သၠပတ်ပထမကဝ် ၂၂
သၠပတ်ပထမကဝ် ၂၂
[ပလေဝ်ဒါန် | ပလေဝ်ဒါန် တမ်ကၞက်]၁ကြဴဂှ် ကျာ်ဂမျိုၚ်ဝွံ တၞဟ်နသၟိက်စံၜတ်အာဗြဟာမ်ဂှ် ကော်အာဗြဟာမ်တုဲ၊ အာဗြဟာမ်ဂှ်လေ၊ အဲဍိက်နွံရသာ်ဝွံ ဟီုပ္တီမ္ဂး၊ ၂မၞးဝွံ ကောန်မၞးဆမွဲဣဇက်၊ ကောန်မဆာန်လောန်ဂှ် ကေတ်တုဲ၊ အာပ္ဍဲရးမဝ်ရိရ။ ပ္ဍဲလတူဒဵုအဲမထၜးဂှ် ညးဂှ် ပယတ်မစံၚ်ပၟတ်တုဲ ပူဇဴရ သာ်ဝွံ ဟီုပၟိၚ်တဴရ။
၃အာဗြဟာမ်ဝွံ က္တဵုနူဂယးပြဟ်တုဲ၊ ပ္တိုန်ဖုန်မာဲမ္ဂး၊ ကော်ကောန်ဇကုဣဇက်ကဵုကောန်ရဲၜါတုဲ၊ သွက်ဂွံစံၚ်ယတ်ကရေက်အောဟ်တုဲမ္ဂး၊ ပ္ဍဲဒေသကျာ်ဂမျိုၚ်မဟီုပၟိၚ်ဂှ် က္တဵုအာရ။ ၄ပ္ဍဲမပေၚ်ပိတ္ၚဲရံၚ်မွဲတုဲ၊ ညာတ်အာဒေသဂှ် နူဇမ္ၚောဲမ္ဂး၊ ၅ပ္ဍဲကဵုကောန်ရဲၜါဂှ်၊ မၞးတံဝွံ ပ္ဍဲဒေသအဲဂှ် ကောံကုမာဲမွဲစွံမၚ်အိုတ်ရ။ အဲဝွံ ကောံကုမၚ်ဗၠာဲမွဲစွံအာပ္ဍဲဒေသတေံတုဲ၊ ပဒဒှ်မရေဟ်သေဟ်ရောၚ်။ အမှုတေံဂှ် တုဲဒှ်တုဲ၊ ပ္ဍဲဇရေၚ်မၞးတံကၠုၚ်ပၠန်ရောၚ် သာ်ဝွံ ဟီုတဴရ။ ၆ပ္ဍဲကာလဂှ် ကေတ်အောဟ်သွက်ဂွံစံၚ်ယတ်တုဲ၊ ပ္တိုန်လတူကောန်ဣဇက်တုဲ၊ ရပ်ကေတ်ပၟတ်ကဵုမြပ္ဍဲတဲဇကုမ္ဂး ညးၜါမွဲစွံအာအိုတ်ရ။ ၇ဝါရမအာအိုတ်ဂှ် ဣဇက်ဝွံ ပ္ဍဲကဵုမညးအာဗြဟာမ်ဂှ် မအံက်၊ သာ်ဝွံ ကော်တုဲ၊ ကောန်၊ အဲနွံမံၚ်ရ သာ်ဝွံ အာဗြဟာမ်ကလုက်တဴရ။ ဣဇက်ဂှ်လေ၊ ပၟတ်ပါရ။ အောဟ်လေ ပါရ။ သဵုသၟတ်သွက်ဂွံစံၚ်ယတ်ဂှ် မူဒၞာဲမနွံရော သာ်ဝွံ သၟာန်မ္ဂး၊ ၈အာဗြဟာမ်ဝွံ သဵုသၟတ်သွက်ဂွံစံၚ်ယတ်ဂှ် ကျာ်ဂမျိုၚ်ဝွံ ပြုပြေၚ်သွက်ဇကုရောၚ် သာ်ဝွံ ဟီုတဴရ။ ၉သာ်ဂှ် ညးၜါအာမွဲစွံမ္ဂး ကာလမစိုပ်အာပ္ဍဲဒေသကျာ်ဂမျိုၚ်မဟီုပၟိၚ်ဂှ်၊ အာဗြဟာမ်ဝွံ ဒက်ပၞၚ်ယတ်တုဲ၊ လးအောဟ်မ္ဂး၊ ကၠေၚ်ဒက် ကောန်ဣဇက်တုဲ၊ ပ္တိုန်လဝ်လတူအောဟ်ပ္ဍဲပၞၚ်ယတ်ရ။ ၁၀ပၠးတဲဇကုတုဲ ညံၚ်ဂွံဂစိုတ်ကောန်ညးရပ်ကေတ်မြရ။ ၁၁ပ္ဍဲကာလဂှ်၊ ကလုတ်ကျာ်ထာဝရဝွံ အာဗြဟာမ်၊ အာဗြဟာမ် သာ်ဝွံ နူလတူအကာသကော်တဴရ။ အာဗြဟာမ်ဝွံ အဲဍိက်နွံရ သာ်ဝွံ ပ္တီမ္ဂး၊ ၁၂လ္ပဒိဒးမၚ်ဗၠာဲဂှ်ရ။ လ္ပပမွဲသာ်ရ။ မၞးဝွံ ဖေက်ဒၟံၚ်ကျာ်ဂမျိုၚ်ရ သာ်ဝွံ လၟုဟ်အဲတီရ။ ဟိုတ်မ္ဂးဂှ် ကောန်မ္ဂး၊ ကောန်ဆမွဲမနွံပ္ဍဲမၞးဂှ် အဲအာတ်တုဲ မၞးဝွံ ဟွံပါဲအဲ သာ်ဝွံ ဟီုပၟိၚ်ရ။
၁၃ပ္ဍဲကာလဂှ် အာဗြဟာမ်ဝွံ လၟဳရံၚ်တုဲ၊ လက်ကရဴဇကုဒြၚ်ဍေံခက်ဒၟံၚ်အုပ်ဂှ် ညာတ်သဵုမွဲရ။ တေံသဵုဂှ် အာကေတ်တုဲ၊ စဏးကောန်ဇကုပယတ်မစံၚ်ပၟတ်မ္ဂး ပူဇဴရ။
၁၄ဒေသဂှ် ယေဟောဝ်ဝါယိရေ သာ်ဝွံ အာဗြဟာမ်ကော်ခဴရ။ ညံၚ်နဲသာ်ဂှ် ပ္ဍဲလတူဒဵုကျာ်ထာဝရပြုပြေၚ်ရောၚ် သာ်ဝွံ ဒဵုကဵုတ္ၚဲဝွံ လဟီုနွံရောၚ်။
၁၅မွဲဝါပၠန်၊ ကလုတ်ကျာ်ထာဝရနူလတူအကာသကော်အာဗြဟာမ်မ္ဂး၊
၁၆မၞးပပွဝွံတုဲ၊ ကောန်မၞး၊ ကောန်ဆမွဲမနွံပ္ဍဲမၞးဟိုတ်ဟွံပါဲအဲဂှ် ၁၇အဲဝွံ ကဵုပသေက်ပသဝ်ပ္ဍဲမၞးလအိတ်တွဵုရောၚ်။ ဂကူဝေါၚ်သမၞးဂှ်လေ၊ ညံၚ်ကဵုသၞံၚ်အကာသဂှ်လေကီု၊ ညံၚ်ကဵုဗတဳပ္ဍဲဇရေၚ်မှာသ္မိတ်ဂှ်လေကီုအဲကဵုဂၠိုၚ်တိုန်လ္အိတ်တွဵုရောၚ်။ ဂကူဝေါၚ်သမၞးဝွံ ဂွံအဝဵုပ္ဍဲတရၚ်ဍုၚ်သတ်တြုညးတံဂမၠိုၚ်ရောၚ်။ ၁၈နကဵုဂကူဝေါၚ်သမၞးဂှ် ဂကူမၞိဟ်အိုတ်သီုဂွံဒုၚ်မ္ၚဵုမၚ်္ဂလအိုတ်ရောၚ် သာ်ဝွံ ဟိုတ်မၞးမကလၚ်ဂလာန်အဲဂှ် အဲဝွံ ပသက်သဳကဵုဇကုတုဲ ဒုၚ်သွဴရ သာ်ဝွံ ကျာ်ထာဝရပ္တိတ်အသံရ။ ၁၉ပ္ဍဲကာလဂှ် အာဗြဟာမ်ဝွံ ကလေၚ်အာပ္ဍဲဒၞာဲ ကောန်ရဲညးနွံတုဲ ညးတံဝွံ က္တဵုမ္ဂး ဗက်အာပ္ဍဲဒေသၜေရသှေၜရ။ ပ္ဍဲဒေသတေံဂှ် အာဗြဟာမ်မံၚ်တဴရ။
၂၀ကြဴဂှ် အာဗြဟာမ်မိၚ်ပရိုၚ်မ္ဂးဂှ်၊ သမ္ဘာဏာခေါဝ်ကောမၞးမိလခါဝွံ သၠးဂဗ္ဘကောန်ဂမၠိုၚ်ရ။ ၂၁ကောန်ဂၠုဟုဇ၊ ဒေံညးၜုဇ၊ မအာရာမ်ကေမိုဲလ၊ ၂၂ခေသေဒ်၊ ဟာဇောဝ်၊ ပိလဍာသှ၊ ယိဍလာပ်၊ ၜေထိုဲလရောၚ် မတွံဂး၊ ၂၃ကောန်ဒစာံတံဂှ် သမ္ဘာဏာခေါဝ်ကောအာဗြဟာမ်မိလခါသၠးဂဗ္ဘရ။ ၜေထိုဲလမ္ဂးဂှ်၊ ဒှ်မေရေၜေကရောၚ်။ ၂၄ဗြဴဍောတ်ဏာခေါဝ်မနွံယၟုရုမာဂှ်လေ၊ တေၜ၊ ကာဟာမ်၊ ထဟာသှ၊ မာခါတံဂှ် သၠးဂဗ္ဘရ။