သိပ္ပသာလ၊ ဘာဂိုဏ်ရာမညနိကာယ ကွာန်ဒဵုသဇေင်
| ဘာသိပ္ပသာလ | |
|---|---|
 | |
  ဒၞာဲဘာသိပ္ပသာလ မနွံ | |
| တင်ဂၞင်ဂမၠိုင် | |
| ဒတန် | ကွာန်ဒဵုသဇေင် |
| ဒတန်ဒၞး | 14°45′42″N 97°53′21″E / 14.761728°N 97.889096°Eဒတန်: 14°45′42″N 97°53′21″E / 14.761728°N 97.889096°E |
| မဆေင်စပ် ကုဘာသာ | ထေရဝါဒဗုဒ္ဓဘာသာ |
| ဒတန်သာသနာ | ဘာတိုက်လိက် ကေုာံ စမြိုင်သာသနာ |
| ဂိုဏ် | ဂိုဏ်ရာမညနိကာယ |
| ကၟိန်ဍုင် | Myanmar |
ဘာသိပ္ပသာလ (ဘာၜဳ) ဂိုဏ်ရာမညနိကာယဝွံ နွံပ္ဍဲ ကွာန်ဒဵုသဇေင်၊ ပွိုင်ဍုင်ဍာ်ဗု၊ ရးတၞင်သဳ။ ဘာတၟိ မနွံပ္ဍဲကွာန်ဒဵုသဇေင်ဝွံ ကျာ်ဇၞော်အ္စာ ဘဒ္ဒန္တကလျာဏမိတ္တ (ဓမ္မာစရိယ) ဇာတိကွာန်တံင်ပရင်၊ ဘာကျာ်သြဳမန် ပ္တန်လဝ် နူသၞာံ ၁၉၅၅ (သက္ကရာဇ် ၁၃၁၆) ဇရေင်ဒဵုသဇေင် ရ။[၁]
ဝင်[ပလေဝ်ဒါန် | ပလေဝ်ဒါန် တမ်ကၞက်]
ၜိုတ်သၞာံ ၁၉၄၁ (သက္ကရာဇ် ၁၃၀၃) ဂှ် အစာလိက် ဘာဒဵု ကွာန်အနေင် ဘဒ္ဒန္တကလျာဏမိတ္တ ဇာတိ ဘာကျာ်သြဳမန်၊ ကွာန်တံင်ပရင်၊ ပွိုင်ဍုင်ရေဝ် တၞဟ်နမိက်ဂွံ အာဝေင် ဇရေင် မသ ကလောဇကု မနွံ ပ္ဍဲကွာန်ဒဵုတၟအ် (ကျောက်တောင်) တုဲ မွဲစွံ ကုကောန်ကွးဇကု မနွံယၟု တၠဂုန်ပညိန္ဒ ဇာတိဘာဒဵု ကွာန်အနေင် စိုပ်ကၠုင် ပ္ဍဲကွာန်ချဗုင် (ယၟုတြေံ ကွာန်ချဗုင် ယၟုနကဵုဘာသာဗၟာ ချပုံး မဂွံအဓိပ္ပါယ် တၞအ်ဂြုန်) လၟုဟ် ကော်စ ကွာန်ဒဵုသဇေင်။ ဒါယကာ ကောန်ကွာန်ဒဵုသဇေင် နိမန် တၠဂုန်အစာ သွက်ဂွံ ဆက်ပ္တန်သာသနာ ပ္ဍဲကဵု ကွာန်ညးတအ်ရ။ ဗွဲကိုပ်ကၠာ တၠဂုဏ်အစာကလျာဏမိတ္တ ဟွံမိက် ပဒတဴကီုလေဝ် ဟိုတ်နူ ဒါယကာတအ် အာတ်အခေါင် ဒုင်ဂုဏ်ဝန်စဝ် ဂၠိုင်ကဵုအလန်တုဲ တၠဂုဏ်ကလျာဏမိတ္တ ပဒတဴ ပ္ဍဲဘာကွာန်ချဗုင်ဂှ်တုဲ ဂွံဒှ် ကျာ်ဇၞော်နွံပိုန်ဘာရ။ ကျာ်ဇၞော် ပဒတဴပ္ဍဲဘာဂှ်တုဲ ကျာ်ဇၞော် ပံက်တိုက်လိက်၊ ထ္ၜးဓရ် မပ္တံ မြဴသာ်ဝွံ ပတုဲကၠုင် ကေင်ကာသာသနာ ဗွဲမဂၠိုင်ဂၠေင်ရ။[၁]
ဘာတြေံဂှ် နွံဒၟံင် ဗဒါဲဂြိုပ်ဒဵု၊ ဟိုတ်မကြပ်ဒၟံင် ကုဒပ်ကောန်ပၞာန်မန်ကီုတုဲ ဇၟာပ်ဇၟာပ် ဗၠာဲသၟိင်ဗၟာ နူကဵုကာန်ပေါက် (ကံပေါက်) မကၠုင်မ္ဂး ဍေဟ်တအ် ထေင်ကေတ် ကျာ်ဇၞော် ပၞုက်လဝ် ရဲကောန်ပၞာန်မန်တအ်တုဲ ဍေဟ်တအ် ဗက်စၟဳစၟတ် ဂၠိုက်ဂၠာဲ သီုကဵု လတူဂြောန် ဟွံသေင်ရ။ ဟိုတ်နူဏအ်တုဲ နကဵုကျာ်ဇၞော် ချပ်ကဵုဒါယကာတအ် ဂွိင်ဖေက် ဒှ်အန္တရာယ် ဗွဲဓာန်ဂတတုဲ အာသြိုင်ဘာ ပ္ဍဲကဵု ဇရေင်ဒဵုသဇေင် ဒၞာဲဘာမနွံလၟုဟ်ဂှ်ရ။ (ပ္ဍဲဒၞာဲဒဵုဂှ် ဟိုတ်နူ တၞံသဇေင် နွံဂၠိုင်တုဲ ညးကော်စ ဒဵုသဇေင်၊ ဗွဲကြဴ ယၟုကွာန်ဗီုဗၟာ ချဗုင် ဂှ် ဟွံကော်တုဲ ယၟုကွာန်ဂှ်လေဝ် ဒှ်အာ ကွာန်ဒဵုသဇေင်ကီုရ။[၁]
သြိုင်ဘာတၟိ ပ္ဍဲဇရေင်ဒဵုသဇေင်[ပလေဝ်ဒါန် | ပလေဝ်ဒါန် တမ်ကၞက်]
ပ္ဍဲသၞာံ ၁၉၅၅ ဇာန်နဝါရဳ ၆ (သက္ကရာဇ်ဍုင် ၁၃၁၆ ဂိတုပုဟ် ၁၃ မမံက်) တ္ၚဲဗြဴဗတိဂှ် စသြိုင်ဘာတုဲ ပွိုင်ပန်ဂိတု ပ္ဍဲသၞာံ ၁၉၅၅ ဂိတုဨပြဳ ၁၀ (သက္ကရာဇ် ၁၃၁၇ ဂိတုစဲ ၃ စွေက်)ဂှ် ဘာဂှ် အာစိုပ်ဒတုဲတုဲ ပဒတဴ ပ္ဍဲဘာဂှ်ရ။[၁]
ရုင်ဒါန် သုခပါလာ[ပလေဝ်ဒါန် | ပလေဝ်ဒါန် တမ်ကၞက်]
သၞာံ ၁၉၅၆ နဝ်ဝေမ်ဗါ ၁၅ (သက္ကရာဇ် ၁၃၁၈ ဂိတုကထိုန် ၁၃ မမံက်) တ္ၚဲဗြဴဗတိဂှ် စသြိုင် ရုင်ဒါန်သုခပါလာ။[၁]
ကျာ်စေတဳဒဵုသဇေင်[ပလေဝ်ဒါန် | ပလေဝ်ဒါန် တမ်ကၞက်]
ကျာ်စေတဳဒဵုသဇေင်ဂှ် ထ္ၜုတ်ပ္တန်လဝ် ပ္ဍဲအခိိင် သာသနာ မအာစိုပ် သၞာံ ၂၅၀၀၊ ပ္ဍဲ သၞာံ ၁၉၅၆ (သက္ကရာဇ်ဍုင် ၁၃၁၈)။[၁]
ဘာကဵုပိုန်ဇိနသာသနာ[ပလေဝ်ဒါန် | ပလေဝ်ဒါန် တမ်ကၞက်]
သၞာံ ၁၉၅၈ ဂိတုဇာန္နဝါရဳ ၂ (သက္ကရာဇ် ၁၃၁၉ ဂိတုပုဟ် ၁၃ မမံက်) တ္ၚဲအဒိုတ်ဂှ် စသြိုင် ဘာကဵုပိုန်တုဲ သၞာံ ၁၉၆၂ ဖေဖဝ်ဝါရဳ ၈ (သက္ကရာဇ် ၁၃၂၃ ဂိတုမာဃ် ၄ မမံက်) တ္ၚဲဗြဴဗတိ စရိုဟ်ဍာ်။ ဘာကဵုပိုန်ဏအ်ဂှ် ကေင်တူလဝ် မွဲဒကုတ်ရ။[၁]
ဘာတိုက် ပိထပ်[ပလေဝ်ဒါန် | ပလေဝ်ဒါန် တမ်ကၞက်]
ကြဴနူ ဘာကဵုပိုန် မတူအာပၟတ်မွဲဒကုတ်တုဲ သွက်ဂွံ သြိုင်ဘာတိုက် ပိထပ်ဂှ် ကျာ်ဇၞော် ပ္အပ် ကုညးတာလျိုင်ကမၠောန်သြိုင်ဘာ ပိ တၠ၊ (၁) ဒကာဘာဇၞော် နာဲကျဝ်ဟာန်၊ (၂) တၠဂုဏ်အစာနာဂ၊ (၃) တၠဂုန်ရာမည (ဇာတိကွာန်အနေင်)ရ။ ဘာတိုက်ပိထပ်ဂှ် စဖျေဟ်ရိုဟ််ကၞက် ပ္ဍဲသၞာံ ၁၉၈၃ ဂိတုမာတ် ၂၄ (သက္ကရာဇ် ၁၃၄၄ ဂိတုဖဝ်ရဂိုန် ၁၁ မမံက်) တ္ၚဲဗြဴဗတိတုဲ အာစိုပ်ဒတုဲ ပ္ဍဲသၞာံ ၁၉၈၃ ဂိတုမေ ၁၂ (သက္ကရာဇ် ၁၃၄၅ ဂိတုပသာ် ၁ မမံက်) တ္ၚဲဗြဴဗတိရ။[၁]
ကျာ်ဇၞော်မနွံပိုန်ဘာဂမၠိုင်[ပလေဝ်ဒါန် | ပလေဝ်ဒါန် တမ်ကၞက်]
- ကျာ်ဇၞော်ဂကူဗၟာ (ဘာတြေံ)
- အရကျာ်ချောဲ နူဘာကျာ်သြဳမန် ကွာန်တံင်ပရင်
- ကျာ်ဇၞော်ကလျာဏမိတ္တ နူဘာကျာ်သြဳမန် ကွာန်တံင်ပရင် (ဘာတြေံကီု သီုကဵုဘာတၟိ)။ ကာလမကလိဂွံ အာယုက် ၇၅ ဝှ် ၅၄ ဟိုတ်နူယဲက္ဍင်တုဲ စဴအာ ဌာန်တွုပ်သုက်ဇကု ဘာကျာ်သြဳမန် ကွာန်တံင်ပရင်တုဲ ပ္ဍဲ သၞာံ ၁၉၉၄ ဂိတုဒဳဇြေမ်ဗါ ၂၆သက္ကရာဇ် ၁၃၅၆ ဂိတုမြေက္ကသဵု ၉ စွေက် တ္ၚဲစန် အခိင်သဝ်တ္ၚဲ ၆း၃၅ဂှ် စုတိစဴအာသွဝ် ပ္ဍဲ ဘာကျာ်သြဳမန် ရ။[၁]
- ကျာ်ဇၞော်ဘဒ္ဒန္တနာဂသေန (ကလိဂွံအာယုက် ၆၉ ဝှ် ၄၉ စဴသွဝ် ပ္ဍဲသၞာံ ၂၀၀၅ ဨပြဳ ၂၃ သက္ကရာဇ် ၁၃၆၇ ဂိတုစဲ ၁၅ မမံက်) အခိင်သဝ်တ္ၚဲ ၀၅:၃၀)[၁]
- ကျာ်ဇၞော်ဘဒ္ဒန္တဣန္ဒက
ဗီုရုပ်ဂမၠိုင်[ပလေဝ်ဒါန် | ပလေဝ်ဒါန် တမ်ကၞက်]
- ဗီုရုပ် ကျာ်ဇၞော်တြေံ ကေုာံ ဘာ
-
ဗီုပါင်မုက် ကေုာံ စင်္ကြံ မလုပ်ကဵုဘာ။ -
ဗီုဘာ မဂွံညာတ်အာ နူဂၠံင် -
ဗီုတၞိန် ဘာဆုတြေံ မသှ်ေဒၟံင်လၟုဟ်။
လၟိဟ်သင်မလုပ်ဒဂိုန်[ပလေဝ်ဒါန် | ပလေဝ်ဒါန် တမ်ကၞက်]
အတိုင်စရင်လုပ်ဒဂိုန် နူရုင်ရာမညနိကာယမ္ဂး ပ္ဍဲဘာဝွံ သင်မလုပ်ဒဂိုန် ပ္ဍဲ
သၞာံ ၂၀၂၁ ဂှ် နွံ ခမဳ ၂ ဇကု၊ ထပိုယ် ၅ ဇကု။၊[၂]
သၞာံ ၂၀၂၂ ဂှ် ခမဳ ၂ ဇကု၊ ထပိုယ် ၃ ဇကု။[၃]
နိဿဲ[ပလေဝ်ဒါန် | ပလေဝ်ဒါန် တမ်ကၞက်]
- ↑ ၁.၀၀ ၁.၀၁ ၁.၀၂ ၁.၀၃ ၁.၀၄ ၁.၀၅ ၁.၀၆ ၁.၀၇ ၁.၀၈ ၁.၀၉ " ဝင်ဘာ ဗွဲခမၞောန်. Open (November 29, 2022).
- ↑ " စရင်သင်လုပ်ဒဂိုန် ရာမညနိကာယ. Open (October 14, 2021).
- ↑ " စရင်သင်လုပ်ဒဂိုန် ရာမညနိကာယ. Open (October 9, 2022).