သဳလတေဇ၊ဘဒ္ဒန္တ၊ဒံက်တာ
| ဘဒ္ဒန္တသဳလတေဇ | |
|---|---|
 ဗီုရုပ် ဒံက်တာသဳလတေဇ (သၞာံ ၂၀၁၉) | |
| သၠးဂၠံဂဝ် | နဝ်ဝေမ်ဗါ ၁၊ ၁၉၈၅ သက္ကရာဇ် ၁၃၄၇-သၞာံ၊ ဂိတုဝှ် (၃)စွေက်၊ တ္ၚဲသိုက် ကွာန်ကြုက်ပိ၊ ပွိုင်ဍုင်ဇြပ်ဗု |
| ဂကူ |  Mon မန် |
| ကဆံင်ပညာ | ပါရဂူ (Ph.D.) |
| ဌာန်ပညာ | တက္ကသိုလ် မဟိဍန် (Mahidol University) |
| အံက် | နာဲလောင်၊ မိခေန်ရှိန် |
| ဂယိုင်လမျီု | ကျာ်ဇၞော်နွံပိုန် ဘာဗုဒ္ဓရက္ခိတ ကထိက၊ ရာမညရဋ္ဌ ဗုဒ္ဓတက္ကသိုလ် |
တၠဂုဏ်အ္စာ သဳလတေဇ (ဇာတိကွာန်ကြုက်ပိ၊ ပွိုင်ဍုင်ဇြပ်ဗု) ဝွံ ဒှ်ကျာ်ဇၞော် နွံပိုန် ဘာဗုဒ္ဓရက္ခိတ ကွာန်လှာကမိုန်၊ ဍုင်စက်စာဲ ကေုာံ ယိုက်ဂၠေင်ဒၟံင် တာလျိုင် နဒဒှ် အစာကထိက ပ္ဍဲ ရာမညရဋ္ဌ ဗုဒ္ဓတက္ကသိုလ် ရ။ တၠဂုဏ်အ္စာဝွံ ဒှ်ညးမကလိဂွံ ဗြးမဟိမု ပါရဂူ (ဒံက်တာ) နူကဵု တက္ကသိုလ်မဟိဍန် (Mahidol University) ဍုင်သေံ ပ္ဍဲသၞာံ ၂၀၁၉ နကဵုဘာသာ ကတ်လ္ၚတ်ဘာသာ Religious Studies, CRS တုဲ၊ ပ္ဍဲပညာပရိယတ်ဂှ်လေဝ် ကလိဂွံလဝ် တဆိပ်ကြာသာသနာဓဇဓမ္မာစရိယ ရ။
ပထမအဝဲ
[ပလေဝ်ဒါန် | ပလေဝ်ဒါန် တမ်ကၞက်]တၠဂုဏ်အ္စာ သဳလတေဇဝွံ ပ္ဍဲသက္ကရာဇ် ၁၃၄၇ သၞာံ ဂိတုဝှ် ၃ စွေက်ဂှ် က္တဵုဒှ်မၞိဟ် နူဇရေင်မိမၜါ နာဲလောင် ကေုာံ မိခေန်ရှိန် ပ္ဍဲကဵုအရာပ်ဗၟံက် ကွာန်ကြုက်ပိ၊ ပွိုင်ဍုင်ဇြပ်ဗု၊ တွဵုရးဍုင်မန်ရ။
ပ္ဍဲကဵုသက္ကရာဇ် ၁၃၅၇ ဂှ် မိမၜါကီု သီုကဵုအပါဇၞော် နာဲဇြပ်ဗု မိဇၞော်မိစောထုင် ဂမၠိုင် ယိုက်ဒိုက်ထံက်ပင်တုဲ ဂွံက္တဵုဒှ်ကၠုင်သာမဏဳ ဇရေင်ကျာ်ဇၞော်အ္စာညာဏရံသဳ ဘာကျာ် ကွာန်ကြုက်ပိရ။ ဗၞတ်မွဲသၞာံ ဂိုင်ကေတ်တဴသဇိုင်ပရိယတ်၊ နူဇရေင်ကျာ်ဇၞော်အ္စာ ကေုာံ တၠဂုဏ်အ္စာဂမၠိုင် ပ္ဍဲဘာကျာ်ကွာန်ကြုက်ပိရ။
ပ္ဍဲကဵုသက္ကရာဇ် ၁၃၅၈ ဂှ် ကရောံအ္စာ နာဲသိရိန္ဓရ၊ အာကတ်လိက် ပ္ဍဲတိုက်လိက်ဘာမဟာယျေန်၊ ကွာန်ကဒဵု၊ ပ္ဍဲဇရေင်ကျာ်ဇၞော်အ္စာတၠတြေံ အဘိဓဇမဟာရဋ္ဌဂုရ ဘဒ္ဒန္တ အာဒိစ္စကီု သီုကဵုအ္စာလိက် ပ္ဍဲတိုက်လိက်ဂှ် ဗွဲမဂၠိုင်ကီုရ။ ပဒတဴပ္ဍဲဘာမဟာယျေန် ကွာန်ကဒဵု ဗၞတ်ပိသၞာံ ဂွံအံင်ဇၞးကေတ်-
- တန်ဥပစာ
- တန်မူလ
- တန်ဍောတ်
ပ္ဍဲသက္ကရာဇ် ၁၃၆၁ ဂှ် အာပပဒတဴ ဘာပုပ္ဖါရာမ (ဘာပဝ်တဝ်မူ) ဍုင်မုဟ်ဍုင် ဇရေင်ကျာ်ဇၞော်အ္စာ သဳဟရာဇာ ရ။
- သၞာံ ၁၃၆၁ - အံင်ဇၞး တန်ဒေါဝ်
- သၞာံ ၁၃၆၂ - အံင်ဇၞး တန်ဇၞော်
- သၞာံ ၁၃၆၆ - ကလိဂွံတဴ တဆိပ်ကြာ သာသနာဓဇဓမ္မာစရိယ (ပဒတဴပ္ဍဲဘာကျာ်သြဳမန် ဍုင်လ္ဂုင်)။
ပ္ဍဲကဵုသက္ကရာဇ်ဍုင် ၁၃၆၆ သၞာံ ဂိတုမာ် ၆ မံက်ဂှ် ဒုင်သဇိုင်ကဵု ပစ္စယာနုဂ္ဂဟ မိမၜါကီု သီုကဵုကလောကောဒေံမသဂမၠိုင်တုဲ ဂွံက္တဵုဒှ်ကၠုင် ဘဝခမဳမပြဲပြဲ ပ္ဍဲခဏ္ဍသဳ ဘာကျာ် ကွာန်ကြုက်ပိရ။
နာဲသဳလတေဇဝွံ ပညာပရိယတ် ဗွဲမထေက်ကြိုက် ဂွံအံင်ဇၞးကေတ်တုဲ သွက်သ္ဂောံကတ် ဘာသန္တရဂှ် ဒုင်ကၠုင်ကွးနူဇရေင်ပါမောက္ခတြေံ ကျာ်ဇၞော်အ္စာကောသလ္လ (ကျာ်ဇၞော်ဘဳအေ) ဘာသုခကာရဳ၊ အရာပ်မဟာစေတဳ၊ ဍုင်ဗဂေါကီု၊ ကျာ်ဇၞော်အ္စာဝါရလင်္ကာ၊ ဘာဂြိုပ် ကွာန်ပါင်ကၟာ ပွိုင်ဍုင်မုဟ်ဍုင်တအ်ကီုရ။
တရဴကတ်ပညာ မဟာဝိဇ္ဇာ
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲသက္ကရာဇ် ၁၃၆၉ အာကတ်လိက် ပ္ဍဲတကအ်လင်္ကာ၊ ဍုင်သိင်ဃဵုတုဲ ဂွံအံင်ဇၞးကေတ် တန်မဟာဝိဇ္ဇာ (Master's Degree) နူတက္ကသိုလ်ကေလနဳယ (University of Kelaniya) ရ။ ပဒတဴပ္ဍဲဍုင်သိင်ဃဵု ဒုင်သဇိုင်ဍာ်ရှ်ပညာ နူအ္စာဍုင်သိင်ဃဵုမဂၠိုင် ပပ္တံနူကဵု အ္စာသနာတ် နာနာယက္ကရာ ကီု မဒှ်ကီုရ။
တရဴကတ်ပညာ ဓမ္မပါရဂူ
[ပလေဝ်ဒါန် | ပလေဝ်ဒါန် တမ်ကၞက်]ဗွဲကြဴ သက္ကရာဇ်ဍုင် ၁၃၇၂ ပြံင်စိုပ်အာ ဍုင်သေံတုဲ နူသက္ကရာဇ် ၁၃၇၅ စိုပ် ၁၃၈၀ ဗၞတ်မသုန်သၞာံ တိုန်တဴ တန်ဗ္တောန်ကီု သီုကဵုချူခၞံတဴပြကိုဟ်မွဲ မၞုံယၟု "တၟေင်အခိုက်ကၞာသ္ဘင်ဖျဴသွဝ် ဂိုဏ်ဓမ္မယုတ္တိနိကာယ ကေုာံ ဂိုဏ်ရာမညနိကာယ" တုဲ နူတက္ကသိုလ်မဟိဍန်၊ ဍုင်သေံ၊ ဌာနလ္ၚတ်သာသနာဂှ် ဇိုန်ကဵုတဆိပ်ကြာ ဓမ္မပါရဂူ (Ph.D in Buddhist Studies) ရ။
မနွံပိုန်ဘာ ကေုာံ ယိုက်ဂၠေင်တာလျိုင်
[ပလေဝ်ဒါန် | ပလေဝ်ဒါန် တမ်ကၞက်]တၠဂုဏ်အ္စာသဳလတေဇဝွံ ယိုက်ဂၠေင် နဒဒှ်ကျာ်ဇၞော်အ္စာ နွံပိုန် ဘာဗုဒ္ဓရက္ခိတ ကွာန်လှာကမိုန်၊ ဍုင်စက်စာဲတုဲ ပတန်တဴသာသနာ နကဵုပရိယတ္တိသာသနာ ကေုာံ ပဋိပတ္တိသာသနာရ။
ပါဲနူဂှ်ပၠန် သွက်ဂွံသၠုင်ပ္တိုန် ကဆံင်ပညာသင်မန်ဂမၠိုင်တုဲ တၠဂုဏ်အ္စာဝွံ ယိုက်ဂၠေင်ဒၟံင် တာလျိုင် နဒဒှ် အစာကထိက (Lecturer) ပ္ဍဲကဵု ရာမညရဋ္ဌ ဗုဒ္ဓတက္ကသိုလ် ကီုရ။ နကဵုပရေင်ပညာမပြဲပြဲဝွံ ယိုက်ဂၠေင်တဴ တာလျိုင် ဂကူဘာသာ၊ သာသနာ ဗွဲတသိုက်စိုတ်၊ တသိုက်ကာယရ။