ကျာ်ခမဳ
_-_panoramio_(1).jpg)
ကျာ်ခမဳဂှ် နွံ ပ္ဍဲၜဳ၊ နူဇိုင်သြင် တိတ်အာမ္ၚး ၜိုတ်မွဲဖာလုမ်၊ ပ္ဍဲ ဍုင်ကျာ်ခမဳ၊ ပွိုင်ဍုင်ဇြပ်ဗု၊ တွဵုရးဍုင်မန်၊ ဒှ်ကျာ် မလုပ်ဝင်တြေံမွဲတုဲ ညးဂမၠိုင် ပတှ်ေကေတ် နွံကဵု ဣဒ္ဓိမွဲရ။
ဝင်
[ပလေဝ်ဒါန် | ပလေဝ်ဒါန် တမ်ကၞက်]အတိုင်စၟတ်သမ္တီဝင်မ္ဂး ကျာ်ခမဳဝွံ ဒှ်ကျာ်မွဲဇကု မသၟိင်တကအ်သိင်္ဃိုင် ဒေဝါနံပိယတိဿ ပအဓိဋ္ဌာန်တုဲ ဖဳဗလးဏာ သီုဖအိုတ် ရုပ်ကျာ် ၄ ဇကုရ။ အတိုင်ဝင်မ္ဂး သၟိင်ဒေဝါနံပိယတိဿဂှ် သွက်မၞိဟ်တအ် ဂွံရှ်ေသှ်ေ စ္ၜုဲစ္ၜော်တုဲ သၟိင်အိန် နိမိတ်ဗဒှ်ကဵု ပဋိမာရုပ် ပန်ဇကုရ။ နကဵု သၟိင် ရန်တၟအ် ကုညးဂမၠိုင် မနွံဌာန်သအာင်တအ် ဂွံဗဵုလ္ၚောဝ်တုဲ ညးဖဳဗလးဏာ ဇရေင်ၜဳမှာသၟိတ်ရ။ ပၞောဝ်ကဵု ကျာ်ပန်ဇကုဂှ် ကျာ်ပဝ်လဝ် မနွံ ပ္ဍဲဍုင်သဓီုဂှ် မွဲဇကု၊ မွဲဇကုပၠန်ဂှ် ညးလ္ၚဵုဟီု စိုပ် ဖာသီ၊ လ္ၚဵုဟီု စိုပ်ရးယခေင်၊ မွဲဇကုဂှ် စိုပ် ဍုင်ထဝါဲ ကျာ်မုတ္ထဳ၊ သၟေဟ်မွဲဇကုဂှ် စိုပ်ဍုင်ဇိုင်ၜဳ (လၟုဟ် ကော်စ ဍုင်ကျာ်ခမဳ) ဝွံရ။
ကျာ်ပဋိမာရုပ် မစိုပ်ကၠုင် ဇရေင်ဍုင်ဇိုင်ၜဳဂှ် ကၠုင်ဒေါအ်တန်ဒၟံင် ဒၞာဲကျာ်စေတဳဨကာဒသ မနွံ ပ္ဍဲၜဳ မဒှ်ကျာ် သၟိင်တမၠာတအ် မပတန်လဝ်တုဲ သၠုဲစုတ်လဝ် ဓါတ်သော် ၁၁ တၞုင်ရ။ အတိုင်ဝင်မ္ဂး ညးဍုင်ကွာန်တအ် ၜိုန်ရ နိမန် ကေတ်ဏာ နူကဵု ဒၞာဲဂှ် ဂၠိုင်ကဵုအလန် ဂၠိုင်ကဵု နဲကီုလေဝ် ပြံင်ပ္တိတ်ဏာ နူကဵု ဒၞာဲဂှ် ဟွံမာန်ရ။ ကၞောတ်တဲ ဗြဴကၟာဲ မဍိုက်ပေင်တဴကဵု သဳလ်မသုန်မွဲ ပအဓိဋ္ဌာန်တုဲ နိမန်တုဲ ပ္ဍဲသာသနာ ၂၃၇၊ ဂိတုမြေက္ကသိုလ်ပေင်ဂှ် ဂွံပြံင်ဏာမာန် နူဒၞာဲဂှ်ရ။
ကျာ်ပဋိမာရုပ်ဂှ် ဗွဲကိုပ်ကၠာ ၜိုန်ရ စွံလဝ်မုက် ဗွဲဒိုဟ်ဗမံက်ကီုလေဝ် ရုပ်ကျာ်ဂှ် က္လေင်ဂတးအာ လပါ်ဗွဲဒိုဟ်သၠုင်ကျာပၠန်ရ။ ဟိုတ်ကျာ်ဂှ် ဂွံဂတးမုက် လပါ်သၠုင်ကျာဂှ် ဟိုတ်နူ ညးစၟဳရံင်အာဒၟံင် ကျာ်မုတ္ထဳ မနွံ ပ္ဍဲဍုင်ထဝါဲဂှ် ဒှ်မာန်ရောင် မၞိဟ်တအ် ပတှ်ေလဝ်ရ။ ဟိုတ်နူ မစၟဳရံင်အာဒၟံင် ဗီုဏအ်တုဲ နကဵု ဘာသာမန် ကျာ်စမဳ ညးကော်စရ။ နူကဵု ကျာ်စမဳဂှ် မြိပတ်အာတုဲ ဒှ်အာ ကျာ်ခမဳ။ ဟိုတ်နူ ကျာ်ဝွံတုဲ ယၟုဒေသဂှ်လေဝ် ယၟုတမ်မူ ဍုင်ဇိုင်ၜဳဂှ် မြိပတ်အာတုဲ မၞိဟ်တအ် ကော်စ ဍုင်ကျာ်ခမဳ ကီုရ။[၁]
ကျာ်စေတဳဨကာဒသဂှ် လီုလာ်တုဲ သှ်ေဒၟံင် ဆတၟအ်ဂၠံဓါတ်သၟးရ။ ကျာ်စေတဳဂှ် မၞိဟ်တအ် ကၠောန်ဘုတ်တုဲ ကျာ်ပဋိမာရုပ်ဂှ်လေဝ် အာစုတ်လဝ် ပ္ဍဲကဵု ဒၞာဲဂၠံဓါတ်တၟအ်ဂှ်ကီုရ။ ဘုတ်ကျာ်ခမဳဂှ် ၜိုတ်လဵု ဍာ်ဇၞော်ဇၞော် ဟွံပၠိုတ်ဍာ်ဂှ် ဒၟာနူ ဣဒ္ဓိကျာ်ဂှ်ရောင်ဂှ်လေဝ် ပတှ်ေကေတ်လဝ်ရ။ ဟိုတ်နူ ကျာ်ဂှ် မနွံသၟဝ်ဂှ်တုဲ လတူဂှ် ညးဟွံကဵု အခေါင် ကုမၞိဟ်ဗြဴတအ်တိုန်ရ။ တၞဟ်န ညးဗြဴတအ် ဂွံဗဵုလ္ၚောဝ်ကီုတုဲ ညးကၠောန်ကဵုလဝ် ဇြပ်လ္ၚောဝ်ကျာ် ဗဒါဲဂှ်မွဲရ။
သၞာံ ၁၂၈၇ ဂှ် ဘုတ်ကျာ်ဂှ် တူအာပၟတ်တုဲ ဥူချေတ်လှာင် အာဂတပၠတရဴတုဲ က္လေင်သြိုင် နကဵု ဘုတ်ကျာ်တိုက်ရ။
သဘင်ကျာ်
[ပလေဝ်ဒါန် | ပလေဝ်ဒါန် တမ်ကၞက်]သဘင်ကျာ်ခမဳဂှ် ညးကၠောန်ဒၟံင် ဇၟာပ်သၞာံ နူဂိတုဝှ် ၁၂ မမံက် စဵုကဵု ဂိတုဝှ်ပေင်ရ။ အခိင်သဘင်ကျာ်ဂှ်မ္ဂး မၞိဟ် ကၠုင်လ္ၚောဝ်ကျာ် နကဵု ကွဳစက်ကီု သီုကဵု ဂၠုင် နူကဵု ဒေသနာနာရ။ [၂]
