ကြပ်ကၠုၚ်ပေါဲစုတ်မာဲတုဲ မၞိဟ်ကျိုၚ်ကယျိုၚ်မန်ဂၠိုၚ်တိုန်ကွေံကွေံ
ကြပ်ကၠုၚ်ပေါဲစုတ်မာဲတုဲ မၞိဟ်ကျိုၚ်ကယျိုၚ်မန် ဂၠိုၚ်တိုန်ကွေံကွေံ ဝွံ ဒှ်လိက်ပရေင် လညာတ် ပရေင်ဍုင်ကွာန် ကေုာံ စိုတ်ဓါတ်ကောန်ဂကူ မချူလဝ် ပရူ ဗီုပြင် ပရေင်ချဳဒရာင် အမာတ်မန် ကေုာံ ပရေင်တၟော်ဆ ပရေင်ဍုင်ကွာန် ပ္ဍဲ အခိင်ကြပ် ပေါဲရုဲမာဲ ရ။
ပရေင်မံက်ဂတဝ် ပ္ဍဲအခိင် ပေါဲရုဲမာဲ
[ပလေဝ်ဒါန် | ပလေဝ်ဒါန် တမ်ကၞက်]မိက်သ္ဂောံဒှ် အမာတ်မန်၊ ညးစၞးကောန်ဂကူမန် ဟီုစတုဲ တ္ၚဲဏံ ထ္ၜးကၠုၚ်ရုပ်ရဴ ဂွံဆဵုကေတ် ဗွဲမဂၠိုၚ် မာန်ရ။ ညးလ္ၚဵုတံဂှ် ကၠာဟွံစိုပ် ပေါဲစုတ်မာဲဏီဂှ် ရုပ်ရဴညးတံ ဒှ်မံၚ်သာ်လဵုလေဝ် တီကေတ်ဟွံမာန်ရ။ တ္ၚဲဏံ စိုပ်ကၠုၚ်အခိၚ် သွက်ဂွံ ကေတ်ဒၞာဲ ဟီုစတုဲ ထ္ၜးကၠုၚ်ရုပ်ရဴ ဗီုညးကဵုညး အိုတ်ရ။
တာလျိုင် ကေုာံ ဖဵုညးဍုင်ကွာန်
[ပလေဝ်ဒါန် | ပလေဝ်ဒါန် တမ်ကၞက်]ဂွံလဝ် မာဲမန်တုဲ ဒးသ္ပစၞး ကောန်ညးဍုၚ်ကွာန်တံဂှ် လ္ပဝိုတ်စအိုတ်ညိ။ ပြသၞာ ညးဍုၚ်ကွာန်တံ ဒှ်နွံသာ်လဵုဂှ်လေဝ် ထေက်ကဵု ဒးကဵုဖျုန် ဒးကဵုဒြဟတ် ဟွံကဵုပိုတ်သ္ကုတ်အာ မာန်ရ။ တ္ၚဲဏံ ပရေၚ်ဍုၚ်ကွာန်လေဝ် ပြံၚ်သၠာဲ ဂတာပ်ကၠုၚ်အခေတ်ယျတုဲ မမာဲမန် ပအပ်လဝ်ကဵု အမာတ်မန်တံ ဖအိုတ်ဂှ် သွက်ဖဵု ကောန်ဂကူမန်ပိုဲ လ္ပဝိုတ်စအိုတ်ညိ။
ကယျိုင်မန် ကေုာံ ဓဝ်ပတေဟ်
[ပလေဝ်ဒါန် | ပလေဝ်ဒါန် တမ်ကၞက်]တ္ၚဲဏံ ကျိုၚ်ထ္ၜးကၠုၚ် ကယျိုၚ်မန်ဟီုဂှ် ဒှ်ပွမတံၚ် စိုတ်ဓါတ် ကောန်ဂကူ ၜိုပ်ထဝ်မန်တံရတုဲ၊ ဓဝ်ပတေဟ် လတူကောန်ၜိုပ်ထဝ် မနွံလတူ အမာတ်မန်တံဂှ်လေဝ် လ္ပကဵုဗၠေတ်မှာအာညိ။ အမာတ်မန်ခိုဟ် ကောန်ညးဍုၚ်ကွာန်လေဝ်ခိုဟ် တုဲ၊ ဖဵုမန် အခေါၚ်အရာမန် ၜိုတ်ထေက်ကြိုက် ကဵုကၠောန်ဂွံ ကေတ်ဂွံ အာစိုပ်ဂှ် သ္ဒးရုန်ဂ္စါန်အာ မွဲစွံ မွဲကရောံ မဒှ်ရ။
စေတနာ ကေုာံ ပရေင်ရီုဗင်
[ပလေဝ်ဒါန် | ပလေဝ်ဒါန် တမ်ကၞက်]လောန်ကၠုၚ် ဟွံလအ် လတုဲကၠုၚ်တေံဂှ်လေဝ် မပ္တံကဵု ဒဒိုက်ဍာ်ဗၠိုက်၊ ယဲကပ် ကဝ်ရဝ်နာ (COVID-19) သွက်ညးဍုၚ်ကွာန်တံဂှ် ဂွံဆဵုကေတ် ညးစၞးကောန်ဂကူမန်ပိုဲ နွံမံၚ်ရိုဟ်လၟိဟ် ဒးမံၚ်ရ၊ ရေၚ်တၠုၚ်ဒၟံၚ် ဖဵုသွက် ညးဍုၚ်ကွာန်တံရ။ တ္ၚဲဏံ မံက်တိတ်ကၠုၚ် မွဲဗဝဝ်တုဲ "ဣဏံ ညးတံ ဒှ်မၞိဟ်စၞး ကောန်ဂကူမန် ကီုဟာ?" ဂှ်လေဝ် ညံၚ်ရဴ တိက်လ္ပအ်ညာတ်ကီုရ။ ဆဂး အဓိကဟွံသေၚ်တုဲ၊ ယဝ်စေတနာညးတံခိုဟ် ရန်လဝ်ဖဵု သွက်ဂကူ၊ သွက်ကောန်ညးဍုၚ်ကွာန်မန်ပိုဲတှ်ေ ဒှ်အဓိကရ။
တင်သရုပ် ကေုာံ အၚာပ်စိုတ်
[ပလေဝ်ဒါန် | ပလေဝ်ဒါန် တမ်ကၞက်]သရောပ်နိဂီုဏံဂှ်တှ်ေ သီုအမာတ်မန် ကေၚ်ဆဵု၊ ဟွံကေၚ်ဆဵုတံ သီုဖအိုတ်ဂှ် ကမၠောန်နာဲတံ၊ ကမၠောန်အစာတံ ပွမချပ်၊ ပွမဟီု၊ ပွမထ္ၜးကမၠောန်ဂှ် ယဝ်ဒှ်ဖဵု သွက်ညးဍုၚ်ကွာန်မန်တံတှ်ေ ကျိုၚ်ကယျိုၚ်မန်ကီု၊ ဟွံကျိုၚ်ကယျိုၚ်မန်ကီုဂှ် အဓိက ဟွံသေၚ်ရ။ အဓိကဇၞော်အိုတ် အၚာပ်စိုတ် ညးဍုၚ်ကွာန်မန်တံဂှ်တှ်ေ ကမၠောန်ဂှ် ဒးဒှ်ဖဵုခိုဟ် သွက်ညးတံဟေၚ် ညးတံနွံဗၟိက် ဇၞော်အိုတ်ရ။