သၠပတ်ပထမကဝ် ၂၅

သၠ​ပတ်​ပ​ထ​မ​ကဝ် ၂၅

^၁မွဲဝါပၠန်အာဗြဟာမ်ဝွံ ပံၚ်ဖက်ကဵုမၞိဟ်ဗြဴမနွံယၟုကေတုရတုဲ၊ ^၂တေံမၞိဟ်ဗြဴဝွံ ဇိမရာန်၊ ယံက်သှာန်၊ မေဍာန်၊ မိဍယာန်၊ ဣသှၜက်၊ သှုအာတံဂှ် သၠးဂဗ္ဘရ။ ^၃ကောန်ယံက်သှာန်မ္ဂးဂှ်၊ သှေၜေကဵုဍေဍာန်ရောၚ်။ ကောန်ဍေဍာန်မ္ဂးဂှ်၊ မၞိဟ်အာသှုရိမ်၊ မၞိဟ်လေဍသှိမ်၊ မၞိဟ်လုမ္မိမ်ရောၚ်။ ^၄ကောန်မိဍယာန်မ္ဂးဂှ်၊ ဨဖာ၊ ဨဖေရ၊ ဟာဏောက်၊ အၜိဍ၊ ဨလဍရောၚ်။ တေံညးအိုတ်သီုတံမ္ဂးဂှ် ဒှ်ကောန်စဴကေတုရရောၚ်။

^၅အာဗြဟာမ်ဝွံ ဒြပ်ဇကုဆမနွံဂှ် ကဵုပ္ဍဲဣဇက်ရ။ ^၆ပ္ဍဲကဵုကောန်ဂမၠိုၚ်မဂွံပ္ဍဲသမ္ဘာဍေါတ်တံဂှ်လေ ဝါရမဂျိုၚ်လမျီုဏီဂှ် ပရံကဵုလာ်သကာဂမၠိုၚ်တုဲ နူကဵုကောန်ညးဣဇက်ဂှ် ဗလးဏာလ္ပာ်ဒိုဟ်ဗၟံက်ပ္ဍဲရးဗၟံက်ရ။

^၇ကြဴဂှ် အာဗြဟာမ်ဝွံ အယုက်ဇၞော်ဂၠိၚ်မ္ဂး ဒှ်သၟီဗျုတုဲ၊ ကောံကုဒဒှ်မဍိုက်ပေၚ်ကဵုဂိတုတ္ၚဲမွဲစွံ ကာလအယုက်မပေၚ်ကၠံထပှ်ဣသုန်သၞာံတုဲ၊ ^၈စိုပ်ကၞောတ်အယုက်တုဲ ဒှ်အနိစ္စမ္ဂး၊ စိုပ်အာဒမံၚ်ဂကူမၞိဟ်ဇကုမကောံဒရီုရ၊ ^၉ကောန်ညးဣဇက်ကဵုဣသှမေလတံဝွံ ပ္ဍဲဂတဍုၚ်မာမ်ရေ ပ္ဍဲဝါဨဖရောန်ကောန်ဇောဝ်ရကောန်ဂကူဟိတ္တိ၊ ပ္ဍဲက္တိုၚ်တိမက်ပေလဂှ် ဖျေံကမ္မထာန်မညးတံအိုတ်ရ။ ^၁၀ကဵုၚုဟ်ပ္ဍဲကောန်ဂကူဟေထတုဲ ပ္ဍဲဝါအာဗြဟာမ်မရာန်ဂှ် ဖျေံကမ္မထာန်အာဗြဟာမ်ကဵုသမ္ဘာညးသာရာအိုတ်ရ။ ^၁၁ကြဴအာဗြဟာမ်မချိုတ်ဂှ်၊ ပ္ဍဲကဵုကောန်ညးဣဇက်ဂှ် ကျာ်ဂမျိုၚ်ကဵုပသေက်ပသဝ်တဴရ။ ဣဇက်ဝွံ မံၚ်ပ္ဍဲဍုၚ်ၜေရလဟာဲရောရောၚ်။ ^၁၂အဆက်ကောန်အဆက်စဴဣသှမေလကောန်အာဗြဟာမ်ဍိက်ဗြဴသာရာကောန်ဂကူအာဲဂုပ္တုဟာဂရမသၠးဂဗ္ဘမတွံဂး၊ ^၁၃အတိုၚ်ဂကူဝေါၚ်သဇကု၊ ယၟုကောန်ဣသှမေလတၞဟ်တၞဟ်မ္ဂးဂှ်၊ ကောန်ဂၠုဏၜါယောတ်၊ ကြဴဂှ် ကေဍာ၊ အာဍၜေလ၊ မိၜသာမ် ^{၁၄-၁၅}မိသှမ၊ ဍမာ၊ မာသ၊ ဟာဍဒ်၊ တေမ၊ ယေတုရ၊ မာဖိသှ၊ ကေဍမာရောၚ် မတွံဂး၊ ^၁၆ကောန်ဣသှမေလရောၚ်။ ညမနွံကဵုယၟုသာ်ဂှ် တံဝွံ အတိုၚ်ဍုၚ်ဇကု၊ အတိုၚ်တိုက်သရာဲဇကုဂှ် မဒှ်သၟီဂကူညးစှ်ၜါတၞဟ်တၞဟ်ရောၚ်။ ^၁၇ဣသှမေလဝွံ ကာလမနွံအယုက်ကၠံပိစှ်ောထပှ်သၞာံဂှ် လမျီုပၠိုတ်တုဲ ချိုတ်မ္ဂး၊ စိုပ်အာဒမံၚ်ဂကူမၞိဟ်ဇကုမကောံဒရီုရ။ ^၁၈ညးတံဂှ်လေ၊ ပ္ဍဲဂၠံၚ်မအာရးအာသှုရိ၊ နူကဵုဍုၚ်ဟာဝိလဒဵုကဵုဍုၚ်သှုရဗၟံက်ရးအာဲဂုပ္တုဂှ် မံၚ်အိုတ်ရ။ သာ်ဂှ် ဣသှမေလဝွံ မစှ်ေဒၞာဲဇရေၚ်ကောဒေံဇကုအိုတ်သီုတံဂှ်ရောၚ်။

^၁၉အဆက်ကောန်အဆက်စဴဣဇက် သာ်ဝွံ မ္ဂးဂှ်၊ ကောန်အာဗြဟာမ်မ္ဂးဂှ်၊ ဣဇက်ရောၚ်။ ^၂၀ဣဇက်ဝွံ ကာလမနွံအယုက် ပန်စှ်ောဂှ် ပသ္ၚိကၟိန် ကဵုရေၜေကကောန်ဗြဴၜေထိုဲလဂကူသှုရိ၊ ရဲဒေသပါဍဏာရာမ်၊ ၝဲမၞိဟ်သှုရိလာၜါန်ရ။ ^၂၁ဣဇက်ဝွံ ဟိုတ်သမ္ဘာဇကု ရေၜေကမဒှ်သမၚ်ဂှ်၊ ဒုၚ်ဂုန်ကျာ်ထာဝရတုဲ၊ ကျာ်ထာဝရကလၚ်မ္ဂး၊ သမ္ဘာညးဝွံ ကေတ်ပ္တိသန္ဓိရ။ ^၂၂သၟတ်မတန်အပ္ဍဲဂၠံဂဝ်တံဂှ် ဇီုဒးရၚ်သ္ကံအိုတ်ရ။ မိဂှ်လေ၊ ဒှ်သာ်ဂှ်တုဲ မူအမှုစိုပ်ပ္ဍဲအဲရောၚ် ရော သာ်ဝွံ ဟီုမ္ဂး တၞဟ်နသၟိက်သၟာန်ပ္တီကျာ်ထာဝရဂှ် အာရ။ ^၂၃ကျာ်ထာဝရဂှ်လေ အပ္ဍဲဂၠံဂဝ်မၞး တေံမၞိဟ်ၜါဂကူမနွံရ။ နူအပ္ဍဲဂၠံဂဝ်မၞးဂှ် မၞိဟ်ၜါရဲတၞဟ်တၞဟ်ဒးသၠးရောၚ်။ မၞိဟ်မွဲဂကူဝွံ လောန်နူမွဲဂကူဇၞော်ဒြဟတ်ရောၚ်။ ညးဇၞော်ဝွံ ဒးဒုၚ်ဍိက်ပ္ဍဲညးဍောတ်ရောၚ် သာ်ဝွံ ဟီုပၟိၚ်ရ။ ^၂၄ကာလမပေၚ်ဂတုတ္ၚဲမသၠးဂဗ္ဘပ္ဍဲဂၠံဂဝ်ညးကောန်ကမာနွံမ္ဂး၊ ^၂၅ကောန်မသၠးကိုပ်ကၠာဂှ် ဒှ်ညံၚ်ကဵုယာတ်နွံကဵုတသော်တုဲ အလုံမွဲဇကုဗ္ကေတ်မံၚ်ရ။ ညးဂှ် နကဵုယၟုဨသဝ်ကော်ခဴအိုတ်ရ။ ^၂၆ကြဴဂှ် ဒေံညးဝွံ ရပ်ကေတ်ဓနေဟ်ကောညးဨသဝ်တုဲ သၠးကၠုၚ်ရ။ ဟိုတ်ဂှ်ရ နကဵုယၟုယျာကောပ်ကော်ခဴအိုတ်ရ။ ကာလမသၠးကောန်ၜါဂှ် ဣဇက်မနွံအယုက်တရဴစှ်ောသၞာံရောၚ်။ ^၂၇သၟတ်တံဝွံ ဇၞော်တိုန်တုဲ၊ ဨသဝ်မ္ဂးဂှ် လၟကောန်ဂြိုပ်မသ္ဍိုဟ်ဂှ် ဒှ်ရ။ ယျာကောပ်မ္ဂးဂှ် လေပ်မံၚ်ပ္ဍဲတာဲတုဲ မဒှ်မၞိဟ်စိုတ်ခိုဟ်ရ။ ^၂၈ဣဇက်ဝွံ ဟိုတ်မကေၚ်စဖျုန်ဨသဝ်မကဵုဂှ်တုဲ ဆာန်ညးရ။ ရေၜေကမ္ဂးဂှ် ဆာန်ယျာကောပ်ရ။

^၂၉ပ္ဍဲမွဲတ္ၚဲဝါရယျာကောပ်မတောံၜိုဟ်စဏစဂှ် ဨသဝ်ဝွံ ကၠုၚ်နူဂြိုပ်တုဲ ဟိုတ်မဍောၚ်ဂှ်၊ ^၃၀ကဵုယျာကောပ်နကဵုတေံစဏစမဗ္ကေတ်ဂှ် ဗ္စအဲညိ။ အဲဍောၚ်ရ သာ်ဝွံ ဟီုရ။ ဟိုတ်နူဂှ် ကော်ယၟုညးဨဍောမ်ရောၚ်။ ^၃၁ယျာကောပ်ဂှ်လေ ပ္ဍဲတ္ၚဲဝွံ ဒၞာဲမၞးကောန်ဂၠုဂှ် သွံကဵုအဲညိ သာ်ဝွံ ဟီုမ္ဂး၊ ^၃၂ဨသဝ်ဝွံ အဲကြပ်ချိုတ်ရ။ နကဵုဒၞာဲကောန်ဂၠုဂှ် မူဂုန်နွံရော သာ်ဝွံ ဟီုရ။ ^၃၃ယျာကောပ်ဂှ်လေ ပ္ဍဲတ္ၚဲဝွံ ဒုၚ်သွဴပ္ဍဲအဲရ။ သာ်ဝွံ ဟီုမ္ဂး ညးဝွံ ဒုၚ်သွဴတုဲ၊ ဒၞါဲဇကုကောန်ဂၠုဂှ် သွံပ္ဍဲယျာကောပ်ရ။ ^၃၄ကာလဂှ် ယျာကောပ်ဝွံ ကဵုကွာၚ်ကဵုသွစပ္ဍဲကဵုဨသဝ်မ္ဂး၊ ညးဝွံ စသုၚ်တုဲ က္တဵုအာရ။ သာ်ဂှ် ဨသဝ်ဝွံ ဟွံပမာနကဵုဒၞာဲကောန်ဂၠုမဆေၚ်ကဵုဇကုရောၚ်။