရမလၞုဟ်နွံမံၚ်မ္ဂး တုပ်သၟဟ်ကဵုမၞိဟ်ကၠောန်ကမၠောန်ဟၟဲတုပ်တုပ် ။
(၃၂၈) ။ ပြသၞာကေုာံဒဒိုက် ကတဵုဒှ်ကၠုၚ်ဟိုတ်နူသ္ပကုသဵုတုဲ −−− ဣဏံ ကုသဵုဇေတ်ဇေတ်ဟသေၚ် ။
(၃၂၉) ။ ပတေဟ်ကံကုသဵုမွဲမဓဝ်ဂှ်လ္ပကဵုဒှ်ညိ၊ ဝဳရိယလေဝ်ဒးပတေဟ်တုဲ တုပ်သၟဟ်ညံၚ်ရဴမၞိဟ်ၜံက်ပလိုၚ်(ကမၠိုၚ်)ကၟာကီုတံ ဒးဂွံဍာ်ဏောၚ်ဂှ် ပတေဟ်ဗိုန်ဒၟံၚ်ရ၊ အကြာဂှ် ဒးကၠောန်ၜံက်ခါဲဒၟံၚ်ပလက်မုဟ်ဍေၚ် ပလက်ကၞေၚ်ဇွောဝ်ဂှ် ဒှ်သဘဴဓဝ်ဝဳရိယ ခြာဟွံလအ်ဟေၚ် ဍာ်ဂှ်ဂွံကၠုၚ်မာန်သေၚ်ဟာ ။
(၃၃၀) ။ ညးဂမၠိုၚ်ဂွံတဆိပ်တြာတက္ကသိုလ် စၟတ်သမ္တီနဒဒှ်မလိက်ကၠးကၠးဂွံဆဵုဂွံထိုၚ်သးဂတမုက်မတ်ညးဂမၠိုၚ်မာန်၊ တဆိပ်တြာတက္ကသိုလ်အဲဂှ် နွံဆတၞးစက္ခူပလးမွဲတၞး သီုဟၟဲကဵုမလိက်စၟတ်သမ္တီမွဲမကီုရ၊ ဆဂး − အဲပေၚ်စိုတ်တဆိပ်တြာစက္ခူပလးဏံတုဲ ဒှ်သွက်ဂွံပါ်ပရအ်ကဵုညးဂမၠိုၚ် သွက်သ္ဂောံချူပ္ဍဵုဖျေံမလိက်ပ္ဍဲစက္ခူပလးဏံဟိုတ်ဖဵုနာနာသာ်မာန်အတိုၚ်ပၟိက်စိုတ်၊ အဲမိပ်စိုတ် တဆိပ်တြာအဲသၠးဒၟံၚ်တုဲ သွက်သ္ဂောံချူဖျေံမလိက်နာနာမာန်၊ ယဝ်ရတဆိပ်တြာအဲတုပ်ဗီုညးတၞဟ်ကီု သီုမလိက်ပေၚ်ဒၟံၚ်ပ္ဍဲတၞးဂှ်တုဲ ဂၠာဲဒၞာဲသွက်ဂွံချူဖျေံမလိက်ဂှ်ဟၟဲလေဝ်ဒှ်မာန်မံၚ် ။
(၃၃၁) ။ ယဝ်ရပိုဲမိက်သ္ဂောံဒှ်နာဲမ္ဂးတှ်ေ − လ္ပဖျေံလဝ်စိုတ် ဒှ်ဍိက်ညးမွဲအာယုက်ညိ ။
(၃၃၂) ။ (1)-ပူဂဵုပတောံလှိၚ် (2)-ပူဂဵုလှိၚ်ဇေတ်တ် − ပူဂဵုၜါဏံ ညးလဵုၚုဟ်ကတဵုလောဲရော −− ?
(၃၃၃) ။ စဖျး အေၚ်ဍာတ်တ်၊ အေၚ်ဖျး ဂွံစဍာတ်ဍာတ်၊ ဟိုတ်ဒှ်သာ်ဂှ်တုဲ ဓရ်အေၚ်ဒုၚ်မွဲမဏံဂှ် နွံတဴၚုဟ်မးကွေံကွေံရ။
(၃၃၄) ။ လၞုဟ်မွဲမ ယဝ်ရနွံဒၟံၚ်ပ္ဍဲပူဂဵုဂှ်မ္ဂးတှ်ေ ၜိုန်ရဂွံလဝ်တဆိပ်ခြာကၠံတၞးကီုလေဝ် တုပ်သၟဟ်တိုပ်စွံထဝ် ပ္ဍဲသၟဝ်တိကီုရ။
(၃၃၅) ။ 1️⃣ပရေၚ်ထတ်ယုက်ခိုဟ် တုဟ်သၟဟ်ထဳပိုက်လ္ၚဳလက်ကိုတ် 2️⃣ၜိုန်သိုက်တိက်လ္တူသြန်ကီုလေဝ် ယဝ်ပရေၚ်ထတ်ယုက်ဟၟဲမ္ဂး ဘွဂှ်မူအဓိပ္ပါယ်နွံရော −−− ?
(၃၃၆) ။ မအရေဝ်ဟီုပတိတ်ဏာဂှ် စွံသသတိဝါတ်ကွေံ − ဟိုတ်ဂှ်ရ လ္ပဟီုဂၠိုၚ် ။
(၃၃၇) ။
(၃၃၈) ။
(၃၃၉) ။
(၃၄၀) ။