သၠပတ်ပထမကဝ် ၂၁
သၠပတ်ပထမကဝ် ၂၁
[ပလေဝ်ဒါန် | ပလေဝ်ဒါန် တမ်ကၞက်]၁ကျာ်ထာဝရဝွံ အတိုၚ်မဟီုပၟိၚ်ဂှ်၊ က္ညရံၚ်မွဲသာရာတုဲ၊ သၟဟ်သမောန်ကဵုဂတိတဳလပိုန်မနွံဂှ် ပပ္ဍဲညးမ္ဂး။ ၂သာရာဝွံ တန်ပ္တိသန္ဓိတုဲ၊ ပ္ဍဲအခိၚ်မသမောဲလဝ်နကဵုအသံကျာ်ဂမျိုၚ်ဂှ် ကာလအယုက်အာဗြဟာမ်မဇၞော်ဂှ်၊ ပ္ဍဲကဵုညးသၠးကောန်တြုံရ။ ၃အာဗြဟာမ်ဂှ်လေ ကောန်ဇကုမဂွံမတွံဂးကောန်တြုံသာရာမသၠးဂှ် ခုတ်ယၟုဣဇက်ရ။ ၄အတိုၚ်ကျာ်ဂမျိုၚ်မဗ္ကန်လဝ်ဂှ်၊ အာဗြဟာမ်ဝွံ ပ္ဍဲမပေၚ်ဒစာံတ္ၚဲဂှ် ပ္ဍဲကောန်တြုံဣဇက်ဂှ် ကဵုမၚ်္ဂလရေက်တဏုၚ်သၞာံရ။ ၅ပ္ဍဲကာလမညာတ်မုက်ကောန်တြုံဣဇက်ဂှ်၊ အာဗြဟာမ်ဝွံ နွံအယုက်ကၠံသၞာံရောၚ်။ ၆သာရာဂှ်လေ၊ အခေါၚ်အဲဂွံဂြိုၚ်ဂှ် ကျာ်ဂမျိုၚ်ကဵုတုဲရ၊ ညးမမိၚ်ပရိုၚ်ဝွံ အိုတ်သီုတံဂှ်လေ၊ ကောံကုအဲမွဲစွံဂြိုၚ်အိုတ်ရောၚ် သာ်ဝွံဂှ်လေကီု၊ ၇သာရာဝွံ ဗမဴတဟ်ကဵုကောန်ရောၚ် သာ်ဝွံ ကဵုအာဗြဟာမ်ညးဂှ် ဂွံဟီုရရော။ ဟိုတ်ဂှ်ရ ကာလအယုက်မဇၞော်ညးဂှ် အဲမသလးကောန်တြုံရ သာ်ဝွံဂှ်လေကီု ဟီုတဴရ။ ၈တေံသၟတ်ဣဇက်ဝွံ ဇၞော်တိုန်တုဲ ပိုတ်အာတဟ်ရ။ ပ္ဍဲတ္ၚဲမပိုတ်တဟ်ဂှ် အာဗြဟာမ်ဝွံ ပဒှ် ပေါဲဇၞော်ရ။
၉ကောန်တြုံအာဗြဟာမ်မဂွံ ပ္ဍဲဟာဂရကောန်ဂကူအာဲဂုပ္တုဂှ် ဒဒှ်မဂြိုၚ်ဂှ် သာရာညာတ်မ္ဂး ၁၀ဍိက်ဗြဴဝွံ ကဵုကောန်ညးဂှ် ဗက်ပ္တိတ်ရ။ ကောန်ဍိက်ဗြဴဝွံဂှ် ကောံကုကောန်အဲမွဲစွံဟွံဂွံဒုၚ်အာဲကၟာဲ သာ်ဝွံ ဟီုကဵုအာဗြဟာမ်ရ။ ၁၁အာဗြဟာမ်ဂှ်လေ ဟိုတ်မဒှ်ကောန်ဇကုဂှ် တေံပွဝွံ ဝါတ်ဗွဲမလောန်ရ သာ်ဝွံ သေလေဟ်ရ။ ၁၂ဒှ်သာ်ဂှ်တုဲ ကျာ်ဂမျိုၚ်ဝွံ၊ ဟိုတ်နူကဵုတေံသၟတ်ဝွံ ကဵုဍိက်ဗြဴမၞးဂှ် ပွဝွံ ဝါတ်ရ သာ်ဝွံ လ္ပသၠေဟ်။ ပ္ဍဲဒမံၚ်ဆသာရာမဟီုဂှ် ကလၚ်ဂလာန်ညးရ။ ဟိုတ်မ္ဂးဂှ် ဆပ္ဍဲဣဇက်ဂှ် ဂကူမၞးတန်ရောၚ်။ ၁၃ကောန်ဍိက်ဗြဴဝွံ ဟိုတ်မဒှ်ဂကူမၞးဂှ် ညးဂှ်လေ အဲကဵုဒှ် ဂကူမၞိဟ်ရောၚ် သာ်ဝွံ ဟီုပၟိၚ်ကဵုအာဗြဟာမ်ရ။
၁၄အာဗြဟာမ်ဝွံ က္တဵုနူဂယးပြဟ်တုဲ၊ ကေတ်ကွာၚ်ကဵုဗဳဍာ်မ္ဂး၊ ပ္တိုန်လတူပၞးဟာဂရတုဲ ပ္အပ်သၟတ်မ္ဂး ဗလးဏာဍိက်ဗြဴရ။ ညးဝွံ အာတုဲ ပ္ဍဲဂြိုပ်ၜေရသှေၜဂၚေၚ်ဒၟံၚ်ရ။ ၁၅ကာလဍာ်မအိုတ်အာပ္ဍဲဗဳဂှ်၊ စွံသၟတ်အသၟဝ်အုပ်တုဲ၊ ၁၆အဲဝွံ သၟတ်မချိုတ်ဂှ် ဟွံမိက်ညာတ် သာ်ဝွံ ဟီုမ္ဂး၊ သ္ၚဲသ္ၚဲၜိုတ်မွဲပန်တ္ၚအာတုဲ ပ္ဍဲဂတသၟတ်ဂှ် ဂဇံဒၟံၚ်ရ၊ ကာလဂဇံဒၟံၚ်သာ်ဂှ် ညးဝွံ ဗလးရမျှာၚ်တုဲ လရိုအ်တဴရ။ ၁၇ကျာ်ဂမျိုၚ်ဝွံ မိၚ်ရမျှာၚ်မၚ်ဗၠာဲတုဲ၊ ကလုတ်ကျာ်ဂမျိုၚ်နူအကာသဝွံ၊ ဟာဂရ၊ မူဒှ်ပ္ဍဲမၞးရော။ လ္ပဂွိၚ်။ နူဒေသမၚ်ဗၠာဲမနွံဂှ် ကျာ်ဂမျိုၚ်မိၚ်ရမျှာၚ်ညးတုဲရ။ ၁၈က္တဵုရ။ ပၚ်ပ္တိုန်မၚ်ဗၠာဲတုဲ ထၜကဵုတဲရ။ အဲဝွံ မကဵုညးဒှ်ဂကူမၞိဟ်ဇၞော်ရောၚ် သာ်ဝွံ နူအပ္ဍဲအာကာသကော်တုဲ ဟီုကဵုဟာဂရရ။ ၁၉ပ္ဍဲကာလဂှ် ကျာ်ဂမျိုၚ်ဝွံ ပံက်မတ်ဟာဂရတုဲ၊ ညးဝွံ ညာတ်ဍာ်ပလိုၚ်မ္ဂး အာဗပေၚ်ဗဳကဵုဍာ်တုဲ၊ ဖျုၚ်ဍာ်ကဵုမၚ်ဗၠာဲရ။ ၂၀ပ္ဍဲလ္ပာ်မၚ်ဗၠာဲဂှ်လေ ကျာ်ဂမျိုၚ်နွံရ။ ညးဝွံ ဇၞော်တိုန်တုဲ မံၚ်ပ္ဍဲဂြိုပ်မ္ဂ။ ဒှ်အာညးမပန်တ္ၚရ။ ၂၁မံၚ်ပ္ဍဲဂြိုပ်ပါရာန်ဂှ်ဒှ်တုဲ၊ မိညးဝွံ နူကဵုရးအာဂုပ္တုကော်ဗြဴမွဲမ္ဂး ကဵုပံၚ်ဖက်ကဵုညးရ။
၂၂ပ္ဍဲကာလဂှ်၊ သၟီအၝိမလေက်ကဵု ဂအုပ်ဗိုဝ်ဖိကောဝ်လတံဝွံ ကော်အာဗြဟာမ်တုဲ၊ ပ္ဍဲပွဆမၞးမပဂှ် ကျာ်ဂမျိုၚ်မနွံလ္ပာ်မၞးရ။ ၂၃ဒှ်သာ်ဂှ်တုဲ မၞးဝွံ အဲဂှ်လေကီု၊ ကောန်အဲဂှ်လေကီု၊ စဴအဲဂှ်လေကီုဟွံလီစ၊ ညံၚ်နဲအဲမပဂုန်ပ္ဍဲမၞးဂှ်၊ ပ္ဍဲအဲဂှ်လေကီု၊ ပ္ဍဲရးမၞးမမံၚ်တၟုဲဂှ်လေကီု ပဂုန်ရောၚ် သာ်ဝွံ ပအဓိဌာန်ကဵုကျာ်ဂမျိုၚ်တုဲ ဒုၚ်သွဴကဵုအဲရ သာ်ဝွံ ဟီုတဴရ။ ၂၄အာဗြဟာမ်ဂှ်လေ၊ အတိုၚ်ဂှ် အဲဒုၚ်သွဴရောၚ် သာ်ဝွံ ကလေၚ်ဟီုရ။ ၂၅ဟိုတ်ဍာ်ပလိုၚ်ဍိက်အၝိမလေက်တံမကေတ်အနိၚ်အပိုၚ်ဂှ် အာဗြဟာမ်နၚ်ဒုဟ်ကဵုအၝိမလေက်ရ။ ၂၆သၟီအၝိမလေက်ဂှ်လေ၊ ပွဝွံ ညးဂှ် ပအဲဟွံတီ။ မၞးဝွံ ဟွံဟီုကဵုအဲ၊ အဲဂှ်လေ ဒဵုကဵုတ္ၚဲဝွံ ဟွံဂွံမိၚ် သာ်ဝွံ ဟီုရ။ ၂၇အာဗြဟာမ်ဂှ်လေ ကေတ်သဵုဂၠဴတံဂှ်တုဲ ကဵုပ္ဍဲအၝိမလေက်မ္ဂး။ တေံညးၜါတံဝွံ ဒက်ကတ္တိကအိုတ်ရ။ ၂၈အာဗြဟာမ်ဝွံလေ ကောန်သဵုၝောံထပှ်ပါ်ပ္တိတ်နူကဵုသဵုဒကံတုဲ စွံလဝ်ရ။ ၂၉အၝိမလေက်ဂှ်လေ၊ ကောန်သဵုၝောံထပှ်မပါ်လဝ်ဂှ် ပသာ်ရော သာ်ဝွံ ဟီုမ္ဂး၊ ၃၀အာဗြဟာမ်ဝွံ ဍာ်ပလိုၚ်ဝွံဂှ် အဲခါဲတုဲရ သာ်ဝွံ ကောန်သဵုၝောံထပှ်ဝွံဂှ် တၞဟ်နသၟိက် ပသက်သဳလ္ပာ်အဲဂှ်၊ ညးတံဂှ် မၞးဒးဒုၚ်ကေတ်နူတဲအဲရောၚ် သာ်ဝွံ ဟီုရ။ ၃၁ဒှ်သာ်ဂှ်တုဲ တေံညးၜါတံဝွံ ဟိုတ်မဒုၚ်သွဴပ္ဍဲဒေသဂှ်၊ တေံဒေသဂှ် ၜေရသှေၜဂှ် ကော်ခဴအိုတ်ရ။ ၃၂သာ်ဂှ် ဒက်ကတ္တိကပ္ဍဲဒေသၜေရသှေၜအိုတ်ရ။ အၝိမလေက်ကဵုဂအုပ်ဗိုဝ်ဖိကောဝ်လတံဝွံ က္တဵုတုဲ ကလေၚ်အာပ္ဍဲရးဖိလိတ္တိအိုတ်ရ။
၃၃အာဗြဟာမ်ဝွံ တဵုတၞံမၚ်ဂၠန်ပ္ဍဲဒေသ ၜေရသှေၜတုဲ၊ ပပတ္တဏာကဵုနာမကျာ်ထာဝရမတွံဂးကျာ်မတန်ဒၟံၚ်လမိုန်ကာလရ။ ၃၄ပ္ဍဲရးဖိလိသှတိကာလဂပ်မလံဂှ် ဒၟံၚ်ကၟုဲရ၊