သၠပတ်ပထမကဝ် ၁၁

^၁ကောန်တိဇၞော်အိုတ်သီုတံဝွံ ဘာသာမွဲဂကူ၊ အရေဝ်မွဲဂကူနွံအိုတ်ဂှ်ဒှ်တုဲ၊ ^၂နူကဵုဒိုဟ်ဗၟံက်အာမ္ဂး ပ္ဍဲရးသှိဏာ ဒေသတိမညဳဆဵုတုဲ၊ ဖျေံဒၞာဲအိုတ်ရ။ ^၃ညးတံဂှ်လေ ကၠုၚ်အိုတ်၊ ကၠောန်ဍိုတ်တုဲ စံၚ်ဗိုန်ဗိုန်အိုတ်စိုအ် သာ်ဝွံ ညးမွဲကဵုညးမွဲဂှ် ဟီုအိုတ်ရ။ သာ်ဂှ် ပ္ဍဲဒမံၚ်တၟံဂှ် ဍိုတ်ဂှ်လေကီု၊ ပ္ဍဲဒမံၚ်လဗေၚ်ဂှ် ထၜိုတ်ဂှ်လေကီုဂွံတုဲမ္ဂး၊ ^၄ကၠုၚ်အိုတ်၊ အလုံမွဲပ္ဍဲဂၠးတိဇၞော်ဇၟာပ်ဇၟာပ်ဒေသပြးချာဲဂှ် ဂွိၚ်ဂွာဲတုဲ၊ ဍုၚ်ဂှ်လေကီုတိုက်သရာဲမစိုပ်အာဒဵုအကာသဂှ်လေကီုဒက်ပ္တန်မ္ဂး၊ တၞဟ်နသၟိက်ကဵုဒယဟ်ကမြဴဂှ် ပအိုတ်စိုအ် သာ်ဝွံ ဟီုဂးအိုတ်ရ။ ^၅တၞဟ်နသၟိက်ရံၚ်ဍုၚ်ကဵုတိုက်သရာဲကောန်မၞိဟ်တံမဒက်ပ္တန်သာ်ဂှ်တုဲ၊ ကျာ်ထာဝရက္ညစှ်ေကၠုၚ်တဴရ။ ^၆ကျာ်ထာဝရဂှ်လေ၊ ရံၚ်မွဲညိ။ မၞိဟ်ဆမွဲဇကု၊ အရေဝ်ဆမွဲဂကူနွံဂှ်ဒှ်တုဲ၊ ညးတံဝွံ မပ္တံပပွဝွံ အိုတ်ရ။ လၟုဟ်ဝွံ သွက်ဂွံဆဳဒနာဆသ္ကပ်ဂနန်မနွံဂှ် ဟွံမွဲ၊ ညးတံကၠောန်အိုတ်ရောၚ်။ ^၇ကၠုၚ်အိုတ်၊ စှ်ေအာအိုတ်စိုအ်။ ညးတံဝွံ တၞဟ်နသၟိက်ဟွံကၠိုဟ်စိုတ်ရၚ်သ္ကံဂှ်၊ ပထုဲဓရုဲအရေဝ်ညးတံအိုတ်စိုအ် သာ်ဝွံ ဟီုပၟိၚ်ရ။ ^၈သာ်ဂှ် ကျာ်ထာဝရဝွံ အလုံပ္ဍဲမွဲဂၠးတိဇၞော်ပရးဂစာဲညးတံဇၟာပ်ဇၟာပ်ဒေသတုဲ၊ ညးတံဝွံ ပ္တန်ဍုၚ်ဂှ် မံၚ်အိုတ်ရ။ ^၉ဒှ်သာ်ဂှ်တုဲ ပ္ဍဲဍုၚ်ဂှ် ကျာ်ထာဝရပထုဲ ကၠေံအရေဝ်ကောန်တိဇၞော်အိုတ်သီုတံဂှ်တုဲ၊ ဟိုတ်မပရးဂစာဲညးတံဇၟာပ်ဇၟာပ်ဒေသ အလုံမွဲဂၠးတိဇၞော်ဂှ်၊ တေံဍုၚ်ဝွံ မကော်ခဴဍုၚ်ၜါၜုလောန်ရောၚ်။

^၁၀အဆက်ကောန် အဆက်စဴ သှေမမ္ဂးဂှ်၊ သှေမဝွံ နွံအယုက်ကၠံသၞာံတုဲ၊ ကြဴဍာ်ဇၞော်ဟးပရးလံၜါသၞာံဂှ် ညာတ်မုက်ကောန်အာဖာဇာဒ်ရ။ ^၁၁ကြဴမညာတ်မုက်အာဖာဇာဒ်ဂှ် သှေမဝွံ ဂျိုၚ်လမျီု မသုန်ကၠံတုဲ ညာတ်မုက်ကောန်တြုံကောန်ဗြဴဂမၠိုၚ်ရ။ ^၁၂အာဖာဇာဒ်ဝွံ နွံအယုက်ပိဣသုန်သၞာံတုဲ ညာတ်မုက်ကောန်သှာလရ။ ^၁၃ကြဴမညာတ်မုက်သှာလဂှ်၊ အာဖာဇာဒ်ဂျိုၚ်လမျီုပန်ကၠံပိသၞာံတုဲ ညာတ်မုက် ကောန်တြုံကောန်ဗြဴဂမၠိုၚ်ရ။ ^၁၄သှာလဝွံ နွံအယုက်ပိစှ်ောသၞာံတုဲ ညာတ်မုက်ကောန် ဟေၜါရ။ ^၁၅ကြဴမညာတ်မုက်ဟေၜါဂှ် သှာလဝွံ ဂျိုၚ်လမျီု ပန်ကၠံစှ်ောသၞာံတုဲ၊ ညာတ်မုက်ကောန်တြုံဗြဴဂမၠိုၚ်ရ။ ^၁၆ဟေၜါဝွံ နွံအယုက်ပိစှ်ောသၞာံတုဲ၊ ညာတ်မုက်ကောန်ဖာလေက်ရ။ ^၁၇ကြဴမညာတ်မုက်ဖာလေက်ဂှ်၊ ဟေၜါဝွံ ဂျိုၚ်လမျီုပန်ကၠံပိစှ်ောသၞာံတုဲ ညာတ်မုက်ကောန်တြုံကောန်ဗြဴဂမၠိုၚ်ရ။ ^၁၈ဖာလေက်ဝွံ နွံအယုက်ပိစှ်ောသၞာံတုဲ၊ ညာတ်မုက်ကောန်ရာဂဝ်ရ။ ^၁၉ကြဴမညာတ်မုက်ကောန် ရာဂဝ်ဂှ်၊ ဖာလေက်ဝွံ ဂျိုၚ်လမျီုၜါကၠံဒစိတ်သၞာံတုဲ၊ ညာတ်မုက်ကောန်တြုံကောန်ဗြဴဂမၠိုၚ်ရ။ ^၂၀ရာဂဝ်ဝွံ နွံအယုက်ပိစှ်ောၜါသၞာံတုဲ၊ ညာတ်မုက်ကောန်သေရုက်ရ။ ^၂၁ကြဴမညာတ်ကောန်သေရုက်ဂှ်၊ ရာဂဝ်ဂျိုၚ်လမျီုၜါကၠံထပှ်သၞာံတုဲ၊ ^၂၂ညာတ်မုက်ကောန်ဏာခေါဝ်ရ။ ^၂၃ကြဴမညာတ်မုက်ဏာခေါဝ်ဂှ် သေရုက်ဝွံ ဂျိုၚ်လမျီုၜါကၠံသၞာံတုဲ ညာတ်မုက် ကောန်တြုံကောန်ဗြဴဂမၠိုၚ်ရ။ ^၂၄ဏာခေါဝ်ဝွံ နွံအယုက်ၜါစောဟ်ဒစိတ်သၞာံတုဲ၊ ညာတ်မုက်တေရရ။ ^၂၅ကြဴမညာတ်မုက်တေရဂှ်၊ ဏာခေါဝ်ဝွံ ဂျိုၚ်လမျီုကၠံစှ်ဒစိတ်သၞာံတုဲ ညာတ်မုက်ကောန်တြုံကောန်ဗြဴဂမၠိုၚ်ရ။ ^၂၆တေရဝွံ နွံအယုက်ထပှ်စှ်ောသၞာံတုဲ၊ ညာတ်မုက်ကောန်အာဗြာမ်၊ ဏာခေါဝ်၊ ခါရာန်တံဂှ်ရ။

^၂၇အဆက်ကောန်အဆက်စဴတေရမ္ဂးဂှ်၊ တေရဝွံ ညာတ်မုက်အာဗြာမ်၊ ဏာခေါဝ်၊ ခါရာန်တံဂှ်ရ။ ^၂၈ခါရာန်ဂှ်လေ၊ ညာတ်မုက်လဝ်တရ။ ခါရာန်ဝွံ ကၠာမညးတေရဟွံချိုတ်၊ ပ္ဍဲဍုၚ်ဥရကောန်ခါလဍာဲမမံၚ်ဒေသဇကုမဒုၚ်သၠးဂဗ္ဘဂှ် ချိုတ်အာရ။ ^၂၉အာဗြာမ်ကဵုဏာခေါဝ်ကေတ်ဗြဴတုဲ၊ ဗြဴအာဗြာမ်မ္ဂးဂှ် နွံယၟုသာရာဲရ။ ဗြဴဏာခေါဝ်မ္ဂးဂှ်၊ ကောန်ဗြဴခါရာန်မနွံယၟုမိလခါရ။ ခါရာန်ဝွံ ဒှ်မမိလခါကဵုဣသခရ။ ^၃၀သာရာဲမ္ဂးဂှ်၊ ဒှ်ဗြဴသမၚ်တုဲ ကောန်ဟွံမွဲ။ ^၃၁တေရဝွံ အာဗြာမ်ဂှ်လေကီု၊ ကောန်ခါနာန်စဴညးလဝ်တဂှ်လေကီု၊ ဂအဟ်ညးသာရာဲမဒှ်သမ္ဘာကောန် ညးအာဗြာမ်ဂှ်လေကီုကော်တုဲ၊ ညံၚ်ညးတံဂွံအာပ္ဍဲဍုၚ်ခါနာန်ဂှ် တိတ်နူဍုၚ်ဥရကောန်ခါလဍာဲတံမမံၚ်ဂှ်တုဲ၊ စိုပ်ပ္ဍဲဍုၚ်ခါရာန်မံၚ်အိုတ်ရ။ ^၃၂တေရဝွံ နွံအယုက်ၜါကၠံသၞာံတုဲ ချိုတ်ပ္ဍဲဍုၚ်ခါရာန်ရ။

နိဿဲ

ဂကောံသၠပတ်သမ္မာမန်