ဟံသာကဵုနန်ထဝ်
ဟံသာကဵု နန်ထဝ်
“ ဟံသာ မန်တအ်ကေတ်ဍုၚ်ဂှ် ဗီုလဵုကေတ်ရော အဲမိက်ဂွံသၟာန်ညိ” ချအ်ပတိတ်အိက်ပါၚ်ဇဗၠု “အပြောတ်”တုဲ နာဲဂေါဝ်ဆာဲ သၟာန်ဒၟံၚ်အဲရ။ တဲညးၜါလ္ပာ်စုတ်လဝ်သရောပ်တဲ ရာဗာ အရံၚ်သာ်ဗုတုဲ တဲပါဲဂှ် ရပ်လဝ်တၞး ဇဗၠုမွဲသကေမ်၊ တဲပုၚ်ဂှ် ရပ်လဝ်လေံခပဵု တၟာရိၜိုက် သၟောန်ပါၚ်ဂှ် ဟာဲမံၚ် “ညက်က်” ညံၚ်ဂၠဴစချံက် ပါၚ်ညးသၠုၚ်သဝ် လဆောဝ် ဂလံက်စုတ် လပှ်တဲပ္ဍဲပါၚ်ညးတုဲ ဂၠံက်ပတိတ် အိက်ဇဗၠုသှ်ေမံၚ်ပ္ဍဲဒၚေက်သွီုညးတုဲ ကလေၚ်ဟာဲပၠန်။ ညးတၚက်တိုန်မ္ဂး ဂွံဆဵုကေတ်ၚေက် ညးမွဲစုမ် ဗကေတ်လောန်အာတုဲ လစံက်မံၚ်တုပ်တဴညံၚ်ရဴ မပညောန်ရ။
ဂတးမုက်ညး လ္ပာ်ပုၚ်ဂှ် ထၟာဲခပဵုမွဲမ ကြပ်ဗန်ဂွံ၊ ကြပ်ပ်ကဵုညးဂှ် တၞးဇဗၠု နွံမံၚ်ပိပန်ပသာ တုၚ်လဝ်ဍာ်လေဝ်နွံ၊ ပရးလဝ်လေဝ်နွံ။ ဂတးမုက်တဝ်ဝ် မုက်ဖျာသဝ်ဝ်ပြေၚ်ရေၚ်စွံလဝ် ကပေါတ် ဇဗၠု(ကွမ်းယာ) နာနာ။ မပ္တံကဵု 92, ဂဥုဲ (ဆေးပေါၚ်း)၊ (နွယ်ဂျို)၊ (အမွေး)၊ (ဇာဂါ)တအ် ပြေၚ်ရေၚ်လဝ် ပဠၚ်၊ (ဗူး)ပေၚ်ထတ်မံၚ်ရ။ ဆေၚ်ညးဂှ် ဒှ်မံၚ်ပန်ကၠၚ်တုဲ ညံၚ်ရဴက္ဍိုပ်ကာခဍအ်ဍုက် တဲလဒေါဝ်(ကာဇက်တိ၊ကာဗဝ်တိ) မၞိဟ်ၜါဟေၚ်လုပ်ဂဇအ်ဂွံ။ ဆေၚ်ဇဗၠု“ကေတ်ဍုၚ်မန်”ဏအ်ဂှ် ပ္ဍဲကွာန်သၞေဟ်ဗ္ဒဝ်ပိုယ် ဒယှ်အိုတ်ရ။ ဒယှ်ကီုလေဝ် ဖျာဂှ်ဍောတ်တ်ရ။
စဗၠုဂှ် မန်ပိုယ်တအ် စကၠုၚ်မံၚ်အဆက်က်။ “သ္ရိတိုက်ပိထပ် ကၟုဲကၠုၚ် ဒးအပ်” အရေဝ် ဂဒိုဟ်ညးတမၠာတအ် ကေၚ်ဟီုလဝ်နွံကၠုၚ်မံၚ်တုဲ အဓိပ္ပါယ်ဍေဟ်ဂှ် ဒးဒုၚ်တၠုၚ်ကၟုဲနကဵု ဇဗၠုသတ်၊ နဂလံၚ် အခိၚ်ကၠာတေအ် ကေတ်ဂုဏ်စရာဲရ။ စိုပ်ကၠုၚ်အခိၚ်အခါတ္ရဲဏအ်ဂှ် မၞိဟ်ဍောတ်တ်ဇၞော်ဇၞော် စ ညံၚ်ရဴ မၜဲ အိုတ်မွဲချအ်မွဲ။
“လညာတ် ညးသၟာပိုန်ဒြပ်ဂှ် စဇဗၠုဂှ် ပၠေၚ်သြန်ရ၊ ဍာ်ဍေဟ်လေဝ် ချအ်ပတိတ်၊ အဖတ် (အရေမရ၊ အဖက်မရ)ဂှ် ချအ်ထောံဖအိုတ်ရ သၟးသၟးရ။ ရဲသၟာပရေၚ်ပညာတအ်ဟီုဂှ် စဇဗၠုဂှ်ဥာဏ်ဇြိုၚ်၊ ရဲသၟာပရေၚ် ပွဳပွူသဘာဝတအ်ဂှ် ဂွံဒှ်ဇဗၠုမွဲသွာတ်ဂှ် ဒးသုၚ်စောဲ ပလာတ်စတေက်ကီု၊ ချဟ်လဝ်ပေၚ်ထာတ် သဘာဝလေဝ်ဟွံကျေဝ်၊ ညးစောဲကဵုဓရ်တအ်ဂှ် ၝဏအ်ဂှ် တဏှာ အစောဲအလာံရ၊ လ္ပစလေဝ်ဂျိုၚ်မံၚ်ရ၊ ညးသၟာပရေၚ်ထတ်ယုက်တအ်ဟီုဂှ် ဒှ်ကေၚ်သာပၠန် သ္ဂး။ ၝလဵုဒးရော? နာဲဂေါဝ်ဆာဲ” ဟး ဟး ဟး နာဲဂေါဝ်ဆာဲ ဂြိုၚ်တိုန်ထတ်တ်တုဲ ဒးမံၚ် ဟံသာ ညးထံက်ဂလာန်။
“ဗီုလဵု ဟီုဟီုရ၊ လညာတ်ညးကဵုညး ကမၠောန်ညးကဵုညးကၠောန်မံၚ်ဖအိုတ်ရလေဝ် နာဲဂေါဝ်ဆာဲ၊ ဇဗၠုဂှ် ညးဟီုခိုဟ်ဂှ် အောန်ကီုလေဝ် နာဲဂေါဝ်ဆာဲ ဒးကၠောန်ဇဗၠုသတ်ဂှ် သီုဒးစုတ်သရောတ်တဲ ဖေက်ခပဵုစ၊ အဓိပ္ပာယ်ဍေဟ်ဂှ် ပုရိသာတ် ညးစဗၠုတအ်ဂှ် ဟွံအောန်အာပုဟ်၊ ဂၠိုၚ်တိုန်ဏီ ဟီုစဂွံ၊ ဗီု နာဲဂေါဝ်ဆာဲ သၟာန်ဂှ် မန်ဗှ်ေတအ်ကေတ်ဍုၚ် ဗီုလဵုကေတ်ရော? တန်တဴဒၞာဲမံၚ်တုဲ ဗီုညးကဵုညး ဒၞာဲညးကဵုညးဂှ် ကၠောန်မံၚ်ဂစာန်ဒၟံၚ်ဖိုဟ်ရ သ္ပသတိတှ်ေညာတ်မာန်မံၚ်ရ”
ဂွံဇဗၠုတုဲ နကဵုကွဳလိုန်ဓါတ် ပ္ရောံအာတူရူအာ အခန်ကၞာတ္ရဲဟံသာဝတဳလီု မရနုက် (၂၆၅) ဝါ သွက်ဂွံ ပူဇဴပၞာၚ်သ္ဍဴ ပ္ဍဲကျာ်စေတဳ ကျာ်ကြုက် ရ။
+++++++++++++
သၞာံ ၂၀၁၉-၂၀၂၀ ဂှ် ဟိုတ်နူအကာဲအရာယဲကပ် ကဝ်ဗောတ်-၁၉တုဲ ၜိုန်အံၚ်လဝ် တန်သၠုၚ်ကီုလေဝ် ဟွံပံက်ဘာဏီတုဲ တိုန်မံၚ် တန်ဗ္တောန်အၚ်္ဂလိက် လတူလပှ်ကျာရ၊ “ဟံသာ” ဍုက်ကေဝ်ကၠုၚ်ကဵု နန်ထဝ် လတူလပှ်ကျာ၊ ဒှ်ကၠုၚ်ရဲ ပ္ဍဲၜှေတ်ဗော်ညးသ္ကအ်တုဲ လဆောတ်တက်ကျာ ဗဳဒဳယဵု၊ လဆောဝ်ပလံၚ်လိက်၊ လဆောဝ် ပလံၚ်ကေတ်ရမျှာၚ်ညးသ္ကံတုဲ ၜိုန်ဆဵုမံၚ်ရုပ်ပတောအ် လတူလပှ်ကျာကီုလေဝ် ပ္ကဴမေတ္တာဆာန် ဟံသာ မွဲဍောၚ် ရာၚ်မောဝ်ကၠုၚ်ပ္ဍဲဂၠံၚ်သြိုဟ်တုဲ ဒးပံက်ဟီုဏာ အရေဝ်ဆာန်ကဵု မိဟံသာ။
“ဗှ်ေကၠုၚ်ဟီုမံၚ်အရေဝ်ဆာန်ကဵုအဲ၊ ကၠုၚ်အာတ်မံၚ် သွဟ်ဆာန်ကဵုအဲဂှ် သ္ပမံၚ်သ္တီရ၊ ဆ္ဂး ဍာ်ဒကေဝ် မၞိဟ်အဲဂွံဒးဆာန်ဂှ် ပ္ဍဲဗှ်ေ ဟၟဲဏီ” မရေဝ် နန်ထဝ် ၜိုန်ရဍိုန်ၜတ်မံၚ်ကီုလေဝ် ညံၚ်ရဴ (လုံမီး) ဇဝ်ဖျေအ်ဏာ ပ္ဍဲဍာ်၊ ဂြိုဟ်အဲမွဲ ဂနမ် ယက်ဒးကုဲဂၠု မံၚ်ရ။ “မၞိဟ်အဲဆာန်ဂှ် စိုတ်စရိုတ်ဒးခိုဟ်၊ ရုပ်သာ်သၠုၚ် ဒးတဴဒးနွံ၊ ဥာဏ်ပညာ ထတ်စောန်မြက်စာ၊ ပိုန်ဒြပ် ဒးနွံ၊ ဒးလျိုၚ်ဇြိုၚ်သ္ဍိုက် ရှ်ေသှ်ေဗုဒ္ဓ ဘာသာ၊ ဒးဒှ် မဇ ကောန်ဂကူမန် ဇောတ်တ်” နန်ထဝ် ရိုဟ်ဏာမွဲတုဲမွဲသိုက်က်ဂှ် အဲအီမာန်ကီုလေဝ် လကြဴအိုတ်မွဲဂှ် ဂွံအာစၟတ် သုညတုဲ ဓညောန်ဗြီု သီုဂအီ ပြေဟ်ဟ်ရ။
“ဒၞာဲကတဵုဒှ်မၞိဟ်၊ ဂကူမသ အခေါၚ်ရုဲစှ်ဟၟဲပုဟ် “နန်ထဝ်” ဟိုတ်နူမိက်ဂွံတးပါဲအဲတုဲ ဍာ်ဒကေဝ်ပ္ဍဲအဲဟၟဲဂှ် ကပှ်ဟီုမံၚ်ဟာ? လ္ပာ် “ဟံသာ” က္ဍုဟ်ဟ်ဆာန်ဆာန်၊ အဲဂှ် ဆာန်ဒၟံၚ်လၟိုန်ကာလဏောၚ်ဂှ် စှ်ေစိုတ်ညိ”
ဟိုတ်နူကဵု “နန်ထဝ်” ဟွံဒုၚ်တဲ ပ္ဍဲမေတ္တာဆာန်မဗုဇကုအးမွဲဍောၚ်ဇကု ဗာတ်ဂတာပ် လ္ပာ်“နန်ထဝ်” မုဟွံဂွံအခေါၚ်ကလေၚ်ဟီု မွဲသာ်ဏီဂှ် “ဟံသာ”မွဲ စှ်ေအာနူလာၚ် သီုထေဲ၊ သီုဟွံပေၚ်စိုတ်ကဵု ဇကုဇကုကီု၊ ဂွကီု၊ ဒှ်ဒေါသကီုတုဲ ဂစာန်စှ်ေအာ နူလာၚ်ပြဟ်ဟ်ရ။ “နန်ထဝ်” မွဲဓဝ်ဟေၚ်သှ်ေမံၚ်လတူလပှ်ကျာရ။
“ဟံသာ”ယျေ ဗှ်ေ မၞိဟ်ဗီုလဵုရော? အတိုၚ်ပၟိက်စိုတ်ဇကုကေတ် ဟွံဂွံဗက်ဂှ် ပါဲတိတ်အာဟဂှ်ဟာ? စိုတ်ဂၠေံ၊ ဓဝ်လအေၚ်ဟၟဲမွဲသာ် ကြပ်ကဵု “နန်ထဝ်” ဒှ်ဟွံမာန်။ “ဟံသာ” နွံပၟိက်ကဵု “နန်ထဝ်” ဏအ်ဇေတ်တ်မ္ဂး မေတ္တာဆာန် မွဲဍောၚ်ဓဝ် ဟွံဂွံပုဟ်၊ ဆၜိုတ် အရေဝ်ရမ္ဂး ဆလအ်မှ ကြပ်ဂှ်လ္ပဟီု လအ်အာသ္ရောဲအာနွံ။
ဟံသာ ကဵု နန်ထဝ် ညးၜါဏအ်ဂှ် ပ္ဍဲတန်ဗ္တောန်အၚ်္ဂလိက်လတူလပှ်ကျာ ပ္ဍဲကွး (၂၀)တၠဂှ် မဒှ်ညးသ္ကေက်သ္ဂာ ပ္ဍဲလိက်ကီု၊ ဟီုအရေဝ်ဆက်ဆောံခိုဟ်ကီု၊ ဘိုၚ်ရီုဗၚ်ညးတၞဟ်ကီု စိုတ်စရိုတ်ခိုဟ်ကီု စရာဲနွံမံၚ်တုဲ ကွးဘာတအ်ဂမၠိုၚ် သ္ဍိုက်မၠိုက်တဴအိုတ်ရ။ ဆဂှ်သၟးဟွံက စပ်ကဵုရုပ်သာပၠန်လေဝ် ညးၜါဂှ် ညံၚ်ရဴကောကဵုဒေအ် ရုပ်သာ်ကျေဝ်ဂေါဝ် ဗုၜတ်ဒၟံၚ်၊ ဇကုဂေါဝ်ဖျုန်သွပၠန်လေဝ် ပေၚ်ဍတ်၊ မုက်မတ်ညးတအ်ညးၜါဂှ် ဓရ်ပတှ်ေဇကုဇကုဂှ် ပေၚ်မံၚ်ဂှ် ဆဵုမုက်ဗက်ဂှ် တီကေတ်မာန်ရ။ အကြာကောန်ကွးဘာဂှ် စာပ်စ မံၚ်ညးၜါဏအ် သွက်ဂွံဒှ် အာတောဲဆောတုဲ ညးခဍုက်အဲဓမက်။ ညးၜါဏအ်ဂှ် နူစ တန်ဗ္တောန် စဗာတ်ဂတာပ် ဍုက်ကေဝ်ဂၠိုၚ်မံၚ်ညးသ္ကံ တုဲတုဲရ ညးၜါဏအ် မွဲလှ်ေဟွံပံက်ပါၚ်လတူဝိုၚ်။
“သၠးအခေါၚ်ညိ “နန်ထဝ်” အဲဒှ်ထေဲအာညိတုဲ စှ်ေအာ နူလပှ်ကျာ မွဲလစုတ်ဂှ် လ္ပကေတ်ဒုဟ်ညိ”
“ပွမ ဒုၚ်ဂုဏ် တီကေတ်ဒးဒှ်ဇကုဂှ် ဒှ်စရာဲ မွဲသာ်ရ။ ပွမဒုၚ်ဂုဏ် “ဟံသာ”ဂှ် “နန်ထဝ်” သၠးမံၚ်အခေါၚ်ရ၊ ဆ္ဂး လ္ပကဵု “နန်ထဝ်” ဒးသၠးမံၚ်အခေါၚ် မွဲခဏခဏညိ ဗီုဂှ် ဟွံမွဲပၟိက်ပုဟ်။ ပွမထေဲပၞောတ်ဂှ် ညးဗြဴဏောၚ် ရဲအရာပ်တအ်ဟီုစ။ “ဟံသာ” လေဝ် လ္ပထေဲဒၟံၚ်ရ ထေဲဂၠိုၚ်တိုန်မ္ဂး ဒှ်ဒေါသတုဲ ဒှ်လလောၚ်ဖိုလ်ရနွံ ဂွံဆဵုတသိုက်ဝါတ်”
မအရေဝ် “နန်ထဝ်” ဗျိဒေန်ဒၟံၚ်ဂှ် သွက်“ဟံသာ” ကလၚ် ၜိုဟ်ဂံၚ်မံၚ် ပ္ဍဲဂၠံၚ်သြိုဟ်ညးတေအ်ရ။ သွက်ဂွံကြပ်ကဵု “နန်ထဝ်” ဂှ် အဲဂဆက်စာန်အာမံၚ်ဏီ ကဵုအခေါၚ်ကဵုအဲညိ အာတ်ဒုၚ်ဂုဏ်ကေတ်နူ “နန်ထဝ်”တုဲ။ ဒၞာဲပြံၚ်လှာဲဂွံဂှ် အဲပြံၚ်လှာဲတုဲ ပွမပြံၚ်လှာဲဟွံဂွံတအ်ဂှ် ဒုၚ်ကေတ်တဲညိ။ ပ္တံနူတ္ရဲဏအ်တုဲ အစောန်စရာဲ အဲ ၜိုတ်သၟဟ်အစောန်မာန်ဂှ် ဂစာန်ဂွံကြပ်ကဵု “နန်ထဝ်”ဏောၚ် အဲဖျေအ် သန္တိဌာန်ရ။ တၚ်ကော်ဆဴဇၞော်အိုတ်မွဲဂှ် ဒးဒှ် မဇ ကောန်ဂကူမန် ဇေတ်တ် ဏအ်ဂှ် ဗီုလဵုဂွံသ္ပရော? သွဟ်ဏအ်ဂှ် ဒးနွံမံၚ်ပ္ဍဲ “နန်ထဝ်” ဟေၚ်ရ။
“နန်ထဝ်” စပ်ကဵု စိုတ်ဓါတ်၊ ပညာပိုန်ဒြပ်တအ်ဂှ် ဂစာန်မ္ဂးဒှ်မာန်ကီုလေဝ် ဒးဒှ် မဇ ကောန်ဂကူမန် ဇေတ်တ် ဗီုလဵုရော?”
“မဇ အဆက်ညးတအ်ဂှ် မန်တုဲ မိမၜါလ္ပာ်ဂှ်မန် ကောန်ညးတအ်ၜံၚ် ပတိတ်မ္ဂး ကောန်မန်ရ၊ ဇကုဇကု ဒးဒုၚ်ကေတ် ကောန်ဂကူမန်ပၠန်ဂှ် ဒှ်တၚ်အဓိက ဇၞော်အိုတ်ရ။ ဟီုအရေဝ်မန်၊ မိမမန်ကီုလေဝ် ပ္ဍဲကဵုအကာဲအရာပရေၚ်ဍုၚ်ကွာန်တ္ရဲဏအ် ဒှ်ကောန်မန်ဂွ(ကျွန်မ မွန်ဖြစ်ရတာ ရှက်တယ်) ကောန်မန်ဗီုဏအ်ဂှ် ဒုၚ်ကေတ်တဲဟွံမာန်ပုဟ်။ မန်ယိုက်ဂၠေၚ်ရေၚ်တၠုၚ် ဒးတုဲဖိုလ်ဒၟံၚ်သွက်မန်ဂှ် ဒှ်ကောန်မန်ဇေတ်တ်ရဒှ်”
“ဒှ်ကောန်မန်မ္ဂး “နန်ထဝ်” ဒုၚ်တဲဟွံမာန်ပုဟ်ဟာ? ယဝ်သ ယှအ်ထောအ်မလိက်ဇေတ်တ်ဂှ် ၜါမရော။ သွက်အဲဂှ် ဒးယှအ်ထောအ်ညိမှ ဂွံကြပ်ကဵု “နန်ထဝ်”မာန်။ ဗီုဂှ်ဟွံသေၚ် “ဟံသာ”ဏအ် ဂွံကြပ်ဂှ်ဟွံလောဲသွာပုဟ်”
မိမ “နန်ထဝ်”တအ်ဂှ် ဇူဒေါအ်လဝ် နူဂကောံဗော်ရပ်လွဟ် ဗော်ဍုၚ်မန်တၟိ နူဌာန ပရေၚ်ပညာကမ္မတဳဘာကောန်ဂကူမန်၊ လညာတ်စိုတ်ဓါတ် ဆာန်ဂကူဂှ် ညံၚ်ဂွံၜဝ်ဇုတ် ဒးဒုၚ်ဒၠောအ်ဗ္တောန်လဝ် ချိုတ်တ်ပၠိုတ်တ်တုဲ အခိၚ်ကာလ သဳကၠဳ ပရေၚ်ပညာမ္ဂး တၚ်နၚ်ချိုတ်ပၠိုတ်တုဲ ညးမွဲမှလေဝ် ကလေၚ်ဂတးကဵုဟွံမာန် ဂွံဆဵုကေတ်ဒၟံၚ် ခဒမ်ဗ္တောန်လိက်ပိုယ် လၟိုန်ကာလရ။
“ယဝ်သ ယှအ်ထောအ်မ္ဂးတှ်ေ ကောန်ဂကူမန်ပိုယ် ဒှ်အာ (ကၠ) ပိမဏောၚ်၊ ဟိုတ်ဂှ်ရ “နန်ထဝ်” ဟွံမိက်ယှအ်”
“ကၠ ပိမဂှ် မုရော? “နန်ထဝ်” ၊ ဖာသီ (၃၂) ဍုၚ် ကောန်ဂကူမန်ပိုယ် ကၠက်အာယျ၊ ဗဂေါ(ဟံသာ) (၃၂)ဍုၚ် ဟွံမွဲရ လကြဴဏအ်မှ မန်ပိုယ်ကလေၚ်စိုပ်အာ ဍုၚ်ဗဂေါညိ၊ မုတ္တမ (၃၂)ဍုၚ် ဌာန်လ္ရဵုတအ်ဂှ် ကၠာဲမံၚ်တုဲ ဥပမာ ဍုၚ်ကျာ်ထဝ် ဂှ် ကၠာဲအိုတ် ဒးဟီုအရေဝ်ဗၟာမှ ညးတအ်ကၠိုဟ်။ လၟုဟ် တွဵုရးမန်ပိုယ် စှ်ပွိုၚ်ဍုၚ်ဂှ် ဒေသ ဟီုအရေဝ်မန်သက်သက် အောန်စှ်ေအာ ကွေဟ်ဟ်ရ။ ကဆံၚ်ပထမဂှ် ကၠာဲ၊ ကၠာဲတုဲကၠေံ၊ ကၠေံတုဲဒှ်ကၠက်ရ။ ကောန်ဂကူမန်ပိုယ်ဂှ် ကၠာဲစလောဲဒၟံၚ် စုက်ကဵုသေံဒှ်သေံ၊ စုက်ကဵုဗၟာဒှ်ဗၟာ စုက်ကဵုအၚ်္ဂလိက်ဒှ် အၚ်္ဂလိက်”
“ ဒးထံက်ဂလာန် မအရေဝ် ‘နန်ထဝ်’ ပေၚ်ၚ်ရ၊ မိပိုယ်ဂှ် ဒှ်ဒၟံၚ်ညးဒုၚ်ကာအလဵုသဳ(အစိုးရဝန်ထမ်း)တုဲ မန်ဇေတ်တ်ကီုလေဝ် ဟီုအရေဝ်ဗၟာဂၠိုၚ်ကၠုၚ်တုဲ ဟွံမိက်တက်ကျာ အရေဝ်မန်ကွေဟ်ဟ် ပ္ဍဲသ္ရိဂှ်ဂွံဆဵုမံၚ် နမတ်ဟဂှ်ရ”
ဟံသာဂှ် ဟွံတီကၠိုဟ်ဝၚ်မန်မွဲသာ် ဆၜိုတ်မိၚ်ညိညးရ။ တီဝၚ်လေဝ်ညိညးရ ဟွံကၠိုဟ်ဇြိုဟ်ဟ်နက်က်တုဲ အခိၚ်ကာလ “နန်ထဝ်” ဟီုလဴသောၚ်ကလးဂှ် သွက်ညးတေအ်ဒှ်မံၚ် ဗဟုသုတတၟိဖအိုတ်တုဲ ညးတေအ် စိုတ်မိက်ဂွံဆက်လ္ရတ် လတူဝၚ်မန်ဂှ် ကလိုက်ကၟဵုကတဵုဒှ်ကၠုၚ်ရ။ ညးတေအ်ချပ်စိုပ်အာ လ္ပာ်အနာဲဇကုတုဲ ဟွံပၠုဟ်အခိၚ်မွဲသာ် အာဆဵု အနာဲဏောၚ်၊ အာတက်ကျာ သ္ဂးတုဲ ဆက်ဏာဖုၚ်ဆိၚ်အခိၚ်ကဵု အနာဲဇကု နွံပ္ဍဲသ္ရိရ။
+++++++++++++++++++++++
“အနာဲ စိုတ်ဓါတ်ဆာန်ဂကူဟီုဂှ် မုရော?၊ မန်ဇေတ်တ်ဟီုဂှ် ဗီုလဵုရော?” ပ္ဍဲဘဝအဲဂှ် ညးထ္ၜးဂၠံၚ်ကဵုအဲလေဝ် ဟီုစဂွံ ဗီုမိမလေဝ် ဟီုဂွံ အနာဲ အံၚ်မာန်မန် ဒှ်ညးဗဟုသုတဂၠိုၚ်၊ ကၠိုဟ်ပရေၚ်ဍုၚ်ကွာန်၊ စိုတ်ဓါတ်ဆာန်ဂကူဍိုက်ပေၚ်။ ကမၠောန်ကေၚ်ကာ စပ်ကဵုမန် ချဳဒရာၚ်မ္ဂး အံၚ်မာန်မန် ဟွံပါမ္ဂး ဝိုၚ်ဏအ်ဟွံစဳ။ “ပၠန်ဂတးမ္ဂးဂှ် ဒးရပ်လွဟ်ဂှ်မွဲသာ်၊ ပၠန်ဂတးလညာတ်ဂှ်မွဲသာ် ညးကေၚ်ဟီုဒၟံၚ်တွဵု”ၝဏအ်ဂှ် ဝါဒညးရ။ အယုက်နွံမံၚ် မသုန်စှ်ကီုလေဝ် ဆက်စပ်မံၚ်ကဵု သၟတ်လၟိုန်တုဲ ဆဵုကဵုသၟတ်တအ်မ္ဂး တက်ကျာမအရေဝ်သၟတ်တအ်လေပ်တုဲ ကာဂဗကဵုညးဇၞော်ဇၞော်တအ်ပၠန်မ္ဂး ဂလှ်ေကျာ စှ်ေဗီု။ ကမၠောန်ညး အဓိကညးယိုက်ဂၠေၚ်ဂှ် လိက်ပတ်ယေန်သၞာၚ်တုဲ ပဵုချိုတ်ပၠိုတ်မွဲဂှ် သွဟ်အဲမိက်ဂွံတီဂှ် တီတွဵုအဲပတှ်ေကေတ်။ နူဍောတ်တ်တေအ် ကေၚ်မံၚ်လဝ်သ္ရိမိနော်တုဲ ညးရံၚ်စံၚ်ဗ္စဖျုန်လဝ်ပၠန် ဍုက်ကေဝ် ဒဒှ်ေဒယှ်ခိုဟ်မံၚ်တုဲ ဒၟံၚ် မံၚ်ဗီုရဲ၊ ဗီုမိမ၊ ဗီုအာစာ မွဲကီုရ။
“ကောန်ကၟိုန်အဲတၟေၚ်ကွေဟ်လေဝ် လုပ်ဂ္ဇံဗတ်ဂတာပ် သၟာန်စိုပ်ကၠုၚ် သ္ဂးဂှ်၊ မုဟိုတ်မိက်ဂွံတီရော ဟံသာ”
“ အဲနွံပၟိက်ကဵုမိက်ဂွံသွဟ် နူမိနန်ထဝ်၊ မိက်ဂွံပိုၚ် နန်ထဝ်တုဲ ဟိုတ်ဂှ်ရ ကၠုၚ်သၟာန် အနာဲ ”
“အခိၚ်ကၠာတေအ်ဂှ် မန်ပိုယ်မုဟိုတ် ဒးကျကၠုၚ်ဍုၚ် ဟံသာ အဲဟီုလဴဒၟံၚ်လၟိုန်ကာလရ”
“အနာဲ အဲမိက်ဂွံတီဂှ် စိုတ်ဓါတ်ဆာန်ဂကူဟီုဂှ်မုရော? လ္ပဓဇက်စဝၚ်အတိတ်ဂၠိုၚ်”
“ညးလဴလေဝ်ကလၚ်ဟွံမာန်၊ ကာလသၟာန်ဗဟုသုတလေဝ် မုဟွံတီ၊ ဂတအ်ဗြာတ် လ္ပဇၞော်နူဒဳ ကွာ်ဟွံဂွံ ဟံသာ၊ လၟုဟ်အဲလဴဂှ် ယဝ်ရဗှ်ေကလၚ်ချိုတ်တ်ပၠိုတ်တ်မ္ဂး စိုတ်ဓါတ်ဆာန်ဂကူဟီုဂှ် မုရော?၊ မန်ဇေတ်တ်ဗှ်ေမိက်ဂွံတီဂှ် ဗီုလဵုရော? ကၠိုဟ်အာသ္ဂးဂှ်ရ”
“သၠးအခေါၚ်ညိ အနာဲ အဲစိုတ်ပြဟ်အာတုဲ လုပ်ပၠံက်ဒးအာ အရေဝ်”
“အကြာကောန်ဂကူ ပိုယ်မန်တအ် ဗၠေတ်ဒုၚ်ဂုဏ် အေၚ်ဒုၚ်ညးသ္ကအ်ဏအ်ဂှ် ဒှ်သွက်ဂွံဂွံ နန်ထဝ် ဇေတ်တ်ရ ဟံသာ၊ ယၟု ဗှ်ေဟံသာဂှ် ညးတၞဟ်ဟွံသေၚ်ပုဟ်ခုတ်လဝ် အဲရကဵုလဝ် ယၟုဏအ်၊ မိက်ဂွံညာတ် သၟတ်တအ်စဴဍုၚ်ဟံသာတုဲ ရန်တၟံနွံနွံ ကဵုလဝ်၊ တ္ရဲဏအ် ကၠုၚ်သၟာန်မိက်ဂွံဂွံ နန်ထဝ် ဏောၚ်သ္ဂး ကၠုၚ်သၟာန်၊ မိပ်စိုတ်သက်ဒးဟီုဟၟဲရ။ ဆ္ဂး နန်ထဝ် ဗှ်ေဂှ် ဟွံကိတ်ညဳကဵု နန်ထဝ် အဲရန်လဝ်ဂှ်ကွေဟ်ဟ်ပုဟ်၊ လကျှန်ခိုဟ်ရဒးဟီု ကောန်ဗၠာဲ ဟံသာဏအ် သၟာန်စိုပ်ကၠုၚ် ပရောပရာ နန်ထဝ်ယျတှ်ေ ဒးလဴဂှ် ဒှ်ကၠုၚ်တာလျိုၚ်ပိုယ်ရ။”
“ နန်ထဝ် အဲဂှ်လေဝ် ဍေဟ်မိက်ဂွံဂွံ ဂကူမန်ဇေတ်တ်၊ စိုတ်ဓါတ်ဆာန်ဂကူနွံမှ ဂွံဍေဟ်မာန် ယဝ်သဟွံဓဇက်ဝၚ်အတိတ်မ္ဂး စိုတ်ဓါတ်ဆာန်ဂကူမန် ဟွံဇြိုဟ်နက်ပုဟ်၊ ဟီုအတိုၚ်ဏအ်တှ်ေ ဗှ်ေလေဝ် စိုတ်ဟွံလုပ်စ၊ အဲသၟာန်သွဟ်ကဵုဗှ်ေဏောၚ်၊ အာဗီု အၚ်တာဗျူတှ်ေ ဗှ်ေလေဝ် ဟွံဒကုဲပုဟ်”
“ဗှ်ေဆာန်ဂကူမန် ဂလိုၚ်လဵုရော? ဟံသာ”
“ဓမ္မတာရ ဆၜိုတ်ဒှ်မန်၊ ကောန်မန်”
“က္ဍိုပ်သ္ကိုပ်ဗှ်ေဒးစိုတ်အိုတ်ဂှ်ညးဂှ်ရော?”
“ ဗိုလ်ချုပ်အောၚ်ဆန်း”
“ကောန်ဂကူမန်ကဵု ကောန်ဂကူဗၟာ ၜါပြကာဏအ် ၝလဵုဗှ်ေထေၚ်ဇၞော်ဂၠိုၚ်ရော?”
“မန်ရ အနာဲ”
“က္ဍိုပ်သ္ကိုပ်မန်ပိုယ် လုပ်ပၠန်ဂတး ရပ်လွဟ်သွက်ဂွံဂွံ အခေါၚ်အရာမန်ဂှ်ညးဂှ်ရော?၊ ဟွံရပ်လွဟ်မွဲသာ် လုပ်ပၠန်ဂတး နကဵုလိက်ပတ်မန်ဂှ် ညးဂှ်ရော? ကောန်ဗၠာဲ ဟံသာတီဟာ?”
“ ဟီုဍာံဍာံမ္ဂး ညးမွဲလေဝ်ဟွံတီ၊ လ္ရတ်လေဝ် ဟွံလ္ရတ်မွဲလှ်ေပုဟ်”
“ဒုၚ်သဇိုၚ်ကဵု အရေဝ်ဗှ်ေတုဲ ယဝ်သ အဲဒးပွံက် အဓိပ္ပာယ်မ္ဂး ဂကူဗၟာဂှ် ဗှ်ေအထေၚ်ဇၞော်ဂၠိုၚ်နူကဵု ဂကူမန်ဏီ”
“အရေဝ်အနာဲဟီု အဲဒုၚ်ဟွံမာန်ပုဟ်၊ အဲကောန်မန်မွဲရ”
“ဒယှ်ေဒွက်မန် မူစိပိုဒ် ဒယှ်ေလေပ်ကီုရော?”
“မွဲပိုဒ်ဟွံဒး၊ ဂွံချိုတ်တ်ပၠိုတ်တ်ဂှ် မုဒွက်လေဝ်ဟၟဲ၊ မတေအ်မွဲမ၊ ၝဏအ်မွဲမ ရဂွံ”
“ပရော (ဗိုဟ်ချုပ်)ဗှ်ေလဴ ညိစမ်”
“ညးဂှ်တှ်ေ ပ္ဍဲဍုၚ်ပိုယ်ဏအ် သွက်ဂွံပရေၚ်ဗၠးၜးနူသၟတ်တဲ အၚ်္ဂလိက်တအ်တုဲ ညးပကောံကၠုၚ်ကောန်ဍုၚ် အရၚ်တအ် တုဲ ဒေသဒဵုကဵု ဒေသဗလး ၜါသာ်ဏအ် ဂွံကၠုၚ်ဗၠးၜးနူ အလုံကၟိုန်ဍုၚ်ရ”
“သၟတ် ဆာန်မန်တအ်ဂှ် လဴပရော (ဗိုလ်ချုပ်) တီ၊ ဒးလဴပရောက္ဍိုပ်သ္ကိုပ်မန် ညးလုပ်မံၚ်ပေါဲဗတိုက်သွက်မန်ဂှ် ဟွံတီ၊ ဂြိုဟ်ဂိဒကေဝ်ကွေဟ်ဟ်၊ သၟတ်မန်ပိုယ် မုဟိုတ် စိုတ်ဓါတ် အထေၚ်ဇၞော်ကောန်ဂကူမန်ပိုယ် ကဆံၚ်ဂွံသဝ်စှ်ေအာ ဒးထေၚ်ဇၞော်အာ ဂကူညးတၞဟ်ဂှ် တ္ရဲဏအ် မိက်ဂွံတီ ပရောပရာဏအ်တုဲ သၟာန်ကၠုၚ် အဲကၠိုဟ်ဗီုဏအ်ရ”
မာံဟံသာလေဝ် ဒးသၟာန် အနာဲညးတေအ် မွဲၜါပါၚ်တုဲ ကလေၚ်ဟီုပြိုၚ်ကဵု အနာဲဇကုဟွံမာန်ဂှ်တီကၠုၚ်ရ။ ၜိုန်ရညး တေအ် ဗဟုသုတဂၠိုၚ်မံၚ်ကီုလေဝ် စပ်ကဵုဝၚ်မန်၊ ပရောပရာမန်ဂှ် မွဲလှ်ေမှ ဟွံလ္ရတ်မွဲလှ်ေ စမ်ၜတ်ကဵု သၟာန် မွဲၜါပါၚ်ဗတ်ဂတာပ်ဂှ် သွဟ်တိတ်အာဂးဂှ်ရ။ ဟိုတ်ဂှ်ရ မိနန်ထဝ် ဒးဒှ်ဏအ်တီမံၚ်တုဲ၊ ပ္ဍဲခန်ဗ္တောန်လိက် အထေၚ်ဇၞော်မံၚ်ကဵု ဂကူမန်ဟွံသေၚ်တုဲ ညံၚ်ဂွံတီအာ ပရောဂကူဇကု ချိုတ်တ်ပၠိုတ်တ်ဂှ် နကဵုမာယာဥပါဲ မိက်ဂွံဂၠာဲလ္ရတ်ဝၚ် ကောန်ဂကူ ဇကုတုဲ ဟီုဏာပိုတ်တ် စိုတ်လ္ရတ်ဂွံဒှ်ကၠုၚ် ပ္ဍဲအခိၚ်တ္ရဲဏအ်ရ။
“မန်ပိုယ်ကျအာဗၟာ သက္ကရာဇ်(၁၁၁၉)ဒးကဵုဍုၚ်ဂှ် နကဵုလညာတ်အဲ ကျညးဒးကဵုဍုၚ် ကဵုဒှ်ကၠာရ။ သီုကဵု ဗက်ဂစိုတ်ဂလက်ထောံ ဂကူမန် အတိုၚ် အ္စာကၞေဟ်ဒယှ် မာံတောအ် ချူလဝ်မ္ဂး
၁။ ဗၟာအံၚ်ဇေယျဂှ် ကဵုစိၚ်လိုန်ဂစိုတ်ထောံခမဳသၚ်ပိုယ်မန် ပ္ဍဲဍုၚ်ဗဂေါဟံသာတဳ ၃၀၀၀- ပိလ္ရီဇကု၊
၂။ ဂစိုတ်ထောံသၟတ်ဗြဴမန်နွံကဵုဂဝ်ဂၞဴပဋိသန္ဓိဂှ် ၇၀၀၀-ထပှ်လ္ရီ။
၃။ ဂစိုတ်ထောံကွးဘာသၟတ်မန်ကောန်ၚာ်တြုံ၊ဗြဴဂှ် ၅၀၀၀ မသုန်လ္ရီ။
၄။ ဂစိုတ်ထောံကောန်ၚာ်ကောန်တှ်ဂှ် ၆၀၀၀-တြဴလ္ရီ။
၅။ ကၠောန်စာတ်ဇၞော်ဒ္စိတ်စာတ် ဍေဟ်ဒဳပၠောပ်ဏာတုဲ စံၚ်ဂစိုတ်ထောံဂကူမန် လၟိဟ်ဂၞန်သၚ်္ချာ မဟာကိုဋ်ရောၚ်။
၆။ ပ္ဍဲသၞာံသက္ကရာဇ် (၁၁၁၇)ဂှ် ဗၟာအံၚ်ဇေယျ သဳဂွံဍုၚ်လ္ဂုၚ်တုဲ၊ ဂစိုတ်ထောံခမဳသၚ်မန်ပိုယ် -၃၀၀၀ ပိလ္ရီ၊ ဒၞာဲဂှ် ဒှ်အာတ္ကအ်မွဲတုဲ တ္ကအ်သ္ရာ မန်ပိုယ်ကော်ခဴစရောၚ်၊ ဗၟာဗၟုဲတအ်ကော် (သၚ်္ကန်းကျွန်း) အတိုၚ်ဏအ် အာစာကၞေဟ်ညးချူစွံလဝ်တုဲ ဂွံဗှ်ကေတ်ပ္ဍဲလိက်ညးချူလဝ်ရ။ ဍေဟ်ဂစိုတ်ကောန်ဂကူမန်ပိုယ်တအ် ဒၞာဲဍေဟ် ကြာတ်ကြဴဆီဂှ် ဍာ်ကၟာဂှ်ဒှ်အာဗီုဆီတုဲ လၟုဟ်မန်ကော်ခဴစ ကၟာဆီ ဗၟာကော် (သွေးဆေးကန်)ရ။
“ ဓဇန်ကွေဟ်ဟ် အလန်ဏအ် ပ္ဍဲဘဝအဲဂွံမိၚ်ကၠာအိုတ်ရ၊ ကောန်ဂကူညးတအ် ဂလိုၚ်ဏအ် ဒးဓဇန်မာန်ဟာ?”
“ဍုၚ်မန်၊ ဍုၚ်ရခေၚ်၊ ဍုၚ်သေံ၊ ဍုၚ်ဂလာ သ္ကုတ်သၟဝ်ကျာ(မဏိပဝ်၊ ကတေဝ်) ညးတံဇၞးအိုတ်ကၠုၚ်တုဲ ဨကရာဇ်ညးတအ် သြဇာဇၞော်တုဲ ဒှ်ကျာ်တြဲရောၚ်ညာတ်ကေတ်တုဲ စနူကဵု ယၟုဨကရာဇ်ညးတံ ကဵုလဝ်ယၟု (အလောၚ်းဘုရား)တုဲ ပညပ်လဝ်သွက်ဂွံဒှ်ကျာ်ရောၚ်ဟီုဂှ် မာနညးတံ သၠုၚ်ဒၟံၚ်ၜိုတ်လဵုရော သ္ဂောံတီကေတ်ရ။ မာနဗီုဏအ်ဂှ် ကော်ခဴစ လညာတ်မဟာဂကူရ၊။ လညာတ်မဟာဂကူဒှ်ကၠုၚ်တုဲ အထေၚ်သောဲ လတူဂကူညးတၞဟ် တံတုဲ သွက်ဂွံဓမံက်ရုပ်ရဴ ဝါဒမဟာဂကူဂှ် ဍေဟ်ဒှ်ကၠုၚ်ရ”
“ဝါဒမဟာဂကူဂှ် မုရော အနာဲ”
“ ဗော်ကျခိုၚ်ယျေ (ကြံ့ခိုင်ရေးပါတီ) ဟီုလဝ်ဂှ် (အားလုံး မြန်မာဖြစ်သွားရၚ် ငြိမ်းချမ်းရေး ရပါပြီး) ဍေဟ်သ္ဂး ညံၚ်ဂွံဒှ် အတိုၚ်ဂှ်လေဝ် ဍေဟ်တအ်ဂစာန်ကၠုၚ်ဒၟံၚ်အဆက်ဆက်ရ၊ ဝါဒ (သခၚ်ကိုယ်တော်မှိုၚ်း)ရ ညးဒုၚ်ကာအလဵုသဳ (အစိုးရဝန်ထမ်း)တအ်ဂှ် ဍေဟ်ပလံၚ်ဒေသတၞဟ်ခြာတုဲ ရဲဒေသတအ်ဂှ် ဂွံစှ်ေဒေဇကုပၠန်ဂှ်ဝါတ်၊ နူတွဵုရးမန် စိုပ်ကရေၚ်၊ ရဲဒေသကရေၚ်စိုပ်ချေၚ်မ္ဂး ခြာဟွံလအ်စှ်ေဒၞာဲ ရဲဒေသညးတအ်ဒၟံၚ်တုဲ ကောန်ညးတအ်ဂှ် ဟီုအရေဝ်ကောန်ဍုၚ် အရၚ်တအ်ဟွံဂွံအိုတ်တုဲ လကြဴ ဒှ်ကၠုၚ် (မြန်မာ) အိုတ်ရ”
“မိမ ပိုယ်တအ်ဂှ် ဒးလဝ်ကၠေမ်ဏအ်ကီု လၟုဟ်မှဂွံကၠိုဟ် အနာဲ”
“တိၚိတ်မၞိဟ်ဟွံကၠက် မၞိဟ်ကဵုမၞိဟ်ဟေၚ်ၚိတ်ဟေၚ်ကၠက်ရောၚ်၊ ဒုၚ်သဇိုၚ်ဝေါဟာဏအ်တုဲ ဒၞာဲအုပ်ဓုပ် ဒးသုၚ်စောဲဟီုအရေဝ်ဗၟာ လိက်ဗၟာ၊ ပရေၚ်ပညာပၠန် မန်ကဵုမန်လေဝ် ဒးဗ္တောန်လိက်ဗၟာ ဒးဟီုအရေဝ်ဗၟာ၊ မဳဒဳယာဂမၠိုၚ်လေဝ် ဗီုပြၚ်နာနာ ဟီုအရေဝ်ဗၟာ၊ လိက်ပရိုၚ်၊ ဒွက် နာနာတအ်ဂှ် ဗၟာသီုဖအိုတ်တှ်ေ ညံၚ်ဂွံအထေၚ်ဇၞော်ကောန်ဂကူညးတအ် တုဲ သ္ပမံၚ်အိုတ်ရ။ သွက်ကောန်ဂကူမန်ဇကုဂှ် ဟွံလေပ်လိက်မန်လေဝ်မုဟွံဒှ် သ္ဂးတိုန်သာ်ဂှ်တုဲ ဂစာန်ဟီုအရေဝ်ဗၟာ၊ ဗ္တောန်လိက်ဗၟာ၊ လအ်တိုန်ညိ အထေၚ်သောဲကဵု ကောန်ဂကူဇကုအိုတ်တုဲ လေပ်လိက်မန်ဗှ်ေတအ် ဒၞာဲလဵုသုၚ်စောဲဂွံရော သၟာန်တဴကောန်ဂကူဇကုအိုတ်ရ။ “ၜဵု ဂယံက်ဒှ်တိုန်တုဲ အခိၚ်လၟုဟ်ဝွံ မန်ပိုယ်ဒးတၟော်မ္ဂး နူကဵုဂွံကၟိုန်ဍုၚ်ဗၠးၜး နူသၟဝ်တဲအၚ်္ဂလိက်တုဲ လၟိုဟ်မၞိဟ်နွံ ၄% ၊ အခိၚ် စရၚ်(သန်းခေါၚ်စာရၚ်း ၂၀၁၄) ထၟံက်ထ္ၜးလဝ် ၂% ကောန်ဂကူမန်ပိုယ် သှ်ေမံၚ်သ္ဂးလဝ်ရ”
“အနာဲ တွဵုးရးမန်ပိုယ်ရော လၟိဟ်မန်နွံမူစိတၠရော?”
“ပ္ဍဲတွဵုရးမန်ဂှ် လၟိဟ်မၞိဟ်နွံမံၚ်ဗၞတ် (၂၁)ကိုဋ် လၟိဟ်မၞိဟ်မန်ဂှ် နွံမံၚ် (၁၀)ကိုဋ်။ လၟိဟ်သၟတ်တအ် ၃ကိုဋ် ပြၚ်ၚ် လၟိဟ်မၞိဟ်ကောန် ဂကူဗက်ကၠုၚ်ဒုတိယဂှ် ဂကူဗၟာ ညးတအ်က္လိဂွံအာစၟတ်သမ္တီကောန်ဍုၚ်(မှတ်ပုံတၚ်)ဂှ် ဒှ်မာန်မွဲသာ်၊ သောၚ်ဂှ်ဟွံသေၚ် အဃောဂကူမန်ပိုယ် ဟီုအရေဝ်မန်ဟွံလေပ် (ဝါ) ဟွံဂံၚ်ဟီုကဵု သၟိၚ်တၠတံဂှ် ဒးဒုၚ်ပၠောပ်အာဒှ် ဂကူဗၟာလေဝ် ဒှ်မာန် (လူမျိုး-မြန်မာ) ၊ လဆောဝ် စွံအာရီုအောန်ကီု၊ ဟွံဂံၚ်ဟီုကဵုသၞာဲဒဴတအ်တုဲ ဒးဒုၚ်စုတ်ဏာစရၚ်လေဝ် ဒှ်မာန်”
“ အနာဲ ဂွံတက်ကျာကဵုတ္ရဲဏအ်ဂှ် ဒှ်အခိၚ်နွံကဵုၚုဟ်မးကွေဟ်ဟ်ရ၊ မၞိဟ်ဟွံတီဝၚ်ဂကူဇကုမွဲ စိုတ်ဓါတ်ဆာန်ဟီုဂကူဂှ် မံက်ဂတဝ်ကၠုၚ်ဟွံမာန်ပုဟ် အဲကၠိုဟ်အာယျ၊ မန်ဇေတ်တ်ဂှ် ဗီုလဵုရော? ”
“အဲလဴစဖအိုတ်မ္ဂး သွဟ်ဍေဟ်ဂှ် ဗှ်ေတီကၠးဟွံသေၚ်ပုဟ်၊ အဲနွံပၟိက်သၟာန်ဗှ်ေဏအ် ဗှ်ေသွဟ်ကေတ်တ်”
“ဗီုလဵုဂွံသွဟ်ရော?အနာဲ ပညုၚ်ကဵုအဲဂၠံၚ်မ္ဂး အဲဂၠာဲကေတ်တ်ဂွံမံၚ်ရ”
“တ္ရဲယးတ္ရဲသဝ်မ္ဂး သွက်ဂွံကၠောန်ဗဒှ်အာအခန်ကၞာ တ္ရဲဟံသာတဳလီု ပေၚ်(၂၆၅)သၞာံ၊ ပ္ဍဲအသာန်ကျာ်ကြုက်ဏောၚ် မိက်ဂွံဗှ်ေကၠုၚ်ကီု ကာလတုဲတှ်ေဗှ်ေတိတ်ပ္ဍဲကွာန်ဏအ် တ္ရဲယးမှစဴ၊ သၟတ်ဝုတ် သၟတ်ဗၠာဲကွာန်ပိုယ်ဏအ် ဍေဟ်တအ်ကၠုၚ်ဍေန်ပၟတ်ပၞာၚ်တုဲ ရာဒနာမိက်၊ ပလံၚ်ဏာကုသိုလ်ပိုယ်ကဵု ညးစုတိစဴတေအ်ဏောၚ် ကၠုၚ်မ္ဂးတှ်ေ သွဟ်ဏအ်ဂှ် ဗှ်ေညာတ်အာပ္ဍဲမတ်ဗှ်ေရ ဟံသာ”
+++++++++++++++++
အဝ် “နန်ထဝ်” ဒှ်ဂကူမန်ဇေတ်တ်မှ ကဵုသွဟ်ကေတ်အဲဏောၚ်တှ်ေလေဝ် ညံၚ်ဂွံဒှ်ကောန်ဂကူမန်ဇေတ်တ်မွဲဂှ် အဲဒးထ္ၜး သက်သဳရဒှ် ဂွံထ္ၜးသက်သဳမာန်ဂှ် မန်ဇေတ်တ်ဂှ် အဲဒးတီလဝ်ကၠာ။ ပ္ဍဲခန္ဓကာယဇကုအဲ ဆီမန် ဂေတ်မံၚ်ပ္ဍဲလတေၚ် ဆီအဲဂှ် ဆီမန်ပါလုပ်မံၚ်ကီုတုဲ ၝဏအ်ဂှ် ညိမှလေဝ်ဟွံဒှ်သံသယပုဟ်၊ ပတှ်ေစှ်ေစိုတ် ဓရ်ပတှ်ေဇကုပေၚ်ၚ်ရ။ ကၠာဟွံအာခန်ကၞာ တေအ်ဏီ အခိၚ်အာရာန်စဇဗၠုဆေၚ်ဖျာ”ကေတ်ဍုၚ်မန်” ပ္ဍဲဖျာနာဲဂေါဝ်ဆာဲဂှ် နကဵု သၟာန် “မန်ဗှ်ေတအ်ကေတ်ဍုၚ် ဗီုလဵုကေတ်ရော?” အဲလေဝ် ဆၜိုတ်ဒှ်ကဵုဒှ် ဟီုဏာကီုလေဝ် ဂၠံၚ်တရဴကေတ်ဍုၚ်ဂှ် ပ္ဍဲမတ်အဲ ဟွံညာတ်အာဏီရ။
အဲလုပ်စိုပ်အာအခန်ကၞာတ္ရဲ ဟံသာဝတဳလီု မရနုက်(၂၆၅)ဝါဂှ် မၞိဟ်စဵုကဵုဂၠိုၚ်ဂှ်ကွေဟ်ဟ်လေဝ်ဟွံသေၚ်။ နွံဒၟံၚ်ဂကောံ သၟတ်မသုန်တြဴကဵု မၞိဟ်အယုက်ဇၞော်ဇၞော်သၟးရဂၠိုၚ်။ အတိုၚ်မွဲသာမ်ကျာ်ဂှ် ကျိုၚ်လဝ်ကယျိုၚ် ဗုဍာဲ မံၚ်ဖအိုတ်။ ဆ္ဂး ဆဵုဂယျိုၚ်ကယျဝ် မန်ဇကုဗတ်ဂှ် စိုတ်ဓါတ်ဆာန်ဂကူမန် ကလေၚ်မံၚ်ဂတဝ်တိုန်မွဲဝါပၠန်ရ။ ရန်တၟံအဲ ဂွံတိုန် အခန်ကၞာဏအ်ဂှ် ပၟိက်ဇၞော်အိုတ်မိက်ဂွံတီဂှ် နန်ထဝ် သၟာန်လဝ်အဲ “မဇ မန်ဇေတ်တ်”သွဟ်ဏအ်တီတုဲမှ သွက်ဂွံကြပ်ကဵု နန်ထဝ် လဂါံဇိုၚ်ကြပ်ကၠုၚ်မွဲပၠန်ရောၚ်။
“မ္ရဵုရအဴ အနာဲ အံၚ်မာန်မန် မူစိနာဍဳစရော?”
“ မ္ရဵုရအဴ ဟံသာ ကၠုၚ်စိုပ်ကဵုဂှ် မိပ်စိုတ်ကွေဟ်ဟ်လေဝ် ဂဇံကိုပ်ကၠာ တြဴနာဍဳမ္ဂး စရဏောၚ်”
ဂ္ဇံဖျေအ်ကေတ်ဒၞာဲတုဲ မတ်အဲဝေၚ်ဂၠာဲဗဵု သွက်ဂွံ မိနန်ထဝ် အဲ တ္ရဲဏအ်ကၠုၚ်ကီုဟာ? ဟွံဒးဂၠာဲလအ်မွဲသာ် ဆဵု နန်ထဝ် နကဵု ကယျိုၚ်မန်ဗုဍာဲ အကြာရဲဂမၠိုၚ် ဟီုဂး၊ တက်ကျာမံၚ်ညးသ္ကအ်ရ။ အခိၚ်အဲကျောဝ်မံၚ်ဍေဟ်ဂှ် ဍေဟ်လေဝ်ကျောဝ်မံၚ်အဲတုဲ မိက်ဂွံဟီုအရေဝ်မွဲမွဲသာ်လေဝ် အဲဂွံဆဵုကေတ်။ ဆ္ဂး အခန်ကၞာ သြပ်စရတုဲ အဲလေဝ် ဟွံကလိုက်က္တဵုအာ နူဒၞာဲအဲတုဲ မတ်အဲ ထိၚ်ပရိုတ် ဟွံမာန် ဒးကၠတ်ကျောဝ်ဗဵုမံၚ်ကျေဝ်ဍေဟ် မွဲခဏမွဲခဏရ။ အတိုၚ်လၟေၚ်အစဳဇန်ကၠောန်တဴ အခန်ကၞာအိုတ်ရ။ ညးမွဲတုဲမွဲ ဟီုပတိုန်ထ္ၜးမံၚ်ရ။ စပ်ကဵုဗီုကောန်ဂကူမန်ချိုတ်အာပ္ဍဲဟံသာဝတဳလီုဂှ် မိၚ်လဝ်အနာဲလဴကီုလေဝ် ထပ်ကလၚ်မွဲပၠန်ဂှ် စိုတ်ချဳကလိုက်ကၟဵုတိုန်မွဲၜါပၠန်ရ။ ညးဟီုပတိုန်ထ္ၜးဂၠိုၚ်ကဵုနဲဂၠိုၚ်ကဵုဗီုပြၚ်ကီုရ။ အရေဝ်နာဲအံၚ်မာန်မန်ဟီုဂှ်ရ သ္တီဒးဂၠိုၚ် ပွမမန်ဒှ်ဍိက်ရ။
“သက္ကရာဇ်ဍုၚ် (၁၁၁၉) သၞာံ ဍုၚ်မန်ဟံသာဝတဳကျဗြုံအာတုဲ ဒးဒှ်ဍိက်သၟတ်တဲ ဂကူညးတၞဟ်တအ် တ္ရဲဏအ်မ္ဂးပေၚ်အာ (၂၆၅) သၞာံ။ ဒှ်အာဍိက်ဗၟာ- ၆၇ ၊ အၚ်္ဂလိက် - ၁၂၀၊ ဂျပါန် - ၃၊ ဗၟာပၠန် - ၇၅၊ ပံၚ် - (၂၆၅) သၞာံဒှ်ကၠုၚ်ယျ။ မန်ပိုယ်တအ် ပွိုၚ်အခိၚ်ၜိုတ်ဏအ်လအ်ကၠုၚ်မ္ဂး ကလေၚ်ပတန်ဍုၚ်မန်မာန်ကၠုၚ်မံၚ် ဂွံဆဵုကေတ်ပ္ဍဲဝၚ်ဗွဲမပြာကတ်ရ၊ ကောန်ဂကူမန်ပိုယ် တအ်ဂှ် ဒှ်အာဍိက်လအ်လးလောန်အာတုဲ စပ်ကၠုၚ်ကဆံၚ်ဂၠုဲယျ၊ ဇကုဒှ်မံၚ်ဍိက်ဏောၚ်ဂှ် ဟွံတီတုဲ မိပ်မံၚ်ကဵု ဘဝဍိက်ညးသ္ဂး”
မအရေဝ်ဒှ်ဍိက်ဂှ် သွက်ဂွံဒးဂိဓဇောတ်ဒှ်မံၚ်ကီုလေဝ် မုဟိုတ်ကောန်ဂကူပိုယ် ကလၚ်မံၚ်ဆၜိုတ်မိၚ်တုဲ ဟွံချပ်ဇြိုဟ်ဟ်နက်က် ဂှ် ဒှ်ကဵုမုရော? ယဝ်သ ဒးသၟာန်ဇကုဇကုမ္ဂး ဟိုတ်ဍေဟ်ဂှ် ဟွံတီဝၚ်ဂကူဇကု၊ ဂကူဇကုဂှ် မၞိဟ်တၠပညာအောန်၊ ဂကူပိုယ်ဂှ် ပရေၚ်ပိုန်ဒြပ်ဟွံဗိုန်ခိုၚ်တုဲ မွဲဗွဝ်သၞာံတုဲ မွဲဗွဝ်သၞာံသဝ်စှ်ေကၠုၚ်ဒၟံၚ်ရ။ ဒှ်ကောန်ဂကူနွံကဵုဝၚ်ချိုတ်တ်ပၠိုတ်တ်ကီုလေဝ် မၞိဟ်လ္ရတ်ကၠိုက်ဂၠာဲဝၚ်၊ တၠပညာဝၚ်ဟီုဂှ် အောန်တဴကွေဟ်ဟ်။ ဒှ်ညးဂွံဆဵုကျာ်ကၠာဟီုတုဲ စိုပ်ကၠုၚ်အခိၚ်လၟုဟ် ဒ္ဂေတ်လၟေတ် ဗုဒ္ဓဘာသာ၊ အခိုက်ကၞာပိုယ်တအ်ဂှ် ကၠောအ်ထောံတုဲ ကေတ်ကၠုၚ်အခိၚ်ညးတၞဟ်ဂှ် ဟွံမိက်ဆဵုလေဝ် ဒးညာတ်မံၚ် ပ္ဍဲဂတးမတ်ရ။ မန်ကဵု မန်ဒးဟီုအရေဝ်၊ မန်ဒးကျိုၚ်မန်၊ မန်တအ် ဒးဗ္တောန်လိက်မန်၊ မန်တအ်ဒးကေတ်ဗၠးၜးမန် လဟီုသၟး ဟွံဂွံရ။ ကောန်ဂကူမန်ပိုယ်တအ်ဂှ် သွက်ဂွံလးဂၠံၚ်တရဴ မဟာဗျူဟာဇၞော်ဇၞော်မွဲဂှ် ဒးကၠောန်လဝ် ထေက်ယျ။ နွံမံၚ်ရဟာဂှ် အဲဟွံတီ ချိုတ်တ်ပၠိုတ်တ်လေဝ်ဒှ်မာန်။ အတိုၚ်ဗျူဟာဂှ် ဟွံစွံလဝ် ပ္ဍဲလိက်အုပ်မွဲသာ် ဓၟံက်ဏာရုပ်ရဴမ္ဂး အတိုၚ်ကောန်ဂကူပိုယ်တအ်ချပ်လဝ်ဂှ် ဟွံလအ်စိုပ် ရောၚ် အဲမိက်ဂွံက္တဵုဟီုကီုလေဝ် အခေါၚ်ဟၟဲတုဲ ကမၠတ်ဟီုမံၚ်ပ္ဍဲစိုတ်ရ။ အခိၚ်ဂှ်ဟေၚ် အဲကလေၚ်ကျောဝ်အာ မိနန်ထဝ်ဂှ် မတ်ဍေဟ်ၜါမလေဝ် သွက်ဂွံဟီုဂးတက်ကျာကဵုအဲဂှ် မံက်ဂတဝ် ပြာကတ်မံၚ်ရ။ “ဒးပံက်အဓိပ္ပာယ်မတ်ဍေဟ်မ္ဂး လ္ပထောံကၠေအ်လွဳတုဲ "ဟံသာ” ဆ္ဂးသၟးဟွံသောၚ်ဏီပုဟ် နွံမံၚ်ဏီ”
မၞိက်ရတ်
ကွာန်သၞေဟ်ဗ္ဒဝ်