ဗညာစက္ကရတ်(ရးဇြာ)
| အစာကၞေဟ် ညးမဂိုတ်ဂစာန် သွက်ဂကူမန် နာဲဗညာစက္ကရတ် ရးဇြာ အစာကၞေဟ် ညးမဂိုတ်ဂစာန် သွက်ဂကူမန် | |
|---|---|
 | |
| သၠးဂၠံဂဝ် |
မာံသာန်မျာင် အဝ်ဂေတ် ၄၊ ၁၉၄၂ ကွာန်ကၟာဝက် |
| စုတိ |
ဂျောန် ၁၉၊ ၂၀၁၉ (အာယုက် ၇၆) ပ္ဍဲသ္ၚိ ဍုင်ကၟာဝက်ရးဇြာ |
| ဟိုတ်မစုတိ | ယဲ |
| ဂကူ |
 Monမန် |
| ကောန်ဍုင် |
 Myanmarကောန်ဍုင်ဗၟာ |
| ကဆံင်ပညာ | တန်သမၠုင် ၁၀ တန် |
| ဂကောံ |
|
| အံက် |
|
ဗညာစက္ကရတ် (ရးဇြာ) ဝွံ ဒှ်အစာဝင်၊ အစာကၞေဟ်မွဲတုဲ သီုဒှ် ညးမကၠောန်ကၠုင် ကမၠောန်ဒတုဲဖိုလ် သွက်ဂကူမန် နာနာသာ် မပ္တံကဵု ပ္ဍဲဗော်ပရေင်ဍုင်ကွာန်မန် ခေတ်အဆက်ဆက်၊ နူခေတ် ဗော်ပၠတရဴဍုင်မန်၊ ဗော်ဒဳမဝ်ကရေသဳကောန်ဂကူမန် စဵုကဵု လအိတ်အာယုက်ရ။ ပ္ဍဲကဵု ဂကောံဗတောန်လိက်ပတ်မည် ကေုာံ ယေန်သၞာင်ဗုဒ္ဓဘာသာ ကဆံင်ကွာန်၊ ကဆံင်ပွိုင်ဍုင်၊ သီုကဵု ကဆံင်အလုံဒေသရးမန်ဂှ် ချဳဓရာင်ကၠုင်တုဲ ဟိုတ်မဒှ် ညးမစိုန်သကီု လပါ်လိက်ပတ် ကေုာံ ဝင်တုဲ ပ္ဍဲသဘင် တ္ၚဲဂကူမန်မ္ဂး ပ္ဍဲသွာင်လိက်ပတ် (ပေါဲပြိုင်လိက်ပတ်မန်)ဂှ် ယိုက်ဂၠေင်ကၠုင်ဒၟံင် အဆက်ဆက် စဵုကဵု လအိတ်လမျီုရ။ နာဲဗညာစက္ကရတ် ရးဇြာဝွံ ပ္ဍဲအခိင် မဒက်ပ္တန် ဂကောံအစာကၞေဟ်မန်ဂှ်လေဝ် ချဳဓရာင်ကၠုင် နဒဒှ် မၞိဟ်အဓိကတမ်မွဲတၠတုဲ လိက်ကၞပ် ကေုာံ လိက်ပရေင် ဗွဲတၟေင် မဆေင်ကဵု ဝင် ကေုာံ ယေန်သၞာင်ဂကူမန်ဂှ် ဗွဲမဂၠိုင်ဂၠေင် ချူကၠုင်လဝ်ရ။
ဘဝသၟတ် ကေုာံ ပရေင်ပညာ[ပလေဝ်ဒါန် | ပလေဝ်ဒါန် တမ်ကၞက်]
နာဲဗညာစက္ကရတ် ရးဇြာ ဝွံ နူဍောတ်တ်တေအ် ကလိဂွံလဝ် ယၟု နကဵုဘာသာဗၟာ နာဲသာန်မျာင်၊ နကဵု ယၟု နာဲသာန်မျာင်ဂှ် ၜိုန်ရ မၞိဟ်မကော်ညးဂၠိုင်ကီုလေဝ် အလဵုဇကုညး ညးချူ ညးဟီု ယၟုညး နကဵု ဗညာစက္ကရတ် (ရးဇြာ)ရ။ နာဲဗညာစက္ကရတ် ရးဇြာ ကတဵုဒှ်မၞိဟ် ပ္ဍဲသၞာံ ၁၉၄၂ အဝ်ဂေတ် ၄ (သက္ကရာဇ်ဍုင် ၁၃၀၄ ဂိတုဒုတိယဒဂိုန် (၈) စွေက်) တ္ၚဲအင္ၚာ ဇရေင်မိမၜါ နာဲရတ်ခိုင် (ယှိုင်ဃာင်) ကဵု မိစိုတ်ၜိုဟ်သြိုဟ် ပ္ဍဲကွာန်ကၟာဝက် (ဗမံက်ၜဳ) ပွိုင်ဍုင်မုဟ်ဍုင်။ သၞာံ ၁၉၆၀ ဂှ် နာဲဗညာစက္ကရတ် ဂွံအံင်ကေတ် ဘာတန်သမၠုင် (၁၀) တန်။[၂]
နာဲဗညာစက္ကရတ်ဝွံ ဒှ်မၞိဟ်မစိုန်သကီု လိက်မန်၊ လိက်ပါဠိ၊ လိက်အင်္ဂလိက်တုဲ အရေဝ်ဘာသာကရေင် (စကောကရင်) ဂှ်လေဝ် ဟီုဂွံခိုဟ်ဟ်ကီုရ။ တုဲပၠန် ညးဝွံ ပ္ဍဲကွတ်ဗေဒင်ဟောရာ၊ တုဲပၠန် ဟိုတ်မယိုက်ဂၠေင်လဝ် ပ္ဍဲဒပ်ပၞာန် အလဵုအသဳတုဲ ကွတ်ပၞာန်ဍာ်၊ ပၞာန်ဒဵုလေဝ် ဒှ်မၞိဟ်မစိုန်သကီုမွဲကီုရ။[၂]
ကမၠောန်ပေါင်မသၟိင်[ပလေဝ်ဒါန် | ပလေဝ်ဒါန် တမ်ကၞက်]
နာဲဗညာစက္ကရတ်ဝွံ အခိင်ဘဝသၟတ်တေအ် ကေင်ယိုက်ဂၠေင်လဝ် ကမၠောန်အလဵုအသဳ လပါ်ဒပ်ပၞာန်ဍာ် ဒပ်ပၞာန်တိုက်၊ ဒေါအ်ဇူ ပၞာန်တုဲ လုပ်ယိုက်ဂၠေင် ပ္ဍဲကံင်ဇြဳသမဝါယမ ပ္ဍဲပွိုင်တိုက်ကၟာဝက်ရ။[၂]
ကမၠောန်သွက်ဂကူမန်[ပလေဝ်ဒါန် | ပလေဝ်ဒါန် တမ်ကၞက်]
သၞာံ ၁၉၆၀ ကဵု ၁၉၆၁ ဂှ် ကေင်ယိုက်ဂၠေင်လဝ် ပ္ဍဲဗော်ပၠတရဴဍုင်မန် နဒဒှ် ဂကောံသၟတ် ပွိုင်ဍုင်မတ်မလီုတုဲ ကမၠောန်ပရေင်ဂကူမန်ဂှ် ယိုက်ဂၠေင် အဆက်ဆက် စဵုကဵုလအိတ်လမျီုရ။ ပ္ဍဲသၞာံ ၂၀၁၄ အခိင်မဒက်ပ္တန် ဂကောံသုတေသနဝင်မန်ဂှ် နဒဒှ် ကောန်ဂကောံအဓိကမွဲတၠ၊[၂] သၞာံ ၂၀၁၇ အခိင် မဒက်ပတန် ဂကောံအစာကၞေဟ်မန်ဂှ်လေဝ် နဒဒှ် မၞိဟ်အဓိကမွဲတၠ ပါလုပ်ကၠုင်ကီုရ။[၃] ပါဲနူဏအ်တုဲ ကမၠောန် ပရေင်ဂကူမန် မပ္တံကဵု ပ္ဍဲဗော်ပရေင်ဍုင်မန် ဗော်ဒဳမဝ်ကရေသဳကောန်ဂကူ (ရုင်ဗော် ပ္ဍဲကၟာဝက် နွံ ပ္ဍဲသ္ၚိညး အရာပ်ဒဒန်ဇၞော်)။ တုဲပၠန် ပ္ဍဲ ဂကောံဗတောန်လိက်ပတ်မည် ကေုာံ ယေန်သၞာင်ဗုဒ္ဓဘာသာ ကဆံင်ကွာန်၊ ကဆံင်ပွိုင်တိုက်၊ ကဆံင်ပွိုင်ဍုင်မုဟ်ဍုင်ဂှ် ပါလုပ် ချဳဓရာင်ကၠုင် နဒဒှ် မၞိဟ်တိုင်ခဳမွဲတၠရ။ ပ္ဍဲကဵု တ္ၚဲတၟေင် တ္ၚဲပရဲ မပ္တံကဵု တ္ၚဲဂကူမန် မ္ဂး နာဲဗညာစက္ကရတ်ဝွံ ဟိုတ်မဒှ် ညးမစိုန်သကီု လပါ်လိက်ပတ်မန်မွဲတၠတုဲ ကေတ်ကၠုင်တာလျိုင် ပ္ဍဲသွာင်လိက်ပတ် ဗီုကဵု ပေါဲပြိုင်လိက်ပတ်တအ်ရ။[၄] ပ္ဍဲအခိင် မဒက်ပတန် လိက်လၟေင်ဂမြင်တၟိ ဂှ် နာဲဗညာစက္ကရတ် ယိုက်ဂၠေင်လဝ် နဒဒှ် ညးဒါန်လိက် (အေဝ်ဒဳတာ) မွဲတၠကီုရ။[၂]
လိက်ကၞပ် မပ္တိတ်လဝ်ဂမၠိုင်[ပလေဝ်ဒါန် | ပလေဝ်ဒါန် တမ်ကၞက်]
- လိက်မင်ဇေန်မန်
- ဝေါဟာရ ဗၟာ-မန် လ္ၚီပြင်
- ဝေါဟာရ တၞံဆု၊ တၞး၊ ခၟာဲ၊ ရိုဟ် လုပ်ဗော်ဂဥုဲဂမၠိုင် (၉၀၀မပြင်)
- ဂဒိုဟ်မန်ၜါကၠံ သီု သဒ္ဒါဗေဒ
- လိက်ပုံအာဂီု မိဍောင်ကှ်ေထဝ်
- လိက်ပုံအာဂီု အဋ္ဌာရသ
- လိက်ပုံအာဂီု ပန္နရသ
- လိက်ဗွဟ်မန် ကေုာံ သဒ္ဒါဗေဒ
- လိက်ဝင်မန် လုပ်ဍုင်သေံ
- လိက်ဝင်ဍုင်ဇြာ (ကၟာဝက်)
- ဝင်ဓာတ်ကျာ်စေတဳဂမၠိုင် ဍုင်ကၟာဝက်[၅]
- လိက်ဝင်ဂကူမန်တအ် ပ္တန်ကၠုင်ဍုင် ဨကရာဇ်ဂမၠိုင် (မန်၊ ဗၟာ)[၂]
လိက်ပရေင် မဆေင်ကဵုဝင် အခိုက်ကၞာမန်ဂှ် ချူလဝ် ဟွံတီလၟိဟ်။
လအိတ်ဘဝ[ပလေဝ်ဒါန် | ပလေဝ်ဒါန် တမ်ကၞက်]
အစာကၞေဟ် ဗညာစက္ကရတ်ဝွံ နကဵု ယဲဝေဒနာအာယုက်ဇၞော်ဂှ် ပ္ဍဲ သၞာံ ၂၀၁၉ ဂိတုဂျောန် ၁၉ (၁၃၈၁ ဂိတုဇှ်ေ ၂ စွေက်) တ္ၚဲဗုဒ္ဓဝါ ဂှ် စုတိ ကလိလောန်စဴအာ ဘဝပရလိုက် ပ္ဍဲကဵု သ္ၚိညး ပ္ဍဲဍုင်ကၟာဝက်ရ။[၆]
နိဿဲ[ပလေဝ်ဒါန် | ပလေဝ်ဒါန် တမ်ကၞက်]
- ↑ Ramanya Min Nyein Chan. [<iframe src="https://www.facebook.com/plugins/post.php?href=https%3A%2F%2Fwww.facebook.com%2Fthanlwin.chitthu.71%2Fposts%2F421316931548383&show_text=true&width=500" width="500" height="539" style="border:none;overflow:hidden" scrolling="no" frameborder="0" allowfullscreen="true" allow="autoplay; clipboard-write; encrypted-media; picture-in-picture; web-share"></iframe> ဂကောံအစာကၞေဟ်မန် (ယာယဳ) ကောံဓရီု အလန်ပထမ]. Open.
- ↑ ၂.၀ ၂.၁ ၂.၂ ၂.၃ ၂.၄ ၂.၅ (2019, October) လိက်မဂ္ဂဇြေန် အစာကၞေဟ်မန် ကၞပ် (၂)။
- ↑ Ramanya Min Nyein Chan. [<iframe src="https://www.facebook.com/plugins/post.php?href=https%3A%2F%2Fwww.facebook.com%2Fthanlwin.chitthu.71%2Fposts%2F421316931548383&show_text=true&width=500" width="500" height="539" style="border:none;overflow:hidden" scrolling="no" frameborder="0" allowfullscreen="true" allow="autoplay; clipboard-write; encrypted-media; picture-in-picture; web-share"></iframe> ဂကောံအစာကၞေဟ်မန် (ယာယဳ) ကောံဓရီု အလန်ပထမ]. Open.
- ↑ နာဲဗဳထဝ်မန်ဇြာ မလဴထ္ၜး
- ↑ ဂကောံအ္စာကၞေဟ်မန် (June 21, 2019). [<iframe src="https://www.facebook.com/plugins/post.php?href=https%3A%2F%2Fwww.facebook.com%2FMonWriters%2Fphotos%2Fa.1600968846636399%2F2277818222284788%2F%3Ftype%3D3&show_text=true&width=500" width="500" height="497" style="border:none;overflow:hidden" scrolling="no" frameborder="0" allowfullscreen="true" allow="autoplay; clipboard-write; encrypted-media; picture-in-picture; web-share"></iframe> လိက်လၞီအောန်စိုတ် လတူ အ္စာကၞေဟ် ဗညာစက္ကရတ် ၁၃၈၀ သၞာံ၊ ဂိတုဇှ်ေ ၃ စွေက်၊ ဂျောန်၊ ၂၀၊ ၂၀၁၉]. Open.
- ↑ <iframe src="https://www.facebook.com/plugins/post.php?href=https%3A%2F%2Fwww.facebook.com%2FMonWriters%2Fphotos%2Fa.1600968846636399%2F2277818222284788%2F%3Ftype%3D3&show_text=true&width=500" width="500" height="497" style="border:none;overflow:hidden" scrolling="no" frameborder="0" allowfullscreen="true" allow="autoplay; clipboard-write; encrypted-media; picture-in-picture; web-share"></iframe>