သၞိၚ်ကျာ်လ္ဂုၚ်ဂှ် ဒှ်သၞိၚ်ဂကူမန်

ရမျာၚ်ခၞိၚ်ကျာ်လ္ဂုၚ်ဗြုမံၚ်ခြေၚ်ၚ်ဂှ် ဟိုတ်နူအသဝ်ဂုဏ်ကောဒေံမန်ၜါ တပူကဵုတဗဝ် မွဲဟာန်ကေုာံ သၟိၚ်မန်ဥက္ကလာပတံ ဒက်ပ္တန်လဝ်တုဲ စဵုကဵုတ္ၚဲဏံ ကောန်ညးဂၠးကဝ် ဂွံကၠုၚ်ဗဵုလ္ၚောဝ်မံၚ်စေတဳကျာ်လ္ဂုၚ်ဏံရ ဒှ်ဂုဏ်စရာဲကျာ်သြဳဂကူမန်ပိုဲရ ဆဂး ပရောဝၚ်ကျာ်လ္ဂုၚ်ဒဒှ်ဍာံ ကောန်ညးဂၠးကဝ်တံ တီလဝ်ဟွံဂၠိုၚ်ပုဟ်ဂှ် ထေက်ကဵုဒးအောန်စိုတ်ရ ခေတ်သုဝဏ္ဏဘူမိ ဟံသာဝတဳ မုဟ်တၟံတေံ ဟိုတ်နူအဝဵုပရေၚ်ဍုၚ်ကွာန်ဂကူဇကုသၠုၚ် နွံကၠုၚ်ကဵုနန်ထဝ်သၟိၚ်ဨကရာဇ် တိဍာ်သၠဲလးတုဲ သၞိၚ်ကျာ်လ္ဂုၚ်ဂှ် ဒှ်သၞိၚ်ဂကူမန်ပိုဲရ သၟိၚ်တၠတိမန်ပိုဲ ခေတ်အဆက်က် ပလေဝ်ဗဂဵုလဟဵုကၠုၚ် လဝ်ကျာ်စေတဳလ္ဂုၚ်ဂှ် ဂွံဆဵုကေတ်ပ္ဍဲဝၚ်ရ

ကျာ်စေတဳလ္ဂုၚ်ဂှ် ရံၚ်ကဵုဝၚ်သက်သဳလိက်တၟံနွံမံၚ်လ္တူကျာ်လ္ဂုၚ်ဏံမ္ဂး ဂကူမန်ပိုဲဟေၚ်ရ ဒက်ပ္တန်ကၠုၚ်လဝ်ဂှ် တီမံၚ်အလုံကောန်ဂကူပိုဲရ သၞိၚ်ကျာ်လ္ဂုၚ်ဂှ် ဒှ်မံၚ်သၞိၚ်ကျာ်သြဳဂကူမန်ပိုဲလၟိုန်ရ ဆဂး နူဍုၚ်ဟံသာဝတဳလီု အဝဵုပရေၚ်ဍုၚ်ကွာန်မန်ပိုဲသရိုဟ်အာတုဲ စဵုကဵုတ္ၚဲဏံ ဒှ်မံၚ်ဘဝဍိက်ရ အဝဵုပရေၚ်ဍုၚ်ကွာန်ဂကူဇကုဟွံမွဲတုဲ တိဍာ်မန်ပိုဲ ဒှ်အာတိဍာ်ဗမာဗွဲမဂၠိုၚ်ရ တိဍာ်ဍေံကဵုလဝ် တွဵုရးမန်တၟာသၠဗ္ဒဝ်ဂှ်လေဝ် အဝဵုအုပ်ဓုပ်ဟွံမွဲ ဒးမံၚ်သၟဝ်တဲအုပ်ဓုပ်အလဵုအသဳဗမာရ

တိဍာ်ဇကု ဂကူဇကုဟွံဂွံအုပ်ဓုပ်ပိုၚ်ပြဳ ဝၚ်ဂကူဇကု အ္စာဝၚ်ဗမာတံ ချူပလေဝ်ပလီုထောံအိုတ် ကျာ်စေတဳလ္ဂုၚ် မန်ဒက်ပ္တန်လဝ်ဂှ် ဗမာတံသ္ပထောံ ကျာ်ဗမာတံပ္တန်လဝ် နကဵုဘာအၚ်္လိက် ဘာသာဗမာ ကၟာတ်မတ်ကတောဝ်ညးဂၠးကဝ်တံတုဲ ချူပလီုကၠုၚ်လဝ်ဝၚ်ကျာ်လ္ဂုၚ်အိုတ်ရ ညးကၠာဲအရေဝ်ဘာသာ ညးသ္ပဂိုက်တံလေဝ် ကၟုဲဍုၚ်မ္ၚးစိုပ်ကၠုၚ်ကျာ်လ္ဂုၚ်မ္ဂး ဝၚ်ကျာ်လ္ဂုၚ် ဂကူမန်တံဒက်ပ္တန်လဝ်ကၠာအိုတ်ဏောၚ်ဂှ် ဆလံဍေံဟွံဟီုပ္တိတ်ရ အဝဵုဟွံမွဲပ္ဍဲတဲဂကူဇကု မုသ္ပဟွံဂွံ ဒးဒုၚ်မံၚ်ဘဲနာနာသာ် လၟိုန်ကာလရ

ဟိုတ်ဂှ်ရ အာဲကၟာဲဇုဇဗဴလပိုဲ ဒက်ပ္တန်လဝ်မပ္တံကဵုတိဍာ် ကျာ်စေတဳလ္ဂုၚ် ကျာ်ဣသိယဵုတံဒှ်တမ် မိက်ဂွံကလေၚ်ဂွံ မိက်ဂွံပိုၚ်ပြဳမ္ဂး အဝဵုပရေၚ်ဍုၚ်ကွာန်ဂကူဇကု ဆောံလေၚ်လဝ်တံဂှ် ကလေၚ်ကေတ်ဂွံမှ ဒှ်မာန်ရောၚ် ဂွံကလေၚ်ဒက်ပ္တန် အဝဵုပရေၚ်ဍုၚ်ကွာန်မာန်မွဲဝါပၠန်ဂှ် နကဵုဇြဟတ်ပပိမဏံ ဒှ်အဓိကရောၚ် စှ်ေစိုတ်ရ ဇြဟတ်ပညာ ဇြဟတ်ပၞာန် ဇြဟတ်ပိုန်ဒြပ် ပ္ဍဲကောန်ဂကူမန်ပိုဲ ညံၚ်ဂွံဂၠိုၚ်တိုန်ဂှ် တဲညဳကသုညဳ ဒက်ပခိုၚ်အာ နကဵုဇြဟတ်ညးဍုၚ်ကွာန်မန်ပိုဲအိုတ်ညိအဴ

ကွးဘာမန် တၠပညာသၟတ်မန်ပိုဲ ညးမကတ်လ္ၚတ်မံၚ်လိက်အၚ်္ဂလိက်တံလေဝ် ပရောဝၚ်ဂကူဇကု ဝၚ်ဌာန်ဒေသဇကု မပ္တံကဵုဝၚ်ကျာ်လ္ဂုၚ် ကျာ်ဣသိယဵုတံဒှ်တမ် ညံၚ်သ္ဂောံဟီု ချူ သောၚ်ကလးကဵုညးဂၠးကဝ်တံ ဗီုဘာသာအၚ်္ဂလိက်မာန်ဂှ် ဂ္စာန်ကတ်လ္ၚတ်အိုတ်ညိ ညံၚ်ဂွိုအ်ဒးအလီဂကူညးတၞဟ်ဂှ် စွံသတိလၟိုန်တုဲ ညံၚ်သ္ဂောံတီအလီဍေံဂှ်လေဝ် ကတ်လ္ၚတ်ပရေၚ်ဝၚ် ပရေၚ်ဍုၚ်ကွာန်လၟိုန်ကာလညိ

အလုံဂကူမန်ပိုဲ သၠုၚ်ပတိုန်အသိၚ်ဝါဒဆာန်ဂကူဗွဲစိန်ဝုန်တုဲ ညံၚ်သ္ဂောံတတ်ထပါ်ပရေၚ်ဍုၚ်ကွာန်အကြာဂကူညးတၞဟ် အကြာညးဂၠးကဝ်တံမာန်ဂှ် ပ္တိတ်ဇြဟတ်လွဳပရာအာ စဵုကဵုလ္အိတ်ဘဝဂကူမန်မွဲစွံအိုတ်ညိအဴ