သၠပတ်ပထမကဝ် ၂၀

သၠ​ပတ်​ပ​ထ​မ​ကဝ် ၂၀

^၁မွဲဝါပၠန်၊ အာဗြဟာမ်အာတရဴပ္ဍဲရးသမၠုၚ်ကျာတုဲ၊ မံၚ်အကြာဍုၚ်ကာဍေသှကဵုဍုၚ်သှုရမ္ဂး၊ ဒှ်မံၚ်တၟုဲပ္ဍဲဍုၚ်ဂေရာရ။ ^၂ပ္ဍဲကာလဂှ် သမ္ဘာညးသာရာဝွံ ဒှ်ၝဲညးရ သာ်ဝွံ ဟိုတ်အာဗြဟာမ်မဟီုကဵုညးတၞဟ်သ္အာၚ်တံဂှ်၊ သၟီဇၞော်ဂေရာအၝိမလေက်ဝွံ ဗလးမၞိဟ်ဇကုတုဲ ကဵုကေတ်သာရာရ။ ^၃ပ္ဍဲပယာံဗ္တံနကဵုမလ္ပံညာတ်ဂှ် ကျာ်ဂမျိုၚ်ဝွံ က္ညကၠုၚ်ပ္ဍဲဇရေၚ်အၝိမလေက်တုဲ၊ မၞးဝွံ ဒှ်မၞိဟ်ချိုတ်ရ။ ဟိုတ်မ္ဂးဂှ် မၞိဟ်ဗြဴမၞးမကေတ်ဂှ် ဒှ်သမ္ဘာညးရ သာ်ဝွံ ဟီုပၟိၚ်ရ။ ^၄အၝိမလေက်ဝွံ ဟွံပံၚ်ဖက်ကဵုမၞိဟ်ဗြဴဂှ် ဏီဂှ်ဒှ်တုဲ၊ နာဲကျာ်အဲ၊ ဂကူမၞိဟ်သ္တပ်လ္ဂူဂှ် တဳလပိုန်ကောပ်ၝေတ်ရောၚ်ဟာ။ ^၅ညးဝွံ ဒှ်ၝဲအဲ သာ်ဝွံ မၞိဟ်တြုံဟီုကဵုအဲဍိက်ဟွံသေၚ်ဟာ။ ညးဝွံ ဒှ်ဒေံအဲ သာ်ဝွံ မၞိဟ်ဗြဴဟီုဟွံသေၚ်ဟာ။ သူစရိုတ်မသ္တပ်လ္ဂူနွံတုဲ၊ နကဵုတဲမသ္အးဇ္ၚးအဲဍိက်ပပွဝွံတုဲရ သာ်ဝွံ ဟီုပ္တီရ။

^၆ပ္ဍဲလ္ပံဂှ် ကျာ်ဂမျိုၚ်ဂှ်လေ၊ သ္ဍာံရ။ မၞးဝွံ နကဵုသူစရိုတ်မသ္တပ်လဂူမပဂှ် အဲတီရ။ ညံၚ်မၞးဟွံဂွံလုတ်အာကဵုအဲဂှ် အဲဆဳဒနာမၞးရ။ သာ်ဂှ်ဒှ်တုဲ၊ အခေါၚ်ဂွံပံၚ်ဖက်ကဵုမၞိဟ်ဗြဴဂှ် အဲဟွံကဵု၊ ^၇လၟုဟ်ဝွံ သမ္ဘာညးကလေၚ်ကဵုပ္ဍဲညးရ။ ညးဝွံ ဒှ်ပရဝ်ဖေတ်ရ။ သွက်မၞးညးဒုၚ်ဂုန်မ္ဂး၊ မၞးဝွံ ဂွံဂျိုၚ်လမျီုရောၚ်။ ဟွံကလေၚ်ကဵုမ္ဂး၊ မပ္တံကဵုမၞးတုဲ ညးမဆေၚ်ကဵုမၞးအိုတ်သီုတံဝွံ ချိုတ်ဨကန္တရောၚ် သာ်ဝွံ ဟီုပၟိၚ်ရ။

^၈နူဂယးပြဟ် အၝိမလေက်က္တဵုတုဲ၊ ကော်ဍိက်ဇကုအိုတ်သီုတံမ္ဂးဂှ်၊ ဟီုပၟိၚ်အရာသီုဖအိုတ်တံဂှ်တုဲ၊ တေံညးတံဝွံ ဖေက်ဗွဲမလောန်အိုတ်ရ။ ^၉အၝိမလေက်ကော်အာဗြဟာမ်တုဲ၊ မၞးဝွံ မူပပ္ဍဲပိုဲညးရော။ ပိုဲညးဝွံ ပ္ဍဲမၞးမူဒုဟ်မွဲမွဲပတုဲ၊ မၞးဝွံ ပ္ဍဲအဲဂှ်လေကီု၊ ပ္ဍဲရးနဳဂီုဂှ်လေကီုဒုဟ်ဗွဲမဇၞော်ကဵုစိုပ်ရော။ မၞးဝွံ ပွဟွံဂေါဝ်ပဂှ် ပပ္ဍဲအဲရသွံ သာ်ဝွံ ဟီုတဴရ။ ^၁၀မွဲဝါပၠန်အၝိမလေက်ဝွံ မၞးဝွံ မူပွညာတ်တုဲ ပသာ်ဂှ်ရော သာ်ဝွံ သၟာန်အာဗြဟာမ်မ္ဂး၊ ^၁၁အာဗြဟာမ်ဝွံ၊ မၞိဟ်ဒေသဝွံတံဂှ် ဟွံဖေက်ကျာ်ဂမျိုၚ်၊ အကွက်သမ္ဘာအဲဍိက်ဂှ် ဂစိုတ်အဲဍိက် အိုတ်ရောၚ် သာ်ဝွံ ဟိုတ်အဲဍိက်မသၠေဟ်ဂှ် အဲဍိက်ပဒးသာ်ဂှ်ရ။ ^၁၂ၜိုန်ဂှ်လေ ညးဝွံ ဒှ်ၝဲအဲဍိက်သ္ဍာံသၟတ်ရ။ ဒှ်ကောန်မအဲဍိက်ရ။ ဒှ်ကောန်မိဟွံသေၚ်။ ဒှ်သမ္ဘာအဲဍိက်ကီုရ။ ^၁၃ကျာ်ဂမျိုၚ်ဝွံ ကော်အဲဍိက်နူသ္ၚိမတုဲ၊ ကာလမကဵုဂၚေၚ်အာဂှ် အဲဍိက်ဝွံ ဂုန်မၞးမဒးပပ္ဍဲအဲမ္ဂးဂှ် အဲဝွံ ဒဒှ်မဒှ်ဒေံမၞးဂှ်၊ မူဒေသမစိုပ်မွဲမွဲဂှ် ဒးဟီုရောၚ် သာ်ဝွံ ဗ္ကန်လဝ်ကဵုသမ္ဘာရ သာ်ဝွံ ကလေၚ်ဟီုရ။ ^၁၄ပ္ဍဲကာလဂှ် အၝိမလေက်ဝွံ သဵု၊ ဂၠဴ၊ ဍိက်တြုံဍိက်ဗြဴတံဂှ် ကေတ်တုဲ ကဵုပ္ဍဲအာဗြဟာမ်ရ။ သမ္ဘာသာရာဂှ်လေ ကလေၚ်ကဵုရ။ ^၁၅အၝိမလေက်ဂှ်လေ တိအဲဝွံ နွံဂတမၞးရ။ အတိုၚ်ပၟိက်မနွံဂှ် မံၚ်ညိ သာ်ဝွံ ဟီုပၟိၚ်ရ။ ^၁၆ပ္ဍဲကဵုသာရာဂှ်လေ၊ သွက်မၞးကဵုပွံၚ်ဖွက်မၞးဂှ်၊ ညံၚ်ဂွံရာန်သွက်ဂွံဂြောပ်မုက်ဂမၠိုၚ်ဂှ်၊ ပ္ဍဲကဵုဒေံမၞးဂှ် အဲကဵုသြန်မွဲလ္ၚီတုဲရ သာ်ဝွံ အသံနွံတုဲ၊ ညးဝွံလေ ပ္ဍဲဇၟာပ်အရာအိုတ်သီုတံဂှ် ဂွံဒုၚ်ဝေတ်ဗ္တောန်ရ။

^၁၇အာဗြဟာမ်ဝွံ ဒုၚ်ဂုန်ကျာ်ဂမျိုၚ်တုဲ၊ ကျာ်ဂမျိုၚ်ဝွံ အၝိမလေက်ကဵုသမ္ဘာညးဍိက်ဗြဴညးဂမၠိုၚ်တံဂှ် ကဵုဗၠးနူယဲမ္ဂး၊ ညးတံဝွံ သၠးဂဗ္ဘကောန်အိုတ်ရ။ ^၁၈ကၠာဂှ် ဟိုတ်နူဗြဴအာဗြဟာမ်သာရာဂှ်၊ကျာ်ထာဝရဝွံ ညးသ္ၚိအၝိမလေက်၊ ဆဗၞတ်မၞိဟ်ဗြဴမွဲဂှ် တၞဟ်နဟွံမိက်ကဵုကေတ်ပ္တိသန္ဓိတုဲ စဳရေၚ်တဴရောၚ်။