ခဏ်ကောန်သၟိၚ်အဇိတပခမဳ

နွံကာလမွဲတ္ၚဲ ကျာ်တြဲနာပိုဲညးလိုက်ပိစှော်မွဲဘုံ မစိုန်ဒှ်တဴအ္စာမၞိဟ်ဒေဝတဴဂမၠိုၚ် မပဒတဴပ္ဍဲဇရေၚ်ဍုၚ်ရာဇာဂြိုဟ် ဘာဝေဠုဝိုန် ကေုာံ အသဳတိသာဝကကွးဂမၠိုၚ်ဒ္စါံစှော်။ သၟိၚ်အဇာတသတြုံဝွံ ဒှ်ဒကာဘာမွဲ အဆက်သၟိၚ်ဗိမ္ဗိသာမအံက်ဇကုဂှ်ရ။ ဂၞကျာ်သၟိၚ်အဇာတသတြု မတွံဂးကဉ္စနဒေဝဳဂှ် က္တဵုဒှ်ပဋိသန္ဓိစှ်ဂိတုစှ်တ္ၚဲ ဍိုက်ပေၚ်တုဲ သၠးဂဗ္ဘ ဂွံကောန်တြုံမွဲဂှ် အဇိတကုမ္မာ ခုတ်လဝ်ယၟုုရ။ အဇိတကုမ္မာဂှ်ပၠန်တုန်လေဝ် ဗွဲလၟေၚ်ၚ်ဇၞော်မောဝ်အာတုဲ မွဲဟာန်ကေုာံကောန်ၚာ်သၟိၚ်မသုန်ကၠံတံဂှ် တွဳဗွိုၚ်လၟိုန်ရ။

ဒးကာလ အာယုက်ဂါမ်စိုပ်စှ်တြဲသၞာံတုဲ သၟိၚ်အဇာတသတြုဂှ် သာ်ဝွံဟီုကဵုကောန်ဂှ်ရ။ "ယွကောန်သ္ဍိုက်သၟိၚ်မ ယြဴပူဂဵုမွဲ တြုံကီုလဝ်၊ ဗြဴကီုလဝ် ပ္ဍဲသာသနာကျာ်တြဲဝွံဂှ် ဂွံမံၚ်မွဲယိုက်ဒိုက် ဂွံဖျိုက်ဇကု တိတ်ပခမဳမ္ဂးဂှ် ဒှ်မပြဲလောန်ရလေဝ် ကောန်"သာ်ဝွံ သၟိၚ်ဟီုဂလာန်ဗွဲဓမ္မဓရ်ရ။

ကောန်တြုံတၠပါရမဳဂှ် ဂွံမိၚ်ကေတ်ဒွါပါၚ်မအံက်တုဲ နကဵုမဗဗေၚ်ပါရမဳအတိက် မကၠုၚ်ဖအောဝ်လလဴ ဇဴစိုတ်သဒ္ဓါသ္ဇုၚ်သ္ဍိုက်အာဂှ်ဒှ်တုဲ၊ ချိုန်ခဏဂှ်ဟေၚ် ဒုၚ်ပါၚ်မအံက်ရ။

"မဟာရာဇ ယွံလေဝ်သၟိၚ်မအံက်မပြဲ အတိုၚ်ဂလာန်သၟိၚ် မအံက်မၞုံဂၞပ်စိုတ်ဂှ် ကောန်သၟဟ်ရထကီုရအဴ" ဂးတုဲ၊ ဗွဲမပြဟ်ဟေၚ် ကေုာံကောန်သၟိၚ်မသုန်ကၠံဂှ်၊ မကျိုၚ်ကျဝ်ဂ္ညိဂ္ညါတ်ကေတ်အလၚ်္ကာရ မပြဲဂှ်လေဝ်ကီု၊ မပ္တံကွာၚ်ၜဲ ယိုဟ်ၜန်ဖျီုဖျိုန်အာဟာရဘောဇိုန် သီုကွိုၚ်ကၟာဲမ္ဒးရးဂှ် သၟိၚ်အဇာတသတြု ကဵုကောန်ကမၠောန်တံ ကၠောန်ၜိုတ်ပြေၚ်ဖျဳ၊ တးညဳဂၠံၚ်ဍာန် သဗာန်ဒးရးတုဲ ဂိုၚ်ကေတ်ဝတ္ထုဒါန် ပ္ၚောံတိတ်အာဌာန် ဇရေၚ်ကျာ်တြဲ ပ္ဍဲဘာဝေဠုဝန် သီုကွိုန်ကျာ်သြဳညဳသာ သၟိၚ်မှာအမာတ် ညးဒိုက်၊ ညးလွေဟ် သ္ၚေဟ်သေဌဳ တွီဗွိုၚ်တိတ်အာ သီုဗဗၞးပြောဟိတ် တိတ်စိုပ်ဘာကျာ်တြဲတုဲ ကျာ်တြဲ သ္ပခမဳကဵုကောန်သၟိၚ်အဇိတကုမ္မာဂှ်ရ။

အဇိတကုမ္မာဂှ်ပၠန်တုန်လေဝ် ပဟိုတ်နူပါရမဳ မဂွံခၞံလဝ်ဂှ် နွံတုဲ၊ နအာနုဘဴပါရမဳဂှ် မသ္ဂောံစိုန်သ္ကီုတဴစရိယသဳလ သမာဓိ ပညာမဍိုက်ပေၚ်တဴရ။ အဇိတထေရ် မဂွံဒုၚ်ယၟုဒယှ်တှ်မြဟ်မြာ ပြာကတ်တဴ မဂွံကမြဴဒၟံၚ်ရ။

(အထ တဒါ ကာလေ) နွံကာလမွဲတ္ၚဲဂှ် ကျာ်တြဲ ကော်အဇိတထေရ်တုဲ နူဍုၚ်ရာဇာဂြိုဟ်ဂှ် မှတ်ပ္ၚောံအာဍုၚ်ကပိလဝှ် အာစိုပ်တုဲ ချိုန်ခဏဂှ် ကေုာံသာကျဝၚ်ကလောဂမၠိုၚ် ဗိုၚ်သၟဝ်သတး သိုၚ်ဘာပဒကာအရှာံနိဂြောဓဂှ် ဇိုန်ကဵုကျာ်တုဲ ကျာ်တြဲပဒတဴပ္ဍဲဘာဂှ်ပၠန်ရ။