သၚ်မန်ကတ်ပညာသိရဳလၚ်္ကာ၊ဂကောံ၊ဝၚ်

ဂကောံမ္ဂးဂှ် က္ဍတ်ပါ်တိတ်ကၠုၚ် နူအကြာဆန္ဒ ဓဝ်ညဳသာပူဂိုလ်ဂမၠိုၚ်တုဲ ဒှ်လတေၚ်လမျီုကောန်ဂကူမွဲ မာန်ကီုရ။ အပ္ဍဲကောန်ဂကူမွဲမွဲ မပ္တံကဵုဂကောံသွာၚ်နာနာဟွံမွဲမ္ဂး ကောန်ဂကူဂှ် ဂွံဂျိုၚ်တန်တဴအာ ဍာ်ဇမၠိၚ်မာန်ဂှ် ဟွံလောဲသွာရ။ မွဲနဲပၠန်မ္ဂး ဂကောံဟီုဂှ် "က္ဍိုပ်စှ် ဂၞန်မွဲ"ရ။ နူမၞိဟ်ဏှ် မၞိဟ်ဂမၠိုၚ်ဂှ် ပံၚ်ပကောံလဝ် မွဲကသပ်ဂၞန် မွဲလညာတ်ရ။ လညာတ်ဆန္ဒ နူပူဂိုလ်ဂမၠိုၚ်ဂှ် ပံၚ်ပကောံတုဲ စွံလဝ်တၚ်ပတဝ်က္ဍိုပ်မွဲရ။ ဥပမာညံၚ်ရဴဂလာန်မန် တြေံဟီုစ " ဍိုက်မွဲဂၠုၚ် ဒယှေ်မွဲဒွက်" ဂှ်ကီု ဂကောံဍိုက်မွဲဂၠုၚ် ဟွံဒယှေ်မွဲဒွက်တအ်ဂှ် တန်တဴအာ အဓာန်ဂၠိုၚ်သ္ၚောဲဟွံမာန်အိုတ်ရ။ ဒှ်ဂကောံတုဲမ္ဂး နကဵုပၟိက်ပူဂိုလ်မွဲဓဝ် ဖျေံကေတ်သ္ဂုတ်သွာတ်ဟွံထေက်တုဲ ဒးဗက်ပၟိက်ဆန္ဒညးဂမၠိုၚ်ရ။ အတိုၚ်ညးဂမၠိုၚ် တုပ်စိုတ်ဖျေံလဝ်သ္ဂုတ်သွာတ် အပ္ဍဲသဘၚ်ကောံဓရီုဂှ် ဒးဓမံက်အာရုပ်ရဴကမၠောန်ဂကောံ အလုံကောန်ဂကောံတအ် သီုညးဖအိုတ်ထေက်ရ။ ညးလဵုမွဲဟွံဟီု ကၠောန်ကမၠောန်ဂကောံမ္ဂး ဒးဝေၚ်ပဲါကၠေံ ပွမဗက်စ ဓဝ်အဂတိပန်သာ်ထေက်ရ။ ဓဝ်အဂတိတအ်ဂှ် လုပ်ကၠုၚ်မ္ဂး ဂကောံလဵုလေဝ် ဒုၚ်အဘဳ (ဒုၚ်ခဳ) မာန်ဟွံသေၚ်ရ။ ဟိုတ်ဂှ်ရ ကၠောန်ကမၠောန်ဂကောံမ္ဂး စိုတ်ဓာတ်အတ္တတအ် တးပဲါကၠေံတုဲ ဇၟာပ်ကောန်ဂကောံ ယဝ်စိုတ်ဓာတ် ဂကောံနွံမ္ဂး ဂကောံဂှ်အာဍာ်ဇမၠိၚ်မာန်ရ။

"ဂကောံဟီုဂှ် "က္ဍိုပ်စှ် ဂၞန်မွဲ" ရ။ နူမၞိဟ်စှ် မၞိဟ်ဂမၠိုၚ်ဂှ် ပံၚ်ပကောံလဝ် မွဲကသပ်ဂၞန် မွဲလညာတ်ရ။ လညာတ်ဆန္ဒ နူပူဂိုလ်ဂမၠိုၚ်ဂှ် ပံၚ်ပကောံတုဲ စွံလဝ်တၚ် ပတဝ်က္ဍိုပ်မွဲရ။ ဥပမာ ညံၚ်ရဴဂလာန်မန်တြေံဟီုစ" ဍိုက်မွဲဂၠုၚ် ဒယှေ်မွဲဒွက်" ဂှ်ကီု ဂကောံဍိုက်မွဲဂၠုၚ် ဟွံဒယှေ်မွဲဒွက်တအ်ဂှ် တန်တဴအာ အဓာန်ဂၠိၚ်သ္ၚောဲ ဟွံမာန်အိုတ်ရ။"

ဗီုဂှ်ကီု ဂကောံသၚ်မန်ကတ်ပညာသဳရိလၚ်္ကာဝွံ ဂွံတန်တဴကၠုၚ် သၞာံလအ်လကာဖာ ဗၞတ် ၂၅ သၞာံ မာန်ဂှ် အပ္ဍဲကောန်ဂကောံမွဲကဵုမွဲဂှ် မပ္တံဓရ်အေၚ်ဒုၚ်၊ ဓရ်မေတ္တာ၊ ဓရ်ကရုဏာ၊ ဓရ်လွဳတအ်၊ ယဝ်ဟွံဇၞော်ပၟဝ်လဝ်မ္ဂး ဗီုလဵုပလေဝ် တန်တဴကၠုၚ်လလအ်ဏအ်မာန်ဟွံသေၚ်ရ။ ဂကောံပိုယ်ဝွံ ၜိုန်ရဂကောံကမ္မတီရေၚ်တၠုၚ်ကေၚ်ကာတအ် ပြံၚ်သၠာဲဒၟံၚ်ပ္ဍဲသဘၚ်ကောံဓရီုရိုဟ်ဒဒှ်သၞာံကီုလေဝ် ကဝါ်ဂကောံဂှ် ဗီုပြၚ်ဟွံလီုမွဲသာ် ကွာ်ဂံါဒၟံၚ်ဟွံသြုၚ် ပေၚ်ကၠုၚ် ၂၅ သၞာံဣရ၊ အပ္ဍဲတရဴဂကောံ ပွိုၚ် ၂၅ သၞာံဝွံ ဗီုလဵုသၚ်မန်ကတ်ပညာ သဳရိလၚ်္ကာတအ် ပတိတ်ကၠုၚ်ဇြဟတ်တအ်ဗပါ်ကၠုၚ် တၚ်ဝါတ်ဂါတ်နာနာသာ်ရောဂှ် မိက်သ္ဂောံပါ်ပရအ်ဏာကဵု ကောန်ဂကူမန်ပိုယ်တအ် ဒုၚ်စသိုၚ်ရံၚ်ညိကီုရ။ ဝၚ်ဂကောံသၚ်မန်ကတ်ပညာသိရဳလၚ်္ကာဝွံ ဓမံက်ထ္ၜးဏာကဵု အတိုၚ်လၟေၚ်သၞာံ ဗွဲသၟဝ်ဝွံရောၚ်။

ကြဴနူပၞာန်လိုက် အလန်ဒုတိယ အာစိုပ်ဒတုဲတုဲ တၠပညာအ္စာသၠပတ်မန် သ္ပပတမ်နူ

• ကျာ်ဇၞော်အ္စာတၠကေတုမတဳ (အဂ္ဂမဟာပိဏ္ဍတ) ဘာခရိုက်သာံ ဍုၚ်ရေဝ်၊
• ကျာ်ဇၞော်အ္စာတၠ အာဒိစ္စ(အဂ္ဂမဟာပဏ္ဍိတ၊ အဘိဓဇအဂ္ဂမဟာသဒ္ဓမ္မဇောတိက၊ အဘိဓဇမဟာရဋ္ဌဂုရု) ဘာမဟာယျေန် ကွာန်ကဒဵု၊ ဗွဲကြဴဝွံ
• ကျာ်ဇၞော်အ္စာကောသလ္လ (သဳရိပဝရဓမ္မာစရိယ၊ ဝိဇ္ဇာ (B.A.)- ဍုၚ်လ္ဂုၚ် မဟာဝိဇ္ဇာ (M. A.) - သိရဳလၚ်္ကာ၊ အဂ္ဂမဟာဂန္ထဝါစကပဏ္ဍိတ၊ အဂ္ဂမဟာပဏ္ဍိတ) ဘာသုခကာရဳ ဍုၚ်ဗ္ဂေါ၊
• ကျာ်ဇၞော်အ္စာ ဥတ္တမ ဘာသိၚ်္ဃုတ္တရ ဍုၚ်လဂုၚ်၊ တၠဂုဏ်အ္စာ ဥဍမ်ဥတ္တမော (အ္စာယေန်) ဘာဝါတ်ဇြေန် ဍုၚ်ၜံၚ်ကံက်တအ်ကီု ကြဴနူဂှ်
• ဒံက်တာကျာ်ဇၞော်နန္ဒပါလ (ပါၚ်ကၟာ) ကီု သီု တၠဂုဏ်အ္စာပါလရာမည ဓမ္မာစရိယ (LLB. Dip in English Sri Lanka) ဘာပရိယတ္တိဝေဒဳ ဍုၚ်မတ်မလီုတအ် ကညကၠုၚ်ကတ်လ္ၚတ်လဝ် ပညာဘာသန္တရ ပ္ဍဲဍုၚ်သိရဳလၚ်္ကာဏအ်ဂှ် ဂွံတီကေတ်ရ။ စရၚ်သၚ်မန် ကတ်ပညာဍုၚ်သိရဳလၚ်္ကာ လက်ထက်ညးတအ်ဂှ် ၜိုတ်ပိုယ်ဍဟောဝ်စိုပ်ဟေၚ် ဓမံက်ထ္ၜးဏာလဝ်ရ။

ကၠာနူဟွံဂွံစိုပ် သၞာံဒက်ပတန်ဂကောံက္ဍၚ်ဂှ် လၟိဟ်သၚ်မန်ပဒတဴဒၟံၚ်ပ္ဍဲဍုၚ်သိရဳလၚ်္ကာဝွံ ဂွံတီကေတ်ဂှ် နွံဗၞတ် (၄) ဇကု၊

• တၠဂုဏ်အ္စာဝဏ္ဏက (ကအ်ဗိန်)
• တၠဂုဏ်အ္စာဝေဓညာဏ (ဝၚ်ဒါ)
• တၠဂုဏ်အ္စာဓမ္မမဟာ (ကအ်ပၞဟ်)
• တၠဂုဏ်အ္စာဓမ္မဒိန္န (ဒူရာ) တအ်ရ။

နူဂှ်ပ္ဍဲသၞာံ ၁၉၉၃ ဂှ် သၚ်မန်ကညစိုပ်ကၠုၚ် ဍုၚ်သိရဳလၚ်္ကာ ဗၞတ် ၉ ဇကုပၠန်။

• တၠဂုဏ်အ္စာ ကေသရ (ကြေဝ်ဏာ)
• တၠဂုဏ်အ္စာ သဳဟ (ဟံၚ်ဂါံ)
• တၠဂုဏ်အ္စာ သုန္ဒရ (ခဒုၚ်သှေ်)
• တၠဂုဏ်အ္စာ နေပုည (ဆၚ်ဂူ)
• တၠဂုဏ်အ္စာ ကောဏ္ဍည (ကအ်ဍောတ်)
• တၠဂုဏ်အ္စာ နာဂသေန (နာၚ်သၠုၚ်)
• တၠဂုဏ်အ္စာ ဝါရိန္ဒ (ဟံၚ်ဂံါ)
• တၠဂုဏ်အ္စာ ပညာဝံသ (ဟံၚ်ဂံါ)
• ကျာ်ဇၞော်အ္စာ ခေမာဝန္တ (တံၚ်ပရၚ်)တအ် ပံၚ်သီုဖအိုတ် သၚ်မန်ကၠုၚ်ကတ်ပညာ ပ္ဍဲဍုၚ်သဳရိလၚ်္ကာ အခိၚ်ဂှ် နွံဗၞတ် (၁၃) ဇကု။

ဟီုဍာံဍာံမ္ဂး ပ္ဍဲအခိၚ်ကာလဂှ် သၚ်ဗၟာနွံဗၞတ် (၅) ဇကု၊ သၚ်သေံ နွံဗၞတ် ၄ ဇကုဓဝ်တုဲ ပၞောဝ်ကဵုသၚ်ကောန်ဍုၚ်အရေၚ် ဍုၚ်ပိုယ်ဂမၠိုၚ် လၟိဟ်သၚ်မန်ပိုယ်ဂၠိုၚ်အိုတ်ဂှ် ကျာ်ဇၞော်အ္စာ သုန္ဒရ (ဘာမန် အနုရာဓပုရ) ဂးလဝ်ရ။

ဟိုတ်ဂွံဒက်ပတန်ဂကောံ (သၞာံ ၁၉၉၃)

ပ္ဍဲခရေတ် ၁၉၉၃ သၞာံဝွံ ခမဳသၚ်မန် ကညစိုပ်ကၠုၚ် ဍုၚ်သဳရိလၚ်္ကာ ဂၠိုၚ်ကၠုၚ်တုဲ ပိုယ်ကဵုပိုယ် ယဝ်ရမံၚ်ထောံ ဗီုညးကဵုညးမ္ဂး ကာလယဲမွဲဒိုက်ၜါ က္တဵုဒှ်ကၠုၚ်မ္ဂး ညးဂှ်မွဲ ဂွံမၚ်မွဲရံၚ်စံၚ်ပိုယ်ရော။ ယဝ်ပိုယ်နွံပ္ဍဲဍုၚ်မန်တေံမ္ဂး ကိစ္စဝွံ ဟွံဒးဍောၚ်စိုတ်မွဲသာ် မိမကလောကောဒေံ အစံၚ်အ္စာဒါယကာတအ် ညးတအ်ဘိုၚ်မၚ်မွဲရံၚ်စံၚ် ကဵုချိုတ်ပၠိုတ်ရ။ ဟိုတ်ဂှ်ရ ပိုယ်ကဵုပိုယ် ယဝ်ရမံၚ် ညံၚ်ရဴကောဒေံအရၚ် ဘိုၚ်မၚ်မွဲညးသ္ကအ်မ္ဂး ဒဒိုက်အိုတ်သီုတအ်ဂှ် ဂံၚ်တတ်ဗပါ်အာမာန် ဍာံဍာံဏောၚ် စှေ်စိုတ်သာ်ဝွံတုဲ ဒက်ပ္တန်လဝ် ဂကောံသၚ်မန်ကတ်ပညာသိရဳလၚ်္ကာ နကဵုတၚ်ရန်တၟံ (၃) တၚ် အတိုၚ်သၟဝ်ဝွံရ။

1. သွက်သ္ဂောံရီုဗၚ် ထံက်ပၚ်သၚ်မန်ကတ်ပညာပ္ဍဲဍုၚ်သိရဳလၚ်္ကာ
2. သွက်သ္ဂောံရီုဗၚ် မၚ်မွဲသၚ်မန်ဂိယဲ ပ္ဍဲဍုၚ်သိရဳလၚ်္ကာ
3. သွက်သ္ဂောံရီုဗၚ် ဒတဲတွာ် ကောဒေံမန် ညးမၞုံပၟိက်ကဵု ကတ်ပညာ ဍုၚ်မ္ၚးဂမၠိုၚ်။

အခိၚ်စဒက်ပ္တန်ဂကောံ

ပ္ဍဲသက္ကရာဇ်သာသနာ ၂၅၃၇ သၞာံ၊ သက္ကရာဇ်ဍုၚ် ၁၃၅၅ သၞာံ၊ ဂိတုဒုတိယဒ္ဂိုန် (၁၄) မံက်၊ တ္ၚဲသ္ၚိသဝ်၊ ခရေတ် ၁၉၉၃ သၞာံ၊ ဂိတု ဂျူလာဲ (၃၁) ပ္ဍဲအခိၚ်တ္ၚဲစေၚ် (၂-၃၀) နာဍဳဂှ် စဒက်ပ္တန်လဝ်ဂကောံဝွံ ပ္ဍဲဌာန ဘာသဳရိဗောဓိရာဇ ဂၠံၚ် ၄၆ ဍုၚ်ကောလမ္ဗ၊ ကၟိုန်ဍုၚ်သဳရိလၚ်္ကာဝွံရောၚ်။

ပ္ဍဲသဘၚ်ကောံဓရီု အလန်ပထမဝွံ ပၞောဝ်ကဵုသၚ်မန်ဗၞတ် (၁၃) ဇကုဂှ် ရုဲစှ်လဝ်ညးတာလျိုၚ် ဂကောံကမ္မတဳရေၚ်တၠုၚ်ကေၚ်ကာ ဗၞတ် (၅) ဇကု နကဵုဆန္ဒမာဲတုဲ သၚ်ပဲါနူဂှ် (၈) ဇကုဂှ် ဒှ်ကောန်ဂကောံဖအိုတ်ရ။

ဂကောံကမ္မတဳရေၚ်တၠုၚ် ကေၚ်ကာဂမၠိုၚ်

၁။ ဥက္ကဌ တၠဂုဏ်အ္စာကေသရ (ကြေဝ်ဏာ)

၂။ ညးအုပ်ကာ တၠဂုဏ်အ္စာဓမ္မဒိန္န (ဒူရာ)

၃။ ညးဂိုၚ်သြန် တၠဂုဏ်အ္စာဝေဓညာဏ (ဝၚ်ဒါ)

၄။ ညးစၟတ်စရၚ် တၠဂုဏ်အ္စာဓမ္မမဟာ (ကအ်ပၞဟ်)

၅။ ညးလၟိၚ်ပရိုၚ် တၠဂုဏ်အ္စာဝဏ္ဏက (ကအ်ဗိန်)

(တၚ်စၟတ်။ ။အာယုက်ကမ္မတဳရေၚ်တၠုၚ်ကေၚ်ကာဝွံ မွဲသၞာံဟေၚ်ရ။ သအာၚ်နူဂှ် ဂကောံကမ္မတဳရေၚ်တၠုၚ်ကေၚ်ကာဂှ် ပ္ဍဲဝၚ်ဝွံဓမံက်ထ္ၜးကဵု အယာံမာတ်မွဲသၞာံဟေၚ်ရ။ ပဲါနူဂှ် ရံၚ်ကေတ်ပ္ဍဲခံက်အၚ် ဂကောံကမ္မတဳ ရေၚ်တၠုၚ်ကေၚ်ကာလၟေၚ်သၞာံ ဗွဲသၟဝ်တေံညိ)။

ယၟုဂကောံ

အပ္ဍဲဝိုၚ်ကောံဓရီုဝွံ ခုတ်လဝ်ယၟုဂကောံနကဵု ဘာသာမန် ကော်ခဴစ "ဂကောံသၚ်မန်ကတ်ပညာသိရိလၚ်္ကာ" ရ။ နကဵုဘာသာအေၚ်ဂလိက် ကော်ခဴစ "MON BUDDHIST STUDENTS' SOCIETY, SRI LANKA" အတိုၚ်သၚ်မန်တအ် တုပ်လဝ်စိုတ်ဝွံရောၚ်။

တဆိပ်ဂကောံ

စပ်ကဵုတဆိပ်ဂကောံတုဲ ပတိုန်ထ္ၜးဏာကဵု အတိုၚ်ကၠုၚ်နူလိက် "သဇိုၚ်သၞောဝ် ဂကောံသၚ်မန်ကတ်ပညာသဳရိလၚ်္ကာ" ညိရ။

တဆိပ်ဂကောံဝွံ ဝိုၚ်ခ္ဍမ်ဒၟံၚ် ညံၚ်ဗၞဳအဝန် ဂိတုပေၚ်တုဲ ပါ်လဝ်ဗွိုၚ်ပိထပ်ရ။ ထပ်အပ္ဍဲ ဓမံက်လဝ် လျးပညာ နကဵုရုပ်ပၟတ်ကၠေၚ်တေလပဇ္ဇောတ၊ ထပ်လဒေါဝ် ဓမံက်လဝ်ဓမ္မစက် ပသဇိုၚ်ကဵုဓရ် သစ္စပန်ကေုာံ ဍောၚ်ဓရ်မဂ္ဂၚ်ဒ္စာံ၊ ထပ်မ္ၚးလ္ပာ်လ္တူ ချူလဝ်ယၟုဂကောံ နကဵုဘာသာမန်တုဲ လ္ပာ်သၟဝ်ဂှ် ချူလဝ်ယၟုဂကောံ နကဵုဘာသာအေၚ်ဂလိက်ရ။ အကြာအစပ်ဘာသာမန် ကေုာံ ဘာသာအေၚ်ဂလိက် လ္ပာ်တဲပုၚ်ဂှ် ဓမံက်လဝ် သက္ကရာဇ်ခရေတ်တုဲ လ္ပာ်တဲပဲါဂှ် ဓမံက်လဝ် သက္ကရာဇ်ဍုၚ် သၞာံစပတန်ဂကောံကီုရ။

လက္ချဏ်ညးလုပ်ဂကောံ

ဂွံဒှ်ကောန်ဂကောံ သၚ်မန်ကတ်ပညာသိရဳလၚ်္ကာဝွံ ထေက်ကဵုဒးနွံ အၚ်္ဂလက္ချဏ် (၃) သာ်ရ။

၁။ ယြဴညးမွဲ ဒှ်ဇာတိဂကူမန်ဍာံဇောတ်တုဲ သ္ဒးတန်တဴဒၟံၚ် ပ္ဍဲဍုၚ်သိရဳလၚ်္ကာရ။

၂။ သ္ဒးဟီုဗှ် ကေုာံ ချူဘာသာမန် မမိက်ကဵုမွဲမွဲလေပ်ချိုတ်ပၠိုတ်ရ။

၃။ တုပ်စိုတ်ကဵုရန်တၟံဂကောံတုဲ အတိုၚ်သၞောဝ်ဂကောံဝွံ သ္ဒးရေၚ်တၠုၚ်ဒ္ဂေတ်ဗက်မာန်ရ။

ဍိုက်ပေၚ်ကဵုလက္ချဏ်ပိသာ်ဝွံမ္ဂး ဂွံအခေါၚ်လုပ်ဂကောံရ။

တၚ်စၟတ်။ ။ယြဴညးမွဲ ၜိုန်ဒှ်ဇာတိဂကူမန်ဍာံဇေတ်ကီုလေဝ် ဟီုဗှ်ချူဘာသာမန် ဟွံလေပ်ချိုတ်ချိုတ်ပၠိုတ်မ္ဂး ပူဂိုလ်ဂှ် ကမ္မတဳရေၚ်တၠုၚ်ကေၚ်ကာတအ် သ္ဂုတ်သွာတ်တုဲဟေၚ် ဂွံအခေါၚ်လုပ်ဂကောံရ။

ဟိုတ်သြန်ဂကောံ ဂွံက္တဵုဒှ်ကၠုၚ်

အပ္ဍဲသဘၚ်ကောံဓရီုမွဲ တၞဟ်နသ္ဂောံဒှ်အာ သြန်ဂအုံ သွက်သၚ်မန်ကတ်ပညာသိရဳလၚ်္ကာတုဲ ဖျေံကၠုၚ်သ္ဂုတ်သွာတ်သာ်ဝွံရ။

၁။ ယြဴညးမွဲ ဒှ်ကောန်ဂကောံတုဲ ဗွဲကိုပ်ကၠာ သ္ဒးစုတ်သြန်တမ်ဂကောံ ဗွဲတွဵုမယုတ် (၁၀၀၀) မွဲလ္ၚီရူပဳ၊

၂။ ဒှ်ကောန်ဂကောံတုဲ ဒးစုတ်သြန်ဂကောံ မွဲဂိတုမ္ဂး (၅၀) ရူပဳ ဇၟာပ်ပ်ဂိတုရ။

၃။ ဗက်လၟိၚ်လၟဟ် ပ္ဍဲအကြာခမဳသၚ်မန် ကေုာံ ဒကာရဲကၠုၚ်လ္ၚောဝ်ကျာ် ပ္ဍဲဍုၚ်သိရဳလၚ်္ကာဝွံတုဲ သြန်ၜိုတ်ကလိဂွံဒါန်တအ်ဂှ် စုတ်ပ္ဍဲသြန်ဂအုံဂကောံရ။

သြန်နူခမဳသၚ်မန် စလုပ်ဂကောံ (၁၃) ဇကုတအ်ဂှ် ကလိဂွံ (၁၆၀၁၃) ရူပဳကီု၊ သြန်ကောန်ဂကောံလၟေၚ်ဂိတုဂမၠိုၚ် (၃၄၀၀) ရူပဳကီု သီုသြန်ဒုၚ်ဒါန်နူဂကောံရဲလ္ၚောဝ်ကျာ် က္ဍိုပ်သ္ကိုပ် တၠဂုဏ်အ္စာဥတ္တမ ဘာသိၚ်္ဃုတ္တရ ဍုၚ်လ္ဂုၚ်ဂှ် (၂၉၀၇၂) ရူပဳကီု ပံၚ်သီုဖအိုတ် ကလိဂွံသြန်ဂအုံဂကောံ (၄၉၇၈၅) ရူပဳရ။ သြန်ဝွံ သွက်သ္ဂောံစုတ် ပ္ဍဲတိုက်သြန် Bank ဂှ် ဒေက်ဒၟံၚ် (၂၁၅) ရူပဳတုဲ တၠဂုဏ်အ္စာကေသရ စေက်လဝ်ကဵုမွဲစုတ်တုဲ သြန်ထာဝရနိဓိ ပေၚ်ကၠုၚ် မသုန်ဠက် (၅၀၀၀၀) ရူပဳရ။ သြန်ဝွံ ဒှ်သြန်တမ် ဂကောံတုဲ ပ္ဍဲစၟတ်တ္ၚဲ 16.12.1993 ဂှ် တၠဂုဏ်အ္စာ ကေသရ (ကြေဝ်ဏာ) ကဵု တၠဂုဏ်အ္စာ ဓမ္မမဟာ (ကအ်ပၞဟ်) စစုတ်လဝ် ပ္ဍဲတိုက်သြန်ဟံၚ်ကံၚ် (Hong Kong Bank) နကဵုဂကူ Fiexd Deposit ကၠာအိုတ်ရဂှ် ဂွံတီကေတ်ရ။

နိဿဲ

လိက်ကၞပ်ရတုသြန်၊ ဂကောံသၚ်မန်ကတ်ပညာသဳရိလၚ်္ကာ Mon Buddhist Students' Society, Sri Lanka. မုက်လိက် (၃၅-၅၃)။ သၞာံတက်တြး ၂၀၁၇။