ကမ္မသတ္တိ
မၞိဟ်ပတှ်ေ ပရေၚ်ကံဂှ် ဒှ်ညးရှ်ေသှ်ေဗုဒ္ဓဘာသာဇေတ်ရ၊ ဗုဒ္ဓဘာသာဂှ် ကမ္မဗန္ဓု ကံဟေၚ် ဒှ်ကလောဒညာတ် ပွဳဗွိုၚ် ကမ္မဒါယာဒ ကံဟေၚ် ဒှ်ဂြပ်အာဲကၟာဲ မၞိဟ်ပတှ်ေကံတံဂှ် သွက်ကမၠောန်ဂွံခိုဟ် ညးတံပလေဝ်လဝ်ရ၊ ပလေဝ်ကံမ္ဂး ဒှ်ပလေဝ် ဘဝရ၊ နွံပၟိက်ကဵုဘဝခိုဟ်မ္ဂး ကံကမၠောန် ခိုဟ်ဂှ်ကၠောန် မၞိဟ်ပလေဝ် လဝ်ကံကမၠောန်ခိုဟ်တံဂှ် ဟွံဒးဒုၚ်ကမျကဵုဓဝ်လောကရ။
ကံဂှ်မၞိဟ်တံကၠိုဟ်လဝ်ကမၠောန်ရ၊ ကမၠောန်ကၠောန်တုဲအိုတ်အး အာရ၊ ဆဂးသတ္တိအိုတ်အး အာသှ်ေၜက်မံၚ်ဏီ အစောန်သၟဟ်သတ္တိဂှ် ဒှ်ကံရ၊ ကၠောန်ခိုဟ်သတ္တိခိုဟ်တှ်ေ ပရေံမ္ဂး သတ္တိပရေံသှ်ေၜက်ရ။
ဂွံလေဝ်ကံမာန် ဒးကေတ်ဇြဟတ် ဂရိုဟ်(ဖိအား) နူညာဏ် ဝဳရိယရ၊ မၞိဟ်ညာဏ်နွံ ဝဳရိယနွံပလေဝ်ကံ မာန်ရ၊ ညာဏ်ခိုဟ်မ္ဂး ကံခိုဟ်ရ၊ ကံဂှ်မၞိဟ် ဖ္အိုတ်ဟွံပတှ်ေရ၊ မၞိဟ်ဟွံပတှ်ေကံဂှ် ညးတံဟွံပလေဝ်ကမၠောန်ရ။
ကံဟေၚ်ဖန်ဗဒှ်ကဵုဘဝမၞိဟ် ညံၚ်ရဴဒုၚ်တဲမာန်ကဵု မၞိဟ်လေဝ်ပလေဝ်ကဵုကံ မာန်ကီုရောၚ်။ ဒးပတှ်ေကီုရ၊ ကၠောန် ခိုဟ်ဂွံခိုဟ်ဂှ် ဆဵုညာတ်မံၚ်နမတ်ရ။
ကံ (ကမၠောန်)အတိက်ၜိုန်ကဵုဖိုလ် ဟွံခိုဟ်ကီုလေဝ် ကံပစ္စုပ္ပန် ညံၚ်ဂွံခိုဟကပလေဝ်ကဵုမာန်မ္ဂး ကံအတိက်ဂှ်ဒးခိုဟ်ဗက်ဏောၚ် ကံအတိက်ဂှ် ညာတ်ကေတ်ဟွံမာန် ကံ (ကမၠောန်) ပစ္စုပ္ပန်ဂတမတ်ဂှ် အလဵုဇကုညာတ်ကေတ်မာန်ရ၊ ပလေဝ်ကံ (ကမၠောန်) ပစ္စုပ္ပန်ဏံညိ။
ကံ-ကမ္မဂှ် ဟီုစကမၠောန်ဂှ် ကမၠောန်ကံခိုဟ်မ္ဂး ဖိုလ်ကမၠောန်ခိုဟ် မံက်ကၠုၚ်မာန်ရ၊ ကမၠောန်ကံဟွံခိုဟ် ဖိုလ်ကံကမၠောန် ဟွံခိုဟ်မံက်ကီုရ၊ ကံပရေံဍဵုဟလိုက်မ္ဂး ဘဝမၞိဟ်ဒးဗၠိုက်ရ၊ မၞိဟ်ဆဵုဂဗမံၚ်ဒဒိုက်ဂှ် ကံပရေံဍဵုဍိုက်ကဵုဖိုလ်ရ။
ညးလ္ၚဵု ကၠောန်ခိုဟ်ဆဵုပရေံဂှ် ၜိုန်ကမၠောန်လုပ်သမာဇဳဝကီုလေဝ် ဒှ်ထဝ်ကမၠတ်တုဲ ဗီုပြၚ်ကမၠောန်သွံရာန်ဟွံစှ်ေဗီုနဲကဲတုဲ ဆဵုဂဗဘဲမာန်ရ။
ရာန်ထဝ်ပ္ဍဲတဲကမၠတ်ကၠတ်ထဝ်ဂှ် ၜိုန်ကမၠောန်လုပ်သမာဇဳဝကီုလေဝ် ဒှ်ထဝ်ကမၠတ်တုဲ ဗီုပြၚ်ကမၠောန်သွံရာန်ဟွံစှ်ေဗီုနဲကဲတုဲ ဆဵုဂဗဘဲမာန်ရ။
ဒးပတှ်ေကံဏောၚ် ၜိုန်ဟီုလဝ်နွံကီုလေဝ် ဒးဆိၚ်ဆစၚ်ခြၚ် နကဵုညာဏ်ပါ်ပဲါ ဇဲလွဳလေဝ်လ္ပယှအ် လ္ပဖ္ဍန်ထောံစိုတ်ဓါတ် ပတှ်ေကံ လ္ပလိုန်စုတ်လ္တူဇလညိ၊ အတိုၚ်ဏံ ဖန်ဗဒှ်မၞိဟ်တံလှ်ေမံၚ်လ္တူစၚ် ဇာတ်လောကရ။
ကံညးနွံပ္ဍဲညးရ ပါ်ပရံဟွံဂွံ ညးကၠောန်ညးဂွံဟေၚ်ရ၊ ကံ အတိက်ဟွံညာတ်ဂှ် လ္ပစၟဳကေတ်တုဲ ကံ (ကမၠောန်) ပစ္စုပ္ပန်ညာတ် မံၚ်ဂတမတ်ဏံ ညံၚ်ဂွံဆာဲဂိုတ်ဂစာန်ပလေဝ်ညိ။
ပတှ်ေဗၠေတ် အာစိုပ်တၞုၚ်တၞးမွဲကရေက် (ဝါဒတၞုၚ်တၞး) လေဝ် ဘဝဟွံဇၞော်မောဝ် လ္တူဒဒှ်ဍာံ ညာဏ်ဇဲလွဳဟွံပေၚ်လေဝ် ဘဝဟွံသၠုၚ် တိုန်ပံၚ်သရောပ်မ္ဂး ကံညာဏ် ဝဳရိယ ဇုက်ပိပၠောပ်ဏံတေၚ်ညိမ္ဂး တိၚ်ရမျာၚ်တိတ်ရ။
ကံခိုဟ်ဂှ် ကုသိုလ်ဏံ ကံပရေံဂှ် အကုသိုလ်ကံ ကံၜါဝွံ နွံမံၚ်ပ္ဍဲဘဝမၞိဟ်လၟိုန်အခိၚ်ရ၊ ဍေံမၚ်မံၚ်အခိၚ် သွက်ဂွံကဵုဖိုလ် ကုမၞိဟ်ဂှ်ရ၊ကၠောန်ခိုဟ် ဆဵုဒဒိုက်ဂှ် ဒှ်အခိၚ် အကုသိုလ်ဏံ ဂွံအခေါၚ် ကဵုဖိုလ်ရ၊ကၠောန်ပရေံ ဂွံတသိုက်ဂှ် ဒှ်အခိၚ် ကုသိုလ်ဏံ ကဵုဖိုလ်ရ။
အခိၚ်ကုသိုလ်ကံကဵုဖိုလ်မ္ဂး ဒဒိုက်ယဲဘဲဟွံမွဲရ၊ ညးတၞဟ် ပၠေၚ်လေဝ်ဘဝပိုန်ဒြပ်ဟွံလေၚ်ရ၊ သ္ၚိဇကုမံၚ်ပၟတ်ဟွံတူရ၊ ဇၟာပ်ချပ် ကၠောန်ဒှ်ဖ္အိုတ်ရ။
ကမၠောန် ဒှ်ကုသိုလ်ဟီုဂှ် ကဵုဒါန်သြန်ဝတ္ထုမာန်မှ ဒှ်ကုသိုလ် ဟွံသေၚ်သွက်ဂွံဒှ်ကမၠောန်ကုသိုလ်ဂှ် နွံမံၚ် ဂတမတ်ပိုဲဖ္အိုတ်ရ၊ ဂၠံၚ်ဍာန် လီုပလေဝ် ဂၠံၚ်ဍာန်ပြးတွံ သ္အးဇ္ၚး ဒၟာနူဇကုမွဲ ညးဂမၠိုၚ် လ္ပကဵုဒှ်ဒဒိုက်၊ ဟီုဂလာန် မၞုံကဵုကျာ်သြဳ ဗိုက်ဗွိုက်လတက်မၞုံကဵုမ္ၚဵု သ္ပရှ်ေသှ်ေရဴဂဴမၞိဟ်ဇၞော် ဍောတ်တံဂှ် ဒှ်ကမၠောန်ဏံ ကုသိုလ်ဖ္အိုတ်ရ။
ဖေက်ဘဲဒဒိုက်ဝဋ္ဋ်သံသာမ္ဂး ဒးဟလိုၚ်ဓဝ်ကုသိုလ်ပ္ဍဲဇကုရ၊ ကၠောန်လေဝ်ကဵုဒှ်ကုသိုလ် ဟီုချပ်လေဝ်ကဵုဒှ်ကုသိုလ်မ္ဂး ပ္ဍဲမၞိဟ်ဂှ် ကုသိုလ်ဂၠိုၚ်ရ၊ ပလေဝ်ကံမ္ဂး ဒးပလေဝ်ကမၠောန်ပိသာ်ဂှ်ရ။
ကၠောန်ခိုဟ်ဂွံခိုဟ် ကၠောန်ပရေံဂွံပရေံဂှ် မၞိဟ်တံတီမံၚ်ကၠးကၠးရ၊ဆဂးအတိုၚ်တီပဲါဟွံမာန်ဂှ် ဟိုတ်နူဟွံပတှ်ေကံပေၚ်ၚ်ရ၊ ပတှ်ေစှ်ေ စိုတ်မ္ဂး ကံပရေံဂှ် ဒးဝေၚ်ပဲါတွဵုရ၊ ကံပရေံပရေံဂှ် ပတုပ်လဝ်ကဵုမတၟံမဗ္တဳတုဲဍေံဗၠိုက်တၞီစှ်ေလ္ပာ်သၟဝ်ဖ္အိုတ်ရ။
မၞိဟ်စွံၚုဟ်မးကဵုဘဝမၞိဟ်တံဂှ် မွဲအာယုက်ဘဝမၞိဟ် ညံၚ်ကံခိုဟ်ဂွံဒှ်မံၚ်လၟိုန် စွံလဝ်ဓဝ်သတိဂၠိုၚ်ၚ်ညိ၊ ပ္ဍဲကမၠောန်လေဝ်စွံသတိ တုဲကၠောန်ဝါစာဟီုဂးကသပ်ချပ်မံၚ်တံဂှ်လေဝ် သတိလ္ပကဵုဗၠးအာညိ။
အာယုက်ပရေံ ကံဇာတိစှ်ေယုတ်သဝ်တုဲ ဒှ်ယဲဂှ် မၞိဟ်တံပတှ်ေဂၠိုၚ်မံၚ်ရ၊ ကာလဒးပလေဝ်ကံပၠေၚ်အန္တရာဲဂှ် ပြာပ်အာကဵုအ္စာဗေဒၚ် သွက်ယဲဝေဒနာ ဇကုဂွံဗၠးဂှ် ဒးဂစိုတ်လမျီုသတ်မွဲမွဲမ္ဂး ဟွံစှ်ေကဵု သၞောဝ်ဗုဒ္ဓဘာသာပလေဝ်ကံရ။
ပလေဝ်ကံအာယုက် အထံက်ပရေံမ္ဂး ကံလ္ပာ်ခိုဟ်ဂှ်ကၠောန်၊ ကဵုဒါန်၊ လ္ၚောဝ်ကျာ်၊ ဖျေံမေတ္တာ ရှ်ေသှ်ေရဴဂဴမိမအ္စာ မၞိဟ်ဇၞော်တံ တွံဂၠံၚ်ဍာန်ထံက်ပၚ်ညးဒိုက်ဝါတ်ဒှ်ဒဒိုက်တံညိ။
✍ကျာ်ဇၞော်အ္စာမဟာထေရ်ပါလိတ
