ကောရက္ခတ္တိယ၊ဝတ္ထု
သုတ်ပါထိက၊ ပါထိကဝဂ်၊ ဒဳဃနိကာယ်၊သုတ္တန္တပိဋက
ဝတ္ထု ကောရက္ခတ္တိယ
ယွံဘဂ္ဂဝ ပ္ဍဲကာလမွဲအခိၚ် အဲဂှ် သ္ပဒတဴတန်တဴဒၟံၚ် ဇနပိုဒ်ထူလု ပ္ဍဲနိဂီုမၞုံယၟု ဥတ္တရကာ ဇနပိုဒ်ထူလု တအ်ရ၊ ယွံဘဂ္ဂဝ ပ္ဍဲကာလဂှ် အဲဂှ် ပ္ဍဲအခိၚ်နူဂယးပြဟ် ပလေဝ် လတက်ကၠေံသ္ၚာတုဲ သီုကဵုထ္ၜဂိုၚ် ရပ်ကေတ် ဗဗေၚ်,သ္ၚာ လုပ်ဂ္ၚေၚ်ပိဏ္ဍပါတ် နိဂီုဥတ္တရကာ မွဲဟာန်ကေုာံ ခမဳဗွက်ကြဴ ကောန်သၟိၚ်လိစ္ဆဝဳ သုနက္ခတ္တရ။ ပ္ဍဲကာလဂှ် တဳကောရက္ခတ္တိယ မဟွံဗိုက်ဗွိုက်လတက်ဂှ် ဒ္ဂေတ်တဴဒ္ဂေတ်ကၠဵုရ၊ ထံက်ဂမာ အာပန်လ္ပာ်ရ၊ စၞ မဖျေံစွံလဝ် ပ္ဍဲတိဂှ် ခၟက်စတဴ နကဵုပါၚ်ဟေၚ်ရ၊ စတဴ နကဵုပါၚ်ဟေၚ်ရ၊ ယွံဘဂ္ဂဝ ကောန်သၟိၚ်လိစ္ဆဝဳ သုနက္ခတ္တဂှ် သ္ဂောံညာတ်ကေတ် တဳကောရက္ခတ္တယိ မဟွံဗိုက်ဗွိုက်လတက် မဒ္ဂေတ်တဴဒ္ဂေတ်ကၠဵု မထံက်ဂမာအာပန်လ္ပာ် စၞ မဖျေံစွံလဝ်ပ္ဍဲတိ မခၟက်စဒၟံၚ် နကဵုပါၚ်ဟေၚ် မစတဴ နကဵုပါၚ်ဟေၚ်ဂှ်တုဲ ကသပ်ရဴသာ်ဝွံ ကတဵုဒှ်ရ--
“ယွံသကအ်တအ် ခမဳ မထံက်ဂမာအာပန်လ္ပာ် စၞ မဖျေံစွံလဝ်ပ္ဍဲတိ မခၟက်စဒၟံၚ် နကဵုပါၚ်ဟေၚ် မစတဴ နကဵုပါၚ်ဟေၚ်ဝွံ ထေက်ကဵုထိုၚ်သး အမ်သဝ်ခိုဟ်ကွေံရသွံ” ရဴဝွံ (ကသပ်ကတဵုဒှ်ရ)။
ယွံဘဂ္ဂဝ ပ္ဍဲကာလဂှ် အဲဂှ် နကဵုစိုတ်အဲ တီကေတ်ကသပ်စိုတ် ကောန်သၟိၚ်လိစ္ဆဝဳ သုနက္ခတ္တတုဲ ဟီုသ္ဂးတဴ ကုကောန်သၟိၚ်လိစ္ဆဝဳ သုနက္ခတ္တ ဂလာန်ဝွံရ--
“ယွံတြုံမလ္ၚုသၟး (နူမဂ်ဖိုလ်) တၠအဲ ဒုၚ်ဝန်တဴ ရဴဝွံမ္ဂး ခမဳကွးကျာ် ကောန်သၟိၚ် သာကျဝၚ်ရသွံ” ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် “ယွံတြုံမလ္ၚုသၟး (နူမဂ်ဖိုလ်) တၠအဲဒုၚ်ဝန်တဴ ရဴဝွံမ္ဂး ခမဳကွးကျာ် ကောန်သၟိၚ်သာကျဝၚ်ရသွံ” ရဴဝွံ မုဟိုတ် ဂွံသ္ဂးတဴဂှ်ရော? ရဴဝွံ (ဂရၚ်ပတီရ)။
ယွံသုနက္ခတ္တ တၠအဲ သ္ဂောံညာတ်ကေတ် တဳကောရက္ခတ္တိယ မဟွံဗိုက်ဗွိုက် လတက် မဒ္ဂေတ် တဴဒ္ဂေတ်ကၠဵု မထံက်ဂမာအာပန်လ္ပာ် စၞ မဖျေံစွံလဝ်ပ္ဍဲတိ မခၟက်စဒၟံၚ် နကဵုပါၚ်ဟေၚ် မစတဴ နကဵုပါၚ် ဟေၚ်ဂှ်တုဲ “ယွံမၞးတအ် ခမဳ မထံက်ဂမာအာပန်လ္ပာ် စၞ မဖျေံ စွံလဝ်ပ္ဍဲတိ မခၟက်စဒၟံၚ် နကဵုပါၚ်ဟေၚ် မစတဴ နကဵုပါၚ်ဟေၚ်ဝွံ ထေက်ကဵုထိုၚ်သး အမ်သဝ် ခိုဟ်ကွေံရသွံ” ရဴဝွံ ကသပ်ကတဵုဒှ် ဟွံသေၚ်ဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဍာံပြတဴရ။ တဳလမၞုံပိုဉ်ကျာ်တြဲ မုဟိုတ် သ္ဂောံသအေတ် သပါန်တဴ အရဟတ္တဖိုလ်ဂှ်ရော ရဴဝွံ (ဂရၚ်ပတီရ)။
ယွံတြုံမလ္ၚုသၟး (နူမဂ်ဖိုလ်) အဲဂှ် ဟွံသအေတ်သပါန်တဴ အရဟတ္တဖိုလ်ရ။ ဗွဲစၟတ်မ္ဂး ကွေတ်မိစ္ဆာမယုတ်မာဝွံ ကတဵုဒှ်ဒၟံၚ် ကုတၠအဲဟေၚ်ရ၊ သြဝ်သၠးကၠေံ ကွေတ်ဂှ်ညိ။ သြဝ်လ္ပကဵုဒှ်တဴ တၞဟ်န လလေၚ်ဖဵု တၞဟ်နဒှ်ဒဒိုခ် ဗွဲမလအ်လ ကုတၠအဲညိ။ ယွံသုနက္ခတ္တ တဳကောရက္ခတ္တိယ မဟွံဗိုက်ဗွိုက် လတက်ဝွံ “ခမဳဝွံ ထေက်ကဵုထိုၚ်သး အမ်သဝ်ခိုဟ် ကွေံရသွံ” ရဴဝွံ တၠအဲ ထေၚ်တဴရ၊ ညးဏအ်ဂှ် ပ္ဍဲမရနုက်ကဵုထပှ်တ္ၚဲတေံဂှ် ကြက်သ္ဒး ချိုတ်တဴ နကဵုယဲစၞ ဟွံလာဲရ၊ ချိုတ်တုဲမ္ဂး ကြက်ဒးအာကတဵုဒှ် အသူရိကာယ် မၞုံယၟု ကာလကဉ္စိကာ ပ္ဍဲဘုံအသူရိကာယ် မယုတ်သဝ်ရ။ ချိုတ်တုဲမ္ဂး ညးဂှ် ကြက်ကၠဟ် ထောံ ပ္ဍဲသုသာန် မၞုံကဵုဂြိုပ်ချောဲဗရံက်အိုတ်ရ။ ယွံသုနက္ခတ္တ ယဝ်တၠအဲနွံပၟိက်မ္ဂး ပြာပ်အာဇရေၚ် တဳကောရက္ခတ္တိယ မဟွံဗိုက်ဗွိုက်လတက်ဂှ်တုဲ “ယွံကောန်တၠ တဳကောရက္ခတ္တိယ ဒၞာဲဌာန်ဇကုကတဵုဒှ်ဂှ် တီတဴဟာ” ရဴဝွံ သြဝ်သၟာန်ညိ။ ယွံသုနက္ခတ္တ တဳကောရက္ခတ္တိယ မဟွံဗိုက် ဗွိုက်လတက်ဂှ် “ယွံကောန်တၠသုနက္ခတ္တ ဒၞာဲဌာန်ဇကု ကတဵုဒှှ်ဂှ် တီတဴရ၊ ကတဵုဒှ်ဒၟံၚ် အသူရိကာယ် မၞုံယၟုကာလ ကဉ္စိကာ ပ္ဍဲဘုံအသူရိကာယ် မယုတ်သဝ်ရ” ရဴဝွံ ဟိုတ်ကြက် ဒးဟီုသွဟ်ကဵုနွံရ ရဴဝွံ (သ္ဂးတဴရ)။
ယွံဘဂ္ဂဝ ပ္ဍဲကာလဂှ် ကောန်သၟိၚ်လိစ္ဆဝဳ သုနက္ခတ္တဂှ် ပြာပ်အာဇရေၚ် တဳကော ရက္ခတ္တိယ မဟွံဗိုက်ဗွိုက်လတက်ဂှ်တုဲ သ္ဂးတဴ ဂလာန်ဝွံရ “ယွံကောန်တၠကောရက္ခတ္တိယ ‘တဳကောရက္ခတ္တိယ မဟွံဗိုက်ဗွိုက်လတက်ဂှ် ပ္ဍဲမရနုက်ကဵုထပှ်တ္ၚဲတေံဂှ် ကြက်သ္ဒးချိုတ်တဴ နကဵုယဲစၞ ဟွံလာဲရ၊ ချိုတ်တုဲမ္ဂး ကြက်ဒးအာကတဵုဒှ် အသူရိကာယ် မၞုံယၟုကာလကဉ္စိကာ ပ္ဍဲဘုံအသူရိကာယ် မယုတ်သဝ်ရ။ ချိုတ်တုဲမ္ဂး ညးဂှ် ကြက်ကၠဟ်ထောံ ပ္ဍဲသုသာန် မၞုံကဵု ဂြိုပ်ချောဲဗရံက်အိုတ်ရ’ ရဴဝွံ ခမဳဂေါတမ ဟီုသ္ဂးလဝ်ရ၊ ယွံကောန်တၠ ကောရက္ခတ္တိယ ဟိုတ်ဒှ်သာ်ဂှ်ရ တၞဟ်နကဵုဂလာန်ခမဳဂေါတမ မှာရာတုဲ စိုန်သကီုကဵု ဗၞတ်ဗ္ၜတ်တုဲ သြဝ်စတဴ စၞညိ၊ စိုန်သကီုကဵုဗၞတ်ဗ္ၜတ်တုဲ သြဝ်သုၚ်တဴဍာ်ညိ” ရဴဝွံ (သ္ဂးတဴရ)။
၁။ ယွံဘဂ္ဂဝ ကြဴနူဂှ် ကောန်သၟိၚ်လိစ္ဆဝဳ သုနက္ခတ္တဂှ် ဟွံပတှ်ေကေတ် ဂလာန်အဲတုဲ မွဲတ္ၚဲ ၜါတ္ၚဲ သ္ဂးတဴ ရဴဝွံတုဲ ရိုဟ်တဴ စဵုကဵုပေၚ်ထပှ်တ္ၚဲရ။
ယွံဘဂ္ဂဝ ဗွဲစၟတ်တုန် တဳကောရက္ခတ္တိယ မဟွံဗိုက်ဗွိုက်လတက်ဂှ် ပ္ဍဲမရနုက်ကဵု ထပှ်တ္ၚဲဂှ် သ္ဒးချိုတ်အာ နကဵုယဲစၞ ဟွံလာဲရ၊ ချိုတ်တုဲမ္ဂး အာကတဵုဒှ် အသူရိကာယ် မၞုံယၟု ကာလကဉ္စိကာ ပ္ဍဲဘုံအသူရိကာယ် မယုတ်သဝ်ရ။ ချိုတ်တုဲမ္ဂး ညးဂှ် ကၠဟ်ထောံပ္ဍဲသုသာန် မၞုံကဵုဂြိုပ်ချောဲဗရံက်အိုတ်ရ။
၂။ ယွံဘဂ္ဂဝ ကောန်သၟိၚ်လိစ္ဆဝဳ သုနက္ခတ္တဂှ် “တဳကောရက္ခတ္တိယ မဟွံဗိုက်ဗွိုက် လတက်ဂှ် ချိုတ်အာ နကဵုယဲစၞ ဟွံလာဲတုဲ ကၠဟ်ထောံလဝ် ပ္ဍဲသုသာန် မၞုံကဵုဂြိုပ်ချောဲဗရံက်ရ” ရဴဝွံ ဂွံမိၚ်ကေတ်ရ။ ယွံဘဂ္ဂဝ ပ္ဍဲကာလဂှ် ကောန်သၟိၚ်လိစ္ဆဝဳ သုနက္ခတ္တဂှ် ပြာပ်အာ ဇရေၚ် တဳကောရက္ခတ္တိယ မဟွံဗိုက်ဗွိုက်လတက် ပ္ဍဲသုသာန် မၞုံကဵုဂြိုပ်ချောဲဗရံက်ဂှ်တုဲ “ယွံကောန် တၠကောရက္ခတ္တိယ ဒၞာဲဌာန်ဇကုကတဵုဒှ် တီတဴဟာ” ရဴဝွံ တက်ဒါတ် နကဵုတဲ ဗၞတ်ပိဝါတုဲ သၟာန်တဴ တဳကောရက္ခတ္တိယ မဟွံဗိုက်ဗွိုက်လတက်ရ။ ယွံဘဂ္ဂဝ ပ္ဍဲကာလဂှ် တဳကော ရက္ခတ္တိယ မဟွံဗိုက်ဗွိုက်လတက်ဂှ် သီုကဵုဇွိတ်သပေါတ်တဴ စၞိန်စး နကဵုတဲ ဒၠိုက်ကတဵုတုဲ “ယွံကောန်တၠ သုနက္ခတ္တ ဒၞာဲဌာန်ဇကုကတဵုဒှ်ဂှ် တီတဴရ၊ ကတဵုဒှ်ဒၟံၚ် အသူရိကာယ် မၞုံယၟုကာလကဉ္စိကာ ပ္ဍဲဘုံအသူရိကာယ် မယုတ်သဝ်ရ” ရဴဝွံ သ္ဂးတိုန်တုဲ ပ္ဍဲဒၞာဲဂှ်ဟေၚ် လောတ်ဒေါမ် စှေ်အာ လံက်လ္ၚာရ။
၃။ ယွံဘဂ္ဂဝ ကြဴနူဂှ် ကောန်သၟိၚ်လိစ္ဆဝဳ သုနက္ခတ္တဂှ် ပ္ၚောံပြာပ်ကၠုၚ် ဇရေၚ်အဲ လ္ၚောဝ်သ္ပဝတ်ကဵုအဲတုဲ ဂဇအ်တဴ ပ္ဍဲဌာန်မဗဗွဲမွဲဒၞာဲရ။ ယွံဘဂ္ဂဝ ကုကောန်သၟိၚ်လိစ္ဆဝဳ သုနက္ခတ္တ မဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲဂှ် အဲသ္ဂးတဴ ဂလာန်ဝွံရ--
“ယွံသုနက္ခတ္တ အရာဝွံဂှ် ပသာ်သမ္တီ ထေၚ်တဴဂှ်ရော၊ သ္ပဟိုတ်ကဵု တဳကောရက္ခ တ္တိယ မဟွံဗိုက်ဗွိုက်လတက်တုဲ အတိုၚ်အဲဟီုသ္ဂးလဝ်ဂှ် ဖဵုဂလာန်ဂှ် ဒှ်တဴဟာ၊ ဟွံသေၚ်မ္ဂးဒှ်တဴ နနယ်မွဲ သအာၚ်ဟာ” ရဴဝွံ (သ္ဂးတဴရ)။ ယွံတဳလမၞုံပိုဉ်ကျာ်တြဲ သ္ပဟိုတ်ကဵုတဳကောရက္ခတ္တိယ မဟွံဗိုက်ဗွိုက် လတက်တုဲ အတိုၚ်တဳလမၞုံပိုဉ်ကျာ်တြဲ ဟီုသ္ဂးလဝ်ဂှ် ဖဵုဂလာန်ဂှ်ဒှ်တဴရ၊ ဟွံဒှ်တဴ နနယ်မွဲသအာၚ်ရ ရဴဝွံ (ဂရၚ်ပတီရ)။
ယွံသုနက္ခတ္တ အရာဝွံဂှ် ပသာ်သမ္တီ ထေၚ်တဴဂှ်ရော၊ ဒှ်တဴသာ်ဂှ်မ္ဂး ဣဒ္ဓိပါဋိဟာ မပြဲလောန် နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် စၞောန်ထ္ၜးကဵုမ္ဂးဟာ၊ ဟွံစၞောန် ထ္ၜးကဵုမ္ဂးဟာ ရဴဝွံ (သ္ဂးတဴရ)။ ယွံတဳလမၞုံပိုဉ်ကျာ်တြဲ ဒှ်တဴသာ်ဝွံမ္ဂး ဣဒ္ဓိပါဋိဟာ မပြဲ လောန်နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် ဗွဲစၟတ်စၞောန်ထ္ၜးကဵုမ္ဂးရ၊ ဟွံစၞောန် ထ္ၜးကဵု ဟွံသေၚ်မ္ဂးရ ရဴဝွံ (ဂရၚ်ပတီရ)။
ယွံတြုံမလ္ၚုသၟး (နူမဂ်ဖိုလ်) အဲမစၞောန်ထ္ၜးကဵု ဣဒ္ဓိပါဋိဟာ မပြဲလောန်နူဓရ်ကုသလ ကမ္မပထ စှ်သာ် မဒှ်ဂြပ်မၞိဟ်တအ် ရဴဝွံဂှ် “ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် ဟွံစၞောန်ထ္ၜးကဵုဣဒ္ဓိပါဋိဟာ မပြဲလောန်နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ် ကုအဲဍိက်ရ” ရဴဝွံ တၠအဲ သ္ဂးတဴဏီရ။ ယွံတြုံမလ္ၚုသၟး (နူမဂ်ဖိုလ်) တၠအဲ ဗၞတ်ၜိုတ်လဵု ကလိလောန်လုတ်မှာဒုဟ်ဂှ် သြဝ်မၠာ်သ္ၚေဝ်ရံၚ်ကေတ်ညိ ရဴဝွံ (သ္ဂးတဴရ)။
ယွံဘဂ္ဂဝ ရဴသာ်ဝွံဟေၚ် ၜိုန်အဲဟီုကီုလေဝ် ညးမထေက်ကဵုအာ အပါယ် နရက်ဂှ် ညံၚ်ရဴ ပါဲစ္ဍး အာကီု ကောန်သၟိၚ်လိစ္ဆဝဳ သုနက္ခတ္တဝွံ ပါဲစ္ဍးအာ နူသာသနာဝွံဟေၚ်ရ။
ဝတ္ထု တဳကဠာရမဋ္ဋက
၄။ ယွံဘဂ္ဂဝ အဲဂှ် ပ္ဍဲကာလမွဲအခိၚ် သ္ပဒတဴတန်တဴဒၟံၚ် ပ္ဍဲဘာပြာသာဒ်မၞုံကဵု အထောဋ်ကအ်ကၠတ် ဂြိုပ်မဟာဝိုန် ဇရေၚ်ဍုၚ်ဝေသာလဳရ။ ပ္ဍဲအခါကာလဂှ် တဳကဠာရ မဋ္ဋက မဟွံဗိုက်ဗွိုက်လတက်ဂှ် ပ္ဍဲကွာန်သၟိၚ်ဝဇ္ဇဳ ဍုၚ်ဝေသာလဳတအ်ဂှ် အာစိုပ်ကၞောတ် အထောဋ် ပွမလာဘ်ဂၠိုၚ် ပွမသကအ်တွဳဝါရ ဂၠိုၚ်တုဲ ပဒတဴဒၟံၚ်ရ။ ညးဂှ် ဒဂိုန်ဒ္ဂေတ်တဴ ဒ္ဂေတ်ဝတ်ဂမၠိုၚ် ထပှ်သာ်ရ။
(၁) စဵုကဵုလအိတ်လမျီု ကြက်ဒှ်တဴ ညးဟွံဗိုက်ဗွိုက်လတက်ရ၊ ကြက်ဟွံဗိုက်ဗွိုက် လတက်ရ။
(၂) စဵုကဵုလအိတ်လမျီု ကြက်ဒှ်တဴ ညးဒ္ဂေတ်တဴ ဒ္ဂေတ်မပြဲရ၊ ကြက်ဟွံသိပ်ဂၠိပ် ဒ္ဂေတ်မေထုန်ရ။
(၃) စဵုကဵုလအိတ်လမျီု ကြက်ယိုပ်ယာပ်တဴ နကဵုသုရာ ဖျုန်တအ်ဟေၚ်ရ။ ကြက်ဟွံ စတဴပုၚ် ကွာၚ်ရ။
(၄) ကလိလောန်အာ ဥဒေနစေတဳ (သ္ၚိဗယိ) ဒိုဟ်ဗၟံက် ဍုၚ်ဝေသာလဳတုဲ ကြက်ဟွံ အာရ။
(၅) ကလိလောန်အာ ဂေါတမကစေတဳ(သ္ၚိဗယိ) ဒိုဟ်သၠုၚ်ကျာ ဍုၚ်ဝေသာလဳတုဲ ကြက်ဟွံ အာရ။
(၆) ကလိလောန်အာ သတ္တမ္ဗစေတဳ (သ္ၚိဗယိ) ဒိုဟ်ပလိုတ် ဍုၚ်ဝေသာလဳတုဲ ကြက်ဟွံအာရ။
(၇) ကလိလောန်အာ ဗဟုပုတ္တစေတဳ (သ္ၚိဗယိ) ဒိုဟ်သၟဝ်ကျာ ဍုၚ်ဝေသာလဳတုဲ ကြက်ဟွံအာရ၊ ရဴဝွံ (ဒဂိုန်ဒ္ဂေတ်တဴရ)။
ညးဂှ် ဟိုတ်နူဒဂိုန်ဒ္ဂေတ်တဴ ဒ္ဂေတ်ဝတ်ထပှ်သာ်ဂမၠိုၚ်ဝွံဂှ်ရ ပ္ဍဲကွာန်သၟိၚ်ဝဇ္ဇဳတအ်ဂှ် အာစိုပ် ကၞောတ်အထောဋ် ပွမလာဘ်ဂၠိုၚ် ပွမသကအ်တွဳဝါရဂၠိုၚ်တုဲ ပဒတဴဒၟံၚ်ရ။
၅။ ယွံဘဂ္ဂဝ ပ္ဍဲကာလဂှ် ကောန်သၟိၚ်လိစ္ဆဝဳ သုနက္ခတ္တဂှ် ပြာပ်အာဇရေၚ် တဳကဠာရမဋ္ဋက မဟွံဗိုက်ဗွိုက် လတက်ဂှ်တုဲ သၟာန်တဴဂလာန်ပြဒ္ဒညာ ကုတဳကဠာရမဋ္ဋက မဟွံဗိုက်ဗွိုက်လတက်ရ။
သုနက္ခတ္တဂှ် သၟာန်တဴမ္ဂး တဳကဠာရမဋ္ဋက မဟွံဗိုက်ဗွိုက်လတက်ဂှ် သွဟ်တဴ ပြဒ္ဒညာဂှ် ဟွံမာန်ရ။ ဟိုတ်မသွဟ်ဟွံမာန်ဂှ်ရ သ္ပပြာကဋ်တဴ ပွမထေဲပၞတ် ပွမစိုတ်လီု ပွမဟွံသ္ဍိုက်မၠိုက်ရ။
ယွံဘဂ္ဂဝ ပ္ဍဲကာလဂှ် ကသပ်ဒှ်တိုန် ကုကောန်သၟိၚ်လိစ္ဆဝဳ သုနက္ခတ္တဂှ် ရဴဝွံရ-- “ယွံမၞးတအ် ထ္ဍိမြိဒးအာ တၠအရှန် မထေက်ကဵုထိုၚ်သး အမ်သဝ်ခိုဟ်ဆာဲဂှ်ရသွံ၊ သြဝ်လ္ပကဵုဒှ်တဴ တၞဟ်နလလေၚ်ဖဵု တၞဟ်နဒှ်ဒဒိုခ် ဗွဲမလအ်လ ကုပိုဲညးဂမၠိုၚ်ညိ” ရဴဝွံ (ကသပ်ဒှ်တိုန်ရ )။
၆။ ယွံဘဂ္ဂဝ ကြဴနူဂှ် ကောန်သၟိၚ်လိစ္ဆဝဳ သုနက္ခတ္တဂှ် ပ္ၚောံပြာပ်ကၠုၚ် ဇရေၚ်အဲ လ္ၚောဝ်သ္ပဝတ် ကဵုအဲတုဲ ဂဇအ်တဴ ပ္ဍဲဌာန်မဗဗွဲမွဲဒၞာဲရ။ ယွံဘဂ္ဂဝ ကုကောန်သၟိၚ်လိစ္ဆဝဳ သုနက္ခတ္တ မဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲဂှ် အဲသ္ဂးတဴ ဂလာန်ဝွံရ။ “ယွံတြုံမလ္ၚုသၟး (နူမဂ်ဖိုလ်) တၠအဲ ဒုၚ်ဝန်တဴ ရဴဝွံမ္ဂး ခမဳကွးကျာ် ကောန်သၟိၚ် သာကျဝၚ်ရသွံ” ရဴဝွံ (သ္ဂးတဴရ )။
ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် “ယွံတြုံမလ္ၚုသၟး (နူမဂ်ဖိုလ်) တၠအဲ ဒုၚ်ဝန်တဴ ရဴဝွံမ္ဂး ခမဳကွးကျာ် ကောန်သၟိၚ်သာကျဝၚ်ရသွံ” ရဴဝွံ မုဟိုတ်ဂွံ သ္ဂးတဴဂှ်ရော ရဴဝွံ (ဂရၚ်ပတီရ)။
ယွံသုနက္ခတ္တ တၠအဲဂှ် ပြာပ်အာဇရေၚ် တဳကဠာရမဋ္ဋက မဟွံဗိုက်ဗွိုက်လတက်တုဲ သၟာန်တဴ ပြဒ္ဒညာရ၊ တၠအဲ သၟာန်တဴမ္ဂး တဳကဠာရမဋ္ဋက မဟွံဗိုက်ဗွိုက်လတက်ဂှ် သွဟ်ကဵု ပြဒ္ဒညာဂှ် ဟွံမာန်ရ၊ ဟိုတ်မသွဟ်ဟွံမာန်ဂှ်ရ သ္ပပြာကဋ်တဴ ပွမထေဲပၞတ် ပွမစိုတ်လီု ပွမဟွံသ္ဍိုက်မၠိုက် ဟွံသေၚ်ဟာ၊ သအာၚ်နူဂှ် “ယွံမၞးတအ် ထ္ဍိမြိဒးအာ တၠအရှန် မထေက် ကဵုထိုၚ်သး အမ်သဝ်ခိုဟ်ဆာဲဂှ်ရသွံ၊ သြဝ်လ္ပကဵုဒှ်တဴ တၞဟ်နလလေၚ်ဖဵု တၞဟ်နဒှ်ဒဒိုခ် ဗွဲမ လအ်လ ကုပိုဲညးဂမၠိုၚ်ညိ” ရဴဝွံ ကသပ်ဒှ်တိုန် ကုတၠအဲ ဟွံသေၚ်ဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဍာံပြတဴရ။ တဳလမၞုံပိုဉ်ကျာ်တြဲဂှ် မုဟိုတ် သ္ဂောံသအေတ် သပါန်တဴ အရဟတ္တဖိုလ်ဂှ်ရော ရဴဝွံ (ဂရၚ်ပတီရ)။
ယွံတြုံမလ္ၚုသၟး (နူမဂ်ဖိုလ်) အဲဂှ် ဟွံသအေတ်သပါန်တဴ အရဟတ္တဖိုလ်ရ၊ ဗွဲစၟတ်မ္ဂး ကွေတ်မိစ္ဆာ မယုတ်မာဝွံ ကတဵုဒှ်ဒၟံၚ် ကုတၠအဲဟေၚ်ရ၊ သြဝ်သၠးကၠေံ ကွေတ်ဂှ်ညိ။ သြဝ်လ္ပ ကဵုဒှ်တဴ တၞဟ်နလလေၚ်ဖဵု တၞဟ်နဒှ်ဒဒိုခ် ဗွဲမလအ်လ ကုတၠအဲညိ။ ယွံသုနက္ခတ္တ တဳကဠာရမဋ္ဋက မဟွံဗိုက်ဗွိုက်လတက်ဝွံ “ခမဳဝွံ ထေက်ကဵုထိုၚ်သး အမ်သဝ်ခိုဟ်ကွေံ ရသွံ” ရဴဝွံ တၠအဲ ထေၚ်တဴရ၊ ညးဏအ်ဂှ် ခြာဟွံလအ်ဟေၚ် ဗိုက်တဴဗွိုက်လတက် ခရှ် ဂေတ်ဂ္ၚေၚ် မွဲဟာန်ကေုာံသမ္ဘာ စတဴပုၚ် ကွာၚ်တုဲ စေတဳသ္ၚိဗယိဂမၠိုၚ် မၞုံပ္ဍဲဍုၚ်ဝေသာလဳ အိုဿီုဂှ် ကလိလောန်အာတုဲ သီုကဵုသကအ်တွဳဝါရဟုတ်ယုတ်ဂှ် ကြက်သ္ဒးချိုတ်ရ ရဴဝွံ (အဲသ္ဂးရ)။
ယွံဘဂ္ဂဝ ကြဴနူဂှ် ခြာဟွံလအ်ဟေၚ် တဳကဠာရမဋ္ဋက မဟွံဗိုက်ဗွိုက်လတက်ဂှ် ဗိုက်လတက်တဴ ဗွိုက်လတက်ခရှ်တုဲ ဂေတ်ဂ္ၚေၚ်တဴ မွဲဟာန်ကေုာံသမ္ဘာ စတဴပုၚ် ကွာၚ်တုဲ စေတဳသ္ၚိဗယိဂမၠိုၚ် မၞုံပ္ဍဲ ဍုၚ်ဝေသာလဳအိုဿီုဂှ် ကလိလောန်အာတုဲ သီုကဵုသကအ်တွဳဝါရ ဟုတ်ယုတ်ဂှ် သ္ဒးချိုတ်အာရ။
၇။ ယွံဘဂ္ဂဝ ကောန်သၟိၚ်လိစ္ဆဝဳ သုနက္ခတ္တဂှ် “တဳကဠာရမဋ္ဋက မဟွံဗိုက်ဗွိုက် လတက်ဂှ် ဗိုက်လတက်တဴ ဗွိုက်လတက်ခရှ်တုဲ ဂေတ်ဂ္ၚေၚ်တဴ မွဲဟာန်ကေုာံသမ္ဘာ စတဴပုၚ် ကွာၚ်တုဲ စေတဳသ္ၚိဗယိဂမၠိုၚ် မၞုံပ္ဍဲ ဍုၚ်ဝေသာလဳအိုဿီုဂှ် ကလိလောန်အာတုဲ သီုကဵုသကအ် တွဳဝါရဟုတ်ယုတ်ဂှ် သ္ဒးချိုတ်အာရဂး” ရဴဝွံ ဂွံမိၚ်ကေတ်ရ။ ယွံဘဂ္ဂဝ ပ္ဍဲကာလဂှ် ကောန်သၟိၚ် လိစ္ဆဝဳ သုနက္ခတ္တဂှ် ပ္ၚောံပြာပ်ကၠုၚ်ဇရေၚ်အဲ လ္ၚောဝ်သ္ပ ဝတ်ကဵုအဲတုဲ ဂဇအ်တဴ ပ္ဍဲဌာန်မဗဗွဲမွဲဒၞာဲရ။ ယွံဘဂ္ဂဝ ကုကောန်သၟိၚ်လိစ္ဆဝဳ သုနက္ခတ္တ မဂဇအ်ဒၟံၚ် ပ္ဍဲဌာန်မဗဗွဲမွဲဒၞာဲဂှ် အဲသ္ဂးတဴဂလာန်ဝွံရ။”ယွံသုနက္ခတ္တ အရာဝွံဂှ် ပသာ်သမ္တီ ထေၚ်တဴဂှ်ရော၊ သ္ပဟိုတ်ကဵု တဳကဠာရမဋ္ဋက မဟွံဗိုက်ဗွိုက်လတက်တုဲ အတိုၚ်အဲဟီုသ္ဂးလဝ်ဂှ် ဖဵုဂလာန်ဂှ် ဒှ်တဴဟာ၊ ဟွံသေၚ်မ္ဂး ဒှ်တဴ နနယ်မွဲသအာၚ်ဟာ” ရဴဝွံ (သ္ဂးတဴရ)။ ယွံတဳလမၞုံပိုဉ်ကျာ်တြဲ သ္ပဟိုတ်ကဵု တဳကဠာရမဋ္ဋက မဟွံ ဗိုက်ဗွိုက်လတက်တုဲ အတိုၚ်တဳလမၞုံပိုဉ်ကျာ်တြဲ ဟီုသ္ဂးလဝ်ဂှ် ဖဵုဂလာန်ဂှ် ဒှ်တဴရ ဟွံဒှ်တဴ နနယ်မွဲ သအာၚ်ရ ရဴဝွံ (ဂရၚ်ပတီရ )။
ယွံသုနက္ခတ္တ အရာဝွံဂှ် ပသာ်သမ္တီ ထေၚ်တဴဂှ်ရော၊ ဒှ်တဴသာ်ဂှ်မ္ဂး ဣဒ္ဓိပါဋိဟာ မပြဲလောန် နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် စၞောန်ထ္ၜးကဵုမ္ဂးဟာ၊ ဟွံစၞောန်ထ္ၜးကဵုမ္ဂးဟာ ရဴဝွံ (သ္ဂးတဴရ) ။ ယွံတဳလမၞုံပိုဉ်ကျာ်တြဲ ဒှ်တဴသာ်ဝွံမ္ဂး ဣဒ္ဓိပါဋိဟာ မပြဲလောန် နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် ဗွဲစၟတ် စၞောန်ထ္ၜးကဵုမ္ဂးရ၊ ဟွံစၞောန်ထ္ၜးကဵု ဟွံသေၚ်မ္ဂးရ ရဴဝွံ (ဂရၚ်ပတီရ )။
ယွံတြုံမလ္ၚုသၟး (နူမဂ်ဖိုလ်) အဲမစၞောန်ထ္ၜးကဵု ဣဒ္ဓိပါဋိဟာ မပြဲလောန်နူဓရ်ကုသလ ကမ္မပထ စှ်သာ် မဒှ်ဂြပ်မၞိဟ်တအ် ရဴဝွံဂှ် “ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် ဟွံစၞောန်ထ္ၜးကဵု ဣဒ္ဓိပါဋိဟာ မပြဲလောန်နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ် ကုအဲဍိက်ရ” ရဴဝွံ တၠအဲ သ္ဂးတဴဏီရ။ ယွံတြုံမလ္ၚုသၟး (နူမဂ်ဖိုလ်) တၠအဲ ဗၞတ်ၜိုတ်လဵု ကလိလောန်လုတ်မှာဒုဟ်ဂှ် သြဝ်မၠာ်သ္ၚေဝ်ရံၚ်ကေတ်ညိ ရဴဝွံ (သ္ဂးတဴရ )။
ယွံဘဂ္ဂဝ ရဴသာ်ဝွံဟေၚ် ၜိုန်အဲဟီုကီုလေဝ် ညးမထေက်ကဵုအာ အပါယ် နရက်ဂှ် ညံၚ်ရဴပါဲစ္ဍးအာကီု ကောန်သၟိၚ်လိစ္ဆဝဳ သုနကတ္တဝွံ ပါဲစ္ဍးအာနူသာသနာဝွံဟေၚ်ရ။