ကမ် ၄ ပြကာ

ခဏ်ထ္ၜးစေတနာဂှ်ပၠန် ဗွဲအစောံကာမကဵုဖိုလ် ကမ် ၄ ပြကာ

1. ဒိဋ္ဌဓမ္မဝေဒနဳယကမ်မွဲ
2. ဥပပဇ္ဇဝေဒနဳယကမ်မွဲ
3. အပရာပရိယဝေဒနဳယကမ်မွဲ
4. အဟောသိကံမွဲ

ရဴသာ်ဝွံ ကမ်တိတ်ဒှ် ၄ ပြကာရ။

ပၞောဝ် ၄ ပြကာဂှ်

၁။ ဒိဋ္ဌဓမ္မဝေဒနဳယကမ်

ကုသိုလ် အကုသိုလ် ပဌမဇဴစေတနာ မလေပ်က္တဵုဗဒှ်ကဵုဖိုလ် ပဝတ္တိပ္ဍဲဘဝဂတမတ်ပစ္စုပ္ပန်ဂှ် ဒိဋ္ဌဓမ္မဝေဒနဳယကမ် မ္ဂးယၟုရ။

• တင်စၟတ်။ ။ ပဌမဇဴစေတနာဝွံ ပၞောဝ်ဇဴ ၇ တန်ဂှ် ဟိုတ်မဒှ်ပဌမကမ်ဇဴ ဇဴတမ်တုဲ၊ နကဵုအစောံသတ္တိအဃောစေတနာ မွဲသ္အာင်ဂှ် ဟိုတ်ဟွံကၠိဂွံအထံက်အပင်တုဲ၊ ညံင်ရဴဍောင်ပ္ကဴဟွံမွဲကဵု သတ်ကီု၊ ဆပ္ဍဲဘဝပစ္စုပ္ပန်ဝွံဟေင်၊ ဖိုလ်အဟိုတ် အယာံမာတ်ဖိုလ် ပဝတ္တိဂှ်ဟေင် ဍေံမကဵုဖိုလ်မာန်ရ။

၂။ ဥပပဇ္ဇဝေဒနဳယကမ်

ကုသိုလ် အကုသိုလ်၊ သတ္တမဇဴစေတနာ မလေပ်က္တဵုဒှ်ကဵု ဖိုလ်ပဋိသန္ဓိ ဖိုလ်ပဝတ္တိပ္ဍဲဘဝမသက္ကုခြာ၊ ပ္ဍဲဒုတိယဘဝဂှ် ဥပပဇ္ဇဝေဒနဳယကမ်မ္ဂးယၟုရ။

• တင်စၟတ်။ ။ ပ္ဍဲအရာကုသဵုဂှ် သမာပတ်စေတနာ၊ ပ္ဍဲအရာအကုသဵုဂှ် ပဉ္စာနန္တရိယ စေတနာ ကမ်မဒှ်ရ။

သတ္တမဇဴစေတနာဝွံ ဍေံဂွံကဵုဖဵုပဋိသန္ဓိဍာံရောင်၊ ဖဵုပဝတ္တိဂှ် ဍေံကဵုမာန်ရ။ ဖဵုပဋိသန္ဓိဂှ် ယဝ်ဍေံဟွံကဵုမ္ဂး - ဖဵုပဝတ္တိဂှ်လေဝ် ဍေံကဵုဖဵုဟွံမာန်ရ။

ပ္ဍဲကာလသက်သၟိင်စုတိချိုတ်အာဂှ်၊ ဒှ်အခေါင်ဒှ်ဒၞဲါသွက်သတ္တမဇဴစေတနာမကဵုဖဵုရ၊ ဂပ်ဝ်သမ္တီ။ စရင်ဓရ်ကုသဵု မပ္တံကဵုဒါနကီု၊ ပွသရာံပါပ်အကုသဵုမပ္တံကဵုပါဏာတိပါတကီု ဟိုတ်ဍေံလေဝ်ပ္တုဲကဵုကိစ္စတံဂှ်တံဂှ်စိ၊ သတ္တမဇဴစေတနာဂှ် အတ္တသာမိကစေတနာ- ရဴဝွံကော်ခဴစရ။

သတ္တမဇဴစေတနာဝွံ ဟိုတ်မဒှ်စေတနာ ဖျေံသ္ဂုတ်သွာတ်မဖျေံသန္နိဌာန်စိ- သန္နိပကစေတနာ ရဴဝွံလေဝ် ကော်ခဴစဏီရ။

၃။ အပရာပရိယ ဝေဒနဳယကမ်

အပရာပရိယ ဝေဒနဳယကမ်မ္ဂးဂှ် -

ပတမ်နူတတိယဘဝတုဲ၊ စဵုကဵုမကလိဂွံ နိဗ္ဗာန်တေံ၊ အခေါင်သၟဟ်ရထမ္ဂး၊ ကုသဵု အကုသဵုစေတနာဇဴဒေါဝ် ၅ တန်လေဝ် က္တဵုဒှ်ကဵုဖဵု ပ္ဍဲပဋိသန္ဓိ ပ္ဍဲပဝတ္တိဂှ် အပရာပရိယဝေဒနဳယကမ်မ္ဂးယၟုရ။

• တင်စၟတ်။ ။ပ္ဍဲသတ္တံဟွံကၠိဂွံနိဗ္ဗာန်ဏီ အလုံအိုတ်သီုဂှ် အပရာပရိယဝေဒနဳယကမ် နွံတဴအိုတ်ဏီရ။ သတ္တံမဂွံတိတ်ဗၠးအာနူ အပရာပရိယဝေဒနဳယကမ်မ္ဂးဂှ် ဟွံမွဲရ။

ဂလာန်ဂှ် ဒှ်ဍာံစၟတ်ဟာ - ထံက်ကဵုပါဠိသာဓကမ္ဂး အပရာပရိယဝေဒနဳယ ကမ္မရဟိတော ဟိ သံသာရေ သံသရန္တောနာမ နထ္တိ တုဲ ဂလာန်ဂှ် ဒှ်ဍာံစၟတ်ရ။

၄။ အဟောသိကမ်

အဟောသိကမ်မ္ဂးဂှ် ပထမဇဴစေတနာ ဟွံကဵုဖဵုပ္ဍဲဘဝပစ္စုပ္ပန် ဂတမတ်ဂှ်ကီု၊ သတ္တမဇဴစေတနာဟွံကဵုဖဵု ပ္ဍဲဒုတိယဘဝဂှ်ကီု၊ သ္ပတမ်နူတတိယဘဝတုဲ စဵုကဵုဘဝမကၠိဂွံနိဗ္ဗာန်တေံ စေတနာဇဴဒေါဝ် ၅ တန် ဟွံကဵုဖဵုဂှ်ကီု စေတနာဂမၠိုင်တံဂှ် ဒှ်အာ အဟောသိကမ် သီုဖအိုတ်ရ။ မၠာ်သ္ၚဳရံင်ရ။

• တင်စၟတ်။ ကမ်မွဲရ ကဵုဖဵု ဗီုဍေံကဵုဖဵုတုန်- ကၠောန်ၜိုတ်ပ္တိတ်ဇြဟတ် ဆန်ၜန်လဝ်ကဵု၊ ဒိဋ္ဌဓမ္မဝေဒနဳယကမ်ဗွဲမဂၠိုင်ဂၠင် နွံတဴကီုလေဝ် ဆကမ်မွဲဓဝ်ဂှ်ဟေင် မကဵုဖဵုဒိဋ္ဌဓမ္မဂတမတ်မာန်ရ။ ကမ်သၟေဟ်နူမွဲတံဂှ် ဟဂွံကဵုဖဵုတုဲ ဍေံဒှ်အဟောသိကမ်ဖ္အိုတ်ရ။
• ကလာန်ဗ္ကန်။ ပွမသ္ဂးသာ်ဝွံတုန် - ရန်ကဵုဒိဋ္ဌဓမ္မဝေဒနဳယကမ်မပြာကတ်ဗွဲမလောန် မကဵုဖဵုကုညးဂမၠိုင် မပ္တံကာကဝလိကယ သေဋ္ဌဳ - တံဂှ်တုဲမတီရ။ ဗွဲစၟတ်တုန်- ဟိုတ်အထံက်အပင်ညဳသာသၟဟ်သၟန်မ္ဂး ဒိဋ္ဌဓမ္မဝေဒနဳယကမ်မွဲဟွံသေင် ကမ်ဗွဲမဂၠိုင်တအ်ဂှ်လေဝ် ကဵုဖဵုဒိဋ္ဌဓမ္မဂတမတ်မာန်အိုတ်ဟေင်ရ။ သာ်ဝွံ တေံသ္ဂးလဝ်ရ။

ပရေင်တင်သဳကၠဳ

ကၠောန်ၜိုတ်ပ္တိတ်ဇြဟတ် ဆန်ၜန်လဝ်ကဵု ဥပပဇ္ဇဝေဒနဳယကံ ဗွဲမဂၠိုင်ဂၠင် ၜိုန်နွံတဴကီုလေဝ် ဆကမ်မွဲဓဝ်ဂှ်ဟေင် ဍေံမကဵုဖဵုပဋိသန္ဓိမာန်ရ။ ကမ်သၟေဟ်နူမွဲတအ်ဂှ် ဍေံကဵုဖဵုပဋိသန္ဓိဟွံမာန်အိုတ်ရ။ အယာံမာတ်ဖဵုပဝတ္တိဂှ်လေဝ် ယဝ်ဍေံဟွံကဵုဖဵုပၠန်မ္ဂး ဍေံဒှ်အဟောသိကမ်အိုတ်ရ။

ပ္ဍဲအရာမကလိလောန်ဒုဟ် အလုံပဉ္စနန္တရိယကမ် ၅ ဂှ်ကီုလေဝ်၊ ကမ်မၞုံကဵုအစောံသတ္တိဇၞော်အိုတ် ဒုဟ်ဇြိုင်အိုတ် သံဃဘေဒကမ်ဂှ်ဟေင် ဍေံမကဵုဖဵုပဋိသန္ဓိ ပ္ဍဲဘဝမသက်သၟိင်။ ဝါ၊ ပ္ဍဲဒုတိယဘဝရ၊ အနန္တရိယကမ်၊ မသၟေဟ်နူဂှ် ဍေံဟဂွံကဵုဖဵုအိုတ်တုဲ ဍေံဒှ်အဟောသိကမ်အိုတ်ရ။

ပ္ဍဲအရာမကလိဂွံသမာပတ် အလုံ ၈ ပြကာဂှ်ကီုလေဝ် ဆသမာပတ်မွဲဓဝ်ဂှ်ဟေင် ဍေံမကဵုဖဵုပဋိသန္ဓိရ။ သမာပတ်မသၟေဟ်တအ်ဂှ် ဍေံဟွံကဵုဖဵုတုဲ။ ဍေံဒှ်အဟောသိကမ်အိုတ်ရ တေံမၠာ်သ္ၚဳရံင်ရ။

အပရာပရိယဝေဒနဳယကမ်တုန်

ကၠိဂွံနိဗ္ဗာန် သံသာစက်ပိုန်သ္ကုတ်အိုတ်အာတုဲဟေင် မဒှ်အဟောသိကမ်ရ။ ဗၞတ်လလအ်ဟွံဂွံက္လိနိဗ္ဗာန်ဏဳမ္ဂး ဗၞတ်ဂှ်ဍေံဒှ်အဟောသိကမ်ဟွံမာန်ဏီရ ကီုမၠာ်သ္ၚဳရံင်ရ။

တင်စၟတ်။ သံသာစက်မ္ဂးယၟုဂှ် ပဋိသန္ဓိစိုတ်၊ ဘဝင်စိုတ်၊ ဝဳထဳစိုတ်၊ စုတိစိုတ်မဒှ်ရ။ (သာ်ဝွံပ္ဍဲ တေံမၠာ်သ္ၚဳရံင်ရ။

နိဿဲ

၁။ ၂၀၀၈ သၞာံ။ သၞိင်စေတနာ-လျးဖိုလ်ဒါန်၊ ပြကိုဟ်။ ဥတ္တရာလင်္ကာရ၊ ဘဒ္ဒန္တ။ ဘာဒဵု၊ ကွာန်အနင်၊ ပွိုင်ဍုင်ဇြပ်ဗု။