သၠပတ်ပထမကဝ် ၂၄

သၠ​ပတ်​ပ​ထ​မ​ကဝ် ၂၄

^၁အာဗြဟာမ်ဝွံ ဗျုတုဲ အယုက်မဇၞော်ဂၠိၚ်ရ။ ကျာ်ထာဝရဝွံ ပ္ဍဲဇၟာပ်အရာအိုတ်သီုမကဵုမ္ၚဵုပ္ဍဲညးတုဲရ။ ^၂အာဗြဟာမ်ဝွံ ပ္ဍဲကောန်သ္ၚိဇကုအယုက်ဇၞော်တုဲ ညးမပဇမၞော်ဗာန္ဒာဂှ် ကော်မ္ဂး၊ ^၃မၞးဝွံ ပ္ဍဲဗြဴကောန်ဂကူခါနာန်ရးအဲမမံၚ်တံဂှ် သွက်ကောန်အဲသမ္ဘာဟွံရုဲကေတ်တုဲ၊ ^၄အာပ္ဍဲအဲရးအဲ၊ ပ္ဍဲကလောဝေါၚ်သအဲမ္ဂး၊ သွက်ကောန်အဲဣဇက်ဒးကေတ်သမ္ဘာရောၚ် သာ်ဝွံ၊ တဲမၞးစွံအသၟဝ်ဒဳအဲတုဲ၊ ပသက်သဳကဵုကျာ်ထာဝရ၊ တလအကာသတိဇၞော်ဂမျိုၚ်မ္ဂး အဲကဵုဒုၚ်သွဴရောၚ် သာ်ဝွံ ဟီုရ။ ^၅ဍိက်ဂှ်လေ မၞိဟ်ဗြဴဝွံ ယဝ်ရဟွံမိက်ဗက်ကၠုၚ်ပ္ဍဲရးဝွံမ္ဂး ပ္ဍဲရးတလ အဲမတိတ်ကၠုၚ်ဂှ် အဲဍိက်ဒးကော်ဏာ ကောန်တလအဲရောၚ် သာ်ဝွံ သၟာန်တုဲ၊ ^၆အာဗြဟာမ်ဝွံ ပ္ဍဲရးဂှ် လ္ပကော်ဏာကောန်အဲ၊ ပသတိရ။ ^၇နူသ္ၚိမအဲဂှ်လေကီု၊ နူရးအဲမဒုၚ်သၠးဂဗ္ဘဂှ်လေကီုကော်အဲတုဲ၊ ပ္ဍဲဂကူဝေါၚ်သမၞးဂှ် အဲကဵုရးဝွံရောၚ် သာ်ဝွံ ကျာ်ထာဝရကျာ်တလဘုံအကာသကဵုပယျးဒိုဟ်ကဵုအဲတုဲ မဒုၚ်သွဴ၊ ဗလးဏာကလုတ်အကာသဇကုပ္ဍဲဂတမၞးမ္ဂး၊ နူရးဂှ် မၞးဝွံ ဒးကေတ်သမ္ဘာသွက်ကောန်အဲရောၚ်။ ^၈မၞိဟ်ဗြဴဝွံ ဟွံမိက်ဗက်ကောံကုမၞးမွဲစွံယဝ်ရသဒှ်၊ မၞးဝွံ နူကဵုသွဴအဲမကဵုလၟုဟ်ဂှ် ဗၠးရောၚ်။ ပ္ဍဲရးတေံဂှ် လ္ပကော်ဏာ ကောန်အဲ သာ်ဝွံ ဟီုတုဲမ္ဂး၊ ^၉ဍိက်ဝွံ ပ္ဍဲအသၟဝ်ဒဳနာဲညးအာဗြဟာမ်စွံတဲတုဲ ဒုၚ်သွဴပ္ဍဲပွဂှ်ရ။

^၁၀တေံဍိက်ဝွံလေ ဒှ်ညးမစဳရေၚ်ပိုန်ဒြပ်နာဲဇကုဆမနွံတုဲ၊ နူဒကံအုတ်နာဲညးဂှ် ကေတ်အုတ်စှ်ဖဍိက်တုဲ၊ က္တဵုအာမ္ဂး စိုပ်အာပ္ဍဲဍုၚ်ဏာခေါဝ်ရးမေသဝ်ပဝ်တာမိရ။ ^၁၁ပ္ဍဲပယာံသၟဝ်တ္ၚဲအခိၚ်မၞိဟ်ဗြဴဂမၠိုၚ် မတုက်ဍာ်ဂှ် ဇရေၚ်ဍာ်ပလိုၚ်မ္ၚးဍုၚ်ဂှ် ကဵုအုတ်တံမာတုဲ၊ ^၁၂ကျာ်ထာဝရကျာ်အာဗြဟာမ်နာဲအဲဍိက်၊ ပ္ဍဲတ္ၚဲဝွံ ကဵုကသပ်အဲဍိက်မံက်တုဲ ပဂုန် ပ္ဍဲအာဗြဟာမ် နာဲအဲဍိက်ညိ သာ်ဝွံ အဲဍိက်ဒုၚ်ဂုန်ရ။ ^၁၃အဲဍိက်ဝွံ မံၚ်ဇရေၚ်ဍာ်ပလိုၚ်ဝွံဂှ်တုဲ၊ ကာလကောန်ဗြဴမၞိဟ်ဍုၚ်ဝွံ မကၠုၚ်ဍာ်တုက်အိုတ်ဂှ်၊ ^၁၄ပ္ဍဲယြဴဝုတ်မွဲဂှ် ညံၚ်အဲဍိက်ဂွံသုၚ်၊ ဖျေဟ်ဍာ်နုၚ်မၞးညိ သာ်ဝွံ ကာလအဲဍိက်မဟီုဂှ်၊ သုၚ်ညိ၊ အုတ်မၞးဂှ်လေ အဲဖျုၚ်ဍာ်ရောၚ် သာ်ဝွံ ဝုတ်မကလေၚ်ဟီုဂှ် ကဵုဒှ်ညးတဳလဂုန်မခါန်ကၞက်သွက်ဍိက်တဳလဂုန်ဣဇက်ညိ။ သာ်ဂှ်ဒှ်တုဲ ဒဒှ်တဳလဂုန်မပဂုန် ပ္ဍဲနာဲအဲဍိက်အာဗြဟာမ်ဂှ် အဲဍိက်ဂွံတီရောၚ် သာ်ဝွံ ဟီုပ္တီရ။

^၁၅ဟီုပ္တီသာ်ဂှ်မ္ဂး ကၠာဟွံတုဲဏီဂှ်၊ ကောန်ဗြဴၜေထိုဲလ၊ ကောန်မိလခါသမ္ဘာဏာခေါဝ်ကောအာဗြဟာမ်၊ ရေၜေကဝွံ တၚိန်ဍာ်နုၚ်မ္ဂး တိတ်ကၠုၚ်ဂှ် ညာတ်ရ။ ^၁၆တေံသၟတ်ဗြဴဝွံ ရုပ်သာ်ဂေါဝ်ဆာဲလောန်တုဲ၊ ဝုတ်ကညာဟွံဂွံဆက်ဆံကဵုမၞိဟ်တြုံဏီဂှ် မဒှ်ရ။ စှ်ေပ္ဍဲဍာ်ပလိုၚ်မ္ဂး ဗပေၚ်ဍာ်နုၚ်ကဵုဍာ်တုဲ တိုန်ကၠုၚ်ရ။ ^၁၇ဍိက်ဝွံလေ ညံၚ်ဂွံဆဵုမၞိဟ်ဗြဴဂှ် ဒြေပ်အာတုဲ၊ ဍာ်ပ္ဍဲနုၚ်မၞးဂှ် ကဵုဂွံသုၚ်အောန်အောန်ညိ သာ်ဝွံ ကာလမဟီုဂှ်၊ ^၁၈မၞိဟ်ဗြဴဝွံ သုၚ်ညိရအဴ သာ်ဝွံ ဟီုမ္ဂး၊ ပ္ဍဲလတူတဲဇကု ဖျေဟ်ဍာ်နုၚ်ဗွဲပရဟ်တုဲ ကဵုသုၚ်ဍာ်ရ။ ^၁၉ကဵုသုၚ်ဍာ်တုဲမ္ဂး အုတ်မၞးတံဂှ်လေ သွက်ဂွံသုၚ်ဒဵုဖဲဂှ် အဲတုက်ဍာ်ရောၚ် သာ်ဝွံ အတိုၚ်မဟီုဂှ်၊ ^၂၀ဗွဲပရဟ်ဍာ်မနွံပ္ဍဲနုၚ်ဂှ် စဝ်ပ္ဍဲဂၠုၚ်ဖျုၚ်ဍာ်တုဲမ္ဂး၊ တၞဟ်နသၟိက်တုက်ဍာ်မွဲဝါပၠန်ဂှ် ဒြေပ်အာပ္ဍဲဍာ်ပလိုၚ်တုဲ၊ သွက်အုတ်ညးသီုဖအိုတ်တံဂှ် တုက်ဍာ်ရ။ ^၂၁မၞိဟ်တြုံဝွံ ပအံသဝ်ကဵုမၞိဟ်ဗြဴဂှ်တုဲ၊ အမှုဇကုမစိုပ်ကၠုၚ်ဂှ် ကျာ်ထာဝရကဵုစိုပ်ဒတုဲကီု၊ ဟွံကဵုစိုပ်ဒတုဲကီု၊ သၟိက်ဂွံတီတုဲ မံၚ်ဗွဲမသ္ၚိတ်ဇြရ။ ^၂၂ကာလအုတ်ဂမၠိုၚ်သုၚ်ဍာ်တုဲဂှ်၊ မၞိဟ်တြုံဝွံ နှေက်ထဝ်မနွံ လယိုၚ်ၜါမးကဵုလကံက်တဲထဝ်မွဲဆောမနွံလယိုၚ်စှ်ဒကေဝ်ဂှ် ပ္တိတ်တုဲ၊ ^၂၃မၞးဝွံ ကောန်ဗြဴညးဂှ်ရော။ ဟီုကဵုအဲဍိက်ညိ။ ပ္ဍဲသ္ၚိမမၞးဂှ် ဒၞာဲပိုဲဍိက်ဂွံဒီုဒက်နွံဟာ သာ်ဝွံ ဟီုတုဲ၊ ^၂၄သၟတ်ဗြဴဝွံ အဲဝွံ မဒှ်ကောန်ဗြဴၜေထိုဲလ၊ ကောန်မိလခါသမ္ဘာဏာခေါဝ် မသၠးဂဗ္ဘရ သာ်ဝွံဂှ်လေကီု၊ ^၂၅ပ္ဍဲပိုညးဆံက်ဗွဲမဂၠိုၚ်၊ စဏတိရစ္ဆာန်ဗွဲမဂၠိုၚ်ကဵုဒမံၚ်ဒီုဒက်လေ နွံရ သာ်ဝွံဂှ်လေကီု ဟီုတဴရ။ ^၂၆ပ္ဍဲကာလဂှ် မၞိဟ်တြုံ ဂညိက်ဖျေံက္ဍိုပ်တုဲရေဟ်သေဟ်ကျာ်ထာဝရမ္ဂး၊ ^၂၇ဟွံရုပ်သီကရုတ်ဏာကဵုသစ္စနူနာဲအဲဍိက်ပ္ဍဲကျာ်ထာဝရကျာ်နာဲအဲဍိက်အာဗြဟာမ် ကဵုနွံမၚ်္ဂလရောၚ်။ ကာလအဲဍိက်မအာဒၟံၚ်ပ္ဍဲဂၠံၚ်ဂှ် ကျာ်ထာဝရဝွံ မပလံၚ်နၚ်အဲဍိက် ပ္ဍဲသ္ၚိကောံဒေံနာဲအဲဍိက်ရသွံ သာ်ဝွံ ဟီုရ။ ^၂၈သၟတ်ဗြဴဝွံလေ ဒြေပ်တုဲ ဟီုပရိုၚ်ဂှ် ပ္ဍဲသ္ၚိမိညးရ။

^၂၉ပ္ဍဲရေၜေကဒေံမနွံယၟုလာၜါန်မနွံမွဲရ။ လာၜါန်ဝွံ ဒြေပ်အာပ္ဍဲဍာ်ပလိုၚ်ဒၞာဲမၞိဟ်တြုံမနွံရ။ ^၃၀ညးဝွံ နှေက်ဂှ်လေကီု၊ လကံက်တဲမနွံပ္ဍဲတဲၝဲညးဂှ်လေကီုညာတ်တုဲ၊ မၞိဟ်တြုံဝွံ သာ်ဂှ် ဟီုကဵုအဲဍိက် သာ်ဝွံ ကာလမမိၚ်အရေဝ်ၝဲညးရေၜေကမဟီုဂှ်၊ ကာလမစိုပ်ပ္ဍဲမၞိဟ်တြုံမဒတဴဒၟံၚ်ဇရေၚ်အုတ်ပ္ဍဲဍာ်ပလိုၚ်ဂှ်၊ ^၃၁ညးကျာ်ထာဝရ မကဵုပသေက်ပသဝ်၊ လုပ်ပ္ဍဲသ္ၚိအဲဍိက်ညိ။ မူဟိုတ်ဒတဴဒၟံၚ်မ္ၚးရော။ သ္ၚိဂှ်လေကီု၊ ဒမံၚ်အုတ်ဂမၠိုၚ်ဂွံမံၚ်ဂှ်လေကီုအဲဍိက်ပြုပြေၚ်တုဲရ သာ်ဝွံ ဟီုမ္ဂး။ ^၃၂မၞိဟ်တြုံဂှ် လုပ်ပ္ဍဲသ္ၚိမ္ဂး အပေါတ်အုတ်တံဂှ် သဟ်တုဲ၊ ကဵုဆံက်ကဵုစဏစကဵုညးတံဂှ်ရ။ သွက်ဂွံကြာတ်ဇိုၚ်တြုံကဵုမၞိဟ်မဗက်တံဂှ် ကဵုလဝ်ဍာ်ကီုရ။ ^၃၃ပ္ဍဲမစုတ်စဏစပ္ဍဲဂတညးဂှ်၊ ညးဂှ်လေ၊ အဲဍိက်ဝွံ ကၠာဟွံဂွံဟီုကေစ္စအဲဍိက်ဂှ် အဲဍိက်ဟွံသၟိက်စ သာ်ဝွံ ဟီုမ္ဂး၊ ဟီုညိ သာ်ဝွံ ဟီုရ။ ^၃၄မၞိဟ်တြုံဂှ်လေ၊ အဲဍိက်မ္ဂးဂှ် ဍိက်အာဗြဟာမ်မဒှ်ရ။ ^၃၅ကျာ်ထာဝရကဵုပသေက်ပသဝ်ကဵုနာဲအဲဍိက်ဗွဲမလောန်တုဲ၊ ညးဝွံ စိုပ်ဒဒှ်မဇၞော်ပြဲတုဲရ။ သဵုဒကံ၊ ဂၠဴဒကံ၊ ထဝ်သြန်၊ ဍိက်တြုံဍိက်ဗြဴ၊ အုတ်ကဵုမာဲဂမၠိုၚ်တံဂှ် တဳလပိုန်ကဵုတုဲရ။ ^၃၆သမ္ဘာနာဲအဲဍိက်သာရာဝွံ ကာလအယုက်မဇၞော်ဂှ် သၠးဂဗ္ဘကောန်တြုံကဵုညးတုဲ၊ ပ္ဍဲကောန်ဂှ် ဒြပ်ဆမနွံဂှ် နာဲမပ္အပ်ကဵုတုဲရ။ ^၃၇နာဲအဲဍိက်ဂှ်လေ မၞးဝွံ ပ္ဍဲကောန်ဗြဴဂကူခါနာန်ရးအဲမမံၚ်ဂှ်၊ သွက်ကောန်အဲဟွံရုဲသမ္ဘာ၊ ^၃၈ပ္ဍဲသ္ၚိမအဲ၊ ပ္ဍဲဇရေၚ်ကောန်ဂကူအဲတံဂှ် အာတုဲ၊ သွက်ကောန်အဲဒးကေတ် သမ္ဘာရောၚ် သာ်ဝွံ ကဵုအဲဍိက်ဒုၚ်သွဴရ။ ^၃၉အဲဍိက်ဂှ်လေ မၞိဟ်ဗြဴဝွံ ဟွံဗက်မ္ဂး ပသာ်ရော သာ်ဝွံ သၟာန်နာဲတုဲ၊ ^၄၀နာဲဝွံ အဲအာကၠုၚ်ပ္ဍဲယြဴကျာ်ထာဝရမွဲဂှ်။ တေံကျာ်ထာဝရဝွံ ကောံကုမၞးမွဲစွံဗလးနၚ်ကလုတ်ဇကုတုဲ၊ ကေစ္စမၞးမအာဂှ် ပြုပြေၚ်မ္ဂး၊ နူအပ္ဍဲသ္ၚိမအဲ၊ ကောန်ဂကူအဲမွဲစွံဂှ်၊ ဒးကေတ်သမ္ဘာသွက်ကောန်အဲရောၚ်။ ^၄၁ကာလမစိုပ်ပ္ဍဲဇရေၚ်ကလောဝေါၚ်သအဲဂှ်၊ မၞးဝွံ ကဵုဗၠးနူသွဴအဲမကဵုရ။ တေံညးတံဝွံ ဟွံကဵုမၞိဟ်ဗြဴၜိုန်ဒှ်ကီု၊ မၞးဝွံ ကဵုဗၠးနူသွဴမကဵုရောၚ် သာ်ဝွံ ဟီုရ။ ^၄၂အဲဍိက်ဝွံ စိုပ်ဍာ်ပလိုၚ်တ္ၚဲဝွံတုဲ၊ ကျာ်ထာဝရကျာ်အာဗြဟာမ်နာဲအဲဍိက်၊ ကေစ္စအဲဍိက်မစိုပ်ကၠုၚ်ဂှ် တဳလပိုန်ပြုပြေၚ်မ္ဂး၊ ^၄၃အဲဍိက်ဝွံ ဒတဴဒၟံၚ်ဇရေၚ်ဍာ်ပလိုၚ်တုဲ၊ တၞဟ်နသၟိက်တုက်ဍာ်ဂှ် ကဵုယြဴဝုတ်ကညာမွဲ၊ သွက်အဲဍိက်ဂွံသုၚ်ဂှ် ပ္ဍဲဍာ်နုၚ်မၞး ဍာ်အောန်အောန်ကဵုညိ သာ်ဝွံ အာတ်တုဲ၊ သုၚ်ညိ။ ^၄၄သွက်အုတ်မၞးဂမၠိုၚ်ဂှ်လေ အဲဍိက်ဗြဴတုက်ဍာ်ရောၚ် သာ်ဝွံ ဝုတ်ကညာမကလေၚ်ဟီုဂှ်၊ သွက်ကောန်ဍိက်တဳလပိုန်ဂှ် ကဵုဒှ်ဗြဴတဳလပိုန်မခါန်ကၞက်ညိ သာ်ဝွံ ဟီုပ္တီရ။ ^၄၅သာ်ဂှ် ဟီုပ္တီပ္ဍဲစိုပ်ကၠာဟွံတုဲဂှ်၊ ရေၜေကဝွံ တၚိန်ဍာ်နုၚ်တုဲ တိတ်ကၠုၚ်မ္ဂး၊ စှ်ေပ္ဍဲဍာ်ပလိုၚ်တုဲ တုက်ဍာ်ဂှ် အဲဍိက်ညာတ်မ္ဂး၊ ကဵုဂွံသုၚ်ဍာ်ညိ သာ်ဝွံ ကာလမအာတ်ပ္ဍဲညးဂှ်၊ ^၄၆ညးဝွံ နူကဵုပၞးဖျေံဍာ်နုၚ်ဗွဲပရဟ်တုဲ၊ သုၚ်ညိ အုတ်မၞးဂမၠိုၚ်ဂှ်လေ အဲဖျုၚ်ဍာ်ရောၚ် သာ်ဝွံ အတိုၚ်မဟီုဂှ် အဲဍိက်သုၚ်ရ။ အုတ်ဂမၠိုၚ်ဂှ်လေ ဖျုၚ်ဍာ်ရ။ ^၄၇အဲဍိက်ဂှ်လေ မၞးဝွံ ဒှ်ကောန်ဗြဴညးဂှ်ရော သာ်ဝွံ ကာလမသၟာန်၊ ညးဝွံ အဲဍိက်ဗြဴဂှ် ဒှ်ကောန်ဗြဴၜေထိုဲလကောန်ဏာခေါဝ်မိလခါမသၠးဂဗ္ဘရ သာ်ဝွံ ဟီုဂးရ။ အဲဍိက်ဂှ်လေ ပ္ဍဲကဵုမုက်ညးနှေက်ဂှ်လေကီု၊ ပ္ဍဲကဵုတဲညးလကံက်တဲဂှ်လေကီုစုတ်တုဲမ္ဂး၊ ^၄၈ဂညိက်ဖျေံက္ဍိုပ်တုဲ၊ တၞဟ်နသၟိက်ကေတ်ကောန်ဗြဴကောန်နာဲအဲဍိက်သွက်ကောန်နာဲဂှ်၊ ပ္ဍဲကဵုကျာ်ထာဝရကျာ်နာဲအဲအာဗြဟာမ်မပလံၚ်နၚ် ပ္ဍဲဂၠံၚ်သ္ဍာံသၟတ်ဂှ် ကဵုပသေက်ပသဝ်တုဲ ရေဟ်သေဟ်ရ။ ^၄၉လၟုဟ်မၞးတံဝွံ ပ္ဍဲနာဲအဲဍိက် နကဵုသစ္စပဂုန်ကီုဟွံပဂုန်ကီုဟီုညိ။ အဲဍိက်ဂှ်လေ ဂၠံၚ်တဲသ္တုံကဵုဒှ်၊ ဂၠံၚ်တဲဇွိကဵုဒှ်၊ ပ္ဍဲမွဲဂၠံၚ်အဲဗက်အာရောၚ် သာ်ဝွံ ဟီုဂးရ။

^၅၀လာၜါန်ကဵုၜေထိုဲလတံဂှ်လေ၊ အမှုဝွံ ဒှ်အမှုကျာ်ထာဝရစဳရေၚ်လဝ်ရ။ ပိုဲညးတံဝွံ ပ္ဍဲမၞးခိုဟ်ကီုဟွံခိုဟ်ကီုဟီုဟွံမာန်ရ။ ^၅၁ရေၜေကဝွံ နွံပ္ဍဲဂတမၞးရ။ ကေတ်ဏာညိရ။ အတိုၚ်ကျာ်ထာဝရ ဟီုပၟိၚ်ဂှ် ကဵုဒှ်သမ္ဘာကောန်နာဲမၞးရ သာ်ဝွံ ကလေၚ်ဟီုရ။ ^၅၂မိၚ်အရေဝ်ဂှ်တုဲ ဍိက်အာဗြဟာမ် ဂညိက်ဖျေံက္ဍိုပ်ဒဵုတိမ္ဂး ရေဟ်သေဟ်ကျာ်ထာဝရတုဲ၊ ^၅၃အပေါတ်သြန်၊ အပေါတ်ထဝ်၊ အပေါတ်ယာတ်ဂမၠိုၚ်ဂှ် ပ္တိတ်တုဲ ကဵုပ္ဍဲရေၜေကရ။ ပ္ဍဲကဵုဒေံညးကဵုမိညးဂှ်လေ လာပ်သကာမထိုက်ကဵုၚုဟ်ဂှ် ကဵုရ။ ^၅၄ညးကဵုဆောဖွက်ညးတံဝွံ စသုၚ်တုဲ ကဵုလောန်အာဗ္တံရ။ နူဂယးက္တဵုတုဲ အဲဍိက်ဝွံ ပ္ဍဲဇရေၚ်နာဲဂှ် ကဵုဂွံကလေၚ်ညိ သာ်ဝွံ ကာလမဟီုဂှ်၊ ^၅၅ဒေံကဵုမိသၟတ်ဗြဴဂှ်လေ ကဵုဂွံမံၚ်ပ္ဍဲပိုဲညးဗၞတ်စှ်တ္ၚဲကၠာ။ ကြဴဂှ် ညးအာရောၚ် သာ်ဝွံ ဟီုအိုတ်ရ။ ^၅၆တေံညးဂှ်လေ လ္ပဆဳဒနာအဲဍိက်ညိ။ ကျာ်ထာဝရဝွံ ကေစ္စအဲဍိက်မစိုပ်ကၠုၚ်ဂှ် ပြုပြေၚ်တုဲရ။ အခေါၚ်အဲဍိက်မဂွံအာပ္ဍဲဇရေၚ်နာဲဂှ် ကဵုညိ သာ်ဝွံ ဟီုမ္ဂး၊ ^၅၇ညးတံဝွံ ကော်သၟတ်ဗြဴတုဲ ပိုဲသၟာန်ပၟိက်ညးရောၚ် သာ်ဝွံ ဟီုအိုတ်ရ။ ^၅၈ကော်ရေၜေကတုဲ မၞးဝွံ လၟုဟ်ဗက်အာမွဲစွံကဵုမၞိဟ်ဝွံဟာ သာ်ဝွံ ကာလညးတံမသၟာန်ဂှ်၊ အဲဍိက်ဗြဴဗက်ရောၚ် သာ်ဝွံ ဟီုရ။ ^၅၉ဒှ်သာ်ဂှ်တုဲ၊ ၝဲဇကုရေၜေကကဵုပၟၚ်ညးဂှ်လေကီု၊ ဍိက်အာဗြဟာမ်ကဵုမၞိဟ်ညးဂှ်လေကီုဗလးဏာအိုတ်ရ။ ^၆၀ကဵုရေၜေကဂှ်လေ မၞးဝွံ မဒှ်ၝဲပိုဲညးရ။ ကဵုဒှ်မိညးလကိုတ်ညိ။ ဂကူဝေါၚ်သမၞးဝွံ ကဵုဂွံအဝဵု ပ္ဍဲတရၚ် သတ်တြုတံညိ သာ်ဝွံ ကဵုပသေက်ပသဝ်အိုတ်ရ။ ^၆၁ရေၜေကဵုသၟတ်ဗြဴညးတံဝွံ က္တဵုမ္ဂး ဍိုက်အုတ်တုဲ၊ ကဵုမၞိဟ်တြုံတေံမွဲစွံဗက်အိုတ်ရ။ သာ်ဂှ် ဍိက်အာဗြဟာမ်ဝွံ ပလံၚ်ဏာရေၜေကရ။

^၆၂ကာလဂှ် ဣဇက်မမံၚ်ပ္ဍဲရးသမၠုၚ်ကျာစိုပ်ကၠုၚ်ပ္ဍဲဂၠံၚ်ၜေရလဟာဲရောဂှ်ဒှ်တုဲ၊ ^၆၃ညံၚ်ဂွံဗ္စာရဏာပ္ဍဲအခိၚ်သၟဝ်တ္ၚဲဂှ် တိတ်အာပ္ဍဲဒေသဂြိုပ်တုဲ၊ လၟဳရံၚ်မ္ဂး အုတ်ဂမၠိုၚ်ကၠုၚ်ဂှ် ညာတ်ရ။ ^၆၄ရေၜေကဝွံလေ လၟဳရံၚ်တုဲ ကာလမညာတ်ဣဇက်ဂှ် နူကဵုလတူအုတ်ဂှ် စှ်ေတုဲ၊ ^၆၅ညံၚ်ဂွံဝါၚ်ဒုၚ်တလုၚ်ပိုဲညးဂှ် တေံညးမကၠုၚ်ပ္ဍဲဂြိုပ်မ္ဂးဂှ် ညးဂှ်ရော သာ်ဝွံ ကာလမသၟာန်ဍိက်ဂှ်၊ ဍိက်ဂှ်လေ၊ တေံညးဝွံ ဒှ်နာဲအဲဍိက်ရ သာ်ဝွံ ဂလာန်မဟီုဂှ် မိၚ်တုဲ၊ ရေၜေကဝွံ ကေတ်ယာတ်ဒလီုမုက်မ္ဂး ဒလီုဇကုရ။ ^၆၆ဍိက်ဂှ်လေ ဆဇကုမပတံဂှ် ဟီုပ္တီပ္ဍဲဣဇက်တုဲမ္ဂး၊ ^၆၇ဣဇက်ဝွံ ပ္ဍဲကဵုတာဲမိညးသာရာပလံၚ်ဏာရေၜေကတုဲ ပံၚ်ဖက်ဒၟံၚ်ရ။ ဆာန်သ္ဍိုက်မၠိုက်ရေၜေကမ္ဂး၊ ပ္ဍဲပွမိမချိုတ်ဂှ် စိုပ်တသိုက်စိုတ်ရ။