သၠပတ်ပထမကဝ် ၂၃

သၠ​ပတ်​ပ​ထ​မ​ကဝ် ၂၃

^၁သာရာဝွံ မနွံအယုက်ကၠံၜါစှ်ောထပှ်သၞာံရ။ ဆဗၞတ်ဂှ် အယုက်သာရာနွံတုဲ၊ ^၂ပ္ဍဲဍုၚ်ကိရိယထာၜမတွံဂးဍုၚ်ဟေဗြောန်ရးခါနာန်ဂှ် ချိုတ်အာရ။ အာဗြဟာမ်ဂှ်လေ ဟိုတ်နူသာရာဂှ် ညံၚ်ဂွံဒက်ဒေါန်ယာံဂကဝ်ဂှ် ကၠုၚ်ရ။

^၃အာဗြဟာမ်ဝွံ ပ္ဍဲဂတဇွသမ္ဘာဇကုက္တဵုတုဲ၊ ပ္ဍဲကဵုကောန်ဂကူဟေထတံ၊ ^၄အဲဝွံ ပ္ဍဲဇရေၚ်မၞးတံဂှ် မဒှ်ကၟုဲဂန္တုကရ။ တၞဟ်နသၟိက်ဂွံဗ္ဒန်မုက်တိုပ်ဇွသမ္ဘာအဲဂှ် ပ္ဍဲမၞးတံသုသာန်ဂှ် ကဵုအခေါၚ်ကဵုအဲညိ သာ်ဝွံ ဟီုရ။ ^၅ကောန်ဂကူဟေထဝွံ၊ နာဲပိုဲဍိက်တံ၊ ကလၚ်ညိ။ ^၆တလအဲဝွံ ပ္ဍဲပိုဲဍိက်တံမဒှ်သၟီမဆေၚ်ကဵုကျာ်ဂမျိုၚ်ရ။ ပ္ဍဲသုသာန်ပိုဲဍိက်တံဂမၠိုၚ်ဂှ် ရုဲတုဲ ဇွသမ္ဘာတလအဲဂှ် တိုပ်ညိ။ တၞဟ်နသၟိက်ဂွံတိုပ်ဇွသမ္ဘာတလအဲဂှ် ပ္ဍဲပိုဲဍိက်တံဆဗၞတ်ညးမွဲဟွံကဵုသုသာန်ဟွံမံၚ်ရ သာ်ဝွံ ကလေၚ်ဟီုကဵုအာဗြဟာမ်အိုတ်ရ။ ^၇အာဗြဟာမ်ဝွံ က္တဵုတုဲ ပ္ဍဲဂတကောန်ဂကူဟေထဂှ် ဂညိက်ဖျေံက္ဍိုပ်မ္ဂး၊ ^၈အဲဝွံ တၞဟ်နသၟိက်ဗ္ဒန်မုက်တိုပ်ဇွသမ္ဘာဂှ် မၞးတံပၟိက်နွံယဝ်ရသဒှ် ကလၚ်ဂလာန်အဲအိုတ်ညိ။ ^၉ပ္ဍဲမၞးတံ သုသာန်အဲမပိုၚ်ထိုက်တၞဟ်နသၟိက်ကဵုနွံဂှ်၊ ကောန်ဇောဝ်ဟာဨဖရောန်ဝွံ က္တိုၚ်တိမက်ပေလမနွံပ္ဍဲမုဟ်တိဗ္ၚဇကုဂှ် တၞဟ်နသၟိက်ကဵု သွံကုအဲနကဵုသြန်ဆမကြိုက်ကဵုၚုဟ်ဂှ် အကွက်အဲဒုၚ်ဂုန်ညးအိုတ်ညိ သာ်ဝွံ ဆက်ပါၚ်တုဲ ဟီုဂးရ။ ^၁၀ကာလဂှ် ဨဖရောန်ဝွံ ဂဇံဒၟံၚ်ပ္ဍဲကောန်ဂကူဟေထရ။ ဒှ်သာ်ဂှ်တုဲ ပူရိသာတ်ကောန်ဂကူဟေထမတွံဂးညးမလုပ်ပ္ဍဲတရၚ်ဍုၚ်အိုတ်သီုတံဂှ်၊ ကောန်ဂကူဟိတ္တိဨဖရောန်ဝွံ သာ်ဂှ် ဟွံသေၚ်။ ^၁၁နာဲအဲကလၚ်ဂလာန်အဲဍိက်ညိ၊ တေံတိဗ္ၚဂှ်လေကီု၊ က္တိုၚ်တိမနွံပ္ဍဲတိဗ္ၚဂှ်လေကီု အဲဍိက်ကဵုကုတလအဲရ။ တိုပ်ဇွသမ္ဘာတလအဲညိ သာ်ဝွံ ကလေၚ်ဟီုကဵုအာဗြဟာမ်ရ။

^၁၂အာဗြဟာမ်ဂှ်လေ ပ္ဍဲဂတကောန်ရးဂှ် ဂညိက်ဖျေံက္ဍိုပ်တုဲ၊ ဒှ်ကွေံရကလၚ်ဂလာန်အဲညိ။ ^၁၃အဲကဵုသြန်ၚုဟ်တိဗ္ၚဂှ်ရောၚ်၊ သြန်ဂှ် ကေတ်ရ။ ဒှ်သာ်ဂှ်တုဲ ပ္ဍဲဒေသဂှ် အဲတိုပ်ဇွသမ္ဘာအဲရောၚ် သာ်ဝွံ ပ္ဍဲဂတပူရိသာတ်ကောန်ရးဂှ် ဟီုကဵုဨဖရောန်ရ။ ^၁၄ဨဖရောန်ဂှ်လေ နာဲအဲဍိက်ကလၚ်ညိ၊ ^၁၅တေံတိဂှ် မကြိုက်ကဵုၚုဟ်သြန်ပန်ပသာရ။ ပ္ဍဲတလအဲကဵုအဲဍိက်ဂှ် မူအကွက်နွံရော။ ဇွသမ္ဘာတလအဲဂှ် တိုပ်ညိ သာ်ဝွံ ဟီုကဵုအာဗြဟာမ်ရ။ ^၁၆အာဗြဟာမ်ဝွံလေ ကလၚ်ဂလာန်ဨဖရောန်ဂှ်ဒှ်တုဲ၊ ဂကူသြန်မၞိဟ်ဗၞိက်မလေပ်စကာ၊ အတိုၚ် ဨဖရောန်မဟီုၚုဟ်မးပ္ဍဲဂတပူရိသာတ်ကောန်ဂကူဟေထဂှ်၊ ကေဝ်သြန်ပန်ပသာတုဲ ကဵုပ္ဍဲညးရ။ ^၁၇သာ်ဂှ် တိဗ္ၚဨဖရောန် မနွံပ္ဍဲဒေသမက်ပေလပ္ဍဲဂတဍုၚ်မာမ်ရေဂှ်လေကီု၊ က္တိုၚ်တိကဵုတၞံဆုမနွံပ္ဍဲတိဗ္ၚဂမၠိုၚ်တၞံဆုပွဳဗွိုၚ်ဂှ်လေကီု၊ ^၁၈ပ္ဍဲပူရိသာတ်ကောန်ဂကူဟေထ၊ ပ္ဍဲဂတညးမလုပ်တရၚ်ဍုၚ်အိုတ်သီုတံဂှ် သွက်ဒြပ်အာဗြဟာမ်ပ္အပ်ကဵုဗိုန်ဗိုန်ရ။

^၁၉ကြဴဂှ် အာဗြဟာမ်ဝွံ ပ္ဍဲဂတဍုၚ်မာမ်ရေ၊ ပ္ဍဲက္တိုၚ်တိဗ္ၚမက်ပေလဂှ် ဂွံတိုပ်သမ္ဘာညးသာရာရ။ တေံဒေသမ္ဂးဂှ်၊ ဒှ်ဒေသဟေဗြောန်ရးခါနာန်ရောၚ်။ ^၂၀တေံတိဗ္ၚကဵုက္တိုၚ်တိဂှ် တၞဟ်နသၟိက်ကဵုဒှ်သုသာန်အာဗြဟာမ်မပိုၚ်ထိုက်ဂှ်၊ ကောန်ဂကူဟေထတံဝွံ ပ္အပ်ကဵုဗိုန်ဗိုန်အိုတ်ရ။