ကပေါတ်ဂၠာဲလောဲပ္ဍဲဍုၚ်ကွာန် ကၠောန်ဂဥုဲဂစိုတ်စၟမာန်

ဂဥုဲဂစိုတ်စၟ သဘာဝ
Natural Pesticide

တင်ဂၞင် သဇိုင်
ပရူပရာ အဓိက:	နဲကဲ စဵုဒၞာ ကေုာံ ဂစိုတ်စၟပလီုတၞံ နကဵုသဘာဝ
ကပေါတ် အဓိက:	သုင်ၜံက်၊ လသိုန်ဗ္တာင်၊ မြေက်၊ ဂဝ်
ဂုဏ်ဖိုလ်:	အန္တရာယ်အောန်၊ ပွဳပွူသဘာဝ ဟွံလီုလာ်

ဂဥုဲဂစိုတ်စၟ သဘာဝ ဝွံ ဒှ်နဲကဲ စဵုဒၞာ ကေုာံ ဂစိုတ်ပလီု စၟမပလီုတၞံမတဵုလွဳဂမၠိုင် နကဵု ကပေါတ်သဘာဝ မဂၠာဲလောဲ အကြာဍုင်ကွာန် ရ။ နဲကဲဏအ်ဝွံ ဒှ်နဲကဲ မစကာကၠုင် နူကဵု လက်ထက် ဇုဇဗဴလ တမၠာတေအ်တုဲ၊ ပ္ဍဲခေတ်လၟုဟ် ဟိုတ်နူ ဂဥုဲဓာတ်သိပ္ပံ (Chemical Pesticides) တအ် ကဵုဘဲအန္တရာယ် ကုပရေင်ထတ်ယုက် ကေုာံ ပွဳပွူသဘာဝတုဲ၊ နဲကဲ သဘာဝဝွံ ကလေင်ကိစ္စဇၞော်ကၠုင် ပၠန်ရ။

လညာတ် သဇိုင် ကေုာံ ဂုဏ်ဖိုလ်

ဂကူမန်တအ်ဝွံ ဒုင်သ္ဇိုင် ကုပရေင်တဵုလွဳ ကၠအ်ဥဒျာန် ကေုာံ တိဗ္ၚ ဗွဲမဂၠိုင် ရ။ ပ္ဍဲအရာမတဵုလွဳ သတ်ပၟဝ်ဇဝ်ပ္ကဴတအ် ညံင်ဟွံဂွံလီုလာ်ဂှ် ပရေင်စဵုဒၞာ ဘဲစၟပလီုဝွံ ဒှ်အရာ ကိစ္စဇၞော်အိုတ် မွဲရ။

ဂဥုဲဓာတ်သိပ္ပံတအ်ဝွံ ၜိုန်ရ ဂစိုတ်စၟ လောဲသွာမာန်ကီုလေဝ် ဖဵုပရေအ် ဗွဲမဂၠိုင် နွံရ။ ဍေံဇီုကပိုက်ကဵု ပရေင်ထတ်ယုက် ညးမတဵုလွဳ ကေုာံ ညးမစသုင်တအ်ကီု၊ ပလီုပလာ်ထောံ ဇြဟတ်ဝဲါသဘာဝ ကေုာံ ရှ်တိတအ်ကီု ရ။ ဂဥုဲသဘာဝဝွံ ပရိုက်ဘဲအန္တရာယ် အောန်တုဲ၊ ထိင်ဒဝ်ကဵု ပွဳပွူသဘာဝ ညံင်ဟွံဂွံလီုလာ် မာန်ရ။

နဲကဲ ကၠောန် ဂဥုဲဂစိုတ်စၟ သဘာဝဂမၠိုင်

၁။ နဲကဲ ဂဥုဲသုင်ၜံက်

နဲကဲဏအ်ဝွံ ဒှ်နဲကဲ မစဵုဒၞာကဵု စၟကိတ်တၞး၊ စၟအဂြေင်၊ စၟကသော် ကေုာံ ယဲတၞးကဝဲ မာန်ရ။

• ကပေါတ်: ဂဥုဲတၞး/သုင်ၜံက် (၂၅) ဒ္ကေဝ်၊ ဗံင်/ဆပ်ပြာ (၂၅) ဒ္ကေဝ်၊ ဍာ် (၄) ဂါလာန် (၂၄ ပလင်)။
• ဗီုကၠောန်: ဍာ် (၄) ဂါလာန်ဂှ် ဍုန်ဗစိန်တုဲ စုတ်ဂဥုဲသုင်ၜံက်ညိ။ ဗံင်ဂှ် ရေက်ကလောံဍောတ်တ်တုဲ ဍုန်စုတ် ကရောံဍာ်ပၠာဲဂှ်ညိ။ နှဴဒှ်မွဲတုဲမ္ဂး ကေတ်ယာတ်ကြဳကြဳ ဂြောပ်ကၟာတ်တုဲ ဗၜိုဟ်စွံလဝ်ညိ။
• ဗီုစကာ: ဍာ်ဂဥုဲ (၁) ဆ မ္ဂး ထပ်ဖက်ကဵု ဍာ်ပလး (၅) ဆ ဟွံသေင်မ္ဂး (၁၀) ဆ တုဲ စဝ်ဖရဲ စကာမာန်ရ။

၂။ နဲကဲ လသိုန်ဗ္တာင်

နဲကဲဏအ်ဝွံ ဗွဲတၟေင် ခိုဟ်သွက် တၞံသြောံ တုဲ၊ စဵုဒၞာကဵု စၟထိုင်၊ ယဲတၞးကှ်၊ တၞးဍာပ် ကေုာံ စၟဗာတ်တဳရဳယာ တအ် မာန်ရ။

• ကပေါတ်: လသိုန်ဗ္တာင် (၆၀) ဒ္ကေဝ်၊ အရက်ဗု (၂) လဳတာ၊ ဍာ်ဗစး/ယှာလကာ (၀.၅) လဳတာ။
• ဗီုကၠောန်: လသိုန်ဗ္တာင်ဂှ် ထၞက်ဖ္ဍိုတ်တုဲ စုတ်ပ္ဍဲ အရက်ဗု ကေုာံ ဍာ်ဗစး မဖက်လဝ် ဍာ် (၁၀) လဳတာ ညိ။ တုင်စွံလဝ် ပွိုင် (၁) သတ္တာဟ တုဲ ထဍိုဟ်ကေတ် ဍာ်ဍေံသၟးညိ။
• ဗီုစကာ: ဍာ်ဂဥုဲ (၁) ဆ မ္ဂး ဍာ်ပလး (၂၀) ဆ ဖက်နှဴတုဲ စဝ်ဖရဲ စကာမာန်ရ။

၃။ နဲကဲ မြေက်

နဲကဲဏအ်ဝွံ ဒှ်နဲကဲ မသ္ကာတ်မြဟ်မွဲသာ် ရ။

• ကပေါတ်: မြေက်ကှ်ကှ် (၃၀) ဒ္ကေဝ်၊ အရက်ဗု (၂) လဳတာ၊ ဍာ်ပလး။
• ဗီုကၠောန်: မြေက်ကှ်ကှ်ဂှ် ဍုန်ကဵု ဍာ် (၄) လဳတာ တုဲ ၜိုဟ်လဝ်ညိ။ ထပ်စုတ် အရက်ဗု (၂) လဳတာ ကေုာံ ဍာ်ပလး (၂၀) လဳတာ ညိ။ ဟံင်ကေတ်မြေက်ဂှ် ထၞက်ဖ္ဍိုတ်တုဲ ကလေင်ထပ်တုင်စွံလဝ် ပွိုင် (၁) သတ္တာဟ ညိ။ တုဲမ္ဂး ထဍိုဟ်ကေတ် ဍာ်ညိ။
• ဗီုစကာ: ဍာ်ဂဥုဲ (၁) ဆ မ္ဂး ဍာ်ပလး (၂၀) ဆ ဖက်နှဴတုဲ စကာမာန်ရ။

၄။ နဲကဲ ပံင်နှဴ (လသိုန်ဗ္တာင်၊ မြေက်၊ ဂဝ်)

• ကပေါတ်: လသိုန်ဗ္တာင် (၆၅) ဒ္ကေဝ်၊ မြေက်ကှ်ကှ် (၃၅) ဒ္ကေဝ်၊ ဂဝ်/ဒဂဝ် (၃၅) ဒ္ကေဝ်၊ ကၠေင်ဍေန် (၀.၅) လဳတာ၊ ဗံင်ထၞိက် (၆.၅) ဒ္ကေဝ်။
• ဗီုကၠောန်: လသိုန်ဗ္တာင်ဂှ် တုင်လဝ် ကဵုကၠေင်ဍေန် ပွိုင်မွဲဗ္တံတုဲ သံက်ခၞော် ထၞက်ကၠေတ်တ်ညိ။ မြေက်ကှ်ကှ် ကေုာံ ဂဝ် ဂှ်လေဝ် ထၞက်ဍိုတ်တ်ညိ။ ဗံင်ထၞိက်ဂှ် ပၠာဲကဵု ဍာ် (၁၀၀) လဳတာ တုဲ၊ ထောံစုတ် ကပေါတ်မထၞက်လဝ် သီုဖအိုတ် ညံင်ဂွံနှဴကၠောံအာညိ။ ထဍိုဟ်ကေတ် ဍာ်ဍေံတုဲ စကာမာန်ရ။

နိဿဲ

• လဇုဗဳ၊ ကပေါတ်ဂၠာဲလောဲ အကြာဍုၚ်ကွာန် ကၠောန်ဂဥုဲဂစိုတ်စၟမာန်
• အောၚ်မိုးဟိန်း၊ သဘာဝနည်းဖြၚ့် သီးနှံဖျက်ပိုး ကာကွယ်နှိမ်နၚ်းခြၚ်း၊ လိက်ဂျာနေဝ် သၞံၚ်တိုၚ်။