ခမဳသုနက္ခတ္တ၊ဝတ္ထု
ဝတ္ထုခမဳသုနက္ခတ္တ
၁။ အဲဍိက် ဂွံမိၚ်လဝ် ရဴသာ်ဝွံရ-
ပ္ဍဲကာလမွဲအခိၚ် တဳလမၞုံပိုဉ်ကျာ်တြဲ သ္ပဒတဴတန်တဴဒၟံၚ် မလ္လရး ပ္ဍဲနိဂီု မၞုံယၟုအနုပိယ သၟိၚ်မလ္လတအ်ရ။ ပ္ဍဲကာလတန်တဴဒၟံၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယးပြဟ် ပလေဝ်လတက်ကၠေံသ္ၚာတုဲ သီုကဵုထ္ၜဂိုၚ် ရပ်ကေတ်ဗဗေၚ်သ္ၚာ တၞဟ်နသွက်ဂေတ်ဂ္ၚေၚ်ပိဏ္ဍပါတ်က္ညလုပ်အာ နိဂီုအနုပိယရ၊ ပ္ဍဲကာလဂှ် ကသပ် ရဴသာ်ဝွံ ဒှ်တိုန်ကုတဳလမၞုံပိုဉ်ကျာ်တြဲရ-
“တၞဟ်နသွက်သ္ဂောံ ဂေတ်ဂ္ၚေၚ်ပိဏ္ဍပါတ် ပ္ဍဲနိဂီုအနုပိယ ပြဟ်လောန်ဒၟံၚ်ဏီရ၊ အဲဂှ် သ္ဂောံပ္ၚောံ ပြာပ်အာ အာရှာမ်ပြဘာဇ်ဘဂ္ဂဝ မဒှ်တၞောဝ်ဒတောဝ်ဘဂ္ဂဝ ဌာန်ပြဘာဇ်ဘဂ္ဂဝ နွံတေံမ္ဂး ခိုဟ်ရ” ရဴဝွံ (ကသပ်ဒှ်တိုန်ရ)။
၂။ ကြဴနူဂှ် တဳလမၞုံပိုဉ်ကျာ်တြဲ ပ္ၚောံပြာပ်အာ အာရှာမ်ပြဘာဇ်ဘဂ္ဂဝ မဒှ်တၞောဝ်ဒတောဝ်ဘဂ္ဂဝ ဌာန်ပြဘာဇ် ဘဂ္ဂဝ နွံဒၟံၚ်ဂှ်ရ၊ ပ္ဍဲကာလဂှ် ပြဘာဇ်ဘဂ္ဂဝ ဂရၚ်ပတီ ကုတဳလမၞုံပိုဉ် ကျာ်တြဲ ဂလာန်ဝွံရ-
“ယွံတဳလမၞုံပိုဉ်ကျာ်တြဲ တဳလမၞုံပိုဉ် သြဝ်က္ညကၠုၚ်ညိ၊ ယွံတဳလမၞုံပိုဉ် တဳလမၞုံပိုဉ် ကျာ်တြဲ က္ညကၠုၚ်ဝွံ ဒှ်တဴပွမက္ညကၠုၚ် ဒးရးခိုဟ်ဆာဲရ၊ ယွံတဳလပိုဉ် တဳလမၞုံပိုဉ်ကျာ်တြဲဂှ် လအ်လကာဖာမှ သ္ပတဴအခေါၚ် အလန် သွက်သ္ဂောံက္ညကၠုၚ်ဌာန်ဝွံရ၊ ယွံတဳလမၞုံပိုဉ်ကျာ်တြဲ သြဝ်က္ညဂဇအ်ညိ၊ ယွံတဳလ မၞုံပိုဉ် ဒၞာဲဏအ်ဂှ် ပလေဝ်ပလေတ် လးပညပ်စွံလဝ်ရ” ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ ဂဇအ်ဖျေံ ပ္ဍဲဒၞာဲလးပညပ်လဝ်ဂှ်ရ။ ပြဘာဇ်ဘဂ္ဂဝလေဝ်ဂိုၚ်ကေတ် သွက်ဂွံ ဂဇအ်သဝ်သဝ်မွဲတုဲ ဂဇအ်တဴ ပ္ဍဲဒၞာဲဗဗွဲမွဲဒၞာဲရ။ ပြဘာဇ်ဘဂ္ဂဝ သီုကဵုမဂဇအ်တဴ ပ္ဍဲဒၞာဲမဗဗွဲမွဲဒၞာဲဂှ် ဂရၚ် ပတီ ကုတဳလမၞုံပိုဉ်ကျာ်တြဲ ဂလာန်ဝွံရ--
“ယွံတဳလမၞုံပိုဉ်ကျာ်တြဲ ပ္ဍဲတ္ၚဲကၠာကၠာတေံဂမၠိုၚ် ကောန်သၟိၚ်လိစ္ဆဝဳ သုနက္ခတ္တဂှ် ပြာပ်ကၠုၚ် ဇရေၚ် အဲဍိက်တုဲ ‘ယွံဘဂ္ဂဝ လၟုဟ်ဝွံ အဲကရဴကၠေံစး သၠးကၠေံ တဳလမၞုံပိုဉ်ကျာ်တြဲတုဲရ၊ လၟုဟ်ဝွံ အဲဂှ် ရန်တၟံ စၞောန်ထ္ၜးတဴ တဳလမၞုံပိုဉ်ကျာ်တြဲ (ရဴဝွံမ္ဂးအာစာ)တုဲ ဟွံပဒတဴရ’ ရဴဝွံ သ္ဂးတဴ ကုအဲဍိက် ဂလာန်ဝွံရ၊ ယွံတဳလမၞုံပိုဉ်ကျာ်တြဲ အတိုၚ်ကောန်သၟိၚ်လိစ္ဆဝဳ သုနက္ခတ္တဟီုသ္ဂးဂလာန်ဝွံဂှ် ဒှ်ဍာံစၟတ်ဟာ” ရဴဝွံ (ဂရၚ်ပတီရ)။
ယွံဘဂ္ဂဝ အတိုၚ်ကောန်သၟိၚ်လိစ္ဆဝဳ သုနက္ခတ္တ ဟီုသ္ဂးဂလာန်ဝွံဂှ် ဒှ်ဍာံစၟတ်ရ-
၃။ ယွံဘဂ္ဂဝ ပ္ဍဲတ္ၚဲကၠာကၠာတေံဂမၠိုၚ် ကောန်သၟိၚ်လိစ္ဆဝဳ သုနက္ခတ္တ ပ္ၚောံပြာပ်ကၠုၚ်ဇရေၚ်အဲ လ္ၚောဝ်သ္ပဝတ် ကဵုအဲတုဲ သီုကဵုမဂဇအ်တဴ ပ္ဍဲဒၞာဲမဗဗွဲမွဲဒၞာဲဂှ် “ယွံတဳလမၞုံပိုဉ်ကျာ်တြဲ လၟုဟ်ဝွံ အဲဍိက် ကြက်ကရဴကၠေံစး သၠးကၠေံ တဳလမၞုံပိုဉ်ကျာ်တြဲရ၊ လၟုဟ်ဝွံ အဲဍိက်ဂှ် ရန်တၟံစၞောန်ထ္ၜးတဴ တဳလမၞုံပိုဉ်ကျာ်တြဲ (ရဴဝွံမ္ဂး အာစာ) တုဲ ကြက်ပဒတဴဟွံသေၚ်ရ” ရဴဝွံ သ္ဂးတဴကုအဲ ဂလာန်ဝွံရ။
ယွံဘဂ္ဂဝ သ္ဂးတဴ ရဴဝွံမ္ဂး အဲဂှ် သ္ဂးတဴ ကုကောန်သၟိၚ်လိစ္ဆဝဳ သုနက္ခတ္တ ဂလာန်ဝွံရ။
“ယွံသုနက္ခတ္တ တၠအဲ သြဝ်ကၠုၚ်ညိ၊ ရန်တၟံစၞောန်ထ္ၜးတဴ အဲ (ရဴဝွံမ္ဂးအာစာ)တုဲသြဝ်ပဒတဴညိ” ရဴဝွံ အဲကေၚ်ဟီုသ္ဂးကဵု တၠအဲကီုဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဟွံကေၚ်ဟီုသ္ဂးရ (ရဴဝွံဂရၚ်ပတီရ)။
“ယွံတဳလမၞုံပိုဉ်ကျာ်တြဲ ရန်တၟံစၞောန်ထ္ၜးတဴ တဳလမၞုံပိုဉ်ကျာ်တြဲ (ရဴဝွံမ္ဂးအာစာ)တုဲအဲဍိက် ကြက်ပ ဒတဴရ” ရဴဝွံ တၠအဲလေဝ် ကေၚ်ဟီုသ္ဂးတဴကဵု အဲကီုဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဟွံကေၚ်ဟီုသ္ဂးရ (ရဴဝွံဂရၚ်ပတီရ)။
ယွံသုနက္ခတ္တ အဲလေဝ် “ယွံသုနက္ခတ္တ တၠအဲ သြဝ်ကၠုၚ်ညိ၊ ရန်တၟံစၞောန်ထ္ၜးတဴအဲ (ရဴဝွံမ္ဂးအာစာ) တုဲ သြဝ်ပဒတဴညိ” ရဴဝွံ ဟွံကေၚ်ဟီုသ္ဂးကဵု တၠအဲရ၊ တၠအဲလေဝ် “ယွံတဳလမၞုံပိုဉ်ကျာ်တြဲ ရန်တၟံ စၞောန်ထ္ၜးတဴ တဳလမၞုံပိုဉ်ကျာ်တြဲ (ရဴဝွံမ္ဂးအာစာ)တုဲ အဲဍိက်ကြက်ပဒတဴရ” ရဴဝွံ ဟွံကေၚ်ဟီုသ္ဂးကဵု အဲရ၊ ယွံတြုံမလ္ၚုသၟး (နူမဂ်ဖိုလ်) ဒှ်တဴသာ်ဝွံမ္ဂးတၠအဲဂှ် ဒှ်တဴ ညးလဵုမွဲတုဲ သၠးကၠေံ ညးလဵုမွဲဂှ်ရော၊ ယွံတြုံ မလ္ၚုသၟး (နူမဂ်ဖိုလ်) တၠအဲဗၞတ်ၜိုတ်လဵု ကလိလောန်လုတ်မှာဒုဟ်ဂှ် သြဝ်မၠာ်သ္ၚေဝ်ရံၚ်ကေတ်ညိ ရဴဝွံ (သ္ဂးတဴရ)။
၄။ ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် ဟွံစၞောန်ထ္ၜးတဴ ဣဒ္ဓိပါဋိဟာ မပြဲလောန်နူဓရ်ကုသလ ကမ္မပထ ၏စှ်သာ် မဒှ်ဂြပ်မၞိဟ်တအ် ကုအဲဍိက်ရ ရဴဝွံ (ဂရၚ်ပတီရ)။
“ယွံသုနက္ခတ္တ တၠအဲ သြဝ်ကၠုၚ်ညိ၊ ရန်တၟံစၞောန်ထ္ၜးတဴ အဲ (ရဴဝွံမ္ဂးအာစာ)တုဲ သြဝ်ပဒတဴညိ၊ အဲဂှ် စၞောန်ထ္ၜးကဵုဣဒ္ဓိပါဋိဟာ မပြဲလောန်နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ် ကုတၠအဲဏောၚ်” ရဴဝွံ အဲကေၚ်ဟီုသ္ဂးကဵု တၠအဲကီုဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဟွံကေၚ်ဟီုသ္ဂးရ ရဴဝွံ (ဂရၚ်ပတီရ)။
“ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် စၞောန်ထ္ၜးတဴကဵုဣဒ္ဓိပါဋိဟာ မပြဲလောန်နူ ဓရ်ကုသလကမ္မပထစှ်သာ် မဒှ်ဂြပ်မၞိဟ်တအ် ကုအဲဍိက်မ္ဂး အဲဍိက်ဂှ် ရန်တၟံစၞောန်ထ္ၜးတဴ တဳလမၞုံပိုဉ် ကျာ်တြဲ (ရဴဝွံမ္ဂးအာစာ)တုဲ ကြက်ပဒတဴရ” ရဴဝွံ တၠအဲလေဝ် ကေၚ်ဟီုသ္ဂးတဴကဵု အဲကီုဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဟွံကေၚ်ဟီုသ္ဂးရ ရဴဝွံ (ဂရၚ်ပတီရ)။
ယွံသုနက္ခတ္တ အဲလေဝ် “ယွံသုနက္ခတ္တ တၠအဲ သြဝ်ကၠုၚ်ညိ ရန်တၟံစၞောန်ထ္ၜးတဴအဲ (ရဴဝွံမ္ဂးအာစာ) တုဲ သြဝ်ပဒတဴညိ၊ အဲဂှ် စၞောန်ထ္ၜးကဵုဣဒ္ဓိပါဋိဟာ မပြဲလောန်နူ ဓရ်ကုသလကမ္မပထစှ်သာ် မဒှ်ဂြပ် မၞိဟ်တအ် ကုတၠအဲဏောၚ်နေ ရဴဝွံ ဟွံကေၚ်ဟီုသ္ဂးရ၊
တၠအဲလေဝ် “ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် စၞောန်ထ္ၜးတဴကဵုဣဒ္ဓိပါဋိဟာမပြဲ လောန် နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ် ကုအဲဍိက်မ္ဂး အဲဍိက်ဂှ် ရန်တၟံစၞောန်ထ္ၜးတဴ တဳလမၞုံပိုဉ်ကျာ်တြဲ (ရဴဝွံမ္ဂးအာစာ) တုဲ ကြက်ပဒတဴရ” ရဴဝွံ ဟွံကေၚ် ဟီုသ္ဂးကဵုအဲရ၊ ယွံတြုံမလ္ၚုသၟး (နူမဂ်ဖိုလ်) ဒှ်တဴသာ်ဝွံမ္ဂး တၠအဲဂှ် ဒှ်တဴညးလဵုမွဲတုဲ သၠးကၠေံ ညးလဵုမွဲဂှ်ရော။ ယွံသုနက္ခတ္တ အရာဝွံဂှ် ပသာ်သမ္တီ ထေၚ်တဴဂှ်ရော၊ ဣဒ္ဓိပါဋိဟာ မပြဲလောန်နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် စၞောန်ထ္ၜးတဴ ကဵုဒှ် ဟွံစၞောန်ထ္ၜးတဴကဵုဒှ် ဓရ်အဲဟီုတွံလဝ် တၞဟ်နဖဵုပွမဖအိုတ်ကၠေံ ဒဒိုခ်ဂှ် ဒှ်တဴတၞဟ်နဖဵု ပွမဖအိုတ် ကၠေံ ဒဒိုခ်အိုဿီု ဒဒက်တဴကဵုညးဒ္ဂေတ်ဗက် အတိုၚ်ဟီုတွံဂှ်ရ ဟွံသေၚ်ဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဣဒ္ဓိပါဋိဟာ မပြဲလောန် နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် စၞောန်ထ္ၜးတဴကဵုဒှ် ဟွံစၞောန်ထ္ၜးတဴကဵုဒှ် ဓရ်တဳလမၞုံပိုဉ်ကျာ်တြဲ ဟီုတွံလဝ်တၞဟ်နဖဵုပွမဖအိုတ်ကၠေံ ဒဒိုခ်ဂှ် ဒှ်တဴတၞဟ်နဖဵုပွမဖအိုတ်ကၠေံ ဒဒိုခ်အိုဿီု ဒဒက်တဴကဵုညးဒ္ဂေတ်ဗက် အတိုၚ်ဟီုတွံလဝ်ဂှ်ရ ရဴဝွံ (ဂရၚ်ပတီရ)။
ယွံသုနက္ခတ္တ ဣဒ္ဓိပါဋိဟာ မပြဲလောန် နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် စၞောန်ထ္ၜးတဴကဵုဒှ် ဟွံစၞောန်ထ္ၜးတဴကဵုဒှ် ဓရ်အဲဟီုတွံလဝ် တၞဟ်နဖဵုပွမဖအိုတ်ကၠေံ ဒဒိုခ်ဂှ် ဒှ်တဴတၞဟ်နဖဵု ပွမဖအိုတ်ကၠေံ ဒဒိုခ်အိုဿီု ဒဒက်တဴကဵုညးဒ္ဂေတ်ဗက် အတိုၚ်ဟီုတွံလဝ်ဂှ်ရ။ ယွံသုနက္ခတ္တ ဒှ်တဴသာ် ဝွံမ္ဂး ပွမစၞောန်ထ္ၜးတဴဣဒ္ဓိပါဋိဟာ မပြဲလောန်နူဓရ်ကုသလကမ္မပထစှ်သာ် မဒှ်ဂြပ်မၞိဟ်တအ်ဂှ် ပသာ်ကြက် သ္ပဂှ်ရော။ ယွံတြုံမလ္ၚုသၟး (နူမဂ်ဖိုလ်) တၠအဲ ဗၞတ်ၜိုတ်လဵု ကလိလောန်လုတ်မှာဒုဟ်ဂှ် သြဝ်မၠာ်သ္ၚေဝ် ရံၚ်ကေတ်ညိ ရဴဝွံ (သ္ဂးတဴရ)။
၅။ ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် ဟွံဟီုတွံတဴ ဓရ်အဂ္ဂည မဂပ်ဝ်တီကေတ် ရဴဝွံမ္ဂး တမ် လောက ကုအဲဍိက်ရ ရဴဝွံ (ဂရၚ်ပတီရ)။
“ယွံသုနက္ခတ္တ တၠအဲ သြဝ်ကၠုၚ်ညိ ရန်တၟံစၞောန်ထ္ၜးတဴ အဲ (ရဴဝွံမ္ဂးအာစာ) တုဲ သြဝ်ပဒတဴညိ၊ အဲဂှ် ဟီုတွံကဵု ဓရ်အဂ္ဂည မဂပ်ဝ်တီကေတ် ရဴဝွံမ္ဂး တမ်လောကဏောၚ်” ရဴဝွံ အဲကေၚ်ဟီုသ္ဂးကဵု ကုတၠအဲကီုဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဟွံကေၚ်ဟီုသ္ဂးရ ရဴဝွံ (ဂရၚ်ပတီရ)။
“ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် ဟီုတွံတဴ ဓရ်အဂ္ဂည မဂပ်ဝ်တီကေတ်ရဴဝွံမ္ဂး တမ်လောက ကုအဲဍိက်မ္ဂး အဲဍိက်ဂှ် ရန်တၟံစၞောန်ထ္ၜးတဴ တဳလမၞုံပိုဉ်ကျာ်တြဲ (ရဴဝွံမ္ဂးအာစာ) တုဲ ကြက်ပဒတဴရ” ရဴဝွံ တၠအဲလေဝ် ကေၚ်ဟီုသ္ဂးကဵု ကုအဲကီုဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဟွံကေၚ်ဟီုသ္ဂးရ ရဴဝွံ (ဂရၚ်ပတီရ)။
ယွံသုနက္ခတ္တ အဲလေဝ် “ယွံသုနက္ခတ္တ တၠအဲ သြဝ်ကၠုၚ်ညိ၊ ရန်တၟံစၞောန်ထ္ၜးတဴအဲ (ရဴဝွံမ္ဂးအာစာ) တုဲ သြဝ်ပဒတဴညိ၊ အဲဂှ် ဟီုတွံကဵု ဓရ်အဂ္ဂည မဂပ်ဝ်တီကေတ် ရဴဝွံမ္ဂးတမ်လောကဏောၚ်” ရဴဝွံ ဟွံကေၚ်ဟီုသ္ဂးကဵု ကုတၠအဲရ၊ တၠအဲလေဝ် “ယွံတဳလမၞုံပိုဉ်ကျာ်တြဲ တဳလမၞုံပိုဉ်ကျာ်တြဲဂှ် ဟီုတွံတဴ ဓရ်အဂ္ဂည မဂပ်ဝ်တီကေတ် ရဴဝွံမ္ဂး တမ်လောကကုအဲဍိက်မ္ဂး အဲဍိက်ဂှ် ရန်တၟံစၞောန်ထ္ၜးတဴ တဳလမၞုံ ပိုဉ်ကျာ်တြဲ (ရဴဝွံမ္ဂးအာစာ)တုဲ ကြက်ပဒတဴရ” ရဴဝွံ ဟွံကေၚ်ဟီုသ္ဂးကဵုအဲရ၊ ယွံတြုံမလ္ၚုသၟး (နူမဂ်ဖိုလ်) ဒှ်တဴသာ်ဝွံမ္ဂး တၠအဲဂှ်ဒှ်တဴ ညးလဵုမွဲတုဲ သၠးကၠေံ ညးလဵုမွဲဂှ်ရော။ ယွံသုနက္ခတ္တ အရာဝွံဂှ် ပသာ်သမ္တီ ထေၚ်တဴဂှ်ရော၊ ဓရ်အဂ္ဂည မဂပ်ဝ်တီကေတ် ရဴဝွံမ္ဂး တမ်လောကဂှ် ဟီုတွံတဴကဵုဒှ် ဟွံဟီုတွံတဴကဵုဒှ် ဓရ်အဲဟီုတွံလဝ် တၞဟ်နဖဵုပွမဖအိုတ်ကၠေံ ဒဒိုခ်ဂှ် ဒှ်တဴတၞဟ်နဖဵုပွမဖအိုတ်ကၠေံ ဒဒိုခ်အိုဿီု ဒဒက်တဴ ကဵုညးဒ္ဂေတ်ဗက် အတိုၚ်ဟီုတွံဂှ်ရ ဟွဲသေၚ်ဟာ ရဴဝွံ (သ္ဂးတဴရ)။
ယွံတဳလမၞုံပိုဉ်ကျာ်တြဲ ဓရ်အဂ္ဂည မဂပ်ဝ်တီကေတ် ရဴဝွံမ္ဂး တမ်လောကဂှ် ဟီုတွံတဴကဵုဒှ် ဟွံဟီုတွံတဴကဵုဒှ် ဓရ်တဳလမၞုံပိုဉ်ကျာ်တြဲ ဟီုတွံလဝ် တၞဟ်နဖဵုပွမဖအိုတ်ကၠေံ ဒဒိုခ်ဂှ်ဒှ်တဴ တၞဟ်နဖဵု ပွမဖအိုတ်ကၠေံ ဒဒိုခ်အိုဿီု ဒဒက်တဴကဵုညးဒ္ဂေတ်ဗက် အတိုၚ်ဟီုတွံလဝ်ဂှ်ရ ရဴဝွံ (ဂရၚ်ပတီရ)။
ယွံသုနက္ခတ္တ ဓရ်အဂ္ဂည မဂပ်ဝ်တီကေတ် ရဴဝွံမ္ဂး တမ်လောကဂှ် ဟီုတွံတဴကဵုဒှ် ဟွံဟီုတွံတဴကဵုဒှ် ဓရ်အဲဟီုတွံလဝ် တၞဟ်နဖဵုပွမဖအိုတ်ကၠေံ ဒဒိုခ်ဂှ် ဒှ်တဴတၞဟ်နဖဵု ပွမဖအိုတ်ကၠေံ ဒဒိုခ်အိုဿီု ဒဒက်တဴ ကဵုညးဒ္ဂေတ်ဗက် အတိုၚ်ဟီုတွံလဝ်ဂှ်ရ။ ယွံသုနက္ခတ္တ ဒှ်တဴသာ်ဝွံမ္ဂး ပွမဟီုတွံတဴ ဓရ်အဂ္ဂည မဂပ်ဝ် တီကေတ် ရဴဝွံမ္ဂး တမ်လောကဂှ် ပသာ်ကြက်သ္ပဂှ်ရော။ ယွံတြုံမလ္ၚုသၟး (နူမဂ်ဖိုလ်) တၠအဲ ဗၞတ်ၜိုတ်လဵု ကလိလောန်လုတ်မှာဒုဟ်ဂှ် သြဝ်မၠာ်သ္ၚေဝ်ရံၚ်ကေတ်ညိ။
၆။ ယွံသုနက္ခတ္တ နကဵုဟိုတ်မဂၠိုၚ်ဂၠၚ် တၠအဲ ကေၚ်ဟီုထိုၚ်သးလဝ် ဂုဏ်အဲ ပ္ဍဲကွာန်သၟိၚ်ဝဇ္ဇဳတအ်ရ--
“တဳလမၞုံပိုဉ်ကျာ်တြဲဂှ် ဟိုတ်နူဟိုတ် မထေက်ဒုၚ်ပူဇဴတၟေၚ်ဝွံလေဝ် အရဟံ မ္ဂးယၟုရ၊ ဟိုတ်နူဟိုတ် မတီကေတ် (ဓရ်ဂမၠိုၚ်အိုဿီု) အလဵုဇကု မဍာံစၟတ်ဝွံလေဝ် သမ္မာသမ္ဗုဒ္ဓ မ္ဂးယၟုရ၊ ဟိုတ်နူဟိုတ် မဍိုက်ပေၚ်တဴကေုာံ ‘ဝိဇ္ဇာ’ လညာတ်ဉာဏ် ‘စရဏ’ ဒ္ဂေတ်လ္ၚတ် ဝွံလေဝ် ဝိဇ္ဇာစရဏသမ္ပန္န မ္ဂးယၟုရ၊ ဟိုတ်နူဟိုတ် မလေပ်သ္ဂးတဴဂလာန် ဒးရးခိုဟ်ဆာဲ ဝွံလေဝ် သုဂတ မ္ဂးယၟုရ၊ ဟိုတ်နူဟိုတ် မတီတဴ လောကဝွံလေဝ် လောကဝိဒူ မ္ဂးယၟုရ၊ ဟိုတ်နူဟိုတ် မလေပ်ဝေတ်ဗတောန်တဴ ညးမထေက်ကဵု ဝေတ်ဗတောန် မဒှ်တဴပူဂိုလ် မဟွံမွဲ ကဵုပတောံၜတ်ဝွံလေဝ် အနုတ္တရောပုရိသဒမ္မသာရထိ မ္ဂးယၟုရ၊ ဟိုတ်နူဟိုတ် မဒှ်တဴအာစာ မၞိဟ် ဒေဝတဴတအ်ဝွံလေဝ် သတ္ထာဒေဝမနုဿာနံ မ္ဂးယၟုရ၊ ဟိုတ်နူဟိုတ် မကဵုတီကေတ် (ဓရ်သစ္စပန်ဂမၠိုၚ်)ဝွံလေဝ် ဗုဒ္ဓ မ္ဂးယၟုရ၊ ဟိုတ်နူဟိုတ် မၞုံကဵုပိုဉ်တြဴပြကာဝွံလေဝ် ဘဂဝါ မ္ဂးယၟုရ” ရဴဝွံ (တၠအဲ ကေၚ်ဟီုထိုၚ်သးလဝ်ရ)။ ယွံသုနက္ခတ္တ ရဴသာ်ဝွံ နကဵုဟိုတ်မဂၠိုၚ်ဂၠၚ် တၠအဲ ကေၚ်ဟီုထိုၚ်သးလဝ် ဂုဏ်အဲ ပ္ဍဲကွာန်သၟိၚ်ဝဇ္ဇဳတအ်ရ။
ယွံသုနက္ခတ္တ နကဵုဟိုတ်မဂၠိုၚ်ဂၠၚ် တၠအဲ ကေၚ်ဟီုထိုၚ်သးလဝ် ဂုဏ်ဓရ် ပ္ဍဲကွာန် သၟိၚ်ဝဇ္ဇဳတအ်ရ--
“ဓရ်တဳလမၞုံပိုဉ်ကျာ်တြဲ မဂပ်ဝ်ဟီုတွံလဝ်ဂှ် ဒှ်တဴဓရ် မဂပ်ဝ်ဟီုတွံလဝ် ဗွဲမဒးရးရ၊ ဒှ်တဴဓရ် မတီညာတ်အလဵုဇကုမာန်ရ၊ ဒှ်တဴဓရ် မလေပ်ကဵုဖဵု ဟွံခြာကာလရ၊ ဒှ်တဴဓရ် မထေက်ကဵုထ္ၜးတဴ ရဴဝွံမ္ဂး ကၠုၚ်ညိ ဗဵုရံၚ်ညိရ၊ ဒှ်တဴဓရ် ထေက်ကဵုရၚ်တၠုၚ်စွံလဝ် ပ္ဍဲဇကုဇကု ပ္ဍဲစိုတ်ဇကုရ၊ ဒှ်တဴဓရ် (အရဳ) ညးမၞုံကဵုပညာတအ်ဟေၚ် တီမာန် ဒုၚ်စသိုၚ်မာန် အလဵုဇကု ညးကဵုညးရ” ရဴဝွံ (တၠအဲ ကေၚ်ဟီုထိုၚ်သး လဝ်ရ)။ ယွံသုနက္ခတ္တ ရဴသာ်ဝွံ နကဵုဟိုတ် မဂၠိုၚ်ဂၠၚ် တၠအဲ ကေၚ်ဟီုထိုၚ်သးလဝ် ဂုဏ်ဓရ် ပ္ဍဲကွာန် သၟိၚ်ဝဇ္ဇဳတအ်ရ။
ယွံသုနက္ခတ္တ နကဵုဟိုတ်မဂၠိုၚ်ဂၠၚ် တၠအဲ ကေၚ်ဟီုထိုၚ်သးလဝ် ဂုဏ်သၚ် ပ္ဍဲကွာန် သၟိၚ်ဝဇ္ဇဳတအ်ရ-
“သၚ် ‘သာဝက’ ကွးတဳလမၞုံပိုဉ်ကျာ်တြဲဂှ် မၞုံကဵုဒ္ဂေတ် ဒးရးခိုဟ်ဆာဲရ၊ သၚ် ‘သာဝက’ ကွးတဳလမၞုံပိုဉ်ကျာ်တြဲဂှ် မၞုံကဵုဒ္ဂေတ် လ္ဂူတပ်တးရ၊ သၚ် ‘သာဝက’ ကွးတဳလ မၞုံပိုဉ်ကျာ်တြဲဂှ် မၞုံကဵု ဒ္ဂေတ် ဍာံစၟတ်ရ၊ သၚ် ‘သာဝက’ ကွးတဳလမၞုံပိုဉ်ကျာ်တြဲဂှ် မၞုံကဵုဒ္ဂေတ် မဗဗွဲရ၊ သၚ် ‘သာဝက’ ကွးတဳလ မၞုံပိုဉ်ကျာ်တြဲ မၞုံကဵုရိုဟ်လၟိဟ် ဗွဲလ္ၚဝ် ပန်လ္ၚဝ် ဗွဲပူဂိုလ်ပၠန်ဒ္စာံဂှ် ထေက်ဒုၚ်ဂိုၚ်ကေတ် ဒါန်ရၚ်တၠုၚ်နၚ် (နူဇမ္ၚောဲ)ရ၊ ထေက်ဒုၚ်ဂိုၚ်ကေတ်ဝတ္ထုဒါန် စဳရေၚ်လဝ် တၞဟ်နသွက်ကၟုဲတအ်ရ၊ ထေက်ဒုၚ်ဂိုၚ်ကေတ် ဒါန်မရန်တၟအ်ကဵု ဖဵုပရလိုက်ရ၊ ထေက်ဒုၚ်ဂိုၚ်ကေတ် ပၚ်ခၠအ်ခၟောမ်တဲရ၊ ဒှ်တဴ တိဗ္ၚထၟိက်မပြဲ သွက်ဂကောံသတ်တအ် ကၠောန်သ္ပ ကုသိုလ်ရ” ရဴဝွံ (တၠအဲ ကေၚ်ဟီုထိုၚ်သးလဝ်ရ)။ ယွံသုနက္ခတ္တ ရဴသာ်ဝွံ နကဵုဟိုတ်မဂၠိုၚ်ဂၠၚ် တၠအဲ ကေၚ်ဟီုထိုၚ်သးလဝ် ဂုဏ်သၚ် ပ္ဍဲကွာန်သၟိၚ်ဝဇ္ဇဳတအ်ရ။
ယွံသုနက္ခတ္တ အဲ ကြက်ဟီုလဴဗ္စကဵုတၠအဲရ၊ ယွံသုနက္ခတ္တ အဲ ကြက်ကဵုတၠအဲတီရ၊ ယွံသုနက္ခတ္တ “ကောန်သၟိၚ်လိစ္ဆဝဳ သုနက္ခတ္တဂှ် ဟွံသၟဟ်ရထ တၞဟ်နဒ္ဂေတ်တဴ ဒ္ဂေတ်မပြဲ ပ္ဍဲဇရေၚ် ခမဳဂေါတမတုဲ ဖျေံကၠေံသိက္ခာတုဲ ရာမ်တိတ်အာ ခရှ်ရ” ရဴဝွံ ကြက်ဟီုဂရိုဟ်တဴ တၠအဲအိုတ်ရ။ ယွံသုနက္ခတ္တ ရဴသာ်ဝွံ ကြက်ဟီုဂရိုဟ်တဴ တၠအဲအိုတ်ရ ရဴဝွံ အဲဟီုကဵု သုနက္ခတ္တရ။ ယွံဘဂ္ဂဝ ရဴသာ်ဝွံ ၜိုန်အဲဟီုကီုလေဝ် ညးမထေက်ကဵုအာ အပါယ် နရက်ဂှ် ညံၚ်ရဴပါဲစ္ဍးအာကီု ကောန်သၟိၚ်လိစ္ဆဝဳ သုနက္ခတ္တဝွံ ပါဲစ္ဍးအာ နူသာသနာဝွံဟေၚ်ရ။