သွက်ဂွံထိၚ်ဒဝ်
သွက်ဂွံထိၚ်ဒဝ်အာ
အရေဝ်၊ လိက်ပတ်၊ ယေန်သၞာၚ်တုဲ
ကၠောန်ဗဒှ် တ္ၚဲအ္စာကဝိမန်
မရနုက်ကဵု (၄) ဝါ အပ္ဍဲဍုၚ်လၟိုၚ်
∆∆∆∆∆∆∆∆∆∆∆∆∆∆∆∆∆∆∆∆∆∆∆∆
သ္ပအစောံကဵု တ္ၚဲကျာ်ဇၞော်အ္စာစွောံ ချူခၞံလဝ် ပြကိုဟ်လောကသိဒ္ဓိ အပ္ဍဲသက္ကရာဇ်ဍုၚ်(၁၁၀၂) ဂိတုမာ်(၃)မံက်တေံတဲု အပ္ဍဲကဵုဂိတုမာ်(၃)မံက် ဂိတုဂျာန္နဝါရဳ(၂၇) ၂၀၂၀ ဗ္တမ်ဂှ် ကၠောန်ဏာအသေအဟာန် တ္ၚဲအ္စာကဝိမန် မရနုက်ကဵု (၄) ဝါ အပ္ဍဲသၠာတ်ကျာ်ကေလာသ ဍုၚ်လၟိုၚ် ပွိုၚ်ဍုၚ်ရေဝ်သၟဝ်ကျာရ။
တ္ၚဲအ္စာကဝိမန် မရနုက်ကဵု (၄) ဝါဝွံ နူကဵုဂကောံအ္စာကၞေဟ်မန်တအ် မံက်တိုန်ကၠုၚ်တုဲ သၞာံဏအ်မ္ဂး ဒှ်သၞာံကၠောန်ဗဒှ်အပ္ဍဲသၠာတ် အလန်ကိုပ်ကၠာအိုတ်တုဲ၊ ပရောအသေအဟာန် တ္ၚဲအ္စာကဝိမန်ဂှ် ပ္တိုန်ထ္ၜးဏာရ။
ပေါဲပြိုၚ်လိက်ပတ်မန်
အပ္ဍဲကဵုအသေအဟာန် တ္ၚဲအ္စာကဝိမန်ဂှ် ဂိတုမာ်(၂)မံက် (၂၆-၁-၂၀၂၀) အခိၚ်တ္ၚဲဂှ် ကၠောန်ဗဒှ်ပေါဲပြိုၚ်လိက်ပတ်မန် ပြိုၚ်ချူလိက်ဇၟန်ရ၊ အပ္ဍဲကဵုပေါဲပြိုၚ်ချူဇန်လိက်ကဗျ-လိက်ဇၟန်ဂှ် ကွးဘာဗၞတ်(၉၀)တၠတအ် ကၠုၚ်ပြိုၚ်ချူအိုတ်ရ။
အပ္ဍဲကဏ္ဍပြိုၚ်ချူဇန်ကဗျဂှ် ပရေၚ်ဝၚ်ကျာ်ဇၞော်အ္စာစွောံ ပရေၚ်လိက်ပတ်မန်၊ ပရေၚ်ဍုၚ်ကွာန်မန် နူကဵုကမ္မတဳကၠောန်ဗဒှ်တအ် ကဵုလဝ်က္ဍိုပ်လိက် (၃) က္ဍိုပ်တုဲ ညးလုပ်ပေါဲပြိုၚ်တအ် ဆန္ဒပၟိက်စိုတ်ကဗျဟွံသေၚ်မ္ဂး လိက်ဇၟန်ကဵုချူဇန်ရ။
ဂိတုမာ်(၂)မံက် အခိၚ်တ္ၚဲစေၚ် (၁:၃၀) ဂှ် ကဵုအခေါၚ်ပြိုၚ်တုဲ စိုပ်အခိၚ်တ္ၚဲသဝ် (၃:၃၀)ဂှ် သီတၞးလိက်သှ်ရ၊ ကပှ်သီကေတ်တၞးလိက် သှ်နူညး လုပ်ပေါဲပြိုၚ်လိက်ပတ်တအ်တုဲဂှ် ဂကောံစၟဳစၟတ် ကဵုစၟတ်ဂမၠိုၚ် သ္ပပ္တမ်နူအာစာကၞေဟ်(သၚ်) အံၚ်သူ (သုဝဏ္ဏဘူမိ) အ္စာကၞေဟ်(သၚ်) အဲနာဲ-ပညာစိုတ်၊ အ္စာကၞေဟ်နာဲအံၚ်ဇၞး၊ အ္စာကၞေဟ်ဗညာဂ္ဇအ်၊ အ္စာကၞေဟ်လျးရတ်၊ (ဂၚ်ယျၚ်) အ္စာကၞေဟ်တၟးဖၠၚ်၊ အ္စာကၞေဟ် အံက်သာ၊ အ္စာကၞေဟ် ဟံၚ်နန်၊ (ပါၚ်ကၟာ) စၟဳစၟတ်တဴရ။
ဗီုပြၚ်စၟဳစၟတ်လိက်ဂှ် ဒုၚ်သ္ဇိုၚ်လ္တူတၚ်နၚ် လက္ချဏ်ပ္တိတ်လဝ်(၄)တၚ်တဲု ကဵုစၟတ်ရ၊ ကဏ္ဍကဗျမ္ဂး မအက္ခရ် ဒးဍာံဂၠိုၚ်ရောၚ်၊ ဂၠိုၚ်အိုတ်(၁၆)ပၞောန် ဒးဒှ်ရောၚ်၊ သာ်ဝွံပ္တိတ်လဝ်ဗီုပြၚ်ကဵုစၟတ်ရ၊ မွဲတၚ်မ္ဂး ပတံနူ(၃) စၟတ်ဂၠိုၚ်အိုတ် ဒဵုကဵု (၅)စၟတ်တုဲယဝ်စၟတ်ပေၚ်မ္ဂး (၂၀) စၟတ်ရ။
ဗီုဂှ်ကီု ကဏ္ဍလိက်ဇၟန်ဂှ် အောန်အိုတ် စက္ခူA4 ၜါမုက်တုဲ ဂၠိုၚ်အိုတ် ဒဵုကဵုA4(၄)မုက် ဒးပေၚ်ရောၚ်၊ ပရူက္ဍိုပ်လိက်ဒးပ္တဝ်ရောၚ်၊ ချူလဝ် ပိုဒ် ဝါကျ ဒးဍာံဂၠိုၚ်ရောၚ်၊ မအက္ခရ်လေဝ် ဒးဍာံဂၠိုၚ်ရောၚ်၊ လၟိဟ်စၟတ်ဂှ် ပံၚ်စၟတ် (၂၀) ရ၊ လ္တူဂှ် အ္စာကၞေဟ် ဂကောံစၟဳစၟတ် ကဵုစၟတ်ဂမၠိုၚ်တအ် ခါတ်အကာဲတုဲ ကဵုအာစၟတ်ရ။
အပ္ဍဲကဵုပေါဲပြိုၚ် ချူဇန်လိက်ကဗျဂှ် မိထဝ်သြန် နူကွာန်တံၚ်ပရၚ် ပံၚ်စၟတ် ဂွံ(၁၉)စၟတ်တုဲ ကလိဂွံလာဘ်ပထမရ၊ မာံခၟောံဆာန်ကွာန်ဒူရာ ပံၚ်စၟတ် (၁၉)စၟတ်(က္ဆံၚ်သဝ်ညိ) ကလိဂွံလာဘ်ဒုတိယ၊ မိယေန်ဆာန် ကွာန်တံၚ်ပရၚ်ဂှ် ဂွံ(၁၈) စၟတ်တုဲ ကလိဂွံလာဘ်တတိယရ၊ မိသ္ဇၚ်ဗြဲဍုၚ်လၟိုၚ်ဂှ် ဂွံ(၁၈)စၟတ် လာဘ်သ္ဍိုက်စိုတ်ကဵု မိစန္ဒာဆာန်ကွာန်တံၚ်ပရၚ်ဂှ် ဂွံ(၁၇)စၟတ် ဂွံသ္ဍိုကခစိုတ်ရ၊
ကဏ္ဍလိက်ဇၟန်ဂှ် မိကျေဝ်ဆာန်သိုက် နူကွာန်ပုပ္ဖဝတဳ(ဒဵုတၟအ်ဗြာတ်)ဂှ် ကလိဂွံစၟတ်(၁၉)စၟတ်တုဲ ကလိဂွံလာဘဘ်ပထမရ၊ မာံမန်ဇေတ် ကွာန်ဝါရက် (ဇြပ်ဗု) ဂှ်ဂွံစၟတ်(၁၉)စၟတ်က္ဆံၚ်သဝ်ညိ)တဲု ဒုတိယ မိအးမန် ကွာန်ပုပ္ဖဝတဳဂှ် ဂွံ(၁၈)စၟတ် လာဘ်တတိယ မိရတ်ဂေါဝ် ကွာန်ကအ်ဍောတ်ဂှ် ဂွံ(၁၇)စၟတ် ဂွံသ္ဍိုက်စိုတ် မာံမန်သိုက် ကွာန်တံၚ်ပရၚ်ဂှ် ဂွံ(၁၉)စၟတ် ကလိဂွံလာဘ်သ္ဍိုက်စိုတ်ရ။
ပေါဲပြိုၚ်ဟီုတွံလိက်ပတ်မန် (ဂလာန်ပေါရာဏာံ ပေါရဒါံ)
ဗ္တမ်မာ်(၂)မံက်ဂှ် ပံက်အသေအဟာန် ဒစးဒုၚ် တ္ၚဲအာစာကဝိမန်တုဲ ခေပ်ဇုက်ဗၠဲရ ပံက်အသေအဟာန်တုဲဂှ် စပ္တမ်အစဳဇန် ပေါဲပြိုၚ်ဟီုတွံလိက်ပတ်မန် (ဂလာန်ပေါဂဏာံပေါရဒါံ)ဂှ် (၁) ကမွဲသအုဲ အုဲသီုဂၠုၚ် (၂) ကျာ်လီုဂုန်ဇြဲ မၞိဟ်လီုဂုန်ရဲ (၃) စၠန်ဇေတ် ဟွံထောံသၟူ မၞိဟ်ဇေတ် ဟွံထောံဂကူ (၄) ဇုက်သ္ကဲဟွံပြဲနူဇုတ်ဇၞော် (၅) တီဒ်ှဂမ္တဴ ဟွံတီအီစဴ (၆) ဗီုဇကုချိၚ် သၟိၚ်ဟွံစၟတ် (၇) လီုထာဝရ ပဠေဝ်မွဲခဏ (၈) အရေဝ်ဂှ်ဖ္အောန် ကမၠောန်ဂှ် ဟလိုၚ် အရေဝ်လောန် ကောန်ဒးကဵုစညး (၁၀) ပညာနွံကီု သတိလီုဒှ်။
အပ္ဍဲကဵုပေါဲဟီုတွံ လိပ်ပတ်မန် (ဂလာန်ပေါဂဏာံ ပေါရဒါံ)ဂှ် သၟတ်နူဒေသနာနာ (၆) တၠတအ် လုပ်ပေါဲပြိုၚ်ရ အပ္ဍဲဂှ် မိပ္ကဴမန် နူကွာန်တၟအ်ကၞေၚ် ပံၚ်ဂွံစၟတ် (၁၃၃) စၟတ်တုဲကလိဂွံလာပ်ပထမ မာံစဴဟံသာ ကွာန်တၟအ်ကၞေၚ် ပံၚ်ဂွံစၟတ်(၁၃၂) စၟတ်ဂှ် ဒုတိယ မာံမန်ဇေတ် ကွာန်ဝါရက်(ဇြပ်ဗု) ဂှ် ဂွံစၟတ်(၁၂၃) စၟတ် ဂွံလာဘ်တတိယရ ။
တုဲမ္ဂး အစဳဇန် ဝိုၚ်သဳကၠဳကဵု အကာဲအရာပရေၚ်ဂကုမန် တ္ၚဲဏအ်ဂှ် အ္စာကၞေဟ် (သၚ်) (အဲနာဲပညာစိုတ်) အ္စာကၞေဟ် အံက်သာ (တံၚ်ပရၚ်) အ္စာဗြဴမိအံၚ်ဇၞး (ဥက္ကဋ္ဌ ဂကောံအ္စာဘာမန်ခေတ်တၟိ ပွိုၚ်ဍုၚ်ရေဝ် သၟဝ်ကျာ) တအ် သဳကၠဳပ္တိုန်ထ္ၜးဏာ အကာဲအရာပရေၚ်လိက်ပတ်မန် ပရေၚ်ပညာမန် ပရေၚ်ဍုၚ်ကွာန်ဂကူမန်တ္ၚဲဏအ်ကီုရ။
တ္ၚဲအာစာကဝိမန် ဗတမ်မာ်(၃) မံက်
ကၠောန်အသေအဟာန်စၟတ်သမ္တီ တ္ၚဲအာစာကဝိမန်ရ အပ္ဍဲတ္ၚဲအ္စာကဝိမန်ဂှ် ဗှ်ဗၞုဟ်သ္ပဂါရဝ ဗှ်ဝၚ်ကျာ်ဇၞော်အ္စာစွောံကီုရ တုဲမ္ဂးဝိုၚ်သဳကၠဳ ပရေၚ်ထိၚ်ဒဝ်အရေဝ်လိက်ပတ်ယေန်သၞာၚ်မန် ပၠောန်အာပၠန်ရ အ္စာကၞေဟ် (သၚ်) အံၚ်သူ (သုဝဏ္ဏဘူမိ) အ္စာကၞေဟ် အံၚ်ဇၞး(ရုတ္တံၚ်) အ္စာကၞေဟ် ဗညာဂ္ဇအ် (ပ္ၚ) တအ် သဳကၠဳဏာ ပရေၚ်လိက်ပတ်ယေန်သၞာၚ်မန် ကီုရ။
အပ္ဍဲဝိုၚ်သဳကၠဳဂှ် အ္စာကၞေဟ်တအ် သဳကၠဳပ္တိုန်ထ္ၜး ပရေၚ်လိက်ပတ်ဂကူ ဆုတ်ယောၚ်စေှ်ဒၟံၚ်တုဲ ဂကူမန်အနာဂတ် သွက်ဒးဂွိၚ်ဂှ်ကီု ဂကူမန် သၟာပရေၚ်ဍုၚ်ကွာန်မန် ဟီုအရေဝ်မန်မ္ဂး ပြံက်နှဴအရေဝ်ဗၟာဂၠိုၚ်တုဲ ကောန်ညးဍုၚ်ကွာန် ညးဒေသလ္ၚဵုတအ်ဂှ် ဟီုအရေဝ်မန် ပြံက်နှဴဒၟံၚ်အရေဝ်ဗၟာ အရေဝ်သေံ (၃၀%) ပိစှော်က္ဍိုပ်ကၠမ် ပြၚ်ပြၚ်ဒၟံက်ရောၚ် အ္စာကၞေဟ်တအ် သဳကၠဳပ္တိုန်ထ္ၜးလဝ်ရ။
အ္စာကၞေဟ်တအ် သဳကၠဳတုဲဂှ် ပုရိသာဒ် တိုန်စိုပ်တအ် ထပ်သၟာန်သွဟ်ကုအ္စာကၞေဟ်တအ်ပၠန်ရ အပ္ဍဲကဵုဂကူမန် သွက်ဒးကၠေံကၠက်အာရောၚ်ဟီုဂှ် ဆလအ်ကၠက်ရော အရေဝ်ကဵု ဂကူဂှ် ဣလဵုကၠက်ကၠာရော ညးတိုန်စိုပ်တါ်သၟာန်ရ။
(အရေဝ်ကဵု ဂကူဂှ် အရေဝ်ကၠက်ကၠာ ဂတမတ်တ္ၚဲဏအ်ဂှ် ကောန်ဂကူပိုဲ ဟီုအရေဝ်မန်ပြံက်နှဴဂၠိုၚ်ကွေံကွေံမွဲတဲ ဂကောံသုတေသနတအ် ဟီုလဝ်ဂှ် ဂတနူဏအ် ပွိုၚ် (၃၀) သၞာံတေှ် ဂကူမန်သွက်ဒးကၠေံကၠက်ရ အပ္ဍဲဂှ်တေှ် အရေဝ် ကၠေံကၠက်ကၠာ အရေဝ် ကၠေံကၠက်ကၠာတဲုတေှ် ဂကူလေဝ်လအ်ညိ ဍေံကၠေံကၠက် ဗက်အာကီုရောၚ်) အ္စာအံၚ်ဇၞး သှ်ထ္ၜးရ။
စပ်ကဵုပရေၚ်ဂကူ ကၠေံကၠက်ဂှ်တုဲ အ္စာကၞေဟ်(သၚ်) အံၚ်သူ (သူဝဏ္ဏဘူမိ) ညးထပ်ဟီုတွံပၠန်ရ (လိက်ပတ်မန်ဂှ် ဍေံဟွံကၠက်အာပုဟ် ဆဂးညးဗှ်ဒးဟွံမွဲတေှ် တုပ်တဴကၠေံကၠက်ကီုရ ဗီုကဵုလိက်တၟပ်မန်လၟုဟ် လိက်တၟအ်မန်နွံဖိုဟ်လေဝ် ညးဗှ်ဒးအောန်လောန် ဂကူကၠက်ဟီုဂှ် ကၠက်အာ အတိုၚ်ဏအ်ဟွံသေၚ် မန်ဟွံဟီုအရေဝ်မန် မန်ဟွံလေပ်လိက်မန်တေှ် ကၠက်ရ ) သာ်ဝွံ အ္စာကၞေဟ် အံၚ်သူ (သုဝဏ္ဏဘူမိ) မြော်တဴရ။
တ္ၚဲအ္စာကဝိမန်ဂှ် လၟေၚ်အရိုဟ်ရိုဟ်သၞာံမ္ဂး ဂကောံအ္စာကၞေဟ်မန်တအ် ကၠောန်ကၠုၚ်မံၚ် အပ္ဍဲဘာ လကျာ် - အခန်ဗွိုၚ် ဘာလကျာ်တုဲ ဟွံဂွံကၠောန်အပ္ဍဲသၠာတ် မွဲလေှ်ဏီရ သၞာံမရနုက်ကဵု (၄) ဝါဏအ်ဂှ် ပံၚ်တောဲကဵုအာစာကၞေဟ် ညးဒေသ ပွိုၚ်တိုက်ဍုၚ်လၟိုၚ်တအ်တုဲ ကၠောန်ဗဒှ်ဏာ အပ္ဍဲသၠာတ်ကျာ် ကေလာသ ဍုၚ်လၟိုၚ်ရ။
အသေအဟာန်တ္ၚဲအ္စာကဝိမန်ဂှ် လၟေၚ်သၞာံဂတတေံလေဝ် ဂကောံအ္စာကၞေဟ်မန်တအ် ဗက်ပညဳပညပ်ကဵု ညးဒေသ ပွိုၚ်ဍုၚ်လဵု ဒုၚ်တဲကၠောန်မ္ဂး သွက်ဂွံဆက်ကၠောန်အာ ဗီုပြၚ်တ္ၚဲကောန်ဂကူမန်-တ္ၚဲသၟတ်မန်ကီုရောၚ် ညးတာလျိုၚ်တအ် ဟီုဂးလဝ်ရ။
တ္ၚဲအ္စာကဝိမန်ဂှ် အပ္ဍဲသက္ကရာဇ်ဍုၚ် (၁၃၄၇) သၞာံဂှ် နူကဵုကျာ်ဇၞော်အ္စာတၠ ပိဇကု(ကျာ်ဇၞော်အ္စာသိၚ်္ဃ၊ ကျာ်ဇၞော်အ္စာပါလိတ ကျာ်ဇၞော်အ္စာပုပ္ဖ) အာက္ဍိုပ်တုဲ ကၠောန်ဂွံတ္ၚဲအ္စာကဝိမန် အပ္ဍဲဇြပ်မန် ဍုၚ်မတ်မလီုဂှ် အဆက်ဆကိ ပွိုၚ်(၃)သၞာံတုဲ ဗွဲကြဴဂှ် ဟိုတ်နူဟိုတ်နာနာသာ်တုဲကီု ကျာ်ဇၞော်အ္စာသိၚ်္ဃ ကလိလောန်စဴအာသွဝ်ကီုတုဲ အသေအဟာန်တ္ၚဲအ္စာကဝိမန်ဂှ် ပိုတ်သ္ကုတ်အာရ။
အဆက်ဂှ် စိုပ်သက္ကရာဇ်(၁၃၇၃) သၞာံဂှ် နကဵုဂကောံအ္စာကၞေဟ် ဒေသရေဝ်သၟဝ်ကျာကဵု ဂကောံလိက်ပတ်မန် ပွိုၚ်တိုက်လၟိုၚ်တအ် ပံၚ်ကောံတုဲ ကၠောန်ဂွံအသေအဟာန် တ္ၚဲအ္စာကဝိမန် ပွိုၚ်(၃)သၞာံရ။
ဗွဲကြဴဏအ် ဂကောံအ္စာကၞေဟ်မန် မံက်ကၠုၚ်တုဲ စနူသၞာံ (၁၃၇၉) သၞာံ ခရေတ် (၂၀၁၇)ဂှ် စကၠောန်ကၠုၚ် အပ္ဍဲဘာဓါတ်ကျာ် ဍုၚ်ကၟာဝက်(၂)သၞာံ အဆက်ဆက်တုဲ သၞာံဂတဂှ် ကၠောန်ကၠုၚ်အပ္ဍဲဘာဓာတုမာလာ ဍုၚ်မတ်မလီုရ။
ကၞေဟ်-နာဲဝဏ္ဏမာန် (ဂကောံအ္စာကၞေဟ်မန်)
ပ္တိုန်ထ္ၜး-အမ်သဝ်နာဲ (အၜဝ်)
(05:34.PM.17.11.2021)