သုရုစိဇာတ်

ဗောဓိသတ်ဒှ်သၟိၚ်အိန်

ဒၞာဲတွံ- ကျာ်တြဲသဗ္ဗညုမစိုန်ဒှ်တဴ အ္စာမၞိဟ်ဒေဝတဴ သ္ပနိဿဲကဵုဍုၚ်သာရဝှ်တုဲ သီုမပဒတဴပ္ဍဲပြာသာဒ် ဥပးဗြဴဝိသာခါ မၞုံယၟုမိဂါရမာတာ ပဟိုတ်ကဵုဥပးဗြဴဇၞော် ဝိသာခါတုဲတွံတဴသုရုစိဇာတ်ဝွံရောၚ်။

ဝတ္တုပစ္စုပ္ပန်

ဂလာန်ဂှ်ကြက်တြးကဵုရ၊ ဥပးဗြဴဇၞော်ဝိသာခါဂှ် နွံကာလမွဲတ္ၚဲ ကၠၚ်ဓရ်ပ္ဍဲဘာဇေတဝန်တုဲ တၞဟ်နဖဵုတ္ၚဲယးဂတ ဘိက်နိမန်ကျာ်တြဲမွဲဟာန် ကေုာံ ဘိက္ခုသၚ်တုဲ အာရ၊ နမကၠိလောန်အာဗ္တံဂှ် ဗြဲဇၞော်ဗျာပ်အာအလုံတ္ကံဇၞော်ပန် ဂူရ။ သဗ္ဗညုကော်ခမဳဂမၠိုၚ်တုဲ ယွံခမဳတုဲ ပ္ဍဲဘာဇေတဝန် ညံၚ်ရဴဗြဴဇၞော်ဂူကီု တုပ်တဴညံၚ်သာ်ဂှ်ဟေၚ် ပ္ဍဲအလုံတ္ကံပန် ဗြဲဇၞော်ဂူရ၊ ယွံခမဳတံ ဖ္ဍုက်ဇကုကဵုဍာ်ဗြဲအိုတ် ညိ၊ ဗြဲဇၞော်ဝွံ ဗြဲမဗျာပ် အလုံတ္ကံပန် မဒှ်ကၞုၚ်ရောၚ်၊ ရဴဝွံသ္ဂးတုဲ နအစောံဣဒ္ဓိမွဲဟာန် ကေုာံ ခမဳဂမၠိုၚ် မၞုံဇကုမဂပ်ဝ်ဖ္ဍုက်လဝ်ဍာ်ဗြဲ အာနူဘာဇေတဝန်တုဲ ပြာကတ်ပ္ဍဲမုက်တြၚ်ဥပးဗြဴ ဝိသာခါရ။

လွဵုဝိသာခါဒ္စံါသာ်

ဥပးဗြဴဝိသာခါဟီု ယွံမၞတံ ကျာ်တြဲဒဒှ်ဣဒ္ဓိဇၞော် အနုဘဴဇၞော် စိုန်ဂပ်ဝ်အမ်သဝ် ကွေံရသွံ၊ ယွံမၞးတံ သ္ဘဴဟွံကေၚ်က္တဵုဒှ်မွဲလှေ် က္တဵုဒှ်ရသွံ၊ ညးသ္အာၚ်မမိက်ကဵုမွဲမွဲ ဍာ်ၜိုတ်က္ၜံၚ်ကီု ၜိုန်ဂၞိၚ်ကီု ၜိုန်ရဒှ်တဴကီုလေဝ် ခမဳမွဲဇကုကီုလေဝ် ဇိုၚ်ဂမၠိုၚ်ကီု သ္ၚာဂမၠိုၚ်ကီု ဟွံဍုက်ဍေက်အိုတ်ရ၊ ရဴဝွံမြဟ်မြဴအိုဟ်တၟိုဟ်မိပ်စိုတ်တုဲ တရိုပ်ဗ္စဘိက္ခုသၚ် မၞုံပဓာန်ဍေံ ကျာ်တုဲ နကြိကိစ္စကဵုဒါန် ပိုန်စိုပ်ဒတုဲတုဲနေဝ် ရဴသာ်ဝွံ ဂရၚ်ပ္တီကျာ်တြဲရ၊ ယွံတၠဳပိုန်ကျာ်တြဲမၞုံပိုန်မဇၞော် အဲဍိက်အာတ်တၠဳပိုန်ကျာ်တြဲ လွဵုဒ္စံါသာ်ရကျာ်၊ ရဴဝွံ ဂရၚ်ပ္တီရ၊ ယွံဝိသာခါ ကျာ်တြဲဂမၠိုၚ်တုန် - ပ္ဍဲပွမကဵုလွဵု စိုန်သ္ဍိုက်မၠိုက်တဴ ဗွဲမလောန်အိုတ်ရ၊ ရဴဝွံနကြိသ္ဂးနေဝ် ယွံတၠဳပိုန် ယြဴယၚ်လွဵုမွဲ ဂပ်ဝ်လေဝ်ဂပ်ဝ်ရ၊ ဒုသ်လေဝ်ဟၟဲအိုတ်ရ၊ ကြက်အာတ်လွဵုဂှ်ရ၊ ရဴဝွံနကြိဂရၚ်ပ္တီနေဝ် ယွံဝိသာခါ သြဝ်ဟီုညိ၊ ရဴဝွံသ္ဂးရ။

1. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန်ကုခမဳသၚ်သ္ၚာသၞုက်ဗြဲရကျာ်။
2. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန် အာဂန္တုကဘတ်ရကျာ်။
3. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန် ဂမိကဘတ်ရကျာ်။
4. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန် ပိဏ္ဍပါတ် ကုခမဳဂိယဲ ဂမၠိုၚ်ရကျာ်။
5. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန်ပိဏ္ဍပါတ် ကုခမဳမကၠောန် ၜိုတ်ညးမဂိယဲဂမၠိုၚ်ရကျာ်။
6. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နဝဳဂဥုဲကုညးဂိယဲဂမၠိုၚ်ရကျာ်။
7. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန် ယာဂုလၟိုန်ရကျာ်။
8. ယွံတၠဳပိုန် အဲဍိက်စဵုလ္အိတ်လမျီု စိုန်နွံပၟိက် တၞဟ်နကဵုဒါန် သ္ၚာသၞုက်ဗြဲ ကုဘိက္ခုနဳသၚ်ရကျာ်၊ ရဴဝွံဂရၚ်ပ္တီရ။

ကျာ်တြဲတုန်- ယွံဝိသာခါ- မူဖိုလ်နိသံသလွဵုဒ္စံါဂှ် တၠအဲညာတ်တုဲ အာတ်အဲကျာ်လွဵု(၈) သာ်ဂှ်ရော၊ ရဴဝွံသၟာန်တုဲ ဥပးဗြဴဝိသာခါ နကြိဂရၚ်ပ္တီ ဖိုလ်နိဿံသလွဵု ၈ သာ်နေဝ် ယွံ ဝိသာခါ ခိုဟ်သန်ကွေံရ၊ ခိုဟ်သန်ကွေံရ၊ ယွံဝိသာခါ တၠအဲညာတ်ဖိုလ် အနိသံသဗွဲမ္ဒးရးတုဲ အာတ်အဲကျာ်လွဵု ၈ သာ်ရ၊ ရဴဝွံ သ္ဂးတုဲ ယွံဝိသာခါ လွဵု ၈ သာ်ဂှ် အဲကျာ်ကဵုအခေါၚ်ကုတၠ အဲရ၊ ရဴဝွံကျာ်တြဲသဗ္ဗညု ကဵုလွဵု ၈ သာ်တုဲ သ္ပအနုမောဒနတုဲ က္ညအာရ။

ကာလဂှ် နွံကာလမွဲတ္ၚဲ နကြိပဒတဴပ္ဍဲဘာပုဗ္ဗာရာံနေဝ် ခမဳဂမၠိုၚ် က္တဵုဗဒှ်ဂလာန်ပ္ဍဲဇြပ်သ္ဘၚ်ဓရ်အိုတ်ရ၊ ယွံကောန်တၠတံ ဥပးဗြဴဇၞော် ဝိသာခါဂှ် ၜိုန်ရမတန်တဴပ္ဍဲဒဒှ်ညးဗြဴကီုလေဝ် ကၠိဂွံလွဵု ၈ သာ် ပ္ဍဲဇရေၚ်ကျာ်တြဲရ၊ ဂုဏ်ဂၠိုၚ်ကွေံရသွံ။ ရဴဝွံက္တဵုဗဒှ်ဂလာန်အိုတ်ရ။ ကျာ်တြဲသဗ္ဗညုက္ညကၠုၚ်တုဲ ယွံခမဳတအ် ပ္ဍဲကာလလၟုဟ် မူရဴနဂလာန်မွဲ ကောံဓရီုဒၟံၚ်အိုတ်ရော ရဴဝွံသၟာန်တုဲ နဂလာန်မဟိမုဝွံ ကောံဓရီုဒၟံၚ်အိုတ်ရအဴ၊ ရဴဝွံနကြိဂရၚ်ပ္တီနေဝ် ယွံခမဳတံ ပ္ဍဲကာလၟုဟ်ဟေၚ် ဝိသာခါကၠိဂွံလွဵု ၈ သာ် နူဇရေၚ်အဲကျာ်ဟွံသေၚ်ဏီ ပ္ဍဲကာလကၠာတေံကီုလေဝ် ဝိသာခါဝွံ ကေၚ်ကၠိဂွံဟေၚ်ရောၚ်၊ ရဴဝွံသ္ဂးတုဲ ဇက်နၚ်ဇာတ်အတိက်ရ။

ဝတ္တုအတိက်

ပ္ဍဲကာလအတိက်တေံ ပ္ဍဲဍုၚ်မိတ္ထဵု သၟိၚ်မၞုံယၟု သုရုစိ နကြိပ္ကၚ်ရၚ်ဍုၚ်နေဝ် ကၠိဂွံကောန်တုဲ သုရုစိကုမာ ရဴဝွံ ခုတ်ယၟုကုကောန်ဂှ်ရ၊ ကောန်သၟိၚ်ဂှ် နကြိအာစိုပ်အဝယ်ဗၠာဲနေဝ် ကြက်ကတ်ကွတ်ပ္ဍဲဍုၚ်တက္ကသိုလ်ရ။ ရဴဝွံအာတုဲ ဂဇအ်ဒၟံၚ်ပ္ဍဲဇြပ်တြၚ်ဍုၚ်တက္ကသိုလ်ရ။ ကောန်သၟိၚ်မၞုံယၟု ဗြဟ္မဒတ္တ မဒှ်ေကာန်သၟိၚ်ဍုၚ်ဗာရာဏသဳကီုလေဝ် တုပ်တဴညံၚ်ရဴသာ်ဂှ်ဟေၚ် အာဍုၚ်တက္ကသိုလ်တုဲ ဂဇအ်ဒၟံၚ်ပ္ဍဲဂတဵုကောန်သၟိၚ်သုရုစိဂဇအ်ရ။ ကောန်သၟိၚ်ၜါဂမၠိုၚ်ဂှ် သၟာန်တဴကေုာံရေၚ်သ္ကံတုဲ လုပ်လၟိဟ်ညးတံအာဇရေၚ်အ္စာမွဲစွံတုဲ ကဵုသွက်အ္စာစတုဲ ကတ်ဗ္တောန်ကွတ်ဟွံလအ်ကာဖာ ယၚ်ဒဒှ်မၞုံကွတ်မကတ်ဗ္တောန်လဝ်တုဲအိုတ်ဂှ်ဒှ်တုဲ ပ္တီအ္စာတုဲ တိတ်အာတြဴမွဲစွံမွဲခဏတုဲ သီုမဒတဴဒၟံၚ်ပ္ဍဲဂၠံၚ်တရဴၜါဒစာ် မိန်ကံကေုာံရေၚ်သ္ကအ်တုဲ တၞဟ်နမၚ်မွဲဒ္ဂေတ်ဓရ်မိဿဟာဲ သ္ပတဴကတိကဝတ်အိုတ်ရ။ ယဝ်အဲဂွံကောန်တြုံ မ္ဂး ကောန်ဗြဴက္တဵုဒှ်ကုတၠအဲမ္ဂး ကောန်တြုံကီုလေဝ် ယဝ်က္တဵုဒှ်ကုတၠအဲမ္ဂး ကောန်ဗြဴကီုလေဝ် ယဝ်က္တဵုဒှ်ကုတၠအဲမ္ဂး ကြက်သ္ပမ္ၚဵုထပ်တဲကုကောန်တြုံကောန်ဗြဴဂမၠိုၚ်ဂှ်အိုတ်ရ။ ရဴဝွံသ္ပတဴကတိကဝက်အိုတ်ရ။

ကောန်သၟိၚ်ဂမၠိုၚ်ၜါဂှ် နကြိဒှ်သၟိၚ်အိုတ်နေဝ် သၟိၚ်ဇၞော်သုရုစိကလိဂွံကောန်တြုံရ၊ သုရုစိကုမာရဴဝွဴ ခုတ်ယၟုကုကောန်သၟိၚ်ဂှ်အိုတ်ရ၊ သၟိၚ်ဇၞော်ဗြဟ္မဒတ္တ ကလိဂွံကောန်ဗြဴရ၊ သုမေဓါရဴဝွံခုတ်ယၟုကောန်သၟိၚ်ဗြဴဂှ်အိုတ်ရ၊ သုရုစိကုမာ နကြိအာစိုပ်အဝယ်ဗၠာဲနေဝ် အာဍုၚ်တက္ကသိုလ် ကတ်ကွတ်တုဲ ကၠေၚ်စဴကၠုၚ်ရ၊ မအံက်သၟိၚ်ဇၞော်သၟိက်စဝ်ဘိသေက်သုရုစိကုမာပ္ဍဲဒဒှ်သၟိၚ်တုဲ ကုမိဿဟာဲအဲသၟိၚ်ဍုၚ်ဗာရာဏသဳ ကောန်ဝုတ်နွံသဒှ်ရ။ ကောန်ဝုတ်သၟိၚ်ဂှ်ဟေၚ် ကြက်ဗဂၞကျာ်ဇၞော်ကောန်အဲရ၊ ရဴဝွံ တၞဟ်နဖိုလ်ကောန်ဝုတ်သၟိၚ်ဍုၚ်ဗာရာဏသီ ကဵုပရၚ်ကၟာဲဗွဲမဂၠိုၚ်တုဲ စကာဏာအမာတ်ဂမၠိုၚ်ရ။

ကၠာအမာတ်ဂမၠိုၚ်ဂှ်ဟွံကၠုၚ် သၟိၚ်ဍုၚ်ဗာရာဏသဳသၟာန်ဂၞကျာ်ရ၊ ယွံဂၞကျာ်မူဂှ် ဒှ်တဴဒဒိုက်မလောန် ကုညးဗြဴဂမၠိုၚ်ဂှ်ရော၊ ရဴဝွံသၟာန်ရ၊ ယွံသၟိၚ်ဇၞော် ပ္ဍဲတြုံတၠသ္ၚိမွဲဓဝ် မၞုံသမ္ဘာမဂၠိုၚ်ဂှ် ညးဗြဴဂမၠိုၚ်ဒှ်တဴဒဒိုက်ဗွဲမလောန်ရ၊ ရဴဝွံဂရၚ်ပ္တီရ။ ယွံဂၞကျာ် ယဝ်ရဒှ်သာ်ဂှ်မ္ဂး ကောန်ဝုတ်အဲမွဲ မဒှ်ကောန်ဗြဴသၟိၚ်မၞုံယၟု သုမေဓာဂှ် ကဵုတိတ်ဗၠးနူဒဒိုက်ဂှ်တုဲ ယြဴညးမွဲဂိုၚ်ကေတ်သုမေဓာဏအ်မွဲဟေၚ်ရ။ ကြက်ကဵု ကုညးဂှ်အိုတ်ရ။ ရဴဝွံဟီုရ၊ အမာတ်သၟိၚ်ဇၞော်သုရုစိဂမၠိုၚ် ကၠုၚ်အိုတ်တုဲ နကြိဂိုၚ်ကေတ်ကောန်ဝုတ်သၟိၚ် မၞုံယၟုသုမေဓာနေဝ် ယွံအမာံတအ် အဲဂှ်ပ္ဍဲကာလကၠာတေံ ပွမဒုၚ်လဝ်အဝန်ကုမိဿဟာဲ သ္ပတဴဒှ်ကွေံရ။ ၜိုန်ရသ္ပတဴသာ်ဂှ်ကီုလေဝ် ပိုယ်ညးဂမၠိုၚ် ကောန်ဝုတ်သၟိၚ်သုမေဓာဝွံ ပ္ဍဲအဒေါဝ်ဂကောံညးဗြဴဂမၠိုၚ် ဟွံမိက်ဖျေံအိုတ်ရ။ ယြဴညးမွဲ ဂိုၚ်ကေတ်သုမေဓာဏအ်မွဲဟေၚ်ရ၊ မမိက်ကဵုကုညးဂှ်အိုတ်ရ ရဴဝွံဟီုရ၊ အမာတ်ဂမၠိုၚ်ဂှ် ဗလးဏာဇရေၚ်သၟိၚ်ဇၞော် သုရုစိအိုတ်ရ။

သၟိၚ်ဇၞော်သုရုစိတုန်- တွဵုရးဍုၚ်ပိုယ်ဇၞော်လှဲလောန်ရ၊ ဍုၚ်မိတ္ထဵုမၞုံဗၞတ်ထပှ်ယောဇနာရ၊ အပိုၚ်အခြာတွဵုရးဍုၚ်တုန် - မၞုံဗၞတ်ပိကၠံယောဇနာရ၊ နအပိုၚ်အြခာအောန်အိုတ် တၞဟ်နကၠိဂွံညးဗြဴမွဲမဟာလ္ၚီတြဴလ္ၚီကြိုတ်ရ၊ ရဴဝွံဟီုတုဲ ဟွံသ္ဍိုက်မၠိုက်ရ၊ ကောန်သၟိၚ်သုရုစိတုန် ဂွံမိၚ်ကေတ်ကောန်သၟိၚ်ဗြဴ သုမေဓာမဍိုက်ပေၚ်တဴ ကေုာံ ရုပ်သာ်မဂေါဝ်ဆာဲတုဲ နမဟုဲဟှ်တဴမ္ဂး ပွမမိၚ်ထၞေန်စပ်တုဲ အဲကေတ်ကောန်ဗြဴသၟိၚ်သုမေဓာမွဲဟေၚ်ရ၊ အဲဟွံမွဲပၟိက်နဂကောံညးဗြဴဂမၠိုၚ်ရ၊ ကောန်ဗြဴသၟိၚ်သုမေဓာဂှ်ဟေၚ် ရၚ်တၠုၚ်နေၚ်ရ၊ ရဴဝွံဗလးဏာကမိမဂမၠိုၚ်ရ။

မိမဂမၠိုၚ် ဟွံပလီုကၠေံစိုတ်ကောန်တုဲ ကဵုပလံၚ်ဏာဒြပ်ဂမၠိုၚ်မဂၠိုၚ်တုဲ နတွဵဝါရဗော်သွးဂမၠိုၚ် ရၚ်တၠုၚ်နၚ်ကောန်ဗြဴသၟိၚ်သုမေဓာပဂၞကျာ်ဇၞော် သုရုစိကုမာတုဲ မွဲဒမြိပ်ဓဝ် စဝ်အဘိသေက်အိုတ်ရ၊ ကောန်သၟိၚ်ဂှ် ဒှ်သၟိၚ်ဇၞော်မၞုံယၟု သုရုစိတုဲ သီုမပ္ကၚ်ရၚ်ဍုၚ်ဗဗွဲဓရ် မွဲဟာန်ကေုာံဂၞကျာ်သုမေဓာ နပွမမံၚ်တဴဗွဲမသ္ဍိုက်ဆာန်မံၚ်တဴအိုတ်ရ၊ ဂၞကျာ်သုမေဓာတုန် လုကဴမွဲမဟာလ္ၚီသၞာံ ၜိုန်ရမံၚ်တဴပ္ဍဲနန်သၟိၚ်ဇၞော်သုရုစိကီုလေဝ် ဟွံကလိဂွံကောန်ဟေၚ်ရောၚ်။ ကာလဂှ် ကောန်ဍုၚ်ဂမၠိုၚ် ကောံဓရီုအိုတ်တုဲ က္ညာၚ်တဴပ္ဍဲဂၠးမုက်ရၚ်သၟိၚ်အိုတ်ရ၊ ပွမက္ညာၚ်ဒၟံၚ်ဝွံတုန် ပသာ်ရော ရဴဝွံနကြိဟီုနေဝ် ဒုဟ်ဟွံမွဲကုသၟိၚ်ရ၊ ဗွဲစၟတ်တုန် ကောန်မလေပ်မံၚ်မွဲတၞောဝ်ဒတောဝ်ဟွံမွဲကုသၟိၚ်ဇၞော်ရ။