က္ဍိုပ်သ္ကိုပ်ကၟိန်ဍုၚ်
က္ဍိုပ်သ္ကိုပ်ကၟိန်ဍုၚ်
ဂကောံလဵုမွဲဟွံဟီု က္ဍိုပ်သ္ကိုပ်ကဵုကောန်ရဲဗက်လက္ကရဴ နွံတွဵုရ။ကၟိန်ဍုၚ် ဒက်ပ္တန်လဝ် နကဵုဂကောံမၞိဟ်ဂမၠိုၚ်လေဝ် က္ဍိုပ်သ္ကိုပ်ညးမကေတ်တာလျိုၚ် သွက်ဂွံသောၚ်ကလးဆိုက်ဗ္ဒက် အရာကိစ္စကောန်ညးဍုၚ်ကွာန်တံလေဝ် နွံကၠုၚ်ဒၟံၚ်တွဵုကီုရ။ ကၟိန်ဍုၚ်လ္ၚဵုဂှ် နကဵုက္ဍိုပ်သ္ကိုပ်မၞိဟ်မွဲဓဝ် ကေတ်တာလျိုၚ်အုပ်ဓုပ်တဴတုဲ ကၟိန်ဍုၚ်လ္ၚဵုဂှ် နကဵုသၞောတ်ဂကောံ ပံၚ်ကောံညးသ္ကံတုဲ အုပ်ဓုပ်တဴအိုတ်ရ။ သၞောတ်အုပ်ဓုပ်လဵုမွဲဟွံဟီု ယဝ်ရသ္ကိုပ်ကၟိန်ဍုၚ်ဂှ် ဍိုက်ပေၚ်တဴမံၚ်ကဵုပရေၚ်အသဝ်ဂုဏ် ပွမၜိုန်သ္ကီု ကဵုပရေၚ်ပွမကေက်သကာတုဲ သွက်ကၟိန်ဍုၚ် ဂွံတဴတက်ဖောအ်ဗြေဝ်ဂှ် လွဳသၠဲပ္တိတ် မာန်မ္ဂး အလံၚ်သ္ကိုပ်သာ်တံမာန်ဂှ် ဒှ်တာလျိုၚ်ကောန်ညးဍုၚ်တံရ။ ဂွံရုဲပ္တိုန်က္ဍိုပ်သ္ကိုပ်သာ်တံဂှ်လေဝ် ကောန်ညးဍုၚ်တံ ဒးတီကၠိုဟ်ကေတ်လဝ် လ္တူအသဝ်ဂုဏ်အစောန်စရာဲကုပူဂဵုမာန်ကီုတုဲ ပရေၚ်လညာတ်ပါ်ပဲါလ္တူပူဂဵုဂှ်လေဝ် ဒးနွံလဝ်ထေက်ကီုရ။က္ဍိုပ်သ္ကိုပ်ညးမဒုၚ်ဂိလ္တူကၟိန်ဍုၚ်ဇကု၊ လ္တူဂကူဇကုကေုာံညးမၞုံတဴကဵုစိုတ်ဓါတ်ကၠောန်ဒတုဲဖဵုလ္တူဂကူဇကု သ္ဒးဒှ်ရ။ ရုဲသ္ကိုပ်ပရေၚ်အိန်ထံၚ်ဗၠေတ်အာဂှ် ဆအယာံမာတ်ဂကောံမၞိဟ်မွဲသ္ၚိဓဝ်ဟေၚ် ဒှ်ဒဒိုက်မာန်တုဲ ရုဲသ္ကိုပ်ကၟိန်ဍုၚ်ဗၠေတ်အာမ္ဂး အလုံဂကောံကၟိန်ဍုၚ်မွဲ ကဵုဂကူဇကုမွဲ မ္ဒးအာစိုပ်ဒဒိုက်လလေၚ်ဖဵုမာန်ရ။
သ္ကိုပ်ကၟိန်ဍုၚ်မ္ဂး ဒှ်သာ်လဵုရော။ သၠုဲသၠိုက်ဂၠိုၚ်တုဲ ရုဲပ္တိုန်ထေက်ဟာ မဗဳဇသၠုၚ်ပြဲတုဲ ရုဲထေက်ဟာ၊ ဂွံလဝ်တဆိပ်ကြာအံၚ်လဝ် ပါရဂူတုဲ ရုဲထေက်ဟာ၊ အစောန်စရာဲအသဝ်ဂုဏ် ပွမစိုန်သ္ကီုတဴ ပ္ဍဲအရာကွတ် က္ဍိုပ်သ္ကိုပ်တုဲ ရုဲပ္တိုန်ထေက်ဟာ?။
လဂွံကဵုယေန်သၞာၚ်အလေံအထ ကၟိန်ဍုၚ်ဂကူပိုဲမ္ဂး အဂႅလက္ချန် သ္ကိုပ်နာယက သ္ပဇၞော်ညးဂှ် နွံဒၟံၚ်တြဴသာ်ရ။ ပွမနွံတဴကဵုဇဲဝဳရိယ၊ ပွမနွံတဴကဵုဓရ်တ္ၚအ်သာဍာ၊ ပွမနွံတဴကဵုဓရ်ဆာန်ဍူမတွံဂး ကာရုဏာ၊ ပွမနွံတဴကဵုဓရ်လအေၚ်ဒုၚ်၊ ပွမနွံတဴကဵုဓရ်ပါ်ပဲါ ကေုာံပွမနွံတဴကဵုဓရ်ဂမြၚ်ညာဏ်တံမဒှ်ရ။ သအာၚ်နူဂှ်ပၠန် သၟိၚ်ဒးနွံတဴကဵုဓရ်ဂမြၚ်ညာဏ်တံမဒှ်ရ။ သအာၚ်နူဂှ်ပၠန် သၟိၚ်ဒးနွံတဴကဵုဓရ်စှ်ဟီုဂှ် ပွမကဵုဒါန်၊ မၚ်မွဲဓရ်သဳလ၊ သၠးကဵုဒြပ်၊ မၞုံကဵုဂလာန်မဍိုန်ၜတ်ဇိပ်ဂၠိပ်၊ မၚ်သဳဥပုဟ်၊ ဖအောန်ဓရ်ဒေါသ၊ စးကဵုညးဍုၚ်ကွာန်ဟွံဂွံ၊ ဍဵုဍိုက်ညးဍုၚ်ကွာန်ဟွံဂွံ၊ နွံကဵုဓရ်လအေၚ်ဒုၚ်၊ ဒ္ဂေတ်ဝတ်တပ်တးတံမဒှ်ရ။ ဣဝွံ မထ္ၜးလဝ်ဏံဂှ် ၜိုန်ရဟွံဂတာပ်ခေတ် ဒှ်မေတ်တြေံနူလက်ထက်ပဒေသရးတေံကီုဂှ်လေဝ် သ္ၚဳရံၚ်ကေတ်ရှ်သာဍေံမ္ဂး တၚ်ထေက်ကဵုသ္ဒးတၞီဗၠိုက်အာဟွံဂွံဂှ် နွံဒၟံၚ်တၟာဂလိုၚ်ရ။
အဂႅလက္ချန် ထေက်ကဵုဒှ်က္ဍိုပ်သ္ကိုပ် အာက္ဍိုပ်ကၟိန်ဍုၚ်ဟီုဂှ် သ္ၚဳရံၚ်ကေတ်နကဵုဓမ္မဓိဌာနစှ်ေစှ်ေမ္ဂး ဒှ်ကဏ္ဍအသဝ်ဂုဏ်,ပွမစိုန်သ္ကီု ကဵုအစောန်စရာဲဒ္ဂေတ်ဝတ်သိက္ခာ သ္ဂးတဴမာန်ရ။ အသဝ်ဂုဏ်ပွမစိုန်သ္ကီုမ္ဂးဂှ် ဒှ်အရာပွမပ္တိတ်ဒြဟတ် ဂၠာဲသ္ၚဳကတ်ဗတောန် ပကောံပကေဝ်ကေတ်လဝ်တုဲ အစောန်စရာဲကဵုဒ္ဂေတ်ဝတ် သိက္ခာဟီုဂှ် ဒှ်ဗဳဇမဍတ်ပါ်ကၠုၚ်နူဂဝ်ကဵုလွဳၜံၚ်ကတဵုဒှ်ကၠုၚ် နူဗွဳဗၠိုၚ်သ္ဂးတဴရ။
ကဏ္ဍအသဝ်ဂုဏ်မစိုမ်သ္ကီု နဒဒှ်က္ဍိုပ်သ္ကိုပ်ခိုဟ်ဟီုဂှ် လေပ်ပညာ၊ ဍိုက်ပေၚ်ကဵုလမိၚ်လညာတ်ဗဟုသုတ၊ဟီုတွံခိုဟ် စန်ဒက်တံၚ်ဂြဲညးဍုၚ်ကွာန်တံမာန်သ္ဂးရ။ကဏ္ဍအစောန်စရာဲကဵုဝတ်သိက္ခာဟီုဂှ် စွံစိုတ်လ္ဂူတပ်တး ဒေါသမာန်မာနအောန် ဓရ်အတ္တကဵု ဓရ်ဗက်စအဂတိဟွံမွဲ၊ စေတနာသၠဲလး လ္တူကၟိန်ဍုၚ်လ္တူကောန်ဂကူ ကေုာံလွဳပရာထိၚ်ဒက်အာ နကဵုစိုတ်ပရဲမပြဲ ဓရ်ပတှ်ေခိုၚ်ဗိုန် ဟွံဆုတ်ဟွံယှအ် မၞုံတဴကဵုဍာ်သ္ကေဝ်ဗု၊တ္တိ၊အရာကိစ္စလဵုမွဲဟွံဟီု သ္ဂုတ်သွာတ်တဴနကဵုဓရ်ဍာ်ပလာဲ ပွမပါ်ပဲါ ပ္ဍဲအရာစၚ်ခြၚ် ဟိုတ်ကဵုဖဵု ကေုာံမၞုံတဴကဵုဓရ်ဆဵုဂဗ ကြံၚ်ၚ်တံသ္ဂးတဴရ။
သ္ကိုပ်ကၟိန်ဍုၚ်မွဲ သ္ကေက်သ္ကာဍိုက်ပေၚ်တဴကဵု အသဝ်ဂုဏ်တှ်ေ ဒှ်မၞိဟ်တဲလ္တူ စိုန်သ္ကီုမွဲသ္ဂးစမာန်ရတုဲ ဍိုက်ပေၚ်တဴကဵုအစောန်စရာဲ ကေုာံဝတ်သိက္ခာမ္ဂး မၞိဟ်ခိုဟ်ပြဲမွဲ စၟတ်စဂွံရ။ က္ဍိုပ်သ္ကိုပ်ကၟိန်ဍုၚ်မွဲ ဒှ်မၞိဟ်တဲလ္တူ စိုန်သ္ကီုမွဲတုဲ ဟွံခိုဟ်ပြဲပုဟ်မ္ဂး ကၟိန်ဍုၚ်ဂိဓဇေတ်တုဲ ကောန်ဍုၚ်ကွာန် ဂကူဇကုတံဂှ်လေဝ် အာစိုပ်ဒဒိုက် ဇၞော်ကဵုဒြဟတ်ရ။ ခိုဟ်ပြဲတုဲ ဟွံစိုန်သ္ကီုပၠန်ဂှ်လေဝ် ကၟိန်ဍုၚ်ကောန်ဂကူဓရံက်ဓရာ်ရ။ ဒှ်သာ်ဂှ်ရ ခိုဟ်လေဝ်ခိုဟ်ပြဲ စိုန်သ္ကီုလေဝ်စိုန်သ္ကီုသ္ဒးဒှ်ရ။ လောကလ္တူဗလးမုက်ဂၠးကဝ်ဝွံ မၞိဟ်စိုန်သ္ကီုတံ ၜိုန်ဂၠိုၚ်မံၚ်ကီုလေဝ် မၞိဟ်ခိုဟ်ပြဲ စေတနာသၠဲတံဂှ် အောန်လောန်ဇြိုၚ်ဂွံဂၠဲါဆဵုရ။မၞိဟ်ဍိုက်ပေၚ်တဴကဵုအသဝ်ဂုဏ် ကေုာံအစောန်စရာဲတံဂှ်လေဝ် ပဵုတုဲဇြိုၚ်ဂွံဆဵုပၠန်ရ။ ဟိုတ်ဒှ်သာ်ဂှ်ရ သ္ကိုပ်ကၟိန်ဍုၚ်မွဲဟွဲဟီုဂှ် ထေက်ကဵု ဒးဍိုက်ပေၚ်တဴကဵု အစောန်စရာဲကေုာံ အသဝ်ဂုဏ် ပ္ဍဲအရာပွမအုပ်ဓုပ်ပိုၚ်ပြဳရ။
သ္ကေက်သ္ကာဍိုက်ပေၚ်ကၠုၚ်ကဵုအသဝ်ဂုဏ်တုဲဂှ် အာက္ဍိုပ်ကၟိန်ဍုၚ်မာန်ရဟွံသေၚ်ဏီ။ လေပ်ကေက်သ္ကာ ပရေၚ်ပညာဂှ် ကတဵုဒှ်အ္စာပါရဂူမာန်ကီုလေဝ် လ္ပါ်ပရေၚ်ဍုၚ်ကွာန်၊ အာက္ဍိုပ်ကၟိန်ဍုၚ်ဂှ် ဘာသာဂမၠိုၚ်နာနာ ဒးလ္ၚတ်ကေမ်ဇျာပ်သရုပ်တီကေတ်မာန်တုဲ ဗဟုသုတဂၠိုၚ်မိၚ်ဂၠိုၚ်ညာတ် ကြံၚ်ၚ်မွဲဂှ်လေဝ် သ္ဒးဒှ်ရ။ဇၟာပ်ဗဟုသုတကြံၚ်၊ ဇၟာပ်ကေမ်ဇျာပ်သရုပ်တီကေတ်လဝ် ပညာဘာသာ နာနာတံဂှ်လေဝ် ဗွဲစၟတ်လ္ပါ်အစောန်စရာဲဂွံအာက္ဍိုပ်ကၟိန်ဍုၚ်ဂှ် နွံဟွံမွဲ၊ မာန်ဟွံမာန်ဂှ် ပၟိက်နွံပၠန်ရ။ မုဟိုတ်ရောဟီုတှ်ေ ဆဵုဂဗလဝ် ပ္ဍဲလိက်ကဵုဒးကလေၚ်ဆဵုဂဗ နကဵုကမၠောန်ဂှ် ဟွံတုပ်ညးသ္ကံရ။ စမပ္တံကဵုကမၠောန်သာမည ၜိၚ်ဍာ်ဓဝ်ရဂှ်လေဝ် ယဝ်ရအကေၚ်ၜိၚ်လဝ်ဟွံမွဲမ္ဂး ၜိုန်ရကတ်ဗှ်လဝ်လိက် ပရောၜိၚ်ဍာ်မွဲအုပ် ဂွံလဝ်ပါၚ်တိုက်ကီုဂှ်လေဝ် ၜိၚ်ဍာ်လေပ်သ္ဂးတဴဟွံဂွံရ။ ဒှ်သာ်ဂှ်ရဗီုသဘဴဍေံကဵုပရေၚ်ဒးကၠောန်ဍေံဟွံတုပ်ညးသ္ကံဂှ် ပရေၚ်ဆဵုဂဗပ္ဍဲလိက်ကဵု ပရေၚ်ဆဵုဂဗနတဲနဇိုၚ်ဟွံတုပ်ညးသ္ကံကီုရ အာက္ဍိုပ်ကၟိန်ဍုၚ်မ္ဂး သ္ဒးနွံတဴကဵုဓရ်ဂမြၚ်ဥာဏ် ဓရ်စဳရေၚ်ပြုပြေၚ်ဓရ်စၚ်ခြၚ်ဟိုတ်ဖဵုကေုာံမ္ဒးတီလဝ် သဘဴကမၠောန် ကဵုရုပ်ကမၠောန်သီုၜါလ္ပါ်မ္ဒးဒှ်ရ။
သ္ကိုပ်ကၟိန်ဍုၚ်မွဲမွဲ ထေက်ကဵုဒးတီ ဆဵုဂဗကၠိုဟ်ခၠၚ်လဝ် ပရေၚ်နာနာဂလိုၚ်လဵုရော ဟီုတှ်ေ ပ္ဍဲကဵုစက်ယန္တရာ ဂကောံအလဵုအသဳဘမဂေတ်ထုဲဒၟံၚ်ကဵုပရေၚ်ကမၠောန်မပ္တံကဵု ဌာနခၞံဥပဒေ၊ ဌာနအုပ်ဓုပ်၊ ဌာနဒုၚ်စဳရေၚ်တံဒၟံၚ်တဴရ။ ဌာနဥပေဒမ္ဂး ခၞံဥပဒေ၊ ကလေၚ်ပလေဝ်သဇိုၚ်ဥပဒေ၊ မဓဇက်လဝ်မူတြေံ၊ တၚ်ဍေံတြေံ ခေတ်ဍေံတြေံအာတံဂှ် ကလေၚ်ဓဇက်ဗပေၚ်ထပ်ကေတ်တၟိ ဗွဲမထေက်ကြိုက်ကဵုခေတ် အပ်ကဵုလဝ်အခေါၚ်အဝဵုမ္ဂး ဆေၚ်စပ်ကဵုလိက်ကသုက်နာနာတံဂှ် ဒးသ္ပဒတန်၊ ကဆံၚ်မပအပ်ပြာပ်လဝ်ကဵု ညးတုဲဂှ် သ္ဒးသ္ပဒတန်၊ ကဆံၚ်မပအပ်ပြာပ်လဝ်ကဵု ညးတုဲဂှ် သ္ဒးသ္ပဒတန်၊ ကဆံၚ်မပအပ်ပြာပ်လဝ်ကဵု ညးတုဲဂှ် သ္ဒးသ္ပဒတန် သွက်ပြဒညာကိစ္စဇၞော်ဇၞော်တံဂှ်ဗဒးဂၠာဲစၟဳစၟတ်ဓမံက်ထ္ၜး၊ ဒးထိၚ်ဒက်ဘဏ္ဍညးဍုၚ်ကွာန်တံရေၚ်တၠုၚ်တဴရ။
ဌာနအုပ်ဓုပ်မ္ဂး ဆက်ဆောံကဵုဂၠးကဝ် ပြုပြေၚ်ဖန်ဖက်ကၟိန်ဍုၚ်၊ပိုန်ဒြပ်ကၟိန်ဍုၚ်ဂွံဖေါအ်ဗြေဝ်ဂှ် ဒလးကဵုဂၠံၚ်၊ ပရေၚ်စဵုဒၞာကၟိန်ဍုၚ်၊ ဌာနစဳရေၚ်ခၞံမဒှ် ဥပဒေကဵုပရေၚ်ကၠောံပ္ဍဲတံဂှ် မ္ဒးထိန်ရပ်ပ္ညဳပ္ညပ်ကဵုရ။ ဌာနစဳရေၚ်ပၠန်ဂှ် ဒက်ပ္တန်ဗဗွဲဓရ်ကဵု ကုဂကောံမၞိဟ် ဖျေံဒကၚ်ကဵုရဲညးဖံက်သၞောဝ်ဥပဒေ၊ နကဵုမၞိဟ်မွဲကဵုဒှ် နကဵုဂကောံဗော်ကဵုဒှ် နကဵုဗော်အလဵုအသဳကဵုဒှ် ညံၚ်ရဴဖန်ဖက်ဏာလ္တူမၞိဟ်မွဲလပါ်တေံ နကဵုဗဗွဲဓရ်ဟွံသေၚ် ညံၚ်ဟွံဂွံကတဵုဒှ်ဂှ် ဒးမၚ်မွဲအာ၊ အလဵုအသဳတွဵုရးခရိုၚ်ကဵု အလဵုအသဳဗဟိုရ်တံ ယဝ်ရစဵုစးညးသ္ကံလ္ပါ်ပရေၚ်ဥပဒေမ္ဂး ဒးကလေၚ်နိဿဲ ပံက်ထ္ၜးသောၚ်ကလးကဵုသဇိုၚ်ဥပဒေမူတံ ဍေံတံမာန်သ္ဂးတဴရ။
ပ္ဍဲဌာနပိဝွံ ညးမဒှ်က္ဍိုပ်သ္ကိုပ်ပ္ဍဲဌာနအုပ်ဓုပ်ဂှ် ဇၞော်အိုတ်ဒှ်ဇၞော်ကၟိန်ဍုၚ်ရတုဲ စပ်ကဵုပရေၚ်ကမၠောန်သီုပိဌာနဂှ် ဒးကၠိုဟ်လဝ်ရ။ ဆဂး လ္ပါ်ပရေၚ်အုပ်ဓုပ် ဂှ် ဒးကၠိုဟ်လဝ်ဗွဲတၟေၚ်ရ။ စပ်ကဵုပရေၚ်အုပ်ဓုပ်တုဲ ကိစ္စဂၠးကဝ်ကဵု ကိစ္စအပ္ဍဲကၟၟိန်ဍုၚ်နွံတဴၜါပြကာ သ္ဂးထောံဂၠိဂၠိရ။ စပ်ကဵုဗဟုသုတ ပရေၚ်ဂၠးကဝ်ဂှ် ဗီုသဘဴဒြဟတ်ကၟိန်ဍုၚ်ညးတံ မတွံဂး ပထဝဳ၊ ပရေၚ်ဍုၚ်ကွာန်၊ ဗီုသ္ဇိုၚ်ဒၟံၚ် ပရေၚ်ဍုၚ်ကွာန် ဂၠးကဝ်က္တဵုဒှ်ပြံၚ်လှာဲဒၟံၚ် ပ္ဍဲခေတ်ဂတမတ်၊ ဗီုကၟိန်ဍုၚ်မဆက်ဆောံကဵုကၟိန်ဍုၚ်ဇကု နကဵုမူဝါဒဗလးဒၟံၚ်ရမျှာၚ် ဆၜိုတ်လ္တူကျာကဵု ဗီုဍေံချဳဒရာၚ်ရုပ်ကမၠောန်အပ္ဍဲကၟိန်ဍုၚ်ဍေံတံ ဗီုတၞဟ်ခြာညးသ္ကံကဵုသ္ဇိုၚ်ပိုန်ဒြပ်ဂၠးကဝ်၊ သဇိုၚ်ပရေၚ်ပၞာန်၊ ပရေၚ်ကလုတ်ဒးဆဵုဂဗကဵုပရေၚ်ဂၠးကဝ် ကေုာံ တရဴဍုၚ်မ္ၚးဒးဆဵုဂဗလဝ်ကြံၚ်ၚ်ဏောၚ်သ္ဂးတဴရ။
ပရေၚ်အပ္ဍဲဍုၚ်ပၠန်ဂှ် ဗွဲတၟေၚ် နူကဵုသဇိုၚ်ရိုဟ်ဍေံတေံ ဇကုဒးဂၠိုက် ဂၠဲါၜံက်ခဲါသရုပ်ၛာပ်ကၠိုဟ်တီလဝ် နကဵုဆဵုဂဗကြံၚ်ၚ်တုဲ ဒးဒှ်မၞိဟ်ပြုပြေၚ်ဇိပ်ပ်ဂၠိပ်ပ်မွဲထေက်ရ။ပရေၚ်ဍုၚ်ကွာန်၊ ပထဝဳတိဍာ်၊ ပရေၚ်စဵုဒၞာ၊ ပရေၚ်ပိုန်ဒြပ်၊ ပရေၚ်အုပ်ဓုပ်၊ ကဏ္ဍတၞဟ်ဟ်သာ် မၞုံပ္ဍဲကၟိန်ဍုၚ်မန်ပိုဲဂှ် ဗွဲမစိုန်သကီု ဒရပ်အာဇုက် နကဵုဂမြၚ်ညာဏ် သ္ကေက်က်သ္ကာသ္ကာ ဆဵုဂဗကြံၚ်ၚ်သ္ဂးရ။
လောကပရေၚ်ဍုၚ်ကွာန် ပ္ဍဲလ္တူစၚ်ကၟိန်ဍုၚ်ပိုဲတ္ၚဲဏံဂှ် ယှုက်ထုဲဒၟံၚ်ဂကူဟွံတုပ်၊ ဘာသာတုပ်၊ လညာတ်ကဵုဓရ်ပတှ်ေဟွံတုပ်, ပါတဳဟွံတုပ်,ပ္ဍဲမွဲပါတဳဓရ်ရဂှ် လညာတ်ပူဂဵုဟွံတုပ်, တၞဟ်ခြာညးသ္ကံ၊
လက္ချန်ကၟေက်ကရောန်နွံဂၠိုၚ်မံၚ်တုဲ သ္ဂောံကလေၚ်ပံၚ်ဒြဟတ်ပရေၚ်ဍုၚ်ကွာန် မွဲပဠောပ်ဓဝ်ပၠန် ဝါတ်ဒၟံၚ်ရ။ဟိုတ်ဒှ်သာ်ဂှ်ရ ကာလလၟုဟ်ဝွံ အလုံကောန်ဂကူပိုဲသီုဖအိုတ် သွက်ဂွံပံၚ်ကောံညးသ္ကံဂှ် ကိစ္စဇၞော်ဒၟံၚ်တုဲ မၞိဟ်အာက္ဍိုပ်ကၟိန်ဍုၚ်ဂှ် စေဲါစပ်ဗော်ပါတဳ၊ စေဲါစပ်ဝါဒ၊ စေဲါစပ်အတ္တ ကဵုဗက်စဆန္ဒ ဂတိတံဂမၠိုၚ် ဒးသ္အးဇ္ၚးကၠေံတုဲ မၞိဟ်အာက္ဍိုပ်ကၟိန်ဍုၚ်တပ်ပ်မွဲ ဒးကဵုဒှ်ရ။ လ္ပါ်ပရေၚ်ဍုၚ်ကွာန်ဂှ်လေဝ် ဒးကၠိုဟ်လဝ် ဇြိုဟ်ဟ်နက်က်ရ။ ပ္ဍဲကၟိန်ဍုၚ်ပိုဲဏံ ဂကူဂမၠိုၚ် ပါတဳပရေၚ်ဍုၚ်ကွာန်ဂမၠိုၚ်၊ ဂကောံဂမၠိုၚ်ကေုာံတၚ်ဒုၚ်ကေတ်ဓရ် ပတှ်ေဂမၠိုၚ် ကဵုပရေၚ်ဂကောံမၞိဟ်တံဂှ် တီကေတ်လဝ်သၠေက်က်သၠံၚ်ၚ်သောဲသောဲဗြောဲဗြောဲမ္ဂးခိုဟ်ရ။
သ္ကိုပ်ကၟိန်ဍုၚ်မွဲမွဲဟီုတှ်ေ ထေက်ကဵုဒးတီကေတ်လဝ် ၜိုတ်ဂှ်ဟွံက၊ ပ္ဍဲကၟိန်ဍုၚ်ပိုဲဏံ မၞုံတဴဒၟံၚ်ကဵုပထဝဳတိဍာ်၊ ဥတုရာသဳ၊ တၞံဆုတၞဒုန်မတိုန်ဍုၚ်ဍဴဒၟံၚ်ဗီုသဘာဝကဵု မတဵုလွဳကေတ်လဝ်တံဂှ်ကီု
သယံဇာတ နတိတ်ဒၟံၚ်လ္တူတိသၟဝ်တိကေုာံ နူဗလးၜဳတံဂှ်ကီု၊ရုၚ်ကမၠောန်ဂမၠိုၚ်ကီု ပရေၚ်ပိုန်ဒြပ်နာနာ ဗီုမလေပ်နွံကဵု ၚုဟ်မး ပ္ဍဲပထမဝဳရေၚ်ဍုၚ်ကွာန် မမံက်ဂတဝ်ဒၟံၚ် လ္ပါ်အာယှသ္ကုတ်ဒိုဟ်အဂၞဲဏံဂှ် နအလဵုဇကု ဒးတီကေတ်လဝ် တၚ်ဏှ်စိစိပေါတ်ထေက်ရ။နဲသာ်ဏံမှ စပ်ကဵုပရေၚ်ဍုၚ်ကွာန်အတိက်၊ ပစ္စုပ္ပန်၊ အနာဂတ်တံ ၜတ်ကၞာတ်ကေတ်တုဲ မၞုံကဵုအသဝ်ဂုဏ် စိုန်သ္ကီု ပ္ဍဲအရာပြုပြေၚ်ဖျေံသ္ဂုတ်သွာတ်မာန်၊ လဟဵုဒက်ပ္တန်ကၟိန်ဍုၚ် ခေတ်ဇၟောဝ်ဍာ်မာန်ရ။
လ္ပါ်ဝါဒသၞမစွံစိုတ် တၚ်ဍေံတံဒုၚ်ကေတ်၊ အလေံဍေံတံမကေၚ်ကၠောန်၊ တက်ပြယာဲနဲကဲပၞာန်ကဵု တၚ်မရန်တၟံ ဗျူဟာပၞာန်၊ ဒေသသၞမထ္ပက်လုပ် စိုပ်သၠဲတိကဵု ညးမၞုံကဵုဒေသတံ မစွံစိုတ် ဆက်တုဲသၞတံဗီုလဂံါဇိုၚ်ဍေံကဵုတၚ်ရန်တၟံဍေံတံဂှ် ဒးချပ်ညာတ်ဂြၚ်တီကေတ်လဝ်တုဲ သ္ဂောံစဵုဒၞာ ရပ်ဇုက်ဗတိုက်ထရိုဟ်ကေတ်မာန်ရ။ ပ္ဍဲကၟိန်ဍုၚ်ပိုဲ စပ်ကဵုပရေၚ်စဵုဒၞာဂှ် လဂွံကဵုပထဝဳ ပရေၚ်ဍုၚ်ကွာန်ဟီုတှ်ေ ဒှ်ဒေသစှ်ေဗြိုဟ်ကဵုမဟာဗျူဟာ၊စှ်ေဗြိုဟ်အန္တရာဲကဵုဂီုကၠီု တၚ်ပၞော်ဗ္တၚ်သၞမရန်တၟံကဵုသဘဴအန္တရာဲ ပၞော်ဍာန်ဂမၠိုၚ်မတွံဂး လဂွံကဵုဝၚ်ပၞော်အတိက် ဗီုသၞမလုပ်စိုပ်ဂွံအာ၊ လဂွံကဵုပၞော်ဍာန် ပစ္စုပ္ပန် ဗီုမလုပ်စိုပ်မာန်ဂှ် ဍာန်ဒဵု၊ ဍာန်ဍာ်၊ ဍာန်ပါၚ်တြၚ် မဒှ်ပၞော်ဗ္တၚ်မလုပ်စိုပ်တံဂှ် မ္ဒးတီလဝ်စိပေါတ်တုဲ နကဵုမူမဒက်
ပ္တန်ဇြဟတ် စဵုဒၞာ (သွက်ဂွံစဵုဒၞာ)ဂှ်လေဝ် မ္ဒးဓဇက်ကဵုမာန်ကီုရ။
လ္ပါ်ပရေၚ်ပိုန်ဒြပ်ပၠန်လေဝ် ဗီုပရေၚ်ပိုန်ဒြပ်ဂၠးကဝ်တေံ မသ္အဳဒၟံၚ်ကီုဂှ်
ဒက်ပ္တဴသိုၚ်ခၞံပ္တန်အာ ပ္ဍဲကၟိန်ဍုၚ်ဇကုမာန်တုဲ အဓိကပိုန်ဒြပ်မတိတ်ဒၟံၚ် ပ္ဍဲကဵုကၟိန်ဍုၚ်ပိုဲဂှ် ဒှ်သြောံသ္ၚုရတုဲ သွက်ဘဝရဲသၟာဗ္ၚသၟာကမၠောန်တံ ဂွံဍိုပ်ဍဴတဴတက်တိုန်ဂှ် ဒးပံက်ဂၠံၚ်လးကဵုဍာန်မာန်ရ။ပဲါနူဂှ် လ္ပါ်ပရေၚ်ပိုန်ဒြပ် မပ္တံကဵုသွံရာန်လှာဲဂတး ပၠောပ်ဗၞိက်ပ္တိတ်ဗၞိက်အပ္ဍဲဍုၚ် မ္ၚးဍုၚ် ရုၚ်ကမၠောန် ရုၚ်စက် ဒက်ပ္တန်တုဲ ဂွံဒုၚ်စသိုၚ်အာ ပ္ဍဲပရေၚ်ပိုန်ဒြပ်ဗၠးဗၠးၜးၜးမာန်ဂှ် ဒးဖန်ဖက်ကဵုမာန်ရ။
လ္ပါ်ပရေၚ်အုပ်ဓုပ်ဂှ်လေဝ် ကဏ္ဍပြုပြေၚ်အမှုအရာ၊ ကဏ္ဍပံက်လးကဵုလာန်ပရေၚ်ပညာဂတာပ်ခေတ်၊ နဲကဲအုပ်ဓုပ် ကရေက်လညာတ်ပ္တိုန်ထ္ၜးတုဲ ကလေၚ်ကံက်ရုဲကေတ်ကၠေၚ်ခၞာၝောံကြက်ဍေံအာ ကလေၚ်ပံၚ်ပကောံ အုပ်ဓုပ်၊ နဲကဲအုပ်ဓုပ် နွံတဴနာနာသာ်တံဂှ် ခိုဟ်ပရေံ၊ ဟိုတ်ကဵုဖဵုဂွံ ရုဲဖဍိုက်ပါ်ပဲါကရေက်ကေတ်မာန်တုဲ ဂွံဖန်ဖက်အာ နကဵုအစောန်စရာဲနွံနွံဂှ်လေဝ် ဒးတီကၠိုဟ် ဒးဆဵုဂဗ ကေတ်လဝ် နကဵုအလဵုဇကုကီုရ။
အတိုၚ်မဓမံက်ထ္ၜးလဝ် တၚ်ဗွဲ
လ္တူ္မတုဲ ကၠုၚ်တေံဂှ် ကံက်သုၚ်စောဲအာတၚ်ဏှ်ကြက်ရိုဟ်ဍေံမ္ဂး တရဴအနာဂတ်ကၟိန်ဍုၚ်ပိုဲ ပၞော်ဗ္တၚ်ဍေံ ဖဲါပံက်ကၠုၚ်ကဵုဝၚ်တၟိမွဲကဏ္ဍမတွံဂး ပရေၚ်ဍုၚ်ကွာန် ပရေၚ်ပၞာန် ပရေၚ်ပိုန်ဒြပ်၊ ပရေၚ်အုပ်ဓုပ်တံဂမၠိုၚ် ဂွံမံက်ဂတဝ်ကၠုၚ်ရ။ မၞိဟ်တၟိ စိုတ်တၟိစိုပ်ကၠုၚ်အခေတ်တၟိ ဒှ်ကာလသာမယ သွက်ဂွံဒက်ပ္တန်ဍုၚ်တၟိရတုဲ ဟွံဒရုဲကဆံၚ်မၞိဟ် ဟွံဒရုဲ၊ ဂကူဘာသာ ဟွံဒးရုဲ အလေံအထ၊ ဟွံဒးရုဲမသဂကူလဂွံကဵု ကမၠောန်ဒတုဲဖဵု သွက်ကၟိန်ဍုၚ် သွက်ကောန်ဂကူဟီုတှ်ေ ပံၚ်ကောံကဝါ်ဒတောဲအာ ညးသ္ကံထေက်ရ။ဆဂး မၞိဟ်မၞုံတဴကဵုလညာတ်သၠဲလး၊ မၞုံတဴကဵုစိုတ်ဓါတ်ပြဲ အသဝ်ဂုဏ်၊ အစောန်စရာဲ၊ စိုန်သကီုတဴ လ္တူစၚ်ပရေၚ်ဍုၚ်ကွာန်၊ ပရေၚ်တိဍာ်ပထဝဳ၊ ပရေၚ်ပိုန်ဒြပ်တံဂှ် ထေက်ကဵုဒးဂွံအခေါၚ် ကဵုဂွံလုပ်ပြာပ်ကေတ်စိုပ်ဒၞာဲခုၚ် ပဵုနူကဵုရဲအစောဲအတ္တ အစေဲါဂိုဏ် ဗက်စဆန္ဒာဂတိတံဂှ်ဏီရ။
ဟိုတ်ဒှ်သာ်ရ စပ်ကဵုကဏ္ဍပံက်မုက်ဝၚ်တၟိဏံမွဲခန်ဂှ် ယြဴမၞိဟ်လဵုမွဲဒှ်မၞိဟ်ဆာန်ကၟိန်ဍုၚ် ဆာန်ဂကူမၞုံတဴကဵုအသဝ်ဂုဏ် အစောန်စရာဲခိုဟ်ပြဲရောဂှ် ဒးပါ်ပဲါသ္ၚေဝ်ဖ္ဍိုဟ်ရုဲစှ်ကေတ်လေပ်တုဲ အနာဂတ်တေံ ဟီုတှ်ေ ကၟိန်ဍုၚ်တၟိ မၞုံတဴကဵုလျးအရံၚ်အရှိန်တေံဂှ် မံက်ဂတဝ်ယိုက်တိုန်မုက် ဒုၚ်တၠုၚ်ကေါ်ခဲါကၠုၚ်ဒၟံၚ်တဲကဵု ဂကူမန်ပိုဲတံရ။
ရဲညးဗန်တဲဒတူဗဵုဒၟံၚ်ဒဒိုက်ကောန်ဂကူမန်တံဂှ် ကဵုသ္ဂောံပြဟ်လလုဲအာအိုတ်တုဲ ရဲညးမဒးလုပ်ဗၠိုက် ဒုၚ်ဒၟံၚ်ဘဲပယျပ္ဍဲထံၚ်ထီုဒမၠုသၟိၚ်နရက် ပ္ဍဲသၟဝ်ဘုံလကိုဟ်မဒှ်ဂကူ ပြိုတ်ဘုတ်မရေက်ဝးစကအ် ဇြောတ်သုၚ်ဆီပိုဲ မၞိဟ်တံဂှ် ကဵုဂွံဗၠးၜးတိတ်အာအိုတ်တုဲ ကောန်ကောန်ပိုဲ ရဲညးမတ်ကၠက်မံၚ်ကဵုပရေၚ်ဂကူတံဂှ်လေဝ် ကဵုမတ်ဂွံကလေၚ်ဖဲါပံက်ဗတောန်ဆာန်တိုန်ဂကူလေပ်အိုတ်ပၠန်တုဲ ဂကူမန်ပိုဲဂှ် လုကဴကဝ်မတန် ကဝ်မတူ၊ ကဝ်ဂမၠိုၚ် ယဝ်ရမၞုံတဴကဵုဓရ်သၚ်္ခါ မဂေတ်ဂ္ၚေၚ်ပြံၚ်လှာဲဒၟံၚ်ဘဝ ဗွဲဒဒှ်ကဝ်တြေံတေံဂၠုပၠိုတ် ပြံၚ်လှာဲကဝ်တၟိတေံဂံါလုပ် ဂဵုတၟးမံက်တိုန်စိုပ် ဆက်တန်တဴဂျိုၚ်အာမျီု ညံၚ်ရဴမတ်ဗၞိက် မဂဵုလဟဵုယးတၟးဒၟံၚ် ပ္ဍဲလ္တူအထောဋ်ကၟဝ်က္ဍိုပ်ၝောံကိုဋ် လၟိုန်န်ထာဝရ ထာဝရ ညိ။ ။
✍ရာမည-မာံဝါန်ၛာဲ✍
ကွာန်ကအ်သိုခ်