ကမ်မတဳလိက်ပတ်ယေန်သၞာၚ်မန် (ဍုၚ်လ္ဂုၚ်)
ကမ္မတဳလိက်ပတ်ယေန်သၞာင်မန် (ဍုင်လ္ဂုင်)ဝွံ စပ္တံနူ (၂၇-၂-၁၉၇၂) ကၠုတ်ပါ်မံက်တိတ်ကၠုင် အကြာကောန်ဂကူမန်တံရ[၁]။
ကာလဂှ် အ္စာဘာတက္ကသဵု၊ ကွးဘာတက္ကသဵုဗွဲမဂၠိုင်ကီု၊ ညးသၞာဲဒါအလဵုအသဳဂၠိုင်ကီု၊ ညးတၠကမၠောန်ဂၠိုင်ကီု၊ ပူဂဵုညးမကၠောန်မကၠောန်ဇကုဇကုကီု ညဳညဳသာသာ မပါလုပ်တုဲ ချဳဒရာင်ကၠုင် ပရေင်လိက်ပတ်ယေန်သၞာင်မန်ရဂှ် ဂွံတီကေတ်ရ။
တင်ရန်တၟံ
[ပလေဝ်ဒါန် | ပလေဝ်ဒါန် တမ်ကၞက်]- (က) သွက်ဂွံစဵုဒၞာထိင်ဒဝ်မင်မွဲအာ လိက်ပတ်၊ ယေန်သၞာင်မန်။
- (ခ) သွက်ဂွံဖေါအ်ဗြေဝ် ထမံက်ရုပ်ရဴကဆံင်ကုလိက်ပတ်၊ ယေန်သၞာင်မန်
- (ဂ) သွက်ဂွံဂ္စာန်ကၠောန်အာ ဇၟာပ်ကောန်ဂကူမန် ညံင််သ္ဂောံသ္ဍိုက်မၠိုက် ရပ်စပ်သုင်စောဲကု လိက်ပတ်၊ ယေန်သၞာင်မန်မာန်။
- (ဃ) သွက်ဂွံထိင်ဒဝ်အာ လိက်ပတ်၊ ယေန်သၞာင်၊ အခိုက်ပြဝေဏဳတုဲ မွဲဟာန်ကေုာံ ဂ္စာန်ကၠောန်အာ ပရေင်တောတက်ဂကူမန်
- (ၚ) လိက်ပတ်ယေန်သၞာင်မန်ဝွံ နကောန်ဍုင်အရင်ဂမၠိုင် လ္ၚတ်စှ်ေစိုတ်တုဲ ညံင်သ္ဂောံဒှ်အာ အထံက်အပင်ပ္ဍဲပရေင်ညဳသၟဟ် ကောန်ဍုင်အရင်မာန်[၁]။
ရုဲစှ်ဂကောံကေင်ကာ
[ပလေဝ်ဒါန် | ပလေဝ်ဒါန် တမ်ကၞက်]စပ္တံနူ ၁၉၇၂ သၞာံ ပ္ဍဲအသေအဟာန်ကၠောံသၞာံဝွံ ရုဲစှ်ဂကောံကေင်ကာ (၁၅) တၠ နူညးတိုန်စိုပ်ပွိုင်ဍုင်ဂမၠိုင်၊ ကွးဘာတက္ကသဵု၊ ညးတၠကမၠောန်ဂမၠိုင်တုဲ အပ်ပြာပ်တာလျိုင်ရ[၁]။
ပရေင်ချဳဒရာင် ကမ္မတဳဂမၠိုင်
[ပလေဝ်ဒါန် | ပလေဝ်ဒါန် တမ်ကၞက်]စပ္တံနူ သၞာံ ၁၉၇၂ စဵုစိုပ် ၁၉၈၀ ဝွံ ဂကောံကေင်ကာ (၁၅) တၠ ကေုာံ ညးလုပ်ကမ္မတဳ ၜိုတ် (၇၀) တၠ စဵုကဵု (၈၀) တၠ ပါလုပ်ချဳဒရာင် ကၠုင်ရဂှ် ဂွံဆဵုကေတ်ရ။ ဂကောံကေင်ကာဂမၠိုင် ဘိုင်စုတ်သြန်ဂိတုတုဲ ချဳဒရာင်ကၠုင်ပရေင်လိက်ပတ်ယေန်သၞာင်မန်ရ။ လၟုဟ်မ္ဂး ညးစၞးပွိုင်ဍုင်တိုင်ခဳဂမၠိုင်ပါလုပ်ချဳဒရာင် နကဵုဇြဟတ်တုဲ ဆက်ကၠုင်တရဴရ။
စတမ်ဗ္တောန်လိက်ပတ်မန်ဝွံ ပ္ဍဲဇြပ်မန် ကေုာံ ပွိုင်လ္ၚဵုတံရ စဗ္တောန်မာန်ကၠုင်ကီုလေဝ် လက်ကရဴဝွံ (၂၂) ပွိုင်ဍုင် သၠောဲတုဲဗ္တောန်လိက်ပတ်မန်ဥတုက္ညင်မာန်ကၠုင်ရ။ ဂတနူဏံမ္ဂး ပွိုင်မွဲသၞာံပံက်တန်ဗ္တောန်လိက်ပတ်မန်ကေုာံ ဗ္တောန်လိက်ပတ်မန်စိုပ်သ္ၚိဌာန်မာန် ဆက်ဂစာန်ကၠောန်အာပၠန်ရောင်။
ပ္ဍဲကဏ္ဍယေန်သၞာင်အနုသုခုမဝွံ ပံက်တန်ဗ္တောန်သ္ဇိုင်လှ်ေအခိုက်မန် ကေုာံ ကွိင်ကွိုက်မန်တုဲ ဆက်တဲကဵုတၞောဝ်တၟိတံရ။
ကမ္မတဳလိက်ပတ်ယေန်သၞာင်မန် (ဍုင်လ္ဂုင်)ဝွံ ရိုဟ်ရိုဟ်သၞာံတက်တြးပ္တိတ်ကၠုင် ကြက္ကဒိန်မန်ရ။ စပ်ကဵုမဂ္ဂဇြေန်ဟီုမ္ဂး မဂ္ဂဇြေန်မန် လွဳဟံသာဂှ် ပ္တိတ်ဂွံ (၁၄) ကၞပ်ရ။ ပ္တိတ်တြးလဝ် လိက်ဂမၠိုင်ဝွံ လိက်ဗွဟ်မန်နဲကဲတၟိ၊ လိက်အခိုက်ကၞာမန်၊ လိက်အဘိဓာန်မန်-ဗၟာ၊ ပရူမန်ဒးတီထေက်၊ ဝေါဟာမန်တံရ။
ပေဲါပြိုင်ဖ္ဍောတ်ကဗျ၊ ပေဲါပြိုင်ဂမြင်ညာဏ်၊ ပေဲါပြိုင်လိက်ပတ်တံဂှ်လေဝ် ကၠောန်ဗဒှ်ကၠုင်သွက်ကောန်ၚာ်မန်တံရ။
ဆေင်စပ်ကဵုပေဲါအခိုက်ကၞာမန်တံတုဲ မပ္တံကဵုကလအ်မၞိဟ်ဇၞော်၊ သ္ဘင်ဗလိုပ်ဍာ်ဇြဴ၊ ဗဝ်သၟုတ်က္ၜင်သ္ဘင်ပူဇဴပၟတ်တံဂှ်လေဝ် ကၠောန်ဗဒှ်လဝ်ရ။
ပံက်တန်ဗ္တောန်လိက်တၟံမန်၊ ပေဲါဗှ်လိက်စံင် ကေုာံ ပေဲါဟီုတွံလိက်ပတ်တံလေဝ် ကၠောန်မာန်ကၠုင်ရ။
ပ္ဍဲသဘင်တ္ၚဲကောန်ဂကူမန်ဝွံ နကဵုကမ္မတဳကေတ်လျိုင်တုဲ ဗဒမ်ထ္ၜးပျးဝင်မန်ဂှ်လေဝ် ရေင်တၠုင်လဝ်ကီုရ။
နူကဵုကမ္မတဳသ္ပသ္ကိုပ်သ္ကတုဲ ကၠောန်ဗဒှ်ကၠုင် သင်သၟဟ်ကောံမိပ်မြဟ် ဒှ်ဂုဏ်စရာဲမန်၊ သ္ဘင်ဒ္ဂေတ်ဗက်လၟိုန်အခါ အခိုက်မန်တမၠာ၊ ပေါဲဝေင်ဂြိပ်မေတ္တာ၊ ပေဲါဖ္ဍောတ်ပရိုတ်တံရ။
လၟုဟ်မ္ဂး အာယုက်ကမ္မတဳပေင်စိုပ် (၅၀) သၞာံရ။ တရဴကွာ်စိုပ်ဂွံ ၅၀ သၞာံရ။ လၟုဟ်ပ္ဍဲကဵုရးမန်ကေုာံ အလုံဍုင်တေံ ကမ္မတဳလိက်ပတ်ယေန်သၞာင်မန် ပွိုင်ဍုင်တံ မံက်ကၠုင်အိုတ်ဂှ် ထေက်ကဵုဒးမိပ်စိုပ်ရ။
လိက်ပတ်မန် ယေန်သၞာင်မန် ဂွံဂျိုင်တဴ ဂွံတောတက် ဂွံဖောအ်ဗြေဝ်ဂွံဂဵုလဟဵု စွံလဝ်တင်ရန်တၟအ်တုဲ ကမ္မတဳလိက်ပတ်ယေန်သၞာင်မန် (ဍုင်လ္ဂုင်)ဝွံ ဆက်ယိုက်ဂၠေင်အာတာလျိုင် စဵုကဵုစိုပ်သၞာံလအ်လကာဖာ ဂိုတ်ဂစာန်အာရောင်ဂှ် ပ္ဍဲအခိင်ကာလသ္ဘင်ရတုထဝ်ဏံ ပ္တိုန်ထ္ၜးဏာရအဴ။