သၠပတ်ပထမကဝ် ၁၉

သၠ​ပတ်​ပ​ထ​မ​ကဝ် ၁၉

^၁ကလုတ်အကာသၜါဇကုတံဝွံ ပ္ဍဲအခိၚ်သၟဝ်တ္ၚဲ စိုပ်ကၠုၚ်ပ္ဍဲဍုၚ်သောဝ်ဍောမ်ရ။ လဝ်တဝွံ ဂဇံဒၟံၚ်ပ္ဍဲပါၚ်တရၚ်ဍုၚ်မ္ဂး၊ ညာတ်ညးတံဂှ်တုဲ၊ ညံၚ်ဂွံဝါၚ်ဒုၚ်တလုၚ်ဂှ် က္တဵုတုဲ၊ ဖျေံက္ဍိုပ်ဒဵုကဵုတိမ္ဂး၊ ^၂နာဲအဲဍိက်တံ၊ လုပ်ပ္ဍဲသ္ၚိဍိက်တဳလပိုန်တံတုဲ မံၚ်အလုံမွဲဗ္တံအိုတ်ညိ။ ကြာတ်ဇိုၚ်အိုတ်ညိ။ က္တဵုနူဂယးပြဟ်တုဲ က္ညအာအိုတ်ညိ သာ်ဝွံ ဟီုရ။ ကလုတ်အကာသတံဝွံ၊ ပိုဲညးဝွံ ဟွံလုပ်၊ အလုံမွဲဗ္တံမံၚ်ပ္ဍဲဂၠံၚ်ရောၚ် သာ်ဝွံ ဟီုၜိုန်ဒှ်ကီု၊ ^၃ဟိုတ်မကသံကၟဝ်ဗွဲမလောန်ဂှ်၊ မွဲဝါပၠန်ကလေၚ်ပ္ဍဲဒမံၚ်လဝ်တတုဲ၊ လုပ်အာပ္ဍဲသ္ၚိညးအိုတ်ရ။ လဝ်တဝွံ သွက်ညးတံပဒှ်ပေါဲတုဲ၊ ဇြုၚ်ကွာၚ်ဟွံမွဲကွဲမ္ဂး၊ ညးတံစအိုတ်ရ။

^၄ကၠာညးတံဟွံတိက်ဏီဂှ်၊ မၞိဟ်တြုံဍုၚ်သောဝ်ဍောမ်ဇၞော်ဍောတ်၊ ညးမကၠုၚ်နူဇၟာပ်အရာပ်အိုတ်သီုတံဝွံ ဗိုၚ်ကၠောံသ္ၚိတုဲ၊ ^၅ကော်လဝ်တမ္ဂး၊ ဗ္တံတ္ၚဲဝွံ ညးမလုပ်သ္ၚိမၞးတံဂှ် မူဒၞာဲမနွံရော။ ပိုဲညးသၟိက်ဂွံဆက်ဆံကဵုညးတံဂှ်ဒှ်တုဲ၊ ကဵုတိတ်ပ္ဍဲဇရေၚ်ပိုဲညးရ သာ်ဝွံ ဟီုအိုတ်ရ။

^၆လဝ်တဝွံလေ တိတ်မ္ၚးတရၚ်ပ္ဍဲဇရေၚ်ညးတံတုဲ၊ ပ္ဍဲလက်ကရဴဇကုကၟာတ်တရၚ်တုဲမ္ဂး ^၇ကောံဒေံတံဝွံ အဓမ္မ သာ်ဝွံဂှ် လ္ပပအိုတ်ညိ။ ^၈ပ္ဍဲအဲကောန်ဗြဴဟွံဆက်ဆံကဵုမၞိဟ်တြုံနွံၜါရ။ ညးတံဂှ် ပ္ဍဲဇရေၚ်မၞးတံအခေါၚ်ဂွံပ္တိတ်နၚ်၊ ကဵုအိုတ်ညိ။ ပ္ဍဲညးတံဆသၟိက်ဂွံပပအိုတ်ညိ။ ပ္ဍဲမၞိဟ်ဝွံတံဂှ် လ္ပပမွဲသာ်အိုတ်ညိ။ ဟိုတ်မ္ဂးဂှ်၊ ညးတံဝွံ ပ္ဍဲသမၞိၚ်ကၟီသ္ၚိအဲဂှ် ဒီုဒက်ဒၟံၚ်ရ သာ်ဝွံ၊ ဒုၚ်ဂုန်ၜိုန်ဒှ်ကီု၊ ^၉ညးတံဝွံ ဆုတ်ရ သာ်ဝွံ ဟီုအိုတ်ရ။ မွဲဝါပၠန်ဂှ်လေ၊ မၞးဝွံ တၞဟ်နသၟိက်ဂွံမံၚ်တၟုဲဆစိုပ်ကၠုၚ်ကီု၊ ဒးပတလသၞောဝ်ရောၚ်ဟာ။ လၟုဟ်ဝွံ လောန်နူမပ္ဍဲညးတံဂှ်၊ ပ္ဍဲမၞးပွမကြံဂှ် ပဗွဲမလောန်ရောၚ် သာ်ဝွံ ဟီုမ္ဂး၊ ဍိဝ်ဍိုက်လဝ်တဗွဲမလောန်တုဲ၊ တၞဟ်နသၟိက်ဗာ်ကရေက်ဝးပ္ကဝ်တရၚ်ဂှ် ကြပ်ကၠုၚ်အိုတ်ရ။ ^၁၀ပ္ဍဲကာလဂှ် ကလုတ်အကာသတံဝွံ ပၠးတဲမ္ဂး၊ အပ္ဍဲသ္ၚိပ္ဍဲဒၞာဲဇကုတံမမံၚ်ဂှ် တံၚ်ပၠုပ်လဝ်တတုဲ ကၟာတ်တရၚ်အိုတ်ရ။ ^၁၁ညးမနွံဇရၚ်တရၚ်သ္ၚိဇၞော်ဍောတ်တံဂှ် တၞဟ်နသၟိက်ကဵုမတ်ကၠက်ဂှ် ကဵုဒန်တုဲ၊ ညးတံဝွံ ဂၠာဲတရၚ်မ္ဂး၊ စိုပ်ဒဒှ်မဍောၚ်ၜိုတ်အိုတ်ရ။

^၁၂ကလုတ်အကာသတံဂှ်လေ၊ ပ္ဍဲဒေသဝွံ ညးမဆေၚ်ကဵုမၞးနွံဏီဟာ။ အပ္ဍဲဍုၚ်ကောန်တြုံကောန်ဗြဴဂမာန်ဆမနွံပ္ဍဲမၞးဂှ် ပလံၚ်ပ္တိတ်နူဒေသဝွံရ။ ^၁၃ပိုဲညးဝွံ ဒးပလီုပလာ်ဒေသဝွံရောၚ်။ ဟိုတ်မ္ဂးဂှ်၊ ဒဒှ်ညးတံမလရိုအ်ဂတေဝ်ပ္ဍဲဂတကျာ်ထာဝရဇၞော်လောန်ဂှ်ဒှ်တုဲ၊ ညံၚ်ဂွံကဵုပလီုပလာ်ဒေသဝွံဂှ် ကျာ်ထာဝရဗလးနၚ် ပိုဲညးတုဲရ သာ်ဝွံ ဟီုကဵုလဝ်တအိုတ်ရ။ ^၁၄လဝ်တတိတ်တုဲ ပ္ဍဲကဵုဂမာန်ဇကုညးမပံၚ်ဖေက်ကဵုကောန်ဗြဴဇကုတံဂှ်၊ က္တဵုအိုတ်။ တိတ်အာနူကဵုဒေသဝွံအိုတ်။ ဍုၚ်ဝွံဂှ် ကျာ်ထာဝရပလီုပလာ်ရောၚ် သာ်ဝွံ ဟီုၜိုန်ဒှ်ကီု၊ ဗီုခမက်ဝေၚ် သာ်ဝွံ ဂမာန်တံသၠေဟ်အိုတ်ရ။

^၁၅ကာလအသှိုန်မတိုန်ဂှ် ကလုတ်အကာသတံဝွံ ကဵုလဝ်တဒရက်တုဲ၊ မၞးဝွံ က္တဵုတုဲ၊ သမ္ဘာကဵုကောန်ဗြဴၜါမနွံပ္ဍဲဒေသဝွံ တံဂှ် ကေတ်ဏာရ။ သာ်ဂှ် ဟွံသေၚ်၊ စိုပ်ပ္ဍဲဒဒှ်မလီုလာ်ပ္ဍဲဒုဟ်ဍုၚ်ရောၚ် သာ်ဝွံ ၜိုန်မဟီုဂှ်၊ ^၁၆ကာလညးမမၚ်လဇဒၟံၚ်ဂှ် ဟိုတ်ကျာ်ထာဝရမဆာန်ဍူဂှ် ကလုတ်အကာသတံဝွံ တံၚ်တဲညးကဵုသမ္ဘာညးကောန်ဗြဴညးၜါတံဂှ်တုဲ၊ ပလံၚ်ပ္တိတ်ဏာမ္ၚးဍုၚ်အိုတ်ရ။

^၁၇ကာလမစိုပ်မ္ၚးဂှ်၊ မၞးဝွံ တၞဟ်နသၟိက်ဂွံဂျိုၚ်လမျီုဂှ် ဒြေပ်ရ။ လ္ပကလေၚ်ရံၚ်လက်ကရဴ။ ပ္ဍဲဒေသတိမညဳလ္ပမံၚ်လးလး။ ဒြေပ်အာပ္ဍဲလတူဒဵု။ သာ်ဂှ် ဟွံသေၚ် စိုပ်ဟုံလေၚ်ရောၚ် သာ်ဝွံ ဟီုတဴရ။ ^၁၈လဝ်တဂှ်လေ နာဲအဲဍိက်လ္ပဟီုသာ်ဂှ်ညိ။ ^၁၉လၟုဟ်ဝွံ ဍိက်တဳလပိုန်ဝွံ ဂွံမုက်ဂတတဳလပိုန်တုဲရ ကဵုလမျီုအဲဍိက်လလံသွာတုဲ။ ပ္ဍဲအဲဍိက်ဂုန်ကရုတ်ဏာတဳလပိုန်မပဂှ် ဂၠိုၚ်ဗွဲမလောန်ရ။ ဗၠးဘဲတုဲ ဒြေပ်အာပ္ဍဲလတူဒဵုဟွံမာန်။ ဘဲမွဲမွဲဂှ် ဆဵုတုဲ ချိုတ်ရောၚ်ဂှ် ဂွိၚ်ဂွာဲရ။ ^၂၀ရံၚ်ညိ။ ဍုၚ်ဂှ် ကြပ်ရ။ ဒြေပ်မာန်ရ။ ဍုၚ်ဍောတ်ဂှ် ဒှ်ကီုရ။ ဗၠးသဲတုဲ ကဵုဂွံဒြေပ်အာပ္ဍဲဒေသဂှ် ညိ။ တေံဍုၚ်ဝွံ ဍုၚ်ဍောတ်ဟွံသေၚ်ဟာ။ ဒြေပ်ပ္ဍဲဒေသဂှ်တုဲ ဂွံလလံသွာလမျီုရောၚ် သာ်ဝွံ ဟီုပ္တီရ။ ^၂၁တေံညးဂှ်လေ ရံၚ်ညိ။ ပ္ဍဲအမှုဝွံဂှ်လေ၊ ညံၚ်အဲဂွံကလၚ်ဂလာန်မၞးဂှ်၊ ဟိုတ်မဒုၚ်ဂုန်သွက်ဍုၚ်ဂှ် အဲဟွံပလီု။ ^၂၂ညံၚ်ဂွံဗၠးဘဲဂှ် ဒြေပ်အာပ္ဍဲဍုၚ်ဂှ် ဗွဲပရဟ်ရ။ ကၠာဟွံစိုပ်ဍုၚ်ဂှ် မူပွမွဲမွဲအဲပဟွံမာန် သာ်ဝွံ ဟီုရ။ ဟိုတ်နူဂှ် ဍုၚ်ဂှ် ခုတ်ယၟုဍုၚ်ဇောဝ်ရအိုတ်ရ။ ^၂၃ကာလလဝ်တမလုပ်ဍုၚ်ဇောဝ်ရဂှ် ဒှ်အခိၚ်တ္ၚဲမတိုန်ပ္ဍဲလတူတိဇၞော်ရောၚ်။ ^၂၄ပ္ဍဲကာလဂှ် ကျာ်ထာဝရဝွံ နူကဵုထာန်တဳလပိုန်ပ္ဍဲလတူအကာသဂှ် ဗြဲဂန်ဓိုက်ကဵုပၟတ်ဂှ် ကဵုဂူပ္ဍဲလတူဍုၚ်သောဝ်ဍောမ်ကဵုဍုၚ်ဂေါဝ်မောဝ်ရရ။ ^၂၅တေံဍုၚ်တံဂှ်လေကီု၊ မွဲဂၠးဒေသခလံက်ဂှ်လေကီု၊ ဆမကၠုတ်တိုန်ပ္ဍဲတိဂှ်လေကီုကျာ်ပၠောတ်ဗ္ကပ်တဴရ။ ^၂၆သမ္ဘာလဝ်တမ္ဂးဂှ်၊ ကလေၚ်ရံၚ်လက်ကရဴတုဲ ဒှ်အာတိုၚ်ၜိုဝ်ရ။

^၂၇အာဗြဟာမ်ဝွံ က္တဵုနူဂယးပြဟ်တုဲ၊ အာပ္ဍဲဒေသမဒတဴဒၟံၚ်ပ္ဍဲဂတကျာ်ထာဝရတုဲမ္ဂး၊ ^၂၈မပ္တံကဵုဍုၚ်သောဝ်ဍောမ်ဍုၚ်ဂေါဝ်မောဝ်ရ တုဲ အလုံမွဲဂၠးဒေသခလံက်ဂှ် ရံၚ်မွဲတုဲ၊ ညံၚ်နဲယက်ပၟတ်ဖဴဂှ် ယက်အလုံမွဲရးတိုန်အာဂှ် ညာတ်တဴရ။ ^၂၉သာ်ဂှ် ကာလကျာ်ဂမျိုၚ်မပလီုပလာ်ဍုၚ်မနွံပ္ဍဲခလံက်တံဂှ်၊ ကျာ်ဗှ်သၞာအာဗြဟာမ်ရ။ ကာလမပၠောတ်ဗ္ကပ် ဍုၚ်လဝ်တမမံၚ်တံဂှ်၊ နူကဵုဒမံၚ်မပၠောတ်ဗ္ကပ်ဂှ် ကျာ်ဗလးဏာလဝ်တတဴရ။

^၃၀လဝ်တဝွံ တိတ်အာနူဍုၚ်ဇောဝ်ရတုဲ၊ ကောံကုကောန်ဗြဴၜါမွဲစွံဂှ် မံၚ်ပ္ဍဲလတူဒဵုရ။ ပ္ဍဲဍုၚ်ဇောဝ်ရဟွံဂွံမံၚ်တုဲ၊ ကောံကုကောန်ဗြဴဇကုၜါမွဲစွံမံၚ်မံၚ်ပ္ဍဲဥမၚ်ရ။ ^၃၁ကောန်ဗြဴဇၞော်ဝွံ၊ မပိုဲဗျုရ။ အတိုၚ်ဘာသာကောန်တိဇၞော်အိုတ်သီုတံဂှ်၊ တြုံမဂွံလုပ်ပ္ဍဲဇရေၚ်ပိုဲညးပ္ဍဲလတူတိဇၞော်ဆဟွံမွဲ။ ^၃၂ကၠုၚ်အိုတ်။ ဖျုၚ်ဍာ်ဇဗျေတ်ကဵုမပိုဲညးအိုတ်စိုအ်။ မၚ်မွဲတၞောဝ်ဒတောဝ်မပိုဲညးတုဲ တိက်ကဵုညးအိုတ်စိုအ် သာ်ဝွံ ဟီုကဵုဒေံညးဂှ်ရ။ ^၃၃ပ္ဍဲဗ္တံတ္ၚဲဂှ် ညးတံဖျုၚ်ဍာ်ဇဗျေတ်ကဵုမညးတံတုဲ၊ ကောန်ဇၞော်လုပ်တိက်ကဵုမညးရ။ ဒတိတ်ဒဒှ်ညးမတိက်ဂှ်လေကီု၊ ဒးတိတ်ဒဒှ်ညးမက္တဵုဂှ်လေကီု။ မညးဟွံတီ။ ^၃၄ပ္ဍဲယးဂတဂှ် ညးဇၞော်ဂှ်လေ၊ လက္ကနေံဗ္တံအဲတိက်ကဵုမပိုဲတုဲရ။ ဗ္တံတ္ၚဲဝွံ မွဲဝါပၠန်ဖျုၚ်ဍာ်ဇဗျေတ်ကဵုညးအိုတ်စိုအ်။ မၞးဝွံ လုပ်တုဲ တၞဟ်နသၟိက်ဂွံမၚ်မွဲတၞောဝ်ဒတောဝ်မပိုဲဂှ် တိက်ကဵုညးရ သာ်ဝွံ ဟီုကဵုဒေံဇကုရ။ ^၃၅ပ္ဍဲဗ္တံတ္ၚဲဂှ်လေ ညးတံဝွံ ဖျုၚ်ဍာ်ဇဗျေတ်မကဵုညးတံတုဲ၊ ညးဍောတ်ဝွံ လုပ်တိက်ကဵုမညးရ။ ဒဒှ်ညးမတိက်ဂှ်လေကီု၊ ဒးဒှ်ညးမက္တဵုဂှ်လေကီု၊ မညးဟွံတီ။ ^၃၆သာ်ဂှ် ကောန်ဗြဴလဝ်တၜါတံဝွံ နကဵုမဇကုတံဂှ် ကေတ်ဒၟံၚ်ပ္တိသန္ဓိအိုတ်ရ။ ^၃၇ကောန်ဗြဴဇၞော်ဝွံ သၠးဂဗ္ဘကောန်တြုံတုဲ ခုတ်ယၟုမဝ်ၜရ။ တေံညးဝွံ မဒှ်ကောန်ဂကူမဝ်ၜမနွံဒဵုကဵုတ္ၚဲဝွံရောၚ်။ ^၃၈ကောန်ဗြဴဍောတ်ဂှ်လေ သၠးဂဗ္ဘကောန်တြုံတုဲ ခုတ်ယၟုၜေနာမ္မိရ။ တေံညးဝွံ မဒှ်ကောန်ဂကူအာမ္မောန်မနွံဒဵုကဵုတ္ၚဲဝွံရောၚ်။