ခမဳအာဇာနယ်ဟွံမွဲကဵုၜတ်ကၞာတ်
✍ကျာ်ဇၞော်ပါလိတ✍
ညးဝွံ စိုတ်သ္ပဍိုက်ပၠက်ဂကူဗၟာ တၟာမလ္ၚဴလေဝ်ဟွံမွဲ၊ စိုတ်ဖေက်ဂၟံက် ဨကရာဇ်ပၞာန်ဗၟာအံၚ်ဇေယျ တၟာမရာဲလေဝ်ဟွံမွဲ၊ စိုတ်ဆာန်ဂကူမန် ဆာန်နန်ပြသာဒ် ဆာန်အမာတ် သကိုပ်ပၞာန်ဗော်သွး တၟာအကးလေဝ်ဟွံက၊ စိုတ်ဂိုဟ်ဆာန် သၞေံသၞဴလိက်ပတ်မန် ဆီနန်ဗကေတ် ဂြောတ်ဒၟံၚ်ဟေၚ်ရဒှ်တုဲ **ယၟုခမဳဥတ္တမာရမ္တ" ဂကူပိုယ်ကော်စပြာကတ်ဒၟံၚ်ဂှ် **ကျာ်ဇၞော်အစွောံ"ရောၚ်။ ကျာ်ဇၞော်အစွောံဝွံ အစာသၠပတ်မန်လေဝ်ဒှ် အစာကဝိမန်ဒယှ်ချူခၞံပြကိုဟ်လိက်ပိဋကတ် လိက်ပတ်မန်နာနာလေဝ် ပြာကတ်အလုံတွဵုရး ဍုၚ်မန်၊ဍုၚ်ဗၟာတ်တအ်။
စိုတ်ဓါတ်ဆီဨကရာဇ်ဆီတၠနာဲ ဍာဲယောဗ်မံၚ်တုဲ ဍိုက်ပေၚ်အသဝ်ဂုဏ် သူရသတ္တိ မၞုံကဵုစိုတ်ဂံၚ်သကာလောန် ဍိုက်ပေၚ်ကဵုအသဝ်ဂုဏ် ဝိသာရဒဗျတ္တိ ဂမြၚ်ညာဏ်စဳကၠး ယးတၟးထတ်စောံ ရောံဒညဟွံမွဲ ပ္ဍဲပိဋကတ်ပိပါဠိအဌကထာ ပ္တန်လဝ်သာသနာ စဵုကဵုအာယုက်ဗဒဲါဒ္စိတ်စှော်သၞာံရ။ ဆီဇာတိဂကူမန် ဍုၚ်ဗဂေါဟံသာဝတဳ ဒှ်ခမဳဍိုက်ပေၚ်ကဵု ကွတ်ပါၚ်,ကွတ်တဲ,ကွတ်ပညာလောကဳလောကုတ္တဵု ညံၚ်ဂွံကၠောန်စိုပ်အာသြၚ်မွဲလပါ်ကော်ခဴစ ပိဋကတ္တယပါရဂူကီုရောၚ်။
သက္ကရာဇ်ဂိတုတ္ၚဲ အာစာကဝိက္တဵုဒှ်မၞိဟ် ဗၞတ်ဂၠိုက်ဂၠာဲဝွံ အတိုၚ်သၟဝ်တေံရ။ သက္ကရာဇ်ကျာ် (၂၂၄၃)သၞာံ သက္ကရာဇ်ဍုၚ်(၁၀၆၁)သၞာံ၊ ပယျာံဂိတုမာ်(ထေၚ်ကေတ်)တ္ၚဲဒိုတ်က္တဵုဒှ်မၞိဟ် ပ္ဍဲကွာန်အစွောံ ဍုၚ်ဗဂေါ အဃောဨကရာဇ်မန်ဂမၠိုၚ် ပကၚ်ရၚ်ဍုၚ်ဆက်ဆက်တုဲ ဗွဲကြဴကၞောဝ်ဒတောဝ်ဨကရာဇ်မန် ပိုယ်သကုတ်အာရ။ ယၟုမိမကောဒေံဒှ်တမ် ဂၠာဲဟွံဆဵုရ။ စိုပ်သက္ကရာဇ်ကျာ်(၂၂၆၂)သၞာံ၊ သက္ကရာဇ်ဍုၚ် (၁၀၈၀)သၞာံ၊ ဂွံအယုက်ၜါစှော်ဂှ် ဒှ်ခမဳပြဲ ပ္ဍဲသာသနာကျာ်ရ။ ဨကရာဇ်မန် တၠညးသေနပတိ ဂွံယၟုဗညာဒလဂှ် သက္ကရာဇ်ကျာ်(၂၂၉၀)သၞာံ၊သက္ကရာဇ်ဍုၚ်(၁၁၀၈)သၞာံ၊ တိုန်နန်ပကၚ်ရၚ် ဍုၚ်ဗဂေါဟံသာဝတဳ (အလုံတွဵုရးဍုၚ်မန် ပၞောဝ်ကဵုသၟိၚ်ဒစိတ်စှော်တြဴတၞောဝ် ဒှ်ဒတောဝ်သၟိၚ်လက်ကရဴတဲ လၟိဟ်သၟိၚ်ပိစှော်ပန်) ပကၚ်ရၚ်ဍုၚ် စှ်မွဲသၞာံဓဝ်ရ။
အဃောဨကရာဇ်မန် တိုန်ပကၚ်ရၚ်ဍုၚ်ဂှ် ကျာ်ဇၞော်အစွောံဂွံၜါစှော်ထပှ်ဝှ် ၜါစှော်ဒ္စာံ(၂၇.၂၈)ဝှ်ရ။ ပ္ဍဲအခိၚ်တၞောဝ်ဒတောဝ် ဨကရာဇ်မန်ပိုတ်သကုတ်အာဂှ်မြုဝန်ဗၟာနာဲသာအံၚ် ပၠံၚ်ဗတိုက်ကေတ်ဍုၚ်မန် ဗဂေါဟံသာဝတဳတုဲ အုပ်ဓုပ်လဝ်ဂကူမန် နကဵုပဒေသရာဇ်သကာတ်မြဟ်လောန် ဍုၚ်ကွာန်ဂမ္တဴဂမ္တာန်လောန်ရ။ ပ္ဍဲအခိၚ်ဂှ်ကျာ်ဇၞော်အစွောံ ဂွံအယုက်ပန်စှော်မွဲသၞာံ၊ဂွံဝှ်ၜါစၞော်မွဲ သက္ကရာဇ်ဍုၚ်(၁၁၀၂)သၞာံ နူကဵုကွာန်အစွောံ ပြံၚ်ကၠောံအာကွာန်ဖါဗြဗၟံက်ဒဵု ကောန်ကွးခမဳတအ် ယဵုယိုက်ဏာလိက်ပတ်မန်ဗၞတ်မာန် ထောံကွာန်ထောံဍုၚ် ဒဴအာဗၟံက်ဒဵုတေံရ။ ဒဴဘဲပၞာန်ဗၟာကၠာတဲ ဗၠးဘဲကီုရဒှ်တုဲ ဂွိၚ်ဖေက်လိက်မန်ကၠေံ ချူကှ်ေပ္ဍဲထီုဖါဗြ နကဵုပၟတ်ကၠေၚ်အၚ်,ကၠေၚ်ဒယာၚ် သ္ပပၟတ်ပၞာၚ်တဝ်ၜံၚ် စံၚ်ဍေန်ဗဂဵုလဝ်ရ။
ဂိုဟ်ဆာန်လိက်ပတ်မန် စိုပ်ကၞောတ်အထောဋ်တုဲ မၚ်မွဲထိၚ်ဒဝ် စဵုကဵုစဴသွဝ်ရကဠောတအ်။ပ္ဍဲကဵုထီုဖါဗြ ကွာန်မာပြၚ်(ထီုတအ်ဂှ်) ဒှ်ဒၞာဲအာစာကဝိမန် ချူကှ်ေခၞံပြကိုဟ် ဂၠိုၚ်ကဵုသၞာံရ။စိုပ်ပယာံ ဍုၚ်ကွာန်ၜိုဟ်သြိုဟ် ဂွံဖျေံစိုတ်တုဲ ကလေၚ်စဴကၠုၚ် သီုလိက်ပတ်သီုကောန်ကွးဂမၠိုၚ်ရ။ လုပ်ဇူတန်တဴ ပ္ဍဲကွာန်ဆက်တိတ်,ကွာန်အခေါန်ထဝ်,ပွိုၚ်ဍုၚ်ဍာ်ဂအုဟ်,တွဵုရးဍုၚ်ဗဂေါ ဒၞာဲဘာနွံဂှ်ရ(တၚ်ဏှ်ရာဇာဝၚ်မန်)။ ဃောတန်တဴမံၚ်ပ္ဍဲဘာဝွံ ဖျေံလိက်ကဵုကောန်ကွး ခမဳသာမဏဳကွးဘာ ချူကှ်ေခၞံပြကိုဟ်နာနာသာ်တုဲ ပတိုန်စိုတ်ဓါတ်ကဵု ကောန်ဂကူမန်လအ် လိက်ပေၚ်တိုၚ်ပေၚ်နဟွံက ကဵုကၟိုဟကဇွောဝ်တိတ်နူ ဂၠံစိုတ်ဟဒယဝတ္ထုရုပဟလေဝ် ကဵုကၟိုဟ်တိတ်ရ။
ဗွဲကြဴ အာစာကဵုကွးကလေၚ်စဴ ဍုၚ်ကွာန်ဌာန်မိမဇကုတန်တဴ ပ္ဍဲကွာန်အစွောံ ဒကာဘာဇၞော်မၞုံ ယၟုနာဲသၟိၚ်ၜိုပ်ထဝ်သိုၚ်လဝ် ဘာဇၞော်ဘာတြေံကၠာတေံ ကဵုလဝ်အပိုၚ်တုဲ ဖျေံဇၞူတၟိပၠန်ရ။ စိုပ်ကၠုၚ်ဘာဇကု ဟွံသက်ဂတာပ်လအ် ကလေၚ်ဖျေံလိက်ကဵုကောန်ကွး ဗ္တောန်လိက်ကဵုကောန်ဍုၚ်ကွာန် ချူခၞံပြကိုဟ်ဂမၠိုၚ် ဂၠိုၚ်ကဵုကၞပ် ကြပ်စိုပ်အာစာသၠပတ်မန် မှာထေရ်ဗုဒ္ဓဃောသာရ။ ပ္ဍဲခေတ်တေံဂှ် အလုံဂကူမန်အိုသီု ဒးကတ်ဗ္တောန်လိက်လောကသိဒ္ဓိ ကၠာအိုတ်ရ။ သက္ကရာဇ်ဍုၚ်မွဲလ္ၚီကၠံၜါ(၁၁၀၂)သၞာံ ဂိတုမာ်ပိမံက် တ္ၚဲဗြဗတိဂွံဝှ် ၜါစှော်မွဲ(၂၁)ဝှ်ဂှ် ချူကှ်ေခၞံလဝ် ပြကိုဟ်လောကသိဒ္ဓိ ပ္ဍဲဘာသၟိၚ်နာဲၜိုပ်ထဝ်ရောၚ်။
ပ္ဍဲအခိၚ်အာစာအစွောံ ချူကှ်ေပြကိုဟ်လောကသိဒ္ဓိဂှ် ဒှ်အခိၚ်ဗၟာအဝ သာကတံၚ်ကတဴ ဍုၚ်ဗဂေါရ။ဟိုတ်နူဂကူမန်တအ် ညဳသၟဟ်ဒှ်မွဲ ဒုၚ်ဍဵုဍိက်ဗၟာဟွံမာန်စိ သၞာံဂၠတိ(၁၇၄၁)သၞာံ၊ ဍုၚ်(၁၁၀၂)သၞာံ ဂိတုသွန်မွဲမံက်(ခ္ဍဲသဳမွဲမံက်) ဗော်ပၠန်ဂတမန်တအ် ဂစိုတ်ထောံက္ဍိုပ်ဂရံၚ်နာဲသာအံၚ်ရ။ ပိုၚ်လဝ်ဂကူမန်တအ် ဂွံမွဲဂိတုလပါ် မွဲဂစုန်ကၠဵုတုဲ ဒးချိုတ်အာ နကဵုကမ်ဗတိုက်ကမ်ပရိုက်ရ။အခိၚ်ဟွံညိၚ်ဝတ်ကဵုညိၚ်ဝတ် ပြိုၚ်ပကာန်မံၚ် ဂၠိုၚ်ကဵုသၞာံတုဲ စိုပ်ကၠုၚ်ခေတ် ဨကရာဇ်ပၞာန်ဓဇန်စှ် ဗၟာအံၚ်ဇေယျ ဍုၚ်လၟ ဍုၚ်ဗြဴကၟာ ပံက်လဝ်ဒပ်သရာဲပၞာန်ကၠာတဲ ၜိုတ်ထပှ်စှော်ရ။နူဂှ်ဂၠိုၚ်ကဵုကိုဋ်အသၚ်ဃဲ စှ်ေဗတိုက်ပၠံၚ်ကေတ် တိဍာ်ဍုၚ်မန်အိုတ်အးရ။ လုပ်သဳဂွံ ဍုၚ်ကွာန်မန်မွဲမွဲဒၞာဲတှ်ေ **စံၚ်,ဂစိုတ်,ပလီု " သ္ပလဝ်စေဝ်ပၞောန် မုက်ပၞာန်ဇၞော်အိုတ်ရ။ ပဲါနူပလီုဘာကျာ်ဒှ်တမ် ပလီုဘဝသၟတ်ဗြဴမန်တအ် သ္ပကောန်ဗြဴဗွဲအနိုၚ်အထက်တုဲ ပန်ဗာ်ထပက်ဂစိုတ်ရ။ ဓဇန်လ္တူ ၝက္ဍိုပ်ပရံၚ်ဏအ်ဟၟဲရ ကဠောတအ်။ ဂစိုတ်ထောံ ခမဳသၚ်မန်ဂကူမန် အနန္တအနန္တံချိုတ်အာစှ်ေမံၚ် ပ္ဍဲဍုၚ်နရက်အဝိက်တေံဖအိုတ်ရ။ အာစာစွောံချူခၞံ ပြကိုဟ်လောကသိဒ္ဓိဂွံစှ်ထပှ်သၞာံတုဲ သက္ကရာဇ်ကျာ်(၂၃၀၁)သၞာံ၊ သက္ကရာဇ်ဍုၚ်(၁၁၁၉)သၞာံ၊ ပယာံဗြဲကဵုဍာ် ဂိတုပသာ်ဒ္စာံစွေက်,တ္ၚဲသိုက် က္ဍိုပ်ပရံၚ်အံၚ်ဇေယျဇက်လုပ်သဳဂွံ ဍုၚ်ဗဂေါဟံသာဝတဳ(ဖအိုတ်၉၆ဍုၚ်) နကဵုဒပ်ပၞာန်တိုက် စံၚ်ဂစိုတ်ပလီုဒှ်ပတေၚ်ချး ဆီဒှ်ၜဳဂၚ်ကေတ်အရီုဗၚ်ဟွံဂွံရ။ မန်တအ်ဒးဂြိပ်ဒဴ ဍုၚ်သေံဇၚ်မာဲဒျူဒျာဂၠိုၚ်ကဵုသၚ်ဃဲရ။ ကျာ်ဇၞော်အစွောံပိုယ်ကဵု ဨကရာဇ်ပၞာန်ဒးဂါန်ဒးဂၠဟ် ဒးလုပ်ပေဲါဗတိုက် နကဵုပါၚ်ဗွဲမဂံၚ်သကာရ။နကဵုအသံအဏာဍေံ ရပ်ပြိုက်ကြိုၚ်စုတ် ပ္ဍဲသ္ၚိဓါတ်ကၟာတ်ထောစၞစသုၚ်ကဵု ဒုၚ်ယျံက်ထောံက္ၜၚ်ရ။
အသံဨကရာဇ်ပၞာန်ဗၟာ စကာဏာဗၠာဲသၟိၚ် ကဵုစၟဳစၟတ်ပ္ဍဲသ္ၚိစာတ်ရ။ **ယဝ်ပိုယ်ဗလးတိတ်နူ သ္ၚိစာတ်ဏအ်တုဲ ကလေၚ်ချူလိက်မန်ဏီဟာ?ဟွံချူဟာဂှ် ဒုၚ်ကတိပါၚ်ညိ။ ဂံၚ်ဒုၚ်ကတိပါၚ် ပိုတ်ပိုတ်သကုတ်ဟာ?ကှ်ေဗီုလဵုဟီုရော?" အာစာကဝိမန်စွံလဝ် မုက်မတ်မ္ၚိုဟ်မ္ၚိုဟ်ကြံၚ်ကြံၚ် ဂံၚ်ဂံၚ်သကာတုဲ ဟီုပ္တိတ်ဏာသာ်ဏအ်ရ။
**ဟာဲအဒိုဟ်ဂၠိုက်တအ် ဗှ်ေတအ်ဗလးတှ်ေအဲဗလး ဗှ်ေတအ်ဂစိုတ်တှ်ေအဲချိုတ် ဗီုဗှ်ေတအ်ဟီုဂှ် အဲဗက်ဟွံမာန် ချူလိက်မန်ဂှ် ဒဵုကဵုလမျီုအိုတ်ရ အဲညးဒုၚ်ကယျံက် ထံက်က္ၜံၚ်ကဵုဗှ်ေတအ်ဟွံသေၚ် "ကလေၚ်အရေဝ်ဗွဲမဂံၚ်သကာ ညးၜါဟွံမွဲတုဲ အိက်ကၟာတ်တအ်ဂှ် ကလေၚ်စဴအာလ္ၚောဝ်ပတီ သတ်နရက်ပၠန်ရ။ နနဲသာ်ဝွံကြံၚ်ကြံၚ်မွဲကလတ် ၜတ်ၜတ်ဂှ်မွဲန ဘပလစမြဗဟေက်ကဵုဖေက်ဂၟံက် နာနာသာ်ကီုလေဝ် အာစာကဝိမန် စိုတ်ဓါတ်ဟွံစှ်ေ ဟွံဖျေံမိဂ္ဂးတုဲ ဗွဲကြဴဗလးဗတိတ်ဏာ ကဵုစဴအာရ။
ကောန်ကွး ခမဳသာမဏဳ ဒကာဇၞော်ဍောတ်ဂကူဂမၠိုၚ်မိၚ် ပရိုၚ်အာစာဇကုစိုပ်ကၠုၚ်ဘာ ဂွံညာတ်ဂွံဆဵုဗဵုလ္ၚောဝ်ကြပ်ကြပ်တုဲ မိပ်စိုတ်ကွေံကွေံကီုရ။ ဆဂးဂှ် ၝသတ်နရက်တအ်ဂှ် ဍေံမံၚ်ကလၚ်မံၚ်ပရိုၚ် ချူလိက်မန် ဂယိုၚ်ပ္တိုန်လမျီုဂကူမန်ဏောၚ် ဂးသာ်ဂှ်တုဲ ဖျေံသံကဵုကုတ်ဗပိုတ်ထောံ လပှော်တဲၝောံတဲ သီုပန်တၞုၚ်ရ။ကာလဂှ် **အဲဒုၚ်ကုတ်ရၝတအ်၊ တဲအဲပိုတ်အာသီုၜါကီုလေဝ် စိုတ်ဓါတ်အဲဟွံပိုတ်၊ ဆီတသိုက်ဓဇူစှ်ေ တော်တော်ဖေါ်ဖေါ် ဟဳဟဳပၠဳပၠဳပၠေတ်ပၠေတ် ဗကေတ်ဗကေတ်ဍာဲဍာဲ ဒၞာဲဏအ်ကီုလေဝ် စိုတ်အဲဟွံချဳဒရိုက်၊ ဒဒိုက်တၟာဏအ်အဲဂံၚ်ဒုၚ်၊ ဂွံကၠုၚ်ဝၚ်ဆာန်ဂကူအဲ၊ ဆာန်လိက်ပတ်ဂကူအဲ၊ အဲပူဇဴသွက်ဂကူမန်အဲရောၚ်ဂှ် ၝတအ်,သပစၟတ်သမ္တီလဝ်ဗိုန်ဗိုန်ညိ"
**ဂံၚ်ဒုၚ်ဂစိုတ်လမျီု ဟွံဂိုဟ်ဂြိုဟ်ကွေံကွေံရ'အာစာကဝိမန်။ လမျီုဒုၚ်ဖအိုတ် သတ်နရက်တအ် ဂစိုတ်ထောံကီုလေဝ် စိုတ်ဂကူကဵု ဆာန်လိက်ပတ်မန်ဂှ် ဂစိုတ်ဟွံချိုတ်ဟေၚ်ရ။ ကာလဂှ် သတ်နရက်တအ် ကုတ်ထပိုတ် ၝောံတဲၜါတၞုၚ်ကီုလပုဟ်တဲ ပိုတ်ထုတ်အာရ။ ကိစ္စတုဲဂှ် ကလေၚ်စဴလ္ၚောဝ်ပ္တီ သတ်နရက်အဝိက် ပေၚ်အာပၟိက်စိုတ်ဍေံရ။ ကောန်ကွးကဵုဒကာဂမၠိုၚ် ညာတ်ဒဒိုက်ကျာ်ဇၞော် မုက္ခဝါအေဲဇြ နရိုအ်ယာံဇွောဝ်ဍာ်ရမတ်တုဲ **ယွံကောန်ကွးတအ် ဒကာတအ် လ္ပဒှ်ဒဒိုက်စိုတ်ညိ၊ချူလိက်ဟွံဂွံကီုလေဝ် ၜိုတ်လၟံက်ပိဏ္ဍာပါတ် ဂွံမံၚ်ဏီရ "ဆီဇွောဝ်ပေၚ်ကၞီ ဂစာန်ကွဳပူဒက်စုတ်ဂဥုဲတုဲ ပၚ်တဲကလအ်အာစာ ဗွဲမသိၚ်သာအိုတ်ရ။
**ကောန်ကွးတအ် အဲကွာ်စၚ်ကြံၚ်တုဲအဲဟီု အဲရံၚ်လိက်တမ်မူလတုဲအဲဟီု ချူကှ်ေဗက်ဏး" **ယွံ…ယွံကျာ်ဟီု အဲဍိက်ချူတုဲ ကဵုကျာ်ဇၞော် ဗှ်ပကိတ်ပၠန်ရကျာ်"ဂွံအခိၚ်ထတ်တိုန်တုဲ အာစာစွောံကွာ်စၚ်ကြံၚ် ဟွံရံၚ်လိက်ဟီုထ္ၜး သိုက်သိုက်ရ။တဲညး ရပ်လိက်ဂွံကီုလေဝ် ၝောံတဲကဵုလပုဟ်တဲပိုတ်အာတုဲ ချူလိက်ဟွံဂွံရ။ချူလိက်တုဲ,တုဲတအ်ဂှ် အာစာကဝိမန် ဗှ်ရံၚ်အိုတ်အိုတ်အးအးရ။ ဒၞာဲယောၚ်ထပ်ပလေဝ် ဒၞာဲလောန်ၜက်အာနုက်ဖျေံ **လောန်တှ်ေဍေက်၊ ဒေက်တှ်ေထပ်" ဗ္ဂပ်ကဵုဂလာန်ဂှ်တုဲ ကလေၚ်ချူခၞံပြကိုဟ် ကၟိုဟ်ကၟိုဟ်ပေၚ်ပေၚ်ရ။ဒၞာဲဒးပၞုက်ဂှ်ပၞုက် ဒၞာဲဒးလုက်မတ်ဂှ်လုက်၊ ရနုက်ဗပေၚ် ပညာပါရမဳဂကူ ဂယိုၚ်ပ္တိုန်လမျီုဂကူ တၟာဒဵုတၟာကးရသွံ။
ပ္ဍဲအခိၚ်ကျာ်ဇၞော်အစွောံ ဒးဒုၚ်ကုတ်ၝောံတဲ လပုဟ်တဲပိုတ်ထေက် ဒတုံစှ်ေဂတမုက် ကွးညးတအ်ဂှ် **တဲအဲပိုတ်ဆံၚ်ဍေံ က္ဍိုပ်အဲဟွံပိုတ် အဲဟွံချိုတ်ဏီရ၊ ကုတ်ကအ်ကရေက်ဗုၚ် ဂၠံက်ဂြိုက်ပ္တိတ်ကြုတ်ဟွံသေၚ်ဏီတုဲ လမျီုအဲဟွံအိုတ် မတ်အဲဟွံပၠိုတ်ဏီရ၊ နဲချူဂွံဂှ်အဲချူပၠန်ဏောၚ်" ဂးတုဲ သတ်နရက်တအ် ဒုၚ်ကျစိုတ်ဓါတ် ကျာ်ဇၞော်အစွောံကျေဝ်ကျေဝ်ရ။ ညးဆာန်ဍူသတ်နရက်တအ်ဂှ်တုဲ ဗကန်ဖျန်ဏာ သာ်ဏအ်ရ။ **ကမၠောန်ကမ်ခၞံလဝ် လ္တူခမဳသၚ်မန် ဂကူမန်ဂမၠိုၚ် ညးဗြဲမၞုံကဵုဂၠံဂဝ် ကောန်ၚာ်မဴမံၚ်တှ်ေ သတိက်လဝ်ပ္ဍဲခရေၚ် ညးတၠအာယုက်ဒုဟ်ဒန်ဟွံမွဲ ဂစိုတ်လဝ် စံၚ်ဂစိုတ်လဝ်ကဵုစိၚ်လိုန်ဂစိုတ်လေဝ်၊ ဗွဲဒုဟ်တၟာဒဵုသိန္နရာဇ် ဒါတ်တိဗၠးတှ်ေဗၠးအာရ နရက်အဝိက်ဟွံဗၠး ဒးစိန်ဂၠက်ဍာံဍာံဂှ် အဲဆာန်ဍူတၠဗှ်ေတအ်ကွေံကွေံရောၚ်" ဂးသာ်ဂှ်တုဲ စဴအာလ္ၚောဝ်ပ္တီဨကရာဇ်ပၞာန်ရ။
**ကပြိုၚ်ချိုတ်သီုနေၚ် ပြေၚ်ချိုတ်သီုဂြၚ်"ၝအဒိုဟ်ကွိုက်ဓဇန်စှ်ဏအ်ရ အာစာကဝိမန်ပိုယ်ဂလိုၚ်လဵု ဆာန်လိက်ပတ်မန် ဂလိုၚ်လဵုစိုတ်ဓါတ်ဆာန်ဂကူမန် ဆာန်ဍုၚ်မန်ရောဟီုဂှ် ချပ်ကေတ်ရကဠောတအ်။ပတန်လဝ်သာသနာ ပ္ဍဲတွဵုရးဍုၚ်မန် နကဵုသူရတ္တိ ဝိသာရဒဗျတ္တိ ကလိဂွံဝၚ်တၟေၚ်တၟဟ် စဵုကဵုကဝ်တဴကဝ်တန်တေံရ။ လပါ် ပရေၚ်သာသနာဂန္တာဓူရ ပရေၚ်ဓဝ်လောကုတ္တဵုမဂ်ဖဵုနိဗ္ဗာန် ဝိပဿနာဓူရ နုက်ဗပေၚ်လဝ်စဵုကဵုစဴသွဝ်တေံရောၚ်။
ဟိုတ်ဂှ်ရ ဂုဏ်ကြဳဇှ်လွဳပရာ အာစာကဝိမန်လောန်စဴအာဗၞတ် ဒဒိုက်ဇကုဂှ်ဟွံရၚ်သ္ၚဳ၊ ဒဒိုက်လိက်ပတ်မန် ဒးဟဳဒးလေၚ်ဒးကၠက်အာဂှ် ဆက်မၠာ်ကျောဝ်ဂၠးဒ္ၚောဝ်ဂှ် တုပ်သၟဟ်ကဵုဂမြၚ်ညာဏ်၊ဂစာန်ချူလဝ်ပြကိုဟ်လိက်ပတ်မန် သွက်ကောန်ဂကူမန်ပိုယ် ပစ္စုပ္ပန်ကဵုအနာဂတ် လၜံၚ်ခ္ဍတ်လဝ် စဵုကဵုလၟုဟ်၊နူသၞာံဂှ်ဒှ်ခမဳ(၁၀၈၀)တေံ စိုပ် (၁၃၆၈)သၞာံ၊ လုကဴပွိုၚ်ၜါကၠံဒ္စာံစှော်သၞာံ အာယုက်ချူကှ်ေခၞံလဝ် ပြကိုဟ်လိက်ပတ်ပိဋကတ်နာနာ နူသၞာံဂှ် ဝၚ်ကျာ်ဇၞော်အာစာအစွောံစွံလဝ် ပ္ဍဲသၠရိုတ်တာ သွက်ဂကူမန်ပိုယ်တုဲ ဝိုတ်တၠိၚ်ထောံ ဂုဏ်ညးဟွံခိုဟ်တုဲ ဒးကၠိုဟ်ပရူဒဒှ်လွဳမဇၞော် ကော်ခဴစ ပူဂိုဟ်မဂံၚ်သကာခမဳအာဇနဲ ဟွံမွဲကဵုၜတ်ကၞာတ် ကဵုညာတ်သတ္တိဗျတ္တိညးအိုတ်ညိ။ ။
✍ကျာ်ဇၞော်အစာပါလိတ✍]]
(ကၟာဝက်)
