သၠပတ်ပထမကဝ် ၁၆
သၠပတ်ပထမကဝ် ၁၆
[ပလေဝ်ဒါန် | ပလေဝ်ဒါန် တမ်ကၞက်]၁ပ္ဍဲသာရာဲသမ္ဘာအာဗြာမ်ဒဒှ်မသၠးဂဗ္ဘဟွံမွဲမ္ဂး၊ ညးရးအာဲဂုတ္တုမနွံယၟုဟာဂရဍိက်ဗြဴနွံမွဲဒှ်တုဲ၊ ၂သာရာဲဝွံ ပ္ဍဲအဲအခေါၚ်ဂွံသၠးဂဗ္ဘဂှ် ကျာ်ထာဝရဟွံကဵုရ။ လုပ်အာပ္ဍဲထာန်ဍိက်ဗြဴအဲညိ။ နကဵုညးဒဒှ်မဒက်ပ္တန်အဲနွံရောၚ် ဟွံတီ သာ်ဝွံ ဟီုကဵုအာဗြာမ်တုဲ၊ အာဗြာမ်ဝွံ ကလၚ်အရေဝ်သာရာဲရ။ ၃သာ်ဂှ် အာဗြာမ်မံၚ်ပ္ဍဲရးခါနာန်စှ်သၞာံတုဲ၊ သာရာဲသမ္ဘာအာဗြာမ်ဝွံ ညးရးအာဲဂုတ္တုဍိက်ဗြဴဇကုဟာဂရကေတ်တုဲ၊ သွက်ဂွံကဵုသမ္ဘာဇကုအာဗြာမ်သီကေတ်ဂှ် ပ္အပ်ကဵုတဴရ။ ၄အာဗြာမ်ဝွံ လုပ်ပ္ဍဲထာန်ဟာဂရတုဲ၊ ဟာဂရဝွံ ကေတ်ပ္တိသန္ဓိရ။ ဟာဂရဝွံ ဒဒှ်မကေတ်သန္ဓိပ္ဍဲဇကုဂှ် တီတုဲ ဟွံပမာနကဵုနာဲဗြဴဇကုရ။ ၅သာရာဲဂှ်လေ ဒုဟ်အဲမဒးဒုၚ်ဂှ် ကဵုနွံပ္ဍဲလတူက္ဍိုပ်တလအဲရ။ ပ္ဍဲသြိုဟ်တလအဲဂှ် အဲပ္အပ်ကဵုဍိက်ဗြဴအဲတုဲရ။ ညးဝွံ ဒဒှ်မကေတ်ပတိသန္ဓိပ္ဍဲဇကုဂှ် တီတုဲ၊ ဟွံပမာနပ္ဍဲအဲသွံ။ ကျာ်ထာဝရဝွံ ကဵုစဳရေၚ်အမှုအဲကဵုတလအဲရ သာ်ဝွံ ဟီုကဵုအာဗြာမ်ရ။ ၆အာဗြာမ်ဂှ်လေ ဍိက်ဗြဴမၞးဂှ် မနွံပ္ဍဲတဲမၞးရ။ ဆသၟိက်ဂွံပပ္ဍဲညးဂှ် ပညိရ သာ်ဝွံ ကလေၚ်ဟီုကဵုသာရာဲတုဲ၊ သာရာဲဝွံ ပယဲခရဍိက်ဗြဴမ္ဂး၊ ဍိက်ဗြဴဝွံ ဒြေပ်တိတ်အာနူဇရေၚ်နာဲဗြဴရ။
၇ကလုတ်အကာသကျာ်ထာဝရဝွံ ပ္ဍဲဇရေၚ်ဍာ်ဗလာဲမနွံပ္ဍဲဂၠံၚ်ဂြိုပ်မအာဍုၚ်သှုရဂှ် ဆဵုဟာဂရတုဲ၊ ၈ဟာဂရဍိက်ဗြဴသာရာဲ မူနူဒေသမကၠုၚ်ရော။ မူပ္ဍဲဒေသမအာရော သာ်ဝွံ သၟာန်မ္ဂး၊ အဲဍိက်ဗြဴဝွံ ဒြေပ်တိတ်ကၠုၚ်နူဇရေၚ်နာဲဗြဴသာရာဲရ သာ်ဝွံ ဟီုရ။ ၉ကလုတ်ကျာ်ထာဝရဂှ်လေ၊ ကလေၚ်အာပ္ဍဲထာန်နာဲဗြဴမၞးတုဲ၊ ဒဒှ်ညးမအုပ်လဒံဂှ် ဒုၚ်ညိ သာ်ဝွံ အသံမနွံရ။ ၁၀မွဲဝါပၠန်ကလုတ်ကျာ်ထာဝရဝွံ၊ တၞောဝ်ဒတောဝ်မၞးဂှ် ဒဵုကဵုမတော်ရိုဟ်ဟွံမာန် အဲကဵုဂၠိုၚ်တိုန်ဗွဲမလောန်ရောၚ် သာ်ဝွံဂှ်လေကီု၊ ၁၁မၞးဝွံ ကေတ်ပတိသန္ဓိတုဲ၊ သၠးဂဗ္ဘကောန်တြုံရောၚ်၊ တေံကောန်ဂှ် ဣသှမေလဒးခုတ်ယၟုရောၚ်။ ဟိုတ်မ္ဂးဂှ်၊ ကျာ်ထာဝရဝွံ ဒဒိုက်ဒုက္ခမၞးဂှ် မိၚ်တုဲရ။ ၁၂ညးဝွံ ဒှ်မၞိဟ်အရိုၚ်ရောၚ်။ ပသတ်တြုကဵုဇၟာပ်မၞိဟ်အိုတ်သီုတံဂှ်ရောၚ်။ ဇၟာပ်မၞိဟ်အိုတ်သီုတံဂှ်လေ ပသတ်တြုကဵုညးရောၚ်။ ပ္ဍဲဂတကောဒေံဇကုအိုတ်သီုတံဂှ် ဒးမံၚ်ရောၚ် သာ်ဝွံဂှ်လေကီု၊ ကလုတ်အကာသဟီုတဴရောၚ်။ ၁၃တေံကျာ်ထာဝရမဟီုပၟိၚ်သာ်ဂှ် ကော်ခဴယၟုအာတဝ်ဨလရောတုဲ၊ ညးမညာတ်အဲဂှ် ပ္ဍဲဒေသဝွံရောၚ် အဲဂွံညာတ်ရသွံ သာ်ဝွံ ဟာဂရဟီုရ။ ၁၄ဟိုတ်ဂှ်ရ၊ တေံဍာ်ပလိုၚ်ဂှ် ခုတ်ယၟုၜေရလဟာဲရောအိုတ်ရ။ အကြာဍုၚ်ကာဍေသှကဵုဍုၚ်ၜေရေတ်မနွံရောၚ်။
၁၅ကြဴဂှ် ဟာဂရဝွံ သၠးဂဗ္ဘကောန်တြုံကဵုအာဗြာမ်ရ။ အာဗြာမ်ဝွံလေ ကောန်တြုံမညာတ်မုက်ပ္ဍဲဟာဂရဂှ် ခုတ်ယၟုဣသှမေလရ။ ၁၆အာဗြာမ်ဝွံ ကာလဟာဂရမသၠးကောန်ဣသှမေလဂှ် မနွံအယုက်ဒစာံစှ်ောတရဴသၞာံရောၚ်။