ကမ်မတဳလိက်ပတ်ယေန်သၞာၚ်မန် (ဍုၚ်လ္ဂုၚ်)

နူ ဝဳကဳပဳဒဳယာ

ကမ္မတဳလိက်ပတ်ယေန်သၞာၚ်မန် (ဍုၚ်လ္ဂုၚ်)ဝွံ စပ္တံနူ (၂၇-၂-၁၉၇၂) ကၠုတ်ပါ်မံက်တိတ်ကၠုၚ် အကြာကောန်ဂကူမန်တံရ[၁]

ကာလဂှ် အ္စာဘာတက္ကသဵု၊ ကွးဘာတက္ကသဵုဗွဲမဂၠိုၚ်ကီု၊ ညးသၞာဲဒါအလဵုအသဳဂၠိုၚ်ကီု၊ ညးတၠကမၠောန်ဂၠိုၚ်ကီု၊ ပူဂဵုညးမကၠောန်မကၠောန်ဇကုဇကုကီု ညဳညဳသာသာ မပါလုပ်တုဲ ချဳဒရာၚ်ကၠုၚ် ပရေၚ်လိက်ပတ်ယေန်သၞာၚ်မန်ရဂှ် ဂွံတီကေတ်ရ။

တၚ်ရန်တၟံ[ပလေဝ်ဒါန် | ပလေဝ်ဒါန် တမ်ကၞက်]

  • (က) သွက်ဂွံစဵုဒၞာထိၚ်ဒဝ်မၚ်မွဲအာ လိက်ပတ်၊ ယေန်သၞာၚ်မန်။
  • (ခ) သွက်ဂွံဖေါအ်ဗြေဝ် ထမံက်ရုပ်ရဴကဆံၚ်ကုလိက်ပတ်၊ ယေန်သၞာၚ်မန်
  • (ဂ) သွက်ဂွံဂ္စာန်ကၠောန်အာ ဇၟာပ်ကောန်ဂကူမန် ညံၚ််သ္ဂောံသ္ဍိုက်မၠိုက် ရပ်စပ်သုၚ်စောဲကု လိက်ပတ်၊ ယေန်သၞာၚ်မန်မာန်။
  • (ဃ) သွက်ဂွံထိၚ်ဒဝ်အာ လိက်ပတ်၊ ယေန်သၞာၚ်၊ အခိုက်ပြဝေဏဳတုဲ မွဲဟာန်ကေုာံ ဂ္စာန်ကၠောန်အာ ပရေၚ်တောတက်ဂကူမန်
  • (ၚ) လိက်ပတ်ယေန်သၞာၚ်မန်ဝွံ နကောန်ဍုၚ်အရၚ်ဂမၠိုၚ် လ္ၚတ်စှ်ေစိုတ်တုဲ ညံၚ်သ္ဂောံဒှ်အာ အထံက်အပၚ်ပ္ဍဲပရေၚ်ညဳသၟဟ် ကောန်ဍုၚ်အရၚ်မာန်[၁]

ရုဲစှ်ဂကောံကေၚ်ကာ[ပလေဝ်ဒါန် | ပလေဝ်ဒါန် တမ်ကၞက်]

စပ္တံနူ ၁၉၇၂ သၞာံ ပ္ဍဲအသေအဟာန်ကၠောံသၞာံဝွံ ရုဲစှ်ဂကောံကေၚ်ကာ (၁၅) တၠ နူညးတိုန်စိုပ်ပွိုၚ်ဍုၚ်ဂမၠိုၚ်၊ ကွးဘာတက္ကသဵု၊ ညးတၠကမၠောန်ဂမၠိုၚ်တုဲ အပ်ပြာပ်တာလျိုၚ်ရ[၁]

ပရေၚ်ချဳဒရာၚ် ကမ္မတဳဂမၠိုၚ်[ပလေဝ်ဒါန် | ပလေဝ်ဒါန် တမ်ကၞက်]

စပ္တံနူ သၞာံ ၁၉၇၂ စဵုစိုပ် ၁၉၈၀ ဝွံ ဂကောံကေၚ်ကာ (၁၅) တၠ ကေုာံ ညးလုပ်ကမ္မတဳ ၜိုတ် (၇၀) တၠ စဵုကဵု (၈၀) တၠ ပါလုပ်ချဳဒရာၚ် ကၠုၚ်ရဂှ် ဂွံဆဵုကေတ်ရ။ ဂကောံကေၚ်ကာဂမၠိုၚ် ဘိုၚ်စုတ်သြန်ဂိတုတုဲ ချဳဒရာၚ်ကၠုၚ်ပရေၚ်လိက်ပတ်ယေန်သၞာၚ်မန်ရ။ လၟုဟ်မ္ဂး ညးစၞးပွိုၚ်ဍုၚ်တိုၚ်ခဳဂမၠိုၚ်ပါလုပ်ချဳဒရာၚ် နကဵုဇြဟတ်တုဲ ဆက်ကၠုၚ်တရဴရ။

စတမ်ဗ္တောန်လိက်ပတ်မန်ဝွံ ပ္ဍဲဇြပ်မန် ကေုာံ ပွိုၚ်လ္ၚဵုတံရ စဗ္တောန်မာန်ကၠုၚ်ကီုလေဝ် လက်ကရဴဝွံ (၂၂) ပွိုၚ်ဍုၚ် သၠောဲတုဲဗ္တောန်လိက်ပတ်မန်ဥတုက္ညၚ်မာန်ကၠုၚ်ရ။ ဂတနူဏံမ္ဂး ပွိုၚ်မွဲသၞာံပံက်တန်ဗ္တောန်လိက်ပတ်မန်ကေုာံ ဗ္တောန်လိက်ပတ်မန်စိုပ်သ္ၚိဌာန်မာန် ဆက်ဂစာန်ကၠောန်အာပၠန်ရောၚ်။

ပ္ဍဲကဏ္ဍယေန်သၞာၚ်အနုသုခုမဝွံ ပံက်တန်ဗ္တောန်သ္ဇိုၚ်လှ်ေအခိုက်မန် ကေုာံ ကွိၚ်ကွိုက်မန်တုဲ ဆက်တဲကဵုတၞောဝ်တၟိတံရ။

ကမ္မတဳလိက်ပတ်ယေန်သၞာၚ်မန် (ဍုၚ်လ္ဂုၚ်)ဝွံ ရိုဟ်ရိုဟ်သၞာံတက်တြးပ္တိတ်ကၠုၚ် ကြက္ကဒိန်မန်ရ။ စပ်ကဵုမဂ္ဂဇြေန်ဟီုမ္ဂး မဂ္ဂဇြေန်မန် လွဳဟံသာဂှ် ပ္တိတ်ဂွံ (၁၄) ကၞပ်ရ။ ပ္တိတ်တြးလဝ် လိက်ဂမၠိုၚ်ဝွံ လိက်ဗွဟ်မန်နဲကဲတၟိ၊ လိက်အခိုက်ကၞာမန်၊ လိက်အဘိဓာန်မန်-ဗၟာ၊ ပရူမန်ဒးတီထေက်၊ ဝေါဟာမန်တံရ။

ပေဲါပြိုၚ်ဖ္ဍောတ်ကဗျ၊ ပေဲါပြိုၚ်ဂမြၚ်ညာဏ်၊ ပေဲါပြိုၚ်လိက်ပတ်တံဂှ်လေဝ် ကၠောန်ဗဒှ်ကၠုၚ်သွက်ကောန်ၚာ်မန်တံရ။

ဆေၚ်စပ်ကဵုပေဲါအခိုက်ကၞာမန်တံတုဲ မပ္တံကဵုကလအ်မၞိဟ်ဇၞော်၊ သ္ဘၚ်ဗလိုပ်ဍာ်ဇြဴ၊ ဗဝ်သၟုတ်က္ၜၚ်သ္ဘၚ်ပူဇဴပၟတ်တံဂှ်လေဝ် ကၠောန်ဗဒှ်လဝ်ရ။

ပံက်တန်ဗ္တောန်လိက်တၟံမန်၊ ပေဲါဗှ်လိက်စံၚ် ကေုာံ ပေဲါဟီုတွံလိက်ပတ်တံလေဝ် ကၠောန်မာန်ကၠုၚ်ရ။

ပ္ဍဲသဘၚ်တ္ၚဲကောန်ဂကူမန်ဝွံ နကဵုကမ္မတဳကေတ်လျိုၚ်တုဲ ဗဒမ်ထ္ၜးပျးဝၚ်မန်ဂှ်လေဝ် ရေၚ်တၠုၚ်လဝ်ကီုရ။

နူကဵုကမ္မတဳသ္ပသ္ကိုပ်သ္ကတုဲ ကၠောန်ဗဒှ်ကၠုၚ် သၚ်သၟဟ်ကောံမိပ်မြဟ် ဒှ်ဂုဏ်စရာဲမန်၊ သ္ဘၚ်ဒ္ဂေတ်ဗက်လၟိုန်အခါ အခိုက်မန်တမၠာ၊ ပေါဲဝေၚ်ဂြိပ်မေတ္တာ၊ ပေဲါဖ္ဍောတ်ပရိုတ်တံရ။

လၟုဟ်မ္ဂး အာယုက်ကမ္မတဳပေၚ်စိုပ် (၅၀) သၞာံရ။ တရဴကွာ်စိုပ်ဂွံ ၅၀ သၞာံရ။ လၟုဟ်ပ္ဍဲကဵုရးမန်ကေုာံ အလုံဍုၚ်တေံ ကမ္မတဳလိက်ပတ်ယေန်သၞာၚ်မန် ပွိုၚ်ဍုၚ်တံ မံက်ကၠုၚ်အိုတ်ဂှ် ထေက်ကဵုဒးမိပ်စိုပ်ရ။

လိက်ပတ်မန် ယေန်သၞာၚ်မန် ဂွံဂျိုၚ်တဴ ဂွံတောတက် ဂွံဖောအ်ဗြေဝ်ဂွံဂဵုလဟဵု စွံလဝ်တၚ်ရန်တၟအ်တုဲ ကမ္မတဳလိက်ပတ်ယေန်သၞာၚ်မန် (ဍုၚ်လ္ဂုၚ်)ဝွံ ဆက်ယိုက်ဂၠေၚ်အာတာလျိုၚ် စဵုကဵုစိုပ်သၞာံလအ်လကာဖာ ဂိုတ်ဂစာန်အာရောၚ်ဂှ် ပ္ဍဲအခိၚ်ကာလသ္ဘၚ်ရတုထဝ်ဏံ ပ္တိုန်ထ္ၜးဏာရအဴ။

နိဿဲ[ပလေဝ်ဒါန် | ပလေဝ်ဒါန် တမ်ကၞက်]

  1. ၁.၀ ၁.၁ ၁.၂ သကေမ်တဲ၊ တၞးလိက်။ တရဴကမ္မတဳပေၚ်စိုပ်(၅၀)သၞာံ ရတုထဝ်