VITAMIN ကၠေၚ်က္ဍဟ်
လိက်အုပ်သၟတ်နွံယၟု (ဂဥုဲကၠေၚ်က္ဍဟ်)
နိဒါန်[ပလေဝ်ဒါန် | ပလေဝ်ဒါန် တမ်ကၞက်]
“VITAMIN ကၠေၚ်က္ဍဟ်”ဏံဝွံ ဒှ်တဴလိက်အုပ်ဗဂဵုလဟဵုတဴလညာတ်မွဲအုပ်ဍောတ်ကီုရ၊ ပ္ဍဲလိက်အုပ်သၟတ်ဏံဝွံ ပိုဲတံဂွံဒုၚ်ကေတ်မအရေဝ်ဝေတ်ဗ္တောန်နွံတဴနာနာသာ် နူကဵုညးတၠလညာတ် ကေုာံ အ္စာသိပ္ပံနာနာတံကီုတုဲ ဒှ်တဴအရေဝ်ဝေတ်ဗ္တောန်မၞုံကဵုၚုဟ်မးမွဲဟေၚ် ဒှ်တဴဂုဏ်ဖဵုပရဲသွက်ဘွပတောံၚုဟ်မးဟွံမာန်ကီုတုဲ ဟိုတ်ဒှ်သာ်ဂှ်ရ− “VITAMIN ကၠောၚ်က္ဍဟ်”အုပ်ဏံ ဒှ်တဴၚုဟ်မးသွက်ကောန်ဂကူတံ နဒဒှ်ကောန်ဗုဒ္ဓဘာသာမွဲပေၚ်ပေၚ်ဟေၚ်။
လိက်အုပ်သၟတ်ဏံဝွံ ဒှ်တဴလိက်အုပ်ကဵုတဴဂုဏ်ဖဵုသွက်ညးဗှ်ကလၚ်ဗွဲမဇြိုဟ်နက်မွဲရ၊ လဴထ္ၜးကဵုပိုဲညးမဗှ်တံ ဂွံတီကၠိုဟ်ကၠးကေတ်လညာတ်(ဗွဲမပၞုက်)လဝ်ပ္ဍဲဂၠံၚ်တရဴဘဝပိုဲဏံ ညံၚ်ဂွံစိုပ်အာတိုၚ်ပ္ကဴပိုဲပြဟ်ပြဟ်မာန် “တိုၚ်ပ္ကဴဘဝ”တုဲ ဒှ်ၚုဟ်မးမွဲဂှ်ဟေၚ် မၞိဟ်ဂမၠိုၚ်မိက်သ္ဂောံဂွံသုၚ်စောဲဗှ်ကလၚ်ကေတ်အိုတ်ရ၊ လိက်အုပ်သၟတ်ဏံဝွံ ဍေံလဴထ္ၜးကဵုပိုဲကောန်ဂကူတံဟီုမာန်ဂှ်တှ်ေ ဂါမ်ဇိုၚ်ပိုဲမကွာ်တိတ်အာကၠာအိုတ်ဂှ် ညံၚ်ရဴဂွံစိုပ်အာတရဴတိုၚ်ပ္ကဴသွက်ဘွတေံပြဟ်ပြဟ် ဒးဆဵုပြသၞာအောန်အိုတ်ဂှ် ဒှ်တဴ “သတိကေုာံလညာတ်”မွဲဟေၚ်။
- သတိကေုာံလညာတ်ဂှ် ကၠုၚ်နူလဵုရော−−−?
- ဗီုလဵုဂွံကၠောန်သ္ပ သတိကေုာံလညာတ် ညံၚ်သ္ဂောံဂွံလုပ်စိုပ်ကၠုၚ်ပ္ဍဲဘွပိုဲဏံမာန်ဂှ်ရော−−−?
- သတိလညာတ်ဗီုလဵု ဂွံဒှ်တဴဂုဏ်ဖဵုသွက်ဘဝပိုဲဏံဂှ်ရော−−−?
- တုဲတှ်ေ−−ဗီုလဵုဂွံလွဳပရာမၚ်မွဲဗဂဵုလဟဵုသတိလညာတ်တံဂှ်ပၠန်ရော−−−?
လိက်အုပ်သၟတ်ဏံဝွံ ဍေံဗ္တောန်လဴကဵုဂါမ်ဇိုၚ်ပိုဲမကွာ်တိတ်အာဂတဂတတေံမာန်ကီုတုဲ ညံၚ်ဂွံဒှ်မၞိဟ် ဂွံဒုၚ်ကေတ်ကေတ်ဖဵုခိုဟ်တၟေၚ်တၟေၚ်ပ္ဍဲဘဝဗွဲမဍာံစၟတ်ဟီုဂှ် “မဍိုက်ပေၚ်ကဵုဒ္ဂေတ်ပွပ္ဍဲဘဝ, စဳပၞောန်သ္ဂုတ်သွာတ်ပ္ဍဲကမၠောန်နာနာ ဗွဲမဒးနွံကဵုဓဝ်ဍာံ, နဲကဲဟီုဂးအရေဝ်နွံကဵုအဓိပ္ပါယ်, နဲကဲဝေတ်ဗ္တောန်ကောန်ဆာန်−လညာတ်ကေုာံဓရ်ဒိုဟ်ဓီု, ပရေၚ်ပိုန်ဒြပ်ထဝ်သြန်− တုဲပၠန် ဗဟုသုတသတိလညာတ်ဂၠံၚ်မတးအးတပ်မွဲတၞုၚ်ပ္ဍဲကဵုဘဝပိုဲဏံဇၟာပ်ဇၟာပ်တ္ၚဲ သွက်ကောန်ဂကူတံမာန်ရ” ။
ပိုဒ်(၁) ၚုဟ်မးအ္စာအဲ[ပလေဝ်ဒါန် | ပလေဝ်ဒါန် တမ်ကၞက်]
၁ ။ အ္စာအဲ ဒှ်ညးတၠပညာ ပိုၚ်ပြဳလဝ်ကောန်ဗုဒ္ဓဘာသာသီုဖအိုတ်၊
ဒှ်မၞိဟ်နွံကဵုဂုဏ်ဖဵု သွက်သတ်နွံကဵုလမျီုအလုံအိုသီုမွဲလိုက်ဏံ ။
၂ ။ ဂိုၚ်ဒေပ်စွံလဝ်ဒ္ဂေတ်ပွစဳပၞောန်ဗွဲမဂၠိုၚ်ဂၠၚ်၊
ကၠိုဟ်စိုတ်လောကဳလောကုတ္တဵု ဗဟုသုတနွံဒၟံၚ်ပ္ဍဲပွဳဗွိုၚ်ညးၜါစှော်ပန်နာဍဳ။
၃ ။ ဒုၚ်ကေတ်အရေဝ်ဒၠောံဗ္တောန် ညံၚ်ဂွံဒှ်မၞိဟ်ခိုဟ်မွဲမာန်၊
ပ္ဍဲကဵုပရေၚ်ဓဝ်ဍာံ ညံၚ်ဂွံဒှ်ဂုဏ်ဖဵုပ္ဍဲဘွဇၟာပ်ဇၟာပ်လၟေၚ်တ္ၚဲ ။
၄ ။ သွက်သ္ဂောံကဵုဓရ်တီဓရ်ကၠိုဟ် သွက်ညးဍောတ်လဒေါဝ်ဇၞော်၊
ပလံၚ်ဗစိုပ်ကဵုဗဟုသုတဗွဲမဍိုဟ်ကေက် ပ္ဍဲဝုတ်ဗၠာဲအဃောခၟောံကဴရာၚ်ပၠးထာၚ်။
၅ ။ ဒက်ဂိုၚ်ဒေပ်စွံလဝ် သွက်ညးမဂၠာဲလ္ၚတ်ဗဟုသုတပ္ဍဲဘဝမွဲ၊
ညးမဍိုဟ်ကေက်စဳကၠးတံဂှ်ဟေၚ် ဂွံဂဗဆဵုမာန်။
၆ ။ ဂွံကၠိုဟ်စိုတ်ၚုဟ်မးအ္စာ ဗီုညးလွဳပရာၜံၚ်လဝ်၊
မအရေဝ်ညးမၞုံကဵုဂုဏ်ဖဵု သွက်ဂွံဒှ်အနာဂတ်ကွး ။
၇ ။ သဗ္ဗညုတညာဏ်နာဲပိုဲ ဒှ်နုၚ်ဓိ တ္ၚဲတြေံတြဟ်အာဟၟဲ၊
ညးဒိုဟ်ဓီုလၞုဟ်တံဂှ် ရံၚ်ဆဵုညာတ်ကေတ်ဟွံလောဲသွာ ။
၈ ။ ကောန်ဂကူဗုဒ္ဓဘာသာတံအဴ ကလၚ်အရေဝ်အပါဗှ်ေဒၠောံဗ္တောန်၊
တုဲပၠန် လ္ပကၠဟ်ထဝေၚ်ထောံ သီုကဵုမအရေဝ်မိယာဲဗှ်ေတံဂှ်ညိဏး ။
၉ ။ မိမၜါဟီုဂှ် ဒှ်မၞိဟ်မသ္ဒးပူဇဴ နွံကဵုဂုဏ်ဖဵု လ္တူက္ဍိုပ်မပြဲသွက်ဗှ်ေတံ၊
ဒှ်တဴမဒွါမတ်မၞိက် ဒးကွက်ဒကုဲလဝ်ပ္ဍဲကအ်ဗှ်ေတံလၟိုန်အခိၚ်အခါညိ။
၁၀ ။ ကောန်ဂကူဗုဒ္ဓတံအဴ ယဝ်ညးယုတ်ပပ် ကၠုၚ်ကသေဟ်ကၟဝ်၊
ယွံကောန်တံ လ္ပဗက်အာကရောံဍေံတံဂှ်ညိတွဵု ။
၁၁ ။ ယဝ်ရဍေံဟီု “ဗက်ကၠုၚ်ဂကောံပိုဲတံဏံညိ”၊
သွက်ဍေံဂွံကဵုဗှ်ေတံဂွံကၠောန်ဗၠေတ် ဂၠံၚ်ဍာန်ဍေံဂှ်ဂှ်ကီု။
၁၂ ။ ဍေံပါ်ပရအ်ကဵုပိုဲဏံသၟးပသအုဲဇကုဍေံ သီုကဵုဂွံဒၟံၚ်ကျာမၞိဟ်ချိုတ်ချိုတ်၊
သၟူဇကုဍေံအလုံခန္ဓမွဲဂှ် ဍေံအာသရာပ်ပါပ်ဍုၚ်နရက်တေံ။
၁၃ ။ ပိုဲဂွံဆဵုဂဗကေတ် ဂုဏ်ဖဵုကေုာံဟိုတ်ဖဵုနာနာသာ်မာန်၊
ပိုဲတံသိုပ္တိုန်သ္ၚိဘဝအိန်ထံၚ်ပိုဲ ညံၚ်ဂွံဍိုပ်ဍဴမၞုံကဵုၚုဟ်မးညိ။
၁၄ ။ ဂကောံညးမယုတ်ပပ်ပဳတံဂှ် ပိုဲတံလ္ပကွာ်လုပ်ဗက်အာတွဵုညိ၊
ပ္ဍဲကဵုဂကောံဗှ်ေတံဂှ်လေဝ် နွံဒၟံၚ်သီုထဝ်သြန် ကေုာံဇွောံမစၞစအဟာရဟွံသေၚ်ဟာ။
၁၅ ။ ကောန်ဂကူဗုဒ္ဓဘာသာတံအဴ လ္ပကွာ်အာကရောံမွဲစွံကဵုဍေံဂှ်ညိဏ၊
တၚ်ဂြဲကေတ်ဂါံဇိုၚ်ဗှ်ေတံ ပ္တိတ်ထောံနူကဵုဂၠံၚ်ဍာန်မဒ္တုဲကွာ်ဏာဒၞာဲဍေံမအာဂှ်ညိ။
၁၆ ။ ဂၠံၚ်တရဴဍေံမအာဂှ် ဒှ်တဴဂၠံၚ်ဍာန်မကၠိပပ်ပဳမွဲတၞုၚ်၊
စဳပၞောန်ဍေံတံဂှ်ဟွံသ္အးဇ္ၚးတုဲ ပိုဲတံကလိတ်လောတ်စှ်ေအာလောဲလောဲဏောၚ်။
၁၇ ။ မၞိဟ်ဗီုဍေံတံဂှ် ဆၜိုတ်ဂစေံခ္ဍာ်ဆဵုဒးဍေံတံဂှ်လေဝ် ဟၟဲကဵုမ္ၚဵု၊
သတ်တိရစ္ဆာန်တံဟေၚ် ဟွံရှ်ေသှ်ေရဴဂဴဍေံတံဏီ။
၁၈ ။ မၞိဟ်ဗီုဍေံတံဂှ် ဍေံဒုၚ်ဇြောတ်ကေတ်ဒြဟတ်ဆီဍေံကဵုဍေံ၊
ဍေံလောတ်ကလိတ်စှ်ေ ဂၠံၚ်ဍာန်မကယဳ ဍေံတံဂှ်ကေတ်ကေတ်ဏောၚ်။
၁၉ ။ ညးမဂၠာဲတဴပရဲ ဟၟဲကဵုဂုဏ်ဖဵုတဴဂှ် ဒှ်တဴဗီုဏံမာန်ဟေၚ်၊
ဟိုတ်ဂှ်ရ− ဍေံကော်ဏာဗှ်ေတံဂှ် သွက်သ္ဂောံဂွံသၠာဲဘဝ ဂွံသၠာဲစုတ်အဇာဒၞာဲဍေံဏောၚ်။
၂၀ ။ လညာတ်ဂှ် ဍေံကညာၚ်ကော်ဒၟံၚ် လဒေါဝ်ဂၠံၚ်ဍာန်ဇၞော်တေံ၊
ဗှ်ေတံဂှ်ပၠန် အာဝေၚ်နွံဒၟံၚ် မ္ၚးဍုၚ်ကွာန်ဏောၚ်ဟာ။
၂၁ ။ ဗှ်ေတံဂှ် ဗက်သ္ၚဳဂၠာဲဒၟံၚ် ပ္ဍဲကဵုပါၚ်တြၚ်သ္ၚိ၊
တုဲပၠန် ဗှ်ေတံဗက်ကော်ကညာၚ်ဒၟံၚ် ပ္ဍဲကဵုဂြိုပ်ဂၞိၚ်တေံအိုတ်ဟာ။
၂၂ ။ ဟေ − မၞိဟ်သတိအောန်တံအဴ ဗှ်ေတံဆာန်ဒၟံၚ်ဓဝ်ဒိုဟ်ဓီုမူစိတ္ၚဲဂိတုသၞာံဏီဂှ်ေရော၊
ဟေ − မၞိဟ်မဒိုဟ်ဓီုတံ ဗှ်ေတံက္ဍုဟ်မၠေံဗဟုသုတပိုဲ မူစိတ္ၚဲဂိတုသၞာံဏီရော။
၂၃ ။ ကၠုၚ်ကျောဝ်ကလၚ်ရံၚ်အရေဝ်ဝေတ်ဗတောန်ပိုဲတ္ၚဲဏံညိ၊
ဣဏံရ− ပိုဲကိုဟ်ဖျေံကဵုလညာတ်ပိုဲ ဂွံဒှ်အာဗဟုသုတမာန်၊ ပိုဲတံဂွံဟီုလဴကဵုအရေဝ်မၞုံကဵုအဓိပ္ပါယ် ဒးသုၚ်စောဲဒၟံၚ်ဍေံတွဵု။
၂၄ ။ ပိုဲကော်တုဲရသေၚ်ဟာ− မုပရောဗှ်ေတံဂြိပ်ဂတးထောံက္ဍိုပ်အိုတ်ဂှ်ရော၊
ပိုဲယာတဲ ကရေဲကညာၚ်မံၚ်ဖိုဟ်ဂှ် မူပရော−ညးမွဲဟွံသ္ပဂရုပိုဲ။
၂၅ ။ ဗှေတံဟွံမိက်တီကၠိုဟ်ကေတ် အရေဝ်ဂုဏ်ဖဵုပိုဲတံ၊
တုဲပၠန် − ဟွံဒုၚ်ကေတ်အရေဝ်ဝေတ်ဗ္တောန်ပိုဲတံကွေံရဟာ။
၂၆ ။ ပိုဲတံမိက်ဂွံဂြိုၚ်ဝေၚ် ဓဝ်သတိအောန်ဗီုဗှ်ေတံကွေံကွေံရ၊
မိက်ဂွံကရိုက်ကဵုမုက် ပ္ဍဲအခိၚ်ဓဝ်မ္ၚိုဟ်ကြံၚ်လေပ်စိုပ်ကၠုၚ်ပ္ဍဲဘဝဗှ်ေတံ။
၂၇ ။ ဓဝ်မ္ၚိုဟ်ကြံၚ်လေပ်စိုပ်ကၠုၚ်ပ္ဍဲဗှ်ေတံ ညံၚ်ရဴလဗိုက်ကျာမွဲ၊
ဟိုတ်နူဓဝ်သတိအောန်ဗှ်ေတံတုဲ ဒးဒုၚ်ကၟိုၚ်ကယျအာအိုတ်။
၂၈ ။ တုဲတှ်ေ ဗှ်ေတံဗှ်သၞာပိုဲ− ဆဂးဂှ် ပိုဲဟွံမိက်ကဵုသွဟ်၊
ၜိုန်ဗှ်ေတံဗက်ဂၠာဲပိုဲကီုလေဝ် ဟွံဆဵုဂဗပိုဲလောဲလောဲ။
၂၉ ။ နူကၠာတေံဂှ် ဟိုတ်နူကဵုဗှ်ေတံက္ဍုဟ်မၠေံလညာတ်ပိုဲတုဲရသေၚ်၊
ဒၟာနူဗှ်ေတံဟွံပတေဟ် ဗီုအရေဝ်ဂၠံၚ်တရဴနာဲပိုဲဗုဒ္ဓ။
၃၀ ။ ဗှ်ေတံဟွံမိက်ဒုၚ်ကေတ်အရေဝ်ဗတောန်ပိုဲတံတုဲ၊
ဘဝဗှ်ေတံလက္ကရဴအိုတ်ဂှ် အရေဝ်ပိုဲဏံဟီုလဴလဝ်ဂှ် ဒးမံၚ်ဖအိုတ်သေၚ်ဟာ။
၃၁ ။ ဗှ်ေတံစဖဲကေတ် ဒ္တုဲဖဵုကမၠောန်ဗှ်ေတံကေတ်ကေတ်ရ၊
တုဲတှ်ေ ဗှ်ေတံဖဲသ္အအကေတ် ဗီုဒ္ဂေတ်စိုတ်မပပ်ပဳဗှ်ေတံကေတ်ကေတ်။
၃၂ ။ မၞိဟ်သတိအောန် ဟိုတ်နူဒးအိုတ်လမျီုဂှ် ဒၟာနူကဵုဂတးထောံက္ဍိုပ် နူကဵုအရေဝ်ဝေတ်ဗတောန်ပိုဲဏံသေၚ်၊
မၞိဟ်ဒိုဟ်ဓီုတံဂှ် ဒၞာဲလဵုအာအာ ဒးဒုၚ်ဍဵုဍိုက် ဒးမံၚ်သၟတ်တွဵု။
၃၃ ။ ဆဂးဂှ် ညးမကလၚ်ပတေဟ်ကေတ်အရေဝ်ပိုဲတံဂှ် ဟၟဲကဵုဒဒိုက်မာန်၊
ဂွံမံၚ်တဴတသိုက်စိုတ်ကာယတုဲ သ္ၚောဲအာနူညးယုတ်သဝ်တံဟေၚ်။
၃၄ ။ မၞိဟ်ယုတ်ယုတ်တံဂှ် ဍေံဟွံဂၠာဲတဴတသိုက်စိုတ်တုဲ၊
ဆဂးဂှ် ညးတၠပညာတံဂှ်ဟေၚ် ဍိုက်ပေၚ်ကဵုတသိုက်စိုတ်ရ။ ။
ပိုဒ်(၂) လာပ်ဗဇဴညးမဂၠာဲတသိုက်စိုတ်[ပလေဝ်ဒါန် | ပလေဝ်ဒါန် တမ်ကၞက်]
၁။ ကောန်ဂကူဗုဒ္ဓဘာသာတံအဴ ယဝ်ဗှ်ေတံကလၚ်ကေတ်အရေဝ်ပိုဲ၊
ပိုဲတံပွမဂိုၚ်ဒေပ်စွံလဝ်လညာတ်ညာဏ် သွက်ဘဝဗှ်ေတံဖအိုတ်ရ။
၂။ သၠကတောဝ်ဗှ်ေတံဂှ် ဒှ်သွက်ဂွံကလၚ်ဒုၚ်ကေတ် အရေဝ်ပိုဲသေၚ်၊
ကောန်တၟံစိုတ်ဗှ်ေတံဂှ် ဒးဂၠာဲလ္ၚတ်ဗဟုသုတဟွံသေၚ်ဟာ။
၃။ အဵု −−− ဒးကွေံရၝာဲ − ယဝ်ဗှ်ေတံဂၠာဲသ္ၚိဗဟုသုတမ္ဂးတှ်ေ၊
ဗှ်ေတံဂွံဍိုက်ပေၚ်တဴကဵုတသိုက် ဇဴစိုတ်ဝိညာဏ်ဗွဲမသၠုၚ်ပြဲအိုတ်မွဲ။
၄။ ယဝ်ဗှ်ေတံဂၠာဲလညာတ် ညံၚ်ရဴဂၠာဲထဝ်သြန်၊
တုဲပၠန်−−− အၜံက်ခါဲလညာတ် ညံၚ်ရဴဗှ်ေတံၜံက်ကတိုၚ်ထဝ်မပၞုက်လဝ်သၟဝ်တိတေံ။
၅။ ဣဏံဟေၚ်ရ−−−ဗှ်ေတံဂွံဆဵုကေတ် ဂၠံၚ်ဍာန်အပါဲပိုဲဗုဒ္ဓမာန်။
တုဲပၠန်−−−−ဂွံဂွဆဵုကေတ် ဓဝ်တီဓဝ်ကၠိုဟ် နာဲပိုဲဖအိုတ်တုပ်တုပ်ညဳညဳရ။
၆။ ဟိုတ်နူနာဲပိုဲဗပေၚ်ဗုၚ်ဂၞဴ နကဵုလညာတ်ညာဏ်ပညာ၊
ဓဝ်တီဓဝ်ကၠိုဟ်တံဂှ်ပၠန် ဒှ်တဴဍာန်ဂၠံၚ်နာဲပိုဲမကွာ်အာဒၟံၚ်ဇၟာပ်ဇၟာပ်တ္ၚဲ။
၇။ နာဲပိုဲညးဂိုၚ်စွံလဝ်ဗဟုသုတ သွက်ဂွံကဵုညးမဆာန်ဓဝ်ဍာံမွဲဟေၚ်၊
ညးကိုဟ်ဆာဲစုတ်ကဵုဗဟုသုတ သွက်ညးမဆာန်ဓဝ်တပ်ယေလ္ဂူသ္အးဇ္ၚး။
၈။ ထေက်ကြိုက်ပိုဲတံ ဒးဆာန်ဓဝ်ဍာံအိုတ်ညိ၊
တုဲပၠန်−−−ပိုဲကေတ်လာပ်ဗဇဴနာနာ ပ္ဍဲကဵုနာဲပိုဲအိုတ်ညိအဴ။
၉။
၁၀။
၁၁။
၁၂။
၁၃။
၁၄။
၁၅။
၁၆။